School Trip

LESSON 14- Behind Those Evil Smiles

"MOMMY, I'm home..." Pagod na umupo si Bridgette sa sofa. Napagod siya dahil kakagaling lang nila sa libing ni Olivia.

Napangiti siya ng maalalang muli ang pag-iyak ng nanay ni Olivia kanina dahil sa ginawa nila sa puntod ng anak nito. Ginawa naman nila iyon dahil sa pagpapahiya sa kaniya ng kanyang teacher.

Inulit ni Bridgette ang pagtawag sa kanyang mommy pero isang katulong ang lumapit sa kanya. "Asan ang mommy?" tanong niya.

"Senyorita, nasa library po kasama ang kanyang mga amiga." sagot sa kanya ng katulong.

Tumayo na siya. "OK. Ihanda mo na ang aking pampaligo. Gusto kong mag hot bath ngayon. And pupuntahan ko lang si mommy sa library..."

Tatalikod na sana siya pero pinigilan siya ng kanilang katulong. "Pero senyorita ang bilin po ng senyora ay bawal po silang maistorbo-"

"Huwag mo nga akong hawakan! Ang baho ng kamay mo. Gross!" Sabay piksi niya ng kanyang braso. "At ano ito? Dinidiktahan mo ako, ha?" At sinampal-sampal niya ang katulong. Iyong mahihina lang pero sunod-sunod.

Napayuko ang kawawang katulong. "H-hindi po..."

"Walang pwedeng magdikta sa akin. Itatak mo yan sa utak mo!" Sigaw pa niya sabay talikod at tinahak na ni Bridgette ang papuntang library.

Pabukas niya ay sumalubong sa kanya ang matitinis na halakhakan ng mga sosyal na amiga ng kanyang mommy.

Lahat ng limang babae na naroon kabilang ang kanyang mommy ay sabay-sabay na napatingin sa kanya. Nawala ang ngiti sa labi ng kanyang mommy ng makita siya. Ngumiti lang itong muli ng kausapin ito ng mga ka-majhong nito.

"Siya ba ang anak niyo Mrs. Luviera? Napakagandang dalagita!" puri sa kanya ng isa sa mga amiga ng kanyang mommy. "Pero parang hindi mo siya kamukha kumare kahit na ng iyong asawa."

Pilit na ngumiti si Mrs. Luviera sabay lihim na pinandilatan siya. "Ah yes! She is Bridgette. Excuse me lang mga amiga!"

At nagmamadaling lumapit sa kanya ang kanyang mommy. Mahigpit siyang hinawakan nito sa braso at dinala sa kanyang silid. "Aww...Mommy you are hurting me!"

"Talagang masasaktan kang ingrata ka! Bakit ka nagpakita sa mga amiga ko?!" Pigil ang paglakas nito ng boses.

"M-may sasabihin lang sana ako mommy."

Kinuha ng kanyang mommy ang purse nito at naglabas ng lilibuhing pera. Nagbilang ito at isiniksik sa kanyang palad ang makapal na pera.

"Ayan! Twenty thousand! Iyan lang naman ang kailangan mo diba? Go outside at huwag kang babalik hangga't hindi umaalis ang mga amigas ko!" Matapos iyon ay iniwan na agad siya ng kanyang mommy.

Napaupo siya sa kanyang kama. Nakita niya ang kanyang sarili sa malaking salamin na nasa kanyang harapan. Hindi maitatanggi na tama ang komento ng kaibigan ng kanyang mommy at daddy. Ang totoo niyan ay bunga siya ng panggagahasa sa kanyang mommy ng dating hardinero ng mga Luviera. Kamukha daw siya ng rapist na nambaboy sa kanyang mommy.

Dahil sa realidad na iyon ay walang amor sa kanya ang kanyang mga magulang. Kapag may kaharap lang silang ibang tao ay saka nagiging mabait ang mga ito. Oo, naibibigay ng mga ito ang lahat lalo na sa pera pero hindi lang naman iyon ang kailangan niya...Kailangan niya ng atensiyon ng mga ito.

Naisipan na lamang niya na tawagan si Thea ng mga oras na iyon.

NAPABUGA ng hangin si Thea matapos niyang makausap sa cellphone si Bridgette. Nag-aaya itong gumimik ngayon. Nag-aalangan siya sa pagsama sa mga ito dahil halos ubos na ang kanyang ipon.