ما تنسوش تحطوا نجمة (vote) و تعطوني رأيكم في التعليقات
حلقة طويلة .. كتعويض
#متلازمة_عائلتي
الحلقة_13
ــــــــــــــــــــــ
نديم : شن تقول انت ؟ علاش ما حدش قالي
علاء : ما صارتش فرصة نخبروك .. وبوك كان يستنى في وضع علي كمال شن ..
نديم : امتى ؟ امتى حددوه ؟
علاء : الخميس متع الاسبوع الجاي ؟
تزيد نديم صدمته و يحط ايديه على راسه
علاء : علاش متفاجأ انت لهالدرجة
نديم(بعصبية) : من جدك تتكلم ؟ كيف ياخدوا قرار عليا بدون ما حد يقولي علاء : هدي روحك .. توا اللي صار صار
نديم : قاعد يقول اللي صار صار
علاء : ما تبيش تتزوج انت ولا شن ؟ مفروض تفرح انت
نديم : ايه ما نبيش نتزوج باهي ؟ شن ليكم علاقة تاخدوا قرار عليا .. و زواج تاني
...
.....
نسرين : علاش ما تبوش تقولوا ان وليد هو اللي هجم يومها على الفيلا و ضربك برصاصة ؟
يتفاجأ علي كمال من سؤالها و يقعد يشوفلها بصدمة
نسرين : خيرك سكتت ؟
علي كمال : من قالك انتي ؟
نسرين : معناها كلامي صح ولا كنت عارفه والله
و هنا علي كمال من كلامه زاد أكدلها
علي كمال : مفيش منها الدوة .. شن دخل وليد .. وليد ماليشي علاقة بشي
نسرين : خلاص معش تقدر ترقعها .. ايه ما جاوبتنيش .. علاش ؟
علي كمال : علاش شن ؟
نسرين : علاش ما تبوش تقولوا وليد سبب العملة
علي كمال يسكت شوية
علي كمال : فوتي الموضوع ما تدخليش فيه .. حاجة بيني وبين وليد و يا ريت ما تقولي لحد رجاء
نسرين : اساسا مش حنقول لحد
علي كمال : أكيد ؟
نسرين : اكيد اكيد سر عندي .. حتى لعلاء مش مقايلة
علي كمال : باهي .. تصبحي على خير
ياخد مالقي المية و يمشي لغرفته
نسرين : مش حنقول الا تطلب الموضوع اني نقول هههههه .. وهادي ورقة رابحة تانية .. ما نبيش نضيعها زي ما عرفت ان علي كمال مش ولد خديجة
و تاخد العشاء و تركب لجناحهم
........
.............
نديم : ايه ما نبيش نتزوج باهي ؟ شن ليكم علاقة تاخدوا قرار عليا .. و زواج تاني
علاء : راك معش صغير باش تقول ما نبيش نتزوج
نديم : شن ليك علاقة بيا نتزوج امتى ما نبي انا
علاء : خلاص قول الكلام هذا لبوك غدوة و شوف ردة فعله بعدين
يتعصب نديم و يدخل للفيلا و يسيبه
علاء بعد ما مشي نديم يولع دخانه .. لانه ما يدخنش قدام نديم معروفة مشكلة صدره ما يتحملش
.......
..........
يوصل نديم لقدام غرفته و قبل ما يدخل يطلع علي كمال من غرفته
علي كمال : نديم تعالى بسرعة
و يدخلوا لغرفة علي كمال و يصكرها بالمفتاح
نديم : خير شن في ؟
علي كمال : خيرك معصب ؟
نديم : بالله ترا فكني .. طلعوا قاريين الفاتحة و محددين العرس الاسبوع الجاي
علي كمال : فاتحة من و عرس من ؟
نديم : من جدك انت ؟ عرسي انا يا علي كمال
يضحك علي كمال ضحكة هزوة
علي كمال : حركات بوك المعتادة .. لما يوم الخطبة قلتله انك معش تبي تتزوج حط الموضوع في راسه و قرر انه يستعجل بالموضوع باش معش يبدا عندك مهرب
نديم : و باهي و انا شن ندير توا يا علي كمال ؟ كيف نقنع بوي ؟
علي كمال : ههه بوك و الاقناع ؟ اكثر حد دماغه مقفل ممكن تشوفه في حياتك هو بوي .. كان نوي على موضوع يديره يديره ماهو انت عارفه
نديم : بالله عليك ما تزيدهاش عليا انت التاني .. بدل ما تطمني
علي كمال : انا نقولك في الواقع
نديم : اسمع انا مش صغير باش ياخدوا عليا قرار الزواج .. سايرتهم في الخطوبة ياسر غدوة بنوقف قدام بوك و بنقوله واللي بيصير خلي يصير
علي كمال : ما ننصحكش لكن دير رايك .. لكن انت علاش ؟ رافض فكرة الزواج ولا المشكلة في وصال ؟
نديم : مش عارف .. لكن تقدر تقول وصال !
علي كمال : خيرها البنت ؟
نديم : المشكلة الاولى اللي صارت و كيف قبل كانوا بيخطبوها لك و كل شي
علي كمال : يا نديم خلاص هذاكا موضوع و تصكر و زايد .. و موضوع اللي قال عليه علاء انها اتصلت بيا في الليل .. راهو كانت تسأل شن صاير عندنا في الحوش و علاش صارت اللخبطة بينك وبيني .. يعني البنت كانت بس تستفسر لان لا سلمى و لا جميلة قالولها حاجة وحتى انهم ما ردوش عليها و خبروها بشي
نديم : ما فيش داعي انك تقولي انا واثق فيك اصلا يا علي كمال
علي كمال : حبيت نوضحلك بس
نديم : ومع ذلك قاعد دماغي ملخبط
علي كمال : كان نقولك شن في .. تو يزيد يتلخبط اكثر
نديم : حقا شن في ؟ ناديتني و كأنك بتقولي حاجة !
علي كمال : مرت خوك نسرين
نديم : خيرها
علي كمال : تعرف ان وليد هو صاحب العملة
نديم : شنوو ؟ كيف صار ؟
علي كمال : مش عارف يا نديم .. دخلت للمطبخ بنعبي مية لقيتها و قالتلي خيركم ما تبوش تقولوا ان وليد هو اللي هجم عليكم
نديم : شن عرفها هي ؟ كيف عرفت
علي كمال : مش عارف
نديم : المرأة هادي جن جن .. توا غدوة تفضح الموضوع كله
علي كمال : قالت مش حنقول شي
نديم : ت كان تقول حاجة نكسرلها راسها
علي كمال : عيب مرت خوك .. شن مقايلك انا ؟
نديم : باهي حاضر .. توا كيف الراي ؟
علي كمال : مفيش راي .. اصلا شن فايدتها لو قالت اصلا
نديم : لحظة احنا علاش خايفين ؟ حتى لو قالت خلي ينفضح الوسخ وليد في العيلة
علي كمال : ما تنساش حتى احنا بنطلعوا كذابين قدام العيلة
نديم : ساهل موضوعنا احنا
علي كمال : يستر الله
نديم : خليني نحل مشكلتي و بعدين ساهل
................
.............
تاني يوم الصبح :
العيلة مقعمزة على سفرة الفطور
علاء و فتحي و خديجة و سلمى و نسرين
نديم في غرفته يفكر
نديم : لازم نواجهه اليوم خلاص .. معش صغير انا
يمشي نديم للمطبخ يلقى العيلة يفطروا .. يوقف بحدا بوه
فتحي : خيرك وقفت على راسي قعمز افطر
نديم : في موضوع نبي نحكيهولك
فتحي : افطر و بعدين ساهل
نديم : لا توا
خديجة : خيرك شن في ع الصبح ؟
نديم : لا مافي شي .. غير سمعت انكم حددتوا موعد عرسي و قرتوا الفاتحة
فتحي : و باهي ؟ عندك مشكلة ؟
نديم : كيف تاخدوا قرارات عليا بدون ما تاخدوا رايي !
فتحي : فعل الخير ما يستناش .. كل ما عجلنا كل ما احسن وبعدين انت مش صغير
يجي علي كمال من غرفته و يقعد واقف يشوفلهم
علاء : حتى انا قلتله يا بوي معش صغير
بخبط نديم ايده على الطاولة
نديم : انت ما ليكش علاقة يا علاء ما تدخلش
فتحي : احترم نفسك و احترم النعمة اللي ع الطاولة ... انت علاش تحاسب فينا توا شن تبي بالزبط ؟
نديم : انا الزواج ما نبيش نتزوج
يوقف فتحي و يقعد يشوفله
نديم : ايه زي ما سمعت ما نبيش .. يا ريت تخبر عمتي و تقوللها معش نبوا بنتكم
فتحي : و الله ؟
نديم (بعصبية) : شن هو بالسيف الموضوع ؟ انا مش عيل صغير باش تزوجوني بالسيف سايرتكم في الخطبة ساد و كان متحشم من عمتي هذاكا موضوعك ما يهمنيش انا
يتعصب فتحي من كلام نديم و في لحظة بيرفع ايده بيضرب نديم .. نديم ينزل راسه و يصكر عيونه
علي كمال (بصوت عالي) : بابا ..
يوقف فتحي و يشوفوا كلهم لعلي كمال
علي كمال : مش كل شي ينحل بالضرب (و يتذكر لما فتحي ضربه كف هاديكا الليلة) خير ما تخسر ولد تاني
علاء : هدي روحك يا بابا
فتحي ( يشبح لنديم ) : هما كلمتين .. يا بتتزوج بنت عمك و انت ساكت يا انا لا بوك ولا نرعفك و لا الحوش هذا عيلتك
يتفاجأ نديم من كلامه و وجهه ما يتفسرش ولسانه بتربط
فتحي : يومين و الاثاث متع جناحك يوصل تكلمت مع شركة و بيهتموا بكل شي .. و من رأيي ابدوا في تحضيرات العرس
نديم يمشي لغرفته و يلحقه علي كمال
فتحي : علاء هيا الحقني للشركة
نسرين تأشر لعلاء بعيونها بمعنى قوله
علاء : بابا .. اليوم مش جاي للشركة
فتحي : علاش شن المناسبة ؟
علاء : بنطلع انا و نسرين شوية
فتحي : وين بتمشوا
علاء : بنغيروا جو شوية قداش لينا معش طلعنا
فتحي : وقته الكلام هذا توا ؟ انا طالع للشركة .. شوية و الحقني و اطلعوا يوم تاني
علاء : حاضر
و يشوف لنسرين بمعنى الله غالب ويمشي ورا بوه .. و نسرين تتضايق و تتعصب و تركب لغرفتها
خديجة : ما نرتاحوش يومين الا ما تصير مشكلة تانية في هالحوش
سلمى : الله غالب
...........
........
يدخل نديم لغرفته و ياخد بخاخ الاكسجين و يبخ منه
نديم : شفته ولا ؟ شفته كيف يضغط عليا
علي كمال : واضح من الاول هكي بيصير .. مستحيل بوك ترجعله كلمة و بالذات مع اخته
نديم : مش على حسابي انا
علي كمال : شن مازال بدير اكثر من هكي اصلا ..
نديم : مش عارف مش عارف
علي كمال : كل ما عارضت اكثر كل ما انضغطت اكثر انت .. معش عندك مهرب توا
و يقعد نديم ساكت
نديم : وين ماشي انت ؟ لابس و متكم ؟
علي كمال : بنمشي الكلية
نديم : وين وين ؟ مازال جرحك جديد
علي كمال : ما يصير شي اصلا مش عاطي محاضرة بنمشي المكتب في اوراق بناخدهم بنجهز الاسئلة .. مش معطل
نديم : باهي رد بالك .. كان صارت معاك حاجة كلمني
علي كمال : تمام
........
..................
ندى في الكلية هي و ليلى مقعمزين في ساحة الكلية يهدرزوا
ندى : مشغولة عليه هلبا يا ليلى .. من يوم المستشفى معش تواصلت معاه .. معش ندري على حاله شن
ليلى : قلتلك ما دام عندك رقمه كلميه
ندى : ما نقدرش شن بنقوله ؟
ليلى : انتي مشيتيله للمستشفى و توا متحشمة من مكالمة ؟
ندى : اصلا مش عارفة كيف درت هكي يومها ..
ليلى : هو في حد يحب استاذه ؟ مهبولة انتي ؟
ندى : بالله شن ؟ توا جاية تقوليلي الكلام هذا ؟ كان في مكاني راهو طايحة على خشمك قداش ليك
ليلى : لا الحمد لله ما طحتش .. دوري شن يحزها بعدين
ندى : خلينا في الجديات توا .. شن ندير ؟ اليوم مية في المية مش حيجي الكلية
ليلى : كلميه في عندك حالي تاني اصلا ؟
ندى : بصفتي شنو ؟ يا بنت بالك يكون مرتبط
ليلى : يا حليلك كان هذا .. رحتي فيها
ندى : اسكتي معش تخوفيني
شوية و يخش علي كمال من باب الكلية .. تشوفه ليلى
ليلى : حي أهو جي ؟
ندى : من ؟
و تتلفت و تشوف علي كمال و تبان الفرحة من عيونها لانها ما كانتش متوقعة تشوفه اصلا
ليلى : اضربي هي من زيـك شفتيه مرة وحدة مش بس سمعتي صوته
تقعد ندى ساكتة و تراقب فيه بعيونها لعند ما دخل داخل
ليلى : نكلم فيك وين مشيتي ؟
ندى : قاعدة قاعدة
ليلى : لا واضح
..........
.............
سلمى : ماما .. بنمشي لهبة بنغير جو شوية .. خلوقي ضاقوا
خديجة : باهي بري و ما تعطليش
سلمى : حاضر
...
وليد يطلع من مربوعتهم و بيمشي لهيثم يشوف سلمى طالعة من فيلتهم و ماشية لفيلا هيثم
توصل سلمى و تلقى الباب مفتوح و تدخل ..
تلقى هيثم مقعمز في الجنان في الطاولة و الكراسي و حاط راسه في النقال
يوصل وليد و يشوفلهم من الباب
سلمى : السلام عليكم
يرفع هيثم راسه
هيثم : اهلين .. وعليكم السلام
سلمى : كيفك ؟
هيثم : بخير .. كيفك انتي ؟
سلمى : تمام ..
هيثم : كيف حال خوك علي ؟
سلمى : الحمد لله احسن بهلباا
هيثم : كويس
سلمى : هبة قاعدة ؟
هيثم : ايه موجودة .. تلقيها في المطبخ على اساس تطيب في كيكه
سلمى : ههههه .. تمام
و دخلتلها و يقعد يراقب فيها لعند ما تدخل يتلفت يلقى وليد واقف قدامه
وليد : وين سرحت ؟
هيثم : لا شي .. شن الجو ؟
وليد : ماشية اهو شن جوك انت ؟
هيثم : بخير .. قعمز هدرز
ويقعمز قدامه
وليد : سلمى بنت عمي جتكم ؟
هيثم : ايه جت لأختي
وليد : كويس ..
يقعد ساكت شوية
وليد : شكلها عاجباتك ؟
هيثم : من ؟ سلمى ؟
وليد : ايه
....
سلمى تدخل لهبة في المطبخ
سلمى : انا جيت
هبة : حححي .. احلى من يجي نورتي
سلمى : منور بأهله .. قالوا اديري في كيكه
هبة : من قالك ؟
سلمى : تلاقيت انا و خوك هيثم وهو قالي
هبة : ايه صح كيف حطيتها في الكوشة
.....
هيثم يتوتر شوية
هيثم : لا مفيش شي
وليد : تقدر تحكيلي .. ما تخافش خود راحتك زي خوك .. في اعجاب ؟
هيثم : مم .. مش عارف لكن في ع الاغلب
وليد : ايه واضح عليك اصلا
هيثم : كيف ؟
وليد : نزبط انا ..
هيثم : اها باهي .. و باهي هي ؟ عندك علم اذا كانت مخطوبة ولا حاجة ؟
وليد : لا لا اتطمن .. نستأذن انا بتمشي
هيثم : قعمز هدرز خيرك ؟
وليد : لا لا تفكرت مشوار توا كنت ناسيه
و يمشي
............
.............
علي كمال في مكتبه يشوف و اوراق و يرتب فيهم
و فجأة يطق الباب
علي كمال : ادخل
و تدخل ندى و هي متوترة
ندى : مرحبا
علي كمال : اهلين ندى
ندى : كيف حالك استاذ علي كمال
علي كمال : الحمد لله و انتي ؟
ندى : بخير .. كيف حال جرحك ؟
علي كمال : كويس احسن بهلبا .. يتعب مرة مرة لكن عادي
ندى : سلامتك ان شاء الله ..
علي كمال : تسلمي
يسكتوا شوية و علي كمال يحط في اوراق في الشنطة متعه و ندى تشوفله
ندى : مفيش محاضرة اليوم ولا في ؟
علي كمال : لا معش في محاضرات .. اكتفوا بالمنهج اللي عطيتهولكم
ندى : تمام مشكور ..
علي كمال : جاهزين للامتحانات
ندى : اي ان شاء الله ..
علي كمال : باهي كويس
ندى : حبيت نسأل و نطمن عليك
يبستم علي كمال و يشوفلها
علي كمال : شكرا ليك ..
ندى : بوي يتصل بيك .. يبي يشوف شن بيدير في موضوع الفلوس
علي كمال : حاضر تو نرد عليه
ندى : تمام
شوية تلاحظ ندى بقعة على سوريه علي كمال في مكان الجرح تحت الجاكيت متعه .. و تقرب منه بسرعة
ندى : استاذ علي .. جرحك ينزف
يشبح للجرح و ندى تقرب منه وهي خايفة
ندى : لازم تمشي تعاينه بسرعة
يلاحظ علي كمال الخوف على وجهها و يقعد يشوفلها وخلاص
ندى : ما تسمعش فيا ؟ لازم تمشي المستشفى تكشف على جرحك !
علي كمل : اه لا لا .. مش مشكلة تو نشوفه في البيت
ندى : استعجل كان هذا
علي كمال : حاضر .. خبري الطلاب كلهم ما تنسيش
ندى : تمام تمام
.....
............
وصال طالعة هي و اختها و امها يشوفوا في فيلو لوصال
ألاء : شن رأيك فيه هذا ؟
وصال : مش عارفة ديري رأيك
ألاء : وباهي هذا
وصال : حلو
فاطمة : اهو حتى هذا حلو يطلع عليك
وصال : عادي حتى هو يمشي حاله
ألاء : خير بلاك انتي ؟ تقول عرسي انا مش عرسك انتي
وصال : و شن تبيني ندير ؟ اختاروا اللي يعجبكم وهيا معش عندي خلوق
ألاء : ايه بالله .. بنختارو الفيلوا لكن مازالت ستين حاجة شن تقولي انتي !
وصال : عادي مش ضروري كله نديروه
ألاء : ياسرك برود ياسر .. حتى قدام امي ديري روحك ناشطة شوية
فاطمة : شن يا بناويت رأيكم في هذا ؟
ألاء : ايه حتى هو حلو يهبل .. صح ولا يا وصال ؟
وصال : ايه ايه حلو .. خلي نختاروه و خلاص
..........
...............
نديم يولع سيارته و يطلع يمشي يدرس على البحر
و يقعد يفكر في المواضيع اللي في راسه و اهمها العرس
....
......
عند هبة وسلمى
هبة : و أخيرا طابت الكيكه ..
سلمى : باينه عليها حلوه
هبة : انتي احلى
يطلعوا الكيكة و يقصوها و يديروا نسكافيه
هبة : شن رأيك نقعمزا برا أحلى .. الجو حلو
سلمى : ايه الجو حلو برا
و يطلعوا و يمشوا للطاولة و الكراسي اللي مقعمز فيهم هيثم
هبة : نوض دور وين تمشي .. خلي بنقعمزوا هنا
هيثم : تقدري تتكلمي بأسلوب أحسن من هكي
هبة : حي خوي هيثم يتكلم بأسلوب .. عشث وشفت .. ولا زعما متحشم من سلمى ؟
هيثم : هبة خيرلك راهو
هبة : حي نسيت الحليب .. خلي نجيبه ونجي
تمشي هبة و يقعدوا سلمى و هيثم و يشوفوا لبعض من تحت لتحت
و شوية تجي هبة
هبة : قاعد ما مشيتش انت ؟
ياخد من الكيكه اللي مدايرتها و يمشي
سلمى : خيرك عليه ؟
هبة : يمشي يطير وهو طول النهار راقد في الحوش !
.....
............
يروح علي كمال للفيلا و أول ما يدخل يتلاقى هو و خديجة
خديجة : عليوه خيره جرحك ؟
علي كمال : لا عادي تصير .. تو نغيره
خديجة : تعالى نغيرهولك ما تقدرش بروحك ي
يدخلوا غرفة علي كمال و تبدا تغيرله في جرحه
خديجة : ماتندريش على خوك نديم وين ؟
علي كمال : لا .. علاش ؟
خديجة : كلمني بوك .. قالي كلمي فاطمة قوليلها نديم اليوم بيجي يشوف خطيبته وصال .. و نتصلوا بنديم ما يردش علينا
علي كمال : اياه ؟ و عمتي كلمتيها ؟
خديجة : ايه كلمتها و عطيتها علم
علي كمال : يا ريتك ما كلمتيها .. مرات نديم ما يبيش يمشي
خديجة : والله انا ما دخليش بوكم قالي ديري و انا نفذت
علي كمال : تو نكلمه انا نديم
خديجة : يا ريت
تكمل خديجة وتطلع .. و علي كمال يتصل بنديم طول
علي كمال : الو
نديم : ايوا علي كمال فيك حاجة ؟
علي كمال : لا ما فيا شي .. وين انت خيرك ما تردش على بوك و أمك ؟
نديم : ع البحر مش خاطري نرد على حد .
علي كمال : تعالى الحوش كان كملت
نديم : شن في ؟
علي كمال : في الحوش تو تعرف
نديم : ما تقوليش في مصيبة تانية ؟
علي كمال : ما تعطلش
نديم : تمام
........
...........
يروح نديم الحوش و يمشي لعلي كمال طول
نديم : علي كمال .. شن في ؟
علي كمال : قعمز ما فيا شي خيرك خاش بعضك
نديم : وين ندري لما قلتلي في حاجة خنست
علي كمال : هو في حاجة
نديم : باهي احكي
علي كمال : بوك يبيك تمشي لوصال اليوم
نديم : شنو ؟ وعلاش ؟
علي كمال : مش عارف كلم أمك وأمك كلمت عمتك و اعطوهم خبر اليوم المغرب بتمشي انت
نديم : تفاجأت ؟ أكيد لا .. حتى هذا ما سألونيش فيه
علي كمال : مش قلتلك نظام بوك هذا يحطك في الأمر الواقع و غصب عليك تنفذ ..
نديم : و انا مانيش ماشي .. عناد فيه هو
علي كمال : اسمع من رأيي برا وخلاص .. أقل مشاكل يا نديم
نديم : انا مش مجبور يا علي كمال افهمني
علي كمال : فاهمك .. لكن كل ما هنالك بتمشي تهدرزوا شوية وتروح وبس .. وبعدين عمتك و وصال عطوهم علم عيب في حقهم فكر فيهم شوية
نديم : و انا من بيفكر فيا ؟
علي كمال : معليشي كون انت احسن منهم و سايرهم المرة هادي .
نديم : على خاطرك بس يا علي كمال
علي كمال : هههه باهي باهي
...........
................
يروح علاء من الخدمة
و يركب لغرفته .. يلقى نسرين م قعمزة ع السرير و تتفرج على التلفزيون
و متعصبة
علاء : نسرو .. شن الجو ؟
نسرين : و قاعد تسأل على جوي ؟
علاء : باهي بوي ما باش يخليني شن نديرله باهي ؟ ما تشبحيش فيه متعصب من اولاده الزوز التانيين و نزيدها عليه انا ؟
نسرين : ايه صحة ليهم خوتك نديم وعلي .. وقت اللي ما يبوش حاجة يقولوا ما نبوش مش زيك انت .. افرض رأيك حتى انت ما تقعدش هكي
علاء : انا نستغل في الوضع يا نسرين افهميني ..
نسرين : مانيش فاهماتك .. لينا شهور ما طلعناش و غيرنا جونا و انا غير محبوسة هنا انطيب و انظف و نمسح .. مولية زي الخدامة شن هذا ؟
علاء : خلاص تو نطلعوا وعد
نسرين : علاء ما تزيدش تعصبني .. اربعة و عشرين ساعة في وجه امك و سلمى لا نشوف في الناس ولا نطلع .. ت حتى عيل مهناش في يدي باش يغيرلي جوي ( و تبدا تبكي )
علاء يقرب منها و يضمها
علاء : خلاص حبيبتي خلاص .. ربك يرزق ان شاء الله .. وعد مني نطلعوا ندهوروا في اقرب وقت
تدفعه و تنوض
نسرين : زيد غادي .. مش مسامحاتك.. وحترقد على الصالون اليوم
علاء : ايح فكينا عاد
نسرين : ما تبيش انت تو نرقد انا ع الصالون
علاء : يا رب صبرني
.............
.................
مع المغرب
نديم في غرفته يجهز في روحه باش يمشي لبيت وصال
علي كمال : شن جهزت ؟
نديم : تقريبا ..
علي كمال : ما تبخش عطر هلبا باش ما تنخنقش
نديم : بخيتش اصلا
علي كمال : لا دير حتى شوية
و يبخله علي كمال رشة وحدة بس لان نديم عنده الربو و ينخنق من الروايح
شوية وتجي خديجة و في يدها حاجات
خديجة : شد هدا الصندوق .. هذا صندوق السلسلة اللي نسيناها الاسبوع الفات ارفعه معاك لوصال ... و هذا خاتمك متع الخطبة البسه قبل ما تمشي .. مستعجلة خليت العشاء ع النار
و تمشي
علي كمال : البسه ما تقعدش تشوفله هكي
نديم : اوف يا علي كمال اوف
.........
............
عند وصال :
وصال جهزت روحها و ساعدتها ألاء طبعا حتى في المطبخ
ألاء : اسمعي لما يجي ما تحسسيشي انك ما تبيش تتزوجي ..
وصال : وعلاش ؟
ألاء : عيب في حق الراجل يحس انه مرفوض
وصال : انا مش رافضاته لانه نديم .. انا رافضة لاني انحطيت في الامر الواقع وانتي عارفه القصة كلها
ألاء : المهم ردي بالك
وصال : حاضر .. أي اوامر تانية ؟
ألاء : و هدرزي معاه مش تسكتي عارفاتك انا
.........
...........
شوية و يوصل نديم و يدخل المربوعة مع بابا وصال مصطفى
و يقعدوا يهدرزوا لعند ما تدخل وصال
تدخل وصال و يطلع بوها مصطفى يخليهم على راحتهم
و الجو يتوتر بيناتهم
وصال : اهلا وسهلا
نديم : اهلين فيك .. كيفك ؟
وصال : بخير و انت كيفك ؟
نديم : الحمد لله
و يسكتوا شوية
وصال : شن حال خالي و مرت خالي و العيلة كلها
نديم : الحمد لله كلهم بخير
وصال : و علي كمال شن حاله توا
نديم : احسن .. أحسن بهلباا
و يقعدوا ساكتين من دون كلام و يشوفوا لبعض من تحت لتحت
و بعدين وصال تدخل للبيت داخل
........
.........
علي كمال متلوح في غرفته
و فجأة تجيه رسالة من رقم على نقاله يفتحها
" مرحبا استاذ علي كمال ..
كيف حالك توا .. انا ندى .. حبيت نطمن عليك توا "
يشوف علي كمال الرسالة و يعدل من تقعميزته
....
ندى بعثت الرسالة و هي خايفة و حذفت نقالها ع السرير
و فجأة تجيها رسالة تشدها بسرعة وتفتحها
""علي كمال : لا الحمد لله اموري بخير .. و شكرا على سؤالك ""
ندى : بس ؟ يلا المهم تطمنت عليه
و شوية و تجيها رسالة تانية
"علي كمال : و انتي كيف حالك ؟ "
تفرح ندى هلباا و ترد عليه
"ندى : الحمد لله بخير .. كنت نقرا و خطرت على بالي حبيت نطمن"
و قعدوا يتراسلو
"علي كمال : يسلم خاطرك .. شن المادة اللي تقري فيها ؟"
"ندى : مادة ***** .. صاعبة شوية لكن مدايرة جهدي فيها"
"علي كمال : ما ينخافش عليك انتي .. قدها "
"ندى : شكرا "
...............
.....................
ترجع وصال لـ نديم و في يدها سفرة عصير و شكلاته و تحطها قدامه
نديم : صحيتي
وصال : سلمك ..
نديم : اي .. شن بديتوا في تجهيزات العرس ؟
وصال : ايه اليوم حجزنا في الفيلو على اساس .. وبضعنا شوية حاجات و بوي حجز في صالة للحفلة
نديم : باهي كويس .. ربي يعاونكم
وصال : الله يسلمك .. وانتم ؟
نديم : لا احنا ما درنا شي
وصال : علاش ؟
نديم : قصدي .. حجزنا للاثاث و اليومين الجايات بنركبه و بضاعة العرس غدوة بنبدوا فيها ان شاء الله
وصال : اها باهي كويس .. ربي يعاونكم
.....
........
يطلع علي كمال للجنان و بيكتب رسالة لندى لكن ما عرفش شن يكتب
يحط النقال في جيبه و يقعد يشوف لحوش عمه خالد و يفكر
و يطلع النقال من جيبه و يدخل على رقم ندى و يضغط على اتصال
يرن النقال عند ندى و تتوتر لما تلقاه علي كمال ترد ولكن في صوتها رجفة
ندى : ألو
علي كمال : هلا
ندى : اهلين
علي كمال : شن الاخبار ؟
ندى : كويسة .. شن اخبارك انت ؟
علي كمال : بخير ..
و يسكتوا شوية
علي كمال : شن مدايرة ؟
ندى : زي ما قلتلك كنت نقرا توا لا .. و انت ؟
علي كمال : ولا شي مقعمز البرا و خلاص
ندى : اها كويس .. الجو حلو
علي كمال : اي صح
و يسكتوا شوية مرة تانية
علي كمال : حبيت نسمع صوتك
ندى قلبها يطير من الفرحة
ندى : ليش ؟
علي كمال : هكي .. مش عارف ! كان ازعجتك نصكر
...........
......................
نديم يلعب بخاتم الخطبة و يحرك فيه يمين ويسار بتوتر و رايه لوطا
وصال : مش متعود عليه !؟
نديم : نعم ؟
وصال : الخاتم في يدك
نديم : اها ايه مش متعود نلبس خواتم ( مع ابتسامة )
وصال : اها ..
يتذكر نديم سلسال الذهب و يدخل يده في جيب الجاكه و يطلع الصندوق و يمدهولها
نديم : تفضلي
وصال (باستغراب) : شن هذا ؟
نديم : مفروض كان يوصلك مع بضاعة يوم الخطبة لكن نسيناه
تفتح وصال الصندوق و تلقاها سلسلة و تعجبها هلباا
وصال : تهبببل .. لكن ما نقدرش ناخدها .. يعني مافيش داعي
نديم : لا لا هي نصيبك ما تقدريش تدريه عليا ..
وصال : بجديات شكرا هلباا يعني ما كانش في داعي
يبتسملها نديم .. تتوتر وصال
وصال : خلي نقيم السفرة
تمد يدها بتقيم السفرة و في نفس اللحظة نديم يمسك السفرة بيعطيها لوصال .. و في لحظة تخبط وصال السفرة و تطيح طاست العصير على سورية نديم .
....
......
ندى : ليش ؟
علي كمال : هكي .. مش عارف ! كان ازعجتك نصكر
ندى : لا خليك .. ااا .. قصدي عادي مفيش ازعاج
علي كمال : شن حالك امك توا .. كان عندها مراجعة المرة الفاتت
ندى : كويسة هلباا .. الدكتور طمنا و قال كل شي كويس يلزمها محافظة بس ..
علي كمال : كويس
ندى : شكرا استاذ علي ... كمال على سؤالك !
علي كمال : و لو ..
ندى : نقدر نسألك سؤال .. لو ما كانش شخصي ؟
علي كمال : تفضلي
ندى : علاش اسمك علي كمال ؟ اول مرة نسمع حد اسمه مركب هكي
علي كمال : اها .. قصة طويلة .. لكن بالمختصر امي توفت وقت ولادتي و كانت تبي تسميني كمال .. لكن بوي كان متزوج من قبل ما يتزوج امي و مرت بوي يلي هي أمي توا شرطت على بوي انها ما تسمينيش كمال فـ بوي باش يرضى الطرفين سجلني علي كمال و بوي قعد ينادي فيا علي كمال حتى العيلة كلها قعدت تنادي فيا هكي ..
ندى : اها فهمت عليك .. حلوة قصة اسمك .. مميز
علي كمال : مش اي حد ينادي فيا علي كمال .. اللي مقربين مني بس الباقي يقولوا علي بس
ندى : اها فهمت عليك
علي كمال : اي
..........
.............
وصال : اسفة اسفة .. ما كانش قصدي
نديم : عادي اصلا ما كانتش معبية هلبا
تاخد وصال منديل و تقرب منه وتمسح سوريته .. و نديم يقعد يشوفلها و في لحظة حتى هي تشوفله .. اول مرة يصير تقارب بينهم هكي
و فجأة وصال توخر و تبعد عليه
نديم : اا .. اساسا اللون الاسود ما يبنش عادي
تاخد السفرة و ترجع الداخل .. و نديم يشرب ميه
ترجع وصال للمطبخ ..
ألاء : ها خيرك رجعتي !
وصال : شي
ألاء : خيرك مش على طبيعتك ؟
وصال : قلت شي .. زعما امتى بيروح ؟
ألاء : تحشمي عاد .. ديري القهوة اهو السفرة واتية بحلوياتها
وصال : باهي
...............
............
علي كمال : نستأذنك توا .!
ندى : تمام خود راحتك
علي كمال : تصبحي على خير
ندى : و انت من اهل الخير
و يصكروا ..
علي كمال يحط نقاله ع الطاولة و يقعمز على الكرسي و يشبح للسماء
ندى تصكر و هي فرحانة ...
........
شوية وينوض علي كمال و ياخد نقاله و يطلع قدام الفيلا متعهم
يشبح يمين يلقى وليد قدام حوشهم .. كان يستنى في هيثم باش بيطلعوا
و يمشيله علي كمال و وليد يشوفه وهو جايه
وليد : شن تبي ؟
يوصل فيه علي كمال .. اول شي يديره يمد إيده اليمين و يخنق وليد من رقبته و يلصقه ع الحيط
وليد : علي كمال .. مش قصدي .. اسمعني
علي كمال : صكر فمك
وليد : ما كانش قصدي نضربك و الله
علي كمال : كان قصدك تضرب نديم صح ولا ؟
وليد : لا مش هكي
علي كمال : لا هكي .. انت قلت يومها مشكلتك الاكبر مع نديم !
وليد : مندريش على روحي سكران .. اطلقني
علي كمال : مش طالقك لن تقول شن مشكلتك بالزبط .. بالك تسحابني نسيتك يا وليد
وليد (بتكلم بالسيف) : الشركة .. مشكلتي الشركة.. نبي نخدم معاكم
علي كمال : كذااب .. مشكلتك مع نديم حاجة تانية .. قول شن ؟
و يزيد يضغط عليه
وليد (بصوت واطي) : و .. وصال
وليد يدف علي كمال من مكان جرحه بقوة .. يوخر علي كمال و يشد كتفه او مكان جرحه
علي كمال (بصدمة ) : شنو ؟
....
.....
تجهز وصال القهوة و تدخل لنديم .. توقف قدام و تمدله القهوة
نديم : ردي بالك تقلبيها عليا حتى هي ههههههه
و ياخد فنجان القهوة و تحط السفرة قدامه
وصال : ههههههه اسفة بجد
نديم : مش مشكلة
و يسكتوا شوية
نديم : راضية على الزواج هذا ؟
تتفاجأ وصال من سؤاله
وصال : ااا .. ايه راضية .. و انت ؟
نديم : ايه راضي
كذبت وصال لانها لو قالت لا حتكون حطاته في موقف محرج ومش حلو .. و نفس الشي نديم
نديم : باهي عندك شروط و اي شي ؟ بعد الزواج او قبله ؟
وصال : لا .. حاجتين بس .. خدمتي يلي هي استاذه في مدرسة .. و السواقة .. صح ما عنديش سيارة لكن بعد الزواج حابة ندير سيارة
نديم : ما عنديش مشكلة .. لكن مشاوير زايدة بالسيارة لا .. المهم المهم
وصال : باهي
و في لحظة يسكتوا و يحسوا ان الموضوع صار جدي وهما الاثنين رافضين الزواج من الاساس
نديم : هيا انا نستأذن
وصال : على راحتك ..
نديم : سلميلي على على عمتي و ألاء
وصال : يوصل ..
و يطلع نديم يركب سيارته و يروح
........
............
علي كمال (بصدمة ) : شنو ؟
وليد : ما تفهمش غلط .. اللي نقصده ان امي كانت تبي تخطبلي وصال بس .. جت في يوم كلمتني عليها و قالتلي بنخطبهالك .. لكن بعد فترة سمعنا ان نديم خطبها
علي كمال : اوعك يا وليد ما تكونش خاين للشرف .. ما تكونش وسخ لهالدرجة .. تحط عينك على مرت ولد عمك
وليد : شن تسحابني يا علي كمال ..؟ انا اصلا وصال من لما كنا صغار ما نتفكرش في شكلها كيف .. موضوعي في نديم بس مش في حد تاني .. دايما حظه شاد معاه و كل شي يجيه بالساهل
علي كمال : مفيش حاجة تجي بالساهل .. و ياسر انك تشوف الناس و تحسدهم اخدم على راسك و ابني نفسك وانت تقارن نفسك بفلان وعلان
وليد : الكلام ساهل .. انتم اولاد عمي فتحي كل شي جاكم جاهز و بوكم خدم و لقيتوا كل شي و انتم مستريحين .. وتوا جاي تقولي مفيش حاجة بالساهل ؟ اللي يسمعك يقول حياتك كلها عذاب ..
علي كمال : ارضى بنصيبك اللي قاسمهولك ربي و احمده توا ربي يفتح عليك و بيض قلبك وصفي نيتك
وليد : نيتي صافية .. لكن انتم .. كنا زي الخوت لما كنا صغار .. لما كبرنا لصقتوني ع الحيط .. علاش ؟ ها .. علاش ؟
علي كمال : ياسر دراما زايدة و اللي باعك بيعه بسيطة القصة .. مع انك متوهم ان احنا بعناك .. انت عارف روحك شني
وليد : عارف روحي .. انتم اللي وسخين
علي كمال : احترم نفسك و اعرف شن تقول من فمك .. خير ما يصير كلام تاني .. و الضربة هادي متع الرصاصة مش حننساهالك .. وحتشوف شن ندير فيك
وليد : اعلى ما في خيلك اركبه
علي كمال : و قصة وصال .. اوعك ثم اوعك نديم يعرف بيها المرة هادي ما توقفش على طريحة بس .. يحط رصاصة في نص راسك .. انا نتلكم لمصلحتك
و شوية ويجي هيثم
هيثم : شن الجو يا علي كمال
علي كمال : كان تبي مصلحتك .. فوتك من خلطته هذا (ويأشر على وليد)
و يمشي علي كمال يرجع لفيلتهم ويدخل لغرفته و هو شاد كتفه لان حاس بوجع من دفة وليد
ياخد دواه و يرقد
............
...............
ألاء : حي محلاااها السلسلة تهبل
وصال : كان تبيها خوديها ..
ألاء : لا يا حبيبتي هدية من خطيبك هادي كيف ناخدها
وصال : عادي ..
ألاء : احكيلي .. شن جوه معاك ؟
وصال : شن بنحكيك ترا فكيني ..
ألاء : غير هيا بلا جو زايد
وصال : زيه زي اي راجل تاني .. شن بيكون يعني .. هدرزنا شوية و بس
ألاء : و باهي شن رايك فيه ؟
وصال : ما شاء الله عليه .. لكن ربي يحفظه لناسه
ألاء : أمين .. بإعتبار انتي ناسه توا
وصال : زيدي غادي .. بنرقد
......
.............
يوصل نديم للفيلا .. يدخل لعلي كمال يلقاه راقد
يدخل لغرفته حتى هو يغير ملابسه و يرقد
...........
.............
تاني يوم ..
يوم جمعة
كان يوم عادي ع الكل ..
مع المغرب علي كمال في غرفته و يدخل عليه نديم
نديم : وين ماشي ؟
علي كمال : كلمني بابا ندى .. يبيني نمشيله
نديم : وعلاش ؟ شن ماشي بتخطب ؟
علي كمال : هاهاهاها .. على قصة الـ 30 الف ولا نسيت
نديم : ايه كيف ننساهم .. اللي حشيتني فيهم قدام بوك على اساس انا خديتهم صح ولا ؟
علي كمال : كنت تستاهل
نديم : الله لا يورينا شرك .. انقلبت علينا
علي كمال : ايه امالا شنو .. المهم تو نحاول نرجعهم من حسابي
نديم : لا خلاص فوتهم رجعتهم من حسابي ليهم فترة
علي كمال : اياه ؟
نديم : ايه المهم .. شن بتقوله
علي كمال : شن بنقوله حالتهم المادية ما تسمحلهش انهم يرجعولي الفلوس يا نديم
نديم : خلاص مش ضروري ترجعهم يا علي كمال .. مش محتاجينهم
علي كمال : انا امس كلمت المحامي و خليته يجهزلي ورقة "تنازل عن دين"
نديم : حتى هذا راي كويس
......
............
يمشي علي كمال و يوصل لحوش ندى
و يستقبله بوها خليفة ويدخله مربوعة الاستقبال متع الضيوف
و يقعدوا يهدرزوا حوالي ربع ساعة و بعد ما ضيفوه
خليفة : شوية وراجعلك
....
ندى طلعت من المطبخ و كانت ماشية جهة المربوعة تبي تمشي تتسمع عليهم شن يهدرزوا
وهي ماشية لاحظت اوراق على الطاولة
تشدها وتقراها و تتفاجأ انها اوراق ملكية الحوش
ندى : ماما
نجاة : نعم ؟
ندى : اوراق ملكية الحوش علاش هنا ؟
نجاة : الله غالب يا بنتي .. بوك قرر يكتب نص الحوش لاستاذك
ندى : شنوو ؟
و يجي خليفة و ياخد الاوراق ويرجع المربوعة
خليفة : و بالنسبة لموضوع الدين .. هذا كان رايي ... و ماكنش عندي حل عدا هذا
يشد علي كمال الاوراق
علي كمال : شنو هذا ؟
خليفة : نص البيت حيكون باسمك .. هو صح بيت مش بالقيمة الكبيرة و قديم لكن نصه يسوى 30 الف
علي كمال : مستحيل الشي هذا
خليفة : و علاش ؟ هكي تضمن حقك .. و انا نستريح
علي كمال : انا قلتلك حتى لو ما تبيش ترده عادي ما عندي مشكلة
خليفة : معليشي .. اي حل الا الحل هذا يا استاذ علي
علي كمال : و انا مستحيل نرضى بالشي هذا
خليفة : الدنيا فيها حياة وموت و مانبيش تصير مشاكل لا قدر الله حتى لو بعد وقت .. نبي كل شي يصير و انا عايش وقدام عيني
علي كمال : في راي
.......
...............
نديم في المطبخ يدور ما ياكل و العيلة في الصالة مقعمزين
و تجي نسرين
نديم : من قالك ان وليد اللي هجم على الحوش ؟
نسرين : علاش تبي تعرف ؟
نديم : يا ريت والله
نسرين : ايح .. شفتك من الروشن يومها و انت طالع من مربوعة وليد و بعدها طلع بعدم ووجه مخرب .. و قعدت نربط في الاحداث
نديم : يا عصب .. انتم النسون مش ساهلين بكل
نسرين : باهي علاش هجم على الفيلا شن كان يبي ؟
نديم : لو كان نعرف السبب بس
نسرين : قصدك حتى انت ما تعرفش ؟
.........
.............
ندى تقعد مقعمزة و تقكر
ندى : مستحيل علي كمال يوقع و ياخد نص الحوش ماهوش من النوع هذا .. مستحل
نجاة : شن تقولي ؟
ندى : لا شي
نجاة : نوضي مديلي دواي خلي ناخده وقت
ندى : باهي حاضر
تمشي ندى تجيب الدواء و تعطيه لأمها و بعدين تقرر تمشي تتصنت على بوها وعلي كمال
توصل غادي و تلقى الباب مفتوح شوية و تقعد تشبح منه
و تشوف لبوها وتلقاها يوقع في ورقة و بعدها ياخد علي كمال الورقة و يوقع حتى هو
علي كمال : وهذا حل مرضي
خليفة : ايه .. بارك الله فيك
علي كمال : نستأذنكم .. شوفلي طريق لو سمحت
خليفة : زيد هدرز خيرك
علي كمال : لا معليشي مره تانية
خليفة : خلاص على راحتك
ندى عيونها يتعبوا دموع و تمشي تتخبى في الجنان قبل ما يطلعوا
يطلع علي كمال و في يده ورقة
خليفة : بارك الله فيك استاذ علي
علي كمال : اجمعين .. تصبح على خير
و يمشي علي كمال و خليفة يدخل البيت
و قبل ما يطلع علي كمال من الباب الخارجي تمسك يده ندى
يتلفت علي كمال و يلقى عيونها معبيات دموع
علي كمال : ندى ؟
ندى : ما سحبتك تطلع شخص هكي
علي كمال : نعم ؟
............
............
نسرين : قصدك حتى انت ما تعرفش ؟
نديم : لا لا .. يومها كان سكران ما قال شي
نسرين : سكران ؟ و في يوم خطوبتك ؟ علاش ؟
نديم : وين ندري عليه انا علاش سكران في يوم خطوبتي
نسرين : لحظة
تبدا تفكر وتفكر وتربط في الاحداث وفجأة تذكر ان سالمة كانت تبي تخطب وصال لـوليد
نسرين : زعما هذا علاش ! .. مفيش شي تاني خطر في بالي
نديم : شن هو ؟ شن تعرفي انتي ؟
نسرين : مش متاكدة لكن في سبب
نديم : اللي هو ؟
نسرين : ..................... .
.............
.....................
علي كمال : ندى ؟
ندى : ما سحبتك تطلع شخص هكي
علي كمال : نعم ؟
ندى : كيف تقبل تاخد نص بيتنا .. انا انخدعت فيك ..
علي كمال : من قالك ان خديت نص بيتكم ؟
ندى : شفتك بعيوني توقع في الورق .. طلعت احرف من حمزة بهلباا .. كان قعد خاطفني خير ولا انقذتني انت .. وتسلب مننا بيتنا
ينصدم علي كمال من كلامها و يتعصب
و بدون ما يقوللها كلمة يمدلها الورقة اللي في يده
ندى : شن هادي ؟
و تاخد الورقة و تقراها
علي كمال : كنا نوقعوا في الورقة هادي
تقرا ندى وتلقاها ورقة "تنازل عن دين"
ـــــــــــــــــــــــــــــــــــــــــــــــــــــــــــــــــــــــــــــ
"" رجوع بالاحداث""
خليفة : الدنيا فيها حياة وموت و مانبيش تصير مشاكل لا قدر الله حتى لو بعد وقت .. نبي كل شي يصير و انا عايش وقدام عيني
علي كمال : في راي
خليفة : شن هو ؟
علي كمال : نقدر نمشي للسيارة ونجي ؟
خليفة : اكيد تفضل
يمشي علي كمال و يرجع و يجيب معاه ورقة التنازل
علي كمال : هادي ورقة اسمها ورقة تنازل عن دين
خليفة : لا مش راي هذا .. مستحيل نقبل ان تتنازل على فلوسك
علي كمال : لا مش هكي .. الورقة هادي طول ما انت عايش الدين تقدر ترجعه امتى ما تقدر بدون اي ضغوط من اي شخص بمجرد ما توقع .. ولو لا قدر الله صارتلك حاجة والدين ما لحقتش تدفعه .. الدين يسقط يعني ما يقعد شي من وراك لاهلك وناسك ..
خليفة : الجزء الاول تمام .. لكن التاني لا .. انا نبي نرجع ديني تحت أي ظرف ما نقدرش
علي كمال : افهمني يا عمي خليفة .. انا ما نبي منك شي .. انا درت الورقة هادي باش انت تستريح فقط لا غير ولا انا راهو مسامحك فيهم الفلوس وما نبي منك شي لا دنيا ولا اخرة
خليفة : نتكلموا على 30 الف مش 50 ولا 100 دينار ..
علي كمال : في النهاية كلها فلوس ..
يفكر خليفة وقت و بعدين يوافق بصعوبة
و هنا توصل ندى و تلقى الباب مفتوح شوية و تقعد تشبح منه
و تشوف لبوها وتلقاها يوقع في ورقة و بعدها ياخد علي كمال الورقة و يوقع حتى هو
علي كمال : وهذا حل مرضي
خليفة : ايه .. بارك الله فيك
علي كمال : نستأذنكم .. شوفلي طريق لو سمحت
ـــــــــــــــــــــــــــــــــــــــــــــــــــــــــــــ
.....
يسحب علي كمال الورقة من بين يدين ندى
علي كمال : كنتي حتكوني حاجة حلوة في حياتي .. لكن انتي مش واثقة فيا ابدا .. كل مرة كنتي تتكلمي بدون ما تفكري
ندى : اسفة
علي كمال : اس ولا كلمة .. للمرة الثانية تقارني فيا بحمزة ولكن خلاص لهنا وبس .. اللي مش واثق ما يلزمنيش في حياتي
و يتلفت بيطلع و تشد ندى ايده بإيديه الزوز
ندى : اسفة .. اسفة
يتلفتلها و يلقى عيونها دموع .. ويقعد يشوفلها
ينفض يده بقوة ويدفها لن تطيح ندى ع الارض و الدموع ينزلوا من عيونها
يطلع علي كمال و يركب سيارته و هي تقعد في مكانها تشوفله حتى هو يشفولها
>>>>>>>>>>>>>>>>>>>>>
ما تنسوش رأيكم يهمني ..
..................................