"إلا أن يشاء الله"

الجزء السادس

✒..
اليوم التالي..
الساعه 5:00عصرا..
في حوش اهل جمال..
كان فالجنان يلعب هو وولد اخته رجاء..
مركبه سيارة لعبه صغيره ويشجع فيه بش يتحرك بيها..
جمال:هيااا بدوري هي..اووووو ايواه ايواه ايوااااه..لالاالااااا لاا..ومشي يجري وراه وهو يضحك بش يشده بالسياره قبل يخش فالجردينه اللي كان مصمم فيها شلال تنزل منه ميه...
شده بالسيارة وقال..تي وين ماشي بيها ياجحش وين..
ع طلعة امه لما شافتهم ابتسمت...
للحظه تخيلت ولدها شاد ولده ولابنته فيده وهادي امنيه امه الوحيده ولدها الوحيد وتبي تفرح بيه وتشوف صغاره..
جتهم وقالت:هي هاته وتوكل ع حالك..
جمال:خوديه..مده لحناه وهو طول طاح عليها..
خداته وهي تضحك بعدين قالت:ولدي منال خطيبتك امتى تتخرج؟
جمال:العام الجاي بإذن الله..
تنهدت وسكتت وقعدت تشبح لولد بنتها..
هو عقد حواجبه وقال:خيرك يام؟
شبحتله وقالت:خاطري نفرح بيك ونشوف صغويرتك..
ابتسم وحط ايديه فجيوبه وقال:تفرحي بيا ان شاء الله وتشوفيهم صغاري..كلها هالعام ونص وان شاء الله يفوتوا بسرعه يام وتفرحي لين تعيي..
صابرين بإبتسامه:آمين..
جمال:هي..اني ماشي ماتبوا شي..
صابرين:لالا مانبوا شي كان سلامتك..
حول ايديه من جيوبه وقربلها باس راسها بعدين حيا بيده ولد اخته وهو يضحك..ومشي بطريقه للباب..
بدر ولد رجاء:ماال..ماال..
ضحكت صابرين وقالت:مااال عنده مايدير بدوري هي تعالى نمشوا نشوفوا ماما..
ومشت خشت بيه داخل..
وين وصلت فدار المعيشه لقت بنتها مقعمزة تقرا في القرآن..
قعدت تشبحلها بحزن..وشويه ومشت ببدر للكوجينه بش توكله..
🌻🌻🌻🌻
في حوش اهل دعاء..
فالكوجينه..
مروة ورويدا..
وحده ادير فالقهوة والتانيه تزين في كيكه دارتها بالمربى..
مروة وهي واقفه حدا بكرج القهوة:اليوم شفتها مزقه..
رويدا وهي تزين فالكيكه:وكان تجي عليها كندرتي والله مانخليها هكي لكن الله غالب رجليها زي رجلين الكناغر..
مروة غلبتها الضحكه وقالت:تفي ياحيوانه..
قعدت تضحك رويدا..
هدت مروة ضحك وقالت:تعرفي رويدا..نفرح ان مازالي هلبه ع القرايه فالجامعه ولاكنت عانيت زي ماتعاني دعاء..
لبستين طول السنه تبدل بيناتهم وكان خش الشتي تلبس عليهم البالطو الازرق الكحلي الوحيد اللي عندها ليه عامين وتلاته شناطي لتوا ماخدتش غيرهم..
رويدا وهي ترش في جوز الهند:باهي اللي في عيد تخشلها منه كل عام لبسه جديده
مروة بضحكه:حني لبس العيد ندسوا فيه للمناسبات
رويدا بضحكه متهكمه:صدقتي..
بعدين التفتت وقالت:حيي..بيان بنت خالتك قريب ولتوا ماخديناله شي..
تنهدت مروة وسرحت بتفكيرها..
وكذلك رويدا..
فجأة فاجت القهوه..الزوز انخلعوا..
مروة:هيييي!
وطفت طول وحولت البكرج..
رويدا:مسبوهه..
شبحتلها مروة ع جنب بعدين قلبت عيونها ومشت بالبكرج بش توتي الصفره..
🌻قعمزوا كلهم في دار البنات وامهم معاهم يشربوا فالقهوة ويهدرزوا في موضوع البيان..
جميله:اني كلمته وقال تونشوف..
ابتسمت دعاء بتهكم.
رويدا:من الاخير كان ماخدالنا شي مش ماشيه..
مروة:اني بنطلب من صاحبتي قفطان وخلاص..
رفعت رويدا حواجبها وقالت:والله فكره..حتى اني تو نطلب من وحده من البنات..
دعاء تمرر فنظرها عليهم وهي ساكته..
جميله:وفاق قفطان العيد متاعها قنين يمشي للبيان..
وفاق تاكل في الكيكه بصمت..
جميله شبحت لدعاء وقالت:وانتي دعاء..
دعاء:ماعنديش خلوق لشي..
جميله ضيقت عيونها وقالت:ماتقوليليش خيرك يابنت من امس وانتي حالك مقلوب واليوم حتى لجامعتك مامشيتي..
حطت دعاء الفنجان فالسفره وقالت:ماخيرني شي..
وناضت وطلعت من حداهم..
جميله:خيرها هادي!!
مروة:نحس صاير معاها موقف فالجامعه.
رويدا:حتى اني..
جميله:زي شنو يعني!!؟
وفاق:كندرتها تمزقت ياماما واضحه..
جميله شبحتلها بعدين شبحت للبنات..
الزوز قعدوا ساكتات وتبان ع وجوههم ملامح الضيق..
في الحوش اللي في جنبهم..
تحديدا الجنان..
محمد:تبيني ناخد حوايج ليها وللبنات ع خاطر بيان بنت اختها
شرقيه:ومن وين بتجيبلها!؟ الدبش مولي نار يامحمد..
محمد بضيق:حتى اني والله ماني عارف منين وكيف..اليوم خديت كندرة لدعاء وماخديتلهاش اي نوعيه دفعت فيها قريب 50دينار..
شرقيه:معندهاش كنادر!!
محمد:هي كندرة العيد قعدت تلبس فيها لين تمزقت..
شرقيه؛كان تاخدلهم سبيدروات يامحمد نوعيه كويسه وتتحمل خيرلهم
محمد:نراجو لين ينزل المرتب
شرقيه:ايه وبالنسبه لحكاية لبس البيان خليها عليا..
محمد:كيف نخليها عليك؟
شرقيه:قتلك خليها عليا ومادورش الباقي..
تنهد محمد وهز راسه بإيجاب..
⚘⚘⚘⚘⚘
يتكلم بالتليفون وهو يشرف ع بضاعه جديده جايه يدخلوا فيها للمخازن..
جمال:والله يامنو مافاضي نحك راسي..
منال بضيق:قداش ليا ماشفتكش جمال خاطري نشوفك ونهدرزوا حتى نص ساعه..
جمال :غاادي غاادي..اشر للراجل بصبعه وهو يحرك فحواجبه..بعدين قال..حاضر عمري حاضر تو نحاول اليومين الجايات..
منال:بالله عليك اليومين الجايات جيمو..
جمال:ياممدوح صكر هدا كله صكره..اوكي اوكي حبي نهدرزوا بعدين في امان الله وصكر..
منال نزلت التليفون وهي تتأفف بضيق..
جتها امها وقعمزت حداها وهي تقول:خيرك تنفخي.
منال:شي.
امها:معاش حصلتيه زي قبل ولا..
شبحتلها منال بضيق..
امها:اياه عاد توا بمن يلهى ليلهى انتي ولا اخته وعيلها ولاامه ولا خدمته..
منال:ماما شن تبي تقولي..
امها:نبي نقولك ان اللي تاخد ولد وحيد عنده كدس خوات وامه معاهم والله ماحتتريح..
منال بتذمر:اووففف نفس الدسكه ياماما..نفس الكلام ماتمليش وانتي تعاودي فيه..
وناضت ومشت من حداها..
امها بصوت:سيورك توليله كلامي يامنال..سيووورك موليتيله..
سمعت باب داره انخبط بقوة..
امها بإزدراء:حمارة..
⚘⚘⚘⚘⚘
خشت عليهم الدار وفيدها بوكس احذيه..
شبحوله خواتها بعدين شبحولها هي..
جميله حطاته حداها وقالت:خداها بوك اليوم قال قيسيها
دعاء قعدت تذكر فالموقف اللي صار..شدت دموعها بالسيف..
فتحت البوكس وطلعتها كانت كندرة حلوة وتبان حاجه صح..
وقفت وقاستها لقتها تجي عليها بصوت يدوب طالع:جايتني تمام
جميله:باهي..
ولفت ومشت طلعت من حداهم..
دعاء قعمزت ودموعها بدوا يطيحوا..لفت وجهها للتلفزيون وتبي ادرقهم ع خواتها..
لكن هما شافوها ومابوش يسألوها..
ماكانوش يبوا يسألوا بش مايتنكدوش حتى هما كل وحده فيهم اللي فيها مكفيها..كلهم عايشين في نفس الهم ومايبوش يزيدوا ع ارواحهم اكثر من هكي مازال صغيرين حمل الهموم..مازال..
⚘⚘⚘⚘
تاني يوم..
مشت دعاء للجامعه..
وتلاقت هي والبنات فرحوا هلبا لما شافوها وسألوها ع الغياب وهي تحججت بالمرض..
وطبعا هي واماني قالبين وجوههم عن بعض..
وهما مقعمزين يهدرزوا..
فاتوا من حداهم قروب بنات..
صبحوا عليهم..وهما ردوا عليهم..بعد فاتوا قالت أمال..
امال:ريتوا انوار كيف رايحه؟.
ريم:ايه ليها مدة ماجتش نحس فيها اشبح من ميتلها..
ايات؛ياحناتي امس كنت نهدرز اني وصاحبتها سجى قالت خالتها وولادها تلاته دارو حادث وكلهم توفوا..
ارتسمت ع وجوه البنات ملامح الاسف والوجع وهما يقولوا:تس تس تس..لاحول ولاقوة الابالله..انا لله وانا اليه راجعون..ربي يرحمهم مساكين..
ايات:ايه الله يرحمهم..واحد من ولاد خالتها كانت تبيه ويبيها..قالت قريب هبلت مسكينه في العزي صارت فيها حاله..
دعاء بوجع:ياناري..
سكينه؛هدا علاش هكي رايحه هي!..
ايات بحزن:ايه..
اماني:الله يرحمهم ويصبرها..
كلهم بأصوات متقطعه :آمين..
سكينه:هيا بنات المحاضره..
ناضوا كلهم ماعدا دعاء لأنها مش معاهم فيها..
ايات:بتركبي فوق دودي؟
دعاء:ايه هو هدا..
ايات هزت راسها ومشوا البنات مع بعض للقاعه..
قعدت دعاء مقعمزة شويه وهي تقرا فالقرآن من امس تقرا فيه..بش ترتاح...بعدين ناضت لمت حاجاتها وبتركب..
وهي ماشيه فاتوا من حداها بسرعه رشاد وامين ومعاهم واحد تاني .
خبط دعاء طاح منها المخطط متاعها والمسطره..
رشاد وامين وقفوا يشبحولها..
وهي تحشمت هلبه..
الولد قام حاجاتها مدلها المخطط خداته..
وقعد يمسح في المسطره ويقول:اني اسف جدا سامحيني..ومدهالها..
هي بخجل ووجهها كان احمر قالت:معليشي..
وخدت مسطرتها وركبت تجري وقلبها بيفر..
قعدوا يشبحولها لين ادرقت..بعدين الولد قال بضحكه:كليتكم مليانه صواريخ..
رشاد بحمقه:تي تحشم ياراجل وانت من اول ماخشيت ماسلم منك حد...وقعد يمشي بروحه وهو معصب..
الولد؛هدا خيره!!
امين بإبتسامه:حازر ع بنات الكليه..
ضحك الولد وامين ضحك معاه..
⚘⚘⚘⚘⚘
مكالمه هاتفيه..
جميله:ومن بيجي كله..
اختها:كلهم جايين ياجميله..
جميله:باهي العشي من برا مش فالحوش اخر كلام؟
اختها:ايه فكيني ياوخيتي من تطييب الحوش والتمزريط والبهدله..
جميله:ايه هكي اريح..
اختها:المهم تعالوا من الصبح هاه..
جميله بإبتسامه:ان شاء الله..
وزادت هدرزت جميله ع اختها شويه بعدين صكرت وبدت تفكر فحكاية اللبس..البيان يوم الآثنين الجاي ولتوا ماقاللها راجلها شي ع طلعة السوق..
دعاء..
وقعدنا نراجو يوم ورا يوم وبابا ماقال شي وماما خايفه تكلمه تتعارك هي وياه وينوض حتى للبيان مايرفعناش..
وقعدنا هكي لعند ماجي يوم الجمعه لمة العيله في حوش جدي..
اني يومها صكرت راسي ومابيتش نمشي مش ناقصني حرق دم اللي فيا سادني..
لكن ماما مشت هيا والبنات..وياريتهم مامشوا..
🗝كانت دعاء مقعمزة تقرا لما خشوا عليها خواتها وفي ايديهم زوز شكاير..
شافتلهم وهي مستغربه قالت؛هدا شنو؟
رويدا وهي رافعه حاجبها ودموعها فعيونها:عقابات مرت عمك وبناويتها..
خلت اللي فيدها وناضت وجت للكياس..
وحده فيها دبش والتانيه احذيه..
فتحتهم وقعدت اطلع بالحاجه..
دعاء..
زمان وحني صغار كانوا يعطوا فينا فدبشهم وكنا نلبسوا والله غالب..بس توا خلاص معاد نقبلوا من حد ولا حاجه..
اللي قهرني يومها اكثر شي ان الحوايج قدم من 2003 2000 شي قديم واضح ومنه البايد..ولا الكنادر شي يحشم اللي طايحات منها فصوص..واللي متقشره..يعني هادي مش بس تبي اذلنا لاتبي تهيننا اهانه مقصودة
دعاء بغضب:علاش خديتوهم منها!!؟
مروة بحزن:ماما قالت خودوهم..
دعاء غمضت عيونها بشده بعدين فتحتهم وقالت:بروا ردوهم..
مروة قعدت تشبحلها وبس..
وفاق جت وشدت شكاره وقالت بحده:اني نردهم..
رويدا بحده:هيا..وقامت التانيه ومشوا هما الزوز..
مروة بخوف:تو بتصير مشكله يادعاء..
دعاء بعصبيه:خل تصير طز..
.....
خشوا البنات الزوز بالشكاير لدار المعيشه..
انصدموا كلهم..ماعدا جميله اللي بردت ع قلبها الحركه..
رويدا:مانبوهمش..
شرقيه رفعت حاجبها وقالت:ردتهم دعاء ولا مسود قلبها هالبنت..
جميله؛وشن ليه علاقه سواد القلب ولابياضه ياشرقيه البنات معاش يبوا يلبسوا من حد..
رفعت امل حاجبها وشبحتلها من فوق لتحت..
ازدهار:صراحه عندهم الحق حتى اني قبل مانبيش نعطوهم لبنات عمي محمد..
ليلى:وحني شن قصدنا كان الخير درنا فيهم خير حني لكن نستاهلوا..
شرقيه:دعاء الحرفه دعاء..
حناها:بكل هالبنت قلبها مليان سم..
جميله ناضت وقالت:توا دعاء طلع قلبها مليان سم ياعمتي!! دعاء اللي ديما فحالها ومصكره فمها مهما رت ولاسمعت تسكت وتفوت...
حناها:ريتوها كيف ترد ريتوا!! ولمن بتطلع يعني!
حطت جميله شاربتها ع راسها والتفتت لبناتها وقالت..هيا..
مشوا البنات وامهم وشرقيه تقول..
"كل حد ربي يعطيه ع قيس نيته وياويكلم من اللي بتاخدوه من نيتكم السودا".
دعاء..
وعاد راجو بابا لين روح واستلماته شرقيه وقالتله كلام صار وكلام ماصارش..
شحناته شحنه باهيه وجانا طول وبدي يعارك ويعيط وامي مسكينه ماتبيش ترد عليه بش مايحرمهاش من البيان..
وحني قعدنا في دارنا ساكتين ونسمعوا..
لعند ماقال..
"والله ماهي رابحه بنتك هادي لو بتستمر هكي"..
اني صدمني الكلام يعني شن هو اللي درته بش يقول عليا هكي!؟..
رقولي الأعصاب ونضت وطلعتله طول..
دعاء وهي تبكي:علاش هدا كله علاش!! لاني رديت صدقات الناس علينا!!ولا انت عاجبك وراضي اللي صغارك يلبسوا في فضلة الناس!!..
بوها قعد يشبحلها وساكت..
دعاء:حني رضينا بحالنا ومتحملينه عادي والحمد لله كله من ربي..لكن الاهانه والذل لا..والله ماحنقبلهم بالذات من اهما اهماا اللي يحبوا ديما يذلونا وينزلوا من قيمتنا وانت عندك عادي..
محمد مشي من حداهم وخش للمربوعه وصكر الباب..
وهي امها وخوتها قعدت يشوفولها..
خشت داخل للدار وانهارت بالبكي..
وخواتها وامها مشوا للدار التانيه..
اما مؤيد خوها قعمز ع الكرسي وهو يشوف للفراغ ودموعه فعيونه...
دعاء..
من بعد هديكا الليله بابا قاطعنا كلنا حتى للجامعه ومدارسنا يرفع فينا لكن مايكلمش فينا بكل..
وامي مسكينه قعدت تخمم في حكاية المشي للبيان..
لهدا تشجعت وكلماته وهو قاللها تو نرفعكم..
🗝بلغت ام دعاء البنات وهما كلموا صاحباتهم بش يجيبولهم اللبس...ودعاء حسبتها رويدا معاها في قفطان من صاحبتها..
واختاروا عليهم احذية مناسبات قدم عندهم..
اما جميله فرفعت معاها "دشداشه"لبستها قريب 4مرات في مناسبات عيلة راجلها بس لكن اول مرة تلبسها في مناسبات لأهلهاهي..
ورفعهم محمد من الساعه 11الصبح..
تلاقوا هما وعيلة امهم غادي وكانت الأجواء حلوة بالمرة نستهم همهم كله..
تساعدوا مع بعض ووتوا الخيمه..والضيافه..
والمنظومه كانت شغاله..مرة مرة يرقصوا عليها..
لعند ماقرب المغرب..
بدوا كلهم يجهزوا في انفسهم...
اللي تلبس..واللي تمكيج..واللي ادير في تسريحه...
والناس بدت تعبي في الخيمه..
وبنات العيله والنساوين بدوا يطلعوا..
🌻مروة:شن رايك ماما؟.
جميله بإبتسامه:ماشاء الله تبارك الرحمن..
رويدا:واني..
جميله:عيني ماضركم كلكم طالعات غزله..اوقفوا ترا..
وقفوا وبدت تقرا عليهم بالوحده..
فاتت من حداهم مرت خالهم وقالت:عندك حق عندك حق ربي يحفظهنلك..
جميله والبنات ابتسموا..
دعاء..
مرت خالي ريمه اصولها من المنطقه الغربيه لكن عاشت هي واهلها قريب 15سنه في بنغازي وليهم 5 سنين منتقلين منها لمصراته..هي عروسه كانت هداكا الوقت ليها 8شهور واخده خالي ..
🗝طلعوا البنات هما وامهم والانظار توجهتلهم..
كل وحده احلا من التانيه والناس مانزلوش عيونهم..
شويه وجت بنت خالتهم من المزين وجايه معاها زكره..
دارت شوط قوي..
بعدين بدت اجواء البيان..
ومروة ورويدا ماعندهمش روح مع الهياجه في المناسبات..
يغنوا ويصفقوا ويرقصوا ورقيصهم حلو هلبه..
والنساوين عيونهم عليهم بالذات حموات خالتهم..
جميله:نوضي دعاء..
دعاء:والله مانعرف..
جميله:نوضي حتى بالجو..
دعاء حركت راسها يمين ويسار رفضا..
جميلة:خزي داره الكبد.
ضحكت دعاء..
وفجأه طب عليها بنت خالتها وتجبدها تنوضها..
دعاء بضحكه:والله مانعرف والله..
بنت خالتها:لا تعرفي ونص..
وقعدت ترقص فيها ودعاء تساير فيها وهي تضحك..
وكلهم يصفقولها ويشجعوا فيها..
والناس تتفرج ويتهامسوا...
ماطولتش دعاء طول انسحبت وخواتها ولوا قعمزوا حتى هما...
وشويه وجو اهل العريس بالبيان..
وكانت حاجاتهم قنينه...
دعاء..
ديما لما نحضر مناسبه نتسهف عليها يعني يبدا خاطري ننخطب وندير بيان ونفرح..وقتها ماكنتش مدركه ان الفرحه هادي برغم حلاوتها الا انها لحظيه تاخد وقتها وتمشي وتقعد ذكرى..وان المهم هو السبب لمظاهر هالبهجه والفرح الإرتباط الرسمي ومايتبعه...
🗝وتم البيان على خير وروحوا في نفس الليله...
الساعه 1:00ليلا..
وهما راقدات في فراشاتهم..
كل وحده فيهم قعدت تتخيل فروحها في مكان بنت خالتهم..
رويدا تتخيل فروحها بس بدون طرف تاني..
اما مروة فكانت تتخيل فروحها بس في طرف تاني..
خدت نقالها وفتحاته وخشت ع الفيس..
دعاء..
وقتها الفيس كان قليل نادر من دايره..وقتها الموضه كانت النيم بز وفيس توك والجو القديم هدا..
وماكناش نعرفوا ان مروة دايراته..
رويدا؛فرخه مروة..
مروة:اممم..
رويدا:قاعد عندك نيم بز؟
مروة:صقع عليك درت صفحه ع الفيس..
شهقوا الزوز بصدمه..وناضوا زحفوا ع ركابهم وجوها..
رويدا:ترا ورينا..
مروة بضحكه:باهي يامتخلفات..
وورتهم الصفحه وهما مذهولات..
كانت مسميه روحها "سدرة المنتهى"
رويدا:يهبل الأسم..
دعاء:عاد انتي بنية خالك ناصر التليفون منه والرصيد منه..
مروة:ماهو كلكم هواتفكم منه..
رويدا بضيق:معاش اذكريني بتليفوني..
دعاء:جبتيه لروحك..
رويدا:ترا صكريلي فمك مش وقتك بكل..
دعاء:لامانيش مصكراته شن بديري ترا..
مروة:يييه عليا..ترا بروا من حداي بروا..
رويدا:لا غير اعبي..وريني تاني شن عندك..
مروة حطت تليفونها ع كتفها وقالت:عندي سر..
شبحولها الزوز بتفنيصه وقالوا:شنو..سر شنو؟
هي تنهدت بإبتسامه ورفعت تليفونها وقعدت تبربش..
بعدين ورتهم الشاشه..
هما دكوا روسهم فيها بش يشوفوا كويس..
رويدا:حي محلى امه هدا منو؟
دعاء؛مروة ؟!
مروة:هادي صفحه عامه ياجاهلات وهدا طالب علم..يعني هكي بالفلاقي شيخ اخر سنه فكلية الدراسات الأسلاميه وماشاء الله على معلوماته وكلامه يهبل يهبل..
دعاء:وين لقيتيه..
مروة:بالصدفه والله..كنت ندور ع صفحة الكليه اللي بنقرا فيها مستقبلا ان شاء الله طلعت قدامي صفحته..
رويدا شافت اسمه وقالت:يوسف عمران..ماسموك يوسف من فراغ...
مروة ابتسمت..
دعاء:باهي انتي شن تبي فيه..
مروة تعكرت ابتسامتها وقالت:شي والله انتي تعرفيني كويس دعاء اني نتابع فيه وبس نستفيد منه وخلاص...
رويدا:ياسرك ياام العقد الوليد شيخ اصلا مش متاع الجو هدا..
وولت لفراشها..
دعاء شبحت لمروة لقتها تشوف لتليفونها بضيق بعدين غيرت عيونها ليها..
دعاء ابتسمت..
ومروة حتى هي وقالت :تعرفيني انتي..
دعاء بهمس:هدا علاش مش خايفه عليك..
كبرت ابتسامة مروة..
وولت دعاء لفراشها ورقدت.
ومروة طلعت من الفيس وحطت التليفون ع تركينه وغمضت عيونها..
⚘⚘⚘⚘⚘
تاني يوم..
الساعه 5:30 عصرا..
" يما اني طالع ماتبوا شي؟!"
طلع بدر يجري ع قد مايقدر وهو يقول:ماال ماال..
جاته رجاء تجري خداته وطباته وقالت:لا وخيي سلامتك بس..
وبدر يبكي ويقول:نبي..ماال..
رجاء:هي تعالى نلعبوا بالسياره..
بدر وهو يبكي:لالا لاا نبي مااال..
جمال ماتحملش دموع ولد اخته جاه طول وخداه منها وقال:تو نطلعه.
رجاء:لا انت طالع تشوف خطيبتك جمال تو يضايقكم..
جمال:بالعكس منال تفرح بيه لما تشوفه..
رجاء ابتسمت وقالت:باهي خل نعطيك شنطته..
جمال:نراجو فيك برا..
ومشي جمال ببدر طلع بيه..
وشويه ولحقاته رجاء عطاته شنطة فيها حاجات ولدها..
خداها جمال وطلعوا مع بعض..
بعد طلعوا رجاء تنهدت بألم وولت خشت للحوش..
🌻🌻🌻🌻🌻
فهالوقت..
كانت اختها نجلاء طالعه بسيارتها تلحق في راجلها اللي كان طالع كل يوم في نفس الوقت يقول عندي خدمه ومايروحش الا اخر الليل...
هي كانت شاكه..وتوا تبي تقطع هالشك باليقين..
🌻🌻🌻🌻🌻
وأهو جينا توا لمرت خالك تلعب انت وياها وتتعرف عليها لكن رد بالك تعاكسها يامعفن باهي..هههههههه.
خاش للمنتزه بولد اخته يدور عليها بعيونه لين شافها..
لما راها مشالها طول..
وصل فيها وقال:جبتلك معاي اليوم صاحبي الوحيد..
منال وهي مبتسمه بمجامله:اممم..بدوري شن جو..ومدت يدها..وبدر سلم عليها..
قعمز جمال جنبها..وعطاهولها.
هي خداته بالسيف وقعدت تلعب فيه مجامله لجمال بس..
وجمال يضحك ويقول:زي مااتفقنا بدوري ردبالك.
منال:على شنو؟.
جمال حول نظاراته وقال:قتله ماتعاكسهاش خالك حزار..
هي ابتسمت بخجل...وجمال يتأمل فيها بإبتسامه..
🌻وبدي بدر بالشطانه يبي يلعب ويجري وهما قعدوا يجروا في جرته وخلاص ومنال كانت قريب تنفجر لكن شاده روحها ع خاطر جمال..
.........
وفي مكان تاني..
وصل راجل نجلاء لعمارة..
درس السيارة ونزل بحاجات..
ونجلاء تشبحله ودموعها ينزلوا..
استنت شويه..
وبعدين مسحت دموعها ونزلت..
فوق...
فالشقه..
منصور:ترا شوفي جبت اللي قلتي عليه كله؟
زوجته:ايه حبيبي..متغدي ولانحطلك غدي؟
منصور:نجلا مادارتش غدي اليوم حطيلي..
زوجته بإمتعاض:ضروري تقول اسمها يعني..
منصور فنص فيها..
هي مشت طول من حداه وهي مضايقه..
اماهو مشي لولده عمره عامين قامه في غمره وقال:شن جو ياسبع..
فجأة طق الباب..
منصور:في حد من الجيران جايك؟
مرته من الكوجينه..
"ايه شكلها جارتي اللي قدامي ردتلي الصونيه افتح منصور بالله"
هو ناض طول وولده يقول:بابا كورة بابا..
منصور:باهي يابابا باهي..
وصل في الباب فتحه..
فالوقت اللي قاله فيه ولده
"بابا عتيني كورة"..
هو ماردش عليه..قعد واقف جامد في مكانه يشوف قدامه بصدمه شديده..
نجلاء بدموع وابتسامه اسف:ياريتك جيت وقتلي قبل يامنصور..كنا تفارقنا بإحترام اقل شي..
هو اربط لسانه ماقدرش يتكلم..
وهي طول نزلت تجري ودموعها ينزلوا ورا بعض..
استاقظ منصور..
خش يجري بالولد حطه لوطا ومشي يجري للباب وطلع وصكره وراه بقوة.
مرته التانيه طلعت من الكوجينه وهي مخلوعه شافت ولدها يلعب لوطا بكورته ومالقتش راجلها قالت:وين مشي!!؟
.....
وهو وصل لوطا يجري..
طلع من العماره لقاها كيف ركبت السياره..
مشي يجري لسيارته ركبها وشغلها وتحرك طول وصكر الباب والسيارة تتحرك..
وطلع وراها..
قام تليفونه واتصل بيها..
وهي تسوق وتبكي وماتبيش ترد..
عاود مرة واتنين وتلاته..
وارتبك وهويسوق..في الاخير حدف التليفون وضرب ع الدومان اكثر من مرة وهو يقول يعيط...نجلااااا..نجلااا..نجلاااا..
ونجلاء تسوق وتبكي بعبرتها..
هو لحق عليها وجي جنبها...وقعد يكلكس..
وهي ولامعبراته..
عقدت حواجبها بغضب وزادت سرعتها..
منصور بصدمه:نجلا..شن دير هادي!!!
ولحقها..
ولأنها تبي تتخلص منه معاش عرفت شن دير...
فجأة فقدت السيطرة ع السياره...وخشت بيها فبالو..
ومنصور دار فرينوا ووقف بالسيارة وهو ميت من خوفه ونزللها طول يجري..
⚘⚘⚘⚘⚘⚘
مكالمه هاتفيه..
"والله بناتك ياجميله جوهم مواضيع يامواضيع"
جميله بضحكه:لالا مروة ورويدا مازال وقتهم..دعاء شن المواضيع اللي جوها..
رقيه:حماتي عجبتها وتبيها لسلفها اللي يسكن في بنغازي..
جميله:لا وخيتي شن بنغازي هادي نبي بنتي حداي..
رقيه:حتى اني قلت هكي بتقولي..وكلمتني عليها حتى جارتي لكن راهو ولدها سمعته مش ولابد صكرته من عندي..
جميله:ايه احسن..
رقيه:لكن مرت خوك شكلها تبي لخوها حتى هي بس ماحددتش مني..قالوا خواتك يامن بنات جميله ولابنت رقيه..
جميله:اين فيهم..
رقيه؛هدا اللي قاعد في بنغازي..
جميله:لالا بعيد لا..
رقيه:حتى اني قلت هكي بنتي مش عاطيتها بعيد..ايه وهو هدا..
جميله:تو يجيهم نصيبهم ماعندنا علاش مستعجلين..
رقيه:صدقتي..
⚘⚘⚘⚘⚘⚘
في المنتزه..
جمال يتمشى مع منال في المنتزه وهو حاضن ولد اخته اللي كان راقد وشاد شنطته..
منال:هي تبيلك امتى تقدر اطلعها العده مازال هلبه ع ماتم..
تنهد وقال:ايه...بإذن الله بعد اتم مش حنخليها هكي..حنوقف معاها لين تولي تخدم وتعيش حياتها وتربي صغارها معانا احسن تربيه..
منال"معانا" ابتسمت بالغصب وقالت:اممم..
جمال:طبعا زي ماتعرفي اختي توا مسؤوله مني اني زي امي بالزبط..ولا؟
منال بإبتسامه مجامله:امم صح نعرف..
جمال ابتسم وشبح القدام وقال:كويس.
منال"عليك حظ حظك يامنال"..
فجأة..
رن تليفون جمال..
طلعه من جيبه شاف المتصل استغرب..
فتح الخط ورد:ايوه نجلا..............وقف بصدمه وقال...غير اهدي وتكلمي كويس فهميني خيرك؟..
ونجلا تشبحله وهي ترعش..
جمال:باهي باهي..جايك جايك..خلاص اسكتي..
ونزل تليفونه وصكر وقال لمنال:هيا تحركي لسيارتك بسرعه..
منال بخوف:شن في!؟
جمال بإنزعاج؛تي غير هيا يامنال تحركي بسرعه بالله عليك..
منال هزت راسها وقالت:باهي..باهي..
ومشت بسرعه لسيارتها وهو وراها..
ركبت..بعدين هو ركب ولد اخته للخلف وركب هو القدام وشغل سيارته..كلكس لمنال تحركت وهو لحقها لين وصلها..
بعدين ولى لحوشهم كلم اخته تطلعله برا..
عطاها ولدها وحاجاته ومشي من غير مايقول شي..
وتوجه طول للعياده اللي فيها اخته..
درس ونزل يجري..
خش للعياده لقاها قدامه ومعاها منصور..
هي لما شافاته جاته تجري..
جمال شدها من يدها وقال:شن في..
نجلا ببكي:نبي نطلق..
جمال:باهي تعالي نطلعوا برا تعالي..واشر بيده لمنصور يلحقهم..
..........
نجلاء ببكي:اني المخلوق هدا تحملته هلبه وصبرت عليه هلبه لهني وخلاص...
منصور:تعوذي من الشيطان يابنت الناس واسمعيني ارجوك..
جمال :لحظه لحظه انتوا الزوز الكلام هني مايجيش منه..انتي خلاص كشفتي وتأكدتي ان مافيك شي؟
منصور:لاالحمد لله مافيها شي السيارة بس اضررت في ستين ودرة تفداها..
نجلاء:معاش تتكلم عني ولانبي نسمع صوتك تقول غير كلمه وحده..انتي طالق..
ومشت من حداهم.
منصور شبح لجمال وقال:لو تسمعني ياجمال يا وخيي تعذرني..
جمال وهو رافع حاجبه قال:نسمعك لكن فحوشنا..
🌻وفعلا..
جمال مشي بأخته لحوش اهله ومنصور مشي وراهم..
ونجلا طول الطريق وهي تسب في منصور..
ومنصور طول الطريق وهو يسمع في اغنيه ليبيه حزينه عن الحب وعايش مشاعره معاها..
وهكي لين وصلوا لحوش اهل جمال..
...........
حدا الصالون..
كانوا واقفات صابرين ورجاء يسمعوا...
صابرين:الله يرحم بوكم هو اللي فرضه ع نجلا في قولة صاحبي يبيها لولده وصاحبي مانقدرش نرده..واهو شوفي وين وصلنا..
رجاء تنهدت بضيق وقعدت ساكته..
داخل..
نجلاء:جيتني كلمتني صارحتني..
ربع منصور ايديه وقال:لو صارحتك وقتلك نبي نتزوج..
نجلاء:والله ماكنت حنوقف فوجهك قتهالك من بعد مادرت العمليه فجيبتي فأحمد..قتلك برا تزوج وخلينا ننفصلوا بهدوء..
منصور:اها..قالت تبي تطلق...واني مانبيش نطلق..اني راجل مانتحشمش ونقولها بالفم المليان اني نحبك ومانقدرش نعيش من غيرك..
جمال رفع حواجبه..
نجلاء بتهكم:واللي يحب يحترم اللي يحبه مش
زيك انت ديما عيونك برا حتى واني معاك مش داير اعتبار لوجودي ياما تحملت من تلقيح وكلام زي السم نسمع فيه نجلا راجلها عينه زايغه..راجلها بصباص..راجلها مش مخلي مراة في حالها..
جمال شبح لأخته بأسف..
منصور وعيونه معبيات دموع؛ويقولوا قريب مات فجرتها لماخشت غيبوبه..وعطاها من دمه كياس ياكياس..ومات ناض حي ع خاطرها..ونهار ولت للدنيا وفتحت عيونها دار مهرجان مش عرس..الناس كلها تحكي بيه..
شبحله جمال واذكر هديكا الأيام ابتسم..
نجلا ودموعها ينزلوا:معاش نبيك خلاص حياة معاك معاش نبيها جيبلي وولادي وطلقني وخليني نعيش حياتي ونعوض ماضاع من عمري معاك..
وناضت ومشت من حداهم..
وهو يشبحلها بصدمه...بعدين شبح لجمال وقال:اني والله مامطلقها ياجمال لو اطير لو تجنح ياجمال..
وناض ومشي طلع من باب الصالون التاني..
جمال وزع نظره ع المكان..
بعدين مسح بإيديه على وجهه وتأفف وقال..
"أستغفر الله العظيم واتوب اليه"..
🌻🌻🌻🌻🌻
وصكرت راسها نجلاء ع الطلاق..
هو جابلها الولاد لكن حلف بالله طلاق ماهو مطلق وهي قالت بتعطيه مهله لوماطلقش بإرادته حترفع عليه قضيه..
ماحاولش جمال يعدلها عن قرارها لأنه من البدايه ماكانش عاجبه منصور وفي نفس الوقت وجعوه ولاد اخته المتعلقين ببوهم وماعرفش هالمره يدير حل جذري..
اما صابرين ركبها الهم..
كانت في بنت ارمله وتوا وحده تانيه تبي تطلق...قدامهم تبين انها عاديه بش مايقولوش امنا ماتبيناش ولاقالقه منا..
ومجرد ماتخش دارها تقعد تبكي وخلاص..
ومر شهر وهما على هالحال...
..............
خودي قرارك من توا يامنال راهو صدقيني كان خديتيه ماك متريحه ولاحتعيشي حياتك..
منال ببكي:ماما افهمي والله مانقدر نعيش من غيره ياماما والله مانقدر.. وحطت ايديها ع وجهه وهي تبكي بالعبره..
امه حركت راسها يمين ويسار ولفت وطلعت من الدار وصكرتها عليها..
🌻🌻🌻🌻🌻
الساعه 12:00ظهرا ..
كلية الهندسه..
رشاد:اميمه نبيك تجسي نبضها بس تهدرزي عليها وتشوفي جوها ووضعها..
اميمه"المعيده":باهي تمام فهمت عليك..
رشاد؛هي ديما تركب تقرا فوق فالوقت هدا بري شوفيها..
اميمه بضحكه:باهي..هي سلام..
ومشت ركبت..
رشاد تنهد بقوة ومسح ع شعره بعدين ابتسم ومشي..
وركبت اميمه وقعدت ادور في القاعات...
لين لقت قاعه فاضيه خشت قعمزت فيها..
شافت ع كرسي اماني بس المقعمزه تقرا ومامعاها حد..
اميمه"هادي صاحبتها...خل نسألها هي عليها أفضل"..
وناضت ومشتلها..
وقفت عليها وقالت:السلام عليكم..
قامت اماني عيونها وقالت:وعليكم السلام.
اميمه بإبتسامه؛نقعمز؟
اماني وهي مستغربه:تفضلي..
وقعمزت اميمه..
⚘⚘⚘⚘⚘⚘
حطيت البصله ع النار ردي بالك منها وابدي بوخي الرشده..
الخدامه؛حاضر..
نجلاء:تمام..
ولفت ومشت طلعت من الكوجينه بطريقها لدار المعيشه رن التليفون الأرضي..
مشتله وقامت السماعه وقالت:ايوه.
"ياعمري..ياحياتي..وراسك وراس صغارنا ياعمري ولي"
نجلا:قتلك مليون مرة قبل معاش تحلف بغير ربي..
منصور:باهي بالله عليك..نجلا بنهبل اني راهو بنخش للخلا..
نجلا:خش وان شاء الله معاد تطلع باهي..
وصكرت في وجهه التليفون..
ومشت وهي معصبه لقتها رجاء من شكلها عرفت خيرها.
رجاء بضحكه:اتصل؟
نجلاء بغضب:سحيقه..
وخشت للدار..ورجاء وراها وهي تضحك..
🌻🌻🌻🌻🌻
والله هي ع حسب مانعرف متكلمين فيها..
اميمه؛-قصدك مخطوبه؟
اماني:ايه تقريبا قريبها هكي..
اميمه رفعت حواجبها وقالت:اها...
اماني:تبي تكلميها ع حد قبل..
اميمه:قبل..
اماني:هلبه مواضيع جوها فالجامعه وهى ترد فيهم وتقول عاطيين فيا كلمه..يخي قلنالها تلبس دبله لكن هي قالت مانبيش نلبسها لين تصير حاجه رسمي..
تنهدت اميمه وقالت:امم..باهي مشكورة وسامحيني ع الإزعاج..
وناضت من حداها..
واماني رفعت حاجبها وقالت:ولايهمك..قعدت معاها بعيونها لين طلعت بعدين قالت..تقول ربي ماخلق كان هالدعاء...
........
فهالوقت كان رشاد واقف لوطا يراجي على نار..
ودعاء والبنات جو من الكافتيريا طول للدروج بيركبوا لما شافهم رشاد اتفاجئ...
ركبوا...واميمه نزلت..
هو استغرب ومشالها طول...
وقف عليها وقال:اهيا ركبت بريلها..
اميمه بضيق:خلاص مش لازم رشاد فوته الموضوع..
هو عقد حواجبه وقال:علاش!!؟
اميمه تنهدت وقالت:البنيه طلعت مخطوبه..
رشاد بصدمه: من قالك!!؟
اميمه:لقيت وحده من صاحباتها فوق قلت خل نسألها هي خير..وقالتلي انها مخطوبه..وانك مش اول واحد طلبها هني وهي ترد فيهم لانها مخطوبه..
رشاد كور قبضة يده بقوة وشبح ايمينه وقعد يذكر في كل تصرفات دعاء معاه..وتوا بس عرف تفسيرها الصح..
فتح يده وقال بإستعجال:باهي باهي.. ع كل حال مشكورة اميمه..
ولبس نظاراته ومشي بسرعه..
واميمه رفعت حواجبها ونزلتهم بعدين تنهدت ومشت..

...يتبع...