ثلاث دمعات

بارت 1

مساء العافية ♥️

#ثلاث دمعات
الكاتبة : ســندريلا ||𝐒𝐀𝐑𝐀𝐇 ♡.
بارت - 1 -

وشنهو ضني، الچنت أتانيهن جزني
لا لگيت شوية منها ولا لگيت شوية
مني،، ضايع وكل الوجوه أستغربني،،

المكان : البصرة
الزمان : السابعة صباحاً
گاعدين اني ودارين ننتظر طفوف تجيب
الأكل... وصدگ شوية ودخلت
بيدها صينية الريوگ
عبارة عن بيضة بماعون وگرصة خبز
وگلاص ماي.. خلت الريوگ گدامنة
وگابلتنا وگعدت...

طفوف :اشاا اشااه الجو انجماد شلون راح
تروحين بهالمطر؟؟!!
أمنية :شسوي عندي أمتحان مهم
دارين : لبستي هواية لا تتمرضين
أمنية : لا لا تخافين علية مايصيبني شي
طفوف : يلا خل ناكل بسرعة وانتي روحي لدوامج
واحنة نروح لبيت الشيخ
صفنت بوجهن ياربي شنو ذنبهن
أعمارهن ١١ سنة وكل هالحمل شايلاتة

شربت شوي ماي وگلت : اني ما أداوم اليوم هونت
انتن نامن واني اروح لبيت الشيخ!!
دارين بحيرة : مو گلتي عندي امتحان مهم؟
جا شلون تغيبين؟ انتي روحي احنا ما عدنة شي..
طفوف :اي صح ماعدنا شي نكمل شغلنا ونرجع ننام

هزيت راسي بمعنى (أي) وحجيت :لعد خوش بس
نضفن وردن نامن واني من أجي أكمل باقي الشغل
دارين :ان شاء الله يلا خلنا ناكل
بلعت الغصة وسكتت صرت أكل شوي شوي
وابقة امضغ بالگمة بحلگي خاطر خواتي يشبعن

انتبهت طفوف گالت بتساؤول : أمنية ليش ما تاكلين؟
رديت : اني ما أشتهي الحمد لله
وگمت نكتت صدريتي
گالت دارين : يعني شلون تروحين ع لحم بطنج تعالي اكليلج لگمة..
رديت : مو گتلجن ما أشتهي... كملن ولبسن زين لا
تتمرضن...

أخذت جنطتي وطلعت
لبست حذائي (أجلكم الله)
وطلعت برا لفحني الهو البارد رجفت
وصرت أفرك ايديني ببعض من البرد
المطر قوي أمشي وأركض حدما وصلت
للمدرسة خشمي نگص من البرد وملابسي تبللت
رحت گعدت برحلة وصرت أرجف من البرد
واكح عرفت أنشلت..

طلعت كتابي بس اباوعله بعيوني وأراجع
شوية ودخلت المعلمة وبلشت بالدرس
وانة بس أكح وأرجف انتبهتلي المعلمة
نترت :مكافي تكحكحين ترا زعجتيني مداگدر
أشرحح
تقربت مني وباوعتلي من فوگ ليجوة
ركزت نظراتها علية وگالت بنتر : بهالمطر
وجاية للمدرسة بطرگ البدي والصدرية
شنو ما تگدرين تلبسين مطرية؟

كحيت وحجيت بحنجرة مجروحة : أسفةة ست
نترت : مرة ثانية لبسي ملابس وتعالي جنابج تتمرضين وتأثرين علينة... وكافي تكحين مداركز بالشرح...
ماتلبس وتگول ليش أتمرض هزت ايدها ورجعت
لناحية الصبورة تشرح

أحس عيون الطالبات كلها تشخصت علية
وگفت الدمعة بمحجر عيني طريقتها جانت مهينة
الكل صار يباوعلي ويتهامس وية اليمة
صاحت بيهم مزمجرة : مااسمعلكم صوت
الكل خنس!!