نور

الجزء التاني

        نور البارت التاني

الساعه خمسه و نص،الشمس قاعده مطلعتش، في دار مظلمة و صاحبة الدار غارقه في أحلامها بس تليفونها يلي رن بي صوت عالي و بي رنات متككره  و مزعجه نوضها مخلوعه.

فنصت عيونها الذابلات و هي تفتح و تسكر فيهم، بينما ادور علي تليفونها تحت مخدتها.
جبدت التليفون و "ااه"، عيطت بتذمر  لما ضي التليفون القوي جي في عيونها. و بدون ما تشبح المتصل قعدت ادور علي العلامه الخضرا بي عيونها يلي نص مفتوحات و مررت صبعها عليها.

"صباح الخييير"، صوت رجولي تكلم بي كل نشاط نور انخلعت من علو الصوت و زلق التليفون من يديها و طاح علي خشمها.

"اااه" ، عيطت بي غيض و قامت التليفون و هي ادلك في خشمها،بينما الصوت الذكوري كان يضحك.

قلبت عيونها و هي تشبح لي الشاشه و الولد المبتسم يلي كان يلوحلها بي يده بي ابتسامته الساحره يلي تحبها و شعره العسلي و عيونه البنيات المتوسطه و نقره زينه يلي ديمه تعبرلا عن غيرتها ان عنده و هي لا.

"شن تبي"، قالت بي صوت مبحوح منزعج.

مط شواربه و قلب عيونه.
"الناس تقول صباح الخير قيوس،كيف حالك قيوس، استحشتك قيوس"، قعد يتكلم بي صوت انوتي.

"قيوس قاعد حمار و ميعرفش يحسب فرق الوقت قد ما حاولت نعلمه، و بعدين شن صباح الخير و انت منوضني و الدنيا ضلام."

صغر عيونه و حط يده يلي كان مريحها علي الطاوله علي خده.

"ليل عينك توا عندكم الخمسه و نص."

حكت عيًنها و شبحت الساعه يلي كانت زي ما قال هوا 5:31، هزت راسها بي انبهار.
"حي غريبه جبتها صحً المرا اهيا اعترف ماما سيرين هي يلي حسبتلك صح."

فنص عيونه، "هاهاها يا قرده شن قصدك تعرفي تتكلمي باهي خيرلك، اني الحمار يلي فكرت انوضك بش متمشيش مأخر في اول يوم ليك"، قالها بي تكشيخه.

ضحكت، "ها حتا انت قلت انك حمار و بعدين علاش تنوض فيا من الخمسه الفجي."

فنص عيونه اكتر و شبحلها بي حده خلتها تعض فمها و تكتم ضحكتها.

"خلاص خلاص  سوري قيس، صباح الخير قيس." قالتها بي نبره نشيطه مصطنعه.

ضحك بي خفه بعدين قال، "واللهي ما في حمار غيرك اهني توا كنّا نوضتك الساعه سته و نص زي ما ديمه تنوضي قبل في المستشفي و نقعد نهدرز عليك بتتاخري، فنوضتك قبلها بي ساعه بش نهدرزو و بعدها نمشي نكمل خدمتي. لان بعدها بنبدا مشغول و لازم نطمن عليك و نريح بالي."

ارتسمت ابتسامه علي وجه نور و عيونها دمعو. "سلم خوي يلي استاحشته هلبا هلباات."

ابتسم بي الأم، "باهي توا قبل ما تبدي تبكي و تبدي في الدراما افتحي الضي خلي نشبح فسختك و احكيلي شن صار امس بي التفصيل و تتكرر بي التفصيل." قال اخر جزا بي جديه بنبرة تحذيز.