*بسم الله*
.
.
.
.
.
.
.
.
.
.
.
.
.
.
.
""ميار""
طبطبت لباب فتحتلي مرا كبيرة سلمت عليها ودخلتني
ميار: صباح الخير خالتو
هي: صباح نور
ميار: بابا وين راه؟
هي: راهو في بيتو تحبي تروحي ليه
ميار: ؤؤک
وراتلي وين وروحت طبطبتلو في بابو ودخلت
ميار: صباح الخير بابا
صهيب: صباح نور بنتي ادخلي
دخلت وريحت جنبو .. تبسم معايا
ميار: لبارح كنت مشغولة مع شريان تع لحوايج والله مقدرت نجوز ليک
صهيب: معليش بنتي المهم راحتک .. وقتاه لعرس
ميار: شهر
صهيب: مكنتش متخيل يجي نهار نلقا بنتي مخطوبة .. ياريت كون كنت حاضر
ميار: بابا والله كنت متمنيا زواجي نخرج تحت جناحک وربي حققلي واش حابة
صهيب: ربي يخليک وينورلک طريقک
ميار: آمين .. حابة نهدرو في حاجة
صهيب: ني نسمع
ميار: لبارح هدرنا انا وختي آسينات وراجلها بلي نتا راک مريح وحدک هنا؟ ايبان قلنا جي تعيش معانا
صهيب: لالا بنتي اول حاجة انا راني مديونلهم بحياتي كي رباوک وتكلفو بيک وتاني حاجة انا عندي دار مريح فيها
ميار: لالاا انا خلاص خممت وآسينات هي ليقتارحت نديرو هكا منها نعيشو كامل كيف كيف قبل منتزوج ومنها متريحش وحدک مخصش واش ريحت وحدک وحتى كي لقيت بنتک تريح هكا؟
صهيب: واش نقولک .. كيما تحبي منقدرش نقولک لالا
ناض فتح خزانة جبد منعرف واش وجا ليا رفد يدي وحطلي دراهم
ميار: لالا بابا صحاا
صهيب: نزعف ضوكا؟.. هذو تع عرسک جهزي بيهم وزيد عندک باباک تسحقي حاجة راني هنا
تبسمت وعنقتو .. حمدلله لي ربي استجاب لدعواتي وراني نشم في ريحت بابا
ميار: بابا معليش نسقسيک
صهيب: شحال تسقسي شغول يماک .. قولي
ميار: قتلي نهار انا نزدت تعرضت للقتل ياک شكون؟
حک وجهو وخزر فيا
صهيب: احسن حاجة متعرفيش
ميار: سقسيت باش نعرف
صهيب: رشيد مالک
غير سمعت آسمو تشوكيت تسما لي حب يقتل بابا يكون بابات لي راح يكون راجلي وحبيبي
ميار: بابات جواد
صهيب: بابات جواد؟؟ راكي سوور
ميار: اييه هوو ونعرفو كي كنت مريحة عند خالتو رحمة جا وضارب مع جواد
صهيب: كيفاه؟
ميار: قبل 19 سنة نهار نزاادت خت جواد اسراء كانت خالتو رحمة ولدت بيها وهذاک نهار وصلها وراق طلاق .. منبعد جواد عيا على يماه وختو باش عيشهم
صهيب: الله لاتربحو شيطان
ميار: ربي يسامحو
صهيب: متخمي في حتى حاجة .. انا جواد والله منهار تلاقيتو درتو كي وليدي تسما متقولي والو
ميار: علبالي وحتى انا خيرت جواد من ناس كامل باسكو هو لي يوالمني
صهيب: ربي يهنيكم ونشوف حفادي
ميار: ان شاء الله.. خلاص تفاهمنا مالا
صهيب: كيما تحبي
ميار: مالا كي تكون واجد عيطلي يجي يجيبک قاسم وانا نوجدلک بيت
صهيب: ان شاء الله
نضت ودعتو وخرجت ملثم وجدت كلش ورحت عند جواد للخدمة باش نشري حاجة لعرس جاسر وحكيتلو واش صرا يعني ماجيت نهدنو حتى ريقي نشف
******************
**جاسر**
دخلت لدار لقيت لحس ودنيا اصلا ليوم لعشا وغدوة لعرس .. تنهدت وطلعت لبيت وحدوخرا باسكو يما خرجتني مبيتي حتى جي مرام
دوشت لبست حوايجي وخرجت .. لقيت جواد و اكرم حتى قاسم وجا برا هذاک وين جاو
نسا دخلو وانا رحت معاهم قعدنا لتحت حتى ل ليل دخلو يتعشاو وانا عيطتلي يما معولة ديرلي لحنة .. نضت على سعدي دارولي
وزهاو هما بيان سور .. روحت رقدت باسكو صباح نوض بكري
نضت صليت لفجر وهبطت لتحت قبل ماينوضو كامل
عيطت لجنيرال وسقسيتو آسكو يجي .. وحمدلله لي قبل
قعدت ندور حتى جزت على بيجوتري تفكرت لخاتم لي نوغمالمو نشريه ووصاتني يما عندها سمانة
دخلت خيرت واحد وزدت سنسلة .. غلفها وخرجت روحت جبت كوستيم ديالي وروحت لحفاف حففت
دخل جواد .. باسكو وصيتو وين .. حتى هو حفف ووانا روحت وجدت روحي في دارهم باسكو لغاشي فدار
غير دخلت لقيتهم مجمعين كامل .. غير نسا مكاشهم .. طلعت وجدت روحي ووليت ليهم
اكرم: اسمع؟
جاسر: خير
اكرم: شبيک مشنف نوغمالمو تكون فرحان
جاسر: في عرسک نشوفوک
اكرم: انا مزال راهي رايحة لعامين
جواد: مشي بزاف
اكرم: ايييه باسكو نتوما طفرتوها وانا نسنا عامين وهي حابة كثر
جواد: نوغمال لوما تقرا شويا
مراد: اسمعو لوقت نوغمالمو نروحو
جاسر: داكور .. نتوما روحو وانا نوصلكم
جواد: ؤؤک
خرجو وانا زدت شويا روحت موراهم .. مديت لمراد يسوق
**************
**مرام**
نوضوني صبااح بكري .. داوني لحفافة ولي ريحت فيها حتى شبت كل دقيقة نقوللها مشي هكاک اومبعد لدار .. قعدت قدام لفونتيلاتوغ باش ميفسدش لماكياج
سيرين ستفتلي ليفاليز تع تصديرة و لافاليز لي نديها معايا تاني .. غير غافلتها هبطت لتحت فتحتها وحطيت بيجامة كنت مخبيتها غلقتها وتنهدت براحة
كي قريب يجو .. لبسوني كراكو وزادولي برنوص ملفوق
كنت حابة هكا ختي اسراء تكون معايا باسكو ختي لوحيدة وحتى جواد مي مشي كيما اسراء
ريحت نسنا يعيطولي و سيرين وجدت روحها تفتحت لباب .. طلعت راسي لقيت ريان وموراه اسراء .. نضت من بلاصتي وجات ليا عنقتها مزياا جات
اسراء: ياعمري على ختي تهبليي
مرام: وجواد جا
اسراء: يجي مع راجلک انا جابني لهنا ريان
مرام: مزيا
سيرين: متبوسيش بنت عمک نتي
دارت وراحت تجري ليها
اسراء: والله ياكلبة توحشتک متآمنيش شحال
سيرين: ملعام لفيل ماجيتي لعدنا
اسراء: كل منجي منلقاكش يا عيشة راجل
سيرين: صحا
ريان: اسمعو لبنات راهم قريب يوصلو وجدو روحكم
اسراء: ؤؤک
خرج وغلق لباب .. حتى هجمت ماما و طاطا جميلة
سعاد: هياا خفو راهم وصلو
مرام: معليش تخلوني مع ماما شويا؟
سيرين: ؤؤک
خرجو وانا دنيت لماما .. عنقتها وسييت منبكيش مالغري عيوبهم مي يريحو والديا
سعاد: ربي يفرحک وشدي في راجلک
مرام: ان شاء الله ماما
باستني هبطتلي لبرنوس على وجهي وخرجتني معاها .. هبطوني لتحت سلمت على بابا وخرجت تحت دراعو
حسيت يدو كي حكملي يدي طلعت عينيا برک لقيتو لابس كوستيم بلو نوي وريحتو سبقاتو
رشيد: بلاک عليها
جاسر: راهي امانة
خرجني وركبني فطونوبيل .. غير ركبنا طلق يدي ودور راسو .. تنهدت ومسحت دموع لي ساحو
وصلنا لاصال .. جاو لبنات هبطوني ودخلوني قابلتني يما سهام
شربتلي حليب وتمر .. ودخلوني لبيت .. جوزت نهار تع بدلي وخرجي .. حتى وصل لاغوب بلونش
سيرين: شوفي بلاكي تبهدلينا معاه
مرام: على واش؟
سيرين: راكي تعرفي
ميار: خليهاا بركاي متخلعي فيها
اسراء: هههه متزيدلهاش مكيش شوفي فيها
سيرين: مصلحتها
مرام: بلعوها عليا هاذي لاطونسيون
سيرين: سوف تندمين
جا هو خرجني قطعنا لابياس مونتي ولبسلي خاتم .. تمتم قال نروحو لا علينا
سلمت عليهم ومشي موراه .. ركبني في طونوبيل وانا لثم بديت نرجف هو فات وعدني وان شاء الله ميدورش في رايو
جاسر: وشبيک تبكي خلاص
مرام: لالا
جاسر: صحا ديري سبتة خير ميحبسونا في نص طريق
مرام: علاه وين رايحين
جاسر: ايه لوتال
دقيقة دقيقة .. ياربي وستر .. نحيت تخمام هذا من مخي وسكت حتى وصلنا
رفد ليفاليز .. دخلنا دا لمفاتح وخلص وطلعت موراه
غير دخلت لبيت وغلق لباب آه لثم بديت نفيبري .. نحيت لبرنوس
مرام: احم معليش تحطلي لافاليز هنا
جاسر: ايه
حطهالي وهو راح دخل لدوش
جبدت واش نسحق .. رفدت لبيجامة لي جبتها مزيا لكلبة تع سيرين مخلات مابقات
نحيت طالون ولاكواف مابيد خرج انا دخلت .. غسلت شعري ونحيت لالاک هذاک غسلت لحمي .. نشفت لبست بيجامتي سر سعادتي وبليغة .. تفكرت سيشوار مجبتوش باش نشف بوووه
لويت سربيتة على شعري وخرجت .. حوست عليه ملقيتوش .. ملييح
لميت لافاليز ديالي وحوايج لي نحيتهم .. وريحت حتى دخل شفت فيه لقيتو لابس شورط وتريكو دپو شعرو مشمخ .. راح ريح فوق لفوتاي وهدر
جاسر: ضوک شويا يوصل لعشا
مرام: منيش جيعانة
جاسر: كولي ولا ريحي المهم جبت باش متقوليش ماجبتش
طبطبو فلباب راح فتح ودخل لماكلة غير شميت ريحة لماكلة نضت ناكل
جاسر: هه سبحان الله
مرام: متاكلش
جا ريح قدامي وبدا ياكل .. عمرت كرشي ولميت دوزان .. دخلت غسلت سنيا وخرجت
جاسر: ادخلي توضاي نصلو
مرام: آه
لالالالالالا متفاهمناش هكا .. بلعت ريقي بصعوبة
جاسر: روحي نسناک ضوک تفوت لعيشا
هل سبق وقلت انا حمارة .. وي وي هذا كامل سيرين دخلتلي سوسة .. روحت توضيت وجبدت بواش نصلي لبستهم وهو كيف كيف
فرش صلايتو وانا موراه .. صلينا كملنا ونضت مابيد نحيت حوايج صلاة لقيتو سطالا فوق لبونک
مرام: وانا وين نرقد
جاسر: منيش وحش ناكل لعيباد .. هايليک بلاصة
شرلي على جنبو .. تنهدت رفدت سربيتة حطيتها على لمخدة باش منشمخهاش وحطيت راسي ملعيا محسيتش رقدت ديراكت
صباح فطنت .. دورت راسي لقيتو مزالو راقد
نضت دخلت لدوش ديراكت
توضيت صليت وجبدت شعري .. ناض عين مفتوحة ولوخرة مغمضة
جاسر: صباح الخير شحال ساعة
مرام: صباح نور.. راهي 9 ايذا حبيت
ناض وانا وجدت روحي لبست عباية ودرت خيماري .. شويا خرج هو لابس سروال نواغ وتريكو grouna وينشف في شعرو
طبطبو فلباب راح فتح ودخل لقهوة ... قعد يشرب آبري خزر فيا
جاسر: متشربيش
مرام: لالا
حط لكاس وناض .. لميت حوايجو في فاليزتو
جاسر: ايذا واجدة نروحو
مرام: ايه
رفد ليفاليز وانا تبعتو .. حط لمفاتح وخرجنا
مدة وصلنا لدار
من دخلة قابلتني يما ومعاها ماما ولبنات موراهم
جاسر حط ليفاليز قدام لباب وراح باسكو كاين نسا .. سلمو عليا ويما مدتلي مصحف و سنسلة
دخلوني وسيرين قعدت تغمزلي ملبعيد ياربي صبر
نضت على سعدي نسلم لي يجي ليا .. حتى هلاصو وطلعت لبيتي وعجبتني بزاف كانت سامبل
دخلت بدلت حوايجي لبست قفطان سامبل باش نبان عروسة بنعمي
عدلت شعري ودرت شويا غوج آلاف وغيسيل برک .. درت ريحة وهبطت لتحت
ريحت معاهم وقعدو يحكو يحكو محبوش يسكتو اصلا ليوم فطور لعروسة لي هي انا
شافت فيا سيرين و هدى وغمزولي .. جات هدى وحكات في وذني
هدى: هيا نطلعو لبيتي
مرام: ونسا
هدى: هياا برک قلت لماما
نضت معاهم وطلعت لفوق .. لحقت اسراء و حتى ميار و سلسبيل جاو
سيرين: واش نتي زينتي بين ليلة وضحاها
مرام: من بكري
سيرين: مزية جيت نعرفک
ميار: مبروک عليک
مرام: يسلمک لعقوبة ليک
جات مدتلي كادو مغلف
ميار: هذا بعتو ليک خوک
زادت باطة حمرة وقالت
ميار: وهاذي مني
مرام: مرسي
سلسبيل: بعدي دالتي
مرام: ههه والله بزاف
سلسبيل: هي صح منعرفكش بزاف مي حبيت نجيبلک كادو باسكو عجبني لمثوم لي طيبوه لبارح
مرام: هههه على جال لماكلة
ميار: على كرشها تخلي عرشها هاذ طفلة
اسراء: آيا خلو سلسبيلتي
سلسبيل: نتي هي الاصل ولباقي تقليد
سيرين: آه وقتاه نتزوج ويطيحو عليا ليكادو هكا
اسراء: طاطا جميلة خليتها نهار كامل ديري ليكادو لروحک
ميار: ايذا تزوجتي هاني نجيبلک
سيرين: يعطيكو صاحيتو
سلسبيل: ضوک معليش تحكيلنا
مرام: واش نحكي
سيرين: متبدايناش جبناک لهنا على جال هاذي
ميار: اييه باش ندي خبرة ياو
مرام: الله يهديكم .. استغفر الله معاكم طفلة صغيرة معليش
هدى: لالا نعرف
سيرين: هههه شحال في عمرک
هدى: 17
مرام: حسابتلي 15 والله
ميار: مام انا
سلسبيل: متبدليش لهدرة
مرام: ماصرا والو راني مريضة
خزرت فيا سيرين وصغرت عينيها اصلا غير هي علبالها علاش تزوجنا
سيرين: آمممممممممم
***********************
**جواد**
شفت جاسر جا ملبعيد وقعد معانا ..
جاسر: صباح الخير
جواد: صباح نور
جاسر: تقدرو تغطو عليا عندي خدمة
اكرم: متبداش وشبيک ليوم عرسک
جاسر: عيطولي ضوک ولازم نروح
جواد: ايه روح
ناض رفد مفاتحو وراح ...
اكرم: وكيفاه ضوک
جواد: واش كاين
قولتهالو مستغرب .. تنهد وقال
اكرم: باباک وين واصل بيها دنر حياة بنتو كامل علبالنا تخمام جاسر راح تتغبن معاه مرام
جواد: عندي كونفيونص في جاسر حتى وايذا جرحها راح يلقاني في وجهو
ريان: ان شاء الله مايكون غير لخير
جواد: المهم نوض شويا ونوليلكم
نضت ومشيت بعدت عليهم .. يعت ميساج لميار باش تهبط
" 5 دقايق نلقاک لتحت راني فالجاراج"
(نفهمكم كيفاه جاية دار جاسر.. بون بروميار ايطاج فيه جاراج كبير باب تخرج لبرا وباب جاية لداخل يقابل دروج يطلعو منو لايطاج 2 ولايطاج ثاني بابو يدخل ديراكت لصالون قدامو كوزينة وفلجنب كاين دروج يدي لبيوت ان شاء الله تكونو فهمتوني وتخيلتوها كيفي ايذا لقيت تصويرة نحط)
ريحت على كورسي وطلقت لاطاي نسنا فيها شويا سمعتها تقبقب وجاية
رفدت روحي بزرب وطفيت ضو .. مشيت من جيهة لحيط بلا مندير لحس وتكيت على لحيط حتى بانت داخلة وتعيط بآسمي
ميار: جوااد
حكمتها من يدها بلخف وجبتها كي جات تعيط غميتلها فمها وتكيتها على لحيط طلعت عينيها فيا نحيت يدي
ميار: يعطييک غمة خلعتني
جواد: غمة؟
ميار: اييه هكا ناس يديرو
جواد: ايه
ميار: ديجا علاش عيطتليواش تسحق كتت مشغولة مع نسا بسيف تسرسبت
جواد: نسيت باش نمدلک حاجة صباح
ميار: وشنوها
دخلت يدي في جيبي وجبدت باطة حمرة
جواد: هاذي ليک
رفدتها من يدي وفتحتها غير شافتهم تبسمت وخزرت فيا
ميار: شابيين ياي مرسي جوادي
طلعت يدها حتى لرقبتي وهبطتني هذا كامل باش تعنقني .. حطيت يدي على ضهرها
سمعت تحمحيم .. دورت راسي لقيت اسراء بعدت عليها
اسراء: آآي نتوما واش راكم ديرو هنا
راحت ليها ميار وداتها .. طلعت شعري وخرجت ملثم لقيت اكرم رايح جاي غير شافني جا
اكرم: وسمک ويين كنت
جواد: هنا علاه؟
اكرم: بابا ضوک عيطلي عندو رونديفو على 3:30 تسما نروح ليه هذاک هو
جواد: اييه ؤؤک تهلا
************
**اكرم**
وصيت جواد يريح مع ريان مابيد نروح ندي بابا .. حكمت طريق لدار سطاسيونيت وجيت داخل
لقيت لباب مشرعة للخر .. ولعياط فصالون زربت في خطواتي حتى شفت بابا مريح حاكم راسو بين يديه ومراة واقفة
محمد: اخرجي من داري خاينة
مراة: محمد والله مخنتک داروها بيناتنا ونتا آمنتهم
اكرم: واش صااري هناا
بابا طلع راسو وانا شفت هذيک لمراة مليح كانت متحجبة وعينيها زروقا
اكرم: مزالني نسنا .. ونتي شكون؟
محمد: اكرم مدخلش روحک
مراة: كيفااه ميدخلش روحو معليش تفهمني
اكرم: ضووک متفهمونيييش
مراة: انا يمااک
مراد لي بسيف باش لقيت واحد يسقي
**************
- إنتهاء البارت
- رايكم؟؟؟
- علاقة جاسر و مرام خممت فيها مليح صراحة مبقاش بزاف ويتكشف رشيد تسما هكا لعلاقة باي باي سلام
- آيواه سي محمد ظهر عندو ماضي جميل ههههه حتى وحدة مسقسات على يمات اكرم حيرتوني
- لبارت لي بعد هذا راح يكون فيه غير اكرم وما جاوره معنتها اسراء هههه هكا قيس مجبتهمش كامل مساكن يغيضو وللعلم هذا وين خممت لقصة يمات اكرم باسكو مكانتش ضمن تخطيطاتي مي منبعد خممت في حوايج ترقبو
- رايكم في عرس مرام و لحجرة تع جاسر وواش تتوقعو نهاية علاقتهم
- شكرا بزاف على تعليقاتكم تشجيعية .. فوط وكومنت ماتنساوش
- إلى الملتقى..
- أحبكم ♡˙︶˙♡