"إلا أن يشاء الله"

الجزء الخامس عشر

✒..
مايو 2015
كلية الهندسه..
في الباحه..
" الحلمه هادي قديمه حلمتها بأختي قبل تنخطب ف2013 ونحسابها تفسرت بعد انخطبت لكن لما فسخت حسيت ان مش هدا تفسيرها...المهم..حلمت بيها مقعمزة في الدار وطالعه هكي حلوة هلبه كأنها عروسه يحنولها في ايديها ورجليها تسعه نساوين اني كنت مستغربه هلبه يعني 9نساوين يحنوا وحده بس هلبه لكن هي كانت زي الفرحانه..
"ايه هدا هو شن تفسيره قوليلي؟!"
:قبل نفسره بنسألك اختك توا متربطه..مخطوبه؟
:لالالالا
:اممم..ع حسب ماحكيتي..والله اعلم اختك هادي بيجيها نصيب ماشاء الله الناس تحلم بيه حلم..نصيب غالي..ذهب...وبتعيش متهنيه معاه..
ورقم تسعه في الحلم والله اعلم يدل على انه هالنصيب يابيجيها فشهر 9..يابعد 9شهور..يابعد9سنين.."
عقدت رويدا حواجبها وهي تقول:يعني لو فسرت الحلم من هداكا الوقت شهر 9 فات..ومن هديكا السنه مر قريب عامين يعني مش بعد 9شهور..فنصت عيونها وقالت..يعني بعد 9سنوات!!؟
صاحبتها نرجس:الله اعلم هدا علمي بالتفسير وزي ماتعرفي ان بوي وامي يفسروا في الاحلام واني واخداته منهم مش دوة وخلاص يارويدا حتى انشدي عليا..
رويدا:لاعارفتك عارفه..لكن قصدي لو اختي بعد..ضيقت عيونها وقالت..بعد 4سنين من توا حتتزوج معناها حطول هلبه..
نرجس:كله ليه مقدر بوقته يارويدا مش حيجيها نصيبها لو ربي كاتبلها نصيب الا في وقته المناسب...
رويدا تنهدت وهي تفكر وقالت:إن شاء الله خير...
..........
في الحوش..
"نهار ابيض !!"
رويدا:هو في النهاية تفسير حلم مش قرآن ياماما مش مزبوط ميه في الميه..
جميله:ان شاء الله يارب نصيبها قريب يجي..
رويدا:يارب..خير من قعدتها كئيبة هكي فالحوش..
جميله بضيق:مش عارفه خيرها هالبنت من دونكم حياتها كلها وقفت لامن قرايه ولامن زواج ولامن شي..
رويدا بحزن:هي دارتها في روحها ياماما..
جميله:ايه صح كان قوت روحها زيكم انتي واختك راهي اقل شي كملت قرايتها وخدمت ماقعدتش هكي..
رويدا بحزن:الله غالب..
شبحتلها جميله وقالت:امتى تكملي امتحاناتك؟
رويدا:اخر شهر 6..
جميله:اممم..معناها لرمضان؟
رويدا:إيه..علاش؟!
جميله:لاشي نسأل هكي وخلاص..
رويدا ناضت وهي تقول:مال خل نوض نقرالي كلمتين..
جميله:بري اقري بري..
ورويدا مشت طلعت من حداها..
اما جميله ناضت تعول ع العشي...
فالوقت اللي كانوا فيه كذلك مروة ووفاق ومؤيد يقروا..
وفاق خشت كلية الطب...ومؤيد ليه سمسترين يقرا في كلية الإقتصاد..
وكل حد فيهم يشق في طريقه لمستقبله..
ماعدا هي...
كانت مقعمزة قدام التلفزيون وخلاص شاغله نفسها بيه ياإما بالفيس واي شي يلهيها وخلاص..
دعاء حاليا حاسه بروحها محطمه ماعندها رغبه في أي شي ولاعندها هدف ولاطموح تسعاله..ولت انسانه فارغه تماما...
دعاء..
فقدت الرغبه في كل شي..انشغالي بشي واحد وتركيزي عليه هو بس وفشلي متوالي فيه هو اللي خلاني نحس اني انسانه خايبه مش حنفلح في شي..وهكي فقدت الرغبه في كل شي في كل شي ومعاش هامني شي...
⚘⚘⚘⚘⚘⚘
وعدت الأيام..
وجي رمضان..وعدى..
وجي العيد...وعدى...
وفي عطلة الصيف مشوا لحوازة جدهم من امهم زي ماتعودوا...
وهني انفتح موضوع رويدا..
في الكوجينه..
ريمه:تمام خلني اني نحكي معاها..
جميله:هكي احسن..
ريمه ابتسمت وقالت:باهي..وطلعت من حداهم..
جميله بقلق:يارب هالمرة تصيب يارب..
خواتها بأصوات متقطعه:إن شاء الله..
⚘ريمه وصلت للدار لقت رويدا مقعمزة مع خواتها يتفرجوا ع التلفزيون جت طول قعمزت حداها وقالت:شن جو يارويدا..
التفت دعاء وشبحتلهم..
رويدا بإبتسامه:تمام..
ريمه:نشدت امك قات مازالك المشروع بس..
رويدا:ايه 3مواد ومعاهم المشروع..
ريمه؛باين عليك شاطرة فيسع كملتيها الهندسه ماشاء الله عليك..
رويدا بإبتسامه:تسلمي.
ريمه:اممم..رودي كيف مايقولن خواتك..
ضحكوا البنات..
رويدا بضحكه:نعم..
ريمه؛احمم..انتي ماعندك حد..
البنات كلهم شبحولهم بإنتباه.
رويدا بإستغراب:كيف مافهمتش؟
ريمه بضحكه:يعني مافي عندك حد تبيه ويبيك وهكي يعني.
دعاء ابتسمت..
رويدا حركت راسها بالنفي وهي تضحك وتقول:لالا..
ريمه:اكيد يارويدا مانبيك تحشمي منه ماسألتك نقصقص راني سألتك لحاجه ضروريه..
رويدا:لاوالله لا ماعندي حد..
ريمه ابتسمت وقامت تليفونها وقعدت تبربش فيه وهي تقول:مادام هكي قوليلي..شن رايك فالسمح هضا؟
ومدت التليفون لرويدا.
خداته رويدا وهي منحرجه ولما شافت الصورة قلبها دق بقوة..
شافت صورة شاب وسيم وانيق وشخصيته تبان حلوة..
ريمه:هضا خويا اللي بعدي على طول اسمه عبدالله مواليد 84..عايش في قبرص لأنه يخدم في السفاره غادي كان مترجم..وبعدها ولا مسؤول عن ملفات مهمه غادي..وغير هكي يخدم في التجاره بين قبرص وتركيا..وعنده محلات في بنغازي ومصراته وطرابلس..برغم ان ربي عاطينا لكن هو بني روحه بروحه بدون مايساعده باتي في قرش خاطي قرايته بس..
خوي محافظ ع دينه وعاداته غادي ومش نشكرلك فيه لانه خوي لكن والله اخلاقه ماشاء الله وناس واجد يعرفوه في طرابلس انشدوهم عنه واسمعوا شن يقولوا..
رويدا مدتلها التليفون وقالت:لكن اني نبي نكمل قرايتي..
خدت ريمه الهاتف وقالت:وهو والله ماعنده مشكله بكل تكملي اللي قعدتلك وبعدين تزوجوا توا خطوبه بس..هاه شن تقولي؟
شبحت رويدا لخواتها..
التلاته كانوا يشبحولها بإبتسامه ونظره خلتها ترد ع مرت خالها وتقول:عطيني وقت نفكر ونرد عليك.
ريمه:خودي وقتك من هنى لعند ماتروحوا..
ابتسمت رويدا بمجامله وقالت:باهي..
⚘ورويدا خلال هالفترة قعدت تفكر في الموضوع كويس وتستخير..وخواتها شجعوها عليه اللي هادي تقول
" ارتحنا للموضوع واحسن حاجه فيه انك حتعيشي برا"
وهالشي كان محمسها حتى هي...
وجي اخر يوم ليهم في الحوازة..
وهما يسلموا قبل ليطلعوا..
ريمه:هاه يارويدة شن قتي؟
رويدا ابتسمت وقالت:قلت ربي يقدم اللي فيه خير..
ريمه بفرحه:يعني موافقه؟
رويدا ضحكت وهزت راسها بإيجاب..
ريمه طول حضنتها وهي تقول:باهي باهي مبروك من توا عليك خويا وانتي مبروكه عليه..
وهي تضحك...واللي حواليهم يشوفولهم ويضحكوا...
دعاء..
وقتها كنا في شهر 8...
وبعد شهر بالزبط..يعني بعد 9 و10 ..
يعني في شهر 11 جو اهل يخطبوا رويدا رسمي..وتأخيرهم هدا كان بسبب وعكه صحيه مر بيها والد ريمه..وبعد شفائه جو من الرجاله خوت ريمه الزوز الكبار...
والنساوين..امه وخواته التلاته وكنه من كناينهم..
وحني حضرنا حناي..وشقشق..تحسابونا افتكينا منها هههههه..لالا قاعده حاشرة خشمها في كل صغيره وكبيره بس طبعا مش زي زمان..
⚘"ماشاء الله ماشاء الله ع اللي كركروه معاهم"
دعاء"الله يجيرنا من  عينك"
جميله بإبتسامه:والله احرجوني الحق شن هدا كله..
شرقيه وهي شاده ظهرها لانها حامل:كان كملوا وجابوا الكسوه...هههههه
وهما يضحكوا معاها مجامله..
فهالوقت..
كانت رويدا في الدار تهيأ في نفسها بش تطلعلهم..
ع خشة وفاق..
وفاق:شن هالعسل هدا كله..
ضحكت رويدا وقالت؛جديات!؟
وفاق بضحكه:والله تهبلي تبارك الرحمن..خدت يدها وقالت..هي تعالي اطلعي ماما تنادي..
خدت رويدا نفس..
بعدين مشت طلعت مع اختها..
وين وصلوا في الصاله.
خدت رويدا نفس من جديد..وخشت عليهم..
ام عبدالله لما شافتها ارتسمت ع وجهها ابتسامه تلقائيا..
رويدا:السلام عليكم..
ومشت سلمت ع ام عبدالله هي الاولى..
بعدين خواته..وفي الاخير الكنه اللي كان باين عليها من وجهها انها مش طايقه رويدا..
دعاء..
لحظتها من الاول وجهها ماضحكش بكل ولما شافت رويدا وجهها ولى اسود..رويدا اختي احلا منها بوين...جو سلفات عاد..
ام عبدالله:رايتك قبل ماشاء الله عليك ديما نقول فيها لريمه بنت جميله هذي ناشطه وفالحه..
رويدا ابتسمت بخجل..
ريمه:بيش تعرفي راك اختيار الحكومه الكبيره..هي قالت تبي رويدا لعبدالله..قات نحس فيها تقدر تقده وتقد ادير حوش في الغربه.
ام عبدالله :خل نجيك بالصراحه من الاول..عبدالله ناسي روحه في الخدمه من كثر مالاهي بيها..نقعد ليلي ونهاري غير نخمم في نومه وماكلته وشرابه ودبشه وحياته كلها..ماتقولي بياخدوني خدامه لا..لايابنتي..بس انا نبيله ونس تخليه يحب حوشه ويحب يستقر ويبي يدير عويله..ومش اي مراة تتحمل تعيش في الغربه يابنيتي..هدا عليش بنقولك خودي وقتك وفكري زين تشوفي روحك تقدري ع عيشة الغربه ولا لا..
رويدا ابتسمت وهزت راسها بإيجاب..
شرقيه:عندي بنت خوي التاني متزوجه وعايشه برا وليها عام لتوا والله ماتوقعناه تقد راجل وحوش برا..واهي الحمد لله عايشه مرتاحه وعندها حتى بنيه..ورويدا ان شاء الله حدير زيها وخير منها بنات خوي محمد طالعات لأمهم قد المسؤوليه..
دعاء..
عاد شقشق تزوجت توا وحامل والحياة حلوة ومادام هي في خير عادي الناس التانيه تعيش في خير ماعندهاش مشكله ههههه...
🗝وع قرب المغرب روحوا ريمه واهلها..
وقعدوا شرقيه وحواء في حوش ولدهم مقعمزين يهدرزوا مع محمد وعيلته بخصوص الخطبه وكلهم كانت عاجبتهم العيله ومستريحين للموضوع تماما..
⚘⚘⚘
وبعد عدى اسبوع بالزبط..
رويدا هدرزت مع امها وقالتلها قرارها النهائي بالموافقه..
وجميله اتصلت بريمه وبلغتها..
وريمه طول اتصلت بخوها فيديو وبلغاته..
عبدالله:قولتيلي تبوا ديروا حاجه رسميه..
ريمه:مالا شنو تبي تشد البنت عام كامل من غير مانديرولها حاجه..تلبيسة اقل شي..
عبدالله:باهي ماعنديش مشكله..بس قبلها نبي نشوف البنت ونهدرز معاها..
ريمه:راك تقول تبي رقمها..راهي قالتلي مانيش مكلماته بكل قبل تصير حاجه رسميه..
ابتسم ع جنب وقال:واني نبي نكلمها وجه لوجه ع الطبيعه..
ريمه بإستغراب:قصدك جاي لليبيا..
هز راسه وهو مبتسم ويقول:اها..
ضحكت ريمه وقالت:تأنس وتشرف ياسيدي..
وعبدالله يشوفلها وهو محتفظ بإبتسامته الجانبيه وفي باله شي يبي يديره ريمه ماعندهاش ادنى فكرة عنه...
⚘⚘⚘⚘
وبالزبط مروا ثلاته ايام..
جي بعدهم عبدالله لليبيا..وطول مشي لحوش اخته ريمه اللي استقبلاته هي وراجلها استقبال حافل اول مرة يخشلهم حوش...
تغدا عندهم وقعد للعشيه..
بعدين انطلق في جوله فطرابلس..
تلاقى هو واصدقائه اللي عزموه كلهم في وحده من المقاهي هدرزوا للمغرب..
ومجرد اذن المغرب مشي صلاه في الجامع..
بعدين تلاقوا من جديد ومشوا تعشوا عند واحد عازمهم في حوشه ع شرف جية عبدالله..
ومع 11 كان عبدالله مروح لحوش أخته وطول غط في نوم عميق...
اما رويدا..
ماقدرتش ترقد ليلتها..
رويدا بتوتر:يابنات تقول اول مرة في حياتي نوقف ع واحد ونكلمه..
وفاق:هييي..راك تقولي الكلمه هادي قدامه ياحماره..
ضحكوا مروة ودعاء..
رويدا بضحكه:خاني التعبير..بس بجديات متوتره يابنات متوتره هلبه..وخايفه..
مروة:ماتخافيش صلي الإستخاره بعد ماتصلي الفجر وفوضي امرك لله..
دعاء:ايه..واللي فيها الخيرة يقدمها ربك..
رويدا تنهدت وقالت:ياارب..
⚘⚘
وجي تاني يوم..
ورويدا اللي يدوب رقدت ساعتين قبل الفجر ناضت ع المنبه..
وناضوا معاها خواتها..
توضت وصلت الفجر..بعدين صلت استخاره..
وامها في الكوجينه تدير في القهوة وتدعي في سرها
"يارب اجبر بخاطر بنتي"..
ورويدا بعد الصلاة وتت روحها وكذلك خواتها ومشوا فطروا..
بس هي ماقدرت تاكل شي..
جميله:خودي مني نصيف هالتفاحه ماما خودي..
تنهدت رويدا وخدتها..
جميله:ان شاء الله كله يمشي تمام امس الليل كله واني ندعيلك..
ضحكت دعاء وقالت:يارب خير ياماما..
جميله بإبتسامه:يارب..
فجأة سمعوا صوت كلاكس..
رويدا:سلام ماما..
جميله:ربي يفتح عليك..
ع خطمة مروة ووفاق وهما يقولوا:سلام ماما..
جميله:ربي يفتح عليكم..
فات من جنبها مؤيد وقال:دعواتك يما..
جميله بإبتسامه؛ربي ينجحك ويعليك بجاه النبي..
ابتسم مؤيد ولبس سبيدروه..
ومشي طلع بعد هما طلعوا يمشي للكليه مع واحد من صحابه..
وبعد طلع مؤيد..
خشت جميله للحوش..
ومشت طول لدار البنات شافت دعاء راقده..
تنهدت بحسره ومشت تنوض عمر بش تقريه...
⚘⚘⚘⚘⚘
الساعه 12:00ظهرا..
كانت الدنيا مسحبه..
ورويدا ماشيه بطريقها لكليه الدارسات اللي تجي جنب قسم الكيمياء التابعه لكلية العلوم..
اتفقت هي وريمه تتلاقي مع عبدالله غادي...وريمه خبرتها ان عبدالله وصل وهو يراجي فيها..
وهي ماشيه وقلبها يدق بقوة من التوتر...
وصلت في الدراسات وقعدت ادور..
ع واحد لابس كبوط جلد قهوي هادي العلامه..
وهي تمشي وادور قالت بهمس:وينه هدا؟!..
"العشيه نتلاقوا ياعلي بإذن الله"..
سمعت صوت واحد يتكلم بالتليفون التفتت شافاته..
كان واقف عاطي بالظهر ويدور ويتكلم في نفس الوقت..
قعدت واقفه تراقب فيه كيف يتكلم..
شن لابس..كيف يتحرك..
ارتسمت ع وجهها ابتسامه تدريجيا وتلقائيا من كثر من عجبها...
وهو في هاللحظه شبح ناحيتها..
لما شافها ثبت في مكانه وقال:تمام تمام ياعلي بعدين نهدرزوا...السلام عليكم..ونزل التليفون..
ضيق عيونه وابتسم وجاها..
وهي نزلت عيونها طول خجلا وتوترها زاد..
وقف عليها وقال بصوت رخيم وخشن..
"رويدا صح؟"
هي ابتسمت وقامت عيونها فيه وقالت:ايه..
هو قعد يشبح لعيونها وبنظرات عيونه اللي مضيقهم وابتسامته ع وجهه..
هي تحشمت من نظراته نزلت عيونها لوطا..
تلقائيا قال:غير علاش هكي بس!؟
شبحتله تاني بإستغراب..
هو ضحك وحك لحيته وقال:خل نعرفك بنفسي قبل عبدالله خو ريمه مرت خالك..
رويدا:عارفه..
عبدالله:هههه..عارفك عارفه وعارفك عارفه اني نعرف انك بنت اخت راجل اختي..غير نبؤ نفتح موضوع..
ضحكت رويدا..
هو ابتسم وحط ايديه فجيوبه؛رويدا..
شبحتله..
عبدالله؛اممم..رويدا احمم..ضحك وقال..مش عارف شن يحكوا في مواقف زي هادي..بس يعني خل نعرفك بنفسي اكثر وظروفي وشكل حياتي..
رويدا؛وكله بصراحه..
عقد حواجبه وهو مبتسم وقال:اكييييد..
هي ضحكت تاني..
رخي حواجبه وقال؛ياستي..اني خريج لغات..ومن عمر 16سنه بدت نخدم في التجاره..اول حاجه درتها طاوله العاب  في الميلود..
ابتسمت رويدا وهي تشوفله وتسمعله وهو يتكلم..
عجبها كيف يتكلم بصراحه ومايحاولش يجمل روحه قدامها تكلم عن عيوبه وايجابياته ووضحلها شكله حياته وعمله..
خلا التوتر يولي راحه عندها هي..وحست كذلك انها عاجباته من النظرات اللي تجي بعد لحظه صمت بين وبينها..
عبدالله بضحكه:والله لين ادروشت منهم وحتى انتي بعدين يدروشنك..
رويدا ضحكت بعدين قالت:لاحظت كلامك مخلط غرباوي ع شرقاوي..
ضحك وقال:ايه بحكم المدة اللي عشتها في الشرق وخدمتي بين جماعه كلهم غرابه لسنين خديت منهم اللهجه حتى هم..
رويدا:حتى بوك وامك واخد منهم اللكنه..
عبدالله بإبتسامه:اسمها عمك وعمتك..
رويدا توسعوا عيونها وهي تشوفله..
وهو ضيق عيونه وابتسم..
ضحكت بخجل بعدين قالت:نستأذنك توا مانقدرش نطول اكثر من هكي عندي محاضره..
تنهد وقال:امتى تكملي بالزبط؟
رويدا:بالزبط الفصل الاخير ليا السنه الجاي نكمل شهر 6..
والمشروع ممكن يطول..
عبدالله:لامتى يعني..
رويدا:ممكن عام تاني.
عبدالله:اصلا عادي تقدري تتواصلي مع مشرفك من بعيد وتخدمي مشروعك وبعدين تروحي تناقشيه..ابتسم وكمل يقول..واني معاك..
رويدا شدت ابتسامتها وقالت:إن شاء الله..هي سلام.
ولفت ومشت واطلقت سراح ابتسامتها وقلبها يرقص من الفرح..وكأن اول مرة في حياته يدق القلب هالدقات الحلوة هادي.
اما هو..فكان جاي بنيه وبيروح توا بنيه تانيه..
كان ناوي يطفشها..وتوا كله حماس ان الموضوع يتم بسرعه...
........
"قول والله!"
عبدالله بضحكه؛والله الله..
ريمه بضحكة فرح :هالنهار تمنيته طلبت العالي ولقيته..
عبدالله وهو يضحك:مهبوله..
.......
فضيع يابنات فضيع..
مروة وهي مبتسمه بحماس:يعني عجبك..
رويدا بفرح:هلبه..خلاني نندم اني عرفت حد قبله..
وفاق:لهالدرجه من لقاء واحد بس!؟
رويدا:والله العظيم ياوفو شعور راحه غريب حسيته معاه سبحانك ربي..
دعاء..
نسمع فيها تتكلم حسيتها مش نفسها رويدا اللي تكلمت قبل ع ابراهيم وبعدين أمين..كلامه عن عبدالله وملامحها وهي تتكلم غير...دعيت وقتها من قلبي ان ربي يتمم فرحتها ع خير..
دعاء:الحمد لله..ربي يتمم ع خير..
رويدا:يارب والفال ليك دودي.
ابتسمت دعاء بس..
رويدا:ايه حقه تسلم عليك ريم..
دعاء وهي متفاجئه:وين ريتيها؟!
رويدا:جت ع خاطر مشروعها..كلهم صاحباتك لاهيات بمشاريعهم..
دعاء تنهدت وقالت:باهي شن جوها ريم هدرزتوا؟
رويدا؛تمام..عندها بنيه وتوا حامل..وقالوا صاحباتك اكرام وسكينه الزوز جايبين ولاد كل وحده زوز..
دعاء:ماشاااء الله تبارك الرحمن..ربي يهنيهم يارب..
البنات مع بعض قالوا:آمين...
دعاء..
واستمرت حياة الكل تمشي ماعدا حياتي اني اللي وقفت..
🗝في ذكرى المولد النبوي...
كانت تلبيسة رويدا..
حضروها خالاتها وعماتها..
وكان كل شي حلو واهل عبدالله قاموا القدر...
قبل يروحوا..
ريمه شدت رويدا ع تركينه وقالت:خودي هذي دبله فضه عمليه خداها عبدالله..وقالك تلقي تحت سبات القفطان مفاجأة وحق ربي مانعلموا عنها قال اول من يشوفها هي.
ضحكت رويدا وقالت:تمام..
حضنتها ريمه وقالت:لعند تو ماني مصدقه..
ورويدا تضحك وخلاص..
وخالتها رقيه وبنتها يراقبوا فيهم بنظرات حسد..
.......
في الطريق..
وهما مروحين وبنتهم المتزوجه معاهم..
رقيه:حطت عينها غير ع بنات جميله..
المتزوجه:ماهو شايفتهم درويشات زي امهم..
رقيه؛مالا رويدا درويشه!
البنت التانيه:ربي يعطي اللي خير منه مشبط ملبط عليهم..
ولد رقيه:باهي ياسر قرمه راهو اختك هادي يام..
رقيه:الهى فالطريق سلم ولدي..
ضحك وحرك راسه يمين ويسار..
⚘هي هكي ولت مايحسدك كان اللي ليك...⚘
⚘⚘⚘⚘⚘
ومرت الأيام...
وجابت شرقيه..
ودارت لمة كبيرة جهزتلها من لما خشت شهرها السادس..
عزمت في لمتها العيله كلها...وحتى صديقات مقربات ليها..
منهم اخت الشيخ الياس اللي من بعد فضل الله ومشيئته عقدة شرقيه انفكت ع ايديه..
لما جو جميله وبناويتها..
شرقيه:هديكا مرت خوي محمد وبناويتها..
ربيعه "اخت الياس" عيونها طول جو ع مروة كانت اكثر وحده ملفته فيهم عجبتها هلبه..
شويه جو جميله والبنات سلموا ع شرقيه..وع اللي حداها..
وربيعه لين جت مروة سلمت عليها قعدت مدققه فيها هلبه...
........
امل:قالوا خطيبك يخدم في القنصليه الليبيه في قبرص..
رويدا:امم..
امل:بتعيشي غادي يابختك محظوظات انتي والفرخه ازدهار..
وفاق:قولي ماشاء الله!
امل؛واااك منك انتي يانويره..
وفاق:مش نويرة اني قلت الحق بس.
رويدا؛خلاص وفاق.
قلبت وفاق عيونها وسكتت..
امل:الحق في اللي يقعمز معاكم..
وناضت ومشت من حداهم..
رويدا:ريحتي..
ضحكت وفاق..
⚘⚘⚘
طول الوقت في اللمه والناس تهدرز وتاكل وتشرب..
ودعاء مستمعه اكثر ماتتكلم..كانت تمرر في نظرها اللي حواليها..
دعاء..
لاحظت عمتي خيريه وبنتها نسرين يشبحوا لرويدا بحسرة..
ومرت عمي ليلى حتى هي عيونها ع رويدا شكلها عرفت ان ولدها كان يبيها الله اعلم عاد شن صار لما انخطبت رويدا..
وحتى لاحظت صاحبة شقشق تشبح هلبه لاختي مروة..
ولاحظت مرت خال بابا تشوف لوفاق..قعدت برج مراقبه وخلاص هههههه..نراقب فيهم ومافي حد يراقب فيا..
ماكنتش نعرف ان بعد نفسخ الخطوبه فرصي حتنعدم هكي..وممكن اني كبرت وخواتي كبروا وتوا وقتهم..
شرقيه:عاد مريوة شيخه تقرا في الدراسات الأسلاميه..
مروة بضحكه:هدا اللي نعرفه ان التشقير في موضع شك حتى هو وفي من حرمه..
عيشه عمتها:خسارة يا مريوة قبل نفكر فيك لولدي مطيع لكن ولدي فري ..
جميله بضحكه:مروة من لما كانت في الاعدادي وهي تقول نبي ناخد شيخ ياماما..
ضحكوا...ومروة ضحكت بخجل..
وربيعه تشوف لمروة بإبتسامه وعيونها يلمعوا بفرح..
🌻وتمت هديكا اللمه ع خير وكانت من احلى الايام اللي مرت عليهم..
⚘⚘⚘⚘
واستمرت الحياة تمشي..
ورويدا عايشه هي وعبدالله قصة حلوة نستها كل شي شين شافاته في حياتها..
وطبعا قسمها كله عرف بخطبتها ومنهم جيداء اخت أمين اللي صدمها الخبر...
زي صدمة مروة لما عرفت بزواج يوسف وشافت التهاني ا صفحته ع الفيس..وعرفت من بنات ليهم علاقات بناس قريبه عليه انه تزوج سوريه مقيمه في السعوديه..
يومها بعد مابكت اخر دموعها ع يوسف قررت تمزق صفحته من حياته..
واول حاجه دارتها هي الغاء اعجابها بصفحته ع الفيس...
اما صغيرتهم فكانت قالبه كلية الطب ع راسها الشباب بيموتوا عليها وهي مطنشتهم كلهم وعقلها في القرايه وبس..
دعاء..
وفاق عاشت معانا تجاربنا وتعلمت منهم هلبه وكانها حصنت نفسها بأخطائنا ودارت اكثر حاجه صح في حياة اي بنت هي انها تفرغت لقرايتها ولهت بيها هي وبس..
⚘⚘⚘⚘⚘
مقعمزة وحاطه اللاب توب ع رجليها..
رويدا:النوعيه هادي كويسه..
مروة:ايه..
مؤيد:اني خديت توشيبا..
رويدا:اغلى متاعك انت..
دعاء..
اللاب توب متاع البنات لموا حقه من فلوس المنحه وبابا ساعدهم..اما لاب توب مؤيد بابا دفع حقه كامل..
عجبوني كيف يجروا ع مستقبلهم..
عجبتني رويدا اللي كملت الهندسه بسرعه وبتفوق وماخلت شي يأثر فيها..
ومروة:اللي قريب تكمل قرايتها حتى هي لانها قعدت تنزل في هلبه مواد وتختصر ع روحها..
ووفاق اللي قاعدة تجري في جرة طموحها..
ومؤيد اللي قاعد يبني فروحه..
مش مفروض يحمسوني اني نرجع لقرايتي ونكمل اللي قعدلي ونشوف روحي!
لكن للأسف اني كنت نزيد نحبط لما نقارن بيني وبينهم ونعرف قداش اني ضعيفه وانهزاميه..ونزيد نجلد في ذاتي ونتحطم اكثر واكثر...
⚘⚘⚘⚘⚘⚘
في الليل..
الساعه 12:00ليلا..
بعتت رويدا لعبدالله صورة حلوة في كلام حلو ودعاء يفتح النفس..زي ماتعودت كل ليله..
ولما جت بتصكر بش ترقد..وصلها مسج بس من حد تاني غير عبدالله..
فتحاته وماركزتش في الاسم..
"قالوا انخطبتي وفيسع نسيتي وبدلتيني بغيري..واني اللي قاعد ع خاطرك نحارب في امي ونجبر فيها ع الموافقه..طلعت موهوم فيك طلعتي ماتستاهليش يارويدا."
شافت الأسم لقاته مغير لأمين العربي..
ابتسمت بتهكم ودارتله حظر وهي تقول..برا طير دوتك فاضيه اني اللي طلعت موهومه فيك..
شويه جتها رساله من ابراهيم..
"مش عارف كيف كنت عايش من غيرك"
رويدا بضحكه:اني اللي مش عارفه كيف كنت عايشه من غيرك بس..
مروة:ارقدي تربحي.
وفاق:ارقدوا ارقدوا قريب نعيط ونجيب بابا..
دعاء بضحكه:خلاص رويدة ارقدي انتي وياه..
رويدا رقدت وهي تقول بضحكه:باهي يادراهات..
وصكرت وحط التليفون تحت المخده وغمضت عيونها وهي مبتسمه...
⚘⚘⚘⚘⚘
اواخر ابريل...2016..
الساعه السابعه مساءا..
في الصاله..
مقعمزة جميله تكلم في سلفتها ناهد مكالمه هاتفيه..
جميله:وعلاش ياكبدي ماحط الا ع مواليد 94؟
ناهد:هما يبوا مروة بالتعني ياجميله كلمتني علي مروة المراة..
تنهدت جميله بضيق وقالت:باهي باهي..تو نفتح الموضوع مع مروة بنتي ونرد عليك..
ناهد:تمام واني نراجي فيك...هي بالسلامه توا...
جميله:بالسلامه..وصكرت وهي تقول..خواتها بياخدوا قبلها وهي قعدت..هدا اللي كنت خايفه منه يابنتي..ريتك غير تطلعي اقل شي شافك حد برا عجبك وعجبتيه..افف..استغفر الله العظيم..
وناضت من مكانها ومشت للدار...
........
"أني!؟"
جميله:ايه انتي..المهم قالتلي انه شيخ سلفي امام في الجامع ويخدم في الاوقاف..وفي الأصل مهندس اتصالات ويخدم في شركة الأتصالت..وعنده شقه فوق اهله قريب يكملها..
مروة:مواليد كم؟
جميله:83..
رويدا:اكبر من عبدو بعام..
جميله:شن رايك..
مروة:بيني وبينه 11سنه..
جميله:قصدك ماتبيش؟
مروة:لالا ماقلتش هكي بس قاعده نفكر بصوت عالي..تنهدت وقالت..خل نصلي استخاره وخلاص..
جميله:باهي وزيدي فكري..
مروة هزت راسها بإيجاب..
دعاء بضحكه:مادامه الشيخ اللي دارلنا مية الرقيه وافقي طول خلا الأفراح متواليه ماشاء الله..
رويدا بضحكه:عندها الحق..
كلهم ضحكوا.
بس جميله كانت ضحكتها بغصه وهي تفكر في دعاء اللي قعدت تسقد في خواتها وحده ورا التانيه وهي قعدت..
⚘⚘⚘⚘
وبعد فترة من التفكير..
ردت مروة على امها بالموافقه المبدئيه..خلاص حتى هي قريب تكمل قعدلها بس فصل واحد ماعندها علاش تقول لا..
وجميله اتصلت بناهد وخبرتها..وناهد بدورها خبرت ربيعه..
ومنها حددوا موعد جيتهم..
دعاء..
وجي يوم الموعد..وجو اهل الشيخ الياس هما يبانوا ناس زينا حالتهم الماديه عاديه..بس دارو الواجب وخشوا بحاجه محترمه..
تعرفوا علاش اني نركز ع الحاجات هادي؟لانها هي اللي توضحك معدن الناس..ايه والله التفاصيل التافهه هادي عند البعض تبين حاجات كبيره هلبه هلبه..والكرم اب كل الاخلاق الحميده..والبخل اصل كل الاخلاق الفاسده...حطوها في روسكم الحاجات هادي ياصبايا..
🗝وطبعا حضرت شرقيه كالعاده وكانت متحمسه للموضوع..
وكما جرت العاده فهالزيارات هدرزوا شويه وهما ياكلوا ويشربوا..
وبعدين نادوا على مروة اللي لما رتها ام الشيخ اعجبت بيها ع الآخر..
مشت مروة سلمت عليهم...وقعمزت قريبه ع امها..
كانوا امه وخواته عاديات مش متلزمات...
ام الياس:يابنتي بنقولك من توا ولدي شيخ..يعني صالات لا
..اغاني لا..تلفزيون لا..لكن التليفون عنده عادي والنت عادي..
واللبس متاعك بيكون ملايه وخمار..
مروة بإبتسامه:من لما عرفت انه سلفي واني عارفه الحاجات هادي..
ربيعه:يعني ماعندكش مشكله..
مروة:التلفزيون ماندورش فيه..والاغاني مانحبش نسمعهم والصالات مش هديكا الحاجه المهمه..
جميله:لكن يعني عرسك بنديروه فالصاله..
ربيعه بضحكه:وهو قال حكمي عليها يسري بعد تولي حوشي..
جميله بإبتسامه:كان هكي كويس..
ضحكوا..
وكملوا هدرزتهم وعيون ام الياس على مروة..
⚘⚘⚘⚘⚘
ماشاء الله عليهم سوا البنيه سوا العيله..
وحده من خواته؛شكلكم نسيتوهم زمان ايام كانوا يجوا لحوش جدودهم في العمارات كانوا البنات صغيرات هلبه..
مروة هادي كان شعرها قصير وقصتها واصله لعيونها ينادوا فيها كوريه..
الياس ابتسم وهو عاقد حواجبه وقعد يذكر ايام علاء كان ينزل تحت العمارة وهو قايم في غمره بنيه صغيره بنفس المواصفات...
ربيعه:ايه نذكرلهم كويس وتفاجئت لما ريتهم في اللمه كيف كبروا..
الياس:لكن ع هكي البنيه صغيره هلبه..
امه:كلهم 11عام اللي بينك وبينها!
الياس تنهد بعدين قال:مادام انتم تمدحوا فيهم هكي مافيش مشكله..اهم شي عرفوا شروطي ووافقوا عليها..
 ربيعه:ايه صاحبة الشأن بروحها وافقت..المهم توا امتى تبي المقابله الشرعيه..
الياس:الأسبوع القادم بإذن الله يوم الإربعاء..
ربيعه:سمعا وطاعه..
ريشلها قصتها ومشي طلع من حداهم وهما يضحكوا..
⚘⚘⚘⚘⚘
يوم الإربعاء..
الساعه السادسه مساءا..
لبست مروة عبايه وشاربه..وقعدت واقفه قدام المرايه وتشوف لروحها وتفكر..
زعمه كيف بيكون الياس هدا!؟ لطيف ولاجاف..
حنين ولاقاسي..
متزمت..ولا ملتزم...
ومش هامها نهائي شكله اخر ماتفكر فيه مروة الشكل..
ع خشة دعاء..
دعاء بإبتسامه:هي مروة..
خدت مروة نفس..
ومشت طلعت وتوجهت طول للمربوعه
في المربوعه..
إلياس:ماتقدرش تكون في صف اي حد فيهم لان كلاهما ع غير الحق..في كل شي لاحظ من زمان وتوا..
مؤيد:عندك حق..بس حالنا قبل قاعد خير.
ألياس:لهالسبب تحرم الخروج على ولي الامر لما يلحقه من ضرر ومفاسد..يخلينا يايوم من ايام زمان..
مؤيد:صدقت..
طق الباب..
نزل الياس عيونه..
مؤيد؛خشي..
خشت مروة وقالت: السلام عليكم..
صوتها كان هادي جدا..عجب الشيخ لهدا رد بإبتسامه:وعليكم السلام..
قعمزت مروة..
مؤيد:عن اذنك شويه ياشيخ .
وناض مشي طلع من حداهم..
قام الياس عيونه جو فعيون مروة..
الراجل انصدم..وقلبه قريب وقف..ماتوقعهاش تكوت جميله لهالدرجه..
قعد يشبحلها وخلاص..
هي تحشمت نزلت عيونها لوطا..
ع خشة عمر بصفرة الميه..
حطها ع الطاوله..وطلع..
ناض الياس وهو في حاله يرثى لها..
صب ميه من المالقي..وخدي الطاسه ولى قعمز وشربها كلها..
بعدين ناض ردها لمكانها وولى قعمز..
ومروة تراقب فيه وهي شاده ابتسامتها..
هو شبحلها انحرج مسح ع لحيته..
ونزل عيونه وقال:احمم..بسم الله والصلاة والسلام على رسول الله..
دعاء..
كلنا قعدنا نسمعوا فيه شن يقوللها كلامه كله بالفصحى..ومرة مرة مروة كانت تتكلم وهو يرد عليها..
كانت اطول مقابله شرعيه قعدت قريب ربع ساعه..
🗝بعد تمت المقابله طلعت مروة وخش مؤيد..
وامها وخواتها تلقوها...
جميله:هاه شنو؟!
مروة بإبتسامه:هدا هو اللي نبيه..
رويدا بهمس:هدا هو هدا هو هدا هو اللي نبوه..
ضحكوا كلهم..
وجميله قالت بضحكه: على بركة الله..
⚘⚘⚘⚘
27/رمضان...2016
يامبروك عليه شقيقي..هدا وين زمطته ريقي..
خوات الياس يغنوا في هالمقطع بعد لبسوا مروة التعليقه..
طبعا الدبله لا عند الشيخ...
ومروة كانت راضيه تمام الرضا ومرتاحه وكل شي عاجبها..
دعاء..
هو هدا اهم شي تكون راضيه ومقتنعه..لما البنت تاخد اللي هي مقتنعه بيه حتعيش حياتها كلها وهي مرتاحه...
وانخطبوا خواتي الزوز وتحدد موعد عرسهم مع بعض..نص شهر 10...
وبدينا نجروا ع ونوتوا ووقتها الدنيا كانت شايطه فيها النار..
بالسيف بتتنالهم..واني وامي يدوب لحقنا ناخدوا حاجه وحده نلبسوها يوم الحفله...
⚘⚘⚘⚘
اواخر يوليو سنة 2016...
كلية الدراسات..
"علاش سألته توا السؤال هدا؟!"
عبدالله:توا خطر ع بالي لما حكيتي عن اختك دعاء واللي مرت بيه..
رويدا نزلت عيونها وقلبها يدق بخوف..
ضحك وقال :خيرك خفتي ووجهك ولى اصفر!!؟..
ضحك تاني بعدين ابتسم وقال..شوفي مافيش بنادم في الدنيا ماعنداش ماضي..اني عشت هلبه تجارب خلتني نحول من راسي فكرة الزواج بالمره..لكن بعد زنين العيله المستمر استسلمت..وقلت خل ندير اللي يبوه ونخطب وحده نمشي معاها فتره..نخليها تكرهني اطيق الموت وماطيقنيش..قالها بالمصري..وضحك وقال..وبعدين تفركش كل شي..
هي تسمع فيه وهي مندهشه..
ابتسم بعدين قال:لكن معاك انتي تغيرت فكرتي عن الزواج..خلتيني نبي نقدم موعد العرس بأي وسيله..
ابتسمت بخجل ونزلت عيونها لوطا..
هو ابتسم وقال:لهدا مايهمنيش شن صار معاك زمان المهم توا وبس..واني عارفك وعارف عيلتك وعارف اختي مش حتختارلي الا بنت الناس والعيله المحترمه..
هي شبحتله وقال:شكرا..
هو رفع حاجبه وقال:بس هدا مايعنيش اني راجل مش غيور..بالعكس اني راجل شرقي وحزار هلبه
هدا علاش اول حاجه بنطلبها منك انك تلبسي ملايه..
هي ضحكت وقالت:اصلا بديت نفكر نلبسها..
هو حك لحيته وقال:شن رايك نقدم العرس لشهر 8!؟
هي نزلت عيونها خجلا وقعدت تضحك...
وهو يتأمل فيها بإبتسامه...
⚘⚘⚘⚘⚘
"لدعاء!!؟"
ناهد:ايه..يشكروا فيه ياجميله..دكتور صيدلاني وكامل والكمال لله..بحوشه وخدمته وربي عاطيهم عندهم صفة محلات تحت عمارتهم..
جميله بإبتسامه:باهي كويس..لكن راهو مانقدرش ندير عرسها مع خواتها العين ياوخيتي اني زوز وخايفه عليهم..
ناهد بضحكه:حتى هما يبوا السنه الجايه كيف طالعين من عرس ماهو..
جميله:كان هكي باهي
.......
"خو مرت عمك يعرفه وقال قداش ليه يدور وقال لأخته تشوفله"
تنهدت دعاء بملل وقالت:باهي قوليلها باهي..مكسده ماعندي ماندير..
جميله:علاش تتكلمي هكي!؟
دعاء:لأني عارفه نهايتها ياماما مش حيصير منه..
جميله عكرشت وجهها وقالت:اعوذ بالله من فالك..
رويدا بضحكه:يامشومه..
دعاء وجميله ضحكوا..
مروة بإبتسامه:تفائلي هالمرة دعاء..
دعاء تنهدت وقالت:نحاول...
دعاء..
وياحناتي..جو الناس..وعمتكم دعاء اللي عندها تقييم خاص بالناس من لما شافتهم خشوا يصفقوا بإيديهم عرفت ان الموضوع مش صاير منه..
جو بس..خواته..الحق كانوا لطيفات وفي بيناتهم ميزة مشتركه لأني ركزت بس في خشتهم ماركزتش ع الميزة هادي..
🗝من لما جو وشافوا جميله والبنات وجوههم تغيرت وبان فيهم الأرتباك..
ولما خشت عليهم دعاء زادو ارتبكوا اكثر..
دعاء..
اني قلت في عقلي اكيد خوهم شين مافيش غير هالتفسير ماتوقعتش اللي هما قالوه بعدين بكل..
⚘وحده من خواته:قبل المقابله الشرعيه في حاجه ضروري تعرفيها..
دعاء وجميله قعدوا يشبحولهم باستغراب..
وخوات العريس شبحوا لبعض..
بعدين وحده فيهم تكلمت وقالت...

....يتبع......