Working Student (BISAYA AU FROM TIKTOK)

DYESI SAIS

Cherry

Hapit tunga sa bulan si Kuya sa hospital usa siya nakagawas. Dako ang bill sa hospital pero maayo nalang kay naa'y life insurances si Kuya ug naa sa'y gihatag nga tabang ang nakabangga kay Kuya hinungdan nga gamay gamay nalang ang bayrunon sa hospital pero niabot gihapon og 70k ang excess.

"Unya imoha rang Kuya isa sa inyohang balay?" Pangutana ni Chloe samtang gahulat mi sulod sa room sa among next nga subject teacher.

"Atong una gikuyogan siya ni Ate Lenlen aron naa siya'y kauban sa balay pero nadugay kay kaya naman daw niya maong siya siya na lang."

Ing-ana jud na si Kuya, dili siya gusto nga makaangin siya'g lain. Maong hangtod kaya niya nga siya siya ra, siya ra jud na. Pero arang arang naman sad hinoon siya. Kato nalang mga samad samad niya ang gihulat niya nga maayo.

"Pero wala pa siya kabalik sa trabaho?"

"Wala pa. Gitagaan siya'g 1 month sa iyahang boss para magrecover."

Naglibog gani ko niya kay magsige siya'g bagutbot nga gusto na daw siya mobalik sa trabaho. Pero dili pa siya pabalikon hantod wala pa siya fully narecover. Kung about sa sweldo, wala man sad daw angay kabalak-an kay icharge to as leave. Boring na jud daw kaayo'g tambay sa balay.

"Unya, unsa daw tong nahitabo nila Ate Kyla hospital?"

"Wala ko kabalo. Wala pako kapangutana kay Kuya."

Wala na sad ko kita kay Ate Kyla sukad paglakaw niya sa hospital. Wala na sad siya nibalik. Daan na ga ingon si Kuya nga dili na siya gusto makita ni Ate Kyla pero wala ko kabalo kung unsa'y rason.

"Kumusta si Ate Kyla?"

"Okay ra man siya. I mean, so far wala man ko'y nakita signs of sadness sa iyaha. O basin hawd lang jud siya motago." Gilihok niya iyang duha ka abaga.

Gisulti nako kay Chloe ang nahitabo sa hospital. Nahibulong kaayo mi kung unsa ang bug-at nga rason para maghilak si Ate Kyla. Wala hinoon nako mapugngan ang paghunahuna nga naa to'y labot sa pagkadisgrasya ni Kuya o basin naa pa'y laing rason. Pero kung unsa man gali ang rason, unta ma okay na sila.

Mrs. Alquizar:

Rhean, please sayo og uli unya.

Giinvite nako ang girlfriend sauna ni Janvier nga sa balay mag dinner.

Tabangi ko magluto.

Ako:

Okay, Tita.

Nagtuo ko nga suod siguro nila Tita sauna ang ex ni Janvier hinungdan nga hantod karon gina-welcome gihapon nila sa ilahang bala bisan wala na sila. O basin tinuod ang istorya nga nag balik jud sila.

"Niks!"

Mihunong ko pagkadungog nako sa tingog ni Larry ug gilingi siya nga nagbaklay padulong sa akoa.

"Naa ko'y good news. Nagdali ka?"

"Papaulion ko'g sayo ni Tita pero go lang. Unsa mana?"

"Guess what?" Mingisi siya sa akoa pero wala ko'y idea kung unsa man ang iyahang iingon. "Congrats! Nakadaog ta sa make-up contest!"

"Hoy! Seryoso?" Gitabunan nako akong baba human mipagawas og dako nga ngisi.

Wala ko nagdahom. I mean, hawd man jud mangamot si Larry ug naa ko'y salig sa iyaha pero wala lang ko'y salig sa akong kaugalingon ngano ako iyaha gikuha. Pero hay, salamat!