တောင်စဉ်၊ မြစ်ပြင် တစ်ခွင်တစ်လွှားဝယ် (MM translation)

Chapter - 8: ဤကမ္ဘာ ( ဤကမာၻ )

(Uni)

ငါတော့ သောက်တာများသွားပြီ ထင်တယ်

သူတို့သည် နာရီဝက်ကျော် အချိန်ဖြုန်းလျက် "မင်းအမူအရာလုပ်ပြ၊ ပြီးတော့ ငါက မှန်းကြည့်မယ်"ဟူသည်ကို မရေမတွက်နိုင်လောက်အောင် အလှည့်ပေါင်းများစွာလုပ်နေကာ နောက်ဆုံးတွင်မူ ကြက်များက ဘဲများကို စကားပြောနေ*သည့် အခြေအနေသို့ ရောက်သွားလေတော့သည်။
[ကြက်များက ဘဲများကို စကားပြောနေ - တစ်ဖက်လူကလည်း ပြောချင်ရာတွေပြော၊ ကိုယ်ကလည်း နားလည်ချင်သလိုတွေ နားလည်နေကြတာမျိုးကို ပြောချင်တာပါ]

အာခေါင်များခြောက်လာပြီး လျှာများသွေ့လာသည်အထိ ပြောပြီးကြသည့်အချိန်ကျမှ ခဏတစ်ဖြုတ် အနားယူကြလေတော့သည်။ သူတို့တွေးနိုင်သမျှ၏ အဆုံးစွန်ထိရောက်နေပြီဖြစ်သော လူနှစ်ယောက်မှာ မျက်နှာချင်းဆိုင်ထိုင်လျက် တစ်ယောက်နှင့်တစ်ယောက် ကူကယ်ရာမဲ့စွာ စိုက်ကြည့်နေကြပေသည်။ နန်ရှန်းက သူ့အတွက် အရက်တစ်ခွက်ငှဲ့ပေးလိုက်လေ၏။ ဤသည်မှာ သူတို့၏ ခံစားချက်များကို ဆက်သွယ်ဖော်ပြနိုင်မည့် တစ်ခုတည်းသောနည်းလမ်း ဖြစ်လာလေတော့သည်။

သူတို့၏ လည်ချောင်းများကို ဤနည်းဖြင့် ရေဓာတ်ဖြည့်လိုက်ပြီးနောက် သောက်ပြီးသွားသည်နှင့် အမူအရာလုပ်ပြခြင်းကို နောက်တစ်ချီ ပြန်လည်စတင်လာကြပေ၏။

ချူဟွမ်မှာ တဖြည်းဖြည်းနှင့် အရက်၏ အနံ့ကို အသားကျသွား‌လျက် ထိုထဲမှ သွေးညှီနံ့နှင့် ရောစွက်နေသော ယမကာနံ့သင်းသင်းကို ခွဲခြားနိုင်သွားလေတော့သည်။ နောက်ဆုံးတွင်မူ ဤသို့သောနည်းလမ်းဖြင့် မည်မျှသောက်လိုက်မိသည်ကိုပင် မမှတ်မိနိုင်တော့ဘဲ တစ်ခွက်ပြီးတစ်ခွက် ဆက်တိုက်သောက်လိုက်မိပေ၏။ သောက်လိုက်သမျှမှာ သူ့ခေါင်းထဲသို့ ဆောင့်တက်လာလေရာ ရီဝေဝေဖြင့် ခုတင်ခေါင်းရင်းကိုမှီနေရသည့် အခြေအနေသို့ ဆိုက်ရောက်သွားလျက် ရှောင်ဖန်းတစ်ယောက် အပေါ်အောက်ခုန်ဆွခုန်ဆွဖြင့် ရယ်စရာကောင်းသည့် သရုပ်ဖော်မှုမျိုးကို စိတ်အားထက်သန်စွာ လုပ်ပြ‌နေသည်ကို ကြည့်နေရလေသည်။

ထိုလူမှာ သူ၏ဝမ်းခေါင်းထဲသို့ အားအင်များစုစည်းကာ ခြေနှစ်ချောင်းကို မာပုထိုင်နေသကဲ့သို့ ချဲထားလျက် တစ်ချက်အော်ဟစ်လိုက်ပြီးနောက် လက်နှစ်ဖက်လုံးကို ဆန့်ထုတ်ကာ တစ်ယောက်ယောက်၏လမ်းကို တားဆီးနေသည့်ပုံစံလုပ်ပြသည်ကို တွေ့လိုက်ရချေ၏။