Working Student (BISAYA AU FROM TIKTOK)

SINGKO

Pabor

"Salamat, Larry," sulti nako paghunong sa sakyanan tungod sa gate sa balay nila Tita.

"Wait, Niks! Naa ko'y payong diri."

Gikuha niya iyang payong nga naa sa lingkuranan sa likod human gitunol niya sa akoa.

"Salamat. Iuli lang ko ni ugma." Mingisi ko human gi-unbelt ang akong seatbelt.

"Salamat pud sa pagkuyog, Niks. Naa pako'y utang snacks sa imoha."

Mikatawa ko usa minaog. "Bye, Larry. Amping pauli," sulti nako usa gisirad-an ang pultahan.

Nakasulod nako gate usa siya miserbato paglarga. Hinay raman ang ulan pero gisabayan og kusog nga hangin hinungdan para masalibuhan ang akong gisuot nga uniform. Usa pa nako masirad-an ang gate kay mao sad ang pag-abot sa sakyanan nila Tita hinungdan sa pag abri nako'g usab.

"Dugaya ni undang sa ulan uy," sulti ni Tita pagsulod nila sa balay.

"Ing ani jud ni basta inday-inday." Si Tito samtang gihubo iyang sapatos.

"Ganina raka nauli, Nak?"

Nilingi ko kay Tita pagkadungog nako sa iyahang pangutana. Nakit-an nako si Janvier nga nagbaklay padulong sa sala samtang naa siya'y gikaon.

"Ganina rang udto kay wala mi klase," sulti niya usa siya milingkod sa sofa para mutan-aw ug TV.

Nidako akong mata pagkabalo nga ganina ra diay siya nauli samtang ako niadto ra'g mall para kuyogan si Larry. Nakahinumdom ko sa gichat niya sa akoa ganina.

Gibutang nako akong bag sa sala ug niadto ko sa gawas pagkahinumdom nga naa man diay ko'y gihalay nga mga nilabhan sa gawas. Ulan baya, nabasa na sad siguro to'g balik. Pero natingala ko nga wala nako'y makita diadto sa gawas. Gihipos kaha ni Janvier?

Gibati ko'g kaulaw kung mao. Akoa baya dapat to nga trabaho pero wala nako nahimo kay niadto pako'g mall. Wala'y sala si Larry. Bisan pa man ug gipakuyog ko niya, dapat naghunahuna ko sa oras nga kinahanglan na nako muoli.

Unsa'y nala'y ikaingon nila Tita nga nag working baya ko sa ilaha.

"Wala raka nabasa sa ulan ganina, Rhean? Wala pa lagi ka nag-ilis?" Pangutana ni Tita pagduol niya sa akoa sa kusina.

"Mag-ilis ko ron, Tita. Nagluto lang ko daan."

"Oh, sige. Kay magkasakit unya ka."

Mitando ko sa giingon ni Tita human gipahinayan nako ang kalayo sa stove pagkaluto sa sud-an. Naghukad ko ug gipauna nako sila'g kaon usa ko nisaka sa taas para maligo ug mag ilis. Gidala nako akong gisuot nga uniform pagnaog nako aron akong malabhan paghuman og kaon. Duha ka kabuok pares sa uniform ang akong ginapulihan ug kada gabie jud ko nagalaba aron mauga dayun pagka-ugma.

Naabtan nako si Janvier sa terrace paggawas nako samtang nagdala ko sa plangga nga naa akong uniform. Naglingkod siya samtang naay gikuri-kuri nga mura'g parts siguro to sa CPU o unsa ba to. Niundang na ang ulan ug gihanger nako ang akong uniform sa halayan nga naa kilid sa terrace. Giduol nako si Janvier usa ko mobalik sa sulod.

"By the way, Janvier. Salamat diay sa pagkuha sa akong mga labhunon ganina," sulti nako.

Nakita nako ang mga mga hinalay nga naa sa laundry basket gawas sa akong kwarto. Maayo gani kay gikuha niya usa ni ulan. Kay kung wala pa, wala unta ko'y suoton uniform ugma.

Nihunong siya sa iyang gibuhat human nitan-aw sa akoa.

"Dili baya ko naga welcome, Rhean," seryoso niyang sulti.