شكرا ع المتابعة ^_^ ...
#متلازمة_عائلتي
#الحلقة 15
..................
علي كمال وندى مقعمزين في الكرسي اللي في حديقة المستشفى
ندى : علي كمال .. بالله عليك سامحني معش نقدر تعبت و انا كل وقت نفكر فيك تعبت و انا عايشة زي الميتة .. امتى بتسامحني ؟
علي كمال : لهالدرجة تحبيني ؟
ندى : و أكثر
و تلاحظ ندى بوها واقف و يشوفلهم و فجأة توقف وهي خايفة
ندى : بابا
يتلفت علي كمال و يوقف .. ويقرب منهم خليفة
و ندى وعلي كمال يقعدوا يشوفوا لبعضهم
............................
.........
يدخلوا وصال و نديم لجناحهم ويدخلوا لغرفة النوم
كانت وصال خايفة ومتوترة .. يوقف نديم قدامها ويقعد بشوفلها
نديم : خودي راحتك .. انا البرا
و ياخد ملابسه و يدخل الحمام .. و يحط ملابسه و يرخي القرواطة و يغسل وجهه اكثر من مرة .. وبعدين يغير حوايجه و يتوضأ ويطلع
.......
.............
سلمى : في حد يشوفلنا
وينصدم هيثم و سلمى مش عارفة شندير
هبة : منو في غادي
هيثم لما يعرف انها هبة يتخبى بالشجرة باش ما تشوفه اخته
و سلمى تستريح لما تلقاها هبة
سلمى : هبة هذا انتي
و تمشيلها
هبة : شن اديري هنا ؟ و مع من واقفة ؟
سلمى : لا لا حد
هبة : شن حد ؟ شفت حد واقف معاك من هذا ؟
سلمى : تو نحكيلك .. شن في انتي خيرك جاية عقاب الليل
هبة : نقالي مصكر شحن و شحني قعد هنا نسيت ناخده
سلمى : اها باهي تعالي نعطيهولك
و يمشوا وهبة تقعد تتلفت و تشوف
و بعد ما يدخلوا هيثم يطلع و يمشي لفيلتهم
.............
.........
و تلاحظ ندى بوها واقف و يشوفلهم و فجأة توقف وهي خايفة
ندى : بابا
يتلفت علي كمال و يوقف .. ويقرب منهم خليفة
و ندى وعلي كمال يقعدوا يشوفوا لبعضهم
خليفة : استاذ علي ؟ شندير هنا
علي كمال يقعد ساكت شوية وندى متوترة
علي كمال : هو .. عندي ولد صاحبي مداير حادث جيت نشوف فيه
خليفه : اها ان شاء الله لا باس عليه
علي كمال : و انا داخل تلاقيت انا و ندى
ندى : ايه .. حسيت روحي انخنقت من جو المستشفى طلعت بنشم هواء تلاقيت و انا استاذ علي و حسيت بدوخة طلعني برا و جابلي ميه
خليفة : اها باهي اعطيني علم قبل ما تتحركي من بحداي
ندى : شن حال امي توا ؟
خليفة : باهية توا اعطوها خروج .. هيا بنروحوا
علي كمال : ان شاء الله لا باس عليها
خليفة : الله يسلمك .. تصبح على خير
تشوف ندى لعلي كمال وهو يشوفلها و تفوت من قدامه وتمشي مع بوها
و يرجع علي كمال يقعمز في مكانه
علي كمال : اووف .. جو المراهقة هادي ما تمشيش معاك يا علي كمال
و يمسح وجهه بإيديه
........
......
هبة : هيا قوليلي من اللي كنتي واقفة معاه ؟
سلمى : هذا ...
هبة : هذا منو ؟
سلمى : ولد عمتي
هبة : ولد عمتك منو ؟ وصال ما عندهاش خوت !
سلمى : ولد عمتي التانية اسمه عمر ما تعرفيشي
هبة : اها وباهي من امتى العلاقة هادي خيرك ما قلتيليش عليها قبل ؟
سلمى : توا جديدة في فترة العرس
هبة : اها .. المهم تو ناخد منك التفاصيل غدوة .. انا عطلت تصبحي على خير
سلمى : و انتي من اهل الخير
تاخد هبة شحنها و تروح .. وسلمى تتنفس الصعداء
.......
......
نديم و وصال يكملوا صلاتهم اللي كل زوجين يديراها اول شي في ليلة الدخلة
توقف وصال و نديم قدامها
نديم : خودي راحتك انا في الصالون
ياخد نديم مخدة و غطاء و يطلع من غرفة النوم ويمشي الصالون
تقعد وصال في صدمة حست روحها مرفوضة و في موقف مش حلو بالنسبة ليها هي كعروس .. في اول ليلة يسيبها راجلها و يرقد برا
و تتأكد ان كلام نسرين صح بأن نديم رافض يتزوج منها
ينطرح نديم ع الصالون و يفكر .. ويحس انه مش متقبل وصال كزوجة قاعد بعد كل اللي صار و المشاكل اللي صارتله بسببها وحتى لو كان هي ما عندها علم بشي
..........
......
تدخل هبة لفيلتهم تلقى هيثم مقعمز في الجنان
هيثم : وين كنتي يا فرخة ؟
هبة : انت وين كنت ؟ قلبت عليك الدنيا نبيك تمشي تسايرني في هالليل بنمشي لسلمى ناخد منها شحني
هيثم : كنت هنا في الجهة .. معش تطلعي بروحك اخرلك مرة هادي
هبة : برا زيد عليا غادي .. (وتمشي وتسيبه)
هيثم : اسمعي الكلام خيرلك معش تطلعي الا بإذني
و بعد ما تمشي يتصل بسلمى
سلمى : هيثم .. قلبي قريب طاح
هيثم : خلاص عدت على خير
سلمى : فكرته علاء و علي كمال اللي شافنا .. تعرفي قريب اغمى عليا
هيثم : حتى لو كانو هما .. ما تخافيش
سلمى : شن كنت بدير ..
هيثم : مش عارف في لحظتها لكن .. مستحيل كنت نسيبك
سلمى : يا وخيتي سلمك .. المهم هيا تصبح على خير نحس في روحي تعبانه وفاشلة
هيثم : تمام تصبحي على خير
...........
........
يوصل علي كمال الفيلا
يدخل و يوصل لقدام غرفته ويشوف لغرفة نديم جنبه و يبتسم
و يدخل لغرفته و يتمدد على سريره و يقعد يفكر في كلام ندى
و بعدها يرقد على طول
..........
..........
تاني يوم الساعة 11
ينوض نديم على صوت طقان باب جناحه .. يفيق و يقعد يشوف و مش مستوعب للحظة هو وين ! .. و بعدين يستوعب على روحه
و ينوض ياخد المخدة و الغطاء و يدخلهم بسرعة لغرفة النوم
يلقى وصال واقفة وباين عليها التوتر
نديم : تو نفتح انا
وصال : باهي
يمشي نديم يفتحو يلقى امه و سلمى جيابين الفطور
خديجة : صباح الخير (وتدخل)
سلمى : صباح الخير
نديم : صباح النور .. ادخلي
يدخلوا و يحطوا سفرة الفطور في الصالون
خديجة : وين عروستنا ما طلعتش ؟
و تجي وصال
وصال : صباح الخير
خديجة – سلمى : صباح النور
خديجة : ماشاء الله ما شاء الله .. كيف حالك ؟
وصال : الحمد لله بخير .. شن حالك انتي ؟
خديجة : كويسة .. اهو جبنالكم الفطور
نديم : ما كانش في داعي .. المطبخ موجود فيه كل شي
خديجة : شن عرفك انت ؟ بتخلي عروستنا بتخدم من اول يوم
و يقعدوا يشبحوا لبعض و ساكتين
خديجة : هيا افطروا و جهز روحك يا نديم للجمعة
نديم : عارف يا امي .. مش صغير راهو
خديجة : اسكت عاد .. للجمعة الفاتت كنت انوض فيك باش تمشي هههه
نديم (بصوت واطي) : لا حول ولا قوة الا بالله
سلمى : هيا ماما نمشوا وقت ع الغذاء
خديجة : ايه حق .. هيا بالسلامة توا
و يطلعوا خديجة وسلمى .. و نديم و وصال يقعدوا يشوفوا لبعض و ساكتين شوية
نديم : افطري .. ندخل الحمام ونجي
تهز راسها بمعني باهي
و يدخل نديم
و شوية ألاء تتصل بوصال
ألاء : شن حال عروستنا
وصال : الحمد لله .. شن حالكم انتم ؟
ألاء : اسكتي امس بكينا لين عيينا بعد ما مشيتي .. و بالذات لما دخلت الغرفة وما لقيتكش فيها
وصال : اسكتي فكيني ما تبكينيش
ألاء : باهي باهي .. شن جوك و جو نديم ؟
وصال : تمام كويسين .. شن حال امي و بوي ؟
ألاء : بخير .. هيا سلامات توا .. نتكالموا بعدين
وصال : سلام
.............
.....
سالمة : يا خالد .. يا خالد
خالد : نعم شني في ؟
سالمة : وليد .. وليد وينه ليا 3 ايام ما شفتاشي
خالد : مش عارف حتى انا من يوم الفضيحة معش شفته بكل الوسخ هذا
سالمة : غير باهي مش وقته الكلام هذا توا .. الولد وين ؟
اسماء : معش شفته حتى انا ..
سالمة : لهينا في العرس و معش سألنا على الولد .. يا رب تحفظه
خالد : وسعي بالك .. تو يروح اكيد بايت عند حد من اصحابه امس خميس و اكيد مزردين
سالمة : ان شاء الله
.........
......
بعد لا يطلع نديم من الحمام .. و يمشي للصالون يلقى وصال مقعمزة وخلاص
نديم : خيرك ما فطرتيش ؟
وصال : اا .. نستنى فيك
نديم : اها ..
اها ويقعمز يفطر ..و تصبله وصال عصير
نديم : صحيتي .. افطري
وصال : حاضر
......
علي كمال يدخل المطبخ يلقى سلمى و نسرين
علي كمال : سلمى اكويلي سوريتي اونها في غرفتي
سلمى : حاضر .. (و تمشي )
علي كمال : ايه يا نسرين ! شن اللي درتيه امبارح ؟
نسرين : علاش شن درت ؟
علي كمال : علاش قلتي لنديم ؟ و بالذات امبارح في الليل ؟
نسرين : اه قصدك ع الرسالة ؟ حبيت انه يعرف قبل .. خير ما يسمع بعدين و يتورط
علي كمال(بعصبية) : في شن بيتورط ؟ مش قلتلك ما تقوليش ! كان نبيه يعرف راهو انا اللي قلتله ما يقعدش الموضوع عليك انتي
نسرين : والله انا درت الشي هذا لمصلحته
علي كمال : مفيش حاجة لمصلحته .. انتي ما اديريش حاجة اللي تكون مصلحتك فيها اولى من كل شي
نسرين : انت توا شن تبي ؟
علي كمال : معش تدخلي في حاجات ماليكش علاقة بيها احسن (و يطلع)
نسرين : ايه ناقصني انت توا
....
.......
نديم و وصال بعد ما يكملوا فطور
وصال : نجهزلك ملابس الصلاة ؟
نديم : لا جاهزات
و يدخل نديم يجهز نفسه .. و يطلع نديم وينزل و يخلي وصال
ينزل نديم لوطا و يلقى علي كمال كيف طالع من غرفته ومجهز نفسه
علي كمال : اووووه
و يحضنوا بعض
علي كمال : الف مبروك يا غالي
نديم : يبارك فيك
علي كمال : شن الوضع
نديم : ماشية اهو
علي كمال (بصوت واطي) : الدخلة مشت امورها ؟
نديم : ايه ايه الحمد لله مشت
علي كمال : كويس .. بوك وعلاء البرا يستنوا
نديم : تمام هيا
.....
و يمشوا الشباب للصلاة ..
و شوية وتنزل وصال و تدخل عليهم في المطبخ
وصال : السلام عليكم
الكل : وعليكم السلام
خديجة : مرحبتين مرحبتين نورتينا
وصال : الحوش منور بأهله
نسرين(بطريقة مستفزة) : اهلين بسلفتي .. حالك باهية ؟
تشبحلها وصال بــ غل
وصال : الحمد لله .. حال العروس الجديدة اهو
نسرين : تتهني ان شاء الله
خديجة : سلمى بنتي .. جهزي السلاطه
سلمى : حاضر
وصال : هاتي تو نديرها انا
خديجة : اللطف .. والله ما صارت عاد هذا اللي ناقص
نسرين : ههههه خيرك مستعجلة يا بنت .. تو تتعبي و انتي تخدمي هنا
خديجة : ايح ع الكلام الزايد توا
........
...............
يجهزوا الغذاء و يروحوا الشباب من الجمعة ويحطولهم الغذاء في الصالون و النساوين يتغدوا في المطبخ
و يتغدوا ويكملوا وياكلوا الفواكه
خديجة : وصال بنتي .. انتي ارفعي الشاهي و الحلويات توا نسرين وسلمى يغسلوا المواعين
وصال : باهي حاضر
تعدل وصال من حجابها و تمشي وهي متوترة
وصال : السلام عليكم
علاء : اووه بنتي عمتي انستينا
علي كمال كان يشبح لنقاله .. يقيم راسه و يشوفلها و بعدين ينزل راسه تاني
فتحي : وعليكم السلام .. نديم خود السفرة من يد مرتك
نديم : ها ؟ باهي
ياخد نديم السفرة و هو يشوفلها وهي باين على وجهها التوتر
و يحطها قدامهم
فتحي : شن حالك يا بنتي
وصال : الحمد لله يا خالي كيف حالك انت؟
فتحي : الحمد لله
و ترجع وصال ...
......
......
سلمى في المطبخ و يرن نقالها
تاخده وتمشي لغرفتها
سلمى : الو هيثم
هيثم : كيف حالك حبي !
سلمى : حبك ؟
هيثم : ايه حبي .. ما قلتهاش قبل ؟
سلمى : لا اول مرة هههه
هيثم : اهو عندك علم توا حبي
سلمى : ممم باهي
هيثم : شنديري ؟
سلمى : اهو قاعدين حايسين شوية .. كيف تغدينا و نظموا .. وانت؟
هيثم : نفس الشي روحنا من صلاة الجمعة انا وبوي وتغدينا قلت خلي نسمع صوتك
سلمى : هيثم
هيثم : عيون هيثم
سلمى : لازم نصكر توا .. نتكالموا بعدين
هيثم : تمام على راحتك
سلمى : يلا سلام
..........
...
خديجة تتكلم في النقال
خديجة : ايه الحمد لله مشت الامور .. تمنيناك جيتي والله .. الاولاد قعدوا يسألو عليك .... لا عارفاتك وعارفه ظروفك .. حتى احنا درناه فجأة زي ما انتي عارفة .. ايه ايه .. حاضر يوصل حتى انتي سلميلي ع الكل غادي .. سلام سلام .. ماشي مع السلامة
سلمى : ماما في من كنتي تكلمي ؟
خديجة : خالتك عيشه
وصال : هادي اللي في الشرق
خديجة : ايه .. تسلم عليكم و تباركلكم
وصال : يبارك فيها
نسرين : وخيرهم ماجوش ؟
خديجة : ماكم عارفينها مريضة و مسافة الطريق ما تتحملش
نسرين(بصوت واطي) : ملا فكه منهم
..............
شوية ويطق الباب و تجي سلمى تفتح الباب
سلمى : اهلين عمي تفضل
خالد : اهلين بنتي .. خوتك وين ؟
سلمى : في الصالون داخل .. تفضل
و يدخلهم ويسلم عليهم
فتحي : قعمز خيرك واقف
خالد : لالا .. جيت بنسأل الأولاد بالك شافوا وليد من يوم الثلاثاء معش روح للحوش
فتحي : يمشي هفه ترفعه
علاء : مش وقت الكلام هذا يا بوي .. كلموا اصحابه اكيد عندهم
خالد : كلمناهم بالواحد .. مفيش حد شافه و نقاله مقفل
نديم : بالنسبة لينا نفس الشي اخر مرة شفناه هداكا اليوم ..ولا يا علي كمال
يقعد علي كمال ساكت بدون كلام
خالد : مش عارف من بنسأل .. امه خليتها في حاله
علاء : اسألوا هيثم .. ليهم فترة يهدرزوا مع بعض
خالد : و انا جايكم لقيته قدام بيتهم و سألته قال ليهم فترة ما تلاقوش
فتحي : عاد ولدك مش صغير يا خالد يشد في السلاح ويضرب علاش خايف عليه .. مدوراشي تو يروح
.......
..............
مع المغرب
تركب وصال للجناح و تدخل لغرفة النوم و تقعمز ع السرير
نديم و علي كمال مقعمزين في الجنان
نديم : برأيك وليد وين ؟
علي كمال : مش عارف .. و ما نبيش نعرف
نديم : سامحته ؟
علي كمال : من ؟ وليد ؟ اكيد لا
نديم : مش عارف لكن ما نسحابش روحي بنقول عليه هكي .. لكن والله وجعني يومها .. بغض النظر عن عمايله اللي دراهم و ضربته فيك بالسلاح
علي كمال : كان ناوي يضربك انت اساسا
نديم : عارف ..
علي كمال : خيرك ؟ مش نادم انها جت فيا .. لو صار تاني ناخد بدلك عشر رصاصات
نديم : ههههه بعيد السو عليك .. وبعدين عارفه الكلام عذا بدون ما تقوله
علي كمال : باهي انت توا شن ادير هنا ؟ برا امشي لمراتك
نديم : باهي توا نمشي
علي كمال : نوض توا برا امشي .. تخليها عروس جديدة بروحها
نديم : باهي حاضر .. هيا سلامات
علي كمال : سلامات
و يمشي نديم
يطلع علي كمال نقاله و يفتح على رقم ندى و يشيلها من الحظر
و يتصل بيها .. تشوف ندى المكالمة و قريب طارت من الفرحة
ندى : الو علي كمال ..
علي كمال : ايوه نعم
ندى : و اخيرا نحيت الحظر .. و انا كل شوية نتصل بيك نجرب
علي كمال : هذا وين فضيت .. كيف حالك وحال امك ؟
ندى : تمام بخير .. أحسن .. كيفك انت ؟
علي كمال : الحمد لله .. بخير شن جو امتحاناتك جاوبتي ؟
ندى : درت جهدي .. والحمد لله اغلبهم جاوبت ..
علي كمال : و مادتي انا ؟
ندى : احلى اجابة فيها هههه
علي كمال : باهي كويس .. قداش مازال عندك امتحان ؟
ندى : واحد ونكمل يوم الاثنين
علي كمال : حلو بالتوفيق .. انا بندخل توا بنصلح الاوراق نتكالموا مرة تانية
ندى : تمام سلامات .. موفق
علي كمال : سلام
و يصكر
علي كمال : اوفف يا علي كمال .. الجو هذا ما يمشيش معاك ..
........
.....
خديجة كيف داخلة الفيلا كانت عند سالمة سلفتها
خديجة : علاء وين ماشي ؟
علاء : بنركب لجناحي .. شن ؟
خديجة : تعالى نبيك في موضوع
علاء : موضوع شن .. شن في ؟
خديجة : غير تعالى توا
و يدخلوا للمطبخ
علاء : شن في ؟
خديجة : اسمع كلامي مزبوط و افهمني
علاء : يا ودي قولي شن في .. علاش تشحطي فيا
خديجة : اللي بنقوله توا مش خوك نديم تزوج ..
علاء : ايه باهي ..
خديجة : و انت ليك سنين متزوج
علاء : سنتين بس
خديجة : المهم .. و مرتك عطلت و ما جابتش الصغار
علاء : الله غالب ..
خديجة : اللي نبي نقوله لك .. شن رايك نزوجوك وحدة تانية تجيبلك الصغار فيسع
علاء (بصدمة) : شنوووو ؟ شن تقولي يا امي !
خديجة : ايه زي ما سمعت
علاء : لا لا لا .. نحي الفكرة من راسك ما نبيش
خديجة : ما تعارضش على طول .. توا نديم يجيب العيل الاول للعيلة و يحمل اسم العيلة و الشركة وكل شي هنا وانت اقعد هكي .. انا لمصلحتك واضح نسرين موضوعها مطول
علاء : احنا ما مشيناش حتى لدكتور قاعدين
خديجة :ما عند لاش تمشي و اتوعبوا في روحكم و كل شي عبارة عن مصاريف زايدة وخلاص و من عيادة لعيادة و دكتور لدكتور و اشبح تشد معاكم ولا لا .. اسمع كلامي يا وليدي انت حالتك معروفة و اي وحدة حتقبل بيك
علاء : فكيني منه الموضوع هذا يا امي ..
خديجة : انت غير زيد فكر .. و ما تتسرعش
علاء : باهي باهي (و يمشي)
خديجة : ايه يا نسرين .. تو نشوفك شنديري توا
..........
.........
يدخل نديم لجناحهم و يدخل لغرفة النوم يلقى وصال منطرحة ع السرير و تشبح للسقف .. تقعمز وصال على طول و تساوي روحها لما شافت نديم قدامها
وصال : تبي حاجة ؟
نديم : كيف يعني ؟
وصال : قصدي .. بالك تبي حاجة انت !
نديم : لا لا ما نبي شي صحيتي ..
و يقعدوا ساكتين شوية .. و بعدين نديم يطلع و يمشي للصالون ويفتح التلفزين و يتفرج و تقعد وصال في الغرفة مستغربة من حركاته و ما قدرتش تكلمه
...
......
في الليل
علي كمال يتعب من تصليح الاوراق و يقرر يطلع يشم هواء البرا
يتجول في جنان الفيلا شوية و يطلع البرا للشارع .. يلقى هيثم قدام فيلتهم حتى هو يدخن
هيثم : مساء الخير
علي كمال : مساء النور
يحذف هيثم الدخان ويمشي لـ علي كمال و يسلم عليه
هيثم : شن الجو .. كيف حالك توا
علي كمال : الحمد لله احسن شت اخبارك انت
هيثم : ماشية بخير .. اهو كساد طلعت ندير في دورة
علي كمال : ادخل نهدرزوا في الجنان الداخل كان ما عندك شي
هيثم : عادي
يدخلوا و يقعمزوا ع الكراسي
علي كمال : شن الوضع العام
هيثم : اهو ماشية
علي كمال : شن تخدم ولا مكسد
هيثم : حاليا مكسد .. لكن بندور خدمة كان سخر ربي
علي كمال : من شن متخرج انت؟
هيثم : هندسة .. مكيانيكية
علي كمال : كويس
هيثم : شن وليد ما فيش اخبار عليه ؟
علي كمال : لا ما سمعت شي
هيثم : عادي نسألك !
علي كمال : خود راحتك
هيثم : شن المشكلة اللي بينكم و بين وليد !
علي كمال : علاش هو شن حاكيلك ؟
هيثم : قصدي ديما ناقم منكم و يقول اولاد عمي نابذيني و ما يحبونيش
علي كمال : و شن رايك انت ؟
هيثم : انا ما نقولش رأيي لكن هو يقول هكي .. و انا حاب نسمع منك حتى انت
علي كمال : مفيش بينا و بينه شي .. هو متوهم وحاس بالنقص يا هيثم .. و حاطنا في راسه ويقارن في روحه بينا .. انتع لاش تقارن في روحك بحد ؟ عيش حياتك انت كيف ما تشوف في روحك و تأقلم مع ظروفك اللي موجود فيها ..
هيثم : هو يقول اولاد عمي كنا مع بعض و باعوني وخلوني زي الكلب بروحي
علي كمال : صح من لما صغار و احنا مع بعض و نلعبوا وهكي .. لكن لما كبرنا كل واحد مشي في طريق و شاف حياته تلقائيا يعني ما في حد باع حد ..
هيثم : اها فهمت عليك ..
علي كمال : اهو نقولك وليد عنده الحق انه يقول اولاد عمي كل شي جاهم جاهز و فتحوا عيونهم ع الدنيا لقوا اوراحهم فلوس ايه عنده فيها الحق .. و ما نبيش نقول ان الفلوس مش كل شي لكن قسمة ربي .. يشهد عليا ربي ان ساعدناه هلبا و وقفنا معاه في هلبا عمايل يدير فيها .. لكن هو ما يهنيش في روحه .. و اخرها ان يبي يخدم معانا في الشركة لكن بوي طبعا رافض انه يخدم معانا في الشركة من عمايله .. احنا شن ذنبنا
هيثم : لكن وليد مش سيء بكل غير ان الحياة ما جتش معاه
علي كمال : انا اكثر واحد عارف ان وليد مش شخص سيء .. لكن تصرفاته هي اللي مخلياته بالشكل هذا
هيثم : الله غالب .. الله يهديه
علي كمال : اجمعين
هيثم : باهي ليه ايام مفيش حد يعرف عليه شي .. بالك صايرتله حاجة
علي كمال : مش عارف .. والله ماني عارف .. بنستنوا لغدوة و بندوروا عليه وخلاص عمي و مرت عمي في حاله ومش عارفين شن يديروا
هيثم : ان شاء الله يكون بخير
علي كمال : ان شاء الله
هيثم : باهي انت .. سامحته على اللي داره يومها فيك انت وعلي كمال ؟
علي كمال : أكيـــد لا ..
هيثم : اها ..
علي كمال : لو كنت في مكاني تسامح ؟
هيثم : مش عارف ما نقدرش نحط روحي في مكانك لكن .. صعب
علي كمال : بالضبط
........
....
نديم شوية يتفرج على التلفزيون و شوية يتصفح في نقاله في النت
و يحس بالنعاس
يدخل لغرفة النوم اول ما يدخل .. تغمض وصال عيونها وادير روحها راقدة .. يقعمز على السرير من الجهة الثانية .. ويفكر شوية
و يقيم الغطاء و يمد رجليه ويرقد في السرير و يعطي وصال يظهره و نفس الشي وصال كانت عاطية بظهرها
نديم كان راقد على طرف السرير و متوتر .. اول مرة يرقد بجنب حد
و وصال توتر هلبا و تحاول تتنفس بالشوية و الاثنين يحاولوا يرقدوا بدون ما يتحركوا هلبا
.....
.......
علاء كان في السرير سارح و يفكر في كلام في امه
نسرين : علاء ؟ وين سارح في شن تفكر ؟
علاء : لا شي .. شوية مواضيع في الشركة
نسرين : متأكد ؟ كأن في حاجة !
علاء : لالا مافي شي .. هيا ارقدي توا
.............
......
تاني يوم الصبح مع الساعة 10:30
وصال نايضة بكري ..
نديم يفيق من النوم و يقعد يشوف و يحاول يستوعب في المكان
يتلفت وراه و ما يلقاش وصال ينوض يسمع الباب يطق
يطلع من دار النوم .. تطلع وصال من الحمام
وصال : صباح الخير
نديم : صباح النور
وصال : هادوم امي و اختي اللي يطقوا اكيد
نديم : باهي افتحي ..
تمشي وصال تفتح و نديم يدخل الحمام
.....
.....
يطلع نديم من الحمام و يدخل لغرفة النوم و بعدين يطلعلهم للصالون
نديم : السلام عليكم
ألاء – فاطمة : وعليكم السلام
نديم : كيف حالك عمتي فاطمة
فاطمة : الحمد لله
نديم : ألاء شن حالك باهية ؟
ألاء : تمام بخير .. شن حالك انت
نديم : الحمد لله .. انستونا
وصال : نجيبلك فطور هنا ؟
نديم : لا لا .. تو ننزل نفطر لوطا ما تعبيش روحك
وصال : على راحتك
يطلع نديم يتلاقى هو وأمه كيف داخله
نديم : صباح الخير
خديجة : صباح النور .. الفطور واتي أونه
نديم : صحيتي
و ينزل
..........
....
رمضان خالهم يدرس قدام الفيلا و ينزل هو ومراته
مراته منال تدخل وهو يقعد واقف يشوف خالد جاي جهة الفيلا
رمضان : صباح الخير .. خيرك تعبان فيك حاجة ؟
كان خالد تعبان لان عنده السكر و متغشش على ولده وليد
خالد : مش قادر نوقف على رجليا خلاص
رمضان : غير قعمز توا ع الرصيف استريح
و يقعمز خالد .. هيثم كان طالع من فيلتهم عنده مشوار يشوفهم ويجيهم
هيثم : عمي خالك .. خيرك ان شاء الله خير ؟
خالد : متغشش على وليد و انا عندي السكر معش نتحمل
رمضان : قاعد لتوا مش معروف وينه ؟
خالد : لا ولا عرفت حتى لمن نمشي !
رمضان : لحظة خلي نجيبلك ميه ونجي
يدخل رمضان بيجيب ميه يتلاقى هو ونديم
رمضان : اسمع جيب مية لمعك خالد تعب ومعش قدر حتى يوقف بسرعة
نديم : باهي تمام
و يرجع رمضان لخالد وهيثم
رمضان : باهي بالك متعارك مع حد و ناويله الشر .. و توا لقي فرصته !
خالد : مندري .. مع من بيكون متعارك كلمت صحابه و سألتهم كلهم ما عندهمش علم
رمضان : مش عارف .. لكن ولدك مش ضارب علي كمال برصاصة بالك يكون مدايرله حاجة
هيثم : لا لا مستحيل علي كمال ما يديرهاش .. صح يومها تعاركوا هنا في الليل و هكي لكن ما اعتقدش علي كمال يديرله شي مستحيل
رمضان : اهو انت قلتها بفمك تعاركوا .. معناها مدايرله حاجة انا هكي نتوقع
.....
....
نديم ياخد شيشة مية و هو طالع من المطبخ يتلاقى هو وعلي كمال
علي كمال : وين ماشي ؟
نديم : خالي رمضان قالي عمك قدام الحوش تعبان جيب مية
و يمشولهم ..
نديم : تفضل يا عمي
علي كمال : شن ما فيش اخبار على وليد
رمضان (بصوت واطي) : مداير جو البراءة
هيثم : لا ما في شي لعند توا
و يجوا فتحي و علاء
فتحي : خالد خيرك ؟
خالد : بديت احسن .. غير مشغول على وليد .. ما خليت وين مشيت
رمضان : انا قلتلكم شوفوا مع من متعارك
خالد : ما نعرف حد متعارك معاه .. انتوا قلتوا علي كمال بس
رمضان : خلاص امالا
علي كمال : شن قصدك ؟
رمضان : ما قصدي شي .. يعني كان عندك علم وين وليد قول ما تخليش عمك في حالة
فتحي : رمضااان
علي كمال : من وين بيكون عندي علم يعني ؟ خيرك انت ؟
رمضان : مش عندك مشاكل مع وليد و صاير ضرب سلاح بيناتكم .. يعني نتوقع انك مدايرله حاجة
علي كمال يتعصب من كلامه و شاد روحه بالسيف
نديم : يا خال فوته الكلام هذا .. اللي في راسك فوته
رمضان : وعلاش ؟ بالنسبة ليا خوك علي نتوقع منه كل شي
يتعصب علي كمال اكثر من كلامه و لا اراديا يهجم على رمضان و يضربه على وجهه
علي كمال : ما دامك تتوقع مني كل شي تحمل ما يجيك
فتحي : علي كماااال
و يهجم رمضان على علي كمال لكن علاء يشد رمضان و نديم يشد علي كمال و يفرقوهم
علاء : خالك هذا يلي ما تتحشمش .. تضربه
علي كمال : لا خالي و لا نعرفه ولا يقربلي و لا نستعرف بيه يكون خالي شكل زي هذا
رمضان : خزيه عليك و انا اللي اعتبرتك زي ولد اختي
علي كمال : هههههههه .. بالله برا زيد عليا غادي قاعد محترمك راهو
نديم : علي كمال خلاص هدي روحك
رمضان : باين عليك الاحترام هلبا لدرجة تضرب خالك
علي كمال : اما خال اللي تتكلم عليه .. طول عمرك تعتبر فيا براني اما خال ؟ انت لا خالي ولا عمري اعتبرتك خالي اصلا
رمضان : اشبح اشبح .. خيرا تعمل شرا تلقى
فتحي : خلاااص .. خلاااص
شوية و تفوت سيارة كيا اوبتيما موديل 2015 من قدامهم و تمشي اتدرس قدام حوش خالد .. و ينزل منها وليد و ينحي نظاراته الشمسية اللي كان لابسهم و يشوفلهم
يشوفوله كلهم وهما متفاجئين منه
و يرجع يلبس نظارته و يدخل لحوشهم
علي كمال : هيا تفضل هذا وليد اللي خايفين عليه (يمشي علي كمال و يدخل الجنان و يقعمز ع الكرسي)
يمشي خالد يلحق وليد
و رمضان يركب سيارته و يمشي
هيثم من الصدمة يقعد واقف شوية و يمشي يطلع لمشوراه
فتحي و نديم وعلاء يدخلوا يلحقوا علي كمال
علاء: وين كان الولد ؟!
نديم : شن دخلنا فيه المهم رجع لأمه
علاء : الراجل راكب سيارة حقها 25 ولا 30 ألف من جابهم في يوم و ليلة ؟ ولا تقول وليد تاني متغير هلبا
فتحي : خليكم بعيدين منه ... اشبح اي مكايد سودة دخللها
علاء : علي كمال .. شن هذا اللي درته لخالك ؟ تضربه ؟
يوقف علي كمال بعصبية
علي كمال : علاء برا فكني منك ما نبيش نغلط فيك
علاء : شن بدير ؟
فتحي : علاء خلاص .. حتى خالك يستاهل زودها بكلامه
علاء : لكن في النهاية يقعد راجل اكبر منه
فتحي : خلاص صكر الموضوع ..
يمشوا علاء و فتحي يدخلوا الفيلا
نديم يسكت شوية و بعدين يضحك
علي كمال : خيرك تضحك ؟
نديم : نضحك عليك كيف ضربت خالي
علي كمال : هههه بالله ترا فكني منه
نديم : والله يستاهل .. مش كلام يقوله هذا تمنيتك تزيد تضربه تاني
علي كمال : علاش شديتني امالا
نديم : مش عارف .. هكي توجب .. اسمع شفت وليد شن يسوق ؟
علي كمال : يسوق حتى طيارة .. فكني منه
نديم : زعما من وين حصل فلوس في يوم و ليلة
علي كمال : شن عرفك ان السيارة ليه ؟
نديم : حق تفكير منطقي
يقعد نديم يفكر في وليد
....
...
خالد : وليد وليدي
خالد يحضن وليد .. و وليد واقف وخلاص
خالد : سالمة يا سالمة وليد جي
تجي سالمة تجري
سالمة : وليدي وليد .. (و تحضنه) وين كنت .. وين كنت .. قلبي تقطع في غيابك
وليد : قاعد يا امي .. ما عندي وين بنمشي
و بيمشي يدخل للمربوعة
خالد : شن السيارة هادي يا وليد .. وين كنت انت ؟
وليد : وين ما كنت اني جيت .. مفيش داعي للأسئلة الزايدة
خالد : تكلم باهي يا وليد .. نكلم فيك رد عليا
وليد : شن تبي ؟
خالد : جاوبني السيارة هادي لمنو ؟ شن درت ؟
وليد : درت اللي ما قدرتش اديره انت يا بوي
و يدخل المربوعة و يصكر على روحه
سالمة : خالد .. خليه توا ما تضغطش عليه ما صدقنا روحلنا بخير وسلامة
خالد : لا حول ولا قوة الا بالله
........
...
تدخل ألاء و وصال لدار النوم
ألاء : اي احكيلي .. شكله نديم يعامل فيك كويس
تقعد وصال ساكتة بدون كلام
ألاء : شن في ؟ احكيلي
وصال : عرفت ان نديم كان رافض يتزوجني
ألاء : شنو؟ من وين عرفتي ؟
وصال : مش مهم من وين عرفت ... تعرفي اول ليلة هو رقد في الصالون و انا رقدت هنا
ألاء : تبصري !! كيف هكي .. علاش زعما ؟
وصال : مش عارفة
ألاء : زعما كان يبي وحدة تانية قبلك ؟
وصال : ما اعتقدش .. كان هذا راهو عرفنا
ألاء : امالا شنو !
وصال : ما نعلمش .. ما عرفتش كيف نتصرف معاه
ألاء : اسمعي خودي نصيحتي .. اهتمي بيه تو مع الوقت يتعود عليك
وصال : كيف يعني ؟
ألاء : يعني ما تخافيش حتى لو كان رافض منك الزواج شن فيها .. ما هو حتى انتي كنتي رافضة تتزوجيه
وصال : باهي وبعدين لوين تبي توصلي
ألاء : يعني باش تكسبيه لصفك .. اهتمي بيه ودلليه
وصال : فكيني منه الكلام هذا .. وهيا نطلعوا مش حلوة هما البرا واحنا هنا نهدرزوا
و يمشوا يطلعوا لفاطمة و خديجة و نسرين و سلمى و يهدرزوا عليهم
....
...
يفوت النهار عادي
بعد العشاء :
هيثم يتصل بسلمى و يهدرزوا
سلمى : وين انت ؟
هيثم : ماشي بنروح بأمي و هبة من حوش خوالي
سلمى : اها باهي قالتلي هبة بنمشوا لحوش خوالي
هيثم : ايه .. شن الوضع عندكم
سلمى : بخير .. علاش شن في ؟
هيثم : لا شي ..
سلمى : اووف .. نحس في روحي مخنوقة قداش ليا ما طلعتش و فادة
هيثم : اسمعي .. انا وصلت توا .. لما نروح تو نكلمك
سلمى : باهي تمام
......
...
خديجة تدور فرصة و تستفرد بـ علاء
خديجة : ها قولي .. شن صار معاك ؟ شن فكرت
علاء : فكرت .. و ما نبيش نتزوج
خديجة : طيح سعدك .. اسمع كلام امك .. شفتلك وحدة في عرس نديم تههبل يا علاء احلى من مرتك بستين مرة .. بنت صاحبتي
علاء : يا امي فكيني كان تسمع نسرين تديرلي العار
خديجة : و كان سمعت ؟ انت الراجل ولا هي .. كلمتك هي اللي تمشي عليها علاش خايف منها
علاء : مش خوف هو لكن ..
خديجة : لا لكن لا شي .. البنت ما شاء الله عليها .. تجيبلك عيل يحمل اسمك .. هيا قول موافق نمشوا من غدوة نخطبوها
علاء : نقولوا اني وافقت .. وين بنسكنها ؟ فوق راسي ؟
خديجة : ما ادورش خود جناح علي مؤقت .. اكيد مازال موضوع الزواج مش في راسه الباين
علاء : مش عارف يا أمي ..خليني نزيد نفكر
خديجة : فكر على مهلك .. المهم تقول باهي
......
......
علي كمال في غرفته يصلح في الاوراق و يدخل عليه نديم
نديم : شندير ؟
علي كمال : شوفت عينك .. انت شن ادير هنا
نديم : علاش ؟
علي كمال : طول النهار مسيب مرتك و حتى توا
نديم : شن فيها يعني
علي كمال : لا مافيها شي .. غير عيب في حق مرتك
نديم : اصلا بنمشي نرقد .. غدوة خدمة في الشركة
علي كمال : خدمة شن و انت قاعد عريس ؟
نديم : خوك علاء تكدست عليه الخدمة بروحه .. وعدته تو نجيه بعد العرس
علي كمال : لالا انت ما تمشيش .. تو نمشي انا اصلا خلاص كملت محاضرات ومعش في كلية عطلة توا
نديم : لا عادي تو نمشي حتى انا
علي كمال : قلت لا انا خوك اكبر منك
نديم : ههه باهي باهي
يطلع نديم من غرفة علي كمال و يدخل لغرفته و يتفحصها بعيونه و ينطرح على سريره شوية و كأنها مستحاشها .. وبعدين يطلع و يمشي لجناحه .. ونفس الشي يفتح التلفزيون ويتفرج
.....
..
يرن نقال علي كمال و يرد
ندى : علي كمال .. وينك النهار كله ما تردش
علي كمال : كنت مشغول ما فضيتش
ندى : اها باهي .. طمني مرة تانية حتى برسالة
علي كمال : ان شاء الله .. ندى
ندى : نعم
علي كمال : مشغول توا نصلح في الاوراق .. وبعدين بنرقد نحس في روحي تعبان
ندى : تمام على راحتك
علي كمال : تصبحي على خير
ندى : و انت من اهل الخير
يصكر .. وندى تقعد مستغربة من تصرفاته
......
..
تمشي وصال لنديم في الصالون
و تفاجأه بسؤالها
وصال : نديم
نديم : نعم
وصال : خيرك تعامل فيا هكي ؟
.....
....
هيثم : ألو حبي
سلمى : نعم ؟
هيثم : تقدري تجي بسرعة لفيلتنا ؟
سلمى : لا لا علاش شن في ؟
هيثم : هبة مريضة شوية .. تعالي شوفيها
سلمى : خيرها
هيثم : مش عارف تعالي
سلمى : باهي شوية ونجي
...
...
نديم : كيف يعني ؟
وصال : متجاهلني.. في حاجة ؟
نديم : لا مافي شي .. ومش متاجهلك هكي طبعي
وصال : لا مش هكي طبعا
و يقعد نديم ساكت
وصال : معناها الكلام صح انك كنت رافضني
نديم : انتي من قالك ؟
وصال : عرفت وخلاص ..
نديم : صح
وصال : وباهي علاش متزوجني كان هذا
نديم : تقدري تقولي الظروف
تتعصب وصال شوية و تدخل لغرفة النوم
نديم : اوووف يا نديم اووف
....
..
توصل سلمى لفيلا هيثم .. تدخل للجنان
و هيثم يطلع من وراها
هيثم : بس
سلمى : بسم الله خلعتني
هيثم : سلامتك
سلمى : خيرها هبة .. وينها ؟
هيثم : نبصر عليك .. ما فيها شي انا نبيك
سلمى : شن تبيني ؟
كان هيثم حاط يديه الزوز ورا ظهره .. وبعدين يطلع كيسة و يعطيها لسلمى
سلمى : شن هذا ؟
هيثم : شوفي بروحك
تاخد سلمى الكيسة و تفتحها تلقاها كيسة معبية شكاليط (شوكلاطة) اشكال و انواع
سلمى : الله .. شن المناسبة ؟
هيثم : مش قلتي متضايقة .. حبيت نفرحك شوية
سلمى : الله محلاااك .. بجد صحيت
هيثم : تاكليهم بالهناء .. وهيا توا بري روحي معش تعطلي اكثر من هكي .. تو نتكالمو ع الوتسأب
سلمى : باهي تمام
تقرصله خده بإيدها وتطلع و يقعد يشوفلها هيثم لعند ما تدخل
.....
...
نسرين : خيرك حتى اليوم سارح .. شن فيك ؟
علاء : لا ما فيا شي .. قلتلك من الخدمة
نسرين : نعرفك مزبوط يا علاء .. مش من الخدمة .. في حاجة تانية شاغلاتك قولي شن هي
علاء : قلتلك ما في شي علاش تضغطي عليا
نسرين : تعرف ما تقوليش .. عارفني انا شن ندير
و تقعد نسرين تضغط على علاء باش يقوللها
نسرين : هيا قولي بسرعة
علاء : امي تبي تزوجني
نسرين تنصدم
نسرين : نعم ؟ شن قلت ؟ ما سمعتش عاود
علاء : زي ما قلتلك .. امي تبي تزوجني مرأة تانية ؟
نسرين : علاء ؟ شن تقول انت ؟
علاء : تبي تعرفي اهو عرفتي
نسرين : علاش ؟ عع علاش تبي تزوجك ما فهمتش ؟!
علاء : تبيني يجوني صغار
نسرين : قصدك تبي تزوجك على خاطر الصغار
و يحكيلها علاء كل شي وتقعد نسرين مصدومة ومش مصدقة وتبكي
نسرين : اطلع ما ترقدش بحداي اليوم
علاء : اووف منك اوووف .. قلتلك انا مستحيل نتزوج عليك
و يطلع يرقد في الصالون و يخليها
.....
..
ينوض نديم يصكر التلفزيون و يدخل لغرفة النوم ونفس الشي يرقد على طرف السرير
....
....
تاني يوم الصبح
الساعة 10 :
تفيق وصال و تقرر تسمع كلام اختها ألاء
تنزل للمطبخ تحت و تجهز سفرة فطور وترفعها لجناحهم و تحطها في الصالون
و تاخد البخارة و تولع البخور و تبخر وسط الحوش وبعدين تدخل بيه لغرفة النوم وتحطه يبخر
و بعدين تاخد ملابسها و تدخل الدوش .. و نديم قاعد راقد
.....
...
يدخل علي كمال للمطبخ يلقى سلمى ونسرين وخديجة
خديجة : علي وينك ؟
علي كمال : صباح الخير .. تاخرت راحت فيا نومة
خديجة : خيرك رقدت موخر ؟
علي كمال : ايه قعدت نرصد في الدرجات وعطلت
خديجة : باهي .. بوك و علاء من بكري مشوا .. وقالك بوك الحقنا في هلبا خدمة
علي كمال : باهي
نسرين : سمعت يا علي كمال ؟
علي كمال : شن بنسمع ؟
نسرين : ...........
.........
....
يطلع وليد بيركب سيارته
و قبل ما يركب يلمح هيثم في جنانهم ويشرب في قهوة ..يقرب منه
هيثم شاد نقاله و يبعث رسالة لسلمى ع الواتسأب
"هيثم : صباح الخير يا قلبي"
وليد : صباح الخير .. ما نحصلوش قهوة ؟
هيثم : اهلين تفضل .. في قهوة
يدخل وليد و يقعمز في الكراسي
هيثم : خلي ندخل نصبلك قهوة ونجي
وليد : تمام
يحط هيثم فنجان القهوة و نقاله ع الطاولة ويدخل
و شوية توصل رسالة من سلمى لهيثم
"سلمى : صباح النور (مع قلب حب)"
يشوف وليد للنقال و يلقاه قاعد مفتوح
ياخد النقال بإيده و يشوف الرسايل كلها اللي بين هيثم وسلمى
يطلع نقاله و يصور المحادثة
.....
...
نديم كان راقد و يحس بإختناق و يتنفس بصعوبة
يفتح عيونه يلقى الدار معبية دخان البخور .. يحس في نفسه يبدا يضيق و يهرب منه ينزل من السرير و كان ماشي بيفتح الروشن
لكن يطيح على ركابه و يبدا يكح بقوة و مش قادر يتنفس
......
.....
نسرين : سمعت يا علي كمال ؟
علي كمال : شن بنسمع ؟
نسرين : أمك قررت تزوج علاء مرة تانية
علي كمال (باستغراب) : و باهي ؟
خديجة : مشي مشي و قالك ماهو
نسرين : ايه بيقولي مش مرته انا .. بدل ما تفكري تزوجي علاء تاني وتجيبيلي ضرة .. خيرك ما تفكريش بعلي كمال و تزوجيه حتى هو زي ما زوجتي علاء و نديم .. ولا على خاطر علي كمال مش ولدك !
خديجة : انتي ما ليكش علاقة .. ندير اللي انا نبيه .. علي ما ادورهاش شن تقول هادي
علي كمال : وعلاش ؟ كلامها مش صح ؟
نسرين : وتعرف شنو تاني ولا ... مقررة انها تزوج علاء في جناحك انت
علي كمال يقعد مصدوم من كلام نسرين .. وحس انه رجع لنقطة البداية وموضوع خديجة وتفريقها بينه و بين اولادها
............
ما تنسوش تعطوني رأيكم
و صوتوا و حطوا نجمة (vote) للبارت و ادعموه القصة
و شكراا على تعليقاتكم الجميلة