ﺧﺮﺟﺎﺕ ﻣﻦ ﻏﺮﻓﺘﻮ ﻭ ﺭﺟﻌﺎﺕ ﻟﺒﻴﺘﻬﺎ ... ﻳﺎﻣﻦ ﺟﻠﺲ ﻓﻄﺮﻑ ﺍﻟﺴﺮﻳﺮ ﻛﻴﻔﻜﺮ ... ﺿﺮﻭ ﻗﻠﺒﻮ ﻷﻧﻬﺎ ﻣﺼﺮﺓ ﻣﺎﺗﺮﺗﺎﺑﻄﺶ ﺑﻴﻪ ... ﻟﻜﻦ ﻫﻮ ﻣﺴﺘﺤﻴﻞ ﻳﺘﺮﺍﺟﻊ ﺧﺎﺻﺔ ﻓﺎﺵ ﺷﺎﻑ ﺣﻤﺎﺱ ﻭ ﻣﻮﺍﻓﻘﺔ ﺑﺎﻫﺎ ... ﻭ ﻣﻨﻴﻦ ﻋﺮﻑ ﺩﺍﺑﺔ ﺃﻧﻬﺎ ﻣﺎﻋﻨﺪﻫﺎ ﺣﺘﻰ ﻓﻜﺮﺓ ﻋﻠﻰ ﻣﻜﺎﻥ ﻭ ﻻ ﺷﻨﻮ ﻭﻗﻊ ﻣﻊ ﺭﺋﺒﺎﻝ ...
ﻏﺎﺩﻱ ﻳﺨﻠﻲ ﺍﻷﻣﻮﺭ ﻛﻴﻒ ﻣﺎﻫﻲ ... ﻭ ﻳﺨﻠﻴﻬﺎ ﺗﻮﺍﻓﻖ ﺗﺰﻭﺝ ﺑﻴﻪ ... ﻫﻮ ﺃﻧﺴﺐ ﺷﺨﺺ ﻟﻴﻬﺎ ﻭ ﻫﻮ ﺍﻟﻲ ﻳﺴﺘﺎﻫﻠﻬﺎ ... ﻣﺎﺷﻲ ﻭﺍﺣﺪ ﻣﺎﺿﻴﻪ ﻭ ﺣﺎﺿﺮﻭ ﻛﺤﻠﻴﻦ ﻭ ﻣﺴﺘﻘﺒﻠﻮ ﻣﺠﻬﻮﻝ ... ﻭ ﻣﻦ ﻧﻬﺎﺭ ﺗﻌﺮﻓﺎﺕ ﻋﻠﻴﻪ ﺭﺟﻌﺎﺕ ﺷﺨﺺ ﺁﺧﺮ ﻏﻴﺮ ﺟﻮﻻﻥ ﺍﻟﻲ ﻛﻴﻌﺮﻑ ... ﻭﺍﻋﺪ ﻧﻔﺴﻮ ﻳﺮﺟﻊ ﺍﻟﺒﺴﻤﺔ ﻟﻮﺟﻬﺎ ﻭ ﻳﺨﻠﻴﻬﺎ ﺗﻨﺴﻰ ﺭﺋﺒﺎﻝ ﻛﺄﻧﻪ ﻋﻤﺮﻭ ﻛﺎﻥ ...
ﻣﺮﻭ ﺃﻳﺎﻡ ﻋﻠﻰ ﺍﻟﺤﺪﻳﺚ ﺍﻟﻲ ﺿﺎﺭ ﺑﻴﻦ ﺟﻮﻻﻥ ﻭ ﺑﺎﻫﺎ ... ﻛﺎﻧﺖ ﻣﻜﺘﺨﺮﺝ ﻣﻦ ﺑﻴﺘﻬﺎ ﺣﺘﻰ ﺗﺄﻛﺪ ﺃﻧﻪ ﺧﺎﺭﺝ ... ﻭ ﻛﻼﻣﻬﺎ ﻣﻊ ﺧﺪﻳﺠﺔ ﺑﺎﺭﺩ ﻭ ﻗﻠﻴﻞ ... ﻇﻨﺎﺕ ﺃﻥ ﺣﺪﻳﺜﻬﺎ ﻣﻊ ﻳﺎﻣﻦ ﻏﺎﺩﻱ ﻳﻨﻬﻲ ﺍﻷﻣﻮﺭ ... ﺣﺘﻰ ﻛﺘﻔﺎﺟﺄ ﺑﻘﺪﻭﻣﻮ ﻫﻮ ﻭ ﻣﻮ ﻟﺒﺎﺭﺡ ... ﺑﺎﺵ ﻳﻄﻠﺒﻮ ﻳﺪﻫﺎ ﻣﻦ ﺑﺎﻫﺎ ﺭﺳﻤﻴﺎ ...
ﻫﺒﻄﺎﺕ ﺗﺤﺖ ﺗﻬﺪﻳﺪ ﺑﺎﻫﺎ ﺍﻟﻲ ﻭﺻﻼﺗﻮ ﻟﻴﻬﺎ ﺧﺪﻳﺠﺔ ﻭﺍﺿﺢ ... ﻣﺎﺑﺪﻻﺗﺶ ﺣﻮﺍﻳﺠﻬﺎ ﻭ ﻣﺪﺍﺭﺕ ﺣﺘﻰ ﺣﺎﺟﺔ ... ﻧﺰﻻﺕ ﻋﻨﺪﻫﻢ ﺑﻤﻼﺑﺲ ﻋﺎﺩﻳﺔ ﻭ ﻭﺟﻪ ﺷﺎﺣﺐ ... ﺟﻠﺴﺎﺕ ﺟﻨﺐ ﻓﻮﺯﻳﺔ ﺍﻟﻲ ﻧﺎﺿﺖ ﻛﺘﺒﻮﺱ ﻓﻴﻬﺎ ﻭ ﺗﻌﻨﻖ ... ﻓﺮﺣﺎﻧﺔ ﺑﺎﺧﺘﻴﺎﺭ ﻭﻟﺪﻫﺎ ... ﺟﻮﻻﻥ ﻋﺰﻳﺰﺓ ﻋﻠﻴﻬﺎ ﻭ ﺯﺍﺩﺕ ﻣﻨﻴﻦ ﻋﺮﻓﺎﺕ ﻭﻟﺪﻫﺎ ﻛﻴﺒﻐﻴﻬﺎ ...
ﻣﺎﻫﺰﺍﺗﺶ ﻋﻨﻴﻬﺎ ﻓﻴﻬﻢ ... ﭼﻠﺴﺎﺕ ﻭﺳﻄﻬﻢ ﻛﺘﺴﻤﻌﻬﻢ ﻛﻴﺘﺎﻓﻘﻮ ﻋﻠﻰ ﻛﻠﺸﻲ ... ﺿﺤﻜﺎﺕ ﻓﺨﺎﻃﺮﻫﺎ ﻣﻦ ﺍﺳﺘﻌﺠﺎﻝ ﻳﺎﻣﻦ ... ﻃﻠﺐ ﺍﻟﻌﻘﺪ ﻳﻜﻮﻥ ﺑﻌﺪ ﺃﺳﺒﻮﻉ ﻭ ﺑﺎﻫﺎ ﻭﺍﻓﻖ ﺑﺪﻭﻥ ﺍﻋﺘﺮﺍﺽ ... ﻗﺮﺍﻭ ﺍﻟﻔﺎﺗﺤﺔ ﻭ ﺑﻌﺪﻣﺎ ﺿﺎﻳﻔﻮﻫﻢ ﻏﺎﺩﺭﻭ ...
ﻣﺮ ﻛﻠﺸﻲ ﺑﺴﺮﻋﺔ ﻭ ﺭﺟﻌﺎﺕ ﻃﻠﻌﺎﺕ ﻟﺒﻴﺘﻬﺎ ... ﺑﻌﺪ ﺗﻮﺻﻴﺔ ﺑﺎﻫﺎ ﻻ ﺗﻔﺴﺪ ﺍﻷﻣﻮﺭ ... ﭼﻠﺴﺎﺕ ﻓﺒﻴﺘﻬﺎ ﻭﺳﻂ ﺍﻟﻈﻠﻤﺔ ﺩﻳﻚ ﺍﻟﻠﻴﻠﺔ ﻭ ﻫﻲ ﻛﺘﻔﻜﺮ ... ﻭﺍﺵ ﺗﻔﺠﺮ ﺍﻟﻘﻨﺒﻠﺔ ﻗﺒﻞ ﻭ ﻻ ﺗﺨﻠﻲ ﺣﺘﻰ ﻳﻜﺘﺎﺷﻔﻮ ﺑﻨﻔﺴﻬﻢ ... ﻣﺎﺑﻘﺎﺵ ﻓﻴﻬﺎ ﺭﺍﺳﻬﺎ ﻓﻬﻲ ﺗﺴﺘﺎﻫﻞ ﺷﻨﻮ ﻏﻴﻮﻗﻊ ... ﻟﻜﻦ ﺍﻟﻲ ﺑﻘﺎﺕ ﻓﻴﻬﺎ ﻫﻲ ﻓﻮﺯﻳﺔ ﺑﻌﺪﻣﺎ ﺷﺎﻓﺖ ﻓﺮﺣﺘﻬﺎ ...
🍂 ﺩﻗﺎﺕ ﻓﺎﻟﺒﺎﺏ ﺑﺸﻮﻳﺔ ﻭ ﺣﻼﺗﻮ ... ﺩﺧﻼﺕ ﻭ ﻫﻲ ﺗﺒﺎﻥ ﻟﻴﻬﺎ ﺟﻮﻻﻥ ﭼﺎﻟﺴﺔ ﻋﻠﻰ ﺍﻟﻔﻮﻃﻮﻱ ﻭ ﻣﺴﻨﺪﺓ ﻋﻠﻰ ﺍﻟﺠﻨﺐ ﻭ ﺣﺎﻃﺔ ﺫﻗﻨﻬﺎ ﻋﻠﻰ ﻳﺪﻳﻬﺎ ... ﻗﺮﺑﺎﺕ ﻋﻨﺪﻫﺎ ﺯﻳﻨﺐ ﻭ ﻗﺮﺩﺍﺕ ﻗﺪﺍﻣﻬﺎ ... ﻟﻤﺤﺎﺕ ﻋﻨﻴﻬﺎ ﻣﺴﺪﻭﺩﻳﻦ ﻭ ﺷﻔﺎﺭﻫﺎ ﻓﺎﺯﮔﻴﻦ ... ﺁﺛﺎﺭ ﺍﻟﺪﻣﻮﻉ ﺑﺎﻗﻴﻴﻦ ﻋﻠﻰ ﺧﺪﻭﺩﻫﺎ ... ﺗﺤﺴﺮﺍﺕ ﻋﻠﻴﻬﺎ ﺯﻳﻨﺐ ...
ﺣﻄﺎﺕ ﻳﺪﻫﺎ ﻋﻠﻰ ﺷﻌﺮ ﺟﻮﻻﻥ ﻣﺮﺭﺍﺗﻬﺎ ﺑﻠﻄﻒ ... ﺣﻼﺕ ﺟﻮﻻﻥ ﻋﻨﻴﻬﺎ ﺷﺎﻓﺖ ﻓﺰﻳﻨﺐ ... ﻧﻈﺮﺗﻬﺎ ﺍﻟﺤﺰﻳﻨﺔ ﺍﻟﻲ ﺣﺎﻣﻠﺔ ﺃﻟﻢ ﻛﺒﻴﺮ ﺧﻼﺕ ﻋﻨﻴﻦ ﺯﻳﻨﺐ ﻳﺪﻣﻌﻮ ... ﺟﻠﺴﺎﺕ ﻋﻠﻰ ﺭﻛﺎﺑﻴﻬﺎ ﻭ ﻋﻨﻘﺎﺕ ﺟﻮﻻﻥ ﺑﻘﻮﺓ ... ﺑﺎﺩﻻﺗﻬﺎ ﺟﻮﻻﻥ ﺍﻟﻌﻨﺎﻕ ﻭ ﺑﺪﺍﻭ ﻳﻄﻠﻌﻮ ﺷﻬﻘﺎﺗﻬﺎ ... ﺑﻜﺎﺕ ﻟﻤﺪﺓ ﻃﻮﻳﻠﺔ ﻭ ﺯﻳﻨﺐ ﺑﻜﺎﺕ ﻣﻌﻬﺎ ...
ﺑﻌﺪﻣﺎ ﻧﺸﻔﻮ ﺩﻣﻮﻋﻬﺎ ﻭ ﻫﺪﺍﺕ ﺷﻮﻳﺔ ... ﺟﻠﺴﺎﺕ ﺯﻳﻨﺐ ﺟﻨﺒﻬﺎ ﻭ ﺷﺪﺍﺕ ﻓﻴﺪﻫﺎ ﻛﺘﻜﻠﻢ ﺑﺠﺪﻳﺔ ...
ﺯﻳﻨﺐ : ﺟﻮﻻﻥ ﻭﺍﻓﻘﻲ ... ﺑﻘﺎﺋﻚ ﻫﻨﺎ ﻏﺎﺩﻱ ﻳﺰﻳﺪ ﻳﺪﻣﺮﻙ ... ﻳﺎﻣﻦ ﻻ ﻋﺎﻭﺩﺗﻲ ﻟﻴﻪ ﻛﻠﺸﻲ ﻳﻘﺪﺭ ﻳﺘﻔﻬﻤﻚ ... ﻭ ﻳﺨﻠﻴﻚ ﺣﺘﻰ ﺗﺮﺗﺎﺣﻲ ﻭ ﻧﺘﻲ ﺗﻘﺮﺭﻱ ﻭﺍﺵ ﺗﻜﻤﻠﻲ ﻭ ﻻ ﻻ ... ﻻ ﻛﺎﻥ ﻛﻴﺒﻐﻴﻚ ﻛﻴﻒ ﻗﺎﻝ ﻏﻴﺘﻔﻬﻢ ... ﺍﻟﻤﻬﻢ ﺗﺨﺮﺟﻲ ﻣﻦ ﻫﻨﺎ ... ﺑﺎﻙ ﻋﻤﺮﻭ ﻏﺎﺩﻱ ﻳﺘﺒﺪﻝ ... ﻭ ﺩﺍﻙ ﺍﻟﻲ ﻣﺸﺎ ﺑﻌﺪ ﺍﻟﻲ ﻭﻗﻊ ﺑﻴﻨﺎﺗﻜﻢ ﻣﻴﺴﺘﺎﻫﻠﺶ ﺩﻣﻮﻋﻚ
ﺟﻮﻻﻥ : ﻋﻴﻴﺖ ... ﻛﺮﻫﺖ ﺭﺍﺳﻲ ﻭ ﻛﺮﻫﺘﻮ
ﺯﻳﻨﺐ : ﻏﻴﻨﺪﻡ ﺑﺰﺍﺍﻑ ... ﻓﻴﻦ ﻫﻮ ﺩﺍﻙ ﺍﻟﺤﺐ ﻛﻮﻟﻮ ... ﺩﻏﻴﺎ ﺳﻤﺢ ﻓﻜﻠﺸﻲ ﻭ ﻣﺸﺎ ﺑﺴﻬﻮﻟﺔ
ﺟﻮﻻﻥ : " ﺿﺎﺭﺕ ﺷﺎﻓﺖ ﻓﻴﻬﺎ ﻭ ﺗﺮﺳﻤﺎﺕ ﺍﺑﺘﺴﺎﻣﺔ ﺑﺎﻫﺘﺔ ﻋﻠﻰ ﺷﻔﺎﻳﻔﻬﺎ " ﺃﺻﻼ ﻋﻤﺮﻭ ﻗﺎﻟﻬﺎ
ﺑﻘﺎﺕ ﻣﻌﻬﺎ ﺯﻳﻨﺐ ﺷﻮﻳﺔ ﻋﺎﺩ ﻏﺎﺩﺭﺍﺕ ... ﺷﺪﺍﺕ ﻃﺎﻛﺴﻲ ﻭ ﻣﺸﺎﺕ ﻟﻠﻤﻄﻌﻢ ﻓﻴﻦ ﻏﺘﻼﻗﻰ ﺑﺈﻟﻴﺎﺱ ... ﺩﺧﻼﺕ ﻛﺘﻘﻠﺐ ﻋﻠﻴﻪ ﺣﺘﻰ ﺑﺎﻥ ﻟﻴﻬﺎ ... ﭼﺎﻟﺲ ﻓﺎﻟﻄﺒﻠﺔ ﻛﻴﻠﻌﺐ ﺑﺎﻟﻜﻮﻧﻄﺎﻛﺖ ﻭ ﺳﺎﻫﻲ ... ﺑﻘﺎﺕ ﻭﺍﻗﻔﺔ ﻛﺘﺸﻮﻑ ﻓﻴﻪ ... ﻣﺆﺧﺮﺍ ﻻﺣﻈﺎﺕ ﺑﻠﻲ ﻣﺰﺍﺟﻮ ﻭ ﺗﺼﺮﻓﺎﺗﻮ ﺗﻐﻴﺮﻭ ... ﻣﺎﻋﺮﻓﺎﺗﺶ ﺍﻟﺴﺒﺐ ﻭ ﻭﻗﺘﻤﺎ ﺳﻮﻻﺗﻮ ﻛﻴﻘﻮﻝ ﻟﻴﻬﺎ ﻭﺍﻟﻮ ... ﻟﻜﻦ ﻣﻦ ﺳﻔﺮ ﺭﺋﺒﺎﻝ ﺭﺟﻊ ﻗﻠﻴﻞ ﻓﻴﻦ ﻛﻴﻀﺤﻚ ...
ﻭ ﺩﻏﻴﺎ ﻛﻴﺘﻌﺼﺐ ... ﺷﺤﺎﻝ ﻣﻦ ﻣﺮﺓ ﻏﻮﺕ ﻋﻠﻴﻬﺎ ﺑﺪﻭﻥ ﺳﺒﺐ ... ﺗﻨﻬﺪﺍﺕ ﻭ ﻗﺮﺑﺎﺕ ﻟﻌﻨﺪﻭ ... ﺟﺮﺍﺕ ﺍﻟﻜﺮﺳﻲ ﻭ ﻫﻮ ﻳﺸﻮﻑ ﻓﻴﻬﺎ ... ﺍﺳﺘﻘﺒﻠﻬﺎ ﺑﺎﺑﺘﺴﺎﻣﺔ ﻭ ﻫﺰ ﻛﻔﻬﺎ ﻃﺒﻊ ﻋﻠﻴﻪ ﻗﺒﻠﺔ ... ﺍﺑﺘﺎﺳﻤﺎﺕ ﻟﻴﻪ ﺑﺪﻭﺭﻫﺎ ﻭ ﻃﻠﺒﻮ ﺍﻷﻛﻞ ... ﺑﻌﺪﻣﺎ ﺗﻨﺎﻭﻟﻮ ﻭﺟﺒﺘﻬﻢ ﻭ ﺟﺎﺑﻮ ﻟﻴﻬﻢ ﻗﻬﻮﺓ ... ﺣﻄﺎﺕ ﻣﺮﻓﻘﻴﻬﺎ ﻋﻠﻰ ﺍﻟﻄﺒﻠﺔ ﻣﻘﺮﺑﺔ ﻟﻴﻪ ﻭ ﺳﻮﻻﺗﻮ ...
ﺯﻳﻨﺐ : ﺇﻟﻴﺎﺱ ﻭﺍﺵ ﻭﺍﻗﻌﺔ ﺷﻲ ﺣﺎﺟﺔ ؟
ﺇﻟﻴﺎﺱ : ﺑﺤﺎﻻﺵ
ﺯﻳﻨﺐ : ﻋﻨﺪﻙ ﺷﻲ ﻣﺸﻜﻴﻞ ... ﻣﺨﺎﺻﻢ ﻣﻊ ﺷﻲ ﺣﺪ ... ﻣﺎﻧﻌﺮﻑ
ﺍﻟﻴﺎﺱ : ﻻ ... ﻣﻜﺎﻳﻦ ﻭﺍﻟﻮ ﻣﻦ ﻫﺎﺩﺷﻲ
ﺯﻳﻨﺐ : ﻣﺎﻳﻤﻜﻨﺶ ﻫﺎﺩ ﺍﻟﺘﻐﻴﺮ ﻓﺠﺄﺓ ... ﻣﻤﻜﻦ ﺗﻌﺎﻭﺩ ﻟﻴﺎ ... ﺑﺎﺵ ﻣﺎﻧﺒﻘﺎﺵ ﺑﺎﻟﻲ ﻣﺸﻄﻮﻥ ﻋﻠﻴﻚ ... ﺑﺎﺭﻛﺔ ﻏﺎ ﺟﻮﻻﻥ ﻭ ﺍﻟﻲ ﻭﺍﻗﻊ ﻣﻌﻬﺎ
ﺇﻟﻴﺎﺱ : ﻋﻼﺵ ﻣﺎﻟﻬﺎ
ﺯﻳﻨﺐ : ﺟﺎﻭﻫﺎ ﺍﻟﺨﻄﺎﺏ ﻭ ﺑﺎﻫﺎ ﺑﺎﻏﻲ ﻳﺰﻭﺟﻬﺎ ﺑﺰﺯ
ﺍﻟﻴﺎﺱ : " ﻋﻘﺪ ﺣﺠﺒﺎﻧﻮ ﻭ ﻋﻀﻠﺔ ﻓﻜﻮ ﺗﺼﻠﺒﺎﺕ " ﺷﻨﻮﻭﻭ ... ﻭ ﻫﻲ ﻣﻮﺍﻓﻘﺔ ؟؟
ﺯﻳﻨﺐ : ﺑﺎﻫﺎ ﻣﺼﺮ ﻭ ﻣﺎﻋﻨﺪﻫﺎ ﻛﻴﻒ ﺩﻳﺮ
ﺇﻟﻴﺎﺱ : " ﺑﻨﺒﺮﺓ ﻋﺎﻟﻴﺔ " ﻛﻴﻔﺎﺵ ﻣﺎﻋﻨﺪﻫﺎ ﻛﻴﻒ ﺩﻳﺮ ... ﺗﻘﻮﻝ ﻻﺍﺍ ... ﺗﺮﻓﺾ
ﺯﻳﻨﺐ : ﻭ ﻋﻼﺵ ﺗﺮﻓﺾ ... ﻋﺎﺭﻑ ﻛﻴﻒ ﻋﺎﻳﺸﺔ ﻓﺪﻳﻚ ﺍﻟﺪﺍﺭ ﻣﻊ ﺑﺎﻫﺎ ﻭ ﻣﺮﺕ ﺑﺎﻫﺎ ... ﻭ ﻻ ﺷﻨﻮ ﺩﺍﺯ ﻋﻠﻴﻬﺎ ﺑﻌﺪﻣﺎ ﺍﻟﺴﻲ ﺭﺋﺒﺎﻝ ﺳﺎﻓﺮ ﻭ ﺧﻼﻫﺎ ... ﺑﺤﺎﻝ ﻻ ﻛﺎﻥ ﻏﺎ ﻋﻠﻰ ﺳﺒﺔ
ﺍﻟﻴﺎﺱ : " ﺿﺮﺏ ﻓﺎﻟﻄﺒﻠﺔ ﺑﻴﺪﻭ " ﺳﻜﺘﻴﻨﺎﺍﺍﺍ
ﺯﻳﻨﺐ : " ﺑﻘﺎﺕ ﻏﻴﺮ ﻛﺘﺸﻮﻑ ﻓﻴﻪ "
ﺇﻟﻴﺎﺱ : ﺑﻐﺎﺕ ﺗﺰﻭﺝ ﺍﻟﻠﻪ ﻳﺮﺑﺢ " ﻭﻗﻒ " ﻳﺎﻻﻩ ﻧﻮﺻﻠﻚ ﻋﻨﺪﻱ ﻣﺎﻳﺪﺍﺭ
ﻫﺰﺍﺕ ﺯﻳﻨﺐ ﺻﺎﻛﻬﺎ ﻭ ﺳﺒﻘﺎﺕ ﻗﺪﺍﻣﻮ ... ﻣﺎﻋﺮﻓﺎﺕ ﻋﻼﺵ ﻫﺎﺩ ﺍﻟﻌﺼﺒﻴﺔ ﻛﻠﻬﺎ ﻣﻦ ﺧﺒﺮ ﺯﻭﺍﺝ ﺟﻮﻻﻥ ... ﻭ ﺻﺎﺣﺒﻮ ﻫﻮ ﺍﻷﻭﻝ ﺍﻟﻲ ﺑﻌﺪ ... ﺭﻛﺒﺎﺕ ﺟﻨﺒﻮ ﻭﺻﻠﻬﺎ ﻟﻠﺪﺍﺭ ... ﻭ ﺗﺤﺮﻙ ﻣﻜﺴﻴﺮﻱ ﻟﻮﺟﻬﺘﻮ ... ﺣﻞ ﻟﻴﻪ ﺍﻟﻌﺴﺎﺱ ﻭ ﺩﺧﻞ ...
ﺑﺎﻧﺖ ﻟﻴﻪ ﺳﻴﺎﺭﺓ ﺳﻨﻤﺎﺭ ﻭ ﻫﻮ ﻳﺘﻢ ﺩﺍﺧﻞ ﻟﭭﻴﻼ ... ﺍﻟﭭﻴﻼ ﺍﻟﻲ ﺳﺎﻛﻦ ﻓﻴﻬﺎ ﺳﻨﻤﺎﺭ ﻛﺎﻧﺖ ﺍﺻﻐﺮ ﻣﻦ ﻻﺧﺮﻯ ... ﺑﻴﻨﻤﺎ ﺇﻟﻴﺎﺱ ﺳﺎﻛﻦ ﻓﺸﻘﺔ ﻛﺒﻴﺮﺓ ﻭﺳﻂ ﺍﻟﻤﺪﻳﻨﺔ ... ﺳﻮﻝ ﺍﻟﺨﺪﺍﻣﺔ ﻋﻠﻴﻪ ﻗﺎﻟﺖ ﻟﻴﻪ ﻛﺎﻳﻦ ﻓﺒﻴﺘﻮ ... ﻃﻠﻊ ﺇﻟﻴﺎﺱ ﻭ ﺗﻮﺟﻪ ﻟﻐﺮﻓﺔ ﺳﻨﻤﺎﺭ ... ﺣﻞ ﻟﺒﺎﺏ ﺑﻐﻰ ﻳﺪﺧﻞ ﻭ ﻫﻮ ﻳﺘﺼﺪﻡ ﻣﻦ ﺍﻟﻤﻨﻈﺮ ﺍﻟﻲ ﻗﺪﺍﻣﻮ ...
ﺍﻟﻐﺮﻓﺔ ﻛﻠﻬﺎ ﻣﻘﺮﺑﻠﺔ ﻭ ﺍﻟﺰﺍﺝ ﻣﻬﺮﺱ ... ﺑﺤﺎﻝ ﺍﻟﻰ ﺩﺍﺯ ﺍﻹﻋﺼﺎﺭ ... ﻟﻤﺢ ﺳﻨﻤﺎﺭ ﭼﺎﻟﺲ ﻓﻄﺮﻑ ﺍﻟﻨﺎﻣﻮﺳﻴﺔ ... ﻣﺴﻨﺪ ﻋﻠﻰ ﺭﺟﻠﻴﻪ ﻭ ﻣﻬﺒﻂ ﺭﺍﺳﻮ ... ﻗﺮﺏ ﺇﻟﻴﺎﺱ ﻛﻴﺸﻮﻑ ﻫﻨﺎ ﻭ ﻟﻬﻴﻪ ... ﻭﻗﻒ ﻗﺪﺍﻣﻮ ﻭ ﺣﻂ ﻳﺪﻭ ﻋﻠﻰ ﻛﺘﻒ ﺳﻨﻤﺎﺭ ... ﻫﺰ ﺳﻨﻤﺎﺭ ﺭﺍﺳﻮ ﺷﺎﻑ ﻓﺈﻟﻴﺎﺱ ... ﺍﻟﻲ ﻫﺎﺩ ﺍﻷﺧﻴﺮ ﺗﺼﺪﻡ ﻭ ﻫﻮ ﻛﻴﺸﻮﻑ ﺍﻟﺪﻣﻮﻉ ﻓﻌﻨﻴﻦ ﺳﻨﻤﺎﺭ ...
ﻣﻦ ﺻﻐﺮﻫﻢ ﻛﺎﻥ ﺳﻨﻤﺎﺭ ﺍﻟﺸﺨﺺ ﺍﻟﻲ ﻣﻜﻴﻀﻌﻔﺶ ﻭ ﻋﻤﺮﻭ ﺑﻜﺎ ... ﻛﺎﻥ ﻳﺎﻛﻞ ﺍﻟﻌﺼﺎ ﻓﺎﻟﻤﻴﺘﻢ ﻭ ﻣﻴﺒﻜﻴﺶ ... ﺗﻌﺮﺽ ﻟﻠﺨﻴﺎﻧﺔ ﻣﻦ ﺍﻹﻧﺴﺎﻧﺔ ﺍﻟﻲ ﺑﻐﻰ ﻭ ﻣﻮﺻﻠﺶ ﻟﻬﺎﺩ ﺍﻟﻤﺮﺣﻠﺔ ... ﺇﻟﻴﺎﺱ ﺣﺲ ﺑﺎﻟﺨﻮﻑ ... ﻣﻨﻴﻦ ﺷﺎﻑ ﺳﻨﻤﺎﺭ ﻓﻬﺎﺩ ﺍﻟﺤﺎﻟﺔ ... ﻋﻠﻰ ﺷﺤﺎﻝ ﺑﺎﺵ ﻧﻄﻖ ...
ﺇﻟﻴﺎﺱ : ﻭ ﻭﺍﺵ ﻭﻗﻌﺎﺕ ﺷﻲ ﺣﺎﺟﺔ ﻟﺮﺋﺒﺎﻝ ؟
ﻣﺪ ﺳﻨﻤﺎﺭ ﻳﺪﻭ ﺍﻟﻤﺠﺮﻭﺣﺔ ﻭ ﻫﺰ ﻣﻦ ﺟﻨﺒﻮ ﻛﺘﺎﺏ ﺻﻐﻴﺮ ... ﻛﺎﺷﻒ ﻭ ﻣﻦ ﺃﻭﺭﺍﻗﻮ ﺍﻟﺼﻔﺮﺍﺀ ﺑﺎﻳﻦ ﻗﺪﻳﻢ ... ﻣﺪﻭ ﻹﻟﻴﺎﺱ ﻭ ﻧﻄﻖ ﺑﺼﻮﺕ ﻣﺠﺮﻭﺡ ...
ﺳﻨﻤﺎﺭ : ﺣﻨﺎ ﺻﺤﺎﺏ ﺣﻨﺎ ... ﺍﻟﻲ ﻛﺎﻥ ﻛﻴﻤﺮ ﺑﻬﺎﺩﺷﻲ ﻛﻮﻟﻮ ﻭ ﺣﻨﺎ ﻣﺤﺎﺳﻴﻨﺶ
ﺷﺎﺩ ﺍﻟﻤﺬﻛﺮﺓ ﺑﻴﻦ ﻳﺪﻳﻪ ﻛﻴﻘﺮﺍ ﻓﺴﻄﻮﺭ ﻣﻦ ﻫﻨﺎ ﻭ ﻫﻨﺎ ... ﻛﻴﻘﻠﺐ ﻓﺎﻟﺼﻔﺤﺎﺕ ﻭ ﻛﻞ ﻣﺰﺍﺩ ﻗﺮﺍ ﻛﻴﺴﺘﻐﺮﺏ ... ﺷﻜﻮﻥ ﺻﺎﺣﺒﺔ ﺍﻟﻤﺬﻛﺮﺍﺕ ﺍﻟﻲ ﺣﺘﻰ ﻟﻮ ﻛﺎﻥ ﻏﺮﻳﺐ ﻏﻴﺘﻌﺎﻃﻒ ﻣﻌﺎﻫﺎ ... ﻣﻦ ﺛﻘﻞ ﺍﻟﻜﻠﻤﺎﺕ ﻭ ﺍﻟﺤﺰﻥ ﺍﻟﻲ ﻛﻴﻨﺒﻀﻮ ﺑﻴﻬﻢ ... ﻫﺰ ﻋﻨﻴﻪ ﺷﺎﻑ ﻓﺴﻨﻤﺎﺭ ﺑﺘﺴﺎﺀﻝ ... ﻭ ﻫﻮ ﻳﺸﻴﺮ ﻟﻴﻪ ﺳﻨﻤﺎﺭ ﻳﻜﻤﻞ ﺣﺘﻰ ﻟﻶﺧﺮ ...
ﻓﻮﺭ ﻣﺎ ﺑﺪﺍﺕ ﻛﺘﻜﺘﺐ ﻋﻠﻰ ﺍﺑﻨﻬﺎ ﻭ ﺷﺎﻑ ﺇﻟﻴﺎﺱ ﺍﺳﻢ ' ﺇﻳﻠﻴﺎ ' ﻫﻨﺎ ﺗﻮﻗﻒ ﻟﻠﺤﻈﺔ ... ﻋﺮﻑ ﺃﻥ ﺍﻡ ﺭﺋﺒﺎﻝ ﻫﻲ ﺻﺎﺣﺒﺔ ﺍﻟﻤﺬﻛﺮﺍﺕ ... ﺭﺟﻊ ﻛﻤﻞ ﺍﻟﻘﺮﺍﺀﺓ ﻭ ﻛﻠﻤﺎ ﻗﻠﺐ ﺍﻟﺼﻔﺤﺎﺕ ﻛﻴﺰﻳﺪ ﻳﺘﺼﺪﻡ ... ﺭﺑﺎﺏ ﻛﺎﻧﺖ ﺫﺍﻛﺮﺓ ﻛﻞ ﺗﻔﺼﻴﻞ ﻋﻠﻰ ﺣﻴﺎﺗﻬﺎ ﻣﻊ ﻭﻟﺪﻫﺎ ﺑﻌﺪﻣﺎ ﺧﻼﻫﺎ ﺟﺎﺑﺮ ... ﻛﻴﻔﺎﺵ ﻛﺘﻌﺎﻣﻠﻮ ﻣﺤﺎﻭﻻﺗﻬﺎ ﻓﺨﻨﻘﻮ ...
ﻭ ﺭﻏﺒﺘﻬﺎ ﺑﺎﻻﻧﺘﺤﺎﺭ ﺍﻟﻲ ﻛﺘﺮﺍﻭﺩﻫﺎ ﻛﻴﻒ ﻛﺘﻔﻴﻖ ﺣﺘﻰ ﻛﺘﺮﺟﻊ ﺗﻨﻌﺲ ... ﻛﺎﻥ ﻭﺍﺿﺢ ﺍﻷﻟﻢ ﻭ ﺍﻟﺤﺰﻥ ﺍﻟﻲ ﻛﺎﻧﺖ ﻏﺎﺭﻗﺔ ﻓﻴﻬﻢ ﻓﺪﻳﻚ ﺍﻟﻤﺮﺣﻠﺔ ... ﻭ ﺗﺮﺩﺩﻫﺎ ﺑﺴﺒﺐ ﻭﻟﺪﻫﺎ ... ﻭﺻﻞ ﻟﻠﺼﻔﺤﺎﺕ ﺍﻷﺧﻴﺮﺓ ﺍﻟﻲ ﻋﺒﺮﺍﺕ ﻓﻴﻬﻢ ﻋﻠﻰ ﺣﺒﻬﺎ ﻟﻮﻟﺪﻫﺎ ﻭ ﺃﻧﻪ ﻣﺎﻳﺴﺘﺎﺣﻘﺶ ﺃﻡ ﺿﻌﻴﻔﺔ ﺑﺤﺎﻟﻬﺎ ... ﻭ ﺁﺧﺮ ﺟﻤﻞ ﻛﺘﺒﺎﺕ ﻛﺎﻧﺖ ﻣﺄﻟﻤﺔ ﻟﻜﻞ ﻣﻦ ﻗﺮﺍﻫﺎ ...
ﻛﻴﻔﺎﺵ ﻛﺘﺮﻓﺾ ﻋﻨﺎﻕ ﻭﻟﺪﻫﺎ ﻛﻞ ﻣﺮﺓ ﻣﺪ ﻳﺪﻳﺪﺍﺗﻮ ﺑﺎﺵ ﻳﺤﻀﻨﻬﺎ ... ﻷﻧﻬﺎ ﺧﺎﻳﻔﺔ ﺗﻌﻨﻘﻮ ﻭ ﻣﺎﻃﻠﻘﻮ ﺣﺘﻰ ﺗﺨﻨﻘﻮ ... ﻭ ﻛﻴﻒ ﻛﺘﺒﻌﺪﻭ ﻋﻠﻴﻬﺎ ﺑﺴﺒﺐ ﺗﻠﻚ ﺍﻷﻓﻜﺎﺭ ﺍﻟﻲ ﻛﺘﺮﺍﻭﺩﻫﺎ ﻛﻞ ﻳﻮﻡ ... ﻭ ﺫﻛﺮﺍﺕ ﺣﺘﻰ ﻏﻄﺴﻬﺎ ﻟﻴﻪ ﻓﺎﻟﻤﺎﺀ ﻭ ﻣﺤﺎﻭﻟﺔ ﺧﻨﻘﻮ ﻓﻨﻌﺎﺳﻮ ... ﻟﻜﻦ ﻛﺘﺮﺍﺟﻊ ﻓﺂﺧﺮ ﻟﺤﻈﺔ ...
ﺭﻏﺒﺘﻬﺎ ﻓﺎﻟﻤﻮﺕ ﺧﻼﺗﻬﺎ ﺗﺼﺮﻑ ﺑﺪﻭﻥ ﻋﻘﻼﻧﻴﺔ ... ﻭ ﻓﻜﺮﺍﺕ ﺃﻧﻬﺎ ﺗﻘﺘﻠﻮ ﻗﺒﻞ ﻣﺎﺗﻨﻬﻲ ﺣﻴﺎﺗﻬﺎ ﺑﺎﺵ ﻣﺘﺨﻠﻴﻬﺶ ﻣﻦ ﻭﺭﺍﻫﺎ ...
ﻟﻜﻨﻬﺎ ﻣﺎﻗﺪﺭﺍﺗﺶ ... ﻭ ﻓﺎﻟﻴﻮﻡ ﺍﻟﻲ ﻗﺮﺭﺍﺕ ﺗﻨﺘﺎﺣﺮ ... ﻭﺻﻼﺗﻮ ﻟﻠﻤﺪﺭﺳﺔ ﺑﻌﺪﻣﺎ ﻗﺎﺩﺍﺕ ﻟﻴﻪ ﺍﻟﻔﻄﻮﺭ ... ﻛﺎﻥ ﺩﺍﺧﻞ ﻭ ﻫﻲ ﺗﺠﺮﻭ ﻋﻨﻘﺎﺗﻮ ﺑﻘﻮﺓ ... ﻋﺎﺩ ﻃﻠﻘﺎﺗﻮ ﻳﺪﺧﻞ ﻟﻠﻤﺪﺭﺳﺔ ... ﺭﺟﻌﺎﺕ ﻟﻠﺪﺍﺭ ﻭ ﻧﻬﺎﺕ ﺣﻴﺎﺗﻬﺎ ﺍﻟﺘﻌﻴﺴﺔ ﻭ ﺍﺳﺘﺴﻠﻤﺎﺕ ﻟﻀﻌﻔﻬﺎ ﻭ ﺍﻻﻛﺘﺌﺎﺏ ﺍﻟﻲ ﺗﻐﻠﺐ ﻋﻠﻴﻬﺎ ...
ﺗﺤﺮﻙ ﺍﻟﻴﺎﺱ ﻭ ﭼﻠﺲ ﺟﻨﺐ ﺳﻨﻤﺎﺭ ... ﺳﺪ ﺍﻟﻤﺬﻛﺮﺓ ﻭ ﺩﻭﺯ ﻳﺪﻳﻪ ﻋﻠﻰ ﻋﻨﻴﻪ ﻛﻴﻤﺴﺢ ﺍﻟﺪﻣﻌﺔ ﺍﻟﻲ ﻫﺒﻄﺎﺕ ... ﺑﻘﺎﻭ ﭼﺎﻟﺴﻴﻦ ﺑﺠﻮﺝ ﻓﺼﻤﺖ ﺣﺘﻰ ﻭﺍﺣﺪ ﻓﻴﻬﻢ ﻣﺎﻧﻄﻖ ﻭ ﻟﻮ ﺑﻜﻠﻤﺔ ...
🍂 ﺣﻞ ﺇﺑﺮﺍﻫﻴﻢ ﻟﺒﺎﺏ ﻭ ﺧﺮﺝ ... ﻏﺎﺩﻱ ﻓﺎﻟﻄﺮﻳﻖ ﻫﺎﺯ ﺭﺍﺳﻮ ... ﻣﻦ ﻧﻬﺎﺭ ﺭﺟﻮﻉ ﺟﻮﻻﻥ ﻟﻠﺪﺍﺭ ﻭ ﻫﻮ ﻣﺮﺍﺿﻴﺶ ﺑﻨﻈﺮﺍﺕ ﺍﻟﻨﺎﺱ ﻟﻴﻪ ... ﻟﻜﻦ ﺩﺍﺑﺔ ﺗﺨﻄﺒﺎﺕ ﻟﺸﺨﺺ ﻣﺤﺘﺮﻡ ﻭ ﺣﺘﻰ ﻭﺍﺣﺪ ﻣﺒﺎﻗﻲ ﻳﻘﺪﺭ ﻳﺤﻞ ﻓﻤﻮ ... ﺍﺗﺎﺟﻪ ﻟﻠﺠﺎﻣﻊ ﺻﻠﻰ ﻭ ﺗﻢ ﺧﺎﺭﺝ ... ﻛﺎﻥ ﺭﺍﺟﻊ ﻟﻠﺪﺍﺭ ﻭ ﻫﻮ ﻳﺴﻤﻊ ﺻﻮﺕ ﻣﺄﻟﻮﻑ ﻛﻴﻌﻴﻂ ﻋﻠﻴﻪ ... ﻭﻗﻒ ﻭ ﺿﺎﺭ ﺷﺎﻑ ﻓﻴﻪ ﺑﻤﻼﻣﺢ ﺟﺎﻣﺪﺓ ...
ﺍﻟﺤﺎﺝ : ﺍﻟﺴﻼﻡ ﻋﻠﻴﻜﻢ
ﺇﺑﺮﺍﻫﻴﻢ : ﻋﻠﻴﻜﻢ ﺍﻟﺴﻼﻡ
ﺍﻟﺤﺎﺝ : ﺇﺑﺮﺍﻫﻴﻢ ﻭﻟﺪﻱ ﻣﻤﻜﻦ ﻧﻬﻀﺮ ﻣﻌﺎﻙ ﻓﻮﺍﺣﺪ ﺍﻟﻤﻮﺿﻮﻉ
ﺇﺑﺮﺍﻫﻴﻢ : ﺃﻣﺎ ﻫﻮ ؟
ﺍﻟﺤﺎﺝ : ﻳﺎﻻﻩ ﻧﻤﺸﻴﻮ ﻟﻠﺪﺍﺭ ﻋﻨﺪﻱ ﻭ ﻧﻬﻀﺮﻭ ﻋﻠﻰ ﺧﺎﻃﺮﻧﺎ
ﺇﺑﺮﺍﻫﻴﻢ : ﻻ ﻛﺎﻧﺖ ﻋﻨﺪﻙ ﺷﻲ ﺣﺎﺟﺔ ﺑﺎﻏﻲ ﺗﻘﻮﻟﻬﺎ ... ﻗﻮﻟﻬﺎ ﻫﻨﺎ ... ﻋﻨﺪﻱ ﻣﺎﻳﺪﺍﺭ ﺧﺎﺹ ﻧﻤﺸﻲ ... ﻏﺪﺍ ﻟﻌﻘﺪ ﺩﻳﺎﻝ ﺑﻨﺘﻲ
ﺍﻟﺤﺎﺝ : ﻣﺼﺮ ﺗﻌﻄﻴﻬﺎ ﺑﺪﻭﻥ ﻣﻮﺍﻓﻘﺘﻬﺎ
ﺇﺑﺮﺍﻫﻴﻢ : " ﺧﻨﺰﺭ ﻓﻴﻪ " ﺳﻲ ﺍﻟﺤﺎﺝ ﻛﻨﺤﺘﺎﺭﻣﻚ ﻭ ﻣﺒﺎﻏﻴﺶ ﻧﺨﺮﺝ ﻣﻌﺎﻙ ﻟﻌﻴﺐ ... ﻟﻜﺎﻥ ﻫﺬﺍ ﻫﻮ ﺍﻟﻤﻮﺿﻮﻉ ﻓﺎﺵ ﺑﺎﻏﻲ ﺗﻨﺎﻗﺶ ﻣﻌﻴﺎ ... ﻏﻨﻘﻮﻝ ﻟﻴﻚ ﻫﺎﺩﺷﻲ ﻣﺨﺎﺻﻜﺶ ﺗﺪﺧﻞ ﻓﻴﻪ ... ﺑﻨﺘﻲ ﻫﺎﺩﻳﻚ ﻭ ﺍﻧﺎ ﻋﺎﺭﻑ ﻣﺼﻠﺤﺘﻬﺎ
ﺍﻟﺤﺎﺝ : ﻣﺼﻠﺤﺘﻬﺎ ... ! ﺍﻧﺎ ﻣﺼﻠﺤﺔ ﻫﺎﺩﻱ ... ﺷﻔﺘﻲ ﺑﻨﺘﻚ ﻛﻴﻒ ﻭﻻﺕ ... ﻣﻜﻔﺎﻛﺶ ﺟﺮﻳﺘﻲ ﻋﻠﻴﻬﺎ ﻣﻦ ﺍﻟﺪﺍﺭ ... ﻭ ﻣﻬﺎ ﺍﻟﻲ ﻣﺎﺗﺖ ﻏﻴﺮ ﻣﺪﺓ ﻗﺼﻴﺮﺓ ﻫﺎﺩﻱ ... ﻭ ﻛﻴﻒ ﺭﺟﻌﺎﺕ ﺑﺎﻏﻲ ﺗﻠﻮﺣﻬﺎ
ﺇﺑﺮﺍﻫﻴﻢ : " ﺭﻓﻊ ﺻﻮﺗﻮ " ﻣﺎﺷﻲ ﻏﻨﻠﻮﺣﻬﺎ ... ﻏﻨﻌﻄﻴﻬﺎ ﻟﺪﺍﻙ ﺍﻟﻲ ﻏﺎﺩﻱ ﻳﺤﺎﻓﻆ ﻋﻠﻴﻬﺎ ﻭ ﻏﻴﺤﻤﻴﻬﺎ ﻣﻦ ﺍﻟﺬﻳﺎﺏ
ﺍﻟﺤﺎﺝ : ﻣﺎﻓﻜﺮﺗﻴﺶ ﺃﻧﻬﺎ ﻣﺤﺘﺎﺟﺔ ﻟﻠﺤﻤﺎﻳﺔ ﺩﻳﺎﻟﻚ ﻧﺘﺎ ... ﺗﺤﺲ ﺑﻠﻲ ﻋﻨﺪﻫﺎ ﺍﺏ ﺗﺤﺎﻣﺎ ﻓﻴﻪ ﻭ ﻳﻌﻮﺿﻬﺎ ﻋﻠﻰ ﺣﻨﺎﻥ ﻣﻬﺎ ﺍﻟﻲ ﻓﻘﺪﺍﺕ
ﺇﺑﺮﺍﻫﻴﻢ : " ﺑﻨﻔﺎﺫ ﺻﺒﺮ " ﻧﺘﺎ ﺁﺧﺮ ﻭﺍﺣﺪ ﻳﻮﺭﻳﻨﻲ ﺷﻨﻮ ﻧﺪﻳﺮ ... ﺑﻨﺘﻲ ﻏﻨﻌﺮﻑ ﻛﻴﻒ ﻧﺘﻌﺎﻣﻞ ﻣﻌﻬﺎ ... ﻣﻐﺎﺩﻳﺶ ﻧﺘﺒﻊ ﻧﺼﻴﺤﺔ ﻭﺍﺣﺪ ﺑﻨﺘﻮ ﻫﺮﺑﺎﺕ ﻣﻊ ﻭﺍﺣﺪ ﻭ ﺧﻼﺕ ﺍﻟﻜﺒﻴﺮ ﻭ ﺍﻟﺼﻐﻴﺮ ﻳﻬﻀﺮ ﻓﺴﻴﺮﺗﻬﺎ
ﺍﻟﺤﺎﺝ : " ﺑﺤﺰﻥ " ﻣﻐﺎﺩﻳﺶ ﻧﺪﻱ ﻋﻠﻰ ﻛﻼﻣﻚ ... ﻭ ﺣﻴﻨﺖ ﺃﻧﺎ ﻏﻠﻄﺖ ... ﻣﺎﺑﻐﻴﺘﻜﺶ ﺗﻌﺎﻭﺩ ﻧﻔﺲ ﺍﻟﻐﻠﻂ ﺍﻟﻲ ﺩﺭﺕ ... " ﺣﻂ ﻳﺪﻭ ﻋﻠﻰ ﻛﺘﻒ ﺇﺑﺮﺍﻫﻴﻢ " ﺟﻮﻻﻥ ﺑﻤﻌﺰﺓ ﺑﻨﺘﻲ ... ﻭ ﻣﻜﺮﻫﺘﻜﺶ ﺗﻔﻜﺮ ﻣﺰﻳﺎﻥ ﻓﺎﻟﻤﻮﺿﻮﻉ ﻗﺒﻞ ﻣﺎ ﺗﻔﻘﺪﻫﺎ ﺣﺘﻰ ﻧﺘﺎ
ﺇﺑﺮﺍﻫﻴﻢ : " ﺣﻴﺪ ﻟﻴﻪ ﻳﺪﻭ " ﺑﻨﺘﻚ ﺷﻔﺘﻬﺎ ﺑﻌﻨﻴﺎ ﻧﻬﺎﺭ ﻫﺮﺑﺎﺕ ﻣﻊ ﺻﺎﺣﺒﻬﺎ ... ﻭ ﺣﻤﺪﺕ ﺍﻟﻠﻪ ﻣﻨﻴﻦ ﻣﺘﺼﻴﺪﺗﺶ ﻓﻴﻬﺎ ﻭ ﺭﻓﻀﺘﻲ ﻃﻠﺒﻲ ... ﻛﻨﺖ ﻏﻨﻌﺮﺿﻚ ﻋﻠﻴﻚ ﺗﺤﻀﺮ ﻏﺪﺍ ... ﻭ ﻟﻜﻦ ﻛﻴﺒﺎﻥ ﺑﻨﺎﻗﺺ ... ﺍﻟﻠﻪ ﻳﻌﺎﻭﻥ
ﺿﺎﺭ ﻋﻄﺎﻩ ﺑﻈﻬﺮﻭ ﻭ ﺯﺍﺩ ... ﺍﻟﺤﺎﺝ ﺷﺪ ﻓﺪﺭﺍﻋﻮ ﻟﻴﻤﻦ ﻛﻴﺤﺲ ﺑﺎﻷﻟﻢ ﻓﺼﺪﺭﻭ ... ﻫﺰ ﺭﺍﺳﻮ ﻛﻴﺸﻮﻑ ﻓﺎﺑﺮﺍﻫﻴﻢ ﻏﺎﺩﻱ ﻭ ﻋﻨﻴﻪ ﻛﻴﻨﺒﻊ ﻣﻨﻬﻢ ﺣﺰﻥ ﻭ ﻧﺪﻡ ... ﻳﺎﺭﻳﺖ ﻳﺮﺟﻊ ﻟﻮﻗﺖ ﻟﻠﻮﺭﺍﺀ ﻭ ﻳﺼﻠﺢ ﻛﻠﺸﻲ ... ﺑﺴﺒﺐ ﺃﻧﺎﻧﻴﺘﻮ ﻭ ﺗﺴﻠﻄﻮ ﻫﺎﻫﻮ ﻛﻴﻌﺎﻧﻲ ﻫﻮ ﻭ ﺯﻭﺟﺘﻮ ﻟﺤﺪ ﺍﻟﺴﺎﻋﺔ ... ﻭ ﺍﻷﻟﻢ ﻛﻴﺰﻳﺪ ﻋﻠﻴﻪ ﻛﻠﻤﺎ ﺷﺎﻑ ﺣﺎﻟﺔ ﺟﻮﻻﻥ ...
ﺍﻟﻲ ﻣﺒﺎﻏﻴﻬﺎﺵ ﺗﺸﺒﻪ ﻟﺒﻨﺘﻮ ﻓﺸﻲ ﺣﺎﺟﺔ ﻣﻦ ﻏﻴﺮ ﺷﻜﻠﻬﺎ ... ﻭ ﻻ ﻳﺘﻜﺘﺐ ﻋﻠﻴﻬﺎ ﻧﻔﺲ ﺍﻟﻘﺪﺭ ﺍﻟﻲ ﻫﻮ ﻣﻌﺎﺭﻓﻮﺵ ﻭ ﺑﻨﺘﻮ ﺑﻌﻴﺪﺓ ﻋﻠﻴﻪ ... ﺭﺟﻊ ﻟﻠﺪﺍﺭ ﻭ ﺑﻠﻎ ﺍﻟﺤﺎﺟﺔ ﺑﻔﺸﻠﻮ ﻓﺈﻗﻨﺎﻉ ﺑﺎﻫﺎ ... ﻫﺒﻄﻮ ﺩﻣﻮﻉ ﺍﻟﺤﺎﺟﺔ ﺗﺤﺴﺮﺍ ﻋﻠﻰ ﺍﻟﺒﻨﺖ ﺍﻟﻲ ﺗﻈﻠﻤﺎﺕ ﺑﺴﺒﺐ ﻋﻨﺎﺩ ﺑﺎﻫﺎ ﻭ ﺑﻄﺸﻮ ...
ﻓﺎﻟﻴﻮﻡ ﺍﻟﻤﻮﺍﻟﻲ ... ﻧﺎﺿﺖ ﺧﺪﻳﺠﺔ ﺑﻜﺮﻱ ﻋﻠﻰ ﻏﻴﺮ ﺍﻟﻌﺎﺩﺓ ... ﺑﺪﺍﺕ ﻛﺘﺠﻤﻊ ﻭ ﺗﺨﻤﻞ ... ﻣﺎ ﺣﺎﻭﻻﺗﺶ ﺗﺨﻠﻲ ﺟﻮﻻﻥ ﺗﻌﺎﻭﻧﻬﺎ ﻷﻧﻬﺎ ﻋﺎﺭﻓﻬﺎ ﺭﺍﻓﻀﺔ ﻫﺎﺩ ﺍﻟﺰﻭﺍﺝ ... ﻭ ﻣﻜﺎﻧﺶ ﻋﻨﺪﻫﺎ ﻣﺎﻧﻊ ﺩﻳﺮ ﻛﻠﺸﻲ ﺑﻮﺣﺪﻫﺎ ... ﻣﻨﻴﻦ ﺟﻮﻻﻥ ﻏﺘﺰﻭﺝ ﻭ ﺗﺨﻮﻱ ﻟﻴﻬﺎ ﺍﻟﻘﻨﺖ ... ﺳﻤﻌﺎﺕ ﺍﻟﺪﻗﺎﻥ ﻭ ﻫﻲ ﺗﺤﻞ ﻟﺒﺎﺏ ... ﻟﻘﺎﺕ ﻓﻮﺯﻳﺔ ﺗﺴﺎﻟﻤﺎﺕ ﻣﻌﻬﺎ ﻭ ﺩﺧﻠﻮ ﻟﻠﺼﺎﻟﺔ ...
ﻓﻮﺯﻳﺔ : ﻛﺎﻳﻦ ﻓﺎﺵ ﻧﻌﺎﻭﻧﻜﻢ ؟
ﺧﺪﻳﺠﺔ : ﻻ ﺍﺧﺘﻲ ﻓﻮﺯﻳﺔ ... ﺑﺎﺭﻛﺔ ﻏﻴﺮ ﺩﺍﻛﺸﻲ ﺍﻟﻲ ﺩﺭﺗﻲ ﻫﺎﺩ ﺍﻟﻴﻮﻣﻴﻦ
ﻓﻮﺯﻳﺔ : ﻓﻴﻦ ﻫﻲ ﺟﻮﻻﻥ ... ﻗﻴﺴﺎﺕ ﺩﺍﻛﺸﻲ ﺍﻟﻲ ﺟﺒﺖ ﻟﻴﻬﺎ ﻟﺒﺎﺭﺡ ؟
ﺧﺪﻳﺠﺔ : " ﺑﺈﺑﺘﺴﺎﻣﺔ ﺻﻔﺮﺍ " ﺁﻩ ﻗﻴﺴﺎﺗﻮ ﻭ ﺟﺎﻫﺎ ﺩﺍﻛﺸﻲ ﺯﻭﻳﻦ
ﻓﻮﺯﻳﺔ : ﺣﻴﻨﺖ ﻭﻟﺪﻱ ﺯﺭﺑﺎﻥ ﺍﻟﻠﻪ ﻳﻬﺪﻳﻪ ... ﺧﺪﻳﻨﺎ ﻛﻠﺸﻲ ﻣﻘﺎﺩ ﻭ ﻣﺨﻴﻂ ... ﻭ ﻣﻨﻴﻦ ﻛﺎﻧﺖ ﻋﻴﺎﻧﺔ ﻣﺎﻗﺪﺭﺍﺗﺶ ﺗﻤﺸﻲ ﻣﻌﻴﺎ ... ﻏﻴﺮ ﻗﺪﺭﺕ ﻗﻴﺎﺳﻬﺎ ... ﻋﻼﻩ ﻳﻜﻮﻥ ﺩﺍﻛﺸﻲ ﻫﻮ ﻫﺪﺍﻙ
ﺧﺪﻳﺠﺔ : ﺟﺎﻭﻫﺎ ﺯﻭﻳﻨﻴﻦ ﻭ ﻓﺮﺣﺎﺕ ﻓﺎﺵ ﻗﻴﺴﺎﺗﻬﻢ ... ﺗﺒﺎﺭﻙ ﺍﻟﻠﻪ ﻋﻠﻰ ﺫﻭﻗﻚ
ﻓﻮﺯﻳﺔ : " ﻭﻗﻔﺎﺕ " ﻭ ﻧﻤﺸﻲ ﻧﻜﻤﻞ ﺷﻐﺎﻟﻲ ﺑﻤﺎ ﺭﺟﻊ ﻭﻟﺪﻱ ... ﻛﻨﺖ ﺑﻐﻴﺖ ﻧﺸﻮﻑ ﺟﻮﻻﻥ ﻭ ﻧﺨﺒﺮﻫﺎ ﺑﻠﻲ ﻣﻨﻴﻦ ﻳﺮﺟﻌﻮ ﻣﻦ ﺷﻬﺮ ﺍﻟﻌﺴﻞ ﻏﻨﺘﺤﻮﻟﻮ ﻟﻠﺒﺎﺭﻃﻤﺔ ﺍﻟﻲ ﺧﺪﺍ ﻳﺎﻣﻦ ... ﻭ ﻟﻜﻦ ﻏﺘﻜﻮﻥ ﻣﺸﻐﻮﻟﺔ ﺑﺮﺍﺳﻬﺎ
ﺧﺪﻳﺠﺔ : " ﺧﺮﺟﺎﺕ ﻋﻨﻴﻬﺎ " ﻏﺘﺤﻮﻟﻮ ... ﻭ ﻟﺒﺎﺭﻃﻤﺔ !!
ﻓﻮﺯﻳﺔ : ﺁﻩ ﻏﻨﺘﺤﻮﻟﻮ ... ﻳﺎﻣﻦ ﻗﺎﻝ ﻟﻴﺎ ﺧﺪﺍﻫﺎ ﻓﺎﺵ ﻗﺮﺭ ﻳﺘﺰﻭﺝ ... " ﺍﺑﺘﺎﺳﻤﺎﺕ " ﻋﺮﻑ ﺑﻠﻲ ﺟﻮﻻﻥ ﻏﺘﺒﻐﻲ ﺗﺴﻜﻦ ﻓﺪﺍﺭ ﺩﻳﺎﻟﻬﺎ ... ﻣﺸﻴﺖ ﺷﻔﺘﻬﺎ ﺯﻭﻳﻨﺔ ﻭ ﻭﺍﺳﻌﺔ ﻭ ﺟﺎﺕ ﻓﺤﻲ ﻧﻘﻲ ﻭ ﻓﻴﻬﺎ ﺍﻟﻬﺪﻭﺀ ... ﻣﺎﺷﻲ ﺑﺤﺎﻝ ﺩﺭﺑﻨﺎ ﻫﻬﻪ
ﺧﺪﻳﺠﺔ : ﻣﺰﻳﺎﻥ ... ﻭ ﻧﺘﻲ ﻏﺘﻌﻴﺸﻲ ﻣﻌﺎﻫﻢ ؟
ﻓﻮﺯﻳﺔ : ﻭﺍﺧﺔ ﻭﻟﻔﺖ ﻫﻨﺎ ﻭ ﻟﻜﻦ ﻣﺎﻧﻘﺪﺭﺵ ﻧﻌﻴﺶ ﺑﻌﻴﺪﺓ ﻋﻠﻰ ﻭﻟﺪﻱ ﺑﺎﻗﻲ
ﺧﺪﻳﺠﺔ : ﻭ ﻻ ﻣﺎﺑﻐﺎﺗﺶ ﺟﻮﻻﻥ
ﻓﻮﺯﻳﺔ : " ﺷﺎﻓﺖ ﻓﻴﻬﺎ ﺑﺎﺳﺘﻔﻬﺎﻡ " ﺑﻨﺘﻲ ﺟﻮﻻﻥ ﻛﻨﻌﺮﻓﻬﺎ ... ﻛﻦ ﻛﺎﻧﺖ ﻭﺣﺪﺓ ﺃﺧﺮﻯ ﻣﻐﺎﺩﻳﺶ ﻧﻮﺍﻓﻖ ﻓﺎﺵ ﻗﺎﻝ ﻟﻴﺎ ﻧﻤﺸﻲ ﻧﻌﻴﺶ ﻣﻌﺎﻫﻢ
ﺧﺪﻳﺠﺔ : ﻣﻊ ﻫﺎﺩ ﺍﻟﺠﻴﻞ ﺗﻮﻗﻌﻲ ﺃﻱ ﺣﺎﺟﺔ ... ﻭ ﻫﺎﻫﻲ ﻏﺘﺨﺮﺝ ﻣﻦ ﻫﺎﺩ ﺍﻟﺤﻲ ... ﻭ ﺯﻫﺮ ﻫﻮ ﻋﻨﺪﻫﺎ
ﻓﻮﺯﻳﺔ : ﻧﻤﺸﻲ ﺑﻠﻤﺎ ﻧﻌﻄﻠﻚ ﻋﻠﻰ ﺷﻐﻠﻚ