Sa edad na disinuebe ay nabuhay si Damon Storm Del Martin na nakukuha niya lahat ng gusto niya. May mapagmahal na magulang, marangyang buhay, kasikatan, at mapagmahal na nobya. Ang akala niya ay ganoon ang buhay na aayon sa lahat ng gusto niya. Ngunit isang araw ay binulaga siya ng dalawang katagang babago sa kinasanayan niya. Isang babae ang biglang sumulpot sa labas ng bahay niya at sinasabing buntis ito at siya ang ama. Sa isip niya ay hindi maari iyon, ngunit wala siyang nagawa nang magdesisyon ang kanyang mga magulang na ipakasal siya sa babaeng ito. Nagulo ang maayos na takbo nang buhay niya, bukod pa roon ay nawala ang babaeng pinakamamahal niya. At lahat ng iyon ay dahil kay Holly Paige Samonte---ang babaeng nabuntis niya. Kaya naman gagawin niya ang lahat para masira rin ang buhay nito. Ngunit habang tumatagal na nakakasama niya ito ay may kakaiba siyang nararamdaman, pakiramdam niya ay lumalambot ang puso niya. Parang gusto niyang bigyan ng tsansa ang relasyon nilang dalawa. Pupuwede kaya iyon?