#ثلاث دمعات
الكاتبة :- ســندريلا ||𝐒𝐀𝐑𝐀𝐇 ♡.
البارت -26-
عمت عين الزمان اليمشي بالمكلوب
مايرحم الزين يحركة ويمرده
عمت عين الزمان وعمت ذيج عيون
من درب الحقيقة مغمضة وغمدة
مثل الموت بس يفتر على الزينين
ويخلي الاغم متونس بسدة..... 🖤
سهاد :- ولكم يبووووووو ماات راح العزيز
راح الحنين يبووووو ولطمت حيل
الگاع صارت متحملني والدنيا دارت بيه
صرخت بأنهيار :- منووووو المااااات...؟!
سهاد :- ولج يمة راح رجلي راح ابو بيتي
صخام بوجهي يمة وكامت تملخ بروحها
تشيلها وتركعها بالكاع فرفحت..
صدمة وذهول كل ضني راح مني مهران
كل ضني هو المات من سمعت زوج سهاد
هو الميت وشفت حالتها شلون تفرفح وعمتي
تصرخ وتلطم گعدت بالگاع وكمت ابجي
بجنون رهبة والموت مو شي هين
واردد بگلبي :- ربي احفظة الية ولتأذيني
بيه الهي رجعه اليه سالم غانم
الفهمته سهاد مخابرتها اميرة وكايلتلها رجلج انقتل
زاد خوفي عليه خفت لا هو هم يضيع مني
ويخليني صوت بكائنا الگئيب يرن بالبيت بكل
أسى سهاد ملخت روحها تلطم وتبجي وتهلس
بشعرها اتهسترت وحقها الراح ابن عمها وزوجها
جد الله يلوم اليلومها
باوعت ع الساعة ب ٥ الفجر ارتفع صوت الأذان
ع صوت بكائنا گمت بتعب ووگفت يم الشباك
هطلت دموعي بغزارة ودعيت يا ربي بحق لا اله الا الله تحفظة اليه وتردة لبيته اتوسلك يا الهي لا
تحرك كلبي عليه بعدني داادعي ودموعي تشكي حالي نفتح باب الشارع ودخل مهران شايل سلاحة
ووراه حازم وبشير وولد عمهم ارتاح كلبي
من شفتة وتمتمت الحمد لله الهي الحمد لله رحت لعمتي اصيح اجوي عمة اجوي....
ام مهران :- كل وليداتي ردو
هزيت راسي بمعنى أي ودموعي تجري
نهضت من مكانها بسرعة وطلعت وفتحت
الباب شافتهم وصرخت بوجهم
ها يا أحفاد عقاب من كونكم رديتو بلايا
ما تاخذون ثار ابن عمكم
رد واحد من ولد عمهم :- موش احنا النسكت
ع كتال اخونا بنفس الساعة الكتل اخوي اخذت بثارة
اني اباوع من الشباك عليهم وارجف
احس فيلم مو حقيقة مهران ما حجة ابد
بس عيونة ملتهبة بنار غياهب الانتقام
طلعت سهاد تعيط وتملخ بروحها فاقدة
وما تدري بروحها مفرعة ودشداشتها مشكوكة
اول ما شافها مهران شمر سلاحه لبشير وركض حضنها وسترها بحضنة كومها ويا ودخلها جوا
هي بجت بجت حيل بحركة كلب وتشكي الحال
لاخوها
حضنها وبقة يواسي بيها وعيونة حمر دم
بعدها گام وصعد فوك رحت اركض ورا
هو دخل وراد يسد الباب منعته وباوعتله
بدموع باوعلي وشتت نظراتة
بصوت يا دوب سمعتة همس :- طلعي طفوف
هزيت راسي بـلا وشفايفي ترجف واباوعله
اتوسلة يطمني بنظراتي بس ما صار وحقة الصار
مو شوية راح طلع دشداشة سودة بدل ولفة الشماغ
الاسود ونزل بلا ميحجي كلمة
نزلت ورا حتى اخاف ابقى وحدي...
العالم بدت تتوافد علينا وكالو الفاتحة تصير
ابيت الشيخ بالستة بيتنا مينشاف من الخطار
وصوت العياط والبجي يوصل لسابع جار
كل شوية وحدة تدخل وتلطم وتصرخ بكل قوتها تهز البيت هز... اني اشتغل وابجي والرجفة بيه من الخوف....
سهاد وام الولد وخواتة حالهن يكسر الكلب
نبحت اصواتهن من الصراخ واللطم ونعمت عيونهن
من البواجي.... مهران سألت مجتبى عليه گال راح للدفنة كلشي مجهول بالنسبه اليه وما ادري شنو الصار وليش مات صلاح زوج سهاد... من الخوف
والرعب العشته امشي واتعثر اكول هسه يطبولنة يكتلونة هسه يكتلون مهران هسه يموت واخسرة
صار المغرب واني مشدوهة اروح منا واجي منا
بنات عمهم لزمن الطبخ والخبز وشالن الفاتحة شيل
ويفترن هنا وهنا حتى خنساء ابد مقصرن واني
وياهن وهم لان كل شغلات البيت اني اندلهه فضليت
ع الصخرة....
نقطعت الكهرباء دنيا المغرب وصوت البجي
مالي البيت گالتلي وحدة من البنات اجيب
لايتات حتى يكملن الطبخ طلعت من المطبخ
وية طلعتي دخلت مرة من باب الصالة ضخمة
ولابسة اسود هي شافتني وعاطت بكل قوتها
بوجهي ولطمت...
ما ادري شنو الصارلي رجليني معانتني وگعت من طولي
بالگاع من الجفلة احس روحي ساحت من الخوف
كمت ارجف من فوگ ليجوة اريد اسيطر عن رجفتي
ما أگدر اسناني تصتك وابجي بجنون...
انتبهن عليه اجني نسوان اثنين يركضن عليه
ولامن المرة.. اي خية شلون تعيطين بوجه البنيه
مشوفيها طفلة ماعت روحها من الخرعة
ترد :- يااع بنات اخر وكت شهالعيارة وين ام صلاح
ولج دادة يبوووووو ولج خية شكلتي من دفنتي وليدج حدر التراب خية
نرعبت وأول مرة اخاف هيج خوفة متمددة بالگاع
بنص الصالة ومرة لازمة ايدي وتفرك بيها وتسمي
عليها تكلي بس احجي احس لساني ثكل ونعقد اريد
احجي والبيني ميخليني فاتحة عيوني ع اوسعهن
وابجي بهستريا اسمعها وما اكدر ارد حتى جسمي
كلة تشنج روحي تحثني انهض واكوم وكل اعضائي متعيني صوت صرخة المرة يدوي بأذني ويعلة صوت
شهگاتي المتألمة...
ام مهران :- بيبي جنان كومي اخذيها لغرفتها خافت
لا يصير بيها شي ما بينا حيل
جنان :- اي بيبي
اجتي جنان كومتني سندتني وصعدتني للغرفة
ونزلت الكهرباء لسه ماكو والغرفة فوك وضلمة
شغلت فلاش الموبايل وتمددت بالسرير وتلحفت
واختض شلون السعفة وارتعش... مر وقت
لهناك وسمعت طگة الباب غمضت عيوني حيل
والرجفة مفاركتني ولو للحظة لحظات متنوصف
من كثر الرعب العشتة...
نرفع الغطة مني وصوتة الحنون تخلل اسماعي
من گال :- فتحي عيونج طفوف
اي هذا صوتة هذا اماني وهذا مأمني هذا طمأنينتي وسلامي فتحت عيوني وباوعتله بدموع گومني وحضني
مهران :- ااشش اهدي ليش هلرجفة ع كيفج وية روحج
جلبت ايديني بدشداشتة وگتلة بأحرف مبعثرة :- اخاف اخاف لا تعوفني
مهران :-اشش ما اعوفج شون اعوفج
همست :- أحضني ودموعي مستمرة بالهطول
مهران :- هذا انة حبيبتي حاضنج بس اهدي
بللت شفايفي وحجيت بتوسل :- احضني اقوة
حضني اقوة واحس راح ادخل باضلاعة
تكسرت ضلوعي بالحضنة واحس اريد اطب
اختل بكلبة هم اريد احضنه وانام بأمان
وبس ..
اسمع صوتة الخافت يقرة عليه آيات قصيرة
ارتاحيت سكينة اجتاحتني اطمئن كلبي وأمنت
شگد مر وقت ما ادري بس حسيت بيه يبعدني
عنة انتفضت وجلبت بي ماريدة يروح والله اخاف
لزم ايديني وگال :- بنيتي بس اسبح تعبان
برطمت شفايفي ودمعت عيوني هو تنهد
وتمدد وجرني الة ونومني ع ايدة واستمر يقرة
عليه بهدوء وخشوع وايدة تداعب بخصلات شعري
نمت وما حسيت غير ثاني يوم ع صوتة
مهران :- صباح الخير ها بوية شلونج هسه
باوعتلة بنعس مبدل وكل لبسة اسود گمت
بسرعة وگلت :- وين رايح
مهران :- اوگف بالفاتحة .. تعالي جرني
وگعدني ع السرير گعد يمي وگال
بهدوء :- انة جوة شتحتاجين دزي مجتبى عليه
اذا حسيتي روحج مو زينة لا تسكتين ودزي عليه
ماريدج تنزلين جوة ابقي بغرفتج.... لا تخافين
اريد گلبج گوي ماكو شي يستحق الخوف
طفوف :- خفت يقتلوني
مهران :- ما دامني عايش فنة اليمس شعرة منج
باسني من راسي وگال بتعب :- بنيتي تعبان ونص حيلي راح وية روحت ابن عمي وانكسر ظهري ورا
لا تخلين بالي يضل يمج لا تبجين دموعج تنزل مثل التيزاب وتحرگني وتسلب كل راحتي
و لتخافين وشغلي قرآن
بالغرفة وراح ترتاحين واكلي حتى تتحسنين
هزيت راسي بأي هو گال :- خليني اشوف ضحكتج
خاطر انزل مرتاح ومأمن
بقيت اباوعلة وارمش بعيوني والدمعة مجلبة بطرف
عيني....
مهران :- يرضيج انزل وبالي ضال يمج
هزيت راسي بلا ومسحت دمعتي الطفرت وغصبت
روحي ع الابتسامة وابتسمت بوجهه ابتسم شبح
ابتسامة غازيها التعب والهم
و بهدوء كال وبنبرة متعبة :- يمن يندار كل السلف فدوة ونذر الهالضحكة
ع رغم حزنة بس احسة يحاول بكلماتة
يهون عليه ويهدي من روعي
من كال هيج زادت ابتسامتي هو نزل للفاتحة
واني سويت مثل مكال ما ردت اشيله هم فوگ
همة طلعت بسكت واكلت وشغلت قرآن وفعلا
مخفت وارتاحت نفسيتي شوية اباوع من الشباك
ليكول كل العراق جاي للفاتحة الجوادر ع طول الفرع
مرت ايام الفاتحة بصعوبة وحزن مخيم طول الفاتحة ما نزلت لا اني رايدة انزل ولا مهران يخليني ومحد حجة لا عمتي ولا غيرها.... محد بحال احد..!!
اليوم يوم الثالث دخل ب ١٢ بليل للغرفة
طفوف :- مجهزتلك الحمام روح اسبح حتى ترتاح
هز راسة وراح يسبح شوية ودخل طفة الضوة
تمدد وفتحلي ايدينة ... تعالي خليني اشم عطرج
خل ينزاح تعبي
ركضت لحضنة وتخبيت بيه بقة حاضني ويذب حسرات تجرأت وسألتة :- ليش هيج مهموم
مهران :- نار موجرة بفادي ع اخوي وابن عمي
وذب حسرة
ردت احجي خلة ايدة ع شفايفي وگال :- لا طفوف ماكو شي يخمد النار البگلبي گربي خليني اشمج وانسه تعبي
دفنت روحي بحضنة بقة يستنشق بشعري
ويشمر حسرات ع هالوضع غفيت بس كولش
متضايقة مهران مبين هواية مأثرة بيه وفاة ابن عمة الله يرحمة طبعا سهاد ضلت يمنا وحال الضيم حالها الله يعينها ويصبرها....
مرت ايام واجتي ايام هالسالفة نسدت بعد گعدات طويلة وتدخلات شيوخ كبار والحمدلله فضت ع خير
جنة خالين كلوبنة بشيشة من الخوف خفنا لا تصير ثارات وينفتح بحر دم الة بداية مالة نهاية
صلاح الله يرحمة متعارك وية صديقة
وواصلة للضالين صاحبة شايل السلاح وكاتلة
واخو صلاح كاتل الولد بنفس الساعة واهله رامينا
بس شيلو اهل الولد من البصرة كلها حازم وبشير
وولد عمهم دمهم حار وكل شوية ماخذين سلاحهم
ويردون يهدون ع بيت الولد ومهران يمنعهم ميتصرف بتهور استلم زمام الامور ونهاها بأقل الخسائر...!!
سهاد لزمت عدة وقبل متلزم جابت كل اغراضها
وقررت تعيش هنا بعدما اترملت جانت هادئة
وع طول بغرفتها وتبجي اخوانها مقصرو وياها
كل يوم يروحون ثلاثتهم يمها يبقون يواسونها يحاولون يغيرون من نفسيتها مهران لان دائما
ممتواجد كلما يخابرني يكولي روحي شوفيها
عينج عليها ومن يجي يروح عليها ويطمئن...!!
هدت الأوضاع وطمئنت القلوب جنان وعمتي
ميغيرن طبعهن ابد اتحمل واسكت لخاطرة
تارسني حنان وميستاهل اضايقة شخصيتة احير
شوصفها عاقل رزن ميتهور حنين بشكل مسؤول
همت بيه وبكل تفصيلة بيه وكل يوم تزيد معزتة
بكلبي...!!
وهيج مرت الايام بهدوء
بس مثل ميكولون الهدوء ما قبل العاصفة..!!
أمنية....
ثاني يوم رجعت من الجامعة
سولفت ويه عمتي شوية وصعدت فوگ
لگيت زينب گاعده وتحجي بالموبايل
سلمت ردت السلام سبحت وبدلت
وكلت اتمدد شويه ارتاح واروح للصيدلية
وصدگ اخذت قسط من الراحة وكمت لفيت شالي
ونزلت جوا
امير :- هلو أمنيه شلونج
امنيه :- هلو بيك امير انت شونك
امير :- ما تنشافين بالعين ولا جنا ابيت واحد
امنيه :- والله دراستنا صعبه ويادوب يكفيني اليوم
امير :- اي حقج.. أگول امنية
امنية :- تفضل گول امير
امير :- شنو رأيج نطلع نتعشى برا عازمج
أمنية :- لا امير تعذرني ما أگدر وهم اريد
اروح لشغلي وكتلك معندي وقت مرخصتك
عفته ومشيت
امير تحسه حباب بس تصرفاته فري
بزيادة... بأي حق اطلع أتعشى وياه
تفكيرة غريب مهتميت كل بالي يم الاسمة
غمار لا يرجع يهزئني ويكسر خاطري وامة
گوة جبرتة....!!
اخذت فورتات ورحت للصيدلية
وصلت سميت باسم الله ودعيت ربي
ييسر احوالي دفعت الباب ودخلت
شفته هو وأمة بلعت ريك ورسمت ابتسامة
هادئة ع ثغري وكلت :- السلام عليكم
ام غمار :- وعليكم السلام بنيتي... هسه نورت
الصيدلية تعالي ماما دخلي
يا الله شگد طيبة هالمرة عكس ابنها
المن اول يوم خلاني اشرد خليت ودخلت
وتجنبت اخلي عيوني تروح عليه
مر الوكت وبقت ام غمار تعلمني ع العلاجات
واماكنهن واستخداماتهن واساميهن شفتها صعبه
بس صبيت كل عقلي يمها وحاولت ما استسلم
من أولها.....
ام غمار :- حبيبتي اني اروح اليوم تعبت ومااكدر اوكف اكثر
اشوفج باجر ابقي وية زميلج غمار وتعلمي ويا
ان شاء الله ميقصر وياج وماكو فرق بينا
هزيت راسي بمعنى أي استحيت شحجي قابل
هي راحت وقبل متروح تهامست ويه ابنها وطلعت....
جان گاعد ع الكرسي من طلعت امة فرة عليه
والقلم بأيدة باوعلي بنفس نظرتة التجلط من فوك
ليجوة... عصبت منة درت وجهي بغضب
رددت الإستغفار ورجعت باوعتله بعده ينظرلي
بنفس النظرة
اخذت نفس وگلت :- اخي ترا مراجعة للشغل علمودك
ولا ضاله ع هالشغل بس، لخاطر امك رجعت تمام
ولتبقئ تباوع هيج ممسويتلك شي اني
غمار أشر ع نفسة بالقلم وقلص نظراتة
ونطق من بين شفايفة :- اني حچيت شي؟
ارتبكت وگلت :- لا بس واضح من نظراتك
غمار :- كام من مكانة.. باوعيلي بابا
حجي بلا فايدة ماريد اشتغلي وانتي ساكتة
أمنية :- اعتقد اكو اسلوب احسن من هيج
عفيه اني ما اتحمل هشكل اعوف الشغل وامشي
غمار :- يابة وعوفي منو لازمج
هز ايدة وبهالاثناء دخل مريض هو راحة يشوف
الراچيتة وينطي علاج...
صعدت البوخة براسي من كلامة
بقيت اصبر بنفسي امنيه صبري امنيه تحملي
امنيه هذا شغلج بحاجته انتي امنية لخاطر ام غمار
صارت الساعة ٧ واني لسه موجودة چلچل الليل
وهو مكالي روحي... عاد خفت يتأخر الوقت اكثر
ساعتها اخاف ارجع اخذت جنطتي تحمحمت وگلت
امنية :- اني أروح
جان يأشر ع علاجات بالقلم حجيت وحتى ما رفع
راسة تنهدت بضيق ورجعت كلت بصوت واضح :- اخي احجي وياك رد علية
شمر القلم رفع راسة اندارلي كتف ايدينة وباوعلي
غمار :- نعم
باوعتلة بضجر وگلت :- اني رايحة
أشر ع نفسة وگال بملل :- وأني شعلية
ارتبكت جان اكولة :- غير انت تعتبر مديري بالشغل
ولازم انطيك علم
غمار :- بس انتي دتنطيني علم متستأذنين العالم تستأذن مو تنطي علم
أمنية :- عفية انت ليش تطول الأمور وتصعبها
خزرني نزلت عيوني بسرعة نتر :- دروحي بابا روحي
عفتة وطلعت ومتضايقة شلون راح تگضي ويا
قلق بداخلي لا امير بيوم يعرف الاشتغل ويا
نفسه السوا ويا الحادث وساعتها اخاف تصير مشكلة
بقيت امشي وصلت للشارع اخذت فورتات ورجعت
للبيت جانو يتعشون صاحتلي عمتي رحت بدلت واجيت
تعشيت وبعدها بقيت اقرة لنص الليل دراستي صعبة
ويرادلها وقت وان شاء الله احاول اوافق بين الجامعة
والدراسة والشغل والبيت.....
دارين...
كل الايام متشابهة اني وناصر كما احنا
بيت عمي حبابين وياية بديت اتعايش وياهم
واتعود عليهم دائما اتواصل وية خواتي
وهيج گاضية حياتي چنت اغسل بالمواعين
بالمطبخ وعمتي ومرام گاعدات يشربن چاي
ونسولف كلنا...
طبعا علاقتنا اني وناصر الكل يفكرها طبيعية
محد يعرف بالحقيقة... المشكلة اني كل يوم
يزيد عنادي اكثر من اليوم القبلة... بأثناء
منسولف نفتح الباب ودحل ناصر
ناصر :- السلام عليكم
.. وعليكم السلام
ام ناصر :- الله يساعدك يمة شلونك
فرك وجهن وگال بتنهيدة :- والله يا أم ناصر تعبان
وبس اريد انام
ام ناصر :- روح يوم لغرفتك ارتاح
هز راسه وراح
ام ناصر :- دارين بنتي روحي ورة رجلج جاي تعبان
من شغلة روحيلة
بتهرب گلت :- لا عمة هو نعسان وح ينام
ام ناصر :- ميصير امي روحي ورة رجلج
دارين :- بس اكمل المطبخ اروح
ام ناصر :- يا عمة شبيج عوفي من ايدج ومرام تكمل بدالج روحي، شوفي رجلج لتهملينة غلط بنتي
جاي تعبان شوفي، شيريد جوعان يريد يسبح
نكتت المي من ايديني وگلت بأستسلام :- ان شاء الله عمة
دخلت للغرفة شفتة ديبدل ملابسة
درت وجهي وگلت :- رايدد شيي
گال بلهفة :- فدوة لحبيبي ليهتم
گلبت عيوني بملل وگلت بضجر :- لتصدگ روحك
ترا أمك دزتني
ناصر :- صدقة لللسان الينگط سم
رفعت عيوني عليه وحجيت بحدة :- شتقصد
ناصر :- اروح نذر للعصبية
دارين :- شنو ينگط سم شتقصد
تقرب مني يمشي ويبتسم طبع بوسة خفيفة ع كتفي
وخرت بسرعة هو تنهد وكال :- الاقصدة تعبت شوكت تلينين
رديت بسرعه :- من يلين الحجر
وأردفت بعصبيه :- يااخي اكرهك
حك لحيتة وشبح ابتسامة ارتسمت ع شفايفة وكال :- ياختي احبج
ابتسمت لا شعوريا حضني بسرعة
دارين :- هاها هاي شكو وخر عني
ناصر :- اووف ولج تعبان وعلي خليني هيج مرتاح
سكتت ما حجيت هو بقى حاضني فترة مو قليلة
دارين :- راح نبقى هيچ؟
ناصر :- دارين لشوكت نبقى هيچ
دارين :- شنبقى
ناصر :- تغشمين نفسچ
سكتت ما رديت عقلي قافل مينفتح
مشة بيه وبعده حاضني تضايقت ودفعته
طفة الضوة وسحبني من ايدي للسرير
انتفضت وحجيت بقهر :- عوفني ناصر عوف ايدي
ناصر :- اششش تعالي بس احضنج ماريد شي
دارين :- ناصر عوفني گتلك
ما رد تمدد وجرني وگعت ع صدرة قيد حركتي
وحاضني حيل واني ما ثبتت احاول اتملص من حضنة
لحدما مليت وهديت بحضنة لان حسيتة نام...
بقيت ع هالوضعية لحدما غفيت وحسيت بلمسات
جريئة ع جسمي فزيت واستوعبت الديصير
ردت احجي التهم شفايفي بشفايفة بنهم ما بادلتة
وبس اريد اتملص منة ابتعد عن شفايفي ويلهث
انفاسة وتحسة مثل العطشان وقدموله المي
بلهفة يقبلني حرارة شفايفة ورجفتها وهي تنطبع ع رگبتي
انفاسة تضرب بشرتي ايدة تتجول على معالم جسمي
رخت أعصابي وبديت انجذب الة
بلهفة وصوت مسحوب يهمس برجفة وبحة
احبج دارين احبج روحي من الدنيا انتي
رايدج الي اميرتي
ازدادت الأمور تطور و صوتة المبحوح يتخلل
حواسي السمعية وهو يغازلني
فجأة وعيت ع وضعنا واني احس بيه يجردني
من ملابسي لزمت ايدة امنعة ما استجابلي
همست :- ناصر ابتعد عني عفية
فاقد وميسمعني بلحظة طيش وبغباء خارق
گلت كلمة راح ابقى كل عمري متندمة عليها
دارين :- مو رجال اعتبرك ناصر اذا ما ابتعدت..!!
يتبع......
.
.
.
.
.
.
متابعة شيقة