البنات

الجزء 20

:اديني فرصه افكر

خالده قالت ليها

:تفكري في شنو يابت ودعمتك ورايدك وعايزك وعارفه وحافظه مامحتاجه فرصه للتفكير تاني

:خلاص يااحمد بعدين بديك ردي

:لا اسي بس تدي ردك يااميمه انا ما ح امشي من هنا معاك البيت الا بعد تدي احمد ردك

:طيب .انا ..... انا ماعندي مانع

احمد دا عايز يطير من الفرحه وخالده قامت علي اميمه حضنته عليها شديد وباركت ليها بي فرحه كبيره جدا جدا ايهاب بارك لي احمد وقعدو مسافه اتونسو وطلعو ايهاب ودعم ومشي واحمد وصلم البيت دخلو جوه وهم مبسوطات شديد من دخلو لقو امهم ولما شافتم داخلات وهم مبسوطات

:ان شاءالله دايما مبسوطات يابناتي فرحو امكم معاكم

خالده قالت ليها

:بتك اميمه جاها عريس

امها زغردت من الفرحه

:والله الف مبرووووك خبر السرور يابتي دا منو

:احمد ودعمتي

:ماشاءالله تبارك الله تستاهل والله اميمه صبرت وربنا اداها الاحسن

اسماء حضنت عليها اميمه شديد وقعدت تبكي من الفرح احساس الامومه احساس عجيب فرحته في اللحظه دي اكبر من فرحه اميمه زاته الام هي البتربي هي البتفرح هي البتتالم هي البتحزن هي البتشيل همنا هي البتعاني لما تحصل لينا حاجه وهي البتكون في قمه السعاده لما ننجح او نفرح اسماء عاشت معا اميمه حزنها كلو ولما عرفت اسي بالخبر السمح دا فرحت لما بكت دموع فرح ودا احساس براهو هند ورانيا ونهي جو وهم مبسوطات وباركو ليها

بهناك احمد اول ماوصل البيت دخل وهو بكورك لي امه وابوه

:ابووي اميي ابووي اميي

ابوه وامه كانو قاعدين في الهول

:باركو لي باركو لي اميمه وافقت ياامي وافقت ياابوي ابوه قال ليهو

:مبرووووك ياولدي الف مبروووووك والله ربنا يهنيك ويسعدك ياولدي

امه وهو مبسوووطه شديد

:مبرووووووووووووك ياولدي والله مبروك صبرت وربنا حقق ليك مرادك

:اي والله ياامي البصبر ربنا مابنسي وبدي مرادو الحمدلله ياامي الحمدلله يالا ياابوي اتصل علي خالي وكلمو انو ماشين ليهم بكره نعقد علي اميمه

:ههههههه اصبر ياولدي

:صبرت كتير ياابوي انت كلمو بس

:حااضر ياولدي انا سعادتك عندي بالدنيا

ابوه طلع التلفون واتصل علي الصادق وكلمو انو بكره جاينهم يعقدو علي اميمه

:اها كدا مبسوط ياولدي

:مبسوط وبس انا طاير من الفرحه ياابوي

دخل احمد جوه علي اخوانه يكلمم

الصادق اتصل علي الفاتح والشفيع ونوال وكلمم بي عقد اميمه

بيت الصادق رجعت الفرحه فيهو من تاني الصادق نادي خالده

:تعالي يابتي بكره احمد جاي يعقد علي اميمه اختك خلي ايهاب يجي بكره عشان نلاقي ونعرفو ويعرفنا

:حاااضر ياابوي

خالده اتصلت علي ايهاب وكلمتو انو يجي يتقدم ليها بكره

تاني يوم البيت كان مبالغه الناس شغاله تجهيزات من الصباح والزينه والفرحه ماليه البيت

المسا كان البيت جاهز لي استقبال الفرحه الجايه ايهاب جا معاهو ابوه وامه واخوانو واخواته وقعدو معا الاسره واتعرفو ببعض وبعد صلاه العشا جا ابو احمد ومعاهو اعمامو وامه والزغاريد ماليه الحته كلها جا الماذون وتم العقد ابو ايهاب قال ليهم

:ياجماعه نحنا والله سعيدين اننا بنناسب اسره ملانه محنه وحب زيكم انا من راي انو ايهاب وخالده نعقد ليهم اسي والزواج علي راحتم

الصادق قال ليهو

:مافي مانع يااخوي

الفاتح قال ليهم

:ونتم ليكم الفرحه كمان انا زاتي عايز اعقد لي عبدالسلام ولدي علي هند

الصادق قال ليهو

:هي بتك ياالفاتح اخوي والبتشوفو اعملو

تم العقد والفرحه ملت البيت بي صوره مبالغه اميمه وخالده وهند التلاته تم عقدهم قامو الناس وباركو العقد لي الصادق والفاتح وابو احمد وابو ايهاب المره دي الفرحه جاتم كبيييره

الصادق قال لي الفاتح والشفيع اخوانو

:زمان كنتو بتقولو لي عرس وجيب ليك ولد يسندك ويشيلك اها شفتو البنات زاتم جابو لي احسن اولاد سند ليهم ولي والله كان جبت اولاد مااظن يكونو زي احمد وايهاب وعبدالسلام الحمدلله الحمدلله ربنا بكرمنا بالزريه الصالحه نحنا نحمد ربنا عليها وكان ولد او بت ببقي في يدك تربيهم كويس وتعلمم وتقوم سلوكم وتخليهم ينفعو نفسم وينفعوك انت وينفعو المجتمع والحمدلله بناتي فرحوني واسعدوني جدا جدا والحمدلله وبكره رانيا ونهي بتجيهم قسمتم اذا ربنا هون ويشوفو حياتم وين بعدين نحنا لما نكبر مافي زول بتحملنا الا بناتنا مره الولد مهما كانت طيبه وبت ناس ماحتكون زي بتك بتمني انو الفرح يدوم علينا كلنا والموده البينا دي اولادنا وبناتنا يواصلو فيها من بعدنا لانو المحنه البين الاهل هي البتخلي صله الرحم متواصله علي طول ماتنقطع نهائ والبقع بسندو والبحزن بخففو عليهو والبتحصل ليهو مشكله بحلوها ليهو والبفرح بكونو فرحانين ليهو واسي نحنا فرحانين كلنا والحمدلله ربنا يديم الفرح بينا

واخدو صوره جماعيه كلهم عشان تكون تزكار للموده والمحبه البينم

وكدا انتهت قصه البنات وبتمني اني اكون وفقت في تقديم مايفيد وماينال اعجابكم ولكم كل ودي واحترامي والا ان نلتقي في روايه قادمه بأذن الله

#الفاضل #انصاري #ابورتاج