ســنيسفيــورم ❤️🌹
بقلــم: محمــد مالـــك
الحلقــه "السادســه 6 "
__________________________
ركبــو فـوق و شبحـو الدكتـور طالع و بلقيـس و امهـا قاعديـن
الدكتـور بخيبـة أمـل. : عظـم الله اجركم بوك و الشخـص الثانـي انتقـلو لـ رحمـة الله.
بلقيـس انهـارت تبكـي و الاء،مشتلهـا و اسامـه غمـض اعيونـه : ان لله و ان اليه راجعــون
فـ نفـس الوقـت فـ واحـد عيـط بصـوت عالـي و هجـم ع بلقيــس
اسامـه شبـح الولـد جـري لجيهتـه شـده من شعــره
بلقيـس مفنصـه عيونهـا و مكبشـه فـ الاء.
الولـد يبـكي بحرقـه. : انتـم لـ قتلتـو بـوي انتـم.
عيلـه الولـد جـو لاسامـه.
اسامـه شبحلـهم بعصبيـه و رما الولـد عليـهم : بوك توفـى و الله يرحمـه هذا عمـره و لـ توفـئ قريبـي. كيف تمس بنت اه
الولـد: بوهـا الغالـط
بدو عيلـه الولـد يعتـذرو بدل عن الـي داره الولـد و اسامـه هز براسـه عـزاهـم و مشـي لـ عمتـه. : عظم الله اجـركم ي عمتـي
عمتـه تبـكي و شدت فـ اسامـه. : يحليـلي ي وليـدي مشي و خـلاني بكري بكري من بيـا من ليـا
اسامـه تاتـر و حضنهـا و بـاس ع راسهـا. : الله يرحمـه و يجـعل مثواه الجنـه صبـري روحك.
مشـي لـ الدكتـور. : السـلام عليـكم معليـش شن سبب الوفـاه. ؟
الدكتـور. : المريـض حسين اه نـزيف داخلـي مقدرنـاش نوقفـوه و خصوصـا ان الحـادث فـالقفـص الصـدري و الكسـور هلبـا
اسامـه تنهـد: تمـام صحيـت. دكتور
بلقيـس تبكـي و تتكلـم و هـي تشهـق: بابا مشي و خلانـي اني و مـاما مالينـاش غيـره حي عليـا ي الاء بدري بدري حي عليـا
الاء تبكـي و تحـاول. تخفف عنهـا بـس الالـم هـذا مجرباتـه و الـبو هـي فاقدتـه. " بـوك بوك يـطول الزمـان ظهر و سنـد و دنيـا ليـك اتغيـب الدنيـا كلهـا و هو ما ايغيـب🌹"
الاء. : بلقيـس حبيبتـي احنـي معاكم.
اسامـه نـاض و هو اعيونـه ع بلقيـس. : عمتي هي نرفعكـم لـ الحـوش و شوفو شن ناقـص و كل شي شـوري
عمتـه تبكي: ولله ما عنـدي حيل لا عزي لا نـاس
اسامـه. : نعلم وعليـم الله ان وجعنـي الله غالب الدنيـا. ما تاخـد كـان الطيـب اهم شي ادعيلــه. قعدتكم اهني ماليهـاش داعي
شوي و طلعـو اسامـه سانـد عمتـه و الاء سانـده بلقيـس الـي كانت خاطرهـا تشبحـه بس مخلوهـاش
فـالطريـق شرين تليـفون اسامـه رد. : ايوه امـي
تهانـي. : شن حالـه عمك طمنـي
اسامـه تنهـد. : الله يرحمـه
تهانـي عيطت و حطت يدها ع قلبهـا : يحليـلي موعرهـا ان لله و ان اليـه راجعـون
اسامـه. :اهو بنحطـهم ف الحـوش معاهم الاء و جـاي نرفعكم تقـوئ منبيهـاش تطلع في واحد يحـوم عالـحوش مش زابط خيره
تهانـي. : العـفو من سكـان المنطقـه. ؟
اسامـه. : منعلمـش. اكيد زابط وحده من البناويت هي بسلامـه بعدين نتكالمـو
صكـر الخـط و بحت في بلقيـس عيونها دمـوع كلهـا. نـزل خدالهـا اميـه و قعدت الاء تشرب فاهـا. بشوويـا
وصلو لـ الحـوش و نزلو و اسامـه شد الاء من ايدهـا : الاء ديري دوره ع حـوش و شوفي شن ناقص بنجيـب امك و بناويت و نجي
الاء هزت راسهـا و خشـت و شـوي بدو الجيـران،يخشـو و يعيطـو كـان محبـوب هلبـا الكـل،يحبـه يوقفـو،معاهـم فالكبيـره قبل الصغيـره
ركـب اسامـه لـ سيـارتـه و هـو مخنـوق اي راجل عمتـه و علاقتـهم. مش قويه هلبـا. بـس فـي الانسـان لـ،يخلي في ذكـريات حلـوه عنـد غيـره باحترامـه و باسلوبــه و هـاذي هـي شخصيـة راجل عمتـه رزين و عاقل و محـبوب
و بينمـا،يسـوق كـان تفكيـره كلـه في بلقيـس و عمتـه ان ماليهمـش راجل تتوا اشبـح شن بيصيــر،فيهـم
مسافـهة الطريــق وصـل قعـد واقف شوي و يشـبح يميـن و يسـار ع امل يشـوف الولـد و يعـرف اميتـه وين اتصـب بس مالقـاشـي. خـش لـ الحـوش.
كـانت تقـوئ و ابـرار و تهانـي لابسات و مقعمـزات.
اسامـه. برفعـة حاجـب و يتلفـت. : شن وين باقيـكم
تهانـي: شن بنمشـو كلنـا
اسامـه راكب لـ دروج باش ياخـد فلوس. : اي ميقعدليـش حد اهنـي
تهانـي. : السيـاره ضيقه خيرك شن جاك
اسامـه. : تتحملـو بعـض شن فاهـا.
تقـوئ: الحـوش بيولـي فاضـي كان دخل خانب
اسامـه من فوق بعياط: يخنـب المـال و يجي غيـره لمن تصير لـ حد حاجه فيكم شن بيعوضني باها
خـش لـ داره خـدي فلـوس و نـززل
اية: علاش بنمشو شن بيصيــرلنا يعنـي
اسامة فنـص فاهـا ؛ اطلعي من غير كــلام اصلا اني الــيوم بننفجر الصــبح غفران بعدهـا اسمــاعيل وتوا وفــاة عمي حسـين متخليش ننفجر عليك انتِ ويـاها
البنـات خافـو علئ اسامـه مش منـه يصيرلـه شي لان يومـه كلهـا واضح مضغـوط هـي غفـران ساده
ركبــو كلهـم و هـما متضـايقيـن و ايه تشـبحو خـايفه من سفيــان
تهاني: كيف حالها عـمتك منهارة ؟
اسامة بحزن: اي ولله مسكينة ربي يكون ف عونــها. !
تهاني عيونهـا دمعو : اي والله يوم فقـدت بوك ما ننــساه طول عمري ربي يكون ف عونهم هما عندهم راس بنت اشبح شن بيصير فيهم توا
تقوى : حي لو عمامها يبو يخشو فـ رزق خوهــم ! معندهمش ولد صح اسامة ولا فالشرع عندهم حق عــمامها وجدها صح
اسامة: منعلمــش كيف مش وقته توا نسيتي عمامك كــيف يموتو عالفلوس توقعي كل شـى من البشر. هـادم ومدام جبتو سيرة عمــامكم
روان: ايه كيف بنقولك كنت. !
اسامة: ايوا اكيد حتشـبحو نساوينهم و تشوفوهم مرات فالعزاء خلطة مفيش خير خيــر وانهو فاهميــن ولا. " و رفع حاجبـه "
تقوى: اي من غير ما توصى
تهاني: يقولو عليكم قلبكم اسود متنســوش صارت حاجة ليـها سنين وقاعدين منسيتوش. !
اسامة: يقولو لـ،بيقولـوه ي امي صارتلي معاهــم حاجات حتا انتو معندكمش علم بــيها زي ما يقولو خليها فالقلب تجرح ولا تطلع لبرا وتفضــح. !
تهاني: العفو احــكيلنا خيرك
اسامة..ابتسم بحســره: كان بنحكيلكم كل حاجة حــتقولو امتئ صار ووين كنا انتو ديرو الي قلته وانتهي الموضوع والي عنده حاجة بيقولها يقولها علينا مش هامنا كلام حد ولا رضا حد ومنبيش نسمع انكم سبب ف مشكلة بذات انتِ ي ايه لسانك ففمك لما تمــشي
اية: كل ما يصير حاجة تقولو بذات انتِ يا اية فهمت فهـمت. ياســر
تهاني: من لسانك متبرى منــك منسيتش شن قلتى اليوم قدام خالتك وغفران غير نفضا ونحاسبــك ع كلامك
اسامة..ابتسم: اية
اية..خافت وقالت توا بيهــزبها: نعم
اسامة: شن خاطرك ناخدلـك
البنات قعدو يضحكو من الخلف. !
تهاني...تشوف ل اسامة باستغراب: بدل ما تهزبها وتقولهـا عيب الي داراته تقولها شن خاطرك ناخـدلك
اسامة..مبتسم: لما ادير حاجة تعجبني نعطــيها مكافاة اكيد
تهاني بحسـره : يا خسارة ما ربيت فيــك تلقح ع خالتها وبنت خالتها يعجبك
اسامة: لا علي خالتي مش عاجبني لكن علي بنت خالتي عاجبني
تهاني: خيرهــا شن دارتلك البنت مسكينة اني قــتلهم يجو مش تشوفها ماه كله منك سالتك تعرفها قتلي كيف شكلها معقولة بنت خالتك متعرفش شكلها. !
اسامة: اني شن قتلك قبلها زواج لا منبيش نظــلم حد معاي الباب الي حتفتحيه معنديش جهد ليه بعديــن لما نعرف روحي نقدر نتزوج نجي اني ونقولك اخـطبيلي
تهاني: مش علي مزاجك والبنت منبيش نفوتها زي الغزالة وعيونها خضر
اسامة..خبط ع الســتيرسو : هالعيون الخضر الي شادتيهم يا امي
وصل امــه و تقوى و ابــرار
وقعدو معاه فالسيارة اية و ملاذ راقدة و روان
خدى الحاجات الناقصة من الاء وخطم جابهــم
و روح بخواته لـ الحوش
خش الحوش
و كلهـم ركبــو لـ ديارهـم
روان شبحـت لاسامـه. : انديرلـك تاكل حاجـه؟
اسامـه هز راسـه. : لالا معنديـش نيـه " و ولـئ يكح"
روان بخــوف. :خيرك شورك واخـده برده ؟
اسامـه يعطس و تفكـر الحـوض. : اي شوره هي تصبحـي ع خيـر. " و ركب "
خـش لـ داره دوش و لبـس بعدهـا صلـى و اتصـل بيتـم اجـراءت الجنــازه
كيـف بياخـده النـوم شرين تليفونـه. : ايييح قيسهـا ليلـه. و كـانت غفـران استغفـر و رد
غفـران بابتسـامه. : مساء الخيـر ان شاءلله مش راقد
اسامـه. : لا فايـق خيـر لـ شني بتوصلـي
غفـران استكت من اسلوبـه. : ولا حاجـه اتصلت بنتعـرف عليك
اسامـه. باستغـراب: ما تعرفينـي ولد. خالتـك و تمت
غفـران. : اي لكـن احني علاقتنـا مش قويـه هلبـا حتـئ الشـبح نشـبح فيك بعد وين
اسامـه. : بتعرفـي بنرقـدو. غدوه وراي عزي
غفران: عزاء منــي؟
اسامة: راجل عمـــتي
غفران: الله يرحمه ويغفرلــه ..عظـم الله اجـرك خلاص مدام تعبان حاضر استــريح اهم شى راحتك
اسامة: اجرنـا و اجـرك ع الله تصبحي ع خيــر
غفران و هـي متعصبـه. : وانت من اهلــه
صكـر الخط و رمـئ التلفون بحـداه: اخخخ ي امــي اخخخ علاش شادة فالمــوضوع ناقصني نقعد انســاير فــيهم اني
________________________
ليلـه كانت ثقيلـه هلبـا علئ بلقيــس لكـن الاء صبرتهـا شـويـا. طول الليـل متغمـره حوايـج بوهـا. و تتفكر فالذكريـات و كل شـوي تعيـط و تبكـي بعدهـا تسكـت
________________
اليـــوم 11 الــصبح
روان..طقت ع باب دار اســامة
اسامة..كان فاتح لابــتوب ومقعمز : تعالــي
روان..فتحت و شبحـت لـ اسامة: خيرك ممشيتش للخدمة اليوم !
اسامة: لا خدمة لا واحد لن نشــوف الولد شن موضوعه من امس واــني نفكر منقدرش نخليكم بروحكـم فالحوش حتا امكم مهناش وتو روحكم بنرفعكم عندالعزاء اقعدو معاها كلمتني الاء قتلى نســاوين عمامك غادي
روان: كنت نكلم ف ماما مقالتـش شئ
اسامة: هي. بري ديري فطور ونرفعكـم
روان : تمـام
اسامة..صــــكر لابتوب
و فتـح الـدولاب لبـس سـروال جينـز اسـود و عليـه تيشـرت رقبـة بيــج و ساعتـه و خاتـم و نـزل
ايـه. : انـي مخاطريـش نمشـي
اسامة..خـش لـ المطبخ: شن فيه
اية..تشبـح لـ اسامة: منبيــش نمشي و نشبحــهم مش ناقصه
اسامة: واني قلت بتمشو كلكــم معاش حد يناقشني فيه الموضوع. هـذا
ملاذ: اني عندي امتحان غدوا لازم نقرا
اسامة يشرب ف قهوه توا نجي ناخدك انتي واية مش معطل عليكم روحي اقرى واوهِ تحملي هالكم ساعة ولسانك خلــيه ففمك
اية..ناضت وطلعت من المطـبخ. و هـي مش عاجبهـا
روان: الجنازة اليــوم ولا
اسامة: ايه اليـوم
روان: اني اسماعيل حياخدني المغرب يــعني حنروح اهنى مع اية و ملاذ
اسامة: معناها وحـدة من اخواتك بيروحو ي تقوى ي الاء ميخلوش اية و ملاذ بروحـهم
روان: شن بيصـيرلهم !
اسامة: خيرك روان قاعدين صغار وحدة ثانوي والثانــية اعدادي انتي غير قوليلهـم بس قال اسامة وحدة منكم تروح حتا ابرار قوليلها الاء مش حترضا تروح. و تخلي بلقيـس
روان: توا نقولهم مفهمتش شن قصة الولد امس بنسـالك نسيت
اسامة: يشوف للباب شدتيه قتــله مزال نشوفك نكـسرلك رجليك لانه تحركاته مش مزبوطـة وبعدين اني ماشى للمستشفي شفته مرة ثانية فالشارع قـصدي اول مرة نشوفه مثلا نقولو من سكان المنطقة ف مش مستريحله
روان: ربي يبعد علينا صغار الحـرام يارب
اسامة: اني كان نشده بس توا نفهم كل شئ
روان بخـوف: لالا شن بدير بيه فكك ما يجيبو الا المشاكل
اسامة..مباش يتناقش معاها شرب القهوة وفطــر وطلعو معاه
وصلهم لحوش عمته وكان زحمه الناس كلــها جاية تعزى
اسامة..طلع ومشى طول لـ جنازة و هوا فالطريق
اتصل بيه ايـهاب
اسامة: ايــوا
ايهاب: عظم الله لكم الاجر
اسامة: البقاء والدوام لله
ايهاب:وين انت اني شفت منزليـن فالفيس مكان الجنازة جيـت توا
اسامة: اهو قريب نوصل دقيقة ونكـون عندك
ايهاب: تمام
شوية ودرس اسامة جنب سيارة ايهـاب ونزل
سلم عليه و كان اذان صلاة الظهـر
ايهاب: شنجوك
اسامة: اهو الحـمد الله .. و ولـئ يـكح من جديد
ايهاب..ابتسـم: قتلك العومة فالصـقع تمرض. ولا
اسامة: امس يوم عالمي الحق كل شى صار فيه
ايهاب: متوضــى ؟
اسامة: ايه
ايهاب: نتوضاء ونجــيك امالا
اسامة..خش لـ الجامــع
صلى ركعتين وقعمز
بدى يزيد عدد الناس شوية شوية لن المسجد تعبى و اسامة لمح عمامه فرج و عبد الرحمن و علي
صلى صلاة الظهر والجنازة ومشو للمــقبرة
اول ما كملت الجنازة
طلع أسامة وايهــاب معا بعضهم
ايهاب: توا اني نمشي لمـحلك بعدين ونشوف لـ يخدم شن اسمه كان يبي حاجة ونوقف عنده والحساب توا نسـكره اني فـالليل
اسامة: تمام موضوع عندك امالا لانه مش حنفـــضا اليوم
ايهاب..اشر ل اسامة بحواجبه ل وراءه : متشــوفش وراءك عمامك يشبحولك الثلاثة
اسامة: منبيش نشبحــهم بكل اني هي مشيت
ايهاب: تمام تنقصك حاجة كلـمني
اسامة.. ابتسـم طبطب ع كتفـه ركب سيارته ولعــها وطلع
___________________
الاء: كلمني اسامة توا كملت الجنــازة وقريب يوصل
بلقيس..تبكي.: صغير يا الاء صغير
الاء: ادعيله بالرحمه خلاص ساد بكى عيونك منــفوخات ومش راقدة حرام الي اديري فيه لروحك هاده ومتـبيش تاكلي ! شن معناها متاكليش !؟
تهاني: عارفين الوجع الي انتِ فيه حتا اني جربـته يا بنتي بس ما اضرى الا فنفسك خودى لقمة ففمك بس
بلقيس..: معنديش نية مخاطريـش
الاء..تلفونها شريــن و كان اسامة
اسامة: اني برا تعالي شوية ي انتي ي امك ونادى ع بلقيـس بنعزيـها
الاء: جاية هي ..و شبحـت لـ بلقيس: تعالي اسامة بيعزيك
وقفت بلقيس و سـاوات الوشـاح كويس وطلعت معا الاء للباب
اسامة..شبــح ل بلقيس كيف عيونها حمر ومنفوخات اول مرة يشبحهـا هكي : عظم الله لكم الاجر ربي يرحـمه ويغفرله
بلقيس..هزت راسها : البقاء والدوام لله
الاء: متبيش تاكل ومن امس مش راقــدة
اسامة..شبـح ل بلقيس: اضرى ف روحك هكي. لازم تاكلـي
بلقيس..شبحـت لعيون اسامة عينها ف عينه وكيف جـت بتتكلم طاحت
اسامة..قــدم و لحق عليها شدهاا قبل ما اطــيح علاارض
الاء..ايدها ع وجها : حي عليا شن صارلــها.
اسامة: واضح هبوط بنرفعــها المستشفي خبـري عمتي انتي بس وقوليلها متخافش
طلع بـيها و هـو قايمهـا بـ حضنه فتح الباب الخلفي وحـطها
وقعد يجري بالسيارة ويشوفلها من المــراية
وصل بيها بسرعة ونزل خداها ف حضنه وخش باهـا للاسعافـات المستشفي
دخلها الدكتور للطوارئ وشاف ل اسامة: شن صــارلها
اسامة:مرقدتش ولا كلت من امــس
الدكتور قعد يشوف ف نبضها
اسامة..شاف لـ تلفونه كان فيه مكالمات فايتة هلبا من الاء
اتصل بيهـا
ردت عليه عمته : شن صارلها يا اســامة..وتبكي
اسامة:متخافيش يا عمتي دارولها تغدية واضح انه هبوط وتعبت !
عمته: نبي نجي وين انت
اسامة: مفيش داعي ي عمتي اني قاعد عندها ومش حيصيرلها شئ..يسمع ف صوت عمته تبكي
وشوية خدت امه التلفون منها
تهاني: ربي يهديها متبيش تاكل قتلها تصيرلك حاجة
أسامة: اني دكتور جاي وبنسكر
تهاني: طمنا ي اسامة عمتك مش متحملة ومنهــارة
اسامة:تمام
سكر المكالمة و شبـح ل دكتور
الدكتور: هبوط سكر حاد عندها لازم ترتاح و اول ما تفيق تاكل كويس نديرلك غرفة ولا بعد التغدية بتطلع بيها
اسامة: لا ديرلي غرفة نقعد اهنى بيها ف المستـشفي لـ اي ظرف
الدكتور: تمام فيه اجراءت تحت ديرهم وتـعال
اسامة..نزل دار الإجـراءت
وركبوها لغرفة
قعد معاها اسامة وكلم امه وقالها ع وضع بلقيـس ف تحسن وطمن عمته قعد فالغـرفة اكثر من ساعتين فاتح تلفونه ومرة مرة يشبحلهـا وهيا راقدة
طق الباب يحسابه الدكتور بيدير مراجعة او كشـف
نفتح الباب
وخش عمه عبد الرحمن وفــرج
يتبــــع 🌹❤️
بقلم محمد مالك
___________________
الحلقة الجاية ولــ بعدها
بيطلعو نساوين عمه و عمامه!
لقاء من ســـنين !
ملاحظة الجـــدول للناس الي مفهمتش
يومين بيوم التنزيل يعني يومين وراء بعض انزل و يوم لا ياريت وضحت الفكرة ❤