Flying Gulls Never Land [ဘာသာပြန်]

23.2

"ခင်ဗျားအနေနဲ့ လွန်ခဲ့တဲ့၂နှစ်က မစ္စတာလောရဲ့ Social Media Account တွေကတဆင့် နေ့တိုင်းစာပို့ခဲ့တယ် ၊ ခင်ဗျားရဲ့ နေ့စဥ်ဘဝအကြောင်းအရာတွေကို ပြောပြတယ် ၊ ချစ်တယ်ဆိုတဲ့အကြောင်းတွေ ပြောခဲ့တယ် ၊ မစ္စတာလောက ခင်ဗျားရဲ့ရိုးသား​မှုကြောင့် စိတ်လှုပ်ရှားသွားပြီးတော့ သူ့ဖုန်းနံပါတ်ကိုပေးတယ် ၊ ခင်ဗျားကလည်း ချက်ချင်းဆက်သွယ်ခဲ့တယ် ၊ ဒီကိစ္စနဲ့ပတ်သက်ပြီး ခင်ဗျားကျေနပ်နေတယ်ဆိုတာ သိသာတယ် ၊ ပြီးတော့ ခင်ဗျားကြိုက်တဲ့အနုပညာရှင်နဲ့ ရင်းနှီးတဲ့ဆက်ဆံရေးတစ်ခုဖန်တီးနိုင်မယ့် အခွင့်အရေးက တခြားအရာတွေထက် ခင်ဗျားကိုပိုစိတ်လှုပ်ရှားစေခဲ့တယ် ၊ မှန်ရဲ့လား ? "

မော့ချိုး နှုတ်ခမ်းနှစ်လွှာကို တင်းကျပ်ကျပ်ဖိကိုက်ကာ ဖြည်းဖြည်းခေါင်းညိတ်မိသည် ။

"ဟုတ်တယ် ဒါပေမဲ့..."

"ဟုတ်ပြီ..."

တရားခံဘက်ခြမ်းမှ မျက်နှာပြင်ကြီးကြီးတစ်ခုထက်တွင် သက်သေတစ်ခုက အချိန်ကျပင် ပေါ်ပေါက်လာခဲ့၏ ။ ၎င်းမှာ ဘောင်ကွက်လေးကွက်ပါသည့် အရောင်ခြယ်ရုပ်ပြပုံတစ်ခုပင် ။ ထိုရုပ်ပြပုံထဲတွင်ကား အိမ်ထောင်ရှင်အမျိုးသမီး၏ပုံကို သရုပ်ဖော်ပြထားခဲ့၏ ။ ဆေးထိုးအပ်ကိုင်ကာ သူနာပြုဝတ်ဆင်ဝတ်ထားခဲ့သောအမျိုးသမီးက အားအင်များထိုးသွင်းပေးမည့်အကြောင်း အလုပ်မှပြန်ရောက်လာသည့်ခင်ပွန်းဖြစ်သူအား စနောက်နေခဲ့၏ ။ ပြသထားသော ရုပ်ပြပုံကား အစမရှိအဆုံးမရှိပေ ။ ကြီးကြီးမားမား အနုပညာလက်ရာတစ်ခုမှ အတိုအထွာလေးတစ်ခုကို ထုတ်နှုတ်ပြထားသည့်အလား ။

"ကျွန်တော် မှတ်မိတယ် ၊ ဒါကျွန်တော့်ရဲ့ အနုပညာလက်ရာထဲက တစ်ခုပဲ "

မည်သို့သောအကြောင်းကြောင့် ရှန့်မင်အော် ဤအပိုင်းအစလေးကို ဆွဲထုတ်လာရလဲဆိုသည်ကို မော့ချိုးလုံးဝနားမလည်နိုင် ။

"အဲ့ဒါက အရမ်းကြာခဲ့ပြီ ။ ငယ်ငယ်စုံတွဲတစ်တွဲရဲ့ ပျော်စရာ စိတ်ချမ်းမြေ့စရာကောင်းတဲ့ နေ့စဥ်ဘဝအကြောင်းဆွဲထားတာ..."

"ခင်ဗျားက တစ်စုံတစ်ယောက်ရဲ့နေရာမှာ ဝင်ပြီးစိတ်ရောကိုယ်ရော သရုပ်ဆောင်ရတာ အဖြစ်အပျက်တွေကို စိတ်ကူးယဥ်ပုံဖော်ရတာ ကြိုက်တယ် ဟုတ်တယ်မလား ?"