🌙حسناء القايد🌙
👑oumaima mega 👑
⚡157⚡
قبالة باب القصر الطويل و العالي لي مكيوسل ليهش الرجليي ...وقفت طموبيل بشيفورها ...عمرها حطت و لا بانت قبالة القصر ...بقات واقفة تما ...تتحل باباها و خرج محمد لابس لباس العادي تاعت الخدمة و في يدو الشكارة لي عطاها ليه عباس مع الهبطة ...هز شوفة في داك الباب لي من طولو ضراتو عينو و شمس ضرباتو و رجع نزل شوفة ...و تقدم لعند العساسة لي غا شافوه ...نومروه من راسو لرجلو ...و دارو شافو في بعضياتهم و السلاح معلق في كتافهم ...توقف قبالتهم و وحد منهم دوا بنهضة : اش كين عندك تما ؟
محمد نطق و تكلم : انا سميتي محمد السخار تاع السي عباس قايد حزب الاستقلال و جبت شي وراق من عندو لسي القايد ...دورها بيناتهم و وحد فيهم هو لي مشا و فتح باب صغير وسط داك الباب و دخل باش يوصل هاد الملام لسي القايد...و شي لاخر بقات عينهم على محمد ...باش لاجاهم الخبار ...يفتشوه تمن سباطو يقلبوه
نرجعو لقلب القصر ...في جلسة لالة سلطانة لي بقا غا مربعة رجلين و هازا خنافرها لسما ...و هاد المرة طابلتها النحاسية ...عامرة بلي تشهت النفس و تفهاتها ...ها الحلاوي ها المسمن ها البغرير ...و وسطهم براد زيين تاع اتاي ...و حالسة هنية بحيكها مهبطة عينيها و غا تسرق شوفة من تحت لعين في لالة سلطانة حيت بانت ليها شوفاتها ماشي تال لهيه....و بناتها جالسين في جنبها عينيهم على الماكلة و كلهم لابسات الحايك البيض ... و حسناء جالسة معاهم بان فيها الفلوس كلها تبري و تلمع ...و لا قالو عليها مرت سيد القايد ..تاجات معاها ...غير جالسة و رامية الشوف لخواتتها ومها تشبع غا من وجوههم ...و شافية خديدمها واقفة عند راسها متتفرقش جلايلها
سلطانة دوزت عليهم بعينيها من راس تال راس و هي تنطق : تفضلو كولو و مدوو يديكم لطبلة
هنية ردت الصواب : لهلا يخطيك علينا ا لالة سلطانة ...ايوا و البنات غا عطاتهم لورد هما يمدو يديهم بستة تبارك الله ... كين لي مشات لحلوى كين لي مشات لمسمن ...القاسمية تدور في المسمن و تماطي لخواتتها ...حسناء حدها خدات حليوة بالقاعيدة و بدات تشد في كيسان تاع اتاي و دوز ليهم و هما وحدة دوز لخرى ...لالة سلطانة شافت هاد الجهالة و الجوع ...عقدت الشوفة و صغرت العين ...معجبهاش هاد المنظر لمهيمج ...هنية قشعت شوفتها من تحتها و دارت و نغزت بنتها الصغيرة لوبانة لي علاين تزوج ...من تحت باطها و دوات معاها بلعين ...و ليني تالبنة هزت عليها كتافها و كملت ماكلتها ...و رجعت هنية تهبط في حنكها و تولي حشمو بيها و بختهم لعروسة
سلطانة مغتكملش جلوسها معاهم و لا تحط مقامها من مقاهمهم هزت عينها في حسناء لي باين فيها الفرح من عيونها ... نفرت بنيوفها ...و هي تتحلف عليها تتمحي تبسيمة على وجهها هي تنقز صورها لعالي و تعمر بقصرها عائلتها واللها لا كانت ليها ...الا لا خرجوها منية من هاد الدار (ميتة ) ....جمعا لوقفة تا دارو البنيتات بمهم عندها دهشرتهم غيشوفة مالها
سلطانة تكلمت مع هنية : نخليكم دابا عندي شغالي مرحبا بيكم في ضيافة سيد القايد راه موصي عليكم
هنية : الله يكبر بيكم ا لالة ... حسناء غا سمعت سمية سيد القايد و توصيتو على والديها هبطت راسها و سرقتها تبسيمة خفيفة ... باقا تحس بدقة في قلبها ...و رجعت هزت راسها ..و لقات عيون سلطانة عليها مشرارة ...و مكتبشرش ببشارة ...تخلعت و من ميمتها كحزت ...و نزلت عيونها لرض ...و سلطانة ضارت معلية الشان و المرشان و تبعتها عرشية من وراها
جلسة المراح
🌙حسناء القايد🌙
👑oumaima mega 👑
⚡158⚡
~~~~~~في جناح ثورية باقي النواح البكا ...تسمعو دقة رجالية ...دخل من وراها اسماعيل راجل ثورية ...لي غا شفتو قلبت وجهها ودموع في عينو ...جا وربع الجلسة قبالتهم و تهو باين من وجهو كبدتو مشوية
ثورية غير تراري براسها هزت فيه شوفتها و نطقت و صوتها مدبوح : دفنتي ولدك
سماعيل هز براسو : دفنتو يامس و شوف سبحان الله ليوم في الصبحية عطاني سيد القايد ندير لولدي صدقة باش يغفر ليه مولاه و نديع خبار موتو في المدينة و بلاما يعرف شي حد بيلا كان مع الخونة سيد القايد قلبو كبيير واخا منعؤف اش دار عبد الصمد سمح ليه و خلا خيانتو سر تدفن معاه يامس باش كاع لي خدا الصدقة يدعي ليه بالرحمة ...ثورية دخل ليها كلامو من ودن و خرج من لخرى ...مسحتها بايلا القايد بغا يكفر على دنبو ...حيت ولدها ماهو خاين ما تآمر على القتلة ...غا مضلوم و مشا بين الرجلين ...و كلشي غيتحاسب على موتو ...و ميمتو لي غتحقق ليه عدالتو تيتهنا في قبرو ....و بقاو جالسين تما مضيومين غير لي لييه ... لي جات فيهم الدقة اما هو مشا لدار لاخرة و رتاح فيها
~~~~~~في مكتب سيد للقايد لي في العلية ...جالس سيد القايد ...و هو لابس العصري ...كومبليي زييين و سلهامو فوق كتافوو ... و جالس فوق الفوطوي .. كيبان عليها من دوك المراركة الزينين الحرشين ...داير رجل على رجل و بين يديه ..مجلاد باين قدييم و وراقيه باليين و ليني قيمتو كبيرة ...عاقد الغوباشة و تيقرا فيه ...تسمع الدقة في دفتو ...هز راسو يستلغى شكون لي عند بابو ...سمغ صوت ولدو لبكر معاد كيدق و يتكلم : بااا
فخر الدين : معاد دخل ....تفتحت الدفة و دخل معاد و سبحان لي صور هاد دريري ...كيشبه لباه فوطوكوبي ..و تاهو عاقد الغوباشة و لابس تقليدي ....سد من وراه الباب ووقف
فخر الدين سد المجلاد و حطو جنبو و دار بيدو لحداه : اجي ا معاد ...تمشى معاد لعندو و جلس في جنبو
معاد : باا جيت نسقسيك واش بصح عمي عبد الصمد مات
فخر الدين على حالو هز يديه و حطها ليه فوق راسو كيدوز و يمسح على شعرو : ااه الله يرحموو
معاد : واش بصح ا با ديك الهدرة لي تتقال على عمي
فخر الدين عرفو وصلاتو خبار بلي عبد الصمد خاين : خوي راسك من هاد الكلام لي خاصك تعرفي بلي عمك مات و صافي و متخليش خواتتك صغار يعرفو بهاد الخبرية و متخليهمش يبكيو نعول عليك ....معاد رد عليه براسو بواخا ...و تبشر ليه القايد من عيونو ...حتى قطع سكاتهم دقة في دفة ...دار فخر الدين معلي الحاج هو ولدو ...و دخلت عرشية حادرة راس
فخر الدين : اش كين ا عرشية ؟
عرشية : سيدي راه العساسة تاوع الباب خبروني بلي شي حد قبالت الباب تاعت القصر اسمو سي محمد جايب شي سخرة من عند قايد حزب الاستقلال ...معاد دار عند باه كيشوف فيه حيت دريري عارف بايلا حزب الاستقلال ضدهم ...و فخر الدين جمع الغوباشة كيشوف في عرشية ... و سكت وحد دقيقة تيفكر ...عاد نطق و تكلم : دخلوه و ديوه لبيت الضيافة يتسنا تما
عرشية : واخا اسيدي ...و دارت رجعت لور خارجة
معاد
🌙حسناء القايد🌙
👑oumaima mega 👑
⚡159⚡
~~~~~~~~~~~ نرجعو لجلسة حسناء مع يماها ة خواتتها ...لي غاناضت سلطانة و بداو ياكل بجهالة ...كين لي تاكل مسمنة ورا لخرا ...و كين لي مشات لحلوى و حطتها في حزتها و تتاكل فيها ...و كين لي مسكينة تهز و تخشي في عبونها (صدرها ) عند بالهم الحلوى غتقادا
هنية نغزت حسناء و جرتها لعندها كانت باغايا تسقسها و ليني العبدة الكبيرة خلعتها (عرشية ) تمشات عاد حلات ليها الجلسة : تي اجي نقولك ا حسناء
حسناء قربت ليها و الروايح الزينة تفوح منها : هاناا ا مي
هنية : تي قولي ليا سمعت بايلا الموت عندكم و مشفت عزاية مشفت نعي كنت باغيا نعزي لالة سلطانة و ليني مسمعت بكل مسمعت نواح فحالا ماشي دار ميت ، تي شكون مات ؟
حسناء قربت ليها تدوي معاها بالهمس: مات ا مي عبد الصمد ولد عم سيد القايد
هنية : يا تبقيت الستر ومديرنش ليه نعي و العزو
حسناء رجعت تدوي بشوية : بشوية اميي راه طلع عبد الصمد من الخونة و هما لي قتلوه ...شهقت هنية و شدت من صدرها : ياربي السلامة (و دريات بحيكهم حطو يديهم على فمهم )
حسناء : و متقولي امي هاد الكلام لحتى حد
هنية : ويلي ابنيتي عليك اماان
حسناء : و سيد القايد مبغاش يعملو لا نعي لا يسمع بكاه هنا في القصر
هنية : ياربي تستر و تدينا في الضو و ترجعنا في الضو
حسناء عدلت لجلسة و دارت عند خواتتها : نوضو يلاه نطلعو لجناحي احسن تما نسدو دفتنا و نهضرو براحتنا
هنية قرصتها في درعيها تقفزت حسناء : كوني تحشمي و ديري عقل نطلعو لجناح سيد القايد اش يقول علينا
حسناء تتحك في القرصة : ولا ا مي سيد القايد عندو جناحو ميقربش ليه رجلي هادا جناحي انا ...هنية طاح فيها العجب هادشي عندهم فشي شكل ...و ليني ميجوزش يهدرو في سيد القايد
نطقت سميحة : خلينا اختي غا هنا كينة الحلوى
حسناء : غا يلاه لجناح غنقول لشافية غتجيب ليكم اش حبيتو
هاينة : فحال هاد الحلوى
حسناء : فحاالهااا غا يلاه ....ناضو البنيات كاملين و شافية متقدماهم و متبسمة : زيدو ا البنات من ورايا ...فرحو و غاديين معاها ...و حسناء شدت من دراع يماها و نوضتها من موضعها و شادة منها و تهمس ليها و تعاود ليها ...و تاهنية تسقسيها ...و غادين لجيهة الدرج ... ايوا هادشي تزامن مع دخلة تاع محمد سايقاه عرشية قدامو ...غادي هو كي نمس و يدور في عينو في داك القصر ...لي عمرو شاف فحالو ...و داتو عرشية لجبهة وحد القوس فيه جوج طرقان ...طريق تودي لقلب القصر و طريق تاع صالون ضايفة لكبيرة ...مع دارت عرشية مع القوس و غيدور من وراها هو تيلوي في عينو ....تاشاف خوتات حسناء ديزات من قلب القصر و لي وقف ليه قدامو و قلبو ...و تصرفيقة على خدو ...هي فاش شاف هنية ماشية و شادة منها حسناء ... كتخبرها ... وقف و صدمة وقفت في حلقو واخا قالت ليه يماه اش كين ...متيقش و هاهو كيشوف بعينو ...حسناء لولية لي عشقها قلبو ...لبسة لباس الدار الكبيرة ...و سالفها طويل لي اول مرة غيشوفو ...و عيونها و زينها ...كيفاش غيقدر ينسا شوفتها ...بلا هواه غير طريقو و بدا غادي كيتمشى لجيهتها قاصدها
عرشية كانت غادا ...حتى حست بايلا الضيف ماشي من وراها وقفت و دارت لعندو لقاتو غير طريقو و هي تبعو كتنده عليه : اسيدي اسيديي ...محمد مكيسمع مكيشوف غير حبيبت قلبو لي خانتو ...و مشات تزوجات ...حسناء كانت كتعاود ليماها الشادة و الفادة و الحاجة لي كتسقسيها عليها كتجاوب عليها ...حتى سمعو شي لغا ...جاي من جيهة القوس ...عرشية كتنده....هزو عويناتهم لجيهة القوس و يارييت كون ماهزوها ... بالاخص حسناء لي تضرب فحال الرعد في وجهها ...و الصدمة خلاتها توقف في مكانها ...كتشوف محمد جاي قاصدها و جاي لجيهتهااا ...و كيتمشى لعندها ...و ديك الساعة عاد خرجت لالة شروق من جناحها كتنشف دموعها ...مع هزت شوفتها نيشان في حسناء و يماها ...و زاد حقدها كبر ليها ...و ليني شافت راجل غريب جاي عندهم و قاصدهم ...صغرت عيونها تتشوف
هنية تهيا كتقول فين شايفة خليقتو تتفكرت بلي هو ولد زوبيدة جارتها ...و ليني اش تيعمل في قصر سيد القايد
محمد توصل قبالتهم و حسناء تخلطت عليها الدعوة و عينيها في عينو و تخلطت عليها بكية و صدمة حتى نطق بين فمو : حسناااء ؟ ...هنية خرجت عيونها و دورت شوفتهل في بنت كرشها ....وشروق زادت صغرت الشوفة كتدوز عينيها بيناتهم ...و هي تدور عيونها غا بصدفة ...تا كيبان ليها سيد القايد لعرضو و طولو واقف في مكانو و داير يدو من وراه ...و غوباشتوو مطلوقة ...غا حطتو تخلق فيك الخلعة ... و باين من وجهو متيبشرش ببشارة زينة ...يتبع
محمد
فخر الدين
🚨🚨🚨🚨🚨🚨🚨
😁😁😁 تابعكم ناشط ناشط ....و غيزيد تشنشيط و ملحا و كامووون ....مغنقولش ليكم اش غيوقع و ليني راه داكشي شاعل شاعل هههه
يلاه بنات تفاعلو كمونطيرات تاعكم ....الحاجة لي كنركز عليها ديما تعاليقكم يكونوو بزاف بينو ليا حماس القصة ...يلاه نتلقاو قريبا