ملاحظة قبل ما تقروا :
البارت عارف عطلت بيه شوية .. فـ بداية من البارت الجاي حنظم التنزيل متع الحلقات
بحكم اني خلاص بنكمل امتحاناتي .. و شكرا ع التفهم .
#متلازمة عائلتي
#الحلقة 9
.....................................................
ألاء : هههههه شن يا ماما هيا نمشوا ؟ مازال عندنا هلبا حاجات بنشروها
فاطمة : ايه ايه .. يلا سلامتكم توا سلمولي على أمكم
جميلة : يوصل .. سلامات
و يمشوا
وصال (بصوت واطي) : صحيتي .. قريب متت
ألاء : حسيت بيك .. أمي و جميلة ما قصروش بكل .. حتى نديم حسيته تحشم هلباا
وصال تتلفت للخلف تشبح نديم وجميلة واقفين على محل ذهب من برا .. جميلة تشوف للعروض .. يتلفت نديم يسار يلقاها تشوفله .. وصال على طول تتلفت قدام و تكمل طريقها مع امها و اختها
.................
...............................
في حوش فتحي
هبة و امها سعاد بيروحوا بعد ما كلمهم هيثم و قاللهم هو قدام الكنشيلوا (الباب الخارجي) يستنى فيهم
سلمى سايرتهم و يهدرزوا لعند ما وصلوا للباب
هبة : عاد باش تجينا حتى انتي ..
سلمى : ايه اكيد
تفتح سعاد الباب و تطلع و وتطلع وراها هبة و تجي وراها سلمى
و فجأة تلقى هيثم واقف يستنى تشوفله و يشوفلها
هي كانت حاطة الوشاح حطان وخصلات شعرها طايحات و لابسة بلوزة طويلة و سروال
على طول سلمى تتحشم و تصكر الباب و تقعد واقفة شوية تفكر
هبة : ت هيااا خيرك قعدت واقف ؟
هيثم : ما في شي .. هيا قدامي
هبة : خير بلاك انت ؟ تنق علينا هيا هيا .. ما خليتناش حتى نهدرزوا كويس
هيثم : اسمعي الكلام يا سمينة خيرلك
هبة : ماااماا قوليله معش يقولي سمينة
سعاد : تحشموا عادي رانا في الشارع مش في الحوش
هيثم يضحك عليها
بعد ما وصلوا الحوش
هيثم : شن وضعهم الناس ؟
سعاد : ما شاء الله قمة في الرقي و الاخلاق ما فيش زيهم بكل
هبة : ايه حق .. احسن شي عندهم بنت من عمري بنبدا نكسد عندها ديما
هيثم يتفكر سلمى
هيثم : الطلوع هلبا ممنوع .. قوليلها حتى هي تجي !
هبة : ايح علينا عاد .. اصلا قلتلها قالت باهي
يفرح هيثم من داخل لكن مش عارف علاش
....................
...............................
تروح ندى من الكلية و تبدا تجهز لمرواحت امها من المستشفى و توتي كل شي لاي ضيف و وتت الغذاء و حتى من الزينة زينت للحوش .. وكل شوي تفكر في علي كمال و كل ما يخطر على بالها تحس في روحها تسخن من الحشم .. و مرات قلبها يدق بسرعة
...........
علي كمال في المكتب متعه و مقعمز يخدم و تخطر على باله ندى يضحك على جنب و يهز راسه
...........
يروحوا جميلة و نديم للحوش و معاهم البضايع اللي شروهم
.................
علي كمال في مكتبه حاس روحه مل من جو الشركة ومش متعود عليها .. خدي نقاله وطلع مشي لصاحبه حسن
.................
مع العشيات تروح نجاة أم ندى و تستقبلها ندى و الفرحة طالعة من عيونها شافت امها و اخيرا رجعت للحوش .. و جو الأقارب و الناس يحمدوا على سلامتها
................
مع المغرب تجي هبة و تدخل من الكنشيلوا .. تلقى نديم مقعمز ع طاولة الجنان البرا و شاد نقاله .. يشوفلها تبتسمله لن خدودها يصكروا على عيونها و هو في باله منو هادي .. تمشي تطق على باب الحوش
تفتح سلمى الباب
هبة (وهي تضحك) : انا جيييت
سلمى : هههههه اهلين فيك .. ادخلي
هبة : لا مستعجلة .. جبت بندير بيرتزا وتيت كل شي .. ضربت ع الخميرة ما لقيتش و ما لقيت حل الا نجي ناخد منكم شوية
سلمى : ايه عادي .. تفضلي ادخلي معاي المطبخ .. خلي ندورها
هبة : تمام ..
و يدخلوا للمطبخ
هبة : اسمعي خوك يلي مقعمزة برا ؟
سلمى : ايه خوي نديم علاش ؟
هبة : بسم الله ما شاء الله .. انا منبهرة الصراحة
سلمى : ههههههه
.......................
شوية و يدخل علي كمال بسيارته و ينزل و يلمح نديم مقعمز تجاهله على طول و نديم يشبحله و خلاص
..................
و تمد سلمى الخميرة لهبة
هبة : اصبري نبي الحمام حاشاك وين ؟
سلمى : بري يسار تلقيه قدامك .. اهو نستنى فيك هنا خلي ندير قهوة نهدرزوا شوية
هبة : تمام
و تطلع و بدل ما تمشي يسار تمشي يمين لعند غرف علي كمال و نديم
هبة : اي .. وين الحمام ؟
و بتولي هبة تقعد تتأمل في الفيلا و تشبح للثريا و علي كمال جاي لغرفته و فجأة يخبطوا في بعض و هبة تطيح ع الارض و تشوف لعلي كمال و فمها مفتوح و علي كمال مصدوم
علي كمال : منو انتي ؟
هبة تنوض من الارض : بسم الله ما شاء الله
علي كمال : نعم ؟
هبة : انا بنت جيرانكم الجدد .. جيت بندخل الحمام حاشاك ضعت في الطرق .. معلوم حوشكم قصدي فيلتكم كبيرة تريح فيها ههههه
علي كمال : اها مش مشكلة .. اهلا وسهلا (و يمشي بيدخل)
هبة (بصوت واطي) : انا منبهرة
علي كمال : كيف ؟
هبة : لا شي (و تمشي تجري لسلمى )
....................
هبة : سلللمى
سلمى : نعم شنو ؟
هبة : ما تقوليش حتى هذا خوك ؟
سلمى : من ؟ نديم ؟
هبة : لااا انا مشيت يمين ما لقيتش الحمام تلاقيت انا وخوك التاني
سلمى : قصدك علي كمال
هبة : ايه .. يا ودي بسم الله ما شاء الله انتي عايشة مع صواريخ
سلمى : هههههههههههه
هبة : انا منبهرررة .. تقول ابطال افلام .. اسمعي بخريهم و اقروا عليهم القران .. هما مرتبطين ؟
سلمى : نديم اللي خطوبته الخميس الجاي .. وعلي كمال ما اعتقدش
هبة : اكيدد مرتبط راجل زيه هو ما يقعدش فاضي .. سعدوود اللي بياخدوهم .. تعرفي كاني مش صغيرة راهو خديت علي كمال وجيتكم كنة
سلمى : هههههههههه انتي من الاخيررر هههههه
هبة : اسمعي .. اعطيني خميرتي بنمشي معش نقدر نتحمل انا هههه
سلمى : و القهوة ؟
هبة : بلاش منها مرة تانية
........................
...................
تروح وصال و امها و ألاء بعد ما شروا هلبا حاجات
ألاء : بعد هذا كله و قاعد مازلنا هلباااا حاجات
وصال : كان عليا انا اللي جي كويس و ساد
ألاء : بالله شن ؟ لازم كل شي يكون على اصوله وكاامل .. خلي يشوفوا حوش خالي احنا منو هههه
وصال : مش رايقتلك راهو
ألاء : عندك الحق اليوم تلاقيتي مع خطيبك و امي و جميلة حشموكم هلبا هههههههه
وصال : تضحكي قاعدة ؟ اقلبي وجهك من بحداي امشي
تمشي ألاء وهي تضحك
تتلوح وصال على فراشها من التعب و خطر على بالها نديم و حست عادي بدت تتقبل فيه عكس قبل كانت كارهاته ومش طايقاته .. و استغربت علاش معش كلمها ع النت
..............
.......................
في الليل موخر و الحوش هادي
علي كمال يمشي للمطبخ بياخد مية يدخل يلقى نديم ياكل في تفاحة .. يتجاهله و يفتح الثلاجة ياخد منها شيشة مية و هو طالع يلقى بوه فتحي وراه
فتحي : وينك يا علي كمال اليوم ؟ جيت موخر و روحت بكري من الشركة .. عندنا هلبا شغل وخوك نديم مش فاضي
يشوفله علي كمال ببرود
علي كمال : نجي امتى ما نبي ونروح امتى ما نبي ..
فتحي : الخدمة كلها تكدست على خوك علاء وعليا
علي كمال : مش موضوعي
فتحي : خيرك مولي هكي انت يا علي كمال ؟ تصرفاتك......
علي كمال : خيرك مستغرب ؟ مش انا بلا رباية و قليل أدب صح ولا ؟ مش هكي انت قلت ؟ علاش توا مستغرب في تصرفاتي ؟
نديم يشبحلهم وخلاص
فتحي : هذاكا موضوع وتصكر بالنسبة ليا .. خلاص انساه
علي كمال : انا ما ننساش يا بابا
و يفوت من جنبه يمشي لداره
علي كمال : قاعد يقولي انسى ؟ يسحابوا الموضوع ساهل عليااا
فتحي : لا حول ولا قوة الا بالله (ويمشي )
نديم يحط التفاحة بغل و يلحق علي كمال .. علي كمال يتلفت بيصكر باب داره يشوف نديم جايه
نديم (بصوت حاد) : علي كمال استنى
يصكر الباب في وجهه وبالمفتاح .. و نديم قربع الباب بإيده
نديم : علي كمال .. خلينا نتكلموا الموضوع طول اكثر من اللازم
علي كمال يتكنطى كيف يقوله طول اكثر من اللازم !
نديم : افتح خلي نتكلموا .. معش اطول الموضوع راهو طول اكثر من اللازم يا علي كمال
علي كمال يزيد يتكنطى منه و توصل حدها منه و يفتح الباب بقوة و من الغل يشد نديم من رقبته بإيد و الايد التانية مصكرها بقوة وحاطها قدام وجهه و كأنه بيعطيه بوكس و ملصقه ع الحيط
...................
نسرين : علاء .. نوض
علاء : شن في ؟
نسرين : في صوت دوشة لوطه و اصوات
علاء : خير شن في زعما ؟
و ينوض يجري يطلع يشوف يلقى بوه كيف طالع حتى هو بعد ما سمع دوشة
علي كمال (بعصبية) : كيف طول اكثر من اللازم ؟ ها ؟ قولي ؟ بعد ما تغلط فيا تجي تقولي طولت الموضوع ..لهالدرجة تحسابني مضحكة وتبيني نسامحكم و كأن ما صار شي ؟
و علي كمال يزيد يضغط على رقبته و نفسه بدي يهرب و نديم حاط ايديه الزوز على ايد علي كمال
علي كمال : جااااوبني هيا جاوبني .. متعود انت اصلا كل شي يجيك بالسااهل .. يا الولد المدلل للعيلة .. لكن حتشوف يا نديم ح ندمرك
و كيف علي كمال بيرخي ايده و بيسيب نديم
يجو علاء و فتحي
علاء : شن ادير انت ؟
و يحاول يدف علي كمال من على نديم .. يطلقه علي كمال و علاء يدفه
يطيح نديم على ركابه ويبدا يكح و ياخد في نفس بالسيف
فتحي : خيرك انت شن ادير ؟ بتقتل خوك ولا شن ؟
و مشي فتحي للمطبخ يجيب مية .. وعلي كمال واقف و وجهه عرق و داهش يشوف لنديم وعلاء بحداه و يوعى على نفسه و يدخل لغرفة نديم و يجيب بخاخ الأكسجين متع نديم
ياخده علاء منه : هاته جاي
و يجيب فتحي المية و يبخوله اكسجين و يستنشقه يتريح شوية و يشرب مية
علاء : شن كنت تحاول ادير انت ؟ بتقتل خوك ولا شن ؟
وعلي كمال ساكت
علاء : نكلم فيك رد عليا
فتحي : نقصوا صوتكم .. مش لازم أمكم تسمع مش ناقصها
علاء : خلي تسمع .. باش تعرف من الولد اللي ادافع عليه .. معقولة كان بيقتل نديم بين ايديه و عارفه عنده الربو وعنده مشاكل في التنفس ؟
فتحي : علي كمال معقولة هكي ادير لخوك ؟ تخنقه هكي.....
نديم : خلاص يا بوي ما صار شي .. اهو كويس انا
علاء : افرض ان انا وبوك ما جيناش شن كان بيصيرلك ؟ كنت حتموت بين ايديه
فتحي : بعيد الشر
علي كمال (بتوتر) : كنت ح نسيبه اصلا انا
نديم : ما تكبرش الموضوع يا علاء .. صح اصلا كان بيطلقني
علاء : كان ؟ بالله عليك ما اتضحكنيش يا نديم .. بعد هذا كله وقاعد تكذب و تدافع عليه
نديم : ما ندافعش عليه قلت الحق
علي كمال يتوتر و يمشي يدخل الحمام
فتحي : خلاص حصل خير .. كل واحد يمشي لغرفته هيا
و يمشوا و نديم يدخل لغرفته و يفكر في كلام علي كمال
" لهالدرجة تسحابني مضحكة وتبيني نسامحكم و كأن ما صار شي ؟"
" متعود انت اصلا كل شي يجيك بالسااهل .. يا الولد المدلل للعيلة "
علي كمال في الحمام و يغسل في وجهه بالمية الباردة يحاول يخفف من توتره
علي كمال (يشوف لروحه في المرايا) : ما صار شي .. خلاص
و يتذكر نديم كيف خنقه و كيف نفسه مقطوع
علي كمال : ما تضعفش يا علي كمال .. ما تنساش شن دارو فيك .. ما تضعفش
و يدخل لغرفته ويتلوح ع سريره و يحط راسه تحت المخدة
...........
....................................
ندى في غرفتها و مش جايها نوم .. تمشي تطمن على أمها تلقاها راقدة و ترجع لغرفتها تاني .. تحط راسها ع المخدة و تفكر في مواقفها اليوم مع علي كمال و ضحكت بصوت خفيف
............................
نديم يقعد مستاقظ في فراشه لعند الفجر بدون نوم و هو يفكر و يفكر
نديم : عنده الحق علي كمال .. عنده الحق .. اخ وخلاااص .. باهي و وصال ؟ مستحيل .. انا اصلا كيف فكرت في شي غلط ؟
نديم كان نادم انه ما وثقش في علي كمال و حاس انه غالط فيه
و فجأة تخطر على باله وصال لما شافها في المول .. هي من زمان عاجباته لكن اليوم زادت عجباته اكثر
................................
............................................
في الصبح :
علاء و نسرين في غرفتهم
نسرين : قولي شن صار امبارح في الليل ؟
علاء : شي شي
نسرين : اسمع قولي ما تخلينيش هكي .. متأكدة ان في حاجة صارت
علاء : فوتي الموضوع يا نسرين
نسرين : خلاص ما تبيش تقول .. تو ننزل نسأل لوطه تو يحكولي
علاء : ردي بالك تقولي لأمي ما عندها علم بشي
نسرين : خلاص امالا قولي
علاء : علي كمال و نديم تعاركوا (و حكالها كل شي )
...........
في المطبخ نسرين و خديجة يضموا في سفرة الفطور
علاء و فتحي مشوا الشركة و علي كمال ما طلعش من غرفته و نديم في الصالون و سلمى في غرفتها
نسرين : عمتي
خديجة : نعم
نسرين : سمعتي صوت امس في الليل ؟
خديجة : صوت شن ؟
نسرين : اه لا لا شي
خديجة : انتي ما تقوليش حاجة ع الفاضي .. شن في ؟
نسرين : نديم و علي كمال تعاركوا امبارح في الليل .. هما قالوا ما تقوليش لكن لازم تعرفي الصراحة انتي أمهم
خديجة : شنووو ؟ ( و تمشي لنديم )
نسرين : اييييه يا خديجة ألهي في صغارك شوية هههههه
خديجة : نديم ؟
نديم : نعم يا امي
و قعمزت بحداه
خديجة : تعاركت انت وخوك علي امبارح ؟
نديم : من قالك ؟
خديجة : معناها حق الكلام .. خيركم علاش تعاركتوا ؟
نديم : مافي شي يا أمي .. تناقشنا بس هذا اللي صار .. ما ادوريش انتي
خديجة : على نفس الموضوع وله ؟ اسمع يا ولدي نديم .. خوك فهمته غلط راهو مستحيل يكلم خطيبتك من وراك .. انا مربيتكم و عارفة كل واحد شن طبعه
نديم : عارف يا أمي عارف
خديجة : باهي علاش قاعدين تتعاركوا ؟
نديم : علي كمال طبعه صعب .. لكن ما ادوريش انتي كل شي ينحل
خديجة : اليوم اختك جميلة مش جاية .. بنطلع انا وياك نكملوا باقي التبضيع
نديم : باهي تمام نص ساعة و نطلعوا
سلمى : ماما بنمشي لحوش جيرانا هبة عادي ؟
خديجة : باهي بري
نديم : اسمعي ما تعطليش نص ساعة و روحي
سلمى : ايح بااهي
.........
تمشي سلمى و و تطق ع الباب الخارجي و كان هيثم في الجنان ينظف فيه
يفتح الباب ويلقى قدامه سلمى يفرح من داخل
هيثم : أهلا
سلمى (بتوتر) : أهلين .. هبة موجودة ؟
هيثم : اي موجودة تفضلي
سلمى : شكرا
تدخل سلمى و في جرتها هيثم يوقف قدام الباب
هيثم (بصوت عالي) : هبببة يااا هبببة
هبة : نعم خيرك يا بلوة تعيط شن في ؟
يفنصلها بعيونه بمعنى اسكتي
هبة : خيرك من هناك ؟
تمد راسها تلقى سلمى
هبة : سلمممى .. اهلييين نورتينا
سلمى : سلمك
هبة : ادخلي ادخلي .. باهي اللي جيتي والله مكسدة ما عرفتش شن ندير
سلمى : هههه حتى انا زيك
و يدخلوا و يرجع هيثم للجنان
................
.................................
علي كمال في غرفته متمدد ع السرير و شاد نقاله و شوي يطق الباب
علي كمال : تفضل
خديجة : فاضي ؟
علي كمال (يضم رجليه و يقعمز) : ادخلي
خديجة (تجي تقعمز بحداه) : خيرك ما جيتش ع الفطور ؟
علي كمال : ما عنديش نية
خديجة : ما تبيش تمشي للشركة ؟
علي كمال : بعدين شوية
خديجة : تعاركت انت و نديم امس ؟
علي كمال يقعد ساكت
خديجة : حاسة فيك ان.....
علي كمال (يقاطعها) :معليشي لكن ما في حد حاس بيا .. تخايلي خوهم اللي عايش معاهم ثلاثين سنة مش واثقين فيه ؟
خديجة : عندك الحق .. لكن واضح خوك نديم نادم هلباا
علي كمال : شن ينفع الندم ؟ بعد شنو يا أمي ؟ يومها لما بوي سبني و ضربني ما في حد دافع عليا و لا قال حتى كلمة .. لعند توا كل ما نتفكر...(يحس بغصة و يسكت)
خديجة تجبده و تضمه لصدرها
خديجة : عندك الحق يا وليدي عندك الحق .. انا عارفاتك لكن ربي يهديه خوك علاء فهم الموضوع غلط و استعجل .. الله غالب توا اللي صار صار .. بوك نادم و خوك نادم كون احسن منهم و سامحهم
علي كمال ساكت و بس
خديجة : توا نوض برا للشركة و تعوذ من الشيطان
يبتسملها و تطلع
علي كمال : هه قتلك سامحهم .. قاعدين ما يعرفوش علي كمال .. كان ما اندمهمش على الكف يلي ضربه ليا بوي و الكلام اللي قاله معش يبدا اسمي علي كمال
يجهز علي كمال نفسه و يطلع يلقى نديم في الصالون يشوفلهم و يتجاهله و فجأة يطق باب الحوش و علي كمال يفتح الباب
رمضان (ببرود) : السلام عليكم
علي كمال (بنفس البرود) : وعليكم السلام
يسمع نديم صوت خاله رمضان و يجي
نديم : خالي .. شن حالك ؟
رمضان : ولد أختي مبارك بتولي عريس ههههه (ويسلم عليه بحرارة)
علي كمال يجبد روحه و يطلع و بدي متعود على معاملة رمضان ليه و لا يحرك فيه شي اصلا
..................
....................................
بعد ما سلمى و هبة يهدرزوا
سلمى : هيا انا نستأذنك بنروح
هبة : علاااش خيرك زيدي اقعدي
سلمى : لا لا بنمشي قلتلهم مش معطلة
هبة : باهي على راحتك .. لكن مش محسوبة الجية هادي راهو
سلمى : هههه باهي حاضر
و توصلها للباب و هبة تخش و سلمى وهي طالعة تشبح هيثم عاطيها بظهره و ماسك طوبو المية يبخبخ في الجنان
و هي فايتة يتلفت هو بالطوبو جهتها هي و يبخها بالمية تشهق سلمى بصوت عالي و هيثم ينصدم .. يرمي الطوبو و يقرب منها
هيثم : اسف والله مش قصدي ما شفتكش
سلمى (و هي تمسح في وجهها ): مش مشكلة
هيثم : نجيبلك منديل تمسحي ؟
سلمى : لا لا مافيش داعي
هيثم : اسف مرة تانية
سلمى : حصل خير
و تمشي تجري تروح و يقعد هيثم يشوفلها لن تطلع
......................
......................
ندى بعد ما ضمت الحوش و جهزت الفطور لأمها و بوها وخوها
قررت تدخل تستريح في دارها قبل ما يجي حد يحمد على سلامة أمها
تتمدد ع السرير تشبح يمينها تلقى كتابها يلي كان عند علي كمال و بدون ما تحس تلقى روحها شاداته و تفتحه ع السريع وعلى طول تلاحظ شي
تلاحظ يلي داره علي كمال لما خربش سمايل الحزين و رسم سمايل مبتسم .. تضحك ضحكة خفيفة و تحس روحها فرحانة مش عارفة علاش
..................
............................
يفوت اليوم عادي ع الكل
نديم و أمه طلعوا و جهزوا اللي ناقص
و وصال حتى هي طلعت مع امها و اختها تكمل باقي التجهيزات
علي كمال في الشركة
ندى تستقبل في الضيوف كالعادة
هيثم و وليد بدو يتلاقوا ويهدرزوا أكثر من قبل
ـــــــــــــــــــــــــــــــــــــــــــــــــــــــــــــــ
"* بعد يوم : يوم الخميس : يوم حفلة الخطوبة *"
(( الساعة 8:30 في الليل
علي كمال في المربوعة متلوح ع الارض مغمى عليه والدم ينزف منه
و على بعد مسافة بسيطة قرب باب المربوعة نديم ياخذ في نفس بصعوبة
و فجأة يهرب عليه النفس و يغمى عليه حتى هو .. و يقعدوا مرميين ع الارض ..... ))
ــــــــــــــ
رجوع بالأحداث :
الصبح :
ألاء : وصاال هيا نوضي يا همي حفلتك اليوم راهو
وصال : باهي خلي نزيد شوية
ألاء : ما تخلينيش نتعصب عليك .. راهو اناديلك ماما
تلوح وصال الغطاء من عليها و تنوض من السرير
وصال : اوووف اوووف
ألاء : اسمعي ننصحك ما تمشيش لماما بوجهك المقلوب هذا
وصال : باهي وانتي كل شوية تهددي فيا بماما .. اهو نضت و بندخل الحمام
ألاء : هيا فيسع شوية و بنات العيلة بيجوا و بنبدوا نجهزوا .. انزلي و المزينة بتجيك بعد ساعة ونص هيا فيسع
وصال : باهي باهي
...............
.....................
فتحي : علاء انت برا للشركة اليوم هو في شوية خدمة حلها و تعالى
علاء : ايه عارف بنمشي مش معطل .. نديم كان تبي حاجة من برا قولي
نديم : لالا اصلا شوية و بنطلع بنشري شن ناقص و بتمشي معاي جميلة
علاء : باهي تمام .. (و يمشي )
فتحي : علي كمال وين ؟ خيره مش معاك
نديم (يشبحله باستغراب) : كيف يعني مش معاي ؟
فتحي : خيره ما يعولش معاك ؟ مفروض واقف معاك توا
نديم : بوي .. شكلك ناسي اللي درته فيه يومها ! راهو ولدك صاعب يرضى و عارفه انت
فتحي : قلناله أنسى خلاص .. احنا عيلة مهما كان مفروض ننسوا و نوقف مع بعض في كل الظروف
نديم يتعفلق شوية و يسكت
فتحي : هيا انا طالع بنشري التموين
نديم : باهي تمام
يوقف نديم شوية و هو يفكر و يمشي يلحق فتحي
نديم : بابا .. اسمع
فتحي : نعم شنو ؟
نديم : ينقولك حاجة
فتحي : شن في ؟
نديم (بصعوبة) : إلغيه
فتحي : شن هو .؟
نديم : موضوع الخطوبة و العرس و موضوع وصال بكبره
يشبحله فتحي شبحه تخوف و يتلفت يمشي
نديم : يا بوي خلاص معش نبي .. الموضوع هذا جابلي مشكلة مع اقرب شخص ليا
فتحي : قول لأقرب شخص ليك ياسر دلال زايد .. و انت بنعتبر اني ما سمعتش منك هذا الكلام
نديم : غير افهمني ..
فتحي : قاعد نتكلم معاك بهدوء .. جميلة تستنى فيك .. بروا اشرو اللي بتشروه
و يمشي و نديم يرجع للحوش
................
......................
نسرين : خيرهم حوش عمكم خالد قاعدين ما جوش ؟
خديجة : توا يجو
نسرين : هما قلتهم خير .. تجي سالمة تقعمز وتبدا تشكي راسي و ركابي و اشبح شن
جميلة : تو تجي أسماء تعول حتى هي عادي
نسرين : أسماء ؟!؟ هههههههه هاديكي مدمنة القرايا اللي مدايرة روحها تحضر في الذرة من لما جيت هنا ما شفتها الا خمسة مرات ههههه
سلمى : و ديما لابسة نظارات هاري بوتر مغطيات نص وجهها هههههه
جميلة : عيب عليكم و الله عيب
نسرين : عيب ع اللي يدير في العيب .. المهم شكلها سالمة متضايقة على خاطر كانت تبي وصال لوليد
خديجة : ايح .. هذاكا موضوع وتصكر خلاص
نديم : السلام عليكم .. موضوع شن ؟
خديجة : لا شي
نديم : جميلة كان واتية هيا خلي نمشوا
جميلة : ايه هيا شوية بس
يجي علي كمال و في يده سورية
علي كمال : سلمى كان فاضية إكويلي سوريتي بنمشي الكلية
سلمى : حاضر هي .. خلي نغسل يديا بس
نديم : هيا شن ؟
جميلة : شوية بس خلي نكمل اللي في ايدي .. ولا شن عريسنا معش يقدر يصبر بكل
نسرين : سبحان الله مفروض علي كمال هو اللي كان العريس اليوم مش نديم
بووم .. الكل ينصدم و يتوتر و الجو فجأة تكهرب و نديم يشوف لعلي كمال وهو متعصب و شاد روحه بالسيف متعصب من امه و بوه و من روحه و علي كمال بدون ردة فعل
نسرين : لكن يلا .. الدنيا نصيبات
يحط علي كمال السورية ع الكرسي ويمشي لداره و نديم يطلع و يسيبهم
خديجة (تفنص في نسرين) : شن اللي قلتيه توا ؟ هو ناقصين مشاكل ولا شن ؟ ما تعرفيش تشدي لسانك بكل ؟
نسرين : شن اللي قلته انا ..تبوني نتبكش عادي راهو
خديجة : يا ريت
تضحك نسرين على جنب بخبث .. و جميلة تعصبت من نسرين هلبا
جميلة : المهم ماما خالتي وردة مش جاية من الشرق هي و بناتها ؟
خديجة : عاطيتها علم .. قالت شن بيجيبني من الشرق قالت تو نجي في العرس وخلاص
جميلة : اها باهي
......................
......................................
علي كمال يبطم في ازرار سوريته بعد ما كوتها له سلمى
يجي نديم يلقى بابه مفتوح يطق و يدخل .. يشوفله علي كمال و يقعمز ع السرير يلبس في "شخشيره" و كندرته و يجي يقعمز جنبه نديم
نديم (بدون أي مقدمات) : انا اسف يا علي كمال
علي كمال ساكت و خلاص و يلبس
نديم : اسف على خاطر ما صدقتكش يومها .. فجأة دماغي استك معش عرفت نفكر .. سامحني .. في النهاية خوك الصغير و غلط فيك سامحه
يوقف علي كمال بعد ما لبس
علي كمال : وباهي ؟ و الكف اللي كليته من بوك ؟ و الكلام اللي قالهولي هذا كيف بنصرفه و نسامحكم !
نديم : الغلط غلطي انا .. انا لو ما كبرتش الموضع يومها و سمعت كلام علاء ما كانش حيصير اللي يصير ..
علي كمال : نبي نعرف انت يا نديم كيف تصدق اني ندير فيك هكي و نكلم خطيبتك من وراك ؟! انا كل ما نفكر بنختش
نديم : ماهو حيوان انا ... في لحظة دماغي وقف معش عرفت نفكر صح أثر فيا كلام علاء مش عارف كيف .. الموضوع كله غلطي انا و امسحه في وجهي و سامحني .. خلاص مش متعود ان ما نكلموش بعض
علي كمال : درته بإيدك يا خوي
نديم : عارف ..لكن كون انت احسن مني .. و انت عارف اليوم خطبتي اللي انحشيت فيها و النية طايرة منها
علي كمال : ربي يهنيك
نديم : شن قصدك ؟ ما تبيش تكون معاي اليوم ؟
علي كمال (بتردد) : لأ
نديم : بالله عليك يا علي .. اصلا بالسيف متحمل الوضع ..
علي كمال : موضوعك يا نديم .. معليشي قلبي ما صفاش منك
وكيف جاي علي كمال بيطلع ...
نديم : باهي اسمع نطلب منك طلب واحد وبس و بعدها دير اللي تبيه !
علي كمال يتلفتله بفضول
علي كمال : شن هو ؟
نديم : .......................... .
.................................
.............................................
رأيكم في التعليقات ..
و صوتوا و حطوا نجمة للبارت ...