Working Student (BISAYA AU FROM TIKTOK)

TRES

Spoiled

Niadto dayon ko sa parking lot pagtungtong og alas singko. Dako ang parking lot sa VVU ug wala ko kabalo asa siya dapit nag park. Nakasakay nako kaisa sa iyahang sakyanan pero tungod sa kadaghan sa mga sakyanan nga nagpark unya halos parehas pajud sila'g mga dagway, wala nako kabalo asa kay Janvier ani.

Nibaklay ko ug gi-isa isa'g tan-aw ang mga sakyanan pero wala ko'y makita nga tima-ilhan kung asa ang iyaha. Plate number nalang unta pero wala sad ko kabalo. Ichat na unta nako siya pero nahutdan sad ko'g load. Bisan free data maglugos ko'g sulod sa messenger.

Kalagot! Gi-timing pajud.

Unknown number:

Mosakay ka o dili?

Ako:

Mosakay pero wala ko kabalo asa ka dapit.

[Sending failed]

"Samoka oy!" sulti nako pagkita nako sa pula nga letra sa ubos.

Unknown number:

No reply? Ikaw bahala.

Unsaon nako pagreply kung wala ko'y load. Nipadayon ko'g baklay para pangitaon siya kay siguradong naa pa to siya diri karon sa eskwelahan.

Unknown number:

Bye!

Naa siya'y gisend na picture but unfortunately wala ko'y load so dili ko kakita.

Naabot ug alas singko baynte, wala gihapon nako nakit-an si Janvier ug ang iyahang sakyanan. Wala na pud siya nichat sa akoa maong nakahunahuna ko nga basin ni-una na siya'g uli. Hinoon, kinsa ra man ko para iyang hulaton. Knowing him nga mura'g wala'y pasensya.

Nibaklay ko padulong sa exit para mosakay og pedicab pauli. Mag commute nalang ko. Actually, mag commute raman jud unta ko kung wala pa lang ko kadawat og text gikan sa iyaha. Namasin nalang sad ko'g adto sa parking para makasakay aron makatipid sa pamasahe.

Imbis na pedicab, nakit-an nako ang itom nga sakyanan nga mihunong sa akong tungod. Ni-abri ang bintana ug nakit-an nako si Janvier nga kun-ot ang agtang nga nag tan-aw sa akoa.

"Sakay," sulti niya.

Wala'y pagduha duha nga giabrihan nako ang likod ug misakay usa niya gipadagan ang sakyanan.

"Nadawat nimo akong mga text diba? Nganong dili ka magreply?" pangutana niya samtang ga-drive.

"Sorry, wako'y load."

"Naghulat ko nimo sa parking lot."

"Naghulat pud ko pero wala tika nakit-an." Tan-aw nako sa iyaha sa rearview mirror.

"Unsaon nimo pagkita nga naa ko sulod sa sakyanan."

"Unsaon nako pagkabalo nga wala man ko kaila sa imong sakyanan."

Gitak-om nako akong pagbaba pagkita sa tabis niya nga tinan-aw sa akoa sa rearview mirror. Milikay ko sa iyang tan-aw ug ni-lingi sa bintana. Taod-taod kay gikalit niya'g liko sa kilid ang sakyanan ug gihunong.

Mikun-ot akong agtang nga nagtan-aw sa iyang gibuhat sa atubangan. Taod taod lang kay naa siya'y gitunol nga papel sa akoa.

"Plate number na. Para sa sunod, wala naka'y rason para dili nimo makit-an akong sakyanan," sulti niya usa siya nagpadayun og drive.

CKN 11**

Gibutang nako sa bulsa sa akong uniform paghuman nako'g basa. Okay na, memorize na nako.

"Naload-an na pud tika. Inkaso'g dili na pud ka magreply kay wala kay load," sulti niya pag-abot namo sa balay.