🍂 ﻣﺮﻭ ﺃﺳﺒﻮﻋﻴﻦ ﻋﻠﻰ ﺍﻟﻲ ﻭﻗﻊ ﺩﺍﻙ ﺍﻟﻴﻮﻡ ﻓﺎﻟﻤﻜﺘﺒﺔ ... ﻋﻼﻗﺔ ﺟﻮﻻﻥ ﻭ ﺭﺋﺒﺎﻝ ﺭﺟﻌﺎﺕ ﺑﺎﺭﺩﺓ ... ﻓﺎﻷﻭﻝ ﻓﻴﻨﻤﺎ ﺗﻘﺮﺏ ﻣﻨﻬﺎ ﻛﺘﺼﺪﻭ ... ﻣﺎﻓﻬﻤﺶ ﺳﺒﺐ ﺗﺼﺮﻓﺎﺗﻬﺎ ﻭ ﻣﻜﺎﻧﺶ ﻣﻦ ﺍﻟﻨﻮﻉ ﺍﻟﻲ ﻳﺤﻜﺮ ﺑﺎﺵ ﻳﻌﺮﻑ ... ﺧﺎﺻﺔ ﻓﺎﺵ ﺭﺟﻌﺎﺕ ﻗﻠﻴﻠﺔ ﺍﻟﻜﻼﻡ ﻣﻌﺎﻩ ﻫﻮ ﺑﺎﻟﺬﺍﺕ ... ﻗﺪﺍﻡ ﺍﻟﻌﺎﺋﻠﺔ ﻛﺘﺼﺮﻑ ﻋﺎﺩﻱ ...
ﻏﻴﺮ ﻛﻴﺒﻘﺎﻭ ﺑﻮﺣﺪﻫﻢ ﻛﺘﺮﺟﻊ ﻟﻨﻔﺲ ﺍﻟﺸﻲﺀ ... ﻣﻨﻴﻦ ﺣﺲ ﺑﻨﻔﻮﺭﻫﺎ ﻣﻨﻮ ﺣﺘﻰ ﻫﻮ ﺧﻼﻫﺎ ﻋﻠﻰ ﺭﺍﺣﺘﻬﺎ ... ﺍﻟﻴﻮﻡ ﻓﺎﻗﺖ ﺑﻌﺪﻣﺎ ﺧﺮﺝ ﻟﻠﺸﺮﻛﺔ ... ﻇﻼﺕ ﻓﺎﻟﺪﺍﺭ ﭼﻠﺴﺎﺕ ﺷﻮﻳﺔ ﻣﻊ ﺍﻟﺤﺎﺟﺔ ﻭ ﺭﺟﻌﺎﺕ ﻟﺒﻴﺘﻬﺎ ... ﻫﺰﺍﺕ ﺍﻟﻔﻮﻥ ﻛﺘﻘﻠﺐ ﻓﻴﻪ ... ﻛﺎﻥ ﻣﻮﺍﻟﻒ ﻳﺘﺎﺻﻞ ﺑﻴﻬﺎ ﻋﺪﺓ ﻣﺮﺍﺕ ﻓﺎﻟﻴﻮﻡ ﻭ ﻫﺎﺩ ﺍﻷﻳﺎﻡ ﻣﺎﺑﻘﺎﺵ ﻛﻴﻌﻴﻂ ...
ﺩﻭﺯﺍﺕ ﺭﻗﻢ ﺯﻳﻨﺐ ﻭ ﻫﻀﺮﺍﺕ ﻣﻌﻬﺎ ... ﺟﻮﻻﻥ ﺑﻌﺪ ﺗﺮﺩﺩ ﻋﺎﻭﺩﺍﺕ ﻟﻴﻬﺎ ﻋﻠﻰ ﺍﻟﻲ ﻭﻗﻊ ﻭ ﺍﻟﻮﺿﻊ ﺍﻟﻲ ﻭﻟﻰ ﺑﻴﻨﻬﺎ ﻭ ﺑﻴﻦ ﺭﺋﺒﺎﻝ ... ﺧﺎﺻﻤﺎﺕ ﻋﻠﻴﻬﺎ ﻣﺰﻳﺎﻥ ﻭ ﻛﻴﻒ ﻗﻄﻌﺎﺕ ﻣﻌﻬﺎ ... ﻧﺎﺿﺖ ﺟﻮﻻﻥ ﺑﺪﻻﺕ ﺣﻮﺍﻳﺠﻬﺎ ﻭ ﺧﺮﺟﺎﺕ ...
ﻛﻼﻡ ﺯﻳﻨﺐ ﺑﻘﻰ ﻛﻴﺘﺮﺩﺩ ﻓﻮﺫﻧﻴﻬﺎ ﻃﻮﻝ ﺍﻟﻄﺮﻳﻖ ... ﻛﻴﻔﺎﺵ ﺗﺨﻠﻲ ﻭﺍﺣﺪ ﺑﺎﻳﻦ ﻣﺨﺘﻞ ﻳﺨﺮﺏ ﻋﻼﻗﺘﻬﺎ ﺑﺮﺍﺟﻠﻬﺎ ... ﻣﺎﻋﺮﻓﺎﺗﺶ ﻭﺍﺵ ﻏﻠﻄﺎﺕ ﻣﻨﻴﻦ ﻣﻘﺎﻟﺖ ﻟﻴﻪ ﻭﺍﻟﻮ ... ﻭ ﻻ ﺩﺍﺭﺕ ﺍﻟﺼﻮﺍﺏ ﻷﻧﻬﺎ ﺧﺎﻳﻔﺔ ﻋﻠﻴﻪ ﻻ ﻳﺘﻬﻮﺭ ... ﻟﻜﻦ ﺗﺼﺮﻓﺎﺗﻬﺎ ﻣﻌﺎﻩ ﻣﺆﺧﺮﺍً ﻛﺎﻧﻮ ﻏﺒﺎﺀ ﻣﻨﻬﺎ ... ﺣﻄﻬﺎ ﺍﻟﻄﺎﻛﺴﻲ ﻗﺪﺍﻡ ﺍﻟﺸﺮﻛﺔ ...
ﺧﻠﺼﺎﺗﻮ ﻭ ﻫﺒﻄﺎﺕ ... ﺧﺮﺟﺎﺕ ﻣﻦ ﺍﻟﻤﺼﻌﺪ ﻭ ﺗﻤﺸﺎﺕ ﻓﺎﻟﻜﻮﻟﻮﺍﺭ ... ﻭ ﻫﻲ ﻛﺘﻘﺮﺏ ﻣﻦ ﻣﻜﺘﺐ ﺭﺋﺒﺎﻝ ... ﻟﻤﺤﺎﺗﻮ ﻭﺍﻗﻒ ﻭ ﻣﻜﺎﻧﺶ ﺑﻮﺣﺪﻭ ... ﻛﺎﻧﺖ ﻭﺍﻗﻔﺔ ﻣﻌﺎﻩ ﻣﺮﻳﻢ ... ﺷﺎﻓﺖ ﻓﻴﻬﺎ ﺟﻮﻻﻥ ﺑﺎﻧﺰﻋﺎﺝ ... ﻟﻜﻦ ﻣﻨﻴﻦ ﺑﺎﻧﺖ ﻟﻴﻬﺎ ﺣﻄﺎﺕ ﻳﺪﻫﺎ ﻋﻠﻰ ﺻﺪﺭﻭ ﻭ ﻣﺎﻟﺖ ﻋﻠﻴﻪ ﺣﺘﻰ ﻃﺒﻌﺎﺕ ﻗﺒﻠﺔ ﺟﻨﺐ ﻓﻤﻮ ...
ﺳﺮﻋﺎﺕ ﻓﻤﺸﻴﺘﻬﺎ ﻭ ﻛﻴﻒ ﻭﻗﻔﺎﺕ ﻋﻠﻴﻬﻢ ... ﻫﺰﺍﺕ ﻳﺪﻫﺎ ﻭ ﻧﺰﻻﺕ ﺑﺼﻔﻌﺔ ﻗﻮﻳﺔ ﻋﻠﻰ ﻭﺟﻪ ﻣﺮﻳﻢ ... ﻫﺎﺩ ﺍﻷﺧﻴﺮﺓ ﺷﺎﻓﺖ ﻓﻴﻬﺎ ﺑﺼﺪﻣﺔ ... ﻭ ﺗﻠﻔﺘﺎﺕ ﻋﻨﺪ ﺭﺋﺒﺎﻝ ﻛﺄﻧﻬﺎ ﻛﺘﻘﻮﻝ ﻟﻴﻪ ﺷﻮﻓﻬﺎ ﺷﻨﻮ ﺩﺍﺭﺕ ... ﺟﻮﻻﻥ ﺟﻤﻌﺎﺕ ﺷﺠﺎﻋﺘﻬﺎ ﻭ ﺿﻮﺭﺍﺕ ﻭﺟﻬﺎ ﻟﻌﻨﺪﻭ ... ﻣﺎﻗﺪﺭﺍﺕ ﺗﻌﺮﻑ ﻭﺍﻟﻮ ﻣﻦ ﻣﻼﻣﺤﻮ ﺍﻟﻐﺎﻣﻀﺔ ... ﻟﻜﻨﻬﺎ ﻣﻜﺎﻧﺘﺶ ﻣﺘﻮﻗﻌﺔ ﺍﻟﺘﺼﺮﻑ ﺍﻟﻲ ﺩﺍﺭ ﺑﻌﺪﻫﺎ ...
ﻫﺰ ﺭﺋﺒﺎﻝ ﻳﺪﻭ ﺣﺘﺎﻝ ﻟﻔﻮﻕ ﻭ ﻧﺰﻝ ﻋﻠﻰ ﺟﻮﻻﻥ ﻟﺨﺪﻫﺎ ... ﻛﺎﻧﺖ ﺻﻔﻌﺔ ﻗﻮﻳﺔ ﺧﻼﺕ ﻭﺟﻬﺎ ﺿﺎﺭ ﻟﻠﺠﻬﺔ ﺍﻷﺧﺮﻯ ... ﺗﻮﻗﻒ ﺍﻟﺰﻣﻦ ﻟﻠﺤﻈﺔ ﺣﺴﺎﺕ ﻓﻴﻬﺎ ﺟﻮﻻﻥ ﺃﻧﻬﺎ ﻛﺘﺤﻠﻢ ... ﻭﻗﻊ ﺍﻟﺼﻔﻌﺔ ﻛﺎﻥ ﺗﺄﺛﻴﺮﻭ ﻓﺪﺍﺧﻠﻬﺎ ﺃﻗﻮﻯ ﻣﻦ ﻋﻠﻰ ﺧﺪﻫﺎ ...
ﻳﻤﻜﻦ ﺗﺎﺧﺪ ﻛﻞ ﺍﻟﻮﻗﺖ ﺑﺎﺵ ﺗﺤﺎﻭﻝ ﺗﺴﺘﻮﻋﺐ ﺃﻧﻪ ﻓﻌﻼ ﺻﻔﻌﻬﺎ ﻭ ﻗﺪﺍﻡ ﻣﺮﻳﻢ ﻭ ﻣﺘﻘﺪﺭﺵ ... ﺁﻩ ﻏﺎﺭﺕ ﻋﻠﻴﻪ ﻭ ﺑﺴﺒﺐ ﺗﻮﺛﺮ ﻋﻼﻗﺘﻬﻢ ﻣﻮﺧﺮﺍ ... ﻛﻴﻒ ﺷﺎﻓﺘﻬﺎ ﻣﻌﺎﻩ ﺣﺴﺎﺕ ﺑﺎﻟﻬﻠﻊ ... ﻭ ﺗﺼﺮﻓﺎﺕ ﺑﺪﻭﻥ ﺗﻔﻜﻴﺮ ﻓﺎﺵ ﺻﻔﻌﺎﺗﻬﺎ ...
ﻟﻜﻦ ﻓﺎﺵ ﺭﺟﻊ ﻟﻴﻪ ﺍﻟﺼﻔﻌﺔ ﺣﺴﺎﺕ ﺑﺸﻲ ﺣﺎﺟﺔ ﻓﺪﺍﺧﻠﻬﺎ ﺗﻜﺴﺮﺍﺕ ... ﺑﻘﺎﺕ ﻣﻬﺒﻄﺔ ﺭﺍﺳﻬﺎ ﻭ ﺷﻌﺮﻫﺎ ﻣﻐﻄﻲ ﻛﻞ ﻭﺟﻬﺎ ... ﻛﺎﻥ ﺃﻭﻝ ﺷﺨﺺ ﻳﻜﺴﺮ ﺍﻟﺼﻤﺖ ﻓﺎﺵ ﻗﺎﻝ ...
ﺭﺋﺒﺎﻝ : ﻣﺮﻳﻢ ﻣﻤﻜﻦ ﺗﻤﺸﻲ
ﻣﺮﻳﻢ : ﻛﻨﻌﺘﺎﺫﺭ ﻻ ﺳﺒﺒﺖ ﺷﻲ ﻣﺸﻜﻴﻞ ﺑﻴﻨﺎﺗﻜﻢ
ﺗﻤﺎﺕ ﻏﺎﺩﺓ ﻛﻴﻒ ﺩﺧﻼﺕ ﻟﻠﻤﺼﻌﺪ ﻭ ﺗﺴﺪ ﻟﺒﺎﺏ ... ﺗﺮﺳﻤﺎﺕ ﻋﻠﻰ ﺷﻔﺎﻳﻔﻬﺎ ﺍﺑﺘﺴﺎﻣﺔ ﻋﺮﻳﻀﺔ ... ﻫﺰﺍﺕ ﻳﺪﻫﺎ ﺣﻄﺎﺗﻬﺎ ﻋﻠﻰ ﺧﺪﻫﺎ ... ﺷﻜﺮﺍﺕ ﻓﻨﻔﺴﻬﺎ ﺟﻮﻻﻥ ﻋﻠﻰ ﺍﻟﺼﻔﻌﺔ ... ﻷﻥ ﺷﻌﻮﺭﻫﺎ ﺑﺎﻟﻔﺮﺣﺔ ﻭ ﺭﺋﺒﺎﻝ ﺭﺟﻊ ﻟﻴﻬﺎ ﺣﻘﻬﺎ ﺩﻳﻚ ﺍﻟﺴﺎﻉ ﻣﻴﺘﻮﺻﻔﺶ ... ﻣﻜﺎﻧﺘﺶ ﻣﺘﻮﻗﻌﺔ ﺣﺘﻰ ﺍﻧﻪ ﻳﺨﻠﻴﻬﺎ ﺗﻌﺘﺎﺫﺭ ...
ﻭﺍﺳﻌﺎﻙ ﻳﻀﺮﺑﻬﺎ ﻭ ﻗﺪﺍﻣﻬﺎ ﻫﻲ ... ﺗﺤﻞ ﻟﺒﺎﺏ ﻭ ﺧﺮﺟﺎﺕ ﻛﺘﻤﺸﻰ ﺑﺮﺷﺎﻗﺔ ﺑﺤﺬﺍﺀﻫﺎ ﺍﻟﻌﺎﻟﻲ ﻭ ﻓﺴﺘﺎﻧﻬﺎ ﺍﻟﻀﻴﻖ ... ﻋﻨﻴﻬﺎ ﻛﻴﺸﻌﻮ ﻣﻦ ﺍﻟﻔﺮﺣﺔ ... ﺃﻛﻴﺪ ﺍﻟﻲ ﻭﻗﻊ ﻏﻴﺨﻠﻲ ﺷﺮﺥ ﻓﺰﻭﺍﺟﻬﻢ ... ﻭ ﻫﻲ ﺃﻛﺜﺮ ﻣﻦ ﺳﻌﻴﺪﺓ ﺗﺴﺘﺮﺟﻊ ﻣﻜﺎﻧﻬﺎ ﻛﺼﺪﻳﻘﺘﻮ ﺍﻟﻤﻘﺮﺑﺔ ...
ﻋﻨﺪﻫﺎ ﺃﻣﻞ ﻛﺒﻴﺮ ﺃﻥ ﻫﺎﺩ ﺍﻟﺰﻳﺠﺔ ﻣﺘﻄﻮﻟﺶ ﺃﻛﺜﺮ ... ﻭ ﺗﻜﻮﻥ ﻓﺎﺷﻠﺔ ﻛﻴﻒ ﺯﻭﺍﺟﻬﺎ ﺍﻷﻭﻝ ... ﻃﻠﻌﺎﺕ ﻟﺴﻴﺎﺭﺗﻬﺎ ﻭ ﺍﻧﻄﺎﻟﻘﺎﺕ ... ﺷﻐﻼﺕ ﻣﻮﺳﻴﻘﻰ ﻛﻼﺳﻴﻜﻴﺔ ﻭ ﺗﻠﻮﻧﺎﺕ ﺍﻟﺪﻧﻴﺎ ﻓﻌﻨﻴﻬﺎ ﻓﻬﺎﺩ ﺍﻟﻠﺤﻈﺔ ...
ﺑﻘﺎﺕ ﻓﻤﻜﺎﻧﻬﺎ ﻣﺘﺤﺮﻛﺎﺗﺶ ﺍﻭ ﻣﺎﻗﺪﺭﺍﺗﺶ ﺗﺨﻄﻮ ﺧﻄﻮﺓ ﺑﺎﺵ ﺗﺒﻌﺪ ﻋﻠﻴﻪ ... ﻛﺎﻥ ﺟﺴﻤﻬﺎ ﻣﺨﺪﺭ ﻛﻴﻒ ﺧﺪﻫﺎ ... ﺣﺴﺎﺕ ﺑﻴﻪ ﺷﺪﻫﺎ ﻣﻦ ﺫﺭﺍﻋﻬﺎ ﻭ ﺟﺮﻫﺎ ﺑﺎﻟﻘﻮﺓ ... ﺩﺧﻠﻬﺎ ﻟﻠﻤﻜﺘﺐ ﻭ ﺳﺪ ﻟﺒﺎﺏ ﺑﺎﻟﺠﻬﺪ ... ﺟﺮﻫﺎ ﻭ ﻫﻮ ﻣﺰﻳﺮ ﻋﻠﻰ ﻳﺪﻫﺎ ﻭ ﺩﻓﻌﻬﺎ ﻟﻔﻮﻃﻮﻱ ...
ﺩﻭﺯ ﻳﺪﻭ ﻋﻠﻰ ﺷﻌﺮﻭ ﻭ ﺑﻘﺎ ﻭﺍﻗﻒ ﻛﻴﺸﻮﻑ ﻓﻴﻬﺎ ... ﻣﺘﺤﺮﻛﺎﺗﺶ ﻛﺄﻧﻬﺎ ﺟﻤﺎﺩ ﻭ ﻣﻬﺰﺍﺗﺶ ﺭﺍﺳﻬﺎ ﻓﻴﻪ ... ﭼﻠﺲ ﻓﻮﻕ ﺍﻟﻄﺒﻠﺔ ﻣﻘﺎﺑﻞ ﻣﻌﻬﺎ ﻭ ﻗﺎﻝ ﺑﻨﺒﺮﺓ ﻏﻀﺐ ﻇﺎﻏﻂ ﻋﻠﻰ ﻛﻞ ﺣﺮﻑ ﻛﻴﺨﺮﺝ ...
ﺭﺋﺒﺎﻝ : ﻋﻼﺵ ﺧﺮﺟﺘﻲ ؟
ﺟﻮﻻﻥ : " ﺍﻟﺼﻤﺖ "
ﺭﺋﺒﺎﻝ : ﺭﺍﻩ ﺳﻮﻟﺘﻚ ... ﻣﻌﺎﺍﺍﻣﻦ ﺗﺸﺎﻭﺭﺗﻲ ﺑﺎﺍﺍﺍﺵ ﺗﺨﺮﺟﻲ ... ﺑﺎﺍﺍﺍﻏﺔ ﻳﺮﺟﻊ ﻳﺸﺪﻙ ﺩﺍﺍﺍﺍﻙ ﻭﻟﺪ ﺍﻟﻘﺢ *** ﻭ ﻳﻘﻨﺘﻚ ﻓﺒﻼﺻﺔ ﺍﺧﺮﺭﺭﺭﻯ
ﻫﺰﺍﺕ ﻓﻴﻪ ﺟﻮﻻﻥ ﺭﺍﺳﻬﺎ ﻣﺨﺮﺟﺔ ﻋﻨﻴﻬﺎ ... ﺑﺎﻥ ﻟﻴﻬﺎ ﻭﺟﻬﻮ ﺣﻤﺮﺭﺭ ﻭ ﻣﺸﺪﻭﺩ ﻭ ﻛﺄﻧﻪ ﺑﺮﻛﺎﻥ ﻭ ﻋﻠﻰ ﻭﺷﻚ ﻳﻨﻔﺎﺟﺮ ... ﻋﺎﺩ ﻛﺎﻥ ﻃﺒﻴﻌﻲ ﻭ ﻣﺠﻤﻊ ﻣﻊ ﺩﻳﻚ ﺧﻴﺘﻲ ... ﻛﻴﻔﺎﺵ ﺣﺘﻰ ﺗﺤﻮﻝ ﻭ ﺭﺟﻊ ﻣﺨﻴﻒ ﻟﻬﺎﺩ ﺍﻟﺪﺭﺟﺔ ...
ﺍﻟﻜﻼﻡ ﺍﻟﻲ ﻗﺎﻝ ﻛﺘﺤﺎﻭﻝ ﺗﺴﺘﻮﻋﺒﻮ ... ﻳﻌﻨﻲ ﻫﻮ ﻋﺎﺭﻑ ﺑﺸﻨﻮ ﻭﻗﻊ ... ﺻﻤﺘﻬﺎ ﺧﻼﻩ ﺭﺟﻊ ﻫﻀﺮﺕ ﺑﺼﻮﺕ ﺃﻋﻠﻰ ﺣﺘﻰ ﻗﻔﺰﻫﺎ ...
ﺭﺋﺒﺎﻝ : ﻛﻨﻬﻀﺮﺭﺭ ﻣﻌﺎﺍﺍﺍﻙ ... ﻋﻼﺍﺍﺍﺍﺵ ﺧﺮﺟﺘﻲ ﻣﻦ ﺍﻟﺪﺍﺍﺍﺍﺭ
ﺟﻮﻻﻥ : " ﻛﺘﺮﺟﻒ " ﺵ ﺷﻜﻮﻥ ﻗﺎﻟﻬﺎ ﻟﻴﻚ ... ﻩ ﻫﻮ !
ﺭﺋﺒﺎﻝ : ﺳﻮﻟﺘﻚ ﺟﻮﺝ ﻣﺮﺍﺕ ﺩﺍﻙ ﺍﻟﻨﻬﺎﺭ ﻭ ﻛﺬﺑﺘﻲ ... ﻋﻼﺵ ؟
ﺟﻮﻻﻥ : ﻙ ﻛﻨﺖ ﺧﺎﻳﻔﺔ ﻡ ﻣﻨﻮ ﻭ ﻭﻋﻠﻴﻚ ... " ﻫﺒﻄﻮ ﺩﻣﻮﻋﻬﺎ " ﻭ ﺍﻟﻠﻪ ﻣﻜﻨﻌﺮﻓﻮ ... ﻣﺎﻋﺮﻓﺘﺶ ﻣﻨﻴﻦ ﺧﺮﺝ ﻟﻴﺎ ... ﺷﺪﻧﻲ ﺑﺰﺯ ﻭ ﻭ ... ﻛﺎﻥ ﻛﻴﻘﻮﻝ ﺷﻲ ﻫﻀﺮﺓ ﺃﻧﺎ ﻣﻔﻬﻤﺘﻬﺎﺵ ... ﻛﺎﻧﺖ ﻫﺎﺩﻳﻚ ﺃﻭﻝ ﻣﺮﺓ ﻧﺸﻮﻓﻮ ﻭ ﻣﻌﺎﺭﻓﺔ ﺣﺘﻰ ﺳﻤﻴﺘﻮ
ﺭﺋﺒﺎﻝ : " ﺳﺪ ﻋﻨﻴﻪ ﻣﺰﻳﺮ ﻋﻠﻴﻬﻢ " ﺩﺍﻛﺸﻲ ﻋﻼﺵ ﻛﻠﻤﺎ ﻗﺮﺑﺖ ﻣﻨﻚ ﻛﺘﺒﻌﺪﻱ
ﺟﻮﻻﻥ : " ﺣﺮﻛﺎﺕ ﺭﺍﺳﻬﺎ ﺑﺎﻹﻳﺠﺎﺏ "
ﺭﺋﺒﺎﻝ : ﺷﻨﻮ ﻗﺎﻝ ﻟﻴﻚ ؟؟
ﺟﻮﻻﻥ : ﻡ ﻣﺎﻋﻘﻠﺘﺶ ... ﻛﺎﻥ ﻛﻴﻬﻀﺮ ﻋﻠﻴﻚ ﺑﺤﺎﻝ ﺍﻟﻰ ﻛﻴﻌﺮﻓﻚ
ﺭﺋﺒﺎﻝ : ﻏﻨﻘﺘﻞ ﺟﺪﺑﻮﻭﻭﻩ
ﺟﻮﻻﻥ : " ﻗﺮﺑﺎﺕ ﻭ ﺷﺪﺍﺕ ﻟﻴﻪ ﻓﻴﺪﻭ " ﺭﺋﺒﺎﺍﺍﻝ ﻻﺍﺍ ... ﻋﻔﺎﻙ ﻣﺪﻳﺮ ﻭﺍﻟﻮﻭﻭ ... ﺃﻧﺎ ﺍﻟﻲ ﻏﻠﻄﺖ ﻓﺎﺵ ﻣﺸﻴﺖ ﻟﺘﻤﺎﻙ ﺑﻼ ﺧﺒﺎﺭﻙ ... ﺃﻧﺎ ﺍﻟﻲ ﻏﺎﺍﺍﻟﻄﺔ " ﺩﻣﻮﻋﻬﺎ ﻏﺎﺩﻳﻴﻦ " ﻭ ﻛﻨﺖ ﺑﻐﻴﺖ ﻧﻘﻮﻟﻬﺎ ﻟﻴﻚ ﻭ ﺧﻔﺖ ... ﺑﺎﻳﻨﺔ ﻋﻠﻴﻪ ﺩﺍﺭﻫﺎ ﻋﻦ ﻋﻤﺪ ﺩﺍﻛﺸﻲ ﻋﻼﺵ ﺳﻜﺖ ... ﻋﻔﺎﺍﻙ ﻣﺎﺩﻳﺮ ﻭﺍﻟﻮ ... ﻛﻨﺘﺮﺟﺎﻙ
ﺭﺋﺒﺎﻝ : ﻻ ﺳﻜﺖ ﻟﻴﻪ ﻋﻠﻰ ﻫﺎﺩﻱ ﻏﻴﺮ ﻳﺠﻲ ﻳﺢ *** ﻫﻮ ﮔﺎﻉ ... ﻣﺴﻴﻔﻂ ﻟﻴﺎ ﺻﻮﺭ ﺍﻟﻜﺎﻣﻴﺮﺍ ﺍﻟﻲ ﻓﺎﻟﻤﻜﺘﺒﺔ ﻟﺒﺎﺭﺡ ﺑﺎﻟﻠﻴﻞ ... ﻧﺘﻲ ﻧﺎﻋﺴﺔ ﺣﺪﺍﻳﺔ ﻭ ﻛﻨﺸﻮﻑ ﻓﺪﺍﻛﺸﻲ ... ﻋﻨﺪ ﺑﺎﻟﻲ ﻣﺮﺗﻲ ﻓﺤﻤﺎﻳﺘﻲ ﺣﺘﻰ ﺷﻲ ﻣﺨﻠﻮﻕ ﻣﺎﻳﻘﺪﺭ ﻳﺤﻂ ﻋﻠﻴﻬﺎ ﺻﺒﻌﻮ ...
ﻭ ﻫﻮ ﺗﺠﺎﻭﺯ ﺍﻟﺤﺪﻭﺩ ﺑﺪﺭﺟﺎﺍﺍﺕ ... ﻟﻜﻦ ﺁﺧﺮﺗﻮ ﻏﺘﻜﻮﻥ ﻋﻠﻰ ﻳﺪﻱ
ﺟﻮﻻﻥ : " ﺑﺘﺮﺟﻲ " ﻻﺍﺍ ... ﺧﻠﻴﻨﺎ ﻧﺴﺎﻭ ﺍﻟﻲ ﻭﻗﻊ ... ﻋﻔﺎﺍﺍﻙ
ﺭﺋﺒﺎﻝ : " ﺟﺮ ﻳﺪﻭ ﻣﻨﻬﺎ ﻭ ﻭﻗﻒ " ﻭﺍﺍﺍﺵ ﻫﻮ ﻣﺴﻴﻔﻂ ﻟﻴﺎ ﻟﻔﻴﺪﻳﻮ ﻭ ﻛﺘﻘﻮﻟﻲ ﻟﻴﺎﺍﺍ ﻧﺴﺎﺍﺍﺍ
ﺑﻌﺪ ﻋﻠﻴﻬﺎ ﻭ ﻣﺸﺎ ﻭﻗﻒ ﻋﻨﺪ ﺍﻟﻨﺎﻓﺬﺓ ... ﺩﺍﺧﻠﻮ ﻧﺎﺍﺍﺍﺭ ﻛﺘﻐﻠﻲ ﻭ ﻣﺎﻛﺮﻫﺶ ﻳﻤﺸﻲ ﻟﻴﻪ ﻓﻬﺎﺩ ﺍﻟﻠﺤﻈﺔ ... ﻟﺒﺎﺭﺡ ﻛﺎﻥ ﻣﺘﻜﻲ ﻓﺎﻟﺴﺮﻳﺮ ﻭ ﺧﺪﺍﻡ ﻓﺎﻟﺒﻴﺴﻲ ﺣﺘﻰ ﻭﺻﻠﻮ ﺗﺴﺠﻴﻞ ﻛﺎﻣﻴﺮﺍ ﺩﻳﺎﻝ ﺍﻟﻤﻜﺘﺒﺔ ... ﺣﺲ ﺑﺎﻟﺴﻘﻒ ﻫﺒﻂ ﻋﻠﻰ ﺭﺍﺳﻮ ﻭ ﻫﻮ ﻛﻴﺸﻮﻑ ﺳﻠﻄﺎﻥ ﻣﺤﺎﺻﺮ ﺟﻮﻻﻥ ﻭ ﻫﻲ ﻛﺘﺤﺎﻭﻝ ﺗﻔﻠﺖ ﻣﻨﻮ ...
ﻓﺎﺵ ﺑﺎﺳﻬﺎ ﺟﻤﺪ ﻟﻴﻪ ﺍﻟﺪﻡ ﻓﻌﺮﻭﻗﻮ ﻭ ﺣﺲ ﺑﺮﻏﺒﺔ ﻓﺎﻟﻘﺘﻞ ... ﺗﻠﻔﺖ ﺟﻬﺘﻬﺎ ﻓﻴﻦ ﻧﺎﻋﺴﺔ ﺑﻬﺪﻭﺀ ﻭ ﻋﺮﻭﻕ ﻋﻨﻴﻪ ﺭﺟﻌﻮ ﺣﻤﺮﻳﻦ ... ﺳﺪ ﺍﻟﺒﻴﺴﻲ ﻭ ﻧﺎﺽ ﺧﺮﺝ ﻣﻦ ﻟﺒﻴﺖ ... ﻫﺰ ﺍﻟﻜﻮﻧﻄﺎﻛﺖ ﻭ ﻃﻠﻊ ﻟﺴﻴﺎﺭﺗﻮ ... ﺳﺎﻕ ﺑﺴﺮﻋﺔ ﺧﻴﺎﻟﻴﺔ ﻭ ﻫﻮ ﻣﺰﻳﺮ ﻋﻠﻰ ﻟﻔﻮﻟﻮﻥ ...
ﻛﺎﻥ ﻏﺎﺩﻱ ﺑﺪﻭﻥ ﻭﺟﻬﺔ ﻭ ﺍﻟﺴﻴﺎﺭﺓ ﻗﺮﺑﺎﺕ ﻃﻴﺮ ﻣﻦ ﺍﻟﺴﺮﻋﺔ ... ﻟﻤﺪﺓ ﺳﺎﻋﺘﻴﻦ ﻭ ﻫﻮ ﺳﺎﻳﻖ ﻭ ﻓﻠﺤﻈﺔ ﺿﻮﺭ ﺍﻟﻔﻮﻟﻮﻥ ﻭ ﺍﺗﺎﺟﻪ ﻟﻠﻤﻜﺎﻥ ﺍﻟﻲ ﻣﻈﻨﺶ ﺃﻧﻪ ﻳﻮﺻﻞ ﻟﻴﻪ ... ﻣﻨﻴﻦ ﻗﺮﺏ ﻳﺼﺒﺢ ﺍﻟﺤﺎﻝ ﺭﺟﻊ ﻟﻠﺪﺍﺭ ﺩﻭﺵ ﻟﺒﺲ ﺣﻮﺍﻳﺠﻮ ﻭ ﺧﺮﺝ ﻗﺒﻞ ﻣﺎﺗﻔﻴﻖ ﺟﻮﻻﻥ ...
ﻓﺎﺵ ﺧﺮﺝ ﻣﻦ ﺍﻹﺟﺘﻤﺎﻉ ﻟﻘﻰ ﻣﺮﻳﻢ ﻛﺘﺴﻨﺎﻩ ﺧﺎﺭﺝ ﺍﻟﻤﻜﺘﺐ ... ﻃﻠﺐ ﻣﻨﻬﺎ ﺗﻐﺎﺩﺭ ﺣﻴﻨﺖ ﻣﻜﺎﻧﺶ ﻓﻤﺰﺍﺝ ﻳﺸﻮﻑ ﻭ ﻻ ﻳﻬﻀﺮ ﻣﻊ ﺣﺪ ... ﺗﻔﺠﺄﺓ ﺑﺎﻟﻄﺮﻳﻘﺔ ﺍﻟﻲ ﺳﻠﻤﺎﺕ ﻋﻠﻴﻪ ﺑﻴﻬﺎ ﻣﺮﻳﻢ ... ﻭ ﻛﺎﻥ ﻏﻴﻮﻗﻔﻬﺎ ﻋﻨﺪ ﺣﺪﻫﺎ ﺣﺘﻰ ﻭﻗﻔﺎﺕ ﺟﻮﻻﻥ ﻭ ﻃﺮﺷﺎﺗﻬﺎ ...
ﻭ ﺍﻟﺼﻔﻌﺔ ﺍﻟﻲ ﻋﻄﺎﻫﺎ ﻫﻮ ﻣﻜﺎﻥ ﻟﻴﻬﺎ ﺣﺘﻰ ﻋﻼﻗﺔ ﺑﺎﻟﻲ ﺩﺍﺭﺕ ﻟﻤﺮﻳﻢ ... ﻓﻘﻂ ﺩﺍﻙ ﺍﻟﻐﻀﺐ ﺍﻟﻲ ﻛﺎﻥ ﻛﺎﺗﻢ ﺍﻧﻔﺎﺟﺮ ﻓﻮﺭ ﻣﺎ ﺷﺎﻑ ﺟﻮﻻﻥ ﻭ ﺩﺍﺯﺕ ﻗﺪﺍﻣﻮ ﺍﻟﻠﻘﻄﺔ ﺍﻟﻲ ﺷﺎﻑ ﻓﺎﻟﻤﻜﺘﺒﺔ ...
ﻭﻗﻔﺎﺕ ﺟﻮﻻﻥ ﻭ ﻗﺮﺑﺎﺕ ﻟﻌﻨﺪﻭ ... ﺣﻄﺎﺕ ﻳﺪﻫﺎ ﺍﻟﻲ ﻛﺘﺮﺟﻒ ﻋﻠﻰ ﺫﺭﺍﻋﻮ ... ﺿﺎﺭ ﻋﻨﺪﻫﺎ ﻣﺰﻳﺮ ﻋﻠﻰ ﻓﻜﻮ ... ﻛﺎﻧﻮ ﻋﻨﻴﻬﺎ ﻋﺎﻣﺮﻳﻦ ﺩﻣﻮﻉ ... ﺷﺎﻑ ﻓﺨﺪﻫﺎ ﺁﺛﺎﺭ ﺻﺒﺎﻋﻮ ﻭ ﺯﺍﺩ ﺻﻌﺮ ... ﻳﺎﻻﻩ ﻏﺎﻳﻤﺪ ﻳﺪﻭ ﻳﻠﻤﺲ ﺧﺪﻫﺎ ﻭ ﻫﻲ ﺗﻘﻮﻝ ...
ﺟﻮﻻﻥ : " ﺑﺼﻮﺕ ﻣﺨﻨﻮﻕ ﻭ ﻏﺼﺔ ﻓﺤﻠﻘﻬﺎ " ﻻ ﻗﺘﻠﺘﻴﻪ ﻏﺘﻜﻮﻥ ﻧﻬﺎﻳﺔ ﻋﻼﻗﺘﻨﺎ
ﺑﻘﻰ ﻏﻴﺮ ﻛﻴﺸﻮﻑ ﻓﻴﻬﺎ ... ﻣﻼﻣﺢ ﻭﺟﻬﺎ ﺑﺎﻳﻦ ﻋﻠﻴﻬﻢ ﺃﻧﻬﺎ ﻋﻨﺎﺕ ﻛﻞ ﻛﻠﻤﺔ ﻗﺎﻟﺖ ... ﺭﻏﻢ ﺃﻥ ﺍﻟﻜﻠﻤﺎﺕ ﺧﺮﺟﻮ ﻣﻦ ﺑﻴﻦ ﺷﻔﺎﻳﻔﻬﺎ ﻣﺘﻠﻌﺜﻤﻴﻦ ... ﻛﻠﻤﺔ ﺍﻟﻔﺮﺍﻕ ﺧﻼﺕ ﺫﺍﺗﻮ ﺗﺒﺮﺩ ... ﻋﻤﺮﻭ ﺗﻤﻨﻰ ﻳﻨﻬﻲ ﺣﻴﺎﺓ ﺷﻲ ﺷﺨﺺ ﻗﺪﻣﺎ ﺑﻐﻰ ﻣﻮﺕ ﺳﻠﻄﺎﻥ ...
ﺍﻟﻲ ﺗﺮﺃﺱ ﺍﻟﻠﻮﺣﺔ ﺍﻟﺴﻮﺩﺍﺀ ﺍﻟﻲ ﺷﻄﺐ ﻋﻠﻴﻬﺎ ﺯﻣﺎﻥ ﻫﺬﺍ ... ﺑﺎﻏﻲ ﻳﻨﻬﻴﻪ ﺑﻄﺮﻳﻘﺔ ﺃﻭ ﺍﺧﺮﻯ ... ﻭ ﺣﻴﻨﺖ ﻋﺎﺭﻑ ﺻﻌﻮﺑﺔ ﻳﻘﻀﻲ ﻋﻠﻴﻪ ﺑﻄﺮﻳﻘﺔ ﻗﺎﻧﻮﻧﻴﺔ ... ﻣﻜﺎﻧﺶ ﻣﺴﺘﺒﻌﺪ ﺍﻟﺤﻞ ﺍﻵﺧﺮ ... ﻭ ﻫﻮ ﻳﻘﺘﻠﻮ ﻭ ﻳﻤﺤﻴﻪ ﻣﻦ ﺍﻟﻮﺟﻮﺩ ﻷﻧﻪ ﺗﺠﺮﺃ ﻭ ﻟﻤﺴﻬﺎ ...
ﻭ ﻫﺎﻫﻲ ﺩﺍﺑﺔ ﻛﺘﺨﻴﺮﻭ ﺑﻴﻦ ﻋﻼﻗﺘﻬﻢ ﻭ ﻣﻮﺕ ﺳﻠﻄﺎﻥ ... ﺍﻟﻲ ﺑﺎﻟﺘﺄﻛﻴﺪ ﻣﻐﺎﺩﻳﺶ ﻳﺨﻠﻴﻬﻢ ﻓﺤﺎﻟﻬﻢ ﺣﺘﻰ ﻳﻨﺘﺎﻗﻢ ﺑﻄﺮﻳﻘﺘﻮ ﺍﻟﻤﻮﺳﺨﺔ ...
ﺟﻮﻻﻥ : ﻋﻔﺎﺍﻙ ﺧﻠﻴﻨﺎ ﺑﻌﺎﺩ ﻋﻠﻰ ﻫﺎﺩﺷﻲ ﺩﻳﺎﻝ ﺍﻟﻘﺘﻞ ﻭ ﺍﻹﻧﺘﻘﺎﻡ ... ﺑﻐﻴﺖ ﻧﻌﻴﺸﻮ ﺣﻴﺎﺓ ﻃﺒﻴﻌﻴﺔ ﺑﺤﺎﻝ ﺍﻟﻨﺎﺱ ... ﻭ ﻧﺒﻌﺪﻭ
ﺭﺋﺒﺎﻝ : ﻣﻨﻴﻦ ﺑﺎﻏﺔ ﺣﻴﺎﺓ ﻃﺒﻴﻌﻴﺔ ﻣﻜﺎﻧﺶ ﻋﻠﻴﻚ ﺗﻮﺍﻓﻘﻲ ﺗﺰﻭﺟﻲ ﺑﻴﺎ
ﺟﻮﻻﻥ : " ﻛﺘﺤﺮﻙ ﺭﺍﺳﻬﺎ ﺑﻼ " ﺃﻧﺎ ﻣﺎﻗﺼﺪﺗﺶ ﻫﺎﺩﺷﻲ ... ﺃﻧﺎ ﺧﺎﻳﻔﺔ ﻋﻠﻴﻚ ... ﻣﺎﺑﻐﻴﺘﺶ ﺗﻮﻗﻊ ﻟﻴﻚ ﺷﻲ ﺣﺎﺟﺔ ... ﻣﻨﻘﺪﺭﺵ ﻧﺘﺤﻤﻞ
ﺭﺋﺒﺎﻝ : ﻣﺎﻋﻨﺪﻙ ﻋﻼﺵ ﺗﺨﺎﻓﻲ ... ﺃﻧﺎ ﻣﻐﺎﺩﻱ ﻳﻮﻗﻊ ﻟﻴﺎ ﻭﺍﻟﻮ ... " ﺷﺪﻫﺎ ﻣﻦ ﺩﺭﺍﻋﻬﺎ ﺑﺠﻮﺝ " ﺟﻮﻻﻥ ﻧﺒﻐﻴﻚ ﺩﻳﺮﻱ ﺣﺎﺟﺔ ﻭﺣﺪﺓ
ﺟﻮﻻﻥ : " ﺑﺨﻮﻑ " ﺵ ﺷﻨﻮ ﻫﻲ ؟؟
ﺭﺋﺒﺎﻝ : ﺳﻤﻌﻲ ﻛﻼﻣﻲ ... ﻻ ﻗﻠﺖ ﻟﻴﻚ ﺍﻟﺤﺎﺟﺔ ﻧﻔﺬﻳﻬﺎ ... ﻭ ﻛﻨﻮﺍﻋﺪﻙ ﺩﺍﻙ ﺍﻟﺴﻜﻮﻥ ﻭ ﺍﻟﺤﻴﺎﺓ ﺍﻟﻄﺒﻴﻌﻴﺔ ﺍﻟﻲ ﺑﻐﻴﺘﻲ ﻏﻨﻮﻓﺮﻫﻢ ﻟﻴﻚ ... ﻧﺘﻲ ﻓﻘﻂ ﺳﻤﻌﻲ ﻟﻜﻼﻣﻲ
ﺟﻮﻻﻥ : ﻭ ﻭﺍﺧﺔ ... ﻭ ﻭﺍﻋﺪﻧﻲ ﻣﺘﻌﺮﺿﺶ ﺣﻴﺎﺗﻚ ﻟﻠﺨﻄﺮ
ﺭﺋﺒﺎﻝ : " ﺍﻟﺼﻤﺖ "
ﺟﻮﻻﻥ : " ﺑﺈﺻﺮﺍﺭ " ﻭﺍﻋﺪﻧﻲ
ﺭﺋﺒﺎﻝ : ﻛﻨﻮﺍﻋﺪﻙ
ﺗﺨﺸﺎﺕ ﻓﻴﻪ ﺟﻮﻻﻥ ﻣﻌﻨﻘﺎﻩ ... ﺿﻮﺭ ﺩﺭﺍﻋﻮ ﻣﺰﻳﺮ ﻋﻠﻴﻬﺎ ... ﻗﺒﻞ ﺭﺍﺳﻬﺎ ﻭ ﻫﻤﺲ ﻋﻨﺪ ﻭﺫﻧﻬﺎ ...
ﺭﺋﺒﺎﻝ : ﺳﻤﺤﻠﻴﺎﺍ
ﺗﻤﺴﻊ ﺍﻟﺪﻗﺎﻥ ﻓﺎﻟﺒﺎﺏ ... ﺑﻐﺎﺕ ﺗﺒﻌﺪ ﺟﻮﻻﻥ ﻭ ﻫﻮ ﻳﻤﻨﻌﻬﺎ ﺭﺋﺒﺎﻝ ... ﻋﻄﻰ ﺍﻹﺫﻥ ﻭ ﻫﻮ ﻳﺘﺤﻞ ﻟﺒﺎﺏ ... ﺩﺧﻞ ﺑﻬﺎﺀ ﺣﺪﻭ ﺷﺎﻑ ﻓﻴﻬﻢ ﻓﺎﻷﻭﻝ ﻭ ﺣﺪﺭ ﺭﺍﺳﻮ ...
ﺑﻬﺎﺀ : ﺍﻟﻈﺎﺑﻂ ﻳﺎﻣﻦ ﺑﻐﻰ ﻳﺸﻮﻓﻚ ... ﻗﺎﻝ ﺑﻠﻲ ﻛﺘﺴﻨﺎﻩ
ﺭﺋﺒﺎﻝ : ﺧﻠﻴﻪ ﻳﺪﺧﻞ
ﺑﻬﺎﺀ : ﻭﺍﺧﺔ ﻣﻮﺳﻴﻮ
ﺧﺮﺝ ﺑﻬﺎﺀ ﻭ ﻫﻲ ﺗﻬﺰ ﺟﻮﻻﻥ ﺭﺍﺳﻬﺎ ﺷﺎﻓﺖ ﻓﺮﺋﺒﺎﻝ ...
ﺟﻮﻻﻥ : ﻋﻼﺵ ﺟﺎ ﻋﻨﺪﻙ ﻳﺎﻣﻦ ؟
ﺭﺋﺒﺎﻝ : ﻣﺘﺸﻐﻠﻴﺶ ﺭﺍﺳﻚ ... ﻏﺘﺮﺟﻌﻲ ﺩﺍﺑﺔ ﻟﻠﺪﺍﺭ ... ﺑﻬﺎﺀ ﻏﺎﺩﻱ ﻳﻮﺻﻠﻚ ... ﻣﺘﺒﻘﺎﻱ ﺗﺨﺮﺟﻲ ﻟﺤﺘﻰ ﺑﻼﺻﺔ ﺑﻼ ﺧﺒﺎﺭﻱ
ﺟﻮﻻﻥ : " ﺣﺮﻛﺎﺕ ﺭﺍﺳﻬﺎ ﺑﺂﻩ "
ﺗﻤﺎﺕ ﺟﻮﻻﻥ ﺧﺎﺭﺟﺔ ﻭ ﻫﻲ ﺗﺼﺎﺩﻑ ﺑﻴﺎﻣﻦ ﻋﻨﺪ ﻟﺒﺎﺏ ...
ﻳﺎﻣﻦ : " ﺑﺈﺑﺘﺴﺎﻣﺔ " ﺟﻮﻻﻥ ﻟﺒﺎﺱ ؟
ﺟﻮﻻﻥ : ﺍﻟﺤﻤﺪ ﻟﻠﻪ ... ﻧﺘﺎ ﻟﺒﺎﺱ ﻋﻠﻴﻚ
ﻳﺎﻣﻦ : ﻫﺎﺣﻨﺎ ... " ﺷﺎﻑ ﻓﺨﺪﻫﺎ ﺍﻟﻲ ﺣﻤﺮ ﻭ ﺗﻌﻘﺪﻭ ﺣﺠﺒﺎﻧﻮ " ﻣﺘﺄﻛﺪﺓ ﺑﻠﻲ ﺻﺎﭬﺎ ؟
ﺟﻮﻻﻥ : " ﺑﺎﺑﺘﺴﺎﻣﺔ ﺧﺎﻓﺘﺔ " ﻭﻱ ... ﺑﻠﻤﺎ ﻧﺸﺪﻙ ... ﺳﻠﻢ ﻣﻌﺎﻙ ﻋﻠﻰ ﺧﺎﻟﺘﻲ ﻓﻮﺯﻳﺔ
ﺗﻤﺸﺎﺕ ﻟﺠﻬﺔ ﺍﻟﻤﺼﻌﺪ ... ﺑﻘﻰ ﻳﺎﻣﻦ ﻣﺘﺒﻌﻬﺎ ﺑﻌﻨﻴﻪ ﺣﺘﻰ ﺩﺧﻼﺕ ... ﺗﻢ ﺩﺍﺧﻞ ﻟﻤﻜﺘﺐ ﺭﺋﺒﺎﻝ ﻋﺎﻗﺪ ﺣﺠﺒﺎﻧﻮ ...
ﻳﺎﻣﻦ : ﻣﺎﻟﻬﺎ ﻓﻮﺟﻬﺎ ؟
ﺭﺋﺒﺎﻝ : ﻫﺎﺩﻳﻚ ﺍﻟﻲ ﻛﺘﻬﻀﺮ ﻋﻠﻴﻬﺎ ﻣﺮﺍﺗﻲ ... ﺭﺩ ﻟﺒﺎﻝ ﻟﻬﻀﺮﺗﻚ ... ﺑﻐﻴﺘﻲ ﻧﻬﻀﺮﻭ ﻋﻼﺵ ﺟﺎﻱ ﭼﻠﺲ ... ﻏﺘﺪﺧﻞ ﻓﺸﻲ ﺣﺎﺟﺔ ﺑﻌﻴﺪﺓ ﻋﻠﻴﻚ ﺳﻴﺮ ﺍﻟﻠﻪ ﻳﻌﺎﻭﻥ ﻣﺎﻣﺴﺎﻟﻴﺶ
ﻳﺎﻣﻦ : " ﺟﻠﺲ " ﻛﻮﻥ ﻋﻨﺪ ﻛﻠﻤﺘﻚ ﻭ ﺣﺎﻓﻆ ﻋﻠﻴﻬﺎ ... ﺑﺎﺭﻛﺔ ﺍﻟﻤﻌﺎﻧﺎﺓ ﺍﻟﻲ ﻋﺎﺷﺘﻬﺎ ﻫﺎﺩ ﺍﻟﺴﻨﻮﺍﺕ
ﺭﺋﺒﺎﻝ : " ﺷﺎﻑ ﻓﻴﻪ ﺑﺤﺪﺓ "
ﻳﺎﻣﻦ : ﻣﺎﻋﻠﻴﻨﺎ ... ﺩﺍﻛﺸﻲ ﺍﻟﻲ ﻗﻠﺘﻲ ﻟﺒﺎﺭﺡ ﻓﺎﻟﻤﺮﻛﺰ ... ﻣﺴﺘﺎﻋﺪ ﺩﻳﺮﻭ ؟
ﺭﺋﺒﺎﻝ : ﻭ ﻻﺵ ﻣﺸﻴﺖ ﻟﻌﻨﺪﻙ ﺍﻟﻰ ﻣﻜﻨﺘﺶ ﻣﺴﺘﺎﻋﺪ ... ﻧﺘﺎ ﺍﻟﻲ ﻭﺍﺵ ﺑﺎﻏﻲ ﻃﻴﺢ ﺍﻟﺤﻮﺕ ﻟﻜﺒﻴﺮ ﺑﺪﻝ ﺗﺒﻘﻰ ﺗﺎﺑﻊ ﺍﻷﻃﺮﺍﻑ
ﻳﺎﻣﻦ : ﺳﻠﻄﺎﻥ ﻣﻦ ﻧﻬﺎﺭ ﺩﺧﻞ ﻟﻠﻤﻐﺮﺏ ﻭﺻﻼﺕ ﺧﺒﺎﺭﻭ ﻟﻠﻜﻞ ... ﺍﻟﻌﻨﻴﻦ ﻋﻠﻴﻪ ﻟﻜﻦ ﺣﺘﻰ ﻭﺍﺣﺪ ﻣﻘﺎﺩﺭ ﻳﺪﻳﺮ ﺷﻲ ﺣﺎﺟﺔ ... ﺣﺘﻰ ﻓﺮﻗﺔ ﻣﻜﺎﻓﺤﺔ ﺍﻟﻤﺨﺪﺭﺍﺕ ﻣﻘﺪﺭﻭﺵ ﻳﻮﺻﻠﻮ ﻟﻴﻪ ... ﻭﺍﺧﺔ ﻋﺎﺭﻓﻴﻦ ﻣﺠﺎﺵ ﺣﺒﺎ ﻓﺎﻟﺒﻼﺩ
ﺭﺋﺒﺎﻝ : ﺗﺠﺎﺭﺓ ﺍﻟﻤﺨﺪﺭﺍﺕ ﻏﻴﺮ ﺍﻟﻮﺍﺟﻬﺔ ﻭ ﻭﺳﻴﻠﺔ ﻟﻠﺘﻤﻮﻳﻞ ... ﻫﻮ ﻣﻮﺭﻁ ﻓﺤﻮﺍﻳﺞ ﺃﺧﺮﻯ ﺍﻛﺒﺮ
ﻳﺎﻣﻦ : ﺑﺤﺎﻻﺵ ؟
ﺭﺋﺒﺎﻝ : " ﺗﻜﺎ ﻋﻠﻰ ﻇﻬﺮ ﺍﻟﻜﺮﺳﻲ " ﺍﻹﺭﻫﺎﺏ ... !
ﺑﻌﺪ ﺣﺪﻳﺚ ﻣﻄﻮﻝ ﺑﻴﻦ ﺭﺋﺒﺎﻝ ﻭ ﻳﺎﻣﻦ ... ﺍﻟﻲ ﺗﻨﺎﻗﺸﻮ ﻓﻴﻪ ﻋﻠﻰ ﻃﺮﻳﻘﺔ ﻟﻼﺣﺎﻃﺔ ﺑﺴﻠﻄﺎﻥ ... ﺑﺠﻮﺝ ﻋﻨﺪﻫﻢ ﻫﺪﻑ ﻭﺍﺣﺪ ... ﺧﻼﻭ ﺧﻼﻓﺎﺗﻬﻢ ﺍﻟﺸﺨﺼﻴﺔ ﺟﻨﺐ ... ﻭ ﻗﺮﺭﻭ ﻳﺪﻳﺮﻭ ﻳﺪﻫﻢ ﻓﺒﻌﺾ ... ﺭﺋﺒﺎﻝ ﻋﺎﺭﻑ ﻋﻠﻰ ﺳﻠﻄﺎﻥ ﻣﻌﻠﻮﻣﺎﺕ ﺃﻛﺜﺮ ﻣﻦ ﺍﻵﺧﺮﻳﻦ ... ﻭ ﻋﻨﺪﻭ ﺳﻼﺡ ﺳﺮﻱ ﻣﻤﻜﻦ ﻳﺴﺘﻌﻤﻠﻮ ﺿﺪﻭ ...
ﻳﺎﻣﻦ ﺑﺪﻭﺭﻭ ﺑﺎﻏﻲ ﻳﺘﺨﻠﺺ ﻣﻦ ﺳﻠﻄﺎﻥ ﻭ ﻓﺴﺎﺩﻭ ﻓﺎﻟﺒﻼﺩ ... ﻣﻜﺎﻧﺶ ﻣﻬﺘﻢ ﺑﻴﻪ ﻓﺎﺵ ﻛﺎﻥ ﻓﺎﻟﺨﺎﺭﺝ ... ﻟﻜﻦ ﻣﻦ ﻧﻬﺎﺭ ﺭﺟﻊ ﻭ ﺗﺼﺮﻑ ﻋﻠﻰ ﺭﺍﺣﺘﻮ ... ﺑﺎﻏﻲ ﻳﺰﺟﻮ ﻓﺎﻟﺴﺠﻦ ... ﻭ ﻣﻨﻴﻦ ﻋﺮﻑ ﺃﻧﻪ ﻛﻴﻤﻮﻝ ﺑﺄﻣﻮﺍﻝ ﺍﻟﻤﺨﺪﺭﺍﺕ ﺧﻼﻳﺎ ﺇﺭﻫﺎﺑﻴﺔ ...
ﻫﻨﺎ ﺯﺍﺩ ﺍﺻﺮﺍﺭﻭ ﺃﻛﺜﺮ ... ﻭ ﺍﻟﻤﻌﻠﻮﻣﺎﺕ ﺍﻟﻲ ﺣﻂ ﻟﻴﻪ ﺭﺋﺒﺎﻝ ﻛﺎﻧﻮ ﻛﺎﻓﻴﻴﻦ ﺑﺎﺵ ﻳﺪﻳﺮﻭ ﻳﺪ ﻓﻴﺪ ...
ﻏﺎﺩﺭ ﻳﺎﻣﻦ ﻭ ﺭﺟﻊ ﻟﻠﻤﺮﻛﺰ ... ﺗﻮﺟﻪ ﻣﺒﺎﺷﺮﺓ ﻟﻤﻜﺘﺐ ﻳﺰﻳﺪ ﻭ ﻋﺎﻭﺩ ﻟﻴﻪ ﺷﻨﻮ ﻛﺎﻳﻦ ... ﻳﺰﻳﺪ ﻣﺘﺮﺩﺩﺵ ﺃﻧﻪ ﻳﻨﻈﻢ ﻟﻴﻬﻢ ... ﺍﺗﺎﻓﻘﻮ ﻳﺨﺪﻣﻮ ﺑﺴﺮﻳﺔ ﺗﺎﻣﺔ ﻷﻥ ﻭﺍﺣﺪ ﺑﺤﺎﻝ ﺳﻠﻄﺎﻥ ... ﺿﺮﻭﺭﻱ ﻋﻨﺪﻭ ﻧﺎﺱ ﺑﻴﻦ ﺍﻟﺸﺮﻃﺔ ...
ﺧﺮﺝ ﻳﺎﻣﻦ ﻣﻦ ﻣﺮﻛﺰ ﺍﻟﺸﺮﻃﺔ ... ﻃﻠﻊ ﻓﺴﻴﺎﺭﺗﻮ ﻭ ﺭﺟﻊ ﻟﻠﺪﺍﺭ ... ﺩﺧﻞ ﻭ ﺗﻮﺟﻪ ﻟﻠﻤﻄﺒﺦ ﻓﻴﻦ ﺩﻳﻤﺎ ﻛﻴﻠﻘﺎﻫﺎ ... ﻗﺮﺏ ﻟﻌﻨﺪﻫﺎ ﻭ ﺑﺎﺱ ﻋﻠﻰ ﺭﺍﺳﻬﺎ ...
ﻳﺎﻣﻦ : ﺷﻨﻮ ﻛﺪﻳﺮﻱ ﻓﺎﻟﻜﻮﺯﻳﻨﺔ ﻓﻬﺎﺩ ﺍﻟﻮﻗﺖ ؟
ﻓﻮﺯﻳﺔ : ﻛﻨﺸﻐﻞ ﺭﺍﺳﻲ ... ﻣﻨﻴﻦ ﻛﺘﺨﺮﺝ ﻣﻊ ﺍﻟﺼﺒﺎﺡ ﻟﺨﺪﻣﺔ ﻛﻨﺒﻘﻰ ﺑﻮﺣﺪﻱ ... ﻛﻦ ﻛﻨﺎ ﺑﺎﻗﻲ ﺳﺎﻛﻨﻴﻦ ﻓﺎﻟﺤﻲ ﺩﻳﺎﻟﻨﺎ ﻛﻦ ﺧﺮﺟﺖ ﺟﻠﺴﺖ ﻣﻊ ﺟﺎﺭﺍﺗﻲ ... ﺍﻭﻯ ﺣﻨﺎ ﻓﻬﺎﺩ ﺍﻟﻌﻤﺎﺭﺓ ﺷﻲ ﻣﻴﻌﺮﻑ ﺷﻲ ... ﺷﻨﻮ ﻧﺪﻳﺮ ... ﺍﻟﻠﻬﻢ ﻧﻼﻫﻲ ﻓﺸﻲ ﺣﺎﺟﺔ ﺣﺘﻰ ﺗﺮﺟﻊ
ﻳﺎﻣﻦ : ﻳﺎﻛﻤﺎ ﺑﻐﻴﺘﻲ ﻧﺨﻠﻲ ﻟﺨﺪﻣﺔ ﻭ ﻧﺠﻠﺲ ﻣﻌﺎﻙ ﺍﻟﻮﺍﻟﻴﺪﺓ ﻫﻬﻪ
ﻓﻮﺯﻳﺔ : " ﺣﻄﺎﺕ ﺩﺍﻛﺸﻲ ﻣﻦ ﻳﺪﻫﺎ ﻭ ﺿﺎﺭﺕ ﻋﻨﺪﻭ " ﺑﻐﻴﺘﻚ ﺗﺰﻭﺝ ﻭ ﺩﻳﺮ ﻭﻻﺩﻙ ... ﺑﺪﺍﺭﻙ ﻭ ﺧﺪﺍﻡ ﻭ ﻣﺎﺧﺼﻚ ﻭﺍﻟﻮ ... ﻋﻼﺵ ﻣﺒﺎﻏﻴﺶ ﺗﺰﻭﺝ ﻭ ﺗﻔﺮﺣﻨﻲ ﺧﻼﺹ ... ﺍﻟﺒﻨﺖ ﺍﻟﻲ ﺑﻐﻴﺘﻲ ﻣﻜﺘﺎﺑﺘﺶ ﻟﻴﻚ ... ﻭ ﻣﺎﺷﻲ ﺗﺴﺪ ﻋﻠﻰ ﺍﻟﺰﻭﺍﺝ ﻓﻤﺮﺓ ... ﻛﺎﻳﻨﻴﻦ ﺑﻨﺎﺕ ﺍﻟﻨﺎﺱ ... ﻭﺍﺣﺪ ﺍﻟﺴﻴﺪﺓ ﺑﻨﺘﻬﺎ ﻏﺰﺍﻟﺔ ﻭ ﺿﺮﻳﻔﺔ ﻭ
ﻳﺎﻣﻦ : ﻻﺍﺍ " ﺷﺎﻑ ﻣﻼﻣﺢ ﺍﻟﺤﺰﻥ ﺑﺎﻧﻮ ﻋﻠﻰ ﻭﺟﻬﺎ " ﻛﺎﻳﻨﺔ ﻭﺣﺪﺓ
ﻓﻮﺯﻳﺔ : " ﺑﻔﺮﺣﺔ " ﺑﺎﻟﺼﺢ ﺍﻭﻟﺪﻱ ... ﺷﻜﻮﻥ ﻫﻲ ﻭ ﺍﻣﺘﻰ ﺗﻌﺮﻓﻨﻲ ﻋﻠﻴﻬﺎ ؟
ﻳﺎﻣﻦ : ﻣﻨﻴﻦ ﻧﺴﺎﻟﻲ ﻧﺠﻴﺒﻬﺎ ﺗﺸﻮﻓﻴﻬﺎ
ﻓﻮﺯﻳﺔ : ﻻ ﺍﻭﻟﺪﻱ ... ﺑﻨﺖ ﺍﻟﻨﺎﺱ ﺣﻨﺎ ﻧﻤﺸﻴﻮ ﻟﻌﻨﺪﻫﺎ ﻭ ﻧﺸﻮﻓﻮ ﻭﺍﻟﺪﻳﻬﺎ ﻭ ﻧﻄﻠﺒﻮﻫﺎ ﻣﻨﻬﻢ ... ﻫﺎﻛﺔ ﺍﻷﺻﻮﻝ
ﻳﺎﻣﻦ : ﺷﻜﻮﻥ ﻗﺎﻟﻴﻚ ﻏﻨﺘﺰﻭﺟﻬﺎ
ﻓﻮﺯﻳﺔ : " ﺿﺮﺑﺎﺕ ﻳﺪ ﻓﻮﻕ ﻳﺪ " ﻭ ﺷﻨﻮ ... ﭼﺎﻟﺲ ﻛﺘﻔﻠﻰ ﻋﻠﻴﻬﺎ
ﻳﺎﻣﻦ : ﻣﺎﺷﻲ ﻛﻨﺘﻔﻠﻰ ﻋﻠﻴﻬﺎ ... ﻭ ﻟﻜﻦ ﻋﺎﺩ ﻋﺮﻓﺘﻬﺎ ... ﺑﺎﻗﻲ ﺍﻟﺤﺎﻝ ﻋﻠﻰ ﻫﻀﺮﺓ ﺍﻟﺰﻭﺍﺝ
ﻓﻮﺯﻳﺔ : ﻻ ﻭﺍﻋﺪﺗﻲ ﺍﻟﺒﻨﺖ ﻭ ﻧﺘﺎ ﻣﺎﻓﻨﻴﺘﻚ ﺯﻭﺍﺝ ... ﻣﻨﺴﻤﺤﺶ ﻟﻴﻚ
ﻳﺎﻣﻦ : ﺍﻟﻠﻪ ﻳﻬﺪﻳﻚ ﺍﻟﻮﺍﻟﻴﺪﺓ
ﻓﻮﺯﻳﺔ : ﺻﺎﻓﻲ ﺟﻴﺒﻬﺎ ﻧﺘﻌﺮﻑ ﻋﻠﻴﻬﺎ
ﻳﺎﻣﻦ : ﻭﺍﺧﺔ ... ﻭ ﻋﻨﺪﺍﻙ ﺗﺠﺒﺪﻱ ﻟﻴﻬﺎ ﺳﻴﺮﺓ ﺷﻲ ﺯﻭﺍﺝ
ﻓﻮﺯﻳﺔ : " ﻧﺰﻻﺕ ﻋﻠﻴﻪ ﺑﺎﻟﻤﻐﺮﻓﺔ " ﻣﺎﺷﻲ ﺷﻐﻠﻚ ... ﻧﺘﺎ ﺟﻴﺒﻬﺎ ﻭ ﺻﺎﻓﻲ