"إلا أن يشاء الله"

المقدمه⚘

✒...
"كل أمر الله عدل..وهو تكريم وفضل
كم يأسنا من أمور..خيرها فينا يجل
قالها من هو أدرى...إن بعد العسر يسرا"
🗝هادي كلمات لأغنيه دينيه "نشيد ديني" كانت جايباته احدي القنوات اللي دعاء تحب تتفرج عليها قبل لتمشي للكليه..
دعاء توا خاشه السمستر السادس في كلية الهندسه...
🌻🌻🌻
قبل لنخشوا ع السمستر السادس اللي كان في سنة 2009 هكي طول..
خل نعطي نبده عني وعن حياتي كلها ونحاول نختصر على قدمانقدر لأن حياتي قبل هالسنه كانت مليانه بالاحداث والمواقف
اولا اني اسمي دعاء محمد سالم..مواليد 90 اكبر وحده في خوتي وخواتي..
بعدي وحده مواليد 92 اسمها رويدا..
وبعدها وحده مواليد 94 اسمها مروة..
والصغيره بكل اسمها وفاق مواليد 96...
وعندي زوز خوت ولاد..
الكبير اسمه مؤيد مواليد 95
والصغير عمر مواليد 2006...
اممم..بوي اسمه محمد..يخدم فالدوله فالامن يعني...
وامي ربة بيت...واسمها جميله..
"دعااااء بوك يكلكس هيا"..
خدت دعاء شنطتها وناضت طول وطلعت تجري للباب..
لبست كندرتها ومشت طلعت من الحوش نزلت من الدروج اللي قدام الحوش..
ومشت للسيارة..شافت بوها يأشرلها بإيديه وهو معصب"بمعنى هيا وقت"..
دعاء..
هدا بابا من نهار عرفته وهو مستعجل تقول خايف الدنيا تهرب
وعاد ركبت من هني وسمعت الموشح الصباحي من هني..
"مفروض تكوني قبلي فالسياره..وتي روحك قبل الوقت بساعه..ماعندكمش احساس بالمسؤوليه..واااك قداش نعاني منكم"
المهم يقعد يدوي يدوي يدوي..لعند مايحطني حدا الكليه واني عندي راسي مولي زي الكورة من النفخ..
نزلت وبطريقي للكليه..
اني في السمستر هدا ناشطه هلبه وايجابيه وماشيه فقرايتي صح..منزله سبعه مواد واللي يعرف اني منزله سبعه يقعد يعيط كيف بتقديرهم انتي!!؟
واني هالسمستر نبي نثبت للكل اني نقدر ونص..
هو بصراحه في سبب قوي كان محفزني بقوة الفصل هدا...
"رشاد"...
🗝رشاد هدا معيد فالقسم اللي تقرا فيه دعاء..
شاب وسيم محترم شخصيته حلوه نص بنات الكليه معجبات بيه..وهو طبعا وكما يبان عليه ان ماعنداش احتكاك بالبنات الا في حدود الزماله او القرايه فقط..
دعاء..
رشاد حافظ كتاب الله وهادي اكتر ميزة عجبتني فيه..
بصدق وصراحه اني ماكنتش منتبهتله الا لما تخصصت فالقسم اللي هو فيه لما شفته انصدمت وين كان مدرق!؟
بس هاه اني انسانه رزينه هلبه ومش مرعوشه صح معجبه بيه هلبه لكن عمري مابينتله ومش عارفه علاش حاسه من نظراته ليا انه وكأنه يعني معجب حتى هو..
🗝خشت للقسم ولقاته في اخر الممر واقف على واحد من صحابه لما جت شافها قعد يشبحلها وهي لما شافلها غيرت عيونها عنه ولاكأنه موجود وفاتت من حداهم وكملت للقاعه وهو يشوفلها...
دعاء..
بصدق مش عارفه اذا كان هو فعلا مبادلني نفس الشعور ولاغير اني نتوهم وخلاص...
تنهدت وكملت تقول..الحق نتمناه يكون "نصيبي"..
⚘⚘⚘⚘
النصيب يادعاء النصيب ماحد عارفه وين مرات تتمني شي من كل قلبك وتدعي ليل نهار ربي ينولهولك لكن تنصدمي بالواقع لما تلقيه مشي لغيرك..
عندها بس لازم تذكري ان ربي هو اللي قدر هالتقدير معناها فيها خيرة..
والله يفعل مايشاء...
المهم..
كملت دعاء يومها في كليتها وودعت صاحبتها وين جت طالعه لقت بوها قدام الكليه وهي تجري مشتله ركبت السيارة وتحرك طول..
دعاء..
حني ماديا حالتنا عاديه يوم فوق ويوم لوطا الحمد لله عايشين..
يعني حوشنا ارضي وملك..صح مش مفرش بأثاث فخم ولافيه تحف غاليه بس ع قد الحال نحاولوا نخلوه حويش قنين..
بوي سيارته قديمه هلبه عمرها قريب 15 عام مرشها القدامي مشقوق مرايات جانبيات مافيهاش ومن داخل حالتها اسوء اصلا الباب اللي نفتح فيه بش نركب قريب يطيح..
الحمد لله على كل حال في غيرنا حالهم مازال اسوا من هكي..
🗝وصلوا للحوش...نزلت ونزلت معاها شكارة خبزة وشكارتين فيهم خضرة خبزة وطماطم..
ومشت جري ركبت الدروج وحولت كندرتها..
شبحتلها لاحظت انها قريب تتمزق اضايقت هلبه..
وخشت للحوش..
دعاء..
ماكنتش قنوعه هكي زمان ايام الثانوي كنت متحشمه من كل شي لبسي سيارتنا شنطتي..كل شي
قريب ركبتني حاله نفسيه وقتها كنت مصاحبه بنات مادياتهم فوق نشوف شن عندهم ونتحسر ونقعد الليل كله واني نبكي
بس بعدين صارت حاجات غيرت نظرتي تماما وخلتني نتعلم نرضى بالمقسوم..
🗝خشت الكوجينه وقالت..
دعاء:السلام عليكم..
جميله"امها": وعليكم السلام..غداك مغطي ع الدولاب..
وطلعت من حداها
حطت الشكاير ع الطاوله ..ومشت تشوف الصونيه حولت المغطى لقت الغدي رز وفيه طرف دبوس دجاجه..
دعاء..
قداش كنت نفرح بحركات ماما هادي..
ماما ماكانتش تعبر عن حبها لينا بالكلام هلبه غالبا الافعال..
ع فكره اني وياها غالبا مانتفقوش ديما مختلفات..
وحتى مع بابا..وحتى مع خواتي..
هههههه..اني انسانه صعبه شويه..امي تقول هالبنت عاصيه..
بمعنى صعبه هلبه..
الله غالب اني هكي..بس نحاول على قد مانقدر نكون لينه ونعرف نتفاهم معاهم..
مشت خشيت الدار لقيت اختي "رويدا" شاده تركينه وتتكلم بالتليفون..
تكلم في صاحبها ولد عمي..
رويدا الوحيده فينا العوجه شويه ماتخافش بكل..
علاقتها بولد عمي بدت من السنه اللي فاتت اول ماخشت التانوي..
وحتى هو عيل زيها..مش عارفه شن عاجبها فيه يدره الكبد هو وامه اللي ماما تكرهها فالدم والله لو تندري عليها تفرمها فرم...
صكرت الباب بش نبدل حوايجي..ونحاول مانسمعش شن تقوله..
هو مش كلام خارج التغطيه..بس حبيبي ماحبيبي ودراه كبد زايد..
بعد بدلت فتحت الباب وطلعت على خشة مروة اللي وين شافتها دفلت عليها بهمس..
ورويدا ولامدورة...
🗝خشت دعاء للحمام..شويه وطلعت وخدت الملايه متاع الصلاه ومشت للصاله صلت..
وبعد كملت طلعت منها حولت الملايه وخشت الكوجينه لقت بوها واخد صفرة غداه وطالع من الكوجينه..
وهي خدت صونيتها وصفره وكاشيك وقعمزت ع كرسي النايلوا  وطاحت في الصونيه تاكل بشراهه..
دعاء..
كنت نقعد ع طرف بريوشه نجيب فيه من الحوش من الصبح للساعه 2..ومرات ا4..
ماكلة الكافتيريا غاليه مانقدرش عليها...
المهم..
بالنسبه لموضوع العلاقات..اني مش ملايكه ولايصلوا على طرفي راهو..
من الصف الاول واني بنت نكره نختلط بالولاد..
زمان لما كنت نشوف بنت مع ولد نقول"حيي يااااما حيي صايعه ضايعه" اصلا لما نشوف بنت لابسه مشحط كنت نقول عليها هكي..
المهم كبرت واني هكي وين نشوف جنس ذكر يصكني الضي..
والحمد لله المدارس اللي قريت فيهم في الابتدائي والاعدادي مدارس بنات..
لعند ماخشيت تالته اعدادي..
نذكر وقتها في ولد عنده ظرف خاص مايقدرش يقرا في مدارس الولاد عادي..كان يده اليمين مبتورة..وماباش يخش مدارس معاقين الحق مانعرفش علاش..
المهم قري معانا..
وكان الولد في وسط شعب بنات..
وحنى وقتها في بدايه سن المراهقه..
المدرسه كلها حباته من طرف واحد..عاد الراجل الوحيد بيناتنا..
يعني تخيلت الكرة الارضيه لو ماقعدش فيها كان راجل واحد ناري عليه مسكين ههههه..
المهم الوليد هدا كان يصادق في زميلاته لكن جو الحب ماحب لا..
والله..وسبحانه...من بد بنات المدرسه كلهم ماعجباته وحده غيري..
انصدمت لما عرفت..جوني البنات بيها يجروا لما سمعوه يقول فيها لوحده من صديقاته..اني نحب دعاء..
تصدقوا خفت من البنات اللي يحبوه وقتها...ههههه..
طبعا انتشر الخبر وكرهوني نص بنات المدرسه..
ماعلينا توا ايام وعدت ع حالها كنا صغار وعقولنا كانت خفيفه..
الحق برغم اني ماعبرتاش بس حسيت بشعور حلو لما عرفت ان في حد معجب بيا..
تنهدت وكملت تقول..
ونجحت في الشهادة الاعداديه وخشيت الثانوي وجت كبتي في مدرسة مختلطه اشكال والوان ولاد وبنات عالم تاني..
وغادي بديت افكاري تتلخبط هلبه..
تعرضت لمضايقات وكنت نطنش..
لكن مع الاسف فواحد قعد فجرتي لين خلاني نميله..
ومع الأسف درت اني وياه علاقه..تكلمنا مع بعض مرتين والمدرسه كلها انصدمت فيا..
لما كنت نسمع فكلامه نفرح عاد بالذات وهو قنين هلبه الحق عيونه بروحهم يخوخموا..
لكن ربايتي الكويسه ماخلتنيش نكمل مشيت طول لماما وحكيتلها..
انفعلت هلبه ومع هدا نصحتني وقالت..
"مش انتي يادعاء اللي ديري هكي مش هكي ربيناك يابنتي"
وحق ربي كرهت روحي وقتها وسيبته طول..
وهو قريب مات لما فته مش حبا فيا لا بل كيف انتي اللي تسيبي!؟
ومشي طول دار وحده تانيه بيغيضني بيها لكن ماعبرتاش صكرت هالباب بكل..
نذكر في ثاني ثانوي ولد بعتلي رساله مع اخته.
قريتها صح وكان كلامه ليا حلو..بس بعدين مزقتها ولوحتها..
اااخ..
وطلعنا من سريب العلاقات للبنات اللي بدوا ينخطبوا لما خشيت ثالثه تانوي..قداش وحده انخبطت ودارت بيان..
وقداش تسهفت وكان خاطري ننخطب زيهم ويجيني بيان حتى اني..
واااك قداش تفكيري كان عببيييييط هلبه..
ومن كثر ماانشغلت بهالموضوع رسبت في امتحان الشهاده الثانويه وكانت هادي اول مرة نرسب فيها قريب هبلت وقتها..
المهم درت امتحان الدور التاني ونجحت وجبت جيدجدا وخشيت هندسه كان  يدخل التقدير هدا هندسه..
المهم..
طلعت من دوامة التفكير فالخطبه..لدوامة التفكير في الجامعه مش عارفه علاش كنت نفكر انها عالم مخيف تقول بنهاجر مش بنقرا في الجامعه..
 وممكن نصائح الناس حواليا زادت خوفتني..
وخشيت الجامعه  وتعرفت ع البنات الخوف تحول كله..
اول سمسترات كنت واخدتها هياجه كنت نصفي ونخلي ولما حصلت انذار قريب متت..
حي عليا كان فصلوني!!
رجعلي عقلي وشديت فقرايتي وقعدت نصفي صح مش هداكا المعدل لكن المهم اني كنت نصفي فيهم كلهم.
لعند ماوصلت للسمستر السادس..
عاطفيا مافي حد لفتني كان اغلبهم "شعابيط" ولافي حد بعتلي لأني كنت نمشي ونفنص فالكليه..ههههههه..
🗝كملت غداها وغسلت ماعينها ومشت طلعت من الكوجينه للدار خشت لقت اختها رويدا تقرا..
قعمزت وقالت بهزوه:شن جو رهيما..
رويدا بدلع مصطنع:خييير من جوووك..
دعاء ضحكت وقتلها :طيح سعدك..
رويدا؛سعدك انتي..
دعاء بضحكه؛اكثر من هكي!
سكتت رويدا ولهت بقرايتها..
تنهدت دعاء وقالت:كندرتي بتتمزق خلاص..
رويدا وهي تكتب:خودي متاعي كان جت عليك رجليك زي الكرنافه انتي..
دعاء؛حيوانه مانبي منك شي..
ع خشة مروة بكتاباتها قالت:وقتها هادي توا..
دعاء ورويدا شبحولها وقالوا:منو!!؟
مروة قعمزت وقالت بعصبيه:عمتكم شرقيه..
رويدا ودعاء:وووووووه وووهين وووواك..
دعاء..
عمتي شرقيه اخت بوي اصغر وحده ومش متزوجه وعمرها 34 مكرهتنا فعيشتنا كانت اعوذ بالله منها...
♦️♦️♦️♦️♦️♦️♦️♦️♦️♦️♦️♦️♦️
ومن عالم دعاء نطلعوا..ونمشوا لعالم مختلف تاني فالوجه التاني من العاصمه طرابلس..
حي راقي جدا..كل سكانه من الناس المرتاحه ماديا...
من ضمنهم عيلة الشاب اللي درس سيارته الفارهه في قراج الفيلا متاعهم ولاخل نقولوا قصر..
فخامته من برا تذهل العيون..
نزل من السيارة وطلع من القراج وهو يغني..
"موعود بعيونك انا موعود.."
وصل فباب الفيلا فتحه وخش للحوش وصكر الباب..
وياعليك حوش هو من داخل شي لايصدق فخامه لاتوصف..
تنشاف فالتلفزيون بس..
وين جي بيمشي للدروج يركب شاف وحده من الخدم..
جمال:شن جو..
الخدامه بإبتسامه:تمام..
جمال ابتسم وقال:امي فالمطبخ بروحها؟.
الخدامه:ايه هي اللي لزتني ياسيدي قات خاطري نطيب بروحي..
ضحك..ونزل من الدرجه اللي ركبها ومشي للمطبخ..
خشله وعاد المطبخ اكبر من صالة حوش دعاء اللي يستقبلوا فيها الضيوف..
جمال:امي..
امه"صابرين":جيمو..
قرب باسها من خدها وقال:شن ديري؟
صابرين:شن تشم؟.
جمال بضحكه:كسكسي بالحوت..
صابرين بضحكه؛قريب يطيب ونسقي برا بدل وصل انزل بسرعه..
جمال قعد يمشي وهو يوخر قال:اوكي..
ولف وطلع للكوجينه ومشي للدروج وركب..
ووين وصل فداره قعد يغني..
قلبي ومفتاحو..دول ملك ايديك...
خش داره..
ورن تليفونه..
شافت المتصل ضحك وفتح الخط ورد:بمساه وصباحو يسألني عليك..قلبي ومفتاحو ومفتاحو دول ملك ايديييك.
"ههههههههه"
جمال بإبتسامه:يدومها ياعمري..
"حبيبتي انت..روحت؟".
جمال:ايه توا كيف خشيت داري..
"باهي عمري بنقولك البنات كلموني وقالوا بيمشوا العشيه ل***** نشربوا قهوة ونهدرزوا..نمشي؟"
جمال حك حاجبه وقال؛اهم شي ماتعطلوش قبل المغرب تطلعوا منال..
منال :تعال انت روح بيا شن رايك..
جمال:هههااه من غير تقولي..
منال بضحكه؛عارفه حتى اني قلتها بلعاني زعميتها جت مني...
جمال ضحك بعدين قال:باهي قولي ماتبي شي؟
منال:لالا حبيبي سلامتك بس بس..سلملي ع عمتي صابرين..
جمال:تعبي روحك واتصلي بيها وهدرزي مش لازم تجيها..
منال:عندك حق حبيبي اني مقصرة هلبه..حاضر ولايهمك
جمال:تمام بري توا وراي كسكسي بالحوت..
منال:هههههه..باهي صحتين...باي..
جمال:في امان الله..
صكرت هي قبل..
وهو حط تليفونه ع الزيانه وصكر باب الدار..
💎جمال عبدالقادر..
عمر 30 سنه..طبيب عيون..االكبير ع 4بنات وكلهم متزوجات..بوه متوفي ليه تلاته سنين وهو مسك عنه معارضه ومحلاته وشركة استيراد وتصدير فالخارج وعندهم زوز مطاعم كبار مشهورات.
تحمل مسؤوليتهم بروحه..سيب مهنته غصب عنه وانخرط فالتجارة وتعلم كل شي بسرعه..
منال هادي تكون خطيبته تعرف عليها صدفه في حوش اخته الكبيره تكون بنت سلفها عجباته هلبه وخطبها وليهم توا عامين خاطبين يراجي فيها تكمل قرايه تقرا طب بشري حتى هي....
◇◇◇◇◇◇◇
وهادي المقدمه وبإذن الله الاجزاء القادمه تحمل العديد من الاحداث..
ردوا بالكم تستعجلوا في الحكم القصه مش تقليديه ومش مستهلكه..مختلفه تماما.....