ثلاثون يوما بحثًا عن السعادة

اليوم السابع

وانت بتقلب في الفيس لمحت صورة غريبة شوية.. صورة كوكب الأرض بس بشكل مسطح! جيت تقراء البوست لقيت واحد كاتب ان دي الحقيقة الي العالم مخبيها وان كوكب الأرض مسطح بأدلة والبراهين والمواثيق الإغريقية والي مش مقتنع يعاركني..طبعا انت الدم غلي في عروقك واتعصبت وحسيت ان حضارة ١٦ سنة تعليم بيتضرب بيها عرض الحائط.. ف دخلت قولتله انت جايب الكلام ده منين والصورة فوتشوب وعيب الكلام ده، ملحقتش ولقيته رد عليك قائلا: ياجاهل عشان انت بتصدق اي حاجة يدسهالك الإعلام الكاذب والعالم المتقامر الأرض مسطحة مفيش حد سافر الفضاء وهيفضلوا يجمعوا ملاين من الهوا طول ما في ناس زيك بتصدقهم...
طبعا انت كنت هتتجنن، ازاي حد يقولك يا جاهل! دانا معايا ليسانس بتقدير مقبول جدا! تسيبه؟ قومت مديله! شتايم بقا وتهزيق وحاجة في اخر قله الادب.. وهو طبعا رد وانت ترد وكل واحد يقول براهينه وافكارة وناس دخلت الحوار وبعد عصبية وحرق دم كتير.. انت كسبت الجدال!.. وللاسف غالبا بيتحول لخناق وبتغلطوا في بعض وفي أهلكوا و في أفكاركوا و اديانكوا وبلادكوا!
للاسف انت مكسبتش.. انت عايز تبقا صح ولا عايز تبقا سعيد؟.. ايه فايدة انه يتقال انت صح مقابل انك بتحرق في دمك وبتضيع وقتك في جدال مش هيغير في حياة حد حاجة...
حتى لو انت بتتكلم مع حد من اهلك او بتناقش زوجتك في موضوع بينكوا -إن شاء الله يعني- لازم حد فيكوا يمشي كلامه؟
ليه دايما في اي حوار لازم يبقا في حد غلط وحد صح؟ ليه منقدرش لحل وسط يرضي الطرفين خصوصا لو الحوار ده في موضوع مفيهوش قواعد ثابته او شخصي؟
جربت قبل كده وانت في نقاش تقول للي بتتحاور معاه بعد ما يقول رأيه تقوله "فاهمك" وبعدها توضح وجهة نظرك؟ جربت أصلا تفهمه او تحت أحتمال انك ممكن تكون غلط؟ ولا انت داخل النقاش عشان تكسبه بس؟
انت بتخسر كتير...
جربت تبتسم للي بتتناقش معاه وتتكلم بصوت هادي في النقاش؟ تفتكر النقاش هيوصل لنفس النهاية لو اتناقشت بصوت عالي وبعصبيه؟
"A warm smile is the universal language of kindness."
– William Arthur Ward
ودايما خليك فاكر انك لما بتتناقش مع حد مش بتتناقش مع الي صنع الأفكار و المفاهيم المغلوطة في المجتمع.. ف المفروض تبقا مقدر انه مشافش غير ده الصح حواليه وانك عايز تهدم قناعات موروثة عنده.. ف عمرك ما هتوصل لحل غير بالعقل...
"When dealing with people, remember you are not dealing with creatures of logic, but creatures of emotion."
– Dale Carnegie
...
متذكر حوار مع صديق ليا وكان الحور ده عن واحد من المفاهيم المغلوطة في الزواج.. بغض النظر عن الحوار كله بس المهم كان في النقطة دي.. قالي انه خايف يترفض لو أتقدم لواحدة بسبب نقطة او فارق المجتمع دلوقتي شايفها حاجة غريبة او متنفعش ولسه موجودة بس نادر مع انه شيء عادي مكنش غريب زمان...
ف قولتله أنت مش هتقدر تغير نظرة المجتمع لأي حاجة، ولو فضلت تحاول هتبقا بتنفخ في إربة مخرومة... نظرة المجتمع مش هي الي هتخلي جوازك ناجح او فاشل، لإن مهما كانت النقط الغريبة او الفروق مبيبقاش ليها لازمة طالما مش حرام في الدين وفي تفاهم بينكم.. ومشكلتك مش مع المجتمع.. مشكلتك انك خايف من رأي المجتمع.. ف لو فعلا واثق من أختيارك متدورش أنك تغير تفكير الناس.. لكن حاول انك تبقا من الحالات النادرة الي مهتمتش لرأي المجتمع...
...
في النهاية كل شخص مسؤول عن نفسه ولو النقاش في شيء يخصك يبقا حاول تكسب سعادتك وعلاقتك بالناس قبل ما تكسب النقاش...
ف مهمة النهاردة هي أنك أي نقاش هتخل فيه مش هتتعصب وهتقول "فاهمك" وتبتسم وانت بتتكلم...
وهتتذكر ٣ مرات دخلت في جدال وهتشوف لو كنت قولت "فاهمك" ومتعصبتش كان الجدال هيوصل لإيه؟
#٣٠يوم_بحثا_عن_السعادة
انت دلوقتي كملت أسبوع ف لو أنت حد متابع الرحلة حاول تشوف ايه المهام المعملتهاش وتعملها وايه الي بطلته مع انه كان مفيد وترجع تعمله