بدون ما نعطل عليكم :
#متلازمة_عائلتي .. للكاتب : عبدو
#الحلقة 16
...............................
نديم كان راقد و يحس بإختناق و يتنفس بصعوبة
يفتح عيونه يلقى الدار معبية دخان البخور .. يحس في نفسه يبدا يضيق و يهرب منه ينزل من السرير و كان ماشي بيفتح الروشن
لكن يطيح على ركابه و يبدا يكح بقوة و مش قادر يتنفس
......
.....
نسرين : سمعت يا علي كمال ؟
علي كمال : شن بنسمع ؟
نسرين : أمك قررت تزوج علاء مرة تانية
علي كمال (باستغراب) : و باهي ؟
خديجة : مشي مشي و قالك ماهو
نسرين : ايه بيقولي مش مرته انا .. بدل ما تفكري تزوجي علاء تاني وتجيبيلي ضرة .. خيرك ما تفكريش بعلي كمال و تزوجيه حتى هو زي ما زوجتي علاء و نديم .. ولا على خاطر علي كمال مش ولدك !
خديجة : انتي ما ليكش علاقة .. ندير اللي انا نبيه .. علي ما ادورهاش شن تقول هادي
علي كمال : وعلاش ؟ كلامها مش صح ؟
نسرين : وتعرف شنو تاني ولا ... مقررة انها تزوج علاء في جناحك انت
علي كمال يقعد مصدوم من كلام نسرين .. وحس انه رجع لنقطة البداية وموضوع خديجة وتفريقها بينه و بين اولادها
............
يحط هيثم فنجان القهوة و نقاله ع الطاولة ويدخل
و شوية توصل رسالة من سلمى لهيثم
"سلمى : صباح النور (مع قلب حب)"
يشوف وليد للنقال و يلقاه قاعد مفتوح
ياخد النقال بإيده و يشوف الرسايل كلها اللي بين هيثم وسلمى
يطلع نقاله و يصور المحادثة
...
يحط وليد النقال بعد ما يصور المحادثة و يجي هيثم
هيثم : هيا تفضل القهوة
وليد : صحيت ..
هيثم : ايه احكيلي ! وين كنت غايب ؟ انشغلنا عليك
وليد : من اللي انشغل عليا
هيثم : كلنا .. بوك و أمك و أنا و أولاد عمك
وليد : هه .. اولاد عمي !
هيثم : طلعت انت اللي هجمت عليهم يومها ؟
يقعد وليد ساكت
هيثم : بسلاح بوي اللي عطيتهولك عشان تصلحه .. صح ولا ؟
وليد : ايه
يحط هيثم إيده على جبهته
هيثم : اخ يا وليد اخ .. علاش وكيف ؟ شن السبب ؟
وليد : هيثم .. كنت سكران مش على وعيي .. أساسا كنت بنوليلهم شفتك انت جيتهم .. وخلاص صكر عليا هذا الموضوع
هيثم : باهي علاش.....
وليد : تعبت من الأسئلة يا هيثم من نفس الموضوع .. اللي عرفته ياسر
هيثم : أولاد عمك مش سيئين يا وليد
وليد : حتى انا مش سيئ يا هيثم....
هيثم : هدي روحك .. عارفك والله عارفك و أولاد عمك عارفينك.....
وليد : فوته الموضوع هذا خلاص صكره
هيثم : باهي ما تبيش تقولي وين كنت ؟
وليد : كنت ناخد في راحة شوية
هيثم : والسيارة ؟
وليد : ليا .. شريتها
هيثم : ما نبيش نحرجك لكن .. السيارة حقها في حدود الـ30 ألف
وليد : انا لازم نمشي عندي مشوار ضروري
أنت تقرأ
متلازمة عائلتي (رواية ليبية)
Fanfictionمفيش انسان معصوم من الأخطاء مفيش انسان كامل .. بعيدا عن روايات المراهقين رواية ليبية واقعية ممزوجة بالخيال مشوقة رواية تحكي عن العائلة و مشاكل العائلة و اسرارها والحب في حياة كل شخص فيها شخصيات مميزة و احداث قوية ..
