"إلا أن يشاء الله"

الجزء الأول✒

✒..
تغدا جمال هو وامه وطبعا الغدي وقتها كان متأخر شوي لأن امه راجاته كعادتها لين يروح من الخدمه..
بعد ماتغدوا..
قعمز هو وامه في دار المعيشه..
هي مش دار معيشه..هي عباره عن صاله كبيره فيها جلسة عربيه فخمه عند الناس التانيه وعندهم هما تعتبر عاديه..
في ناس عايشه فرفاهيه هكي فعلا على ارض الواقع.
المهم..
كانوا هو وامه يهدرزوا ويشربوا في الشاهي الاخضر..
امه تحبه وهو يساير فيها...
معلومه مهمه عن جمال..
امه عنده بالدنيا ومافيها مش مجرد كلام ينقال وبس..يعطيها عمره وروحه ويضحي بكل شي على خاطرها..
وصابرين امه انسانه طيبه جدا وغلاوة جمال عندها مايوصلها حد..
برغم انها في الحقيقه ماكانتش راضيه عن اختياره لمنال لكن بينت العكس تماما لانها شافت الحب فعيون ولدها لمنال..
هي ماشافت منها شي غلط..بس داخليا مش ماارتحتلهاش.
صابرين:لا اتصلت بيا امس وسألت عليا وقعدت مشوار وهي تهدرز..
جمال قعد يشبح لأمه بإبتسامه حب..
لما سألها اذا كان خطيبته كلمتها ولالا..وهي كذبت بش ماتكدراش وتخليه يدير مشكله معاها...
صابرين رشفت من الشاهي وقالت:بنيه كويسه ولدي ربي يحفظكم لبعض..
جمال بإبتسامه:ويحفظك ليا يارب العالمين..
ابتسمت صابرين...
فجأة رن تليفون جمال..
جمال:ان شاء الله غير مش من المعرض بس..
طلعه من جيب السروال وشاف المتصل عقد حواجبه بإستغراب وقال:وجدي راجل آلاء!
وجه صابرين تغير..
فتح جمال الخط ورد وهو يقول:ايوه وجدي السلام عليكم.............شبح لامه وهو عاقد حواجبه وقال..لاقاعد فالحوش قاعد فالحوش.......غير عيونه عن امه اللي بان عليها التوتر....باهي باهي..تمام..
وصكر..
ناض جمال وهو معصب يقول:بنتك اشبح شن ملبزة تاني..
ومشي طلع من حداها..
صابرين بتوتر:ياحليلي اني..كله منك ومن نقانك ياآلاء..
💎طلع جمال من الحوش
لقي نسيبه مدرس السيارة فم الباب..
نزل طول وجاه..
وجدي مد يده وقال بضيق:شن جو جمال..
صافحه جمال وهو مركز في ملامح وجهه:تمام الحمد لله..خش داخل خش..
خش وجدي وجمال خش بعده وصكر الباب..
ومشوا الزوز خشوا داخل الحوش..
وجدي:عمتي فايقه؟.
جمال:ايه فايقه..شن فيه ياوجدي شن صاير..
وجدي:غير ارفعني وين ماموجوده عمتي توا..
هز جمال راسه وهومعصب وساكت..
ومشي بوجدي لدار المعيشه..
خش وجدي داخل وهو يقول:السلام عليكم..
وصابرين تشبحله بتوتر:وعليكم السلام..
وصلوا فيها..
ووقف وجدي قدامها طلع من جيب دجاكته فلوس ومدهم لصابرين وقال:دسي فلوسك ياعمتي احني مش محتاجين..
جمال ضيق عيونه وقال وهو يمرر فنظره عليهم:فلوس شنو؟!
وجدي التفتله وقال:اختك ربي يهديها شن عندي بنقول غير هكي تبي قفطان كبير وغالي تلبسه في عرس ولد خوي قلتلها مانقدرش عليه توا شوفي غيره دارتلي نهار احرف ياجمال وماخلت ماقالت واني والله مابيت نرد عليها حدي انسحبت من حداها وطلعت لاني مش ضامن لو قعدت شن يطلع مني..المهم اليوم روحت من العمل جتني واني نتغدا مدت الفلوس زي توا..قلد حركتها..وقالت ماما عطتني حق القفطان ماشيه بنشريه..ولاكأني راجلها لااحترام لاتقدير لكن اني نستاهل حليتلها هلبه..
جمال عصب ع الآخر لين وجهه ولى احمر من الغضب..
خدي الفلوس من جمال وحطهم حدا امه وقال:سامحني ياوجدي وامسحها فوجهي
وجدي:حاشاك ياجمال..بس نبي نطلب طلب واحد..ضم كفوفه لبعض وحطهم تحت ذقنه وقال برجاء..ارجوك ياعمتي ارجوك معاش نبيك تخشي بيني وبينها..نزل ايديه وقال..حتى امي والله مامخليها تدخل في حياتي لاني عارف المشاكل اللي بتصير بعدين..
هزت صابرين راسها وهي مضايقه..خدت الفلوس وناضت مشت طلعت من حداهم..
وجدي شبح لجمال وقال:سامحني ياجمال..
جمال وهو عاقد حواجبه:عندك الحق مايلومك حد على شي..
وجدي:تمام هي مالا اني نستأذن توا مولي للخدمه..
جمال:غير اقعد شويه اشرب قهوة!
وجدي:لا والله ياحبيبي مافيها كيف اني معطل اصلا..
جمال:على راحتك..
💎ومشي جمال مع راجل اخته وسقده..
بعدين ولى خش داخل وهو معصب..ركب لداره..بدل حوايجه ونزل وهو يلبس في نظاراته وطلع من الحوش...
⚘⚘⚘⚘⚘⚘⚘⚘⚘
"دعااااااء...دعدوعه"
فنصت دعاء..
رويدا بضحكه:حي عليك حي..
دعاء عكرشت وجهها وهي تنوض قالت بصوت منخفض:عليك هم اسود..
ومشت طلعت من الدار وخواتها يضحكوا عليها..
دعاء..
عمتي شرقيه تخدم مدرسه..انسانه حشريه محسديه غيورة قلبها اسود ماتحبش الخير لغيرها بكل معنى الكلمه..
وتأخرها فالزواج زادها بلي على بلاها..وين شافتنا بدينا نكبروا حطت راسها براسنا..ولأن بابا مع الاسف يعطي فوذنه ليها كرهنا في عيشتنا معاها..كانت متحكمه حتى فلبسنا..
بس حاليا وبسبب هلبه مشاكل صارت..بابا بدي يتجنب فيها لما عرف نيتها وتفكيرها..
🗝خشت للكوجينه..
لقت امها واقفه ع الغاز ادير في القهوة وشرقيه واقفه ع باب الكوجينه الخارجي تهدرز حداها
شرقيه:دعدوعه..شن جو..
جتها سلمت عليها بعدين وقفت ع دولاب الكوجينه وقالت:تمام شن جوك انتي..
رقصت حواجبها وقالت:جايبتلك عريس..
دعاء..
ههههههه...اكيد نموذج فاشل ماتجيبش الحاجه المقومه الباهي ترد فيه منها غادي...
دعاء ابتسمت مجامله وقالت على اساس انها متفاجئة:عريس!
جميله"ام دعاء":قالت اخت ابلتك متاع الاحياء زمان..
دعاء بصدمه:راك تقولي ابتسام!؟
ضحكت شرقيه وهزت راسها بإيجاب..
دعاء..
ابلة ابتسام هادي اعوذ بالله منها حتى هي التانيه متزوجه وعندها صغار لكن طباعها طباع شقشق بالزبط..طبعا ماتصاحب شقشق الا اللي زيها..
شرقيه:ياحنه يخدم موظف في شركه خاصه وعنده خدمه فالدوله وبشقته وحوشه..قولي فيلا مش حوش..
دعاء..
وقتها قلت لالا مستحيل يكون عريس فول أوبشن وهي جايباته وحده من اتنين ياهي واكله ضربة ع راسها اليوم..يالعريس فيه علة ماتبيش تقولها
لكن ياودي ماتقدرش كان طلع فيه شي غلط فوجهها هي بعدين..
جميله:مواليد كم؟
شرقيه:مايعتبرش كبير هلبه هكي 74..
امها فنصت وقالت:74!؟
دعاء بصدمه:اكبر مني ب16سنه..
جتني وشدت يدي وقالت:ياغبيه ياخدك صغيره يدلعك وتعيشي فالدلال راهو فلوس فلوس
دعاء شبحت لأمها..
جميله:ياوخيتي بقولي كبير هلبه عليها
شرقيه:ياما منهم واخدين كبار وعايشين احلا عيشه..مش مقياس المهم راجل متعلم..شبحت لدعاء وقالتلها..فكري في الموضوع كويس صدقيني مش حتندمي..واني عمتك يابنتي لو فيه عيب بنجيبه
دعاء في نفسها"انت ماتجيبي الا العرسان اللي عارفه اني حنرفضهم لكن تو تشوفي المرة هادي بنوافق نكايه فيك"..باهي عطيني وقت نفكر ونرد عليك
دعاء...
ماغباني اني ماغباني وقتها مافكرتش فيها صح لو وافقت ماتفرقش عندها المهم ماناخدش شاب من جيلي..
عندي بنت عمي تزوجت بعلاقه وراجلها اكبر منها ب5 سنين هيا قمه في الجمال وهو شخصية تقتل نذكر لما جي يسلم على حناي وهما واقفين مع بعض كانوا يجننوا..
وهي تشبحلهم بغل ودموعها فعيونها...
المهم..
هي شربت قهوتها وانتلفت بعد ماقرمت عباد الله..واني وامي  وخواتي عقدنا اجتماع القمه..
جميله وهي توكل في عمر:هي مسألة العمر بس اللي مش عاجبتني..
رويدا:باهي مرات يطلع قنين..
دعاء بتفكير:ابله ابتسام بيضاء وقنينه الحق..
مروة:منين هما؟.
جميله:سوق الجمعه..
مروه:اها طرابلسيه..
دعاء:بنستخير وخلاص..
رويدا؛ايه هو هدا...وان شاء الله يصير منه خل نديروا عرس..
ضحكوا
دعاء..
ماتقولوش ورشاد..لارشاد لاشرشور..بنقعد عمري كله نراجي فيه واني ماريت منه شي غير الشبحات من بعيد كان عنده حاجه راهو جي كلمني طول...مانعلقش معلقه روحي فأوهام...
⚘⚘⚘⚘⚘⚘⚘⚘
ضغط ع زر الأنتر فون..
ردت عليه اخته "منو"
جمال:جمال افتحي..
شويه وانفتح الباب...وخش جمال للحوش وصكره وراه..
وكمل للباب الدخلاني لقاه مفتوح خش وصكره..
لقاها قدامه واقفه ومربعه ايديها ودموعها فعيونه..
جمال:خشي قدامي..
هي تنهدت بضيق وخشت..
دخلاته للصالون وقعمزوا مع بعض..
جمال:انتي امتى بديري عقل قولي..
الاء بدموع:طبعا لازم نطلع اني الغالطه وماننفعش!
جمال بشي من العصبيه:ايه غالطه وماتنفعيش بكل..اقسم بربي لو منال دارتلي الحركه اللي درتيها لراجلك بعدين كنت مطلقها طول بدون ماتتحركلي شعره..وحده تصغر راجلها واطيح من قدره واحترامه وماتراعيش ظروفه ماتلزمنيش..
الاء ببكي:هدا وانت وخوي مفروض تجي معاي
جمال:نجي مع عينك..نجي معاك على خاطر شنو..ضاربك..مجوعك..هانك..منقص عليك شي!..هو قالك بناخدلك لكن ع حسب امكانياتي..الراجل لما كان عنده ماكانش مخلي فخاطرك شي..لكن توا ظروفه ملخبطه والله حتى المساعده مني ماباش يقبلها لانه عزيز نفس..راجلك راجل زي الفرح والسعد ياآلاء اقسم بربي احسن نسيب عندي..راجل اصلي..لو ضيعيه ياآلاء والله ربعه ماك محصله تاني..
وآلاء تسمع فيه وهي تمسح فدموعها وراسها لوطا..
جمال تنهد وجي جنبها حاوط كتافها بذراعه وقال بهدوء:خليك بنت اصول ياآلو..خليه يقول يرحم بوها وامها عرفوا يربوا..اصبري معاه ع الحلوة والمرة..اوقفي جنبه خففي عنه سانديه..قوليله مش لازم كل يوم ناكلوا بالوطني مش لازم كل يوم نفطروا عسل وبريوش ومش عارف شنو مش لازم كل اسبوع نطلعوا للمطعم الفلاني قوليله الكلام هدا بدون ماتكسريه ياآلاء سيوره رب العالمين يفرجها..هو قال فإن بعد العسر يسرا.. وعاود أكد عليها..ان بعد العسر يسرا..
⚘⚘⚘⚘
قالها من هو ادرى..ان بعد العسر يسرا..
فأمضي للعيش ابيا..لاتخف للعيش ضرا..
رويدا وهي خاشة الدار:نقصي يادعاء شويه..
دعاء شبحتلها لقتها خشت تحت الشرشاف والتليفون على وذنها..
مطت شواربها للأسفل بإزدراء وخدت شيتاتها وناضت..
طلعت من الدار بتمشي للدار التانيه..
"دعااااء بري حركي الطبيخه"
دعاء بعصبيه:بنقرا الهم بنقراااا..
ومشت للكوجينه..
جميله:وطي صوتك بلغمه تبلغمك..
خشت دعاء للكوجينه ولوحت شيتاتها ع الطاوله ومشت حركت طنجرة طبيخة البطاطا..
بعدين ولت طلعت بشيتاتها للدار..
لقت خواتها..
مروة ووفاق يكتبوا فواجباتهم وهي قعمزت حداهم تقرا..
وفاق وقفت كتيبه وقالت:شنطتي خلاص تمزقت..
مروة شبحتلها بضيق..
دعاء:خيرك ماخدتيش شنطة مؤيد متاع العام اللي فات...
وفاق:بالله بري عليا غادي تبيني نلبس شنطة ولاد!!؟
دعاء:مالا اقعدي بالمزقه..
وفاق:انتي اسكتي والهي في شيتاتك..
دعاء بقرف:داره كبد
وفاق طنشتها وقالت:شن ندير مروة..
مروة:ماعندك ماديري من غير شي حالنا في الحضيض يبال مع تقشف بوك..
وفاق :باهي نمشي بشنطة مشركه!!
دعاء:قتلك خودي شنطة مؤيد..
وفاق بدت ادمع وقالت بعصبيه:باهي خلاص اسكتوا اسكتوا..
وطبست على كراساتها وكملت كتيبة الواجب ودموعها يقطروا....
دعاء...
وقتها خطر عليا الموضوع اللي جاني..قلت كان نتزوج اني نخفف عليهم مصاريف الجامعه..وبالك نقدر نساعد كان هو فلوس زي ماحكت عنه شقشق..
🗝وفاللحظه اللي كانت فيها دعاء غارقه بتفكيرها..استاقظت ع صوت صياح بوها..
"جمييله...ياجميييله"
مروة ودعاء ووفاق:ياستار!..
وقعدوا يسمعوا..
برا..
جميله جت لراجلها محمد تجري:خيرك شن في!؟
محمد:انتي خديتي عشرين جني كانوا محطوطات في مكتبة المربوعه!؟
جميله:لا والله..حتى المربوعه ماخشتيلها من العشيه..
علا محمد صوته وقعد ينادي:دعاء رويدا..مؤيد..كلكم تعالوا هني ..
ناضوا طول وطلعوله..ع جية رويدا من الدار التانيه وهي ترعش...ومؤيد جي من دارهم وقال:شن في؟
محمد:واخد فلوس انت من المربوعه؟
مؤيد:وحق ايات الله ماخشيتها بكل اليوم..
مرر نظره علينا وقال:وانتم!؟
دعاء ومروة ووفاق:لالا والله لا..ماخديت شي..والله ماخديت حاجه...
شبح لرويدا..
رويدا:احني مانقدروش ناخدوا منك الربع بناخدوا عشرين مرة وحده..
تكلمت بهزوة..
قدملها وعطاها كف قريب طير وجهها وقال:كيف تكلمي بوك هكي ياقليلة الربايه ياكلبه!..
مشت طول خشت للدار وهي تبكي..
محمد:العشرين جني توا يطلعوا..
جميله:بالك انت خديتهم واشبح وين حطيتهم وناسي..
محمد بإزدراء:ماليش ساعه حاطهم فالمكتبه اني..
ومشي للمربوعه وهما وراه وخشوا يدوروا فالفلوس..
دعاء..
العشرين جني كانت حاجة كبيره هداكا الوقت ياما تجيب واكيد بابا كان يجيب بيها شي للحوش..حني طبعا عمرنا ماخنبنا منه..وامي مش زي النساوين اللي ياخدوا من ورا رجالتهم..تي هي مرات تلقى فلوس فحوايجه وين تجي تغسلهم تردهمله طول..
دورنا ليلتها وبابا ما خلا ماحط علينا كان كلام جارح هلبه ووصل في أمي وتعاركوا وليله سودا بمعنى الكلمه...
رقدت ليلتها ودموع على خدي وكنت واخدة قرار اني خلاص حنوافق ع العريس..
⚘⚘⚘⚘⚘⚘⚘
فمعرض السجاد...
جمال بإبتسامه:بنجيك غدوة منو..
منال:لااالا جيمو انسى..
جمال بضحكه؛ياختشه استاحشت نهدرز عليك..
منال:نتلاقوا في اي مكان تاني ان شاء الله حتى حوش اختك..
جمال :هههههه..الغيرة اللي بتقتلك هادي..تي ياهبله اني نشوف لغيرك؟تي اني معاش نشوف معاك في شي..
منال بإبتسامه خجوله:اني مانبيش نشوف حد يشبحلك غيري..
جمال بضحكه:ياودي باهي..
منال:عارفاتك تمشي فيا جيمو..
جمال ضحك..
منال بغيظ:جيييمووو..
جمال:ههههههههه...
"استاذ جمال"
جمال هدا ضحك وقال:خلاص عمري بنصكر ونشوف الزباين بعدين نهدرزوا وعندي معاك موضوع طويل عريض ع البلوزة اللي لبستيها اليوم...
منال بضحكه:عارفه عارفه..
جمال:وعارفه فوقها..باااهي..تو نوريك..المهم توا ماتبي شي؟
منال:سلامتك..بس بس..
جمال:تمام سلام روحي..
منال:سلام قلبي..
وصكر جمال ومشي يشوف فزباينه..
⚘قعد ساعه وبعدين روح للحوش..
ركب لدار امه لقاها راقده..خلاها ومشي لداره..
بدل حوايجه وتوضى وصلى صلاته وخش للسرير واتصل بمنال هدرزوا شويه..بعدين رقد..
⚘⚘⚘⚘⚘⚘⚘
🗝تاني يوم الصبح..
مشوا البنات لمدارسهم على رجليهم..
ورويدا مشت بالباص لان مدرستها برا المنطقه..
ودعاء ومؤيد مشوا مع بوهم..
حط مؤيد في مدرسته ورفع دعاء للجامعه..
طول الطريق كان ساكت ولاكلمه..
لما وصلوا لوحلها عشره جني وقال:الفلوس اللي امس قبل بنعطيهوملك تاخدي بيهم الكتاب اللي قلتي عليه..ماعندي كان عشرة صوريه بيهم وخلاص..
دعاء..
وجعني بابا هلبه وقتها..خديت الفلوس ونزلت خشيت الكليه..
ومشيت طول لقسمي وين مافي قروبي..
المتكون من سته بنات..
آيات..امال..اكرام ..اماني..سكينه..ريم..
لقيتهم ملمومات على امال...صبحت عليهم ودكيت راسي معاهم..لقيتهم يتفرجوا فتليفونها ع بتات امال اللي جهزاته كله..خلاص مازال على عرسها اقل من شهر..
الوحيده فالقروب المخطوبه وكانت اكبر منا كلنا..
دعاء:ماشاء الله اموله ربي يتمم على خير..
امال بإبتسامه:الفال ليك دودي..
دعاء خطر عليها موضوع وقالت:تسلمي..
اماني ضربت دعاء على كتفها وقالت:تعالي قريني..
دعاء وهي تتحسس فالضربه:اححح ياسم..كسرة..
اماني بضحكه :في ايديك..
خطم من حداهم رشاد..
طنشاته دعاء وسكينه قعدت تشبحلها..
شويه وقعمزوا على تركينه وبدوا يقروا...وباقي البنات يهدرزوا مع امال ع تجهيزات عرسها..
دعاء..
امال كانت مسهفتنا كلنا للموضوع..
بالذات اكرام وايات بيموتوا ع الزواج لكن ماجتهمش مواضيع جديه قعدوا غير يتعرفوا ويديروا فالعلاقات يحسابوا هكي بيلقوا نصيبهم..
المهم..
يومها خدينا محاضرتين
وقعدت بس محاضرة مازال عليها تلاته ساعات..
خديت آيات على تركينه..وحكيتلها موضوعي..
آيات:الله!!بتنخطبي حتى انتي؟!
دعاء:غير يولد ويسموه..المهم خاطري نمشي نشوف الفرخه تسنيم استاحشاتها ونبي نحكيلها وناخد رايها..
آيات:نمشولها!؟
دعاء:اكيد..
آيات شدت يدي وقالت:هي تعالي..
ومشوا مع بعض لكلية الطب..
كانت في مسافه قعطوها على رجليهم وهما داهشات...
في نفس الوقت..
قدام الكليه..
منال وهي شاده يد جمال وحواجبها معقودات:هي اطلع قدامي هيا..
وجمال يضحك..
كانوا وين يخطموا حدا بنات يعلقوا عيونهم فيه..
كان جميل وشخصيه واشقر حاجه ماصارتش...اللي تشبحله ماتقدرش تحول عيونها من عليه..
.....
دعاء:رجليا طاحوا..
آيات:صوابعي من القدام تنفخوا..
وصلوا في الباب..
هما خشوا من هني...وجمال ومنال طلعوا من هني..
جمال خطم من جنب دعاء الزبط..
هو كان يهدرز على خطيبته ويضحك..
وهي كانت تشكي من رجليها..
وكل حد مشي على حاله..
دعاء:كلمتيها الفرخه..
أيات:هويناااه..
دعاء شافتها عيطت..
وتسنيم عيطت...ومشوا لبعض يجروا وحضنوا بعض وهما يعيطوا..والولاد يتفرجوا ويدعولهم بالشفي
دعاء..
تسنيم وآيات صاحباتي من ايام الثانوي
ايات جت معاي في نفس الكليه لكن تسنيم قرت تمريض..
تسنيم كنت نحب ديما ناخد رايها بنيه عاقله الحق..
تسنيم:كبير هلبه يادودي..لكن مانبيش نقولك فوتي الموضوع انتي شوفيه قبل وتكلمي معاه مرات يطلع كويس ويعجبك..
تنهدت دعاء وقالت:نصلي استخارة وخلاص..
آيات:ربي يقدملك اللي فيه الخير..
دعاء:آمين..
دعاء..
خلاص اني وافقت مبدئيا لين نشوفه وبعدها نقرر نهائيا...
يومها روحت الحوش..استخرت ومشيت لماما وقتلها قولي لعمتي شرقيه دعاء واقفت تشوفه قبل بعدين تعطي رايها..
وامي اتصلت بيها كلمتها وشرقيه قالت نكلم ابتسام ونرد عليكم ..ماكنتش مستريحه لهدوء عمتي شرقيه بككككل..
بعد المغرب..
كانوا مقعمزات فالدار يتفرجوا على برنامج..
دعاء:معاش صارشي في موضوع العشرين جني
جميله:تس تس..
مروة:كان نعرف من خداهم بس؟
جميله:تي من بياخدهم قولي انتم ماعمركم مديتوا ايديكم ع حاجة حد..هو اشبح وين مشي بيهم..
"ماما"..
ناضت جميله وقالت:عمر ناض..
ومشتله وين ماهو...
فجأة جت اغنيه فالتلفزيون...صاخبه وترقص..
ناضت رويدا صكرت الدار..
وجت للتلفزيون علت الصوت وبدت ترقص..
وخواتها يعجبوا عليها..
بعدين سهفتهم...ناضوا رقصوا معاها رقصوا رقيص مش طبيعي..
دعاء..
هبلنا يومها..طاقه سلبيه وفرغناها هم مكبوت وطلعناه منا نبوا نخففوا على ارواحنا وخلاص...
لكن عمرهم الرقيص والغني ماجلوا هم..
اني قبل كنت متمسكه بقراية القرآن والآستغفار والنوافل والفجر في وقته حتى قيام الليل..
وفجأه اللي جاني جاني فترت تماما..وقعدت بس محافظة ع الصلوات المكتوبه..
والله هديكا الفترة كانت حياتي جنه..عكس توا كلها هموم وغموم..وكل مانحاول نولي مانقدرش..ماعرفتش السبب هل من الشيطان اعوذ بالله منه ولا شي تاني..
المهم..
بعدها بالك باسبوع..نهار الجمعه..
حددنا موعد يجونا خوات العريس بعد العصر..
اني لبست يوما سروال جينز عليه كت ربع كم شكله حلو هلبه مانعرفش نوصفه المهم مناسب..
وشعري استشوارته رويدا والمكياج درت بروحي واللي يشوفني نعجبه..
الا شقشق..
شرقيه:مفروض لبستي قفطان قصير..
دعاء بتفنيصه:وعلااااش!!؟
شرقيه:بش يبين انوثك ياغبيه..
دعاء:لالا مانبيش..
شرقيه:مالت عليك على قولتهم..
دعاء"مالت عليك انتي..تس تي هادي خيرها تبيني نتزوج وخلاص لالا اشبح شن جاها فراسها مازال مش مستوعبه"..
وخدت دعاء وطلعت لإبتسام واختها لما شافوها قريب ماتوا عليها...ومن لما قعمزت وهما يمنقلوا فيها..
في الكوجينه..
رويدا:سحيقه قفاصين جايين يصفقوا بإيديهم.
مروة:مصح وجوههم.
مرت عمهم بضحكه:هي طلعوا وراي الحلويات..
دعاء..
مرت عمي علاء كويسه نحبوها وتحبنا وجت تحضر وتعاون يومها..اما عمي راجلها قعمز مع خوها في مربوعة حوش جدي لان بابا مهناش..
"حوش جدهم جنبهم"..
في الصاله..
ابتسام:خلاص نديروا توا النظرة الشرعيه..
كلهم تفاجئوا..
ابتسام بضحكه:مادام هو جي خل يشوفها بالمرة علاش اطولوا فيها..
شرقيه ناضت وقالت:باهي تونكلم خوي نوقضه..
ومشت طلعت من حداهم..
جميله وهي مبتسمه بالسيف:نوضي بنتي البسي عباية ووشاح..
ابتسام:كان يشوفك هكي يجيب الشيخ ويروح بيك...وقعدت تضحك هي واختها...وجميله جاملتهم وضحكت..
اما دعاء فكانت متحشمه هلبه وفي نفس الوقت قلبها مش مستريح..
وكيف جت بتوصل في الدار سمعت عمها ينادي..لبست العبايه بسرعه وطلعتله وقالت:نعم عمي..
علاء وهو عاقد حواجبه:وان شاء الله بتطلعيله حق انتي!
دعاء:علاش خيره؟!
علاء:مش ليك بكل يابنتي مش ليك حرام عليك اضيعي نفسك مازلتي صغيره راهو ماخشليش راس بكل..
دعاء بقلق:لهالدرجه!
علاء:ايه فوتي الموضوع ومانكش طالعتيله..
دعاء:حاضر..
دعاء..
ريحني هلبه موقف عمي يومها..وطبعا صارت عركه بينه وبين شقشق اللي بانت نيتها وتوضحت..
وفي الاخير روحوا وماطلعت لحد..
ومن بعد هالموقف رفضت الموضوع...وسكرنا عليه مره وحده...ورجعت نفكر فرشاد ههههههه..
⚘⚘⚘⚘⚘⚘
في نفس يوم الجمعه...
مروح من الخدمه..يسمع فاصوات خواته وصغارهم..
خاش حامل ومحمل..مماخلي ماجايب...
فرق ع الصغار..وحتى على خواته وقعمز في نصهم..
خواته بالترتيب..
من الكبيره للصغيره..
نجلاء...عطاء..رجاء..آلاء..وكلهم متزوجات
رجاء:جيمو..
جمال هو ياكل فالشكلاطه:اممم..
رجاء:ترفعني غدوة العياده نراجع"حامل"..
جمال:والتراس اللي عندك...
رجاء:عالق طواريء.."رجل امن"..
جمال:الساعه قداش..
رجاء:11 الصبح..
هز راسه بإيجاب .
رجاء بضحكه:سلمه حبيبي..
نجلاء:جيمو..
جمال:اممم..
نجلاء:ترفعنا الشاليه متاعك في مصراته السبوع الجاي؟
جمال:ياودي باهي امي قالتلي وقتلها باهي..
قرصاته نجلا من خده وقالت:نجي خونا ياربي..
قعد جمال يتحسس فخده ويشوفلها ع جنب...وامه وخواته يضحكوا..
شويه وقالت صابرين:عمك اتصل..
جمال وهو يكمكم فغلاف الشكلاطه:يبي فلوس كالعاده بنك روما حني...وناض ومشي من حداهم وهو معصب..
نجلاء:عنده الحق ياخد فيهم ويقول بنخش مشاريع وهو يكسر فيهم فالقمار..
عطاء:كان نبلغوا عليه خير..
صابرين:هدا اللي ناقص..اسكتوا خيرلكم...
رجاء:عليك حاله..بيقصروا عمره وخيي..
صابرين والبنات بفزعه:بعيد السو عليه..
فوق...
طلع جمال من الحمام..
خدي فوطه مسح وجهه وايديه..وحطها ع الكرسي...وقف ع الصلايه..
سرح للحظه فهمومه..بعدين تعوذ من الشيطان..
ورفع ايديه لورا وذانه وقال..
"الله اكبر"...
⚘ماتقولش يارب عندي هم كبير...قول ياهم عندي رب كبير⚘
وهالدنيا مش دار راحه...
بل دار ابتلاء....
وكل حد ربي يبتيله ع قد قدرته...
لايكلف الله نفسا الا وسعها..
🌻🌻🌻🌻
يوم الأحد..
خشت دعاء للكليه..
وصلت  للقسم وخشت وتفاجئت وخافت من اللي شافاته..
دعاء..
عمري ماننساه هداكا اليوم..يوم صعب بمعنى الكلمه..
لقيت البنات ملتمات على سكينه..
وكلهم كانوا بين اللي ادمع واللي تبكي..
واني نرعش قتلهم :خيركم..
وتجيني الصدمه..
سكينه ببكي:الحقير اللي كان خاطب امال رخي بيها وخلاها وهرب لبريطانيا..
دعاء خبطت بيدها ع صدرها بقوة..
سكينه:الكلب قال اني انجبرت عليها مانبيهاش قال الكلام هدا لخوها الكلب وهو يكلم فيه من غادي..
اماني بدموع:كسرها الله يكسره..
دعاء..
اني وكأني في دوامه مش مصدقه اللي نسمع فيه معقوله!!
البنت كانت فرحانه بطير..
بتت..وحجزت فالصاله والمزين والفيلو والعشي والحلويات..وووو...تي البنت كانت فرحانه ياناس فرحانه عرسها مازال عليه اسبوعين بس معقوله هكي!!
علاش مش من الاول علاش!!ضيعها هو هكي خلاها مضحكه قدام الناس خلاهم يدووا عليها ويألفوا في القصص علاش سيبها قبل اسبوعين من العرس..
الناس حتحط الحق عليها اكيد..هدا مجتمعنا حني الغلط يركب المراة بس...
اااه..
روحت هداكا اليوم نفسيتي مدمرة..بكيت هلبه على امال وقعدت نخمم في حالها...
حتى الغدي ماجتش فيه النيه..حكيت لماما وخواتي وجعتهم هلبه وقعدوا يدعوا ع الكلب اللي كان خاطبها...
المهم هداكا اليوم ماتمش لعند هكي وبس..
🗝هديكا الليله البنات كانوا مع امهم فالدار يعانوا معاها في خوهم الصغير مريض..
ورويدا كانت بروحها فالدار تكتب في مذاكراتها عن حبيب القلب..
وفهالوقت عمكم محمد كان يدور على دعاء بيأكد عليها موعد طلوعهم غدوة .
دار البنات كانت مفتوحه..
خش ولقي رويدا بروحها...
محمد:وين اختك دعاء؟
هي انتفضت من الخلعه وصكرت المذكرة  وقالت وهي ترعش:مانعرفش..
محمد مافاتتش عليه الحركه..
جاها طول وهو يشوفلها بنظرة تبان بارده ومخيفه هلبه..
محمد:جيبي جاي..
رويدا وجهها ولى اصفر وقعدت تبلع في ريقها وهي تشبحله..
محمد بصوت عالي:قلت جيبي جاااااي..
رويدا ع نفس الحاله..
هو طبس عليها وجبد منها المذكرة وفتحها وقعد يقرا..
ورويدا من الخوف صقعت مع بعضها..
خلاص انتهت....

....يتبع....