"الراوي👇🏻"
_فاهمين إحساس الثقة المفرطة البتمنحها معظم الامهات لبناتها..إحساس إنك مميزة وواعية وعاقلة وكل الصفات الحميدة فيك..مجرد سوء فهم ممكن يغير راي امك فيك..مش عشان الثقة فجأة أنعدمت..لا عشان حالة الصدمة البتكون فيها الأم..ما ح تقدر تخت ليك العذر..ح يكون في غشاوة على بصرها..ما ح تقدر تخت مبررات او أعذار..الكلام واضح وضوح الشمس بالنسبة ليها..هل ح تسألك لحظتها..م أعتقد...
"نتابع"
"على لسان ليالي"
_أمي ماسكه تلفوني في يدها ودموعها نازله..تلقائياً خمنتا أنها قرت الدردشة..قلبي بقى يدق شديد..حسيت أنفاسي ح تِقطع..فجأه الغرفة بقت لي كأنها تابوت..أمي رمت التلفون في السرير وجات مسكتني من معصمي بقوة وبقت تكفت فيني وتنبذني..ما كنتا قادرة أعمل شي..هي بس ماسكاني وبتكفت فيني بكل قوتهاا..لحدي ما رمتني في الارض..وطلعت شبشبها وبقت تضربني بيهو في وشي واي حته في جسمي وانا بصرخ وبتوسل ليها أنها تسمعني بس بدون فايدة...ياسمين جات جارية وشافتنا..جات مسكت أمي..أمي لزتها هناك...أساسا أبوي طلع بعد اتكلم معاي طوالي ما عارفة لو كان قاعد كان ح يحصل شنوو..أمي فجأه هبطت ووقعت..ياسمين قعدت جنبها وبقت تقول:- أمي أمي اصحي..في شنو يا ليالي في شنو اتكلمي ياخ..مالها معاك..انا كنت ببكي بس ما قادرة حتى انطق بكلمة...ياسمين بصرخة:- قووومي جيبي بصلة وموية قومي..قومتا بصعوبة مشيت جبتهم وجيت..شممت أمي البصله ورشتها بالموية..أمي نفسها كان عالي زي الشخير وعيونا غايرة..لما فتحت شوية مسكتني من شعري وبقت تقول:- ليه ليه حرام عليك..عملتي كده ليه..الليلة إلا توريني ده منو ومشيتي ليهو كم مرة..والله ما تتكلمي أطلِع روحك في يدي يا قليلة ادب يا لافة..دي اخرة قرايتك..تفووو عليك يا عفنة...اتكلمي..اتكلمي سرعه..قولته ليها:- والله والله العظيم يا أمي انتي فاهمه الموضوع غلط والله العظيم...كفتتني وخنقتني وبقت تقول:- غلط..شقة وتقولي لي غلط...بقيتي تمشي شقق يا ليالي..فجأه بقت تبكي وعاينت لي بكسرة وقالت:- انا ليالي بتي التعبتا في تربيتها ما بتعمل كده...ليه كسرتي ضهري..ليه ختيتي راس ابوك في الارض..ليه..قصرنا معاك في شنو...أفتحي خشمك ده ما تسكتي لي ما تسكتي..ياسمين ما كانت فاهمه حاجه بس بتعاين لينا وبتهدي في أمي..أمي وهي طالعه من الغرفة شالت تلفوني معاها..قالت :- تاني جامعه تبقى ليك زي الحلم..تلفون ماف طلعة من البيت ماف الله يقدرك تخطي خطوة واحده برة الغرفة دي والله اكلم ليك أبوك..وعاينت لي بإستحقار وطلعت..بقيت أبكي وأضرب في وشي..عملت شنو انا عملت شنو...يا الله لا..أمي فهمتني غلط فهمت بتها غلط وخلاص..حياتي انتهت..اعمل شنو يارب ساعدني..انا غلطانة ايوة بس والله العظيم نيتي سليمة وانت عالم..يارب تطلعني من المحنه دي يارب...!
بليل ياسمين جابت تلج وبقت تمرروا في جسمي ووشي..قالت لي:- أمي بتبكي يا ليالي..متحسرة منك شديد وزعلانة..أنا فاهمه إنو الدردشة عادية بس أمي لا..أمي مهما تحاولي تقنعيها ما ح تقتنع ليك...قولته ليها:- مبروك..يلا أشمتي فيني لسه..مش ده الانتي عاوزة..قالت لي:- ماتفتكري انا مبسوطه بالحصل ليك..انا زعلانه عليك بالجد..مهما حصل ومهما الشيطان دخل بينا أنتي اختي الصغيرة يا ليالي وانا الكبيرة..صدقيني💛..حاولي تنومي..لأنو فكرة أنك تواجهي أمي حالياً دي مخاطرة ويمكن ترجع تضربك تاني...غطتني وطلعت..انا البكى البكيتو ليلتها..عمري وحياتي ما بكيت زيو..إحساس إني غلطانة وما غلطانة..لخبطة جواي وندم واي احساس سئ انا حسيتو وقتها...
