__❄عيون_الجليد❄__

17

الحلقة17:
خرجت مالدوش صباح..نشف فشعري..رميت المنشفة عالسرير..رفدت حوايجي لي وجدتهم..لسبت سالوبات جين و تحتها تريكو فلحمر..كونفارس حمراء بلبيض..نشفت شعري درتلو تخاس..وقفت ضوية عند لمرايا..نشوف معا روحي..رفدت يدي مترددة حطيتها فوق خدي نتحسس فيه..مزلت نحس بلمستو ليلة لبارح..غمضت عينيا نتبسم وحدي..فلحظة رجعت صورتو و هو معنق هاديك تعدات بين عينيا..عضيت شفتي..نحبس فدموعي لي تجمعو فعينيا..تنهدت نبعد فهاد الافكار..اصلا ملي نضت و انا نحاول منفكرش فيه و منتفكرش لبارح..دايرة كامل جهدي باش نخرجو من راصي و من تفكيري..خرجت مالبيت..تلفت لبيتو..الباب مغلوقة..اكيد مزالو راقد..بزاف اسئلة دور فراصي..ادا راح معاها علاه رجع..علاه ولا بعد اقل من ساعتين ؟..فكرتو راح يبات معاها..مفهمتش علا ولا..
خذيت نفس طويل..رجعت تلفت لصالة دخلت..شعلت التيليفيزيون..نحوس على حاجة نلهي بيها روحي..درت قناة غناء زدتلو..خليتها و دخلت للكوزينة..فتحت لفريجيدار..جبدتالعصير عمرت..زدت جبدت القاطو..قعدت فوق الكرسي العالي لي لتم (هادوك لكراسا كيما تاع البيتزيريا)..يطل عالصالة..التيليفيزيون مقابلتني..بديت ناكل..شوية و تبدلت الغنية..تبسمت وقت سمعت غنية وائل جسار ~لمين هعيش~..غمضت عينيا..نغني معاها..كلماتها داوني لبعيد..طرت معا كلماتو و احساسو..وليت نغني معاه من غير ما نحس
"🎶لمين هعيش..بعدو هعيش املي..هتسوى ايه اياامي لو مش لي..و تسوووى ايه احلمي لو مش لي..🎶..من غيرو صعب الدنيا دي احس بيا و حياتي بعدو صعب اتعود عليها مش كل حب بيتنسي هنحب بعدو و لا كل حاجة حلوة بسهولة نلاقيها🎶🎶"..
منعرفش علاش..و انا نغني الحاجة الوحيدة لي كانت بين عينيا هي صورة هشام..عينين هشام..ضحكة هشام..صوت هشام..كل تفصيل صغير من هشام..حاجة فوق طاقتي..مشي بيدي..غزى افكاري و حتل عقلي و مبقاش يخرج مني..سكن فيا و استعمرني..
فتحت عينيا شوية شوية وقت شميت ريحتو..وقت دخلت ريحتو لداخل تاعي..و خلات قلبي يدق..تلفت ليه..طاحت عيني فعينو..متكي عالحيط يشوف معايا..نظرة مفهمتهاش..مركز معا عينيا..قد ما حاولت نفسر نظرتو مقدرتش..خيبة امل..وجع..منعرف واش بالضبط..بقينا لثواني ساكتين..شوية و كملها وائل جسار.."🎶حياتي ليه و حياتي وقفة عليه🎶