"إلا أن يشاء الله"

الجزء السابع

✒...
وتمر الأيام..
وكل حد لاهي بهمه وحياته..
وهم بنات جميله حاليا قرايتهم وبس..
بالذات مروة شهادة اعداديه تبي تجيب نجاح بتقدير عالي حتى وان كانت تبي تخش ثانويه غير علميه بش دخلها بعدين كلية الدراسات الإسلاميه الا انه يهمها تنجح بتفوق..
كذلك رويدا اللي تبي تخش هندسه زي اختها كان همها كله قرايتها وماتبيش تلتفت لأي شي تاني غيرها يكفي اللي صار فيها قريب ضاعت بسبب مشيها ورا الغلط..
وبرغم محاولات "رائد" صاحب محل مواد الزينه معاها كانت مسكره في وجهه بابها بقوه وهو كل ماله الموضوع يزيد يكبر عنده ويولي جدي اكثر..
اما دعاء..
كنت لاهيه بقرايتي بس..لاحظت ان رشاد معاش زي قبل تغير فيه شي حركاته وتصرفاته ونقول اهتمامه شبه انعدم..يعني حتى لوصار وشفته فالكليه فبالصدفه...مش عارفه شن صارلي وقتها حسيت اني مضايقه هلبه ووجعتني روحي مش عارفه علاش..يعني اني بيني وبينه ماصار شي..بس هكي حسيت...
قعدت نتجاهل وخلاص زي عادتي ومن داخلي كان قلبي يوجع فيا..
🌻وجت فترة الأمتحانات النهائيه لرويدا ودعاء وداروها وكانوا راضيات ع انفسهم وضامنات النجاح بإذن الله..
وقعدت مروة اللي امتحاناتها مازالوا..
طول اليوم وهي ياتقرا ياتصلي وتقرا في القرآن وكل اللي فالحوش مريحينها اخر راحه..
خلال هالفتره..
كانت المقاطعه متواصله بينهم وبين حوش جدهم حتى ان وحده من نساوين عمامهم جابت ودارت لمه هما ماحضروهاش...
وبالنسبه لمحمد فبعد فتره من المقاطعه رجع يكلم في مرته وصغاره زي قبل..ويحاول يرضي الطرفين اهله وعيلته..
⚘⚘⚘⚘⚘
اما عند جمال وعيلته..
فبدت رجاء تطلع شويه شويه من حالة الإكتئاب والحزن ع خاطر ولدها والعيل اللي في بطنها..طلع ولد حتى هو..ووجود نجلا معاها ساعدها كذلك..
نجلاء اللي قررت ترفع قضيه طلاق ع منصور خلاص..
ولما جت كلمت جمال عنها..حاول يخليها تعدل عن قرارها لكنها تمسكت بيه..وهو طبعا حيدعم اخته وبدي يجريلها ع القضيه..
وانشغاله بهموم ومشاكل خواته وصغارهم..
كان مخلي منال توصل لأقصى مراحل التذمر..بالذات وان هالحال حيستمر لفترة طويله حتى بعد زواجهم..
الاانها بسبب حبها لجمال تحاول تتغاضى وتتأقلم وتتحمل..
بس ياترى لعند امتى؟؟!..
🌻🌻🌻🌻🌻🌻
واقفه ع الحوض في الكوجينه تغسل فماعين الغدي..
خشت عليها امها حطت التليفون ع دولاب الكوجينه وقالت:فرخه رويدا اخرلك فرصه راهو..
رويدا التفتت وشافت تليفونها قريب طارت من الفرحه وقالت لأمها بضحكه فرح:خلاص ياماما اني تبت ارتاحوا انتي وبابا..
ضحكت جميله ومشت طلعت من الكوجينه..
ورويدا التفتت للماعين وقعدت تغسل فيهم بسرعه..
بعد كملتهم..ضمت الكوجينه ع السريع..
ومشت تجري لتليفونها خداته..حاولت تفتحه ماباش ينفتح زبطت ان شحنه تام..
مشت تجري للدار خشت ع خواتها اللي كانوا راقدات..
خدت شحنها من الدولاب وجاباته لبريزه حدا فراشها حطاته فيه...
وشويه وفتحت تليفونها..
لحظات وبدوا يهلوا عليها رسائل بالهبل..
منهم من صاحبات السو..طول حدفتهم وحدفت ارقامهم..
وفي رساله جتها من بنيه تقرا معاها ع القرايه قديمه..
ورساله كانت من نصري
(شن حالك توا ان شاء الله كويسه)
كانت قديمه من التاريخ اللي قاللها فيه نصري عن حقيقة ابراهيم..
تنهدت وبعدين فتحت الاخيره..
(مرحبا..اني رائد اكيد عرفتيني..ارجوك عطيني فرصه معاك والله نيتي صافيه وقصدي شريف اقسملك بالله)
رويدا بصدمه:من عطاه رقمي !!..اني الشفره هادي شكلي بنغيرها وخلاص..لكن من بيغيرهالي!!؟...تس..
خل ندير لرقمه تحويل وخلاص..
ودارت التحويل..ومسحت رسالته وحطت تليفونها وتمددت ع الفراش بش ترقد حتى هي..
⚘⚘⚘⚘⚘
وتستمر الأيام تمر..
ويجي اسبوع امتحانات مروة..
وكانت فهداكا الأسبوع في قمة التوتر والقلق وبش يخفف عليها بوها توترها مايخليش فيها تمشي وتروح ع رجليها كان هو يرفع ويجيب..
وامها تقول تمتحن معاها..حتى هي متوتره زيها..
تساعد فيها فالقرايه..وتسمع عليها مرات..وكل مرة ديرلها حاجه مرة حليب وزنجبيل مرة صونيه فواكه من الموجود وهكذا..
دعاء..
كلنا كنا نفكروا في مروة زي مافكروا فينا اني ورويدا زمان في امتحانات الشهاده..هكي تحسوا الحوش كله يمتحن..
وماتمر هالأيام الا وحني كلنا اعصابنا تالفه..
المهم كملت مروة امتحاناتها..وبعدها ممكن بيومين على مانذكر مشينا لحوش جدي من امي بنقعدوا عندهم اسبوع..حوش جدي في حوازة كبيره وخوالي بانيين حداه..
حني نقعدوا نراجو امتى نتموا قرايه بش نمشوا غادي نغيروا جو...
وفعلا الاجواء فاليومين الأولات كانت جدا جميله..
وفي ثالت يوم...
🗝جتهم مرت خالهم ريمه بتتغدا عندهم في حوش العيله..
كانت طول الوقت عيونها ع بنات جميله..بس ركزت ع دعاء لأنها اكبرهم...
بعد تغدت وساعدتهم في الماعين روحت لحوشها..
وقعمزوا خوات جميله مع جميله وقعدوا يهدرزوا..
وحده من خواتها قالت:ريمه حاطه عينها ع بناتك وتبي دعاء تحديدا..
جميله:بناتي!! نحساب بنات العيله وخلاص.
:لالا من الأول قالت عاجبينها بناتك وتبي وحده منهم لخوها اللي قاعد في قبرص..
جميله بآستغراب:قبرص ولابنغازي!؟
:لا قداش ليه قاعد في قبرص خوها يخدم غادي بينها وبين تركيا وبنغازي معاش يمشيلها كان زيارات..
اختها التانيه:يخدم فالتجاره وفي نفس الوقت مترجم فالقنصليه الليبيه في قبرص..
:وفلوس وعز وغير هكي خوك يشكر فيه راجل صلاي اوقاته فالجامع ومستقيم..
وهما يحكوا ع مميزات خو ريمه وجميله تفكر فاللي قالاته اختها رقيه وماعرفتش كيف تفسره..
برغم ان تفسيره واضح بس جميله ماكانتش تبي تنصدم في اختها حتى هي..
🌻زماننا هدا معاد حد يستغرب فيه شي كل شي وارد اختك تحسدك زي ماتحسدك حماتك وسلفتك مافيش فرق رابط الدم مايغير شي🌻
بلعتها جميله ومشت وقالت لخواتها:برغم اني مانبيهاش بعيده عليا بس الميزات اللي فالولد مخليتني نتشجع نفتح معاها الموضوع وان شاء الله خير..
وعدا باقي الاسبوع والبنات غيروا جوهم مع خالاتهم وخوالهم اللي قعد كل مرة واحد يطلع فيهم ومايخلوا ماياخدولهم من ماكله وهدايا..وطبعا ع حسب المقدره..
وفي اخر يوم..
كانت العيله كلها ملتمه حتى من البنات المتزوجات غير جميله..
جميله كانت واخده موقف من اختها رقيه..
رقيه اللي كانت تحاول تتقرب اكثر من ريمه هي وبنتها ويبوا يديروا معاها صحبه برغم ان رقيه ماكانتش تبي خوها ياخد ريمه قبل...
جميله هني قررت ماتفتحش الموضوع مع دعاء..ماتبيش خواطرها هي وبنتها ينكسروا كان ريمه غيرت وخدت لخوها بنت اختها رقيه..
وكلت الأمر لله وقالت في نفسها"لو كانه من نصيبها حيجيها غصب عن الكل"..
⚘⚘⚘⚘⚘⚘
🌻وخش رمضان..
موسم الطاعه والتسامح..
ايه التسامح..يعني جميله مشت هي وبناتها لحوش شيابينها تهني برمضان..وشرقيه وامها استقبلوهم عادي وكأن ماصار شي..
هما هكي متعودين..
المهم..مرت ايام الشهر المبارك الحلوة..عاديه بدون مايصير فيها أي شي جديد...
🌷لكن عند حوش اهل جمال..
بعد ماتناصف الشهر جي موعد ولادة رجاء..
تعبت هلبه رجاء فهديكا الليله..
مشوا معاها نجلاء ولحقتها عطاء..
وبعد معاناة جابت وليدها التاني قبل الفجر بساعه...
جمال يومها واصل 26 ساعه مارقدش فيهم كان غفوات بسيطه وهو بين امه والصغار اللي قعدوا في الحوش..واخته وخواته اللي فالعياده..
الساعه 10 صباحا..
وجدي:والله لما تروح الله..اني وآلاء قاعدين ياراجل خيرك..
جمال وهو مرهق:مايجيش ياوجدي..
وجدي ضحك وحط يده ع ظهر جمال وقال:ياراجل بترقد وانت واقف برا روح برا..
مسح عيونه بيده بعدين هز راسه بإيجاب وقال:هيا نجلا..
ومشي..ألاء بضحكه:سوقي انتي يانجو
نجلاء هزت راسها بإيجاب وهي تضحك..وخدت المفتاح من خوها وتعنقت ذراعه وقعدت تمشي هي وياه..
وجدي ابتسم وقال:ربي يحفظه.
آلاء بإبتسامه:اللهم آمين و يفرحنا بيه..
وجدي شبحلها وقال:ان شاء الله..هي خشي لأختك..
آلاء:حاضر..
ومشت خشت لاختها..
ووجدي مشي بينزل..
🌻روح جمال للحوش..
ورقد بس 6ساعات..وبعدين ناض صلى العصر ومشي طول للعياده..
فالعياده شاف ام وخوات مروان جايين يزوروا رجاءفرح هلبه..
وقبل المغرب روحوا وهو روح بأخته وولدها..
وبعد التروايح مباشرة ولوا اهل مروان وماخلوا ماجابوا معاهم..
حاجات البيبي كلها من ألف الياء وجابوا لخوه بدر هدايا حتى هو...
ورجاء فرحت هلبه بوجودهم حواليها..
الا ان هاللمه خلتهم يذكروا مروان..ويسترجعوا فذكرياته من هو صغير ويبكوا عليه...
🌻🌻🌻🌻
وعدوا من هداكا اليوم 4ايام..
في العشر الأواخر من شهر رمضان..
فالسوق..
كانت نجلاء طالعه بصغارها بتشريلهم دبش ومعاهم ولد رجاء اللي كان شاده جمال..
نجلاء:مش قبل بتطلع معانا حتى منال وامها علاش غيرت رايها..
جمال:جتهم خالتها قالت..
نجلاء:اممم..باهي عندك علم ياجمال ان منال لتوا مااتصلتش برجاء بكل وباركتلها..
جمال قعد ساكت وهو يشبح القدام..
نجلاء:اني والله مانبي نعبيك عليها بس الحركات هادي غلط ومش فصالحها بكل..
جمال تنهد وقعد ساكت..
ونجلاء سكتت كذلك وبعدين لهت مع صغارها ودبش العيد..
.........
في الحوش..
تحديدا داره...
مكالمه هاتفيه..
جمال:انتي المده الأخيره بشكل عام متغيره هلبه ونحس فيك جابده روحك حتى مني اني..
منال بضيق:لالا صدقني لا بس نفسيتي تاعبه ع خاطر الإمتحانات..
تنهد وقال:واني عارف وعاذرك حبيبتي..لكن نبي منك توا مجرد تصكري مني تتصلي برجاء تمام..
ابتسمت وقالت:ان شاء الله..
جمال بإبتسامه:و قولي لعمتي غدوة ان شاء الله بنجي نفطر عندكم..
منال:اهلين ومرحبتين بنور العين..
جمال:هههههههه..
🗝وبعد ماهدرزوا شويه تانيه مع بعض انهوا المكالمه..ومجرد ماصكرت منال من جمال اتصلت برجاء طول وكلمتها وتعذرتلها بالأمتحانات ورجاء كلمتها عادي جدا..اساسا ماكانتش واخده منها موقف..
🌷واليوم اللي بعده جاهم جمال بش بيفطر عندهم..
جاب معاه باقة ورد وحلويات وشكلاطه وبوكس كبير احمر ع هيئة (قلب) ملفوف بشريط ابيض..
دخلوه خوت منال لمنال...
لما فتحاته لقت فيه لبسه كامله ووشاح..
وبوكس فيه كندرة وشنطه وعطر..ومكياج وكيسه صغيره متاع مجوهرات فتحتها لقت فيها تعليقه ذهب خفيفه وحلوة..
فرحت بيهم منال هلبه..
وشويه وناداها بوها بش تطلع تهدرز على خطيبها شويه فالجنان..
ع نفس الطاولة مقعمزين يهدرزوا..
منال:حبيبي وروحي انت نحبك اكتر من كل شي فالدنيا..
ضحك جمال وقال:والله مالازم منو هدايا وجو وانتي تعرفيني مانحبش الساعات هلبه..
منال:ع خاطري البسها العيد هدا جيمو باهي..
جمال ابتسم وقال:من...غمض عيونه وفتحهم..معناها "عيوني"
وهي ضحكت..
وامها تتفرج عليهم من فوق وتقول:اضحكي توا ياهبله بعدين ياقعادك تبكي وتندبي..
⚘⚘⚘⚘⚘
وجي العيد..
عيد الفطر...اللي ديما اجوائه تكون حلوه الصبح بس..
دعاء..
روتينا حني فأول يوم..نقعدوا سهرانين للصبح لعند مايروحوا بابا وخوي من صلاة العيد نعيدوا عليهم ونرقدوا لل11 بعدين تنوضنا امي نلبسوا ونمشوا نعيدوا على حوش جدي..
نقعدوا ساعه بس بعدين نروحوا ونرقدوا طول...
اليوم الأول ممل عندنا حني..
⚘⚘⚘⚘⚘
بينما جمال بعد صلاة العيد..مشي دار ع عمامه واحد واحد عيد عليهم برغم انهم تعاملوا معاه بشي من الجفاء..لكن هو مادورش المهم يدير واجبه...
بعدين مشي عيد ع صحاب بوه...
وبعدها مشي للمقبرة يزور قبر بوه...ومنه يروح للحوش..
يفطر مع امه وخواته..ويركب لداره..يكلم منال شويه ويرقد طول..
لآذان الظهر..ينوض يصلي ويتغدا...وبعدها يولي يرقد للعصر..وبعد الصلاة خدي خواته وصغارهم وطلعوا...
حط امه ورجاء في حوش اهل مروان..
ومشي هو ونجلاء والصغار لمدينة ألعاب معروفه في طرابلس...
🌷🌷🌷🌷
في حوش جد منال..
كانت العيله تحكي في موضوع منصور خوهم اللي صايره فيه حاله بسبب فراق نجلاء وصغارهم..
وحده من خوات منصور:ردت عليه حتى الحوايج اللي جابهولها هي والصغار قتله خوي خدالي..
ام منال:ياودي المراة بايعه راهو ومعاش تبي قالتلي منال بعد رمضان بترفع قضيه..
كلهم انصدموا..
وحده تانيه من خواته قالت:معقوله!!؟
ام منال:والله زي مانحكيلكم...
⚘في جهة تانيه من نفس الحوش كانوا ملتمات بنات العيله..منهم متزوجات ومنهم مخطوبات..
وحده من المتزوجات قالت:هادي تالت سنه لينا مع بعض وتالت رمضان نقضوه برا والحق في تركيا قنين لكن مش زي ليبيا طبعا..
وحده مخطوبه قالت:حلوة تركيا نفكر نخليها في برنامج شهر العسل تو نقول لموسى عنها..
وحده متزوجه:نصيحه للمخطوبات احلا ايام الزواج الأولى هيجوا فيها لين تشبعوا ومادا بيكم تفوتوا موضوع الصغار ع الأقل 6 شهور الأولات لأنهم حياخدوكم من بعض..
🌻ومنال تفكر فكلامها وهي مخنوقه وتقول فنفسها "ياريت جتني في حكاية الإنجاب بكري ولامتأخر" وكل مالها تزيد تفكر في شكل حياتها هي وجمال بعدين وتزيد تنخنق اكثر واكثر...
⚘⚘⚘⚘⚘
تاني يوم العيد..
كانت العيله ملمومه في حوش اهل محمد..
والبنات مع امهم من العشيه كانوا غادي...
كانت الأجواء عاديه بعض الشي..يعني خاف شويه التلقيح..
بس كانوا جميله وبناتها ساحبين نفسهم من مرت علاء وشرقيه ملاحظتهم وعاجبها اللي صاير..
عيشه:رويدا ترا نوضي اغسلي الطواسي..
ناضت رويدا وقالت:حاضر..
خدت الصفره ومشت طلعت للكوجينه..
بعد ماخشتلها بشويه خش نصري بيشرب ميه شافها عاطيه بالظهر وتغسل فالطواسي..
نصري مسح ع لحيته وقال:شن جو رويدا..
هي انخلعت والتفتت وقالت بضحكه:خلعتني..
هو ضحك وقال:اسف..
رويدا وهي تضحك:تمام شن جوك انت..
نصري حط ايديه في جيوبه وقال:تمام ماشي الحال..طلعت نتيجتك قالوا ونجحتي..
رويدا بإبتسامه:ايه الحمد لله..
نصري تنهد وطلع من جيبه حاجه وجي لرويدا وقال:ماعرفتش امتى نعطيهالك واهي جتني الفرصه..
هي بإستغراب:شن هي هادي؟
نصري وهو محتشم شويه:هديه بسيطه..
رويدا قعدت تشبحله وخطر عليها اول مرة قربلها فيها ابراهيم كان ليه نفس الأسلوب..
طول ارتسمت على وجهها ملامح الضيق..
ع خطمه ابراهيم من قدام الكوجينه راهم رفع حاجبه ووقف يشوفلهم..
رويدا بضيق:اسفه مانقدرش ناخدها..
ولفت وخدت الصفره..
نصري:رويدا ماتفهمنيش غلط صوابع ايديك مش زي بعض راهو..
هي فاتت من حداه وعيونها لوطا ومشت للباب..
هو لف بيلحقها شاف ابراهيم واقف يشوفله برفعة حواجب..
هي لما شافت ابراهيم زادت تنرفزت وقالت بعصبيه:ترا وسع..
شبحلها ورفع حاجبه اليسار ووخر...وهي مشت طلعت..
خش ابراهيم واشر لنصري وقال:خليك راجل واطلع توا الحقني بالسيارة..
ولف ابراهيم ومشي..
نصري بتهكم:شوف من يتكلم ع الرجوله!..
ولحقه..
⚘⚘⚘⚘⚘⚘
في مكان تاني..
كانت عيله جمال طالعه مع منال وامها دهواري..
واستقر بيهم المآل لمدينة الألعاب ع خاطر الصغار..
مشوا جمال ومنال مع الصغار..
والنساوين قعمزوا مع بعض..
ام منال:مانبيكش تزعلي مني يانجلا لكن انتي بعد ماحولتي الرحم مفروض تكوني متفهمه لمنصور لو خدي عليك..
نجلاء:والله لو انتي عندك عادي راجلك ياخد عليك وتقعدي عايشه معاه عادي اني لا..
ام منال:لما يكون عندي منه صغار نقعد ونتحمل ع خاطرهم..
نجلاء:مش مجبره ع خاطر شي نتنازل ع كرامتي ساد مافوتتله وانتي تعرفي قداش مفوتتله..
ام منال:والصغار..
نجلاء:لاهم اول ولااخر صغار بوهم وامهم ينفصلوا..
ام منال:لاانتي خلاص واخده قرارك ومصرة عليه..
نجلا:ومستحيل نرجع عنه..
ام منال تنهدت وقال:الله غالب..
وصابرين وبناتها يشبحولهم من بعيد شويه وهما يهدرزوا..
الاء:مصكرة راسها نجلاء خلاص..
عطاء:احسن.
صابرين:اسكتي انتي..
عطاء:لا مش ساكته ماما احسن واحسنين يخي افتكت منه..
قرصتها صابرين..
عطاء:احح ياماما..
والاء ورجاء يضحكوا..
🌷وحدا الألعاب..
منال:اني نفكر في اكثر من دوله..
جمال:ايهم..رد بالك من خوك..
منال:تس جمال تسمع فيا..
هز راسه وهو يشوف للصغار:ايه ايه حبيبتي كملي..
منال تنهدت وقالت:ع شهر العسل قتلك فكرت في اكثر من دوله..قبرص..و...
جمال:لاااا لايابدر..
وقام سوريته العربيه ومشاله يجري..
وطبه وقعد يركب فيه فالزحليقه مع الصغار وبدر يتزلحق ويضحك بفرح..
وجمال يضحك معاه..
وصغار نجلاء جو وقفوا يكلموا فيه واشروله ع لعبه تانيه..
ومنال تشوفلهم وهي واصله حدها خلاص..
لفت ومشت للنساوين وهي معصبه..
وجمال من كثر ماشغلوه صغار خواته نساها...
⚘⚘⚘⚘⚘
في مكان شبه فاضي..
درسوا سياراتهم ونزلوا..
ابراهيم:اقسم بالله ماتتحشم ولاتجي راجل اللي تحط عينك ع البنت اللي يبيها ولد خالك..
نصري:قصدك البنت اللي يضحك عليها ولد عمها..ولد عمها اللي يفوت بيها فالوقت..راجل اللي يدير هكي في بنت عمه يااا هيما ياراااجل؟!
قدمله ابراهيم وضربه بوكس وقال:نبيها من جدي ياحيوان مانضحكش عليها..
ردهوله نصري وقال:انت يا#### قتلي بروحك مش جديات معاها..
ابراهيم بعصبيه:كنت نخرف نهتري مانعرفش شن نقول..جاه وشده من دجاكته وقال..فوتها احسنلك يانصري..
نصري شد يده ونزلها بقوة وقاله..خلاص عرفت كل شي عليك ولخليقتك معاش مازال تشوف ياوسخ..يا####
جي بيضربه ابراهيم مرة تانيه شد نصري يده وعوجها وحطها ورا ظهره بعدين دفه وطيحه..
مسح فمه ومشي عنه وخلاه..
وابراهيم ناض وهو ينفض فحوايجه يكح ويمسح في فمه وهو يشبحله كيف ركب السياره بنظرات غل..
⚘⚘⚘⚘⚘
الساعه 9:00ليلا..
خشوا للحوش..
وجمال قايم بدر اللي كان راقد..
ونجلاء خاشه بصغارها ...
مشي جمال للدار اللي تقعد فيها اخته..
نجلاء بعد مشي قالت:ريتوها كيف قعدت قالبه وجهنا علينا هي وامها..
رجاء:نحس فيها كانت تبي تقعد هي وياه برواحهم..
نجلاء:وتبي حوش بروحها بعدين..
صابرين:عادي يشري حوش حدانا..
نجلاء:جمال مايرضاش يخلينا برواحنا..
صابرين:وعلاش شن بيصيرلنا كان قعدنا برواحنا؟!
نجلاء:كيف يام تبينا نقعدوا نساوين برواحنا من غير راجل!
صابرين بحده:اسمعي يابنت انتي ماتفسديش ع خوك ع خاطر انتي تبي تطلق من عم خطيبته..ماتخشيش بيناتهم يانجلاء خيرلك..
ومشت من حداهم وهي معصبه..
ونجلاء تشبح لأمها بصدمه..
ع جية جمال:رجاء رقد بدر خلاص..
رجاء وهي تشبح لنجلاء:باهي خل نمشي نحط مروان حتى هو..
ومشت من حداهم..
جمال شبح لنجلاء وقال:ركبي صغارك للدار بيرقدوا..
نجلاء شبحتله شويه بعدين هزت راسها ومشت للدروج..
اما جمال مشي طول طلع دار دورة ع السياره بعدين خش للحوش..
⚘⚘⚘⚘⚘⚘
مقعمزة فالدار بروحها ع خشة اختها عليها بعد طلعت من الحمام..
رويدا تنهدت وقالت:دعاء..
التفتت دعاء وقالت:اممم..
ناضت رويدا وجت وقفت قدامها وقالت:بنقولك حاجه لكن بالله عليك تكلمي معاي بدون عصاب..
دعاء تنهدت وقالت:قولي..
رويدا خدت نفس وقالت:اليوم نصري عطاني هدية وقالي بمناسبة النجاح واني ماخديتهاش منه رديته..
دعاء:يعني معاش تبي تخشي في معامع تانيه..لكن مادامك جاية تسألي معناها في شي شغلك..
رويدا قعدت تشبحلها بضيق..
دعاء:اني بننصحك نصيحه اكيد طبعا بنقولك فوتيه بس لسبب تاني غير اني مانبيكش اديري هالوجيج..نصري ولد عمة ابراهيم وانتي ولد عمتك نصري يعني من عيله وحده يعني اخيي بمعنى الكلمه موقفكم لو صار شي بينك وبين نصري بعدين..وحاجه تانيه نفرضوا انك خديتي نصري بعدين وهو عارف بالعلاقه القديمه بيناتكم مش مرات بعدين يقعد ديما شاك فيك ويديرلك ايام سود لو شافك بالصدفه خطمتي من حداه..تس تس رويدا وخيتي المواضيع هادي صكري عليها بالمرة توا انتي بتقري شهادة ثانويه..فكري فقرايتك بس وماتخلي شي يشغلك عنها زي ماأنشغلت اني ودرت دور تاني..
رويدا غمضت عيونها وهزت راسها بإيجاب..
بعدين فتحتهم وابتسمت..
ودعاء ردت الابتسامه..ع خشة مروة..
مروة:واااك قداش نكره ماعين العشي..
رويدا:مفروض ندخلوا معانا فرخه وفاق فالدور..
"هني جمالك يارويدااا"...صوت وفاق من الدار التانيه..
مروة ودعاء ضحكوا بصدمه
رويدا:ودانك صاطلايت يافرخه..زرقاء اليمامه..
مروة:وووك ياجاهله زرقاء اليمامه تنقال ع اللي نظرهم قوي ويشبحوا الحاجه زين من بعيد..
رويدا:باهي شن يقولوا ع اللي ودانهم الكبار!!؟
دعاء:فيل..
"فيل في عينك انتي تحسابيني سمينه زيك"..
دعاء:قليلة الأدب!؟
ومشتلها طول للدار..
وقعدت تضرب فيها ووفاق ميته ضحك..
⚘⚘⚘⚘⚘
ويعدوا الأيام...
وتطلع نتيجة مروة وتنجح بتقدير ممتاز..
يومها الحوش انقلب بالزغاريد قلب...
وهنوا البنات أختهم وغنولها اغنيه عبدالحليم وهي كانت طايره من الفرحه...
وامها يومها دارت عشي بسيط ونادت علي شرقيه وعزوزتها بس...
ومحمد جاب صفرة باسطي وفرقها ع خوته وعيلته..
دعاء..
حاجه بسيطه لاعزايم ولاحاجه كبيره ع قد مانقدروا والحمد لله..والله كنا نفرحوا من قلوبنا بهالإحتفال البسيط..
وبعدها بفترة طلعت نتيجتي وصفيت موادي كلهم والحمد لله...
بعد شهر ونص..ولينا لقرايه...
🗝حولت رويدا لمدرسه بتقرا فيها اختها مروة الثانوي والزوز بيوصلهم ويروح بيهم باص واحد..
المدرسه كانت ممتازة وسمعتها كويسه وادارتها حازمه...
ومن اول يوم البنات تعرفوا وانسجموا مع الأجواء الجديده عليهم...
اما دعاء..
لما ولت للقرايه...
وتلاقت مع قروبها سلمت ع اماني عادي وتصافوا وكأن ماصار شي بيناتهم...
🌻سكينه وهي شاده تليفونها وتوري للبنات فالصور..
دعاء:تهبل طلعت ماشاء الله..
ريم؛لكن راجلها الحق طلع كبير هلبه..
امال؛الحق وين خش انصدمنا الفرق كان واضح هلبه..
سكينه:لكن هي والله مامدورة الضحكه من الوذن للوذن وواثقه من روحها..
دعاء:ربي يهنيها ويسعدها..
ووقفت ع حيلها وقعدت ادور بعيونها فرشاد شافاته صدفه خاطم وخاش داخل..
هي انسحبت من حدا صاحبتها دون مايحسوا بيها وخشت داخل..
شافاته واقف ع استاذ يكلم فيه بعدين مشوا ركبوا من الدروج..
هي تنهدت بضيق ومشت ولت لصاحباتها..
⚘⚘⚘⚘⚘
الساعه 12:30 قبل الظهر..
خشوا جمال ونجلا للحوش..
نجلا بإنفعال:خل يهرب ومايحضرش هادي والزوز التانيات والمحكمه اطلقني منه ونفتك هالواطي هدا..
جمال بحده:نقصي صوتك..
نجلا مشت للدروج وركبت وهي معصبه..
شبح جمال لأمه اللي كانت واقفه تشوف لبنتها وهي راكبه بعدين شبحتله وقالت بحزن:الله يرحمك ويسامحك ياحاج..
وولت خشت لدار المعيشه..
جمال كان مضايق ع الآخر..
لف ومشي طلع من الحوش .
رن تليفونه قامه لقي منال المتصله.
وليها من الصبح تتصل..
جمال فتح الخط وقال؛منال بالله اليوم فوتيني مش رايق بكل..سلام..وصكر...ومشي طلع من الحوش..
انصدمت منال في طريقة رده عليها وهي اللي كانت ناويه اليوم تفاجئه واديرله احتفال بسيط بذكرى ميلاده..
بس اللي في حالة جمال يامنال باله مش فالحاجات هادي وصعب جدا يذكرها..باهي اللي قاعد متفكر اسمه وكل هالمسؤوليات فوق راسه...
لكن منال صعب جدا تقدر الوضع هدا..لأنها فعلا معاش قادرة تتحمله..
⚘⚘⚘⚘⚘
بعد مرور شهرين...
مقعمزات برا فالساحه يهدرزوا مع بعض..
دعاء بحزن:حسيت انه معجب بيا مهتم بيا هلبه وكأنه يبيني حق بالذات بعد شكينا انه فسخ حسيته فأي لحظه حيوقف عليا ويكلمني..بس مش عارفه شن صار تغير بالمرة ياسكينه..
سكينه:مانكذبش عليك والله حتى اني حسيت انه ميال ليك هلبه ولاحظت ان خطيبته معاش جاته بكل والدبله معاش لبسها بكل قلت فنفسي واضح انه فسخ ويبي دودي بالرسمي بس بعدين ركزت عليه كيف تغير فجأة ومافهمتش شن صار ولافهمت حاجه اصلا من البدايه لتوا..
تنهدت دعاء ومسحت دموعها..
مسحت سكينه ع ظهرها وقالت:شكلك حبتيه يادعاء بالحق..
دعاء حط يدها فوق عيونها وقعدت تبكي..
وسكينه دمعت معاها وشدت يدها وهي تقول بصوت مخنوق:خلاص دودي خلاص..
داخل..
قدام قاعة لطلبة الدراسات العليا..
رشاد:نحاول نطلعها من دماغي ياامين..
امين:ياريتك سألت عليها كويس وماكنتش استعجلت وخليت فدوى..
رشاد:لا فدوى هكي ولاهكي كنت ناوي نسيبها..تنهد وبعدين قال..يللا نصيبات وخلاص وباين نصيبي مش فيهم..
امين:صح..
شويه رن تليفون امين قال لرشاد؛لحظه بس..
ومشي امين من حدا رشاد..
رشاد فهاللحظه تنهد تاني وغير عيونه ع امين جو ع وحده لقاها مقعمزة وتشبح لتليفونها ودموعها ينزلوا وتمسح فيهم.
ما فهمش شن حس وقتها بس وجعاته هلبه وهي تبكي..وتعض ع شاربها بقوة..
قعد يشوفلها وبس..
شويه والبنت نزلت تليفونها..مسحت دموعها ووجهها بعدين نزلت ايديها وجو عيونها فعيونه..
هو لاإراديا ابتسم ابتسامه خفيفه وحياها بحركة الراس..
وهي ردتله الأبتسامه بعدين نزلت ايديها وعيونها وضمت كفوفها لبعض وحطتهم ع التليفون..
وهو قاعد يشوفلها ..
ع جية امين:هيا رشاد خش الاستاذة جت..
رشاد شبحله وقال؛تمام..
وخشوا الزوز للقاعه..والاستاذه خشت وراهم والبنت كانت تشوفلهم..
ع جية صاحبتها..
سجى؛هيا نونو..
انوار ناضت ولبست شنطتها وقالت:هيا..
سجى لاحظت الدموع فعيونها حضنت دراع صاحبتها ومشوا مع بعض..
⚘⚘⚘⚘⚘
هالشهر كان اخر شهر فسنة 2010 ..
شهر 12 اللي بدت فيه احداث او ثورة تونس اللي قلبت العالم كله..
وفيه يوم...
صار فيه اكثر حدث صعب في حياة جمال هداكا الوقت..
فالجامعه..
كلية الطب...
"باهي ممكن تهدي ونتناقشوا بهدوء"
منال بعصبيه:لالا جمال معاش فيها هدوء الصراحه اني من البدايه قتلك اني نرضى نعيش مع امك ماعنديش مشكله عادي فالنهايه امك والمراة قاعده بروحها ومستحيل تخليها..لكن توا الوضع تغير خواتك معاها وصغارهم يعني مش حيكون لينا خصوصيه بكل لو قعدنا معاهم..وبصراحه اكبر نجلا اختك بعد اللي صار بينها وبين عمي حطتني فراسها من توا مش طايقتني وتعامل فيا معامله خي كيف بديريلي بعدين لو قعدنا مع بعض في حوش واحد!..
ربع ايديه وقال:وكيف تبيني نخلي نساوين يقعدوا برواحهم ..النساوين هادوا امي وخواتي وصغارهم..صغار صغيرين يمرضوا يطيحوا يصيرلهم الف شي فاليوم...
منال بتهكم :ايه..ع هكي حتى السفر مانحلمش بيه..ولو يوم طلعنا لازم يطلعوا معانا..ومانقدروش نقعدوا مع بعض مرتاحين لان في اي لحظه ممكن يتصلوا ويقولولك تعال بدر مرض..مش عارفه منوا اشبح شن صار فيه..وهكذا..لاياجمال لا هادي مش حياة بكل واني والله مانقدر نتحملها لاتوا ولابعدين..
قعد يشبحلها وهو مربع ايديه ودموعه فعيونه قال:والمعنى..لشن تبي توصلي؟
هي بلعت ريقها وقالت ودموعها فعيونها:اني اسفه جمال..مانقدرش..
جمال:شن هو اللي ماتقدريشي!؟
منال نزلت عيونها وقالت بصوت مخنوق:مانقدرش نكمل معاك..
نزل ايديه وحطهم فجيوبه وهو يرشف ويوزع في نظره ع المكان بعدين قال:احمم..نخليك توا..هكي يومين تهدي وتفكري فيهم وانتي رايقه..شبحلها وقال..خودي حتى اسبوع..خودي شهر..المهم فكري بالشويه عليك يامنال..ماتاخديش قرار تندمي عليه بعدين..
"هدا قراري نهائي خلاص"
منال شبحتله وقالت:فكرت فيه هلبه ياجمال اني مانقدرش نعرف روحي مانقدرش..
قعد يشبحلها هلبه..بعدين طبسلها وهو يشوف لعيونها وطلع يده من جيبه واشر بسبابته القدام وقال:منال..راهو لو مشيت توا وكل شي منتهي معاش نولي يامنال معاش نولي بكل..بكل يامنال..
منال نزلت عيونها لوطا وقعدت ساكته..
وهو قعد يشبحلها شويه بعدين نزل يده ووقف ع حيله وقال:امم..تمام...خلاص..خليك مذكره ان انتي اللي قررتي..
وحول الدبله اللي هيا جابتهاله وخدي يدها وحطها فيها.
بعدين مشي وفات من حداها..
وقلبه كان يتقطع تقطيع..مسح دمعه نزلت منه..ولبس نظاراته..
هني منال قعدت تشبح لدبلته فيدها وعيونها متوسعات بصدمه..
بعدين التفتت..ماشافتاش...
خلاص جمال..راح ومعاش يرجع..وهي اللي تخلت عنه بروحها!!...
قعدت تشبح القدام بصدمه لدقائق...بعدين بدت شويه شويه تبكي..
وحطت ايديها ع وجهها وانهارت بالبكي...
🥀🥀🥀🥀🥀
"نتلاقوا السمستر الجاي صبايا"..
"ان شاء الله..سلام..باي دودي"
ومشت دعاء تجري لسيارة بوها اللي كانت مدرسه قدام الكليه..
ع جية رشاد اللي كان يقص فالطريق مع صحابه..
كان يشبح لسيارة بوها بنظرات غريبه..
هي لما شافت نظراته تحشمت..
ومشت طول بتركب..
فتحت الباب بقوة من الإنفعال الباب نزل شويه ودار صوت هي شبحت جنبها لقت رشاد فايت يشبح للباب بنظرة فيها شي من الإستغراب والشفقه..
غيرت عيونها عنه وهي مخنوقه بدمعتها وقامت الباب شويه وركبت وصكراته..
محمد:هاه امتحاناتك تمام؟
بلعت ريقها وقالت:ايه تمام بابا....
محمد:باهي كويس..
وتحرك طول بسيارته ومشي...
وبنته في جنبه كانت من داخل تبكي بقهر شديد..بس عيونها كانوا حابسات الدموع بقوة...
⚘⚘⚘⚘⚘
وفاتوا من هداكا اليوم ايام وايام...
وخشت سنه 2011...

...يتبع.....