# ثلاث دمعات
الكاتبة :- ســندريلا ||𝐒𝐀𝐑𝐀𝐇 ♡.
البارت -12-
مرات حته الصدگ مانكدر نكولةةةةة
بس علمتني البجي وصار الدمع سولة
من زغير كلبي انجرح ولهسه ادور فرح
مثل اليدور حرف بوراق مشعوله.... 🖤
. أهتزت الصينية بأيدي من هول ما سمعت
مغصتني بطني واني اسمع موافقة ابوية
بدون حتى مياخذ رأيي… يعني مكفاا السوا
بطفوف وأمنية جاي يكملها بية
سحبت نفس قويت روحي واردد
دارين مو انتي التخضعين الهم مو أنتي !
دخلت عليهم وسويت نفسي طبيعية
قدمتلهم الچاي وخليتة أخير شي
خليت الصينية بالگاع وشلت چااية
دنگت انطي الة وسويت زلگ من ايدي
ووگعتة عليه وحرگتة هو بسرعة أنتفض وگام
من مكاانة…!
صاح بابا :- شبيچ عمية متشوفين حرگتي ابن عمچ
ناصر :- لا عمي ما صار شي
باوعتلة بطرف عيني،،، هو أبتسم بوجهي
وطلع يغسل،،
رحت للمطبخ وطلعت ورا للطارمة
أصلا كل السويتة علمود أحچي ويا
لگيتة واگف يم المغسلة يغسل رحتلة
كتفت ايديني ووگفت گدامة…
هو رفع راسة شافني وأبتسم
گال :- ليش حرگتيني؟
رديت :- كيفي
ضحك وگال :- ما تصيرلچ چارة لا والله
ردت ارد بس ما ردت نتعارك مثل كلمرة
شديت ع نفسي تماسكت وحاولت أحچي
بنبرة هادئة
دارين :- نااصر
ناصر :- يعيونة
ركزت عيوني بعيونة وگتلة :- عيونك خليهن الك
ما اريدهن… أريد غير شي؟!
ناصر :- أعتبري صار..
دارين :- ترا اني سمعت كل الكلام
ناصر :- يا كلام تقصدينَ؟!
دارين :- أنت تدري يا كلام
نكت المي من ايدي وما رد
رجعت گلت :- ناصر اريدك تنهي هالسالفة.
كلها من يمكك!
ناصر بنبرة عصبية :- يا سالفة التحچين عليها!؟
صكيت ع اسناني وگلت :- اني ما اريدك
ما اطيقك مستحيل اتحملك واعاشرك
ما اتحمل اعيش وياك ، تفهمني اعتقني
من هالساالفة ما اريدك
رد بهدوء :- بس انة أريدچ
دارين :- بس اني ما اريدك افتهم ارجوك ما اطيقك
والله اكرهك
دفعني من گدامة بخفة وگال :- مو بكيفچ
رديت عليه :- ثق و صدگني اگلب حياتك جحيم
من ادخللها مغصوبة !!
وساعتها راح تتندم ع هذا قرارك
وتعض اصابيعك ندم؟؟!
ناصر :-وأني قابل…
دارين :- راح تتندم!
ناصر :- عاجبني أتندم
عافني ودخل جوا واني صرت
نار لا لا لازم اكو حل مستحيل اقبل بهالزواج
شنو بيدي ولازم اسوي زين اني ممقتنعة
هاي قناعتي ورغبتي واريد ارفض..؟
بس اذا رفصت واعترضت اكو واحد
راح يسمعني ويهتم!؟ ابوية الانطاهم
الموافقة بدون ما اوافق بدون ميكلف نفسة
يسألني عن رأيي…
والله،، احس انسطرت هالسالفة
لا ع البال ولا ع الخاطر وخصوصا
نااصرر آخر شخص افكر ارتبط بيه
احنا اصلا منتراهم اني شرار وهو النار!!
شلوون نعيش واتأقلم وية شخص...
ما اطيقة ما أگدر صعبة وفكرة
اني ممتقبلتهة ومتدخل عقلي،
عافني وراح خلا النار تشب بيه
وما تنطفي شعلني وحركني بنارة
وعافني حايرة بزمااني.. والافكار
تتلاطم براسي شمرت حسرة
صاكة ع اسناني وهمست بكره
شگد اكرهكك يا ناصر شگد....
هزيت ايدي بأنزعاج واني اتذكر
كلامة من گتلة نااصر.. وگال... ياعيونة.
چبحك كون شگد مستفز
ابو عيون الدگم… جنهن زروف
چفچير
لا بهاي چذبت بالعكس عيونة كبار
وناعساات ، اي بس مو حلوات.
اي طبعاً مو حلوات ضربت الارض
برجلي الهيي اطلب منك الاستعانة
عيني شالدبرة شسوي هسه ؟؟!
رحت دخلت جوا گعدت بالمطبخ
وخليت راسي بين رجليةةة كل افكاري
وتلخبطت لا عقلي مقتنع ولا گلبي
مسوين اجمااع ع الرفض،،، زين اني
شبيدي شرراح اسوي رفعت راسي
ولزمت راسي بقووة !! ماا أريد افكر
ما أريد
شوية ودخلت حمدية بيديها
صينية الچاي باوعتلي وگالت
:- خلصت من اثنين وراح اخلص
من الثالثةة… اوف يا فرحتي سنين
وانتن ع گلبي واجة اليوم التولن كلچن
واخلص منجن يا بنات نجلة
هزيت ايدي بأنزعاج حتى مالي خلگها
سحيلة ام الخلاگين ع گولت مراام
هساا غير يروحون حتى افتهم من ابوية
بلكت يقتنع بررفضي والله ما أريد هالزواج !!
لا أريد أتزوج لا ناصر ولا غيرة…
الكاتلني ابويا انطة كلمة الهم بالموافقة
زين ليش محد فكر ياخذ رآيي
ليش داحسهه حياتهم مو حياتي
بكيفهم يقررون بيها همة الراح يتزوجون
لو أني…؟
ليش مالي رأيي هذا حق هذي حياتي
ومن حقي اقرر بيمن ارتبط من حقي ارفض
ليش رأيي معدوم شنو محلي من الإعراب
أني… الهالدرجة المجتمع الحواليني
عادمين رآي المرة ومالها اي حق ولا قرار
بحياتها يردون بكيفهم اعيش باقي حياتي
مو بكيفي…،؛
اوووف يا ناصر منين طلعتلي منين
انتضرتهم يروحوون لحدما راحو اني
بس اقوي بروحي واهديها اريد اتصرف بعقل
اريد اقنع بابا بس شلون وشراح يقنعة
الشمر بنتة لشيخ، بدون ميفكر بيها
ولا يسأل عليها هداها هدة قطعة من روحة
من صلبة بلا ميفكر ولا يهتم… شتوقع منا
يحن لو يقتنع لو ياخذ رأيي !؟
بعد ما راحو رحت لبابا جان گاعد
بالاستقبال هو حتى بوجهي ميباااوع
شلون افاتحة بالموضوع رحت گعدت مقابيلة
رمقني بنظرة وگال :- بيت عمج طلبوج مني
دارين :- واني ما موافقة..
رد :- واني موافق ودانطيج علم
وماكو كلمة تعلى ع كلمتي سامعة؟!
دارين :- اي سامعة،، بس بابا
رد بقساوة وزمجر بغضب :- بدون بس گتلج
انطيت الموافقة تردين تكسرين كلمتي ولچ
دارين :- ما أكسر كلمتك، بس اني ما موافقة
ومستحيل اقبل بهالزواج مو مشكلتي
انت وافقت بلا متاخذ رأيي
بللت شفايفي وعضيت شفتي بألم
تحولت نبرتي للبكاء ورحت گعدت
ع ركبي مقابيلة… لزمت ايدينة
وگلت بتوسل :- بابا الله يخليك لا تضلمني
فدوة اروحلك لا تسوي بيه هيچ
بابا الزواج مو جبر الله يخليك أفهمني ولا مستعدة
لزواج ولا أريد هالزواج بابا لأول مرة اطلب منك
شي لا تخيبني حس بية ليش انت مو ابوية
حس بية لا تهضمني… المن التجئ اني لغيرك فدوا
ابوس ايدك لا تجبرني ولا مو حمل هالشي
والله..... اني بنتك بابا حس بيه
نتر ايديني ودفرني برجلة
وگعت بالگاع حبست دموعي الالتهب
بجفوني بلعت ريق مم علقم ورسمت
ابتسامة ساخرة ع شفتي اي شتوقع منة
غير القساوة احس گلبي يعتصر من
فرط الألم والوجع الداحسةة
وگف وتقدم جرني من شعري
ويعتعت بي ويجيبني ويوديني
غمضت عيوني بوجع كزبز جسمي
من علو حسة الماخذ الدنيا
"اسمعيني زين ولج وخلي كلامي ترچية بأذنچ
كلمة اعتراض ما أريد توافقين وغصبن عليچ
وراسج فوگ رجليچ، اذا سمعتچ مسوية شي
ترا ما تلومين غير نفسچ واذا مو لأبن عمچ
اشمرچ ع اول واحد يجيج
وأردف بقساوة :- انةة ما اعول اخلص منجن
جايات تتشرطن وتعترضن گتلج توافقين
ومن باچر اروح لعمج واكلة يستعجل بالعرس
ماا اريد شوفة هالوجه وأتكدر…
الله ياخذجن واخلص منجن علل ع گلبي
لو بس ادري شنهي الحكمة من الله
بلاني بيچن بنات الفگر…!!
حمدية :- بنات آخر وكت وترفض هم
وشبي ابن عمج عيني خاااف ما عاجبج
احسن منة انتي بشنووو؟؟
فززني صوت بابا من زكح بحدية :-
ما عندي مرة ترفض وكلتها واكررها مامش
وحدة منجن تطلع من طوعي ترضى بأبن عمها
وهي الممنونة !!
انتفضت وگتلة بقلة حيلة وضعف :- والله هذا الزواج ما يتمكتلك ما موافقة ولو ع جنازتي ما اغير رأييوشتريد تسوي سوي، حاسب روحك أب انت
ابيش ما تعول تخلص من بنااتك شمسويلك احنا
هااا لا فديوم طلبنا منك شي ولا ردنا منك شي
اب بس بالاسم لا سند ولا عزوة
اني گلت هيج عرفت جنيت ع روحي
بس صدقاً غصبن عليه فقدت اعصابي
وما اتحملت اكام اكثر الضغط يولد
الانفجار واليوم نفجرت بوجهه…
ما حسيت غير طار عليه لزمني
گعني تگطع يبسني تيبس من الكتل
يضرب ضرب مبرح بلا رحمة بلا ميرف
قلبة كأن الگدامة حيواان من الشاررع
مو بنتة لا والله الحيوان هم ميسوولة
هيج… احس عضامي تكسرت والالم
ما أدري منين يجيني والضربات تتوالة
علية بكل مكاان،، اصررخ كل قوتي واحس
صرخاتي تفطر گلبي…
أبتعد مني وهو يسب ويشتم بأسوء
الألفاظ وحمدية واگفة تحرضاا علية
ربيها،، ممرباية توگف بوجه ابوها
الله يعينك عليها،لا تروح تفشلنا وية
بيت اخوك...
أسمع أسمع وأحس روحي مثل
طير مذبوح دتفرفح گمت بوجع
واني اتأوة من الألم… مشيت من يمهم
بلا ما التفتت ورحت للغرفة وسديت الباب
گعدت بالگااع مسحت حلگي من الدم
بأصابعي واختليت بروحي ومواجعي
اطلقت العنان لدموعي المحبوسة
بمحاجري وسمحتلها تاخذ مجراها وتنزل
ع خدي وتلسعة بألم...
كرهت ابوية كرهتة كرهت ناصر
كرهت روحي كرهت كلهم
كل الديصير بية بسببهم…
لزمت راسي واضربة برجليني حيل
اريد عقلي يوگف ميفكرر ما أريد
افكر بأي شي…!!
ليلتها حلفت قسم ادفعة الثمن
غالي واخلي يتندم… اي هو اجة
تقدملي واني رفضت وطلبت منة ينهي
كولشي من يمة وهو يعرف كلش زين
ما بيدي اي حيلة ومغلوب ع أمري
بس هو اتلذذ بقلة حيلتي واتمتع بضعفي
وأصر ع رأية الله ياخذني واخلص منة
ومن الكل…!!
اني ما اريدة وهو يعرف بهالشي
شرايد مني بعد ما ادري بس مثل
معاند اني هماتين اعرف اعاند
الا اخلي يتمنى يمحي الساعة الي
فكر بيها يرتبط بية...
جسمي كلة يوجعني أريد أگوم
ع حيلي ما بية وجع يدگ بالعظم
كسرني تكسر ، گمت بألف يا علي
أجتني دوخة قوية لزمت الحايط
وارتچيت عليه لحدما هدئت...
رحت طلعتلي ملابس ورحت للحمام
سبحت بمي دافي اريد جسمي شوية
يرتاح من الضرب الاكلة ويسترخي.!
كملت ورجعت للغرفة تمددت بفراشي
غمضت عيوني والافكار اكلت راسي
أكل،،، اخير شي استسلمت جفوني
للنوم وهربت من واقعي وخلصت
ولو بعض ساااعاات !!
يوم ثاني
چنت گاعدة وساكتة أجتني حمدية
وشمرت الموبايل عليه وراحت بلا متحچي
هزيت ايدي نيال امها عليها
اخذت الموبايل وخليتة ع اذني
تخلل أسماعي أحن صوت بالدنيا
وهي تگول :- شلونچ يااا روحي انتي
مشتاقتلج فوگ متتصورين…!!
أبتسمت ورديت عليها
گالت :- ليش أحسچ بيچ شي
ممرتاحة لنبرة صوتچ كوليلي صاير
شي واني ما ادري.؟!
رديت بضيق :- اشياء قصدچ
ردت بخوف :- شصاير تراا خوفتيني
حجيتلها كولشي من طئطئة للسلام عليكم!
ردت :- وهسا شلونج خوما بعدج متأذية
من ضربة ألچ؟!
رديت بغصة. :- هسا ع الم جسدي يهوون
بس النار البروحي شيخمدها!؟
ردت :- ارتاحي دارين واني راح ارجع
بأقرب وقت اخلي عمتي تجيبني
ابتسمت بأستهزاء وگلت :- ولو جيتي شسوين
ابقي هناك وفلحي بدراستج احسن منما تجين هنانة
هه لا يروح ينطيج انتي هم وعلمود تكمل السبحة
گالت بألم :- اووف يا خواتي والله تمرمرتن من صغرجن.. شنو البيدي وما اسوي والله لو اعرف
هاي روحي افديها في سبيل تعيشن برااحة ما ابخل بيها والله
ما بيدي اي حيلة لا ام تحتوينا لا اخ يصيرلنا عزوة. لا اب يسندنا ويحن؟! ليش شنو البيدي وما اسوي
ولج تدرين شلون داطحن بروحي طحن ع اختج
ما ادري شنو وضعها مرتاحة لو بالضيم
شصار بيها،،، تدرين هاي لو انتي ما اخاف عليچ
هالخوف لان اعرفج بيچ قوة شوية
الا ذيچ اوووف يا غصة طفوف ما تنبلع
اعرفها فقيرة رجل دجاجة متحل خاايفة عليها فدنوبا..
رديت بحيرة :- والله ما ادري يا امنية
ان شاء الله تكون بخيرر..
گالت بحنان :- حبيبتي انتي ليش معترضة ع ناصر؟
ترا ناصر خووش ناصر ليش كل هالرفض؟
صدگيني خوش ولد ولو رضيتي بي راح
تخلصين من هالقااع العايشة بيه!
رديت بضجر :- شدتكولين حتى انتي يا امنية
هو مو صوجج صوجي اني داحجيلج ليش
مدتفهمين عليه؟!
أمنية :- فاااهمتج يا دارين بس خلينا نكون واقعين شنو البيدنا نسوي برأيچ راح نگدر نوگف بوجه ابوج ومرتة
رديت :- احجي ويا هالناصر خلي يلغي كولشي من يمة
ردت بصدمة :- عززاا تخبلت ،، شوون هيج احجي وياا وبعدين هو رجال ومو رجال ليرد بكلمتة
شوون طلبچ رسمي وتردينة يتراجع بقرارة
برأيج هاايي السالفة ترهم؟!
رديت :-اشمدريني متكليلي هذا من وين طلعلي
اني حجيت وياا كتلة ما اريدك انهي كولشي بس هو عند بس بسيطة اذا ما كرهته بعيشتة
ردت بذهول :- ارتاحي حبيبتي ارتاحي عقلج ضارب يمكن شعدنا فيلم هندي ومسويتها انتقامات
اصحي ع روحچ وديربالج ع نفسج احجي وياا عمتي بلكي تجيبني دور والله استحي مرمرتها ويانا طول هالمدة…
رديت :- ماشي اخذي راحتج بيباي
سديتة من امنية ورحت ادور ع
حمدية دانطيها موبايلها..
أمنية
بصراحة شي متوقع
نلصر ودارين ما ادري اذا احساسي
بمحلة او لا بس دائما جنت انتبه
لناصر يصفن بدارين او بالعادة يهتملها
اكثر من البااقين،
بس المشكلة مو بناصر هو خوش ناصر
شهم وسبع بس المشكلة بأختي
الرافضة هالفكرة نهائيا اعرفها مو صاحية
تحجيلي بالانتقامات وادفعه الثمن ومن هالحجي
المشكلة اعرفها خبلة وتسويها صدگ
وما تخااف !!
نفضت الأفكار هاي من راسي ودعيت
ربي يريح كلب خواتي ويزرع بيهن
بذور السعادة،،، جانت دنيا العصر
نزلت يم عمتي لگيتها گاعدة هي وأمير
بالصالة يشربون چاي،،
سلمت،، وگالت عمتي وهي تمسح
ع المكان اليمها
:-تعالي حبيبتي گعدي شربيلج استكان جاي
وية عمتج
:- تسلميلي عمة
صبتلي چاي اخذتة وصرت اشرب
وفكري شارد يم دارين وطفوف،
فززني صوت أمير من گال :- شنو رأيچ بالموبايل
كون عجبج؟؟
رديت :- حيل حلو تسلم تعبتك ويااي
رد وهو يرتشف من الجاي :- الف عافية
رديت :- تسلم الله يعافيك... ااااا.. عمة
گالت عمتي :- ها عمة..
كمت خليت الچاي ع الطبلة ورجعت لمكاني
يم عمتي گلتلها :- عمة دارين ناصر ابن عمي متقدملها .. وابوية مواافق ... يعني احتمال
الخطوبة هالايام لازم ارجع للبصرة
گال أمير بايتسامة جانبية :- الف مبروك وروحتكم عليه اني أوديكم شوكت متردون
عمتي حيل فرحت لان دارين ح تصير
من نصيب ناصر وامير تكفل بروحتنا
ما انسى وگفتهم ويااي هواية طيبين
بس يا ترى هالطيب راح يستمر…؟؟؟
اتفقنا نروح عگب باجر من الصبح
بقيت انتضر ع نار شوكت يجي اليوم
الروح بيه لحدما اجة طلعنا من الصبح
بسيارة امير وتوجهنا من بغداد الحبيبة
لبصرة الخير غبشة !!
الطريق حيل متعب وطويل ساعة
اغفي ساعة اكعد حاى نزلنا مطعم
ارتاحينا شويه وريحنا رجلينا من گعدت
السيارة وانطلقنا من وصلنا
نزلت اركض للبيت وعمتي وراي تضحك
عليه… احس گلبي طاگ ع دارين وطفوف
وبرااق بس اريد اكحل عيوني بشوفتهم
التسوى العمر...
طلعت دارين من الباب تركض
شمرت جنطتي وركضت حضنتها بقينا
متحاضنات بلهفة ليگول صار سنين
متفارگين مو أياام من حضنتها
وشفتها حسيت شوية ردت الروح بية
دخلت امير للاستقبال كال كولشي
ما اريد بس اناام فرشتلة ونام سديت
الباب ورحت للغرفة اركض انردمت
بحمدية ابتسمت بوجهه وگتلها :- شلونج ان شاء الله بخير
عاطت بضجر :- انعل ابو الخير يا خير اليلفاني من وراجن ما اعول اخلص منجن شعدج رديتي
شوكت افتك منجن انةةة دفعتني حيل ومشت
بعصبية تدردم...
تصنمت بمكاني من ردة فعلها
لو مأذيتها بشي حقهاا
لو مأثرة عليها حقهاا
لو مسويتلها شي هم حقهااا
بس اني ممسويتلها اي شي
الله شاهد ولا فكرت بيوم أذيها !!
حتى مرات دارين وطفوف
يسون بيها دگايگ وما ارضه عليهن
وانهرهن عجيبة هالانسانة
نيال گلبها هم تنام بليل مرتاحة
وهي بهالقساااوة!؟
شفت براق طلع من غرفتهم
رحت حضنتة وبوستة ابو خدود
وبقيت الاعبة لحدما ضاج تفل عليه
وراح هههههه!
دخلت للغرفة شفت عمتي تحجي
وية دارين تحاول توعيها وتفهمها
ابن عمج اولى بيج من الغريب
وناصر خوش ناصر ومن هالكلام
ودارين معاجبها الحجي وتسمع ع اعصابها
حسيتها ح تنفجر عاد غيرت الموضوع
وگلت :- خطية اميرر تعبنا ذب روحة ونام والله يا عمةزيناتكم كثرت مدري شلون اجازيج
امي ما فكرت تسأل علينا طول هالسنين
وانتي واگفلتنا وگفة الام وأكثر
ردت بطيبتها المعتادة :- يا يمة ليش تگولين
هلحجـي كم مرة اگلچ ما أحب اسمعة
ردت أرد ما حسينا غير بالباب
ينفتح وتدخل منا طفوف جنطتها
بأيدها عيونها حمر والدموع تنذرف
عشرة عشرة…!!!!
يتبع……