قبل ما تقروا ادعموا الرواية و حطوا تصويت (vote) على كل بارت
و شكرااا
حطيتلكم بارت طويل شوية
هيا ديروا مشاركة للرواية لقروباتكم و صاحباتكم
#متلازمة_ عائلتي
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
نديم في داره واقف وشاد النقال و حاط على رقم وصال و يفكر في كلام جميلة لما كانت عندهم
جميلة : هادي بتولي خطيبتك لازم تتصل وتتعرفوا على بعض اكثر
و قرر يتصل
وصال : من هذا ؟ رقم ما نعرفاشي
ألاء : ما ترديش اكيد حد غالط
نديم : زعما راقدة ؟ خلي نعاود اخر مرة
وصال : يتصل تاني
ألاء : ردي وخلاص .. بالك حد نعرفوه
وصال : باهي .. ألو
نديم (بتوتر) : ايوا .. وصال ؟
وصال : نعم من معاي ؟
نديم : أ .. أنا نديم
تنصدم وصال و تحط يدها ع النقال باش نديم ما يسمعش
وصال (بصوت واطي) : هذا نديم
ألا : شنوووو ؟
وصال : شن ندير ؟
ألاء : كلميه شوفيه شن يبي
نديم : ألو .. ألو ؟؟!!
وصال : ايوة ايوة نسمع فيك
نديم : كيف حالك ؟ ان شاء الله بخير
وصال : الحمد لله وانت ؟
نديم : بخير ..
ويسكتوا شووية
نديم : معليشي كلمتك في الوقت المتأخر هذا !
وصال : خير تبي حاجة ؟
نديم : لا سلامتك .. غير جميلة قالتلي لازم تكلمها وتعرفوا على بعضكم اكثر
وصال : اها باهي
نديم : اااا .. بالك تبي حاجة ولا ناقصاتك حاجة
وصال : لالا ما نبي شي .. انا بنرقد توة تصبح على خير
نديم : تمام .. وانتي من اهل الخير
و يصكروا
نديم : غبي غبببببي .. خلاص معش تعرف تقول كلمتين مع بنت ؟ شن بالك تبي حاااجة هادي
...
ألاء : خيره شن يبي احكي فيسع !
وصال : شي غير جميلة شورها مكلماته قالتله كلم وصال وزيدوا تعرفوا على بعض
ألاء : نسمع فيك تقولي لالا ما نبي شي
وصال : سألني قالي بالك تبي حاجة
ألاء : ما شاء الله اهتمام من البداية
وصال : اهتمام شن .. كان يتحشم على وجهه راهو ما يوافقش ع الزواج هذا بعد ما خدعوا خوه علي كمال
ألاء : معش تحكمي عليه طول .. وين تندري عليهم شن صار بيناتهم
وصال سكتت وقعدت تفكر ..
..
تاني يوم الصبح
يجهز علي كمال روحه للكلية ويطلع
وهو كيف طالع بسيارته قدام حوشهم يشبح ناس و سيارات كبيرة جايبة أثاث و حاجات جايين للفيلا يلي قدامهم و فجأة قبل ما يمشي يجيه وليد ولد عمهم يوقف عليه من الروشن
وليد : صباح الخير شن الجو
علي كمال : صباح النور ماشية
وليد : شفت جيرانكم الجدد ؟ بدو يجيبوا في بضايعهم
علي كمال : عيلة منو ؟
وليد : عيلة **** عندهم ولد هذاكا اللي يسوق في السيارة و بنت عمر اختك سلمى
علي كمال : ما شاء الله عليك عندك تقرير كامل عليهم
وليد : كيف عاد سألت عليهم .. اسمع بالله شن صار كلمت بوك ع الخدمة في الشركة ؟
علي كمال : ما كلمتاشي .. ما فضيتش الايام هادي (يكلم فيه بالسيف)
وليد : عندك الحق الايام هادي انت مشغول بعد اللي صارلك .. المهم شوفهولي خلي يخدمني معاه في الشركة .. انت اكثر واحد ياخد بكلامك
علي كمال : باه تو نشوفه مع ان صعب راهو .. انا عطلت ع المحاضرة هيا سلامتك (و يمشي)
علي كمال (يكلم في روحه في السيارة) : يبي خدمة هو حتى شهادة ما عنده شن الناس هادي .. ت برا شوف خدمة تناسبك
وليد (يقعد واقف قدام الحوش) : تو يجيك يوم يا ولد السورية و تطيح في ايدي
يتلفت يشبح نديم كيف طالع من الحوش يأشرله بإيده و يبتسم ابتسامة خفيفة
وليد : حتى انت يا نديم .. تاخد مني وصال ! تو تشوف
...................
..........................
بعد ما العيلة كلها سمعت و عرفت ان علي كمال أمه سورية
نسرين و سلمى و خديجة في الكوجينة
نسرين : اشبح عمي ما يطلع منه .. وصل في السوريات ههههه
خديجة : مش لازم منها الدوة هادي ع الصبح
نسرين : شنو يا عمتي شكلك غرتي .. هو تبي الحق من حقك تغاري شكلها أم علي كمال كانت آية من الجمال
خديجة (بعصبية) : شن عرفك فيها انتي .. بلاش كلام زايد
نسرين : لا انا توقعت الصراحة لان علي كمال احلى واحد في العيلة احلى من نديم و حتى من راجلي الصراحة
خديجة يتغير وجهها
سلمى : حليلك كان يسمعك علاء
نسرين : قلت الحق أنا .. لكن انا راجلي ما يجي حد زيه في كل شي ربي يحفظهولي
خديجة : ياسر ياسر من الهدرزة اللي بلا معنى .. نديم و علاء حتى هما ما شاء الله عليهم طول وعرض وجمال طالعين لبوهم كلهم حتى علي كمال
نسرين : أكيدة حتى انا اصلا ما قلتش مش حلوين لكن قلت احلاهم علي كمال .. يلا نقول لعلاء يرفعني حوش عيالي قداش ليا ما مشيتش ( و تمشي)
خديجة : احسن خلي نستريحوا منك شوية
سلمى : عمري ما ريت زي لسانها الصراحة شن هذااا ؟
......
..........
ندى و صاحبتها ليلى في ساحة الكلية
ندى : عقلي مش معاي بكل .. مشغولة على أمي
ليلى : حاولي تركزي الامتحان هذا عليه درجة كبيرة
ندى : والله ما هامني الامتحان .. على خاطر امي حلفتلي كان هذا ما نحضره
شوية و يدخل علي كمال للكلية
ليلى : أهو الاستاذ علي جي هيا بالك
ندى : يجي ولا يقعد مش حاضرتله المحاضرة
ليلى : علاش ؟ هيا شن بتخليني نحضر بروحي
ندى : المرة الفاتت طردني بلا سبب وتبيني نولي نحضرله ؟ بري انتي
ليلى : امالا انا بنمشي نحضر باش ما يفوت علينا شي .. وانتي راجعي للامتحان حسيتك ما قريتيش كويس
ندى : هو هذا بنستغل الوقت .. تلقيني في المكتبة بعدين
.............
..........................
يدخل علي كمال للقاعة و يدخلوا في جرته الطلبة كلهم و يلاحظ ليلى لكن ندى مهناش
...........
..........................
وصال و ألاء يهدرزوا مع أمهم فاطمة
وصال :ماما عندك علم بقصة علي كمال ؟
فاطمة : ايه .. العيلة كلنا عندنا علم من زمان
ألاء : وخيركم ما قلتوش ؟
فاطمة : خالكم محلفنا ع المصحف ما نفتحوا الموضوع
وصال : وباهي عندك علم انهم قبل مفروض يخطبوني لعلي كمال مش لنديم !
فاطمة : توة اللي صار صار و الحمد لله نصيبك نديم خير من علي كمال
وصال : و خيره علي كمال شن ناقصه ؟
فاطمة : ما ناقصه شي .. الزوز ولاد خوي في النهاية حتى لو كانت ام علي كمال برانية
ألاء : شن برانية اللطف ؟
فاطمة : أمه سورية مش ليبية
ينصدموا ألاء و وصال شوية
وصال : سورية ولا تونسية في النهاية ولد خوك و خديجة مربياته من صغره
فاطمة : ما قلنا شي حتى احنا ... المهم مش موضوعك علي كمال .. موضوعك نديم نديم
وصال : وخيره نديم ؟
فاطمة : تكلمي فيه ولا ؟ هذا بيولي راجلك توا
وصال : مش ضروري نكلمه ماهوش كاتب عليا الكتاب حتى خطيبي لا
فاطمة (بعصبية) : وصاااال
وصال تقعد ساكتة و مش عاجبها الكلام
.......................
...............................
نديم مقعمز في الجنان شاد نقاله فاتح النت شوية ويجي علاء
علاء : شن الجو
نديم : اهو كساد وخلاص
علاء : عاد سبت اليوم مفيش شركة
نديم : ايه حتى الراحة باهية
علاء : سمعت ؟ خونا طلعت أمه سورية
نديم يعدل تقعميزته ويحط النقال على الطاولة ويشبح لعلاء
نديم : سورية ولا اللي هو في النهاية خونا ومن دمنا ما فرق شي
علاء : خيرك معصب انت ؟
نديم : ما خيرني شي
وياخذ تلفونه ويدخل للحوش و بعدها تجي نسرين
نسرين : خيره خوك هذا ؟
علاء : شي .. خليه خليه تو يندم
نسرين :علاش شن في ؟
علاء : ما في شي .. واتية ولا ؟
نسرين : ايه هيا
علاء : هيا
......................
.................................
وليد يمشي لجيرانهم الجدد
وليد : السلام عليكم
هيثم : وعليكم السلام (هيثم 28 سنة متخرج من الهندسة)
وليد : مرحبتين بجيراننا الجدد
هيثم : بارك الله فيك
وليد : أنا وليد جيرانكم هنا .. نورتوا الجهة
هيثم : منورة بأهلها
وليد : بالك تبوا مساعدة ولا حاجة احنا في الخدمة
هيثم : بارك الله فيك .. اليوم الحكم كملنا مازال تشطيبات الداخل وخلاص
وليد : باهي تسكنوا بالهنا ..
هيثم : سلمك
يقعدوا واقفين شوية وساكتين
وليد : امالا زي ما قلتلك تبوا حاجة كلمني .. نستأذنك
هيثم : بإذن الله .. تفضل خوذ راحتك
وليد يمشي
وليد : انت لازم تفيدني يا هيثم
.................
.............................
في القاعة وبعد ما تمت المحاضرة و الطلبة بدو يطلعوا
علي كمال : ليلى
تقرب منه ليلى
ليلى : نعم يا استاذ
علي كمال : صاحبتك ندى خيرها ما دخلتش ع حسب ما شفت الصبح انتم مع بعض !
ليلى : هو .. مش عارفة شن بنقولك
علي كمال : قوليلها تحاول معش تغيب ع المحاضرات .. نهاية سيمستر والحضور مهم
ليلى : حاضر
وياخذ شنطته ويمشي ويوصل لعند الباب ..
علي كمال : كانها قاعدة في الكلية قوليلها تجي لمكتبي
ليلى : حاضر تو نقوللها
.................
تمشي ليلى لندى في المكتبة
ليلى : اسمعي اسمعي
ندى : خيرك شن في ؟
ليلى : استاذ علي يبيك في المكتب متعه ؟
ندى : شنو ؟ علاش ؟ خيره شن يبي ؟
ليلى : مش عارفه سألني عليك قلي خيرها ما حضرتش و بعدين قلي قوليلها تجي المكتب .. بري شوفيه خيره
ندى : افففف .. انا عارفه كان مشيتله بنتعارك انا وياه
ليلى : ايه و اعتبري المادة قاعدتلك
ندى : باهي باهي
........................
ندى توصل لمكتب علي كمال و تطق ع الباب
علي كمال : تفضل
ندى : السلام عليكم
علي كمال : وعليكم السلام .. ادخلي
ندى : قالوا طلبتني .. ان شاء الله خير
علي كمال : ايه .. علاش ما حضرتيش اليوم ؟
ندى : عادي مش ضروري نحضر
علي كمال : كيف ؟
ندى : باهي نقدر نعرف علاش طردتني المحاضرة اللي فاتت ؟
علي كمال : عادي .. اكيدة انتي غالطة
ندى (بشوية عصبية) : لا ما غلطتش .. وبعدين انت تعامل كل طلبتك اللي ما يحضروش هكي وتنادي فيهم لـمكتبك وتستجوبهم ولا غير انا عندك معاي مشكلة ؟
علي كمال يتفاجأ بكلامها و يلوح القلم من يده ويتكى على كرسيه و يشبحلها
علي كمال : تقدري تتكلمي بأسلوب أحسن من هكي ؟ ولا خير من يصير كلام تاني
ندى : انا قلت اللي عندي و انا مش غالطة .. ونستأذنك عندي امتحان توا
علي كمال : تفضلي
كيف تتلفت و بتطلع
علي كمال : و اعتبري المادة قاعدتلك
تتلفتله وعيونه مدمعات تشد روحها وتطلع وتصكر الباب وراها وتمشي وهي تبكي والطلبة كلهم يشبحولها
يمسح علي كمال وجهه بإيديه الزوز بعصبية
ويقعد شوية ويطلع يروح
..........................
........................................
نديم يدخل على سلمى و امه في المطبخ و يقعمز ع الكرسي
نديم : يما شن الغذاء ؟
خديجة : بنديروا مكرونة وخلاص
نديم : ايح ديما مكرونة
خديجة : امس درنا كسكسي على خاطرك ولا نسيت
نديم : سلمى نوضي ديريلي سندوتش حسيت روحي جعت
سلمى : شن مازال ع الغذاء استنى وخلاص
نديم : غير نوضي هيا .. ديري حتى سندوتش تن
سلمى : اوف باهي
نديم : يما خيرها الشيشمة تقطر ؟
خديجة : نستنوا فيك تصلحها
سملى : ههههههه وحق الله قصفاتك
نديم : اسكتي يا فرخة انتي وهاتي السندوتش هيا
سلمى : باهي استنى
نديم : خيرك بطيئة انتي
خديجة : خود سندوتشك واطلع كوله بعيد عليا خلي ندير غداي على راحتي وانت اليوم شكلك مكسد هلبا
نديم : حتى انا بنمشي اصلا اقعدوا فيها .. جيبيلي سندوتشي للجنان
......................
...................................
ندى تبكي و تحاول ليلى تهديها
ليلى : غير اهدي توا
ندى : معش عرفت على شن نبكي اصلا .. امي اللي بتدخل ع العملية و انا عندي امتحان توا ولا ع المادة يلي بتقعدلي وانا مفروض السنة هادي نتخرج
ليلى : اهم شي توا تركزي ع الامتحان وبعدين كله تو نشوفوله حل .. هيا ندخلوا القاعة الامتحان بيبدا
ندى : اصبري نبي نكلم بوي نطمن على و ضعهم و على وضع أمي
....
...........
ندى : ألو بابا .. شن صار معاكم كيف حال أمي
بوها : الحمد لله .. كيف دخلوا يجهزوا فيها للعملية
ندى : خاااطري نكون غادي معااكم
بوها : ركزي على امتحانك وبس كلنا معاها ما تخافيش .. بعد ما تكملي الامتحان كلمتلك ولد عمك مروان تو يروح بيك
ندى : باهي تمام
...............
...................................
يروح علي كمال الحوش يلقى نديم ياكل في سندوتش التن
علي كمال : صحتين ( وياخد منه السندوتش وياكل) ياسرك
نديم : كوله اصلا مش جعان غير ناكل من الكساد
علي كمال : ههههه
نديم : خيرك شكلك تعبان !
علي كمال : ايه والله بندخل نرقد ساعة ولا ساعة ونص ما تنوضونيش ع الغذى
نديم : باهي نضم أمورك
..............
............................
....................
بعد ساعة ونص يستاقظ علي كمال من النوم
علي كمال : الساعة قداش توا ؟
يدور نقاله يمين و يسار ما يلقاشي
علي كمال : ت وين مشي !؟!
نديم في داره شاد نقاله و فاتح الفيس على ايميل وصال و يبي يبعثلها رسالة و متردد
نديم : زعما نبعثلها رسالة ؟ .. باهي شن بنقولها ؟ وكان ما ردتش عليا ؟
و فجأة يطق بابه .. يعدل من تقعميزته
نديم : منو ؟ ادخل
علي كمال : أنا .. ساعة كم توا ؟ و ما شفتش نقالي ؟
نديم : تقريبا 3:30 .. لا ما ريتاشي
علي كمال : باهي ترا اتصلي بيه
نديم : باهي
يتصل بيه لكن مافيش صوت في الحوش
نديم : بالك خليته في السيارة ؟
علي كمال : كنت ندور فيه غادي ما لقيتاشي .. شكلني نسيته في الكلية الزفت
نديم : متأكد ؟
علي كمال : ايه لان اخر مرة نتفكر في روحي استعملته في المكتب .. خلي نمشي قبل ما يصكروا
نديم : باهي برا فيسع
علي كمال ينظم اموره و يلبس تيشرت ازرق كحلي و بنطلون كاجوال متع جيوب و يمشي
...........
........................
تطلع ندى من الامتحان و اول شي اديره تتصل ببوها
ندى : نعم بوي .. شن صار في امي ؟
بوها : قاعدة في العملية و أهو نستنوا
ندى : ما قالولكم شي قاعدين ؟
بوها : لا مازال .. كملتي انتي ؟ شن جاوبتي ؟
ندى : ايه كملت .. باهي جاوبت الحمد لله
بوها : خلاص امالا كلمي مروان يجيك .. انا قاعد هنا على اي ظرف
ندى : تو نكلمه انت خليك في المستشفى .. يلا سلام !
تطلع ليلى من الامتحان
ليلى : ندى .. شن صار فيك ؟
ندى : باهي جاوبت لكن مش هلبا
ليلى : المهم فوق النص
ندى : ايه .. وانتي شن ؟
ليلى : باهي جاوبت .. شن صار في أمك ؟
ندى : كلمت بوي قالي قاعدة في العملية .. مشغولة عليها هلبا
ليلى : ان شاء الله خير ما تخافيش
ندى : ان شاء الله
ليلى : بوي يستنى فيا قدام الكلية .. هيا تعالي نوصلوك في طريقنا
ندى : لالا بوي مكلم مروان ولد عمي هو بيروح بيا
ليلى : متأكدة ؟ الكلية فاضية مهناش الا احنا و كم طالب تاني .. خيره عطل ؟
ندى : أكيد في الطريق .. ما ادوريش بري انتي
ليلى : باهي امالا تمام .. كان في حاجة كلميني .. و توا نكلمك بعدين انا .. يلا سلام
ندى : سلامات
................
يفوت وقت و الكلية فضت وندى تستنى قدام بوابة الكلية في ولد عمها اللي قاعد ماجاش و تتصل بيه ما يردش
ندى : اوووف .. وينه هذا ؟ ت خيره ما يردش
ويجيها بواب الكلية
البواب : شن يا بنتي .. خيرك ما روحتيش قاعدة ؟
ندى : نستنى في خوي عطل عليا .. اكيد شوي و يوصل
البواب : باهي كان تبي حاجة .. قوليلي
ندى : ان شاء الله .. بارك الله فيك
شوية و تشوف سيارة جاية و تدرس قدام البوابة و ينزل منها علي كمال
ينزل علي كمال من السيارة و يشبح ندى واقفة و هي تشبحله
ندى : استغفر الله العظيم .. هذا شن جيبه ناقصني أنا نشوف دراهات كبد
يسلم علي كمال على البواب و يدخل
تقعد ندى واقفة تستنى بلا فايدة و تتصل وولد عمها ما يردش بكل
ندى : والله ما عاد فيها كيف .. بنمشي على رجليا وخلاص
تمشي ندى مسافة بسيطة لعند قدام الكلية و فجأة توقف عليها سيارة ينفتح بابها الخلفي و يجبدوا ندى لداخل السيارة .. كانوا ثلاثة اشخاص
واحد يسوق و واحد مقعمز ع اليمين و الثالث اللي ركبها بالسيف
ندى بدت تعيط على طولها حسها لكن يصكرلها فمها بقطعة قماش ويغمى عليها ...
.................
...........................
.........................
تستاقظ ندى شوية شوية و تلقى روحها في مستودع كبير ومهجور و مربوطة على كرسي ويديها ورجليها مربوطات بحبل ومصكرين فمها بشريط لاصق
تسمعصوت خطوات شخص من وراها كل مرة تقوى لن يوقف قدامها
تقعد اتبع فيه بعيونها من رجليه لن تشوف لوجهه و المفاجأة و الصدمة لندى إن الشخصهذا هو علي كمال
........................
..................................
فلاش باك ." رجوع بالأحداث"
يوصل علي كمال للكلية و يدرس قدام البوابة
و ينزل من السيارة و يشبح ندى واقفة و هي تشبحله
علي كمال في خاطره : خيرها هادي قاعدة لتوا !
يسلم علي كمال على البواب و يدخل .. يوقف شوية قبل ما يدخل ويلاحظ التوتر على ندى و يقرر يسألها بالك تبي حاجة و بعدين يتردد و يفوتها ..ولن قريب يوصل للمبنى يتلفت يشبح وراه يلقى ندى طلعت وتمشي بروحها .. يتأكد انه صايرلها حاجة ويقرر يولي ويسألها
و يوصل للبوابة يلقى البواب مقعمز في داره
و يشبح يلقى ندى قاعدة تمشي و في لحظة تجي سيارة توقف عليها ويصير اللي يصير
على طول علي كمال و بدون وعي يركب سيارته و يبدا يلحق فيهم لكن بدون ما يلاحظوه وهو مش عارف شن يدير
علي كمال : ت شن في ؟ زعما خطف ولا حد تعرفه ؟ احسن شي نقعد نتبعهم لن نعرف شن قصتهم شن
يوصلوا لمكان بعيد على الزحمة في طريق تراب طويلة وعلي كمال وراهم من بعيد هلبا و بدا يشك في الوضع .. يدرس السيارة و ينزل على رجليه ويشوف فيهم ينزلوا في ندى من السيارة و يدخلاها فيقرر يتصل بالشرطة ولا أي حد لكن نقاله مش معاه
علي كمال : ال#**&& النقال مش معاي .. الحظ الأغبر
يطلعوا الثلاثة نفار يوقفوا قدام المستودع .. يستغل علي كمال انهم البرا و يلف من ورا المستودع لفة كبيرة بين الشجر .. يوصل للمستودع من الخلف يلقى روشن مفتوح يدخل منه
اول ما يدخل يشبح ندى على الكرسي .. و يمشيلها بالشوية لحد ما يوقف قدامها
...............
.......................................
يأشر علي كمال لندى و يحط صبعه على فمه بمعنى بلا صوت
و يثني ركابه و ينزل بيفك الحبل و هي تشوفله و لكن في لحظة يلقى مسدس موجه على راسه من الخلف و يرفع يديه على طول !
.......
ــــــــــــــــــــــــــــــــــــــــــ
في رأيكم شن بيصير في علي كمال و ندى ؟