#ثلاث دمعات
الكاتبة :- ســندريلا ||𝐒𝐀𝐑𝐀𝐇 ♡.
البارت - 25 -
عريان يگول :- حريمة تعيش ويةة
أنسان ما يعرف شكو بروحك... 🖤
(لسان حال ناصر)
دگ بأصابعة ع الميز وگال :- نعم ست سما خيرچ
سما بأبتسامة :- شلونك غمار
غمار :- زين
وبقة يباوعلنا بأستفسار سما فتحت الباب
الصغير ودخلت يمة وشفتها تتهامس وياه
تدفقت العصبية لمعالم وجهه وهالشي جدا جان
واضح باوعلي من فوگ ليجوة دنگت بسرعة
غمار :- روحي سما وحسابنا بعدين..
اجتي سما وكالت :- يلا اني اروح
أمنية :- سما كلتي مرت عمج هماتين لعد وينها مداشوفها
سما :- مرت عمي مو دائما تكعد بالصيدلية اكثر شي غمار
يلا دخلي وعفية تحملي هو يومين ويتعود عليج
أمنية :- شتحمل سما اكو شي اذا ميقبل اشتغل هنا
ترا عادي بلاها.
سما :- لا ماكو شي من هذا القبيل يلا اني ح اروح
سحلة سعيدة
أمنية :- سمااا
سما :- وسما تسمج دامشي عاد ح نترزل
رفعت عيني عليه شفته خال ايدينة بجيوب البنطرون
ويباوعلنة بضجر ونظراتة مال واحد يريد ينفجر
أمنية :- ماشي روحي
راحت سما واني بقيت بمكاني اريدة يگولي
دخلي بس ابد ما حچة دخلو اثنين اشترو علاج وراحو
واني واگفة بمكاني تنهدت وفتحت الباب ودخلت
هو باوعلي بسرعة متفاجأ مني
أشر عليه وگال :- انتي منو سمحلج تدخلين؟؟
أمنية :- لعد ابقى صافنة غير جاية اشتغل
رفع حاجبة حك لحيتة بهدوء گال :- اهااااا كلتيلي جاية تشتغلين
بأستغراب رديت :- اي لعد شسوي
غمار : لعد يلا شوفي شغلج وأشر بعيونة وراية
التفتت شفت مرة وبيدها وصفة علاج
بلعت ريگ بتوتر وتقدمت ابتسمت واخذت الورقة
منها بقيت اباوعلها بعدم فهم وما ادري شسوي
سحبها من ايدي وبلش يطلع العلاجات من الرفوف
لحدما كمل حاسبها وراحت باوعتله وگلت :- اني
ذكية ترا بس علمني ع العلاجات واسمائهن لان ما اعرفهن
ما رد فاتح الرف ومدري شيفلفس
غمضت عيوني بنفاذ صبر وگلت :- اخي داحجي وياك
اندار عليه ودقني يباوعلي من فوگ ليجوة
وملامح وجهه جامدة خالية من اي تعبير
أمنية :- عفوا اكو بيه شي غلط ليش هيج تباوعلي
غمار :- اني مباوعلج ويأشر ع نفسه بصدمة
أمنية :- بللت شفايفي وبربكة حجيت.. اي لعد اني
غمار :- مو تريدين تشتغلين
أمنية :- اي طبعاً لعد شريد
غمار :- مسحي الميز
فكيت حلگي بصدمة وگلت :- هااا
غمار :- ما اكرر كلامي
أمنية :- بس اني جاية اشتغل بالصيدلية بالادوية مو امسح
غمار :- طلع باكيتة اخذ جگارة وورثها سحب نفس
حك طرف شفتة بأصبعة الابهام وگال :- باوعيلي بابا
جفلت من گال بابا سويت نفسي طبيعية وباوعتلة
هو كمل كلامة بملل وگال :- جيتج وشغلج هنا اصلا ما عندي علم بيها فلتتوقعين مني اكعد افهمج واعلمج تريد امي مثل
ما جابتج عليه هيه تعلمج واحنا اصلا ممحتاجين مساعد ويانا
أمنية :- تنفست بغضب وگتلة.. يعني هسه شنو
غمار :- يعني انتي زايدة احنه ممحتاجينج بس بعد كلام الوالدة
ما اكدر اكسرة
أمنية :- رجفت شفايفي سحبت جنطتي
وگتلة بعصبية :- وهو اني اصلا ماريد اشتغل هنا وصوجي
وافقت وطعت سما لا رايدة هالشغل ولا ممنونية أحد
طلعت ركض بقيت اركض وحاضنة جنطتي وأبچي
بهضم كلما اكول تفرح تنسد بوجهي اكثر وهاي حتى
الشغل طار...
وگفت اتنفس بعمق ودموعي تتساقط بغزارة
وحرگة گعدت ع الرصيف هديت شوية بعدها
طلعت موبايلي خابرت ع سما حجيتلهه كلشي
گالت انطيني مكانج انتي وين انطيتها العنوان
بضبط وسديتة شفت سوبر ماركت گدامي
رحت اشتريت بطل مي شربت وگعدت والعبرة
خانگتني.... رغم الهوا عذيبي وطيب
طبگ تاكسي گدامي نزلت سما بسرعة واجتي علية
گعدت القرفصاء گدامي وگالت :- گومي وياي
أمنية :- وين
سما :- نگعد بمكان هادئ نسولف
أمنية :- مالي خلگ سما
سما :- خلصتي العمر مالج هلگ اشو الج كومي لا تشلعين كلبي بعنادج
گمت وياها ادري بيها من تلح بعد هاهيه
و صدگ رحنا بحديقة عامة وگعدنا سولفنا وگدرت
سما بسوالفها وخفة دمها تضحكني
سما :- بعرضي لا اخلي عمتي تطيح حضه
أمنية :- لا هو شمسوي هم حقة اذا ممحتاجيني شيسوي بيه؟
سما :- مو بكيفة وروحة الجدي المات وما شفته
الا
أمنية :- الا شنو
سما :- تأشر بيدها بعصبية وتگول.. الا الا
أمنية :- اي بلا
سما :- الا كلشي ما سويلة يحبي هذا غمار يعني
سحل كتل شعل نعل نتل
أمنية :- والدليل من اول ساعة خلاني افلت بريشاتي
صارت دنيا غروب واحنا گاعدين نسولف عاد گمنا
اخذنا تاكسي وصلني للبيت وبعدها راح يودي
سما دخلت ضايجة وروحي طالعة من الدنيا
بوجهي للغرفة حتى صاحوني للعشا ما نزلت
بقيت اقرة واحاول انسى الصار واردد اكو الله
أمنية اكو الله هو يحل كلشي الله موجود..!!
سما... وصلت أمنيه ورحت لبيت عمي
ابو غمار بعدما بلغت اهلي گلبي محروگ ع
امنيه غمار فشلنا وياها وخطية دموعها تنذرف
مثل مزنة مطر والله روحي ساحت عليها من القهر
گلت ماكو غير مرت عمي هي التخلي حد لغمار..
والله أمنية مثل اختي اول مشفتها دخلت
للشريان الابهر هي هيج تدخل للگلب ركض
بدون نعال...
وصلت سلمت عليهم واخذت عمتي ع صفحة
وحجيتلها كلشي فهي خطيه تخبلت لان اني
حاجيتلها ع وضع أمنيه ووعدتني من يجي
تحجي ويا وفعلا قبل العشا بشوية وصل غمار
باوعلي وگال :- شعندج تفرفرين من مكان لمكان الظاهر مرخيلج الحبل هالايام
سما :- ياا شعليك بيه؟؟ والله حلوة هاي
غمار :- لتلغين زايد من الجامعة للبيت ومن البيت للجامعة تفرفر ودياحة ما اريد
سما :- دگيت رجلي بالگاع وضربتلة تحية
وگلت :- حاضر سيدي
بعدها أشرتلة بحواجبي ع غرفة مرت عمي
غمار :- شنو
سما :- عمتي تريدك
ما رد مشة باتجاه غرفة مرت عمي فتحها ودخل
دخلت ورا ومبتسمة بخباثة وگلب مبتهج بمكر
غمار :- گولي يمة گالو رايدتني
ام غمار :- اي ماما تعال أگعُد وخلينا نتفاهم
غمض عيونة وراح گعد
ام غمار :- ماماتي سما ادخلي وسدي الباب
سديت الباب بحماس للاكشن ورحت گعدت يمهم
غمار باوعلي باستفسار وعاگد حواجبة ومقلص
عيونة بسرعة نزلت عيوني منة بلشت مرت عمي
تحچي :- غمار شنو المسوي اليوم بالبنية
هو بعد يباوعلي بخزرة رد :- يا بنية
ام غمار :- صديقة سما.. الراحت تشتغل ويانا بالصيدلية
رفع راسه ع امة بسرعة وگال :- شسويتلهه ما مسوي شي
حجيت بأنفعال :- لا والله انت طاردها بنزاكة وتكولها منحتاجج وما اريد اعلمج ع هالعلاجات ومن هالكلام
ابتسم بسخرية وگال :- ما جذبت لا نحتاجها.. ولا اني من الممكن اعلمها روحي مالي خلگها الي خلگ اعلم احد شتحجين انتي يمة؟
ام غمار :- ميصير ابني البنية بحاجة الشغل وصديقة اختك
المفروض نعينها ونساعدها مو تصرف هذا تصرفك
كام وكف رجع شعرة بايدينة ليورة وگال :- تريد تشتغل خلي تشتغل ويانه بس اني ما اعلم احد وابقى افهم
ام غمار :- هيج صارت غمار ما رايدة منك شي اني اعلمها عمي بس لتغثها
غمار :- بشرفي لا غاث احد ولا حاجي ع احد ياأم غمار
سما :- والصار اليوم شيسمونها
غمار :- يسمونها صراحة
بكلبي گلت قصدك وقاحة غمار بيگ
خلة وطلع ولا حصلنا منة لا حق ولا باطل
ام غمار :- خابريلي البنيه خليني اعتذر منها بالنيابة
سما :- ادللي عمتو طلعت موبايلي اتصلت عليها
اجاني صوتها المبحوح :- هلو سما
سما :- هلا بگلبي ونبضاتة وشرايينة
أمنية :- ههههه هلا بيج شنو اشتاقيتيلي
سما :- طبعا طبعا اشتاقيتلج
أمنية :- هههه شبسرعة المهم ادري بحلگج
حجي كولي اريد اقرة
سما :- من ورايا امنية بتزاكري من ورايا؟!
أمنية :- ليش مدرستي
سما :- عوفج مني وهاج مرت عمي تريد تحجي وياج
منتظرت ردها انطيت الموبايل لمرت عمي
رفعته وگالت :- شلونج ماماتي امنيه
امنية :- رديت بخجل... هلو خالة شلونج
ام غمار :- حبيبتي انتي شوفي ماماتي من باجر اريدج وياي
بالصيدلية وماريد اسمع اي كلمة اعتراض واني اعتذر بالنيابة عن ابني ع الصار اليوم ان شاء الله ميتكرر هالشي كولش محجرة منج بنيتي والتمس العذر
أمنية :- لا خالة والله
قاطعتني وهي تگول :- لا خالة كتلج ماريد اي اعتراض
اني بحسبه امج لترديني وكتلج ان شاء الله الصار ميتكرر انتي تعالي واني بنفسي راح اعلمج ع الشغل
أمنية :- بتوتر وتردد كلت بس
ام غمار :- بلا بس اعتبريني امج وطلبتج شكلتي بنيتي
فركت وجهي وما عرفت شرد
ام غمار :- ماماتي اطمئني ولتختافين من شي يلا عاد ارضي يرضيج تردين طلبي
ابتسمت بهدوء وگلت :- طبعا ميرضيني والتردينة يصير
ام غمار :- يعني باجر اشوفج بالصيدلية؟
أمنية :- ان شاء الله
وفعلا قررت باجر ارجع واجرب حضي ماردت استسلم من اولها وخليت الف عذر وعذر لخاطر مرت عم سما لان توسلتلي وحرجتني حيل وما كدرت غير اوافق ذبيت حملي ع رب العالمين ودعيته ينورلي، طريقي ويختارلي الاحسن..
طفوف
جنت گاعدة بالغرفة وساعة ١١ بليل
انتضرة يجي هو هيج دائما ياخذة الصبح
ويردة الليل واذا گعد بالبيت منفهم منة شي
الخطار يبقون رايحين جايين هاي من غير
كل يوم بمحافضة شكل علمود فصل او طلابة
يعني بإختصار بس بليل اشوفة...
هواية اشتاقلة اتمنى لو نقضي وقت اطول
سوة بس هو دائما مشغول خابرت ع دارين
شو هاي نهدت بيه وتگول :- الله بلاني بابن
عمج ووو شگد حجت الفهمتة متعاركين هي
وناصر
اليوم سهاد يمنا شلعت كلبي من الصبح لليل
تكرب عليه وتسمعني حجي مسموم
سمعت صوت سيارة دخلت للبيت
سديتة منها وگمت اباوع من الشباك
شفتة دخل السيارة ودخل للبيت ركضت للمراية
عدلت نفسي جنت لابسة تراكسود بيجي
وخالة مكياج خفيف بس حمرة وكحل لان مااعرف اخلي كامل رشيت عطر وانتضرتة يدخل
نفتح الباب ودخل بهيبتة ووقارة
ركضت عليه بكل لهفة وعلگت ايديني برگبتة
رفعني الة وگال :- شلونها بنيتي
برطمت ونزلت عيوني :- مو زينة
مهران :- منو وية بنية گليبي
نزلت من حضنة وگتلة :- انت َ
مهران :- افاا ليش عساني اموت ولا ازعلج
خليت ايديني ع حلگة وگتلة :- عزا ليش تكول هيج
اسم الله عليك
ذبلت عيونة وهو يباوعلي شتت نظراتي
منة هو دنگ لمستواي وباسني من جوة حنجي
وأبتعد بهدوء ابتسمت ع الشعور الحسيتة
بحب گال وعيونة تتمعن بتفاصيلي :- شگد الله يحبني وخلاج بطريقي
طفوف دنگت بخجل من كلامة وگلبي يدگ بعشق
الة واني التمس الحنية الي بصوتة
مهران :- أروح اسبح واجي
طفوف :- متعشي
مهران :- اي الحمد لله
طفوف :- وين جنت
مهران :- جانت عدنا گعدة بديوان الشيخ ××××
طفوف :- ليش عدكم گعدة
مهران :- الشيخ واخو متطالبين واخو دز عليه
حتىٰ اصلح بينهم انة وجم واحد خير
طفوف :- اكلك
مهران :- ها
طفوف :- لعد همة ليش متزاعلين الشيخ واخو
مهران :- بعد صارت مشكلة بيناتهم
طفوف :- ها اي هم صدك
مهران :- اي بنيتي
طفوف :- اكلك لعد ليش تاخرت
مهران :- مو كتلج جانت عدنه كعدة
طفوف :- اي صح نسيت يلا روح اسبح
مهران :- خلص التحقيق
طفوف :- اي خلص يلا روح روح
راح يسبح واني طفيت الاضوية وگعدت
انتضرة شوية ودخل كبل تمدد واخذني لحضنة
بقيت اسولفلة واحجي براسة وبمواضيع
عادية لو لزمتة وبقيت احجيله ع قصة المسلسل
وهو يسمعلي بأصغاء وبدون ملل ولا شكى ولا گال
اريد انام تعبان لحدما بلشت أغفي ونمت ع صدرة
الواسع الدافي واستسلمت جفوني للنوم....
فزيت ع صوت رمي قوي عبالي حلم اريد استوعب
شديصير النعس بعدة بعيوني الاضوية مشتغلة
باوعت يمي ما شفتة كمزت من مكاني، بسرعة
فركت عيوني وشفتة فاتح الكنتور ومدري، شيدور
ركضت عليه برعب واسناني تصطك من الرهبة
طفوف :- شديصير شنو هذا الصوت
ما رد بس شايل شاجور بايدة ويعبي طلقات
اسمع جوة صوت صياح وصوت الرمي
ليكول جبهة الخوف موتني وكل ذزة بيه ترجف
برعب جلبت بايدة وگتلة ببكاء :- شديصير فهمني
كمل ودفعني بخفة وطلع بلا ميحجي كلمة
لحظات هي مجرد لحظات بس الرعب العشته
بيها مينوصف احس نفسي بحلم مو بعلم
الإنسان من يخاف ع عزيز كلبة يصير مثل
المجنون ميدري شيسوي وشيتصرف حتى
يحافظ عليه واني عشت هالحالة طلعت وراه
اركض ودموعي تتسابق وية خطواتي..!!
بين مرحت وراه هدأ صوت الطلق
نزل من الدرج يركض ويسحب اقسام
اسمع اصواتهم وصرخاتهم بس ساعتها ما شفت
شي ما شفت غيرة وتفكيري انصب بأني راح
افقدة افقد الشي الوحيد الحلو بحياتي
ركضت وجلبت بيه هو باوعلي بأستعجال
بچيت بنحيب ورجفة اعتلت كل جسمي
وگفت گدامة وصرخت برعب :- لا لا ترووح مهران
ماريدك تموت لا تروووح عفية
خلة ايدة ع خدي وهمسلي بأستعجال ونبرة حنينة :- بنيتي تماسكي ولتخافين ولتصعدين فوك ابقي
هنا يم امي
لزمت ايدينة وباوعتلة بتوسل واعتلة صوت شهكاتي
المؤلمة فك ايدة من ايدي ورمقني بنظرة
ع هيئة طمأنينة وراح وخلاني اني ومخاوفي...!!
التفتت عليهم امة واختة وبنتة حالهم مو أقل
من حالي الكل يبجي وصوت شهكاتنا العالية
الموجوعة تطرب بهذا البيت الكئيب گعدت بالگاع
ورفعت راسي للسما ما حجيت شي ولا دعيت
بس همست بقلبي ربي انت تعلم بحالي هسه
لا تفجعني بيه ولا تخلي عيني تبچي..!!
كمت من مكاني اجر بثياب الحزن والالام
ورحت عليهن اتوسلهن يحجلي شنو الصاير
بس محد ريحني وحجالي كلمة بقيت الوب
واحس روحي اشتعلت شعل من الخوف
تذكرت الموبايل رحت اركض فوگ جبت
موبايلي وحاولت هوايه اتصل بيه بس ما يرد
عمتي تبجي وتصرخ بانهيار :- يبووو وليدي
راح مني ولكم يمة سودة بوجهي
هي تحجي هيج واني ازيد بجي
باوعت لجنان ترجف رجف من هول الرعب
العشتة والخوف ما حسيت بنفسي غير گايمة
واريد افتح الباب واطلع برا اروح عليه
ايد تخلت ع ايدي التفتت شفتها جنان
كالت بهمس وسوت مبحوح من البجي
:- ارجعي بابا حذرنة محد يطلع
من گالت بابا بجيت بحرگة هو مو بس ابوها
اي والله مو بس ابوها ابوية هم شو صارلي
اب وام وزوج اخ وسند وكولشي
تراجعت وصعدت فوگ توضيت وحاولت اقوي
نفسي بس دموعي ما اسيطر عليها طلعت
قرآن وبلشت اقرة سورة الرعد واحصنه بيها
اقرة واشهك كل حيلي كل شوية اخطأ من رجفتي
واستغفر احاول اقري روحي واكمل.
كملت كمت اريد اخلي القران بمكانة
وما سمعت غير عياط هز اركان البيت هز
خليت القرآن ع الميز واحس روحي تخردلت
اريد انزل واشوف شكو وشنو هالعياط وخايفة
خايفة لا انفجع والبالي يطلع صح وساعتها
تنتهي طفوف وينتهي عمرها..!!
علا الصوت كمت ارجف من فوك ليجوة
واحس كلبي يريد يطلع من الخوف نزلت
جوا وشفت عمتي وسهاد يلطمن ويصرخن
بكل قوتهن وجنان تبجي بهستيرياااااااا
سهاد :- ولكم يبووووووو ماات راح العزيز
راح الحنين يبووووو ولطمت حيل
الگاع صارت متحملني والدنيا دارت بيه
وگعت بالگاع باوعتلها بعيون مدمعة شهگت و
صرخت بأنهيار :- مهررران المااااات...؟!
يتبع...
هلو 😂💙بنات اسمة غمار بالغين
مو عمار بالعين + ترا تفاعلكم صاير ميونس ابد
البارت هديه شوية كرزات صباحية 😂😍