ما تنسوش التصويت و رأيكم في التعليقات ...
#متلازمة_عائلتي
#الحلقة_8
فتحي : سألتكم جاوبوني .. ناقصات 30 ألف من خداهم ؟
نديم : هو يا بوي الموضوع و مافيه ان .....(ويقاطعه علي كمال)
علي كمال (ببرود) : الفلوس نديم هو اللي خداهم
و يتلفتله نديم ويقعد يشبحله بصدمة
فتحي : نديم ! وعلاش خداهم ؟
علي كمال : علاش خداهم هذي ما نعرفش .. تقدر تسأله بروحك
و نديم مصدوم من كلام علي كمال و ساكت
علي كمال : هيا انا نستأذنكم بما انك عرفت من اللي خدي الفلوس معش عندي لزمة هنا
علي كمال قبل ما يطلع يتلفت لنديم ويضحك ضحكة شر و استهزاء و نديم يشوفله و مش فاهم شي و بعدين يطلع
فتحي : ايه يا نديم .. ما تبيش تقول شن درت بيهم الفلوس ؟
نديم : كنت محتاجهم وخديتهم .. وما تخافش بنردهم من حسابي غير كنت مضطر ناخدهم من هنا
فتحي : قاعد ماقلتش علاش خديتهم
نديم : ما نقدرش نقولك يا بوي .. اللي نقدر نقوله لك .. أوثق فيا بس الأمور كلها طيبة
فتحي : مصر انك ما تقولش ؟
نديم : ايه .. المهم تو نردهم في اقرب فرصة نوعدك
فتحي : تقدر تمشي
...........
يطلع نديم من مكتوب بوه و يمشي لمكتب علي كمال
نديم (بعصبية) : علاش بعتني ؟
علي كمال (ببرود) : ما بعتكش .. مش انت اللي خديت الفلوس ولا لا ؟
نديم : ما تنساش انا خديتهم لانك انت طلبتهم
علي كمال : موضوعك
نديم : اصلا انا ما كنتش ح نبيعك علاش ما وثقتش فيا
علي كمال : ههههههههههه
نديم : خيرك تضحك ؟
علي كمال يوقف و يحط ايده ع الطاولة و يتكلم بعصبية
علي كمال : انت والثقة ! وثقت فيا امس انت ؟ لا انت وثقت في خوك علاء و كلامه و تبيني نوثق فيك بعد ما انت طلعتني خاين
نديم : ما طلعتكش خاين يا علي كمال انا بس..........
علي كمال : انت صدقت اللي تبي تصدقه تم الكلام
ياخد تلفونه وبيجي يطلع يشده نديم من مرفقه
نديم : ما تهربش .. ما دام الموضوع انفتح خلي نتكلموا فيه
علي كمال : برا تكلم مع علاء فيه .. معش يهمني حد فيكم و بالذات انت
يقربع باب المكتب و يطلع و نديم يقعمز ع الكرسي و يحط ايده على راسه .. يطلعوا علاء و فتحي من مكاتبهم و يشوفوا علي كمال طالع بعصبية
علاء : شفت يا بوي اللي قلتلك عليه .. من أول يوم تعاركوا وحشمونا قدام الموظفين و الناس
يقعد فتحي ساكت
........................
.......................................
ندى تروح لبيتهم هي وخوها معاذ .. و شوية وتتصل بيها ليلى
ليلى : شن حال عمتي نجاة اليوم ؟
ندى : الحمد لله بخير غدوة العشية بيعطوها خروج
ليلى : كويس الحمد لله .. شن حالك انتي وشن وضعك ؟
ندى : ماشية الحمد لله
ليلى : بتجي غدوة للكلية ؟
تقعد ندى تفكر شوية
ليلى : خيرك سكتي ؟ ولا زعما تفكري في المنقذ استاذ علي هههههه
ندى : ليلى !! شن تخرطي انتي ؟ وعلاش بنفكر فيه اصلا ؟
ليلى : ت نبصر وانتي خشيتي بعضك تقول في حاجة !
ندى : لا مافي شي يا قردة
ليلى : باهي شن بتجي غدوة ولا لا ؟
ندى : ايه تو نجي نهاية سيمستر و سنة تخرج ما نبيش نضيع شي
ليلى : ايه احسن شي
ندى : هيا بري تو نكلمك بعدين .. خلي بنضم الحوش و بنساويه
ليلى : باهي تمام تو نتكالموا في النت
...............
...............................
علاء يمشي لنديم في مكتبه
علاء : خيرك انت و علي ؟
نديم : ما في شي
علاء : شن ما في شي وصوتكم واصل لنهاية الشركة
نديم : علاء .. انت متأكد من اللي سمعته ؟ متأكد انك سمعت علي كمال يكلم في وصال ؟
علاء : ايه متأكد .. وشن تبيني نحلف ع المصحف عادي ..انت قاعد مش مصدق وتكذب فيا ؟
نديم : بالله عليك يا علاء مش ناقص انا .. خليني بروحي بالله عليك
علاء : نظم امورك
يمشي ويخليه
نديم : اوووف اوووف .. في شي غلط أكيد .. علي كمال لو مداير حاجة زي هادي مستحيل يواجهني و يواجه العيلة كلها بالشكل هذا
........
...........
علي كمال يمشي لصاحبه جمال في المحل متعه
علي كمال : مش عارف اللي ندير فيه هذا صح ولا غلط مش عاارف
جمال : صح وعين الصح
علي كمال : لكن في النهاية عيلتي يا جمال ما نرضاش فيهم شر
جمال : و باهي هما ؟ واللي داروه فيك و الموقف اللي حطوك فيه .. علاء و نديم وحتى بوك مع احترامي لكن الكلام اللي قالهولك صاعب وخليك من الكف قدام الكل عطاهولك .. معقولة ما يعرفش ولده ؟
علي كمال : عندك الحق لكن....
جمال : انت اصلا شن هو اللي درته ؟ مشيت للشركة وبس .. لازم تزيد تاخد حقك بإيدك اكثر من هكي لازم توقف في و جوههم و يعرفوا من هو علي كمال اللي داروا فيه هكي
يقعد علي كمال ساكت و يفكر وخلاص
.................
.............................
في الليل وليد و هيثم يهدرزوا في مربوعة وليد
هيثم : وهذا اللي هناك في حياتي .. وانت ؟
وليد : شن بنحكيلك وشن بنقولك !
هيثم : احكي هدرز عادي بدينا جيرة توا عاد
وليد : والله جارك ضاربته الحياة كف يا عرفي
هيثم : علاش خيرك ؟
وليد : اهو شوفت عينك .. ما حبتش تشد معاي في شي لا في خدمة ولا في زواج ولا في فلوس و لا حتى حاجة
هيثم : و ولاد عمك ؟ على حسب ما قلتلي حالتهم فوق الريح وعندهم شركة .. ما دارولكش راي بكل معاهم ؟
وليد : خليها في سرك يا عرفي .. هما السبب اصلا ما يبوش يخدموني معاهم في الشركة ع اساس ما عنديش شهادة .. خوهم الكبير بدون شهادة وشاد منصب كبير في الشركة .. انا ما طلبتش منصب حتى موظف عادي قابل بيه
هيثم : غريبة يبان عليهم ناس كويسة
وليد : الناس كلها من بعيد تبان كويسة
هيثم : عندك الحق
يقعدوا ساكتين شوية
هيثم : ااا .. عندهم اخت ؟
وليد : من هما ؟
هيثم : ولاد عمك .. الصبح شفت بنت واقفة قدام فيلتهم
وليد : اه ايه سلمى اختهم الصغيرة اكيدة تستنى في الباص متعها
هيثم (بصوت واطي) : سلمى
وليد (يعدل تقعميزته ويشبحله) : علاش تسأل انت ؟
هيثم : لا شي هكي وخلاص
يقعد وليد يشبحله و هيثم سارح
..........
........................
علي كمال في غرفته و شوية ويطق الباب
علي كمال يستغرب و يمشي يفتح
علي كمال : سلمى ؟! خير في حاجة ؟
سلمى : لا مافي شي ..
و تمدله كتاب
علي كمال : شن هذا ؟
سلمى : عطاهولي نديم قالي اعطيه لعلي كمال
يشوفه و يفتح يلقاه كتاب ندى اللي نساته في سيارة نديم يوم أمس
علي كمال : اها تمام صحيتي
سلمى : سلمك .. علي كمال !
علي كمال : نعم سلمى .. خيرك في حاجة ؟ كأن في كلام تبي تقوليه
سلمى : كيف حالك ؟ قصدي بعد أمس في الليل كيف حالك ؟ انا متأكدة انك مستحيل ادير هكي اكيد في حاجة غلط وعلاء سامع غلط
علي كمال يبتسملها
سلمى : تعرف حتى أمي نفس رأيي .. تعاركت هي وعلاء امس بعد ما انت مشيت
علي كمال : أمي؟
سلمى : ايه و حتى ما رقدتش قعدت للصبح تستنى فيك مشغولة عليك .. المهم تصبح على خير
علي كمال : وانت بخير
يصكر الباب و هو مبسوط ان في حد مصدقه و واقف معاه أمه وسلمى
نديم كان فاتح باب غرفته و واقف يسمع فيهم شن يقولوا
نديم : كان لازم تصدقه يا نديم .. كيف ما تصدقاشي كيييف ؟
يقعمز علي كمال على سريره و يفتح كتاب ندى و يلقاها راسمة سمايل (وجه) حزين يفتح الدرج متعه و ياخد قلم حبر و يخط على السمايل الحزين و يرسم سمايل مبتسم
علي كمال : زعما الكتاب هذا تحتاجه ؟ احتمال يكون عندها بيه امتحان ولا حاجة
يشد نقاله ويقعد يبحث في سجل الرسايل لوحدة من الطالبات اللي مكلماته قبل و يطلب منها انها تتواصل مع ندى توا و تقوللها قالك استاذ علي كمال تجي لمكتبي غدوة الساعة 10
ندى كانت ماسكة نقالها و تهدرز ع البنات في النت .. شوية تجيها رسالة من الطالبة
ندى (تفرح) : حي زعماا شن يبي ؟
تقعد تفكر شوية وبعدين وجهها يتغير لحزن
ندى : أكيد يبيني في الموضوع الفلوس .. اكيدة بيقولي كلمي بوك وقوليله نبي فلوسي .. وووك عليا من وين بنجيبوهم يا ربي .. نسحابه كويس طلع احرف حتى من حمزة
.................
..................
تاني يوم الصبح
جميلة جاية بدوشتها هي ولدها شادها عياطات
تخش عليهم وهما في المطبخ يفطروا الكل عدا علي كمال قاعد راقد
جميلة : السلام عليكم
الكل : وعليكم السلام
بعد يفطروا ويكملوا
جميلة : نديم هيا وتيلي روحك
نديم : علاش شن في ؟
جميلة : شن شن في ؟ بنمشوا نطلعوا نشروا حاجات البيان التعليقة و الخاتم و كل شي
نديم : شنوا ؟
جميلة : ايه زي ما سمعت .. انا وياك و أمي و سلمى
فتحي : أمك وسلمى لا .. الجيران الجدد اليوم بيجوكم يشربوا قهوة و يتعرفوا عليكم
خديجة : حاق ؟ خيرك ما قلتش من قبل .. ستر ربي عندي حلويات محولتهم على جيت حد
نسرين : و انا نقول وين مشوا .. طلعتي انتي محولتهم يا عمتي
خديجة : ايه امالا شن
جميلة : خلاص امالا نمشي انا ونديم وحمودي تو نخليهولكم وخلاص
نديم : يا بوي مش اليوم عندنا هلبا خدمة ؟
فتحي : لا ما دخلكش انت اليوم .. انا وعلاء نكفوا و زيادة علي كمال معانا
خديجة : علي كمال بدي يخدم في الشركة ؟
فتحي : ايه و شن المشكلة
جميلة : غريبة قبل مصكر راسه عليها
................................
................
يطلع نديم و جميلة و تخلي ولدها لأمها
يستاقظ علي كمال و يجهز نفسه و يمشي للكلية
يدخل لمكتبه و شوية تجي ندى تطق ع الباب
علي كمال : تفضل
ندى : السلام عليكم
علي كمال : و عليكم السلام .. ادخلي
و تدخل ندى و هي متوترة و علي كمال يشوفلها
ندى : انا عارفة علاش طلبت تشوفني اليوم
علي كمال يستغرب : باهي وعلاش ؟
ندى : عارفة انك تبي تكلم بوي على موضوع الفلوس
يعقد علي كمال حواجبه و يشوفلها بإستغراب و يقعد يسمعلها
ندى : تمام هو من حقك تطلبهم .. لكن انت عارف وضعنا و ظروفنا و شفت بعينك .. و بالذات في الوضع الحالي مستحيل نقدروا نوفرولك حتى جزء بسيط منهم
علي كمال ساكت و يسمعها وبس
ندى : توقعتك تستنى علينا اكثر من هكي .. شن الفرق بينك و بين حمزة توا ترا قولي
يسمع علي كمال الجملة الاخيرة منها يخبط إيده ع الطاولة ويوقف
ندى تنخلع و تخش بعضها ..
ياخذ علي كمال نفس باش يضبط اعصابه و يشد كتابها من ع الطاولة و يمدهولها .. تستغرب ندى و تقعد تشوف لإيد علي كمال و للكتاب
علي كمال : أولا .. طلبتك باش نعطيك كتابك يلي نسيتيه يومها في سيارة خوي
تنصدم ندى و تحط ايدها على فمها و ايدها الثانية تاخد بيها الكتاب وهي تفكر في الكلام اللي قالتهوله
علي كمال : ثانيا .. ردي بالك ثم أوعك تقارنيني بالكلب حمزة احسن ليك و ليا
ندى : اسفة اسفة والله اسفة استاذ علي مش قصدي فهمتك غلط اسفة يا استاذ علي
علي كمال يقرب منها لعند ما يوقف قدامها و ندى تشبحله و هي متوترة
علي كمال (بصوت واطي و حنين) : ثالثا .. اسمي علي كمال .. مش علي بس ..علي كمال
تتفاجيء و وجهها يحمر ندى : ها ... اها تمام !
و على طول رجليها للباب و تطلع تصكره وراها
يبتسم علي كمال و يهز راسه : مهبولة
ندى تقعد واقفة شوية و تزند على روحها بالكتاب : خيرني سخنت ؟ اخ يا ربي انفضحت انفضحت
و تمشي لصاحبتها ليلى
...........................
................................................
في حوش فتحي شوية ويطق الباب
خديجة : اهو الجيران جو .. تعالوا نستقبلوهم
و تمشي تفتح
سعاد و بنتها هبة ( عمرها 22 سنة سمينة شوية و جوها كوميدي )
يتعرفوا على بعض و يقعمزوا في صالة الاستقبال
خديجة : نورتونا والله
سعاد : الحوش منور بأهله و اصحابه
و يهدرزوا شوية
خديجة : سلمى نوضي ديري قهوة
سلمى : حاضر ماما
سعاد : نوضي يا هبة بري معاها عاونيها و تعرفوا
هبة : حاضر
و ينوضوا يمشوا .. و هما ماشيين للمطبخ هبة تقعد تشبح للفيلا وتفاصيله
سلمى : خيرك هههه
هبة : انا منبهرة الصرااحة .. فيلتكم احلى من فيلتنا بهلبا تقول فيلا متع الافلام و المسلسلات
سلمى : ههههههههه
هبة : والله حق سعدووودكم
سلمى : حتى انتم فيلتكم حلوة داخلتها زمان لما كانوا يسكنوا فيها جيراننا القدم
هبة : علاش حولوا ؟ زعما ما يكونش مسكون و طلعوا سيبوه
سلمى : هههههههه تي لالا ظروف بس
هبة : اها باهي ريحتيني
سلمى : في شن تقري انتي ؟
هبة : نقرا في معهد المعلمات ماشية بالدفان انا والقرايا مش صحاب بكل .. وانتي ؟
سلمى : تقنية طبية اخر سنة ان شاء الله قريب نبدا امتحانات
هبة : سعدوودك بتستريحي قريب
توتي سلمى القهوة و تطلع الحلويات وتبدا تحط
هبة : وووك بكلااااوة ما نقدرش نقاومها الصرااحة بناخد طرف
سلمى : هههههههه تفضلي خودي ما تتحشميش
و يرفعولهم القهوة
.........................
.......................................
عند ليلى و ندى
ليلى : حييي عليك حييي .. يا فضيحتك يا ندى
ندى : انتي بتواسيني ولا بتزيديها عليا
ليلى : شن بنديرلك انتي عفنتيها و خشيتي فيه طول وعرض .. ديما نقولك معش تتسرعي
ندى : انا وين نعلم بيعطيني كتابي .. توا قوليلي شن بندير ؟ نسيت حتى ما خديتش رقمه
تفنص فيها ليلى : شن ؟ رقمه ؟
ندى : ما تفهميش غلط يا حيوانة .. بوي يبيه
ليلى : اها باهي .. اسمعي بريله و وزيدي تأسفي
ندى : شن تقولي انتي ؟ انا معش عندي وجه حتى نقابل بيه تقولي بريله
ليلى : والله كان تبي تسمعي كلامي اهو قدامك و احسنلك .. الموضوع توا قاعد سخون تقدري تداركيه خير ما يقعد في بالك ديما
ندى : هكي قولتك ؟
ليلى : ايه ومنها تاخدي رقمه
و تمشي ندى
توقف قدام باب مكتبه و قلبه يدق بسرعة و متوترة .. وفكرت اكثر من مرة انها ما تخشش و فجأة يفتح علي كمال الباب كان بيطلع يمشي للشركة وفي إيده شنطته و يلقى ندى قدامه.. تتوتر ندى و تخش بعضها و تنزل راسها تحت ..
يبتسم علي كمال على جنب
علي كمال : ادخلي كنتي تبي حاجة ؟
تهز ندى راسها بمعنى ايه
يدخل علي كمال و وراه ندى و يوقفوا قدام بعض على مسافة كويسة و يحط علي كمال الشنطة من ايده على المكتب
ندى : انا جيت بنتأسف منك .. ما كانش قصدي .. شن بيعرفني انك كنت بتعطيني الكتاب اللي ناسياته و انا اصلا مش متفكراته حتى .. ما خطرش على بالي الا موضوع الفلوس .. اسفة يا استاذ علي (و في اخر لحظة تكملها ) كمال "علي كمال"
علي كمال : مش مشكلة حصل خير معش تتسرعي مرة تانية
ندى : تمام ..
علي كمال : شن حال أمك توا ؟
ندى (تبتسم) : الحمد لله بأحسن حال .. اليوم العشية بتروح الحوش
علي كمال : كويس
و علي كمال يمد إيده بياخد شنطته و تصدمه ندى بطلبها
ندى : ممكن تعطيني رقمك ؟
يشبحلها علي كمال بإستغراب .. تتوتر ندى و تفيق على روحها
ندى : مش ليا والله ماهو ليا .. قصدي لبوي يبيه هو طلبه مني قالي نبي رقم استاذك بيتفاهم معاك في موضوع الفلوس والله
يضحك علي كمال على جنب و ياخد ورقة يكتب فيها رقمه و يعطيه لندى
علي كمال : تفضلي
تاخد ندى الرقم : شكرا
و تطلع تجري و جهها احمر من كثر الحشم و قلبها يدق بسرعة
يضحك علي كمال على تصرفاتها و يطلع يمشي للشركة
...............
..............................
خديجة و سعاد مقعمزات يهدرزوا و نسرين بحداهم و سلمى وهبة في دار سلمى يهدرزوا مع بعض
خديجة : ايه .. حتى ولدي الصغير بيانه الخميس الجاي على بنت عمته
سعاد : باهي ما شاء الله ربي يتمم على خير
خديجة : سلمك .. عاد باش تتفضلوا تمشوا معانا ضروري
سعاد : ان شاء الله يصير خير
شوية وحمودة ولد جميلة يعيط بحداها تشده خديجة حاولت معاه لكن ما باش يسكت
نسرين : هاتيه يا عمتي عليك
شداته و حطاته على صدرها و على طول سكت
سعاد : ما شاء الله الولد ما يبي غير امه .. شداته طول سكت
تبتسم نسرين بحزن و تمنت حق انها شادة ولدها بين يديها
خديجة : لا هذا ولد بنتي الكبيرة طلعت هي ولدي الصغير يجهزوا للخطوبة و خلاته عندنا
سعاد : اه مش مشكلة .. ان شاء الله يا ربي تشدي ولدك بين يديك في اقرب وقت
نسرين : ان شاء الله صحيتي ..
خديجة : ان شاء الله يا رب
.........
...............................
هبة : ما عندكش صاحبات ولا بناويت عم بحداك ؟
سلمى : لا صاحباتي كلهم بعاد .. وعندي بنت عم وحدة اسماء ما نتلاقاش انا وياها مدمنة قرايا و جوها مش حلو بكل
هبة : ايه حتى انا زيك خليت صاحباتي وجيراني وراي وجينا هنا .. بس يلا المهم تحولنا لفيلا كبيرة كل يوم نستكشف فيها دار
سلمى : ههههه كل ما تكسدي عادي تعالي هدرزي
هبة : بنجي اصلا ما عنديش غيرك توا هههه
و شوية يرن نقال هبة
هبة : نعم شنو في ؟ .... مازال شوية و احنا امتى جينا اللطف ؟ ... ت مازال مش مستاحشة وجهك راهو خلينا نتعرفوا ع الناس الهم ... باهي نص ساعة وتعالى ... هيا وجهك يا همي
سلمى : في من تكلمي ؟
هبة : من بيكون يعني خوي هيثم الدراه الكبد ..
سلمى : وعلاش بيجي يروح بيكم وانت خطوة هنا
هبة : حتى الصبح جي معانا وصلنا لقدام الحوش و روح .. مداير روحه خايف علينا الدراه الكبد
سلمى : هههههه .. خوك الوحيد ؟
هبة : اي .. وانتي ؟
سلمى : ثلاثة خوت .. علاء الكبير و بعدين علي كمال و نديم و بعدين اختي جميلة و بعدين انا
هبة : هكي عندك اربعة خوت مش ثلاثة
سلمى : علاش ؟ كيف ؟
هبة : انتي قلتي علاء وعلي وكمال و نديم .. اربعة
سلمى : تي لاااا .. خوي الوسطي اسمه علي كمال
هبة : علي كمال ؟ اول مرة نسمع بيه الاسم هذا
سلمى : اسم مركب ماهو
هبة : غريبة
سلمى : زي سراج الدين و هكي يعني
..................
................................
جميلة و نديم في المول من محل لمحل و هما يشروا
و فجأة جميلة تشبح وصال و ألاء و أمهم فاطمة حتى هما يجهزوا و يشروا لحفلة الخطوبة
جميلة : نديييم
نديم : خيرك شن فيك ؟
جميلة : شوف من هناك
يشوف و على طول تطيح عينه على وصال
جميلة : هيا تعالى نمشوا نسلموا عليهم
نديم : بلا جو زايد يا جميلة .. فكينا تعالي نمشوا لمكان تاني
جميلة : خيرك العفو ؟ متحشم ولا شن ؟ هادي بتولي مرتك راهو
و تأشرلهم جميلة و تمشيلهم و يلحقها نديم بالسيف
وصال تشوفهم تخش بعضها وتتوتر : شن جابهم هنا !
ألاء : حي ملا عملة
فاطمة : اهلين جميلة
و تسلم عليهم و يوصل نديم حتى يسلم عليهم من بعيد و يقعد يشوف لوصال و وصال تشوفله
وصال شافتله بنظرة خطيبها و بيولي زوجها و هو كشاب بسم الله ما شاء الله تتمناه كل بنت طول وعرض و شخصية .. لأول مرة حست بشعور غريب شعور ان ولد خالها يلي طول عمرها تشوفله كـ ولد عادي اليوم تشوفلها بنظرة خطيبها
و شوية ونديم يبعد عيونه ويشوف لمكان تاني و وصال حتى هي تنزل عيونها تحت
جميلة : شن حتى انتم تجهزوا للحفلة
ألاء : ايه اهو ليه ليه .. انضغطنا لكن يلا تو نلحقوا
جميلة : ايه ايه ما يصير الا الخير
فاطمة : بإذن الله .. وين أمك خيرها مش معاكم
جميلة : كانت بتجي معانا غير جوها ضيوف ما قدرتش تطلع
فاطمة : مش مشكلة .. شن يا نديم شن حالك وشن حالك الخدمة
نديم : الحمد لله كل شي بخير يا عمتي .. وين عمي ؟ شن قعد في السيارة ؟
فاطمة : لا قال مش فاضي .. خدينا منه السيارة و جابتنا وصال !
يعقد نديم حواجبه و كأن مش عاجبه طلوعهم بروحهم
جميلة : تعرفي .. نسيت انك تعرفي تسوقي
وصال تبتسم وخلاص
جميلة : خيرك ساكتة ما سمعناش صوتك بكل .. فيك حاجة ؟
تشبح وصال لنديم و حتى هو يشبحلها
جميلة : ولا زعما متحشمة من نديم ههههه ؟
و جهها يحمر و تنزل راسها لوطه
فاطمة : علاش بتتحشم اللطف راجلها هذا توا هههه
ألاء حست الوضع توتر شوية
ألاء : هههههه شن يا ماما هيا نمشوا ؟ مازال عندنا هلبا حاجات بنشروها
فاطمة : ايه ايه .. يلا سلامتكم توا سلمولي على أمكم
جميلة : يوصل .. سلامات
و يمشوا
وصال (بصوت واطي) : صحيتي .. قريب متت
ألاء : حسيت بيك .. أمي و جميلة ما قصروش بكل .. حتى نديم حسيته تحشم هلباا
وصال تتلفت للخلف تشبح نديم وجميلة واقفين على محل ذهب من برا .. جميلة تشوف للعروض .. يتلفت نديم يسار يلقاها تشوفله ..
........
ـــــــــــــــــــــــــــــــــــــــــــــــــــــــــ
الحلقة قصيرة شوية .. هذا اللي قدرت نجهزه و انزله مع الظروف
وشكرا لكل المتابعين ..