أولا وقبل كل شي
اسف جدا ع التأخير .. صارتلي لخبطة في الأيام فكرتها مفروض اليوم تنزل
و هي كان لازم تنزل امس الحلقة .. اسف جدا
عوضتكم بـ بارت طويل هلباا
.....
#متلازمة_عائلتي
#الحلقة 14
............................................
يطلع علي كمال و يركب سيارته و هي تقعد في مكانها تشوفله و حتى هو يشفولها
و بدون تفكير يولع سيارته و يمشي و يخليها
....
.....
تبدا تفكر وتفكر وتربط في الاحداث وفجأة تذكر ان سالمة كانت تبي تخطب وصال لـوليد
نسرين : زعما هذا علاش ! .. مفيش شي تاني خطر في بالي
نديم : شن هو ؟ شن تعرفي انتي ؟
نسرين : مش متاكدة لكن في سبب
نديم : اللي هو ؟
نسرين : عمتك سالمة ام وليد قبل .....
و تدخل سلمى و تقاطلعهم
سلمى : نسرين هيا وين الشاهي .. بوي يسأل عليه
نسرين : اهو واتي هي
و ترفع نسرين الشاهي و تلحقها سلمى و نديم يقعد يفكر ويضربه الفضول
....
......
تنوض ندى من مكانها و تمسح دموعها و تدخل للبيت
نجاة : ت وين كنتي انتي ؟
ندى : هنا في المربوعة كنت نرتب فيها
خليفة : شفتي استاذك شن دار .. ما شاء الله عليه راجل اصيل
نجاة : ايه فرحني هلباا ربي يحفظه لاهله و ناسه
خليفة : اي والله .. رفض ياخد نص البيت و دار راي كويس
تبتسملهم ندى و تدخل لغرفتها و تصكر على روحها
..........
...............
شوية و يروح علي كمال و يدخل يسلم عليهم و بعدين يدخل لغرفته و يلحقه نديم
نديم : خيره جوك بلهون ؟
علي كمال : لا ما في شي .. تعبان بس
نديم : شن صار معاك ؟
علي كمال : لقيته مجهز اوراق بيكتبلي نص الحوش بإسمي
نديم : بجديات ؟ اكيد رفضت ولا
علي كمال : اكيد شن ما تعرفنيش .. المهم خليته يوقع على ورقتي بعد جهد جهيد
نديم : احسن شي ..
علي كمال : خيرك انت ؟ باين في حاجة شاغلاتك !
نديم : ايه صح
علي كمال : شن هي ؟
نديم : نسرين كانت بتقولي علاش وليد عنده معاي مشكلة و سلمى قاطعتنا
علي كمال : كيف ؟ ما فهمتش علاش نسرين بتقولك هي ؟
نديم : لقيتها في المطبخ و فتحنا موضوع وليد وهكي و بدت تفكر شن السبب اللي يخلي وليد يهجم على الحوش يوم الخطبة
علي كمال : وباهي ؟
نديم : مش عارف بعدين قالت في سبب لكن مش متأكدة .. كيف قالت ان مرت عمك سالمة و دخلت سلمى ما كملتش
و علي كمال على طول يتفكر ان وليد قاله ان امه قبل تبي تخطبله وصال
نديم : شن قولك انت ؟
علي كمال : مش عارف لكن فوتها اكيد نسرين تخرط
نديم : نسرين ؟ تي عقلها زي السم تشبح فيها مفيش حاجة تفوت عليها
ESTÁS LEYENDO
متلازمة عائلتي (رواية ليبية)
Fanficمفيش انسان معصوم من الأخطاء مفيش انسان كامل .. بعيدا عن روايات المراهقين رواية ليبية واقعية ممزوجة بالخيال مشوقة رواية تحكي عن العائلة و مشاكل العائلة و اسرارها والحب في حياة كل شخص فيها شخصيات مميزة و احداث قوية ..
