أولا - السلام عليكم
ثانيا - عارف روحي عطلت عليكم بالحلقة
كان عندي ضغط امتحانات .. اليوم تريحت شوية
ك تعويض درتلكم بارت طويل ..
اعطوني رأيكم :))
...........................
#متلازمة_عائلتي
يبتسملها علي كمال و يركب سيارته .. و ندى وبوها يمشوا لأمها في المستشفى
علي كمال يقعز في سيارته شوية ياخذ نفس طويل و كيف بيوخر بالسيارة
فجأة حد يطق على روشن السيارة
علي كمال : ندى ؟؟؟
ندى : حبيت نقولك شكراا مرة تانية .. بجد مش عارفة كيف نشكرك ع اللي درته معاي و.....
علي كمال : خلاص عادي .. اي حد كان حيدير زيني و أكثر
ندى : لا مستحيل
علي كمال : :)) بري لبوك توا يستنى فيك .. و شوفي أمك و تطمني عليها
تبتسمله ندى و توخر و ترجع لبوها و علي كمال يشوفلها و بعدين طلع بالسيارة و مشي
....................
....................................
يروح علي كمال للحوش
خديجة : علي وين كنت الساعة 7 توا ونقالك ما تردش عليه .. حتى الغذاء ما تغديتش
علي كمال : نسيته في الكلية في مكتبي .. وقولي لسلمى تحطلي الغذاء نخش ندوش ونطلع
خديجة : برا خش دوش و اطلع تلقاني مسخناته
..........
........................
في الليل و الكل مقعمز في صالون وسط الحوش .. نسرين مقعمزة جنب علاء و جنبهم سلمى و خديجة و فتحي و علي كمال جنب بعض و نديم طالع
خديجة : ايه يا نسرين شن حالك عيالك ؟
نسرين : الحمد لله .. تسلم عليك امي
خديجة : سلمها .. خيرها معش جت ومعش شفناها اللطف
نسرين : تو تجي
خديجة : مم باهي .. غير قلت شكلها حرجانة ولا حاجة معش جت
نسرين : لا علاش اللطف أمي قلبها ابيض وطيب ما تحطش في قلبها زي هلبا ناس
خديجة : ايه صح نعرفها هلبا حتى انا
علاء : شفتوا جيراننا الجدد ؟
فتحي : تلاقيت مع بوهم الصبح .. وهدرزت عليه ناس كويسة وباهية وقلتلهم باش تقول للعيلة يجوا يتفضلوا يتعرفوا
خديجة : مرحبتين بيهم في أي وقت
علي كمال : سلمى عندهم بنت ندك
سلمى : جديات ؟ و اخيرا لقيت على من نهدرز خير الدراه أسماء بنت عمي مدمنة القرايا
فتحي : عيب يا بنتي
نسرين : ويا ريت حتى ثامر فيها تجيب فيهم بالمادة واثنين كل سنة ههههه
سلمى و نسرين يضحكوا بالشوية وعلي كمال يضحك على جنب بدون صوت
فتحي : لا حول ولا قوة الا بالله
شوية ويخش نديم
نديم : السلام عليكم
الكل : وعليكم السلام
و يقعمز جنب علي كمال
خديجة : نجيبولك عشاك ؟
نديم : لا لا تعشيت مع الولاد
نسرين و علاء و سملى و خديجة يهدرزوا فتحي يتفرج التلفزيون
علي كمال ونديم يهدرزوا بصوت واطي
نديم : شن صار فيك انت ؟
علي كمال : مشت الامور
نديم : باهي كويس .. ما تكلمتوش ع الفلوس ؟
فتحي يلقط في وذنه فلوس ما فلوس هنا
علي كمال (بصوت واطي هلبا) : عارف لازم نرجعهم
نديم : المشكلة انهم من خزينة الشركة لازم يترجعوا .. المهم ما ادورهمش بكل انت خليهم عليا انا تو نرجعهم من حسابي
علي كمال : ساهل بعدين ساهل
علاء : شن توشوشوا انتم .. شاركونا
نديم : ما في شي .. نهدرزوا وخلاص
علاء : اصلا حتى لو في حاجة من امتى انتم الزوز تقولولي حاجة
و يعم الصمت في المكان
نسرين (بصوت واطي لعلاء) : شفت اللي نقولك عليه
وعلاء يتضايق .. نديم شاد نقاله ويلعب بيه بتوتر و يستنى في رسالة من وصال بعد ما بعثلها " السلام عليكم " ع الواتسأب
علي كمال : خيرك ؟ تستنى في مكالمة ؟
نديم : لا لا شي .. انا بنطلع للجنان نشم هواء
علي كمال : باهي برا شوية ونجيك
يمشي نديم .. وعلي كمال يكلم بوه
علي كمال : بوي
فتحي : نعم ؟
علي كمال : وليد ولد عمي يبي يخدم في الشركة قالي شوف عمي يحصلي خدمة معاه
فتحي : قوله معش يفتح الموضوع هذا خيرله .. وقت يجيب الشهادة متعه نخدمه فيها الشركة
خديجة : ايه والله شن يبي يخدم وهو حتى الثانوي مش مكمله
علاء : عادي نحصلوله اي خدمة يمشي بيها روحه شن فيها ؟
فتحي : لا .. معاش تفتحوه الموضوع هذا معاي وهو كل مرة يبعثلي واحد يتوسطله انا مقايل لخوي من قبل ولدك مش متع خدمة .. يبي كل شي بالراحة بس
علي كمال : خلاص على راحتك
و يطلع علي كمال يلحق نديم للجنان .. نديم يحذف نقاله على الطاولة
علي كمال : خيرك ؟ بمن تتصل ؟
نديم : وصال !
علي كمال : اها .. خيركم
نديم : بعثلها رسالة ونتصل بيها ما تردش
علي كمال : بالك مش فاضية ؟
نديم : مش عارف حسيتها ما عندهاش نية تكلمني ! و متجاهلتني
ويجي علاء من وراهم
علاء : انت مش علي كمال باش ترد عليك
نديم و علي كمال متفاجئين من كلامه
نديم : كيف ؟
علي كمال : شن تقول انت ؟
علاء : زي ما سمعتوا .. كان انت علي كمال راهو ردت عليك يا نديم
نديم : شن تحاول تقول انت ؟
علي كمال : ما تعدلش عليه هذا فيوزاته انضربوا
علاء : بالله شن ؟ على اساس وصال ما تتصلش بيك عقاب الليل
نديم : شنو ؟؟
علاء : ايه يومها سمعتهم يهدرزوا في الليل
نديم مصدوم
علي كمال : علاااء
نديم : لا لا اكيد تكذب انت .. مستحيل علي كمال يدير هكي
علاء : اهو خوك اللي تحبه قدامك و أسأله
نديم : علي كمال قولي انه يكذب
علي كمال : غير اسمعني
نديم : كلماتك ؟ كلماتك و انت رديت عليها زي ما يقول ؟
علي كمال : ايه صح لكن.....
نديم (بصوت عالي) : معقولة ؟ معقولة يا علي كمال هكي ادير فيا خوك انا
علي كمال : راك فاهم غلط يا نديم .. ما تقولش كلام تندم عليه بعدين وانت تعرفني
سلمى : شن الدوشة هادي ؟
و تنوض تشوف من الروشن
سلمى :بابا خوتي شكلهم يتعاركوا
فتحي : خيرهم شن في ؟
و يطلعوا كلهم يجروا
نديم : شن مازال بنندم بعد اللي سمعته .. خوك انا يا علي!
ويجي فتحي يجري
فتحي : خيركم شن في ؟ علاء خيرهم خوتك ؟
علاء : شن بنقولك .. لكن علي كمال سمعته يومها يهدرز على وصال عقاب الليل
ينصدم علي كمال من كلامه
فتحي : شنو ؟ امتى الكلام هذا ؟
علاء : قبل يومين فاتو .. يوم اللي جيتني في الليل وقلتلي انزل تأسف يوم اللي ضربته .. ما كنتش نبي نقول لكن...
و يرفع فتحي ايده و يضرب علي كمال كف على وجهه
الكل ينصدم و خديجة تشهق و سلمى تحط ايدها على فمها ..
علي كمال شاد خده و عيونه مدمعات و يشبحلهم كلهم واحد واحد و نديم ما كانش متوقع بوه يضرب علي كمال
فتحي : قليل أدب ! ناقص رباية.. هادي بتولي مرت خوك يلي ما تتحشم على وجهك .. خزيه عليك
كلام فتحي ينزل على علي كمال زي السم .. و علي كمال يشبح لنديم و كأنه أنا مش هكي لكن نديم واقف وما قال شي وكأنه مصدق
فتحي : خديجة .. من غدوة تكلمي أختي تقوليلها الخميس الجاي يجهزوا للبيان و نديروا خطبة رسمية لنديم وبنتها وبعد فترة بسيطة العرس و ياسر من اللعب الزايد
خديجة : حح حاضر
علي كمال يمشي لداره ياخد مفتاح سيارته و يرجع يفوت من بحداهم ويركب سيارته ويطلع .. فتحي يمشي ويركب لداره
و نديم يمشي يدخل لدراه ويصكر على روحه و اول ما يدخل ياخد بخاخ الاكسجين و يستنشق منه بعد ما حس صدره ضاق عليه
......
نسرين : حي حي .. صدمة الصراحة
خديجة : علاء ولدي .. بالك سمعت غلط علي ما يديرش هكي
علاء : والله يا أمي سمعته يكلم فيها
خديجة : باهي بالك تكلم فيه على شي ولا تسأل فيه على حاجة و أنت فهمت غلط
علاء : كان بدافعي على حد .. دافعي على ولدك نديم .. علي مش ولدك كان تبي نفكرك
خديجة : علي ولدي زي ما انتم ولادي .. انا اللي مربياته كان تبيني انا نفكرك
علاء : انا و نديم اولادك .. هذاكا ولد السورية
و يمشي ويسيبها و تلحقه نسرين
خديجة : ما تنساش انه خوك قبل كل شي
وتجيها سلمى
خديجة : اه يا ربي .. عين و صابتنا
سلمى : هدي روحك .. مستحيل خوي علي كمال يدير هكي
خديجة : عارفاته يا سلمى عارفاته
...........
................................
علي كمال يسوق و يخبط في ستيرسو السيارة
علي كمال : انا قليل أدب يا بوي ؟ أنا ؟؟؟؟؟ أنا نقص ربااية ؟
و يوصل لاستراحة صاحبه حسن
..........
..........................
نديم في داره مقعمز على سريره أفكاره ملخبطة .. و عنده احساس ان علي كمال ما يديرش هكي
نديم : علاش ما دافعش على روحه علااش ال**&% ؟ وعلاش يكلم فيها اصلا دام عارفها بتصير مرت خوه .. اخ يا ربي
..........
.................
ندى في المستشفى تكلم في صاحبتها ليلى
و حكتلها كل اللي صار معاها اليوم و ليلى مصدووومة
ليلى : لالا مش مصددقة الصراحة .. معقوولة كل هذا صاير معاك اليوم ؟
ندى : والله اقسم بالله
ليلى : يا بنت انخطفتي .. واستاذ علي نقذك ؟ متأكدة ؟ شكلك رقدتي ونضتي تسحابيه حق .. سامعة بأحلام العصر ولا
ندى : لا مش احلام العصر هههه .. والله صار معاي كل هذا حتى انا لحظات ما نصدقش ونقول شكلني كنت نحلم ههههه
ليلى : وتضحكي تاني ؟
ندى : شن بندير هي .. والله خففت هلباا بكري قريب متت
ليلى : و جاك المنقذ الاستاذ علي انقذك ههه
ندى : كان مش منه راهو لتوا قاعدة غادي الحق
خليفة : ندى هيا يا بنتي خلي نوصلك باش نولي نقعد مع أمك
ندى : اسمعي بوي يكلم فيا تو نتكالموا بعدين
ليلى : المهم الحمد لله على سلامتك وسلامة أمك .. سلامات
ندى : يسلمك يا رب .. باي
و تصكر
ندى : خليني نقعد معاها اليوم
خليفة : لا لا انتي تعبانة ما تنسيش شن صاير معاك اليوم .. هيا قدامي وخوك قاعد في حوشك عمك .. اقعدوا مع بعض والصبح تعالوا
ندى : باهي
......
........................
...................................
علي كمال : تعرف يا حسن .. اللي وجعني مش الكف ..اللي وجعني كيف عاملوني و مافي حد دافع عليا و كأنهم مصدقين اني ندير هكي
حسن : و نديم ؟ شن دار ؟
علي كمال : أكثر واحد انصدمت فيه .. كيف طلع مش واثق فيا هكي
حسن : مستغرب فيه .. كان اقرب واحد منك ويفهمك من عيونك
علي كمال : و بوي حتى هو .. مش عارف من مربي ؟ لدرجة يقولي قليل أدب و ناقص رباية
وعلى خشت صاحبهم جمال
جمال : خير يا حلوين
حسن : خير
جمال : علي كمال ؟ خيرك ؟
...........
................
..............................
خليفة وندى في السيارة مروح بيها
خليفة : خفت عليك هلبا يا بنتي .. والله يديا و رجليا تربطوا و قعدت غير ندعي وبس .. الحمد لله ربي استجابلي و بعثلك استاذ علي
ندى : الحمد لله يا بوي فات على خير
خليفة : استاذك علي يقري فيك توا ؟
ندى : ايه ناخد معاه في مادة
خليفة : نسيت ما خديتش رقمه باش نكلمه و نتفاهموا كيف بنردله الفلوس .. امتى عندك معاه محاضرة
ندى : الخميس الجاي .. لكن يا بابا كيف بتردله الفلوس وضعنا معروف
خليفة : يفرج ربي يا بنتي يفرج ربي .المهم خودي رقمه منه و قوليله بوي يبي يتواصل معاك
ندى : باهي حاضر
.........
..........................
نديم قاعد في داره و شوية تجيه اشعار ع الواتسأب
يشوفها يلقاها رسالة من وصال راده عليه : وعليكم السلام
يحذف النقال على طول ايده ويحط راسه تحت المخدة و يحاول يرقد
...
وصال كيف طالعة من الدوش و بعد ما شافت نقالها و ردت على نديم .. مقعمزة تجفف في شعرها و أختها ألاء مقعمزة في سريرها
ألاء : من اللي يبعثلك في الرسايل من بكري ؟
وصال : قروب البنات لقيتهم مهدرزات و حتى نديم لقيته باعث رسالة
ألاء : خيره شن يبي ؟ وشن قالك ؟
وصال : ما قال شي .. كاتب السلام عليكم بس
ألاء : رديتي عليه ولا ؟
وصال : ايه رديت وخلاص
ألاء : ايه هكي خير .. زعما خيره عطل معش رد عليك ؟
وصال : اكيد رقد و ياسر من القصقصة الزايدة
ألاء : لازم نعرف كل شي امالا شنو
..................
..............................
جمال : ت كان نحصل عليه خوك علاء الكلب هذا نرقبه ع الموت
علي كمال : اخر واحد يهمني علاء .. زي خاله رمضان بالزبط
جمال : اسمع رد بالك تسكتلهم .. كاني في مكانك نحرقهم كلهم لا أمي لا بوي ما نعرف حد انا
حسن : انت بتهدي الوضع ولا بتزيده ؟ ما ادوراشي هادم عيالك لازم تتحملهم صح غلطوا فيك لكن في النهاية عيالك
علي كمال ساكت ويسمعلهم بس
جمال : اسمع الوقت هذا جو الطيبة معش ينفع .. خود حقك بإيدك كان هذا بتريح فيك
حسن : علي كمال .. فوته هذا ادخل ارقد توا .. غدوا عندك كلية و محاضرات بتعطيهم
جمال : ت كلية شن اللي قاعد تفكر فيها ؟ انت مفروض غدوة تمشي للشركة تقعمز في نصهم و تاخد حقك غادي
.............
.........................
تدخل ندى لدارها و تحط شنطتها ع الطاولة وتحط ايدها في جيبها تلقى الكلينكس وعليه دم علي كمال اللي مسح خشمه بيه .. تتأمل فيه شوية تبتسم على جنب و تحط الكلينكس في الدرج يلي جنب سريرها
............
دخل علي كمال يحاول يرقد و هو يفكر في كلام صحابه حسن وجمال و كلام من يسمع ..
خديجة مقعمزة في الصالة : وين مشي في هالليل؟ حتى نقاله قالي نسيته في مكتب الكلية
سلمى : وين بيكون أكيد عند صاحبه حسن ما عنده وين بيمشي .. ادخلي ارقدي توا يروح
خديجة : ادخلي انتي .. بنستناه لين يروح
و تمشي سلمى و تقعد خديجة مقعمزة تستنى
..........
............................
.....................................................
تاني يوم الصبح يستاقظ علي كمال من النوم و راسه يوجع فيه من يوم امس .. ندى و نديم وبوه وعلاء و أمه كلهم خطروا في باله اول ما ناض
يوم أمس كأنه كابوس عليه
يروح علي كمال للفيلا يدرس سيارته البرا قدام الفيلا ويدخل لداره بدون ما يحس عليه حد و يصكر على روحه
..........
....................
بعد ساعة
خديجة في المطبخ تجهز في الفطور و تجي سلمى
سلمى : صباح الخير
خديجة : صباح النور
سلمى : علي كمال ما روحش ؟
خديجة : لالا .. مشغولة عليه
سلمى : تو ناخدوا رقم حسن من نديم ونسألوه عليه .. خلي نجهز معاك توا
خديجة : ايه احسن حل
و يكملوا تجهيز طاولة الفطور ..
و يجوا الكل على الطاولة و يقعمزوا و الوضع متوتر ومكهرب ومافي حد يتكلم ياكلوا بس
خديجة : نديم .. ما تعلمش خوك علي وين ؟
يهز نديم راسه بمعنى لا
خديجة : كان عندك رقم صاحبه حسن اعطيهولي
و نفس الشي يهز راسه بمعنى ايه بدون ما يتكلم
علاء متضايق من أمه و تصرفاتها
نسرين (بصوت واطي) : ع اساس مهتمة بيه هلبا توا !
خديجة : مشغولة عليه .. ان شاء الله يكون عند حسن
فتحي : ما يصيرله شي ما تنشغليش عليه
يفتح علي كمال باب داره وهو لابس البدلة الرسمية لونها ازرق كحلي و قرواطة حمرة و كندره كحلة و يمشي جهة المطبخ
و هما في المطبخ يسمعوا طقات كندرة علي كمال و مستغربين لعند ما يوصل قدام باب المطبخ و هما متفاجئين ..
واقف بكل شموخ ورافع حاجبه و كأنه مش معدل عليهم كلهم ولا يهموه
و يمشي يقعمز جنب سلمى ع اليمين و مقابل نديم
خديجة : علي ! امتى روحت ؟
علي كمال(بصوت واثق) : الصبح
خديجة : كنت عند حسن ؟
علي كمال : ايه
يتضايق علاء منه ويشبحله بغل .. نديم حتى هو يشوفله و مستغرب من تصرفه وهو مش معدل مقعمز يفطر
سلمى : تبي عصير ولا شاهي
علي كمال : كان شاهي اخضر صبي
سلمى : ايه أخضر
نديم يشوف لعلي كمال و مش فاهم تصرفاته اللي يدير فيها .. و في نفس اللحظة حتى علي كمال يشوف لنديم .. لكن علي كمال يكمل فطوره عادي بدون ردة فعل
فتحي : نديم .. علاء .. ما تعطلوش اليوم بعد نص ساعة عندنا اجتماع مع مندوب شركة **** .
علاء : حاضر يا بوي
يكمل علي كمال فطوره ع السريع و ينوض بيمشي
خديجة : وين ماشي ؟ لابس بدلة و متكم
علي كمال : عندي مواضيع
و يطلع ويسبهم مستغربين فيه
نسرين : كيف عنده صحة وجه بعد اللي داره ؟
فتحي : عيب و احترميني حتى انا موجود
نسرين : محترماتك انا يا عمي .. لكن انت بروحك قلتله يا قليل أدب ومش متربي امبارح ولا نسيت يا عمي ؟
ينوض فتحي من الطاولة وهو متكنطي و نديم كأن الكلام مش عاجبه وينوض حتى هو ويطلع
خديجة : ما تعرفيش تسكتي انتي ولا شن ؟ صبح راهو
علاء : ما قالتش حاجة غلط .. كلامها مزبوط
وحتى هو ينوض يطلع
نسرين : نقولك حاجة يا عمتي .. امبارح الموقف اللي نحط فيه علي كمال ما نتمناه لعدو .. وكان طلعتوا غالطين فيه يا ويلكم منه وبالذات عمي بالكلام يلي قالهوله امس
سلمى : المشكلة أنا متأكدة ان خوي علي كمال ما يديرش هكي
نسرين : و حتى خوك علاء ما يكذبش يا ماما
سلمى : مش قصدي ان علاء يكذب ! لكن أكيد فاهم غلط
نسرين : علاء قال اللي سمعه وبس .. غير هكي أكيد وصال هي اللي متصلة بعلي كمال هي حاطة عينها عليه من فترة
خديجة : استغفر الله العظيم .. معش تعاودي الكلام هذا احنا ناقصنا مشاكل بين الاولاد
نسرين : بدل ما تحاسبوا علي كمال بس .. المفروض تحاسبي حتى كنتك الجديدة
............
.........................
اول ما يركب علي كمال سيارته يرخي القرواطة متعه شوية
علي كمال : اوففف
ويجي وليد من الروشن كالعادة
وليد : صباح الخير
علي كمال (في نفسه : استغفر الله ) : صباح النور
وليد : عارفك مستعجل بنقولك كلمت عمي ع الخدمة؟
علي كمال : اسمع نقولك حاجة ما عندك عندنا شي
وليد : كيف ؟ ما فهمتش
علي كمال : خدمة في الشركة مافيش .. حاول تخدم على راسك
و يمشي علي كمال ويخلي وليد واقف و قلبه مكسور وعلامات الحزن على وجهه
.........
.................
تستاقظ ندى من النوم و أول حاجة تخطر في بالها علي كمال
ندى : علاش أستاذ علي ؟
و تبتسم و تدخل الحمام و بعدها تدخل تجهز حاجات لبوها و أمها وتمشي لخوها معاذ في غرفته
ندى : هيا نووض هيا بنمشوا للمستشفى
معاذ : اوووف .. من بيرفعنا ؟
ندى : عمك بيرفعنا .. كانك كبير وتسوق راهو مش صاير فينا هكي
معاذ : كان عليا انا نسوق عادي لكن بوك ما يبيش
ندى : هذا اللي ناقص باش تقلبها بينا ع طول ههههههه
معاذ :عينك يا قردة
ندى : هيا نوض هياا
...........
............................
يوصل علي كمال للكلية و يدخل للمكتب متعه و ياخد نقاله اللي نساه امس
يلقى هلبا اتصالات
و هو طالع يقابل بنت عمته ألاء
ألاء : صباح الخير يا علي
علي كمال : ألاء .. أهلين صباح النور
ألاء : كيف الحال شن الامور !
علي كمال : الحمد لله بخير شن أمورك انت شن جو الكلية معاك ؟
الاء : بخير الحمد لله ماشية اهو .. شن حال خالي ومرت خالي والعيلة كلها
علي كمال يسكت شوية : كويسين كويسين .. نستأذتك توا مستعجل شوية
ألاء : لا عادي خوذ راحتك
و يمشي
...
............
فاطمة : وصااال يا وصااال
وصال : نعم يا أمي ؟
فاطمة : هاتي البشارة
وصال : خير يا أمي شن في ؟
فاطمة : كلمتني خديجة مرت خالك .. بيانك الخميس الجاي
وصال (بصدمة) : شنو ؟ الخميس هذا ؟ هذا الجاي ؟ خطوبتي ؟
فاطمة : خطوبتك ايه املا شن نقول انا ؟
وصال : شن تقولي يا امي .. اليوم أحد راهو يعني بعد ثلاثة ايام !
فاطمة : ايه عارفه و كان هذا
وصال : شن وكان هذا ؟ امتى بنلحق نجهز .. وبعدين من قال انا جاهزة للخطوبة وموضوع الخطوبة
فاطمة : شنو بنولوا لموضوعنا الاول شكلنا .. قاعدة نكلم فيك بهدوء انا
وصال : ياااا رب صبرني وخلاص يا رب
.........
...................
سلمى واقفة قدام الفيلا تستنى باص الكلية و شوية يجي هيثم يدرس قدام الفيلا متعهم تقعد سلمى اتبع فيه بعيونها لعند ما ينزل و يشوفلها و تنزل راسها تحت و مستمر يشبحلها و شوية يجي الباص متعها وتركب تمشي
.........
...................
توصل ندى وخوها للمستشفى ويدخلوا لأمهم في غرفتها
ندى : الحمد لله على سلامتك يا اغلى شي في حياتي
أمها ( نجاة ) : الله يسلمك يا بنيتي
و تحضنهم هي ومعاذ
ندى : شن حالك توا كويسة ؟
نجاة : ايه الحمد لله خير بهلبا
خليفة : هانت اهو قريب تولينا الحوش الحمد لله
ندى : امتى بيعطوها خروج ؟
خليفة : غدوا ان شاء الله
ندى : بجديات ؟ احححلى خبر الحمد لله
.........
..................
فتحي و نديم وعلاء في الشركة في الاجتماع و معاهم اشخاص و المندوب واقف في النص يشرح
و فجأة يطق الباب و يفتح .. يشبحوا كلهم جهة الباب و منصدمين انه علي كمال
علي كمال : معليشي عطلت شوية .. تقدر تكمل !
علاء و نديم يشبحوا لبعض .. وعلاء متكنطي و فتحي مستغرب
و بعد شوية يكمل الاجتماع ويطلعوا الاشخاص ويقعد فتحي و اولاده
علاء : شن ادير هنا انت ؟
فتحي : علاااء
علي كمال : زي ما ادير انت هنا
علاء : و من قال قاعد عندك مكان هنا في الشركة ؟
علي كمال : الشركة شركة بونا و عندي فيها حصة 25% زي ما عندك انت و نديم .. و انا من اليوم قررت نباشر في الشركة
علاء(بعصبية) : الشركة اللي تتكلم عليها انا اكثر من تعب عليها ف ما تجيش انت بالساهل تقول حصتي
علي كمال (بكل برود) : والله هذاكا موضوعك في النهاية حصصنا قاعدة زي ما هي و متساوية
نديم ساكت و حاط يده علي جبهته ويشوف لوطه
علاء : اسمع .. خود روحك و اطلع من هنا خيرلك
علي كمال : انت اخر من يقدر يطردني من هنا
علاء يعصب منه وترقاله : قسما بالله لو ما تطلعش من هنا و تقلب وجهك من الشركة الا (ويقاطعه فتحي و يخبط بإيده ع الطاولة)
فتحي : خلااص .. سمعتكم بما فيه الكفاية ! علاء الموضوع منتهي
علاء : لكن يا بوي ..
فتحي : شن لكن ؟ هذا خوك وحقه شن بتاكله فيه ؟
علي كمال متكي ع الكرسي ويشوفلهم بكل برود و نديم ساكت بدون ما يقول شي ولا يدير شي و يشوف لعلي كمال و تصرفاته
فتحي : علي كمال .. مكانك في الشركة محفوظ وقاعد تقدر تكلم السيكرتيرة و تاخد منها مفتاح المكتب متعك و تستلم شغلك و تباشر
علي كمال( يوقف ) : معليشي لكن ما نستناش فيك لين انت تقولي الكلام هذا .. وحتى لو ما قلتاشي.. حقي بناخده سواء رضيتوا او لا
يقوللهم الكلام هذا و يطلع يمشي ياخد مفتاح مكتبه
علاء : شفته يا بوي .. شفت الوقاحة وقلة الأدب شفت كيف يرد عليك في الكلام ؟ شن المعاملة هادي على اساس هذا ولدك الطيب والمسكين
نديم : هذا مش علي كمال اللي نعرفوه .. لكن بدل ما تقول خيره بدي هكي .. اسأل شن السبب يلي خلاه هكي !
علاء : هادي صحة وجه و وقاحة.. شن بيكون يعني ؟
نديم : والله اسأل روحك الكلام هذا يا علاء .. علاش علي كمال بدي هكي فجأة
علاء : شن قصدك ؟
نديم : ما قلت شي انا .. لكن نقولهالكم .. تحملوا اللي جايكم منه !(ويطلع)
علاء : خيره حتى هذا ؟
فتحي : علاء اسمعني يا ولدي .. هادوم خوتك الصغار و انت الكبير فيهم لازم ترد بالك عليهم مش تعاديهم انت اللي بتشد العيلة من بعدي
علاء : بعد عمر طويل ان شاء الله .. لكن يا بوي اللي يدير فيه علي كمال مش صح و انت شفت بعينك
فتحي : تحمله وخلاص توا في النهاية خوك
علاء : حتى بعد اللي صار امس قاعد ادافع عليه وبتعطيه مكان في الشركة ؟
فتحي : الانسان يغلط .. في النهاية هذا ولدي و خوك لازم نسامحوا بعض
علاء : تمام يا بوي لكن انه يكون هنا في الشركة قدام عيون خوه نديم غلط حيسبب مشاكل بيناتهم
فتحي : لعند امتى بيقعدوا ما يشوفوش لبعض .. خوت و يتسامحوا توا ولا بعدين
علاء يقعد ساكت و جاياته صفارات من اللي صاير
...........
..........................
وليد مقعمز في صالون حوشهم و حاط إيده على كفه و يفكر وتجي أمه سالمة من المطبخ و تقعمز بحداه
سالمة : وليد وليدي خيرك مهموم
وليد : لا ما في شي يا أمي
سالمة : غير قولي شن في .. وضعك مش عاجبني
وليد : هو من أمتى وضعي مساوي يا أمي .. ماهو طول عمري متقربعة على راسي
سالمة : معش تقول هكي يا ولدي توا يفرجها ربي عليك
وليد (بغصة) : اللهم لا اعتراض .. لكن لعند امتى بنستنى لامتى ؟ مش حابة تشد معاي في شي .. لا في خدمة ولا في زواج و لا حتى حاجة
سالمة : الله غالب
وليد (يوقف و يتكلم بعصبية) : كله من بوي يا أمي .. زمان لما كان عمي فتحي يقرا ويخدم و يأسس في شركة هكي كبرها .. بوي وين كان ؟ لما كان عمي يأمن في مستقبل عيلته و أولاده .. بوي وين كان ؟
كان يتصيع بس صح ولا
سالمة : ما تنساش اللي تتلكم عليه بوك هذا
وليد : في وقت عمي يبني في فيلا هكي كبرها .. بوي ولا هامه واحنا عايشين في حوش عادي .. وين كان بوي ؟
سالمة : قول الحمد لله في ناس مش محصلاته
وليد : توا اللي عنده فلوس يسوى خاطي هكي يعفسوا عليك الناس ويفوتوا بدون ما يعبروك !
و يطلع ويخليها
وليد يطلع قدام حوشهم و بالصدفة يشوف هيثم قدام الفيلا متعهم و يقرر يمشيله
وليد : كيف الحال يا جار ؟
هيثم : اهلا .. الحمد لله شن حالك انت ؟
وليد : ماشية اهو .. شن خلاص استقريتوا ؟
هيثم : ايه بإذن الله .. من اليوم
وليد : كويس تسكنوا بالهناء .. تعالى في الليل هدرز كان انت مكسد نهدرزوا في المربوعة و منها نتعرفوا وتغير جو !
هيثم : ان شاء الله تو نشوف روحي
وليد : خلاص امالا .. هيا سلامتك توا
..........
........................
تروح ألاء من الكلية
ألاء : تكذبي ؟ الخميس الجاي بيانك ؟
وصال : هكي قالت أمك
ألاء : و انتي ؟ خيرك هكي باردة ؟
وصال : شن تبيني ندير ؟ تعبت وانا نقول لا وما نبيش .. خلاص توا اللي بيصير خلي يصير
ألاء : عندك الحق .. أمي ضاغطة عليك و زيادة كان سمع بوك يفرمك فرم
وصال : ايه كويس طمنتيني
ألاء : هذا الواقع وانتي عارفاته
وصال : باهي باهي
ألاء : باهي شن توا ؟ كيف بنلحقوا نجهزوا كل شي ؟
وصال : مش عارفة .. توا أمك ادبر راسها
ألاء : الصراحة انا مصدومة ببرودك هذا .. أول مرة نشوف هكي عروس
وصال : و شن تبيني نديرترا قوليلي ؟ حطوني في الامر الواقع يا ألاء
ألاء : خلاص خلاص .. انلحقوا ان شاء الله .. تو نكلموا بوي يطلعنا وكان مش فاضي خودي منه السيارة و نمشوا احنا ومعانا امي نشروا كل شي
وصال : غدوة ساهل .. اليوم ما عنديش خلوق
ألاء : بالله .؟
وصال : ايه
ألاء : المهم تلاقيت مع علي كمال اليوم في الكلية
وصال : و المطلوب ؟
ألاء : لا شي غير نهدرز !
وصال : ما تهدرزيش .. عيلة خالك فتحي نحس في روحي كلهم كارهتهم
ألاء : جو من الاخير انتي
.............
....................................
يطلع فتحي من المكتب متعه و يمشي لمكتب علاء
فتحي : علاء
علاء : نعم يا بوي
فتحي : الفلوس اللي في خزنة الشركة انت واخد منهم حاجة ؟
علاء : لالا يا بوي علاش ناقصات ؟
فتحي : لا شكلي غالط
و يوقف يفكر شوية ويتذكر ليلة أمس نديم و علي كمال يتكلموا ع فلوس
علاء : شوف نديم مع انه اعتقد ما قربهمش
فتحي : لا خلاص تذكرت توا .. كمل خدمة
يطلع و يمشي لمكتب نديم و علي كمال و يقوللهم يجوا لمكتبه
يدخل نديم و في جرته علي كمال لمكتب بوهم فتحي و يوقفوا جنب بعض
نديم : بوي في حاجة ؟
فتحي : ايه في
علي كمال : عادي تقدر تقول ع السريع خلي نمشوا على حالنا
فتحي : من فيكم واخذ فلوس من خزينة الشركة ؟
يتفاجأوا علي كمال ونديم و يتوتروا
فتحي : سألتكم جاوبوني .. ناقصات 30 ألف من خداهم ؟
نديم : هو يا بوي الموضوع و مافيه ان .....(ويقاطعه علي كمال)
علي كمال (ببرود) : الفلوس نديم هو اللي خداهم
و يتلفتله نديم ويقعد يشبحله بصدمة
فتحي : نديم ! وعلاش خداهم ؟
علي كمال : علاش خداهم هذي ما نعرفش .. تقدر تسأله بروحك
و نديم مصدوم من كلام علي كمال و ساكت
علي كمال : هيا انا نستأذنكم بما انك عرفت من اللي خدي الفلوس معش عندي لزمة هنا
علي كمال قبل ما يطلع يتلفت لنديم ويضحك ضحكة شر و استهزاء و نديم يشوفله و مش فاهم شي و بعدين يطلع
ــــــــــــــــــــــــــــــــــــــــــــــــــــــ
رأيكم في التعليقات ..
و ما تنسوش تصوتوا للحقات و تحطوا نجمة
تابعوني ع الانستجرام : abdo_eh25