شيخه ... يا سواد الوجهه يول يشموخ صدك هالحجي معدله حجابج جدامه
غالي بصياح ... جده شبيج ول عليش تخلوني هسه اروح اموته واخلص منه
وفاء ... جده جذب اني جنت واكف اصلا شموخ ولا اندارت حتى ما شافته
رضيه ... روح موته وابتلي بي وخليني فاكه حلكي عالهوى حرمتك احبسها فوك ولا تضل تتمشكل ويه عمومتك
غالي بغضب وصياح ... يمه يمه وين متمشكل اني شو جنكم ما مصدكين
انتم ويايه لو عليا هاااا
سعد ... كافي ول يابه وياك احنى عجل عليش ماكلت هيج جدام عمامك
غالي ... اكللهم يكول ركبت مرتي معضعضه ناقص اني مثله
هيفاء ... شمدري بركبتها يجوز معدله حجابها عادي يعني من فات لجحها
غالي بصياح ... هيفاء ولا كلمه
اسمع الحجي متت بجي طبيت عليهم فتحت حجابي كلتها جده دحكي عليا ركبتي بيها شي
عمو سعد صد بصفحه كال ... روحي وليدي مو يمج الحجي
دحك عليا مطير عيونه اشرلي اطلع
طلعت بسرعه ضليت واكفه يم الدرج
طلع من البيت عصبي غادي نارر ولشته كله ترجف واديه معوره طالع منها دم
رحت للمطبخ اساعدهم اديه ترجف ما اكدر اسوي شي جبت السطل وكاعده الم المواعين المكسره انجرح اصبعي جابتلي وفاء كطن
طب غالي شافني طير عيونه تگرب عليا يدحك عالجرح كال ...عوفي كل شي وامشي فوك
صعدت لغرفتي فتحت العلبه اخذت لزكة جروح اريد اضمد جرحي ما اكدر
دخل وطبك الباب اخذ اللزكه وضمد اصبعي
ما سويت شي هو كل ساع يطب
اششش ادري ادري
كعد عالقنفه وكعدني على رجله يحجي بهدوء بس نبرة صوته شديدة
اي عزيمه اتصير بيتنا واتشوفين ولد عمامي يطبون للمطبخ فورا تطلعين اني ما مشكك بيهم ولا بيج جاي تفهمين عليا بنيتي
هزيت راسي اي ... وكمل كلامه
يضلون يشاقون ويضحكون نوبات يكطون حجي بضحك كلهم اعرفهم واعرف طبعهم تا ما يتكرر الي صار اليوم اذا اني موجود وياج اخذي راحتج ما امنعج من الكلام
بارت 21
Start from the beginning
