ثلاث دمعات

بارت 17

# ثلاث دمعات
الكاتبة :- ســندريلا ||𝐒𝐀𝐑𝐀𝐇 ♡.
البارت - 17 -

دوم الغني ينحب حتى لو مكروه
ويحب دوم الفقير وما يحبونة
مابيها ضمان العشرة، وي الطاك
بس وي الفقير العشرة مضمونة 🖤

طفوف... حلو الانسان يلگة الشخص
اليدافعلة ويوگف وياا حلو من انت
عايش بغابة والذيااب تنهش بلحمك
ويجي شخص ينقذك ويحميك.... هذا
حالي ع رغم الاذية الاكلتها والي لهسه
اثرها موجود بس قلبي أبتهج من دفاعة
الية ومساندتة....

الاحساس الحسيتة محد راح يفهمة
غير الفاقد سند.. طول عمري ما عندي
سند ماعندي شخص اتحامى بيه
من دافعلي ووگف بوجهم وما قبل ع أذيتي
حسيت روحي محلقة بسماء الفرح
شعور حلو من يكون عندك شخص
يساندك ويحاميلك

گلبي طار من الفرحة مثل الممصدگة
عود شخص يهتم لأمري وما يرضالي
بالمو زين اسمعة يدافعلي واحس
بحلم مو بعلم...

لو من گال طفوف مرتي و احترامها
من احترامي نبض گلبي بقوة من كلمتة.
يعني معترف بيه ومعترف بوجودي
بحياتة يعني اني مو نكرة....

حسيت بروحي انساانة
حسسني بروحي اني حتى دفاع
ما ادافع عن روحي لان احس نفسي
ولا شي لا ألي قيمة ولا شأن
ان دافعت وان لا ...

ما ادري شنو أحسااسي
بس الاعرفة گلبي دگ بترانيم جميلة
وروحي غمرتها السعادة والسكينة
غمضت عيوني وتنفست بأبتهااج وراحة
والابتسامة مفارگت شفافي..

تذكرت شلون الصبح جنت نايمة
يمة وقريبة منة بحيث عطرة يتخلل
انفي.. نبض گلبي من هالذكرى
مشاعري ما اگدر اوصفها كومة
مال مشاعر ما ادري شفسرهاا

باوعت لروحي بالمراية شلون الابتسامة
مرسومة بوجهي تملكتني الحيرة وصابني الاستغراب
من سر هالابتسامة المدترضا تختفي
ميلت راسي وغمضت عيوني
واتنفس سريع من ذكر هالموقف

بس اريدة يدخل حتى ارمقة بنظرة
شكر افتر بالغرفة رايحة جاية
واسمع خطواتة ع الدرج
قريبة حبست انفاسي مجرد وجودة
ويااي بمكان واحد يخليني اتوتر
وگلبي يدگ سريع وتنكتم انفااسي..

فززني من فتح الباب ودخل باوعلي وتمدد
ع الجرباية فتحلي ايدينة
وگال بتعب :- تعاالي حداي

رفرفت برموشي واندهشت من طلبة
بقيت اباوعلة بتردد گلبي المخبل
تخبل عليه من طلبة يريدني اروح
وعقلي يگلي شبيج طفوف صدگ تحجين ...

ما انطاني مجال للتفكير
من رجع كرر طلبة مشيت بخطوات
مترددة اقدم رجل وارجع الثانية
وابلع بريگي وصلت يم الجرباية
رفع نفسة شوية وگالي :- تعاالي

فززنا صوت الباب من اندگ
هو گام بسرعة يفتحة واني اتنفست
الصعداء الحمد لله الباب نقذني
جانت جنان جايبة الاكل انطتة لابوها
ومشت..

خلة الأكل بالگاع وگال :- يلا تعالي
اكلي حتى تاخذين علاجج..
باوعت للأكل بعدم شهية وعگدت حواجبي
هو انتبهلي.. مهران.. لازم تاكلين حتى
تاخذين علاجج وتتحسنين
كتلة :- اي ونزلت گعد مقابيلة وخيم
الصمت وبس صوت الانفاس ينسمع
قلبي بحضرتة.. يرفض يهدة ويستچن
يرفض يهدي من نبضاتة الي تتراقص
مثل الفراشات ع ألحان موسيقى جميلة
هادئةوعذبة ....

اكلت شوية وگمت بس شنو بالگوة
احرك بأيدي صح الحرگ ملايح جفوف
ايديني بس هماتين يأذيني هو هم ما اكل بس
شي بسيط من گمت هو اخذ الصينية وطلع
واني رحت تمددت ع الجرباية كل جسمي
تعبان بس خليت راسي ع المخدة دموعي
صارت تتساقط احس روحي مثل شجرة
ذابلة ومتصحرة ويه كل هبة ريح تتساقط
اوراقي واهتز أكثر ...

ايديني يحرگني الوجع ابد مينحمل
وبس يصدر مني صوت انين..
سمعت صوت الباب انفتح مغمضة عيوني
ما فتحتهن حسيت صار ثگل ع الجرباية
عرفته اجة دموعي بعيوني يحرگني
مشاعري فضيعة من احس بقربة مني
انسى نفسي وانسى كولشي وبمجرد
ما اختلي بروحي تهيج كل مواجعي...

بقيت ع نومتي ما تحركت
حسيت ايدة تخلت ع شعري
وصوت هادئ يتخلل اسماعي
مهران :- گومي اخذي علاجج
فتحت عيوني الماليها الدمع
جان يصب مي بالگلاص من البطل
اندارلي شافني وگال :- ليش هالدموع يابوية ؟
طفوف :- گتلة بصوت مبحوح.. ايديني يوجعني.
مهران :- تنهد وگال..مديلي ايدينچ

طفوف :- شنوو
سحب ايديني اله وشال الشاش
وطلع مرهم من علاگة
الدوا فتحة بلش يخلي لأيديني
ويمررة ع جلدي بلطف وهدوء هسة
هي غير لمستة عادية وديخليلي علاج.
لعد شبي گلبي خبصني خبص...

أهتمامة.. حنانة.. هدوئة
كلهن فاقدتهن ومحتاجتلهن
وهو ما بخل بيهن عليه..
بالعكس قدمهن الي بكل رحاابة
صدر واني استقبلتهن بكل لهفة لان
حقا محتاجتلهن ...!! .

كمل ومدلي المي لزمتة طلع حبوب
وگال :- اشربيهم هسة يسكنن الألم
اخذتهم من ايدة وشربتهم باوعت لايديني
من العكس لحد الچف بيهن حرگ بس
مو كل الايد بأماكن متفرقة ...
بعدها لف شاش خفيف ع أيدي
حتى ليتلوث الحرگ..

من خلة الشاش شوية ارتاحيت
طول ما هو يخليلي علاج عيني
كل شوية تصير عليهن وحيل انقهر من منضرهن
من خلا ارتاحيت..

مهران :- شلونج هسةة
طفوف :- لا صرت أحسن
مهران :- الحمد لله انتي بس أتحملي
طفوف :- اي ان شاء الله
مهران :- تحتاجين شي؟
طفوف :- لا
مهران :- چا نامي وأرتاحي
طفوف :- ان شاء الله

خلة ونزل جوا واني هود وجعي
وجفوني غمضت من النعس
بس ما نايمة هيج احس بين الغافية
والما غافية انفتح الباب عرفته هو
محد يدخل للغرفة غيرة ما اريد أگوم
جسمي مكسر والنعس غالبني بس
مداانام ضليت ع نومتي.... حسيتة تمدد
يمي يمكن نام فترة وانعادت حركتة
نفس المرة الماضية أحتضن خصري
واحس بانفاسة أطخ رگبتي ...

غمضت عيوني حيل والخجل متملكني
والرجفة سرت بكل جسمي احس بأيدينة
ملتفة حول خصري بانضباط ما ادري شنو
سر هالانسان الي بقربة گلبي يعلن عن انتفاضة
عارمة ومو راضي يهدي من ثورتة ...!!

انفااسة دافية وتضرب بركبتي
من شدة الاحاسيس والمشاعر العندي
ما حسيت غير اشيل ايدة من خصري و
أگلب نفسي للجهة الثانية وأدفن راسي
بوسط صدرة وقرب قلبـة وهو بدورة
احتضني بقوة حسيت روحي ضعت بحضنتة
لسة ما مستوعبة اني شسويت وشلون
تجرأت وگدرت وسويتها ورحت لحضنة
طول ما اني بحضنة كل ذرة بية ترتعش
واحبس انفاسي وارجع اتنفس بعمق...

فززني صوتة من گال :- ليش ما نايمة..
رديت بخفوت وخجل :- مما أجانيي نوم..
مهران :- شو اشوفج رفعي راسج
طفوف :- ليش
مهران :- طفوف رفعي راسج.
وخرت راسي من صدرة والخجل والاحراج
يقرن مليار وعيوني مغمضتهن
خلة ايدة ع وجهي وأصبعة الابهام
يتحرك بهدوء ع فكي قشعريرة سرت
بكل جسمي وكياني تزلزل من لمساتة
همس :- فتحي عيونج
فتحت عيوني واني اتنفس من حلگي
وكل خلية بية ترجف
خلة عيونة الناعسة بعيوني
وتقرب وطبع بوسة رقيقة جدا
ع حنچي...

حرارة صارت بكل جسمي الخجل اعتلاني
دفعتة بسرعة... ودرت وجهي
للجهة الثانية وصرت التقط انفاسي
المقطوعة بقوة ايدة تخلت ع چتفي
ودارني صارت نومتي ع ظهري
مد ايدة جوة راسي بقيت متشنجة
ما بدر مني اي ردة فعل
مهران :- ليش ترجفين
طفوف :- مدارجف
مهران :- تعالي لحضني
طفوف :- مااريد
مهران :- گتلج تعالي مو بكيفج
احتضني بقوة... واني بقيت متصنمة
بحضنة..
مهران :- رخي روحچ المن هالخوف والرجفة
هاي مقبلات وهيچ چا لو
طفوف :- گتلة بمنتهاء الغباء.. لو شنو؟
مهران :- انة اگول لو تنامين مو أحسن.

طفوف :- هاا
مهران :- يلا نامي نامي
وخلة راسي بصدرة وصدگ
بسرعة استسلمت للنوم ونمت وعطرة معبي
انفاسي ...!

أمنية ....
بعد مرور إسبوعين
بلش دوام الجامعات وتحدد زواج
دارين وناصر ع السنة الجديدة...
عمتي راحت واني بقيت ما رحت
جنا گاعدين اني ودارين بالغرفة نسولف

أمنية :- هم تحجين وية ناصر
دارين :- لاا
أمنية :- يا ليش ما يتصل عليج؟
دارين :- أمبلاا.. بس ما أرد
غميتها وگلت :- أمداچ
دارين :- مو أكول أختي الچبيرة ما اريد
اتخلى عن اخلاقي واغلط غلطة
من العيار الثقيل...
أمنية :- ياا عزا شو انتي فدنوب ما تحترمين

اندارتلي وگالت :- هسة انتي شايفة خوات يحترمن بعض؟
أمنية :- لا
دارين :- لعد خلي نعال لحلگج وصمي
أمنية :- انجبي وتعاليلي ليش متردين
ع ناصر المسكين
دارين :- كييييفييييي
أمنية :- وهو يمشي ع كيفچ
دارين :- ترا ما جبرتة يجي يتزوجني
خل يتحمل
أمنية :- وين تريدين توصلين ويا
دارين :- لراس الشارع

أمنية :- خاايبة انجبي
دارين :- أگلج
أمنية :- غردي
دارين :- شوكت تروحين لبغداد
مو الدوامات بدت شعندج مگابلتني
وگاعده بهالبيت هو شبيه البيت

سكتت لسة مداگدر أوصل
لقرار ساعة اگول اداوم وساعة
أگول لا
دارين :- امنيه مستقبلج لتضيعينا
احنا وان جنا صغار فالقهر كبرنا
ونعرف ندبر امورنا بدونچ لا تسوين
هيچ وتخلينة حجر عثرة بطريق نجاحج
اذا صدگ تحبينا تروحين وتكملين
دراستج ع الاقل وحدة من عدنا خل
تبني حياتها مثل متريد لو ضليتي هنا
راح تتندمين گد شعر راسچ كومي كومي
خابري عمتي مو گالتلتج دگي عليه
شوكت متقررين واجيج...
امنية ردي داحچي وياچ لتصفنين..

رديت بحيرة :- ما ادري دارين خليني افكر
دارين :- ماكو شي اسمة ما تدرين اكو شي
اسمة تدرين وجرت الموبايل وشمرتة بحضني
واشرتلي عليه وگالت :- يلا بسرعة
اتصلي
رفعت ايذي بأستهجان وگلتلها :- دارين خليني
ع راحتي خل احسم قراري
دارين :- لج افتهميني هالخطوة حتى تخطينها
ما يحتاجلها تردد وتفكير... اتصلي امنية اتصلي

اخذت الموبايل واتصلت بتردد جبير
كل شويه اريد افصله وتخزرني دارين
ردت عمتي وگلتلها گالت يومين واني يمج
اجي اخذج تشكرت منها وسديتة
بس تردد وحيرة مو طبيعية عندي ...!!!

دارين
مرن أسبوعين ماكو اي مستجدات
ناصر ما مل ولا كل يوميا يتصل
ويدز مسجات بس ما ارد عليه وحتى
اجانة للبيت وما طلعتله رغم أمنية شگد
حاولت ويااي بس عندت لحدما انتضر
وأيس مني وخلة و راح...

چانت دنيا غروب واني گاعدة بالسطح
والموبايل يمي مشغلة دعاء
ومغمضة عيوني سمعت رنت الموبايل عرفتة
اتصل وعرفت هو بلا ما اباوع ع الاسم...
بقة يلح اكثر من ١٠ مكالماات عاد
انطيتة رفض...

بسرعة دز مسج كاتب

- مشتاگلج يا بعد العافية وأهلهه

بقيت حايرة ارد لو ما ارد عاد بالأخير
رسيت ع بر وكتبتلة..

-خووش

- شني خوش؟

- يعني خوش

- شلونها أميرتي

- زينة ما طول ما اشوفك

- لهلدرجة شوفتي تكدر خلگج..

- وأكثر بعد

- كل هذا وأگولن يجي يوم وتتقبليني وتحبيني
أضعاف حبي ألج..

- وليش واثق

- واثق بربي طلبتج من الله بصدق نية يا بنت عمي
احبج وشاريچ حچيت لربي اعليچ وگتلة
هذي حلمي رايدها منك وحاشة ربچ يرد عبدة

- اروح انام نعستت

- لا تنامين بهالوكت مو زين عليچ

- وليش بلا مو زين؟

- دنيا غروب صلي وتعشي ونامي

- لا شو الا انام هسة

- بوية العناد يجري وي دمچ

- ياااا توك تدري

- اندار فدوة الج ولسوالفج

- شكرا

- تدرين بمجرد ما أشوف حروف رسالتج
تنور بموبايلي يبتهج گلبي

- لا ما أدري

- متعرفين تجمعين كلمتين براسهن خير

- لا ما اعرف عندي خلل بالتعبير

- نعالج هالخلل مستقبلاً ان شاء الله

- ترا ضحكتني

- وداعت معزتچ البروحي و وحگ حبچ المتعشعش بگلبي
أنولچ لو تطيرين وانةة وياچ والزمن طووويل..

- نشووف بلا

- داريني..

- همممم

- يا حلمي أنتي

- نعم

- عليش هلگد أحبچ انة

- اندري غير حضي المصخم خلاك تحبني

- وحضي الحلو الخلا حبچ يدخل بگلبي

- اروح انزل

- ليش انتي وين

- بالسطح

- وشسوين بالسطح.

- گاعدة

- أمشي نزلي بوية شعندج فوگ
ما تگولين اكو وادم تشوفچ امشي نزلي

- ليش داحسك تأمرني اكو اسلوب احلى ترا و ما انزل

- دارين

- والله ما انزل

- والله مدأمر يا حبيبتي انتي يا عمري الحلو
يگلب ناصر وروحة من هالدنيا يبعد هالكون
يا أنتي.. مجرد گتلج نزلي مدأمرج وربچ

- وعبالك من گلت هيج راح أنزل

- ادري بيچ ما تنزلين چا هو الله
من خلقج مكثر عناد بطينتج

- اروح انام

- نامي سوي ليريحج بس نزلي

- ناااااااااصررررر

- يا أميرة ناصر

- راح انام بالسطح

- اي نامي علمود حضج اطيحة

- ما أخاف منك

- ادري وداعتج بس نزلي..

- راح انزل مو الخاطرك بس لان الحرمس شبعني تگرص

- انيالة والله

- منو؟

- الحرمس يروحي

- أروححح اني بااااااي

- الله وياج أميرتي

سديت الموبايل ونزلت جوا جانو بيت عمتي رحاب
يمنا اجوي ع امنيه حتى ياخذونها وياهم
طبعا وصلة من لساني وگعت يلا وافقت
بس اشوف بعيونها الحيرة والتردد والخوف.
حبيبتي اعرفها متگدر تفارگنا... أمنيه
حنانها فضيع بحيث دائما أگول الله من
نطانة ام طايح حضها عوضنا بأخت صارتلنا ام واكثر من ام

وتحدد زواجنا اني وناصر
ع السنة الجديدة واي فرحة بداخلي
ماكو داخلي فارغ ماعندي اي لهفة
ولا مشاعر خلال هالفترة كلها
صديت ناصر أتأملة يعوفني ويمل
ما طول بعدنا ع البر بس شكلة
مو راضي يمل ولا يكل..

بعد العشا اجوي بيت عمي
بس هو ما اجة بس عمي ومرام
ومرت عمي وهماتين گامو يتناقشون
ع أمور العرس واني اصلا ما اشاركهم
النقاش مسلمتهم الخيط والمخيط كل
خلگ ما عندي...

بعدها بقينا سهرانين اني وامنية
شگد سولفنا وحچينا واني بقيت لازگة
بيها احس اريد اشبع منها لان هم
راح افارگها مثلها مثل طفوف
.. طفوف احسها معلگة وية نفسي
لو دقيقه ما تغيب عن بالي كل الوقت
افكر بيها وشلون عايشةةة
وحتى امنيه مشاركتني نفس هالقلق
بالنهاية ما بيدنا شي غير ندعيلها..

أمنية
مرن اليومين بسرعة اجتي عمتي
تاخذني هي وامير باتو يمنة وثاني
يوم الصبح توجهنا لبغداد ودعت دارين
وطفوف ما گدرت أروحلهه لان طلعنا
من الغبشة ما ادري ليش احس بتردد جبير
اصفن اگول گلبي شلون نطااني وعفت خواتي..
اجوز اليسمعني يستغرب بس والله احسهن
بناتي وخواتي ومن مسؤوليتي...

جانت دنيا الصبح ب الستة
طول الطريق احنا ساكتين محد حجة
منو الة خلگ يسولف من الصبح. اني
گاعدة ليورة وفكرة توديني وفكرة تجيبني
عندي قلق وخوف من حياتي
الجاية يا ترى شراح يصير بينا بعد
شضامتلنا الاقدار وشنو خباياها؟؟!

كل شوية اريد اغفة من
النعس خطية عمتي وأمير شگد نشلع
گلبهم ويااي وابوية ما مهتملي أصلا
ولا ع بالة وبس يريد يتخلص من عدنا
تنهدت بحزن ع حالنا وزفرت بقهر وتعب..

دنمشي وراد امير يلتااف
ما نحس غير سيارة تدعم بينا
وروسنا تنلطخ بالكشناات
لزمت راسي بأيدي وشفت ايدي
ملياانة دم هي مجرد لحظات قليلة
بس ما أدري شنو الصارر....
بس كل الاعرفة عطت مفزوعة بكل
علو حسي... آآآه...

يتبع......

.
.
.
.
.
.
.
متابعة شيقة🖤