على كيفكم شبيجن تكودتن كلجن سوى 😁😁😁
اريد البارت ينترس تعليقات بين الفقرات ☹ ومازعل بعد
بارت ال23
وصل للبيت ونزل وتوه يسد باب السيارة ماراح يدخلها وشاف هيثم طلعله..وماسمع غير صوت الطلق اجه عليهم...والسيارة صارت سده....
وشاف هيثم طاح عالأرض ودمه غرك دشداشته....نور صاح بصووت هييييثم....
وجان اكو رجال بالشارع وشاف الي رمه على الشيخ وشرد وركض وراه ولزمه....جان هيج مجرد صدفة طالع من بيته بته الزغيرة مطلعته....
ونور لزم هيثم ودمه غركه ويصيح فارس مشتاق...ويكله بويه لا تموت بعد ابوك لا تغمض عيونك...
واجو كلهم على صوت الرصاص اصلاً وشافو هيثم هيج انفجعو...
وطلعو زلم المنطقة وهيثم رصاصة برجله والثانية ببطنه والثالثة بجتفه بس بعيد عن كلبه.. وحتى نور صايبته وحدة بزنده..وراحو بي للمستشفى..والي ضرب هالرصاص لزمو الولد....
ونور مايعرف شيسوي وهو مصوب يريد يروح ويه ابنه ويكول ابني مات..والله لا امليهم رصاص واحد واحد اذا صارله شي...
ويردون ياخذونه يشوفون ايده لأن مصاب برصاصة بزنده..مايقبل وبألف ياعلي اخذوه....
وبيت العم بهاء...توها حطت راسها عالمخده...وهي وشهد يحجن بهمس...
شهد بهمس:نورسين شبيج ضحكاتج اختفت من اجينه لهنا لهسة
نورسين:مشتاقه لبابا..واعتبرت نور هو بابا وماما وهسة فارقته صار 3 ايام لا ابد كأنها 3 سنوات
شهد:هل كثر تحبينه وهو ماتقبلج ولا حتى يعاملج بالحسنى مرات..وسكتت..تعرفين يعني علاقتهم الزوجية
نورسين:يحبني وراح يتقبل شهد..بس غير يقتنع بببرائتي غير هيج ماسمح يلمسني اذا مايقتنع بعقله مو فعله
شهد:نور اخوي وحافظته عدل..لوما يحبج مستحيل يقبل بفكرة انو انتي هيج مثل مايظن ويقبل بيج يمه ومرته وبيته..هو فعلاً يحبج لا يعشكج بكل تفصيل
نورسين تغير الموضوع لأن راح تنزل دموعها عليه راح توه واخذ كلبها وياه...
نورسين:ولج شهد لاحظت سراب يباوع عليج صارلي يومين ملاحظة..شنو هو يحبج
شهد تفاجئت:هاااااا سراب؟؟..لا مايحبني اقصد ماعرف هو جان مزوج بس مشاكل ويه مرته واشتكت عليه وطلكها ويكولون تحاول ترجعله بس مايريدها..يعني يمته لحك يحبني بهل الأيام يمهم هههههه وهو شنو ماشايفني من قبل وين جنت عنه
نورسين:شبيج اخذتي الرجال حاصل فاصل..مو شرط شايفج..يمكن توه يالله لاحظج..بس مو تحطينه ببالج وتتأملين
شهد:لا وين اتأمل بشنو واخوه الي جنت اريده تزوج واخته تكول اخوي مايريد مطلكه يمي
نورسين:ولج غبية هاي معناها كايللهم عنج ورايدج بس شكلهم خواته ماقابلات..اشوف مرته تباوعلج بنص عين..ولا حبيتها كل شوي تسألني شتحطين لبشرتج وشنو هاي وشنو ذاك وليش مايجوكم شنو كلب عليهم ذبوكم وماسألو
شهد:ههههههه ولج احسها زعطوطة برغم عمرها 24
نورسين:ميهمني احد بهاي الدنيا كلها بس نور واخوي الباقيلي من عائلتي..ونور نبضات كلبي وبس اسمع صوته ولا اسمع اي صوت بعد من اسمعه احس العالم كله يختفي صوتهم وشخصهم وبس شخصه يبقه كدامي
شهد:اويلي على العشك..اتمنى اجربه مرة ثانية ولو ماسمي حب المراهقين عشك ههههه..بس اتمنى احب وانحب اريد احس بهالشعور
نورسين:واني اتمنى تجربينه بس الحب عذااااب وخصوص اذا ويه شخص مصنوع من العناد وعصبي ومتسلط...خلي اتصل اشوفه وصل مشغول بالي وكلت اخاف اتصل وهو بالطريق ويتشتت ويصيرله حادث...
وكامت طلعت وحجابها لفته وبيدها تلفونها...اتصلت ويرن وماكو رد...وفجأة سمعت سراب بالطارمة ودخل للديوان وصاح على ابوه وتسمع كال نور تصاوب هو وهيثم....
سمعت هيج نور تصووب وتفتر الكلمة براسها واستوعبتها نور راح للبيت وتصاووب يعني سووها وقتلوه وافترت الدنيا بيها وداخت وطاحت ليورى وتكومت عالأرض....
جانت امل مرت ابنهم الجبير طالعة وشافت نورسين متكومة هيج والولد طلعو اجاهم خبر تصاوب نور وكلمن خذه سلاحة وطلع والبنات نخبصن...
ومنا نورسين طاحت عليهم...وماينسمع غير دعوات الحجية وبجيها ومرت العم بهاء تهدي بيها وايناس تبجي بخبال وتكول اخذوني لبابا....
وخابرولهم كلولهم نور مابي شي الرصاصة بزنده بس هيثم بالعمليات وبين الحياة والموت ورصاصة بطنه خطره...
ببطنه من جهة اليسار يعني حياته على المحك..بأي لحظة يكولون فقدنه المريض...
ونورسين كعدت وتريد تطلع تروحله بالمستشفى وبالكوة كاضاتها البنات وكلولها مابي شي وهيثم الماكل الرصاصة الخطرة...
وماهمها وتريد تروح وامل لازمتها قوي...
أمل:لا تتهورين نورسين فوك ما مخبوصة هسة تنخبص عليج واطيح براسج نور هسة كلبه شاعل نار ونعرفه من يعصب مايشوف كدامه وترحين بهالوضع الدنيا يكلبها فوك راسج
نورسين:كلبه هو كلبي اذا صار شي لهيثم يعني كلبه يتأذه وكلبي وياه
شهد وجهها احمر من البجي على هيثم:ولج غبية صارلج شكد يمنه ماتعلمتي وين موليه بهالوضع يم الزلم شفتي مرة من عدنه خذوها ودوها لهناك..اكعدي مكانج حالج حالنه روحتج شراح تسويله وغير هسة بيا وضع هو ويرحب بيج..وعصبت..تعاي ياعمري ويحضنج ويشكيلج همه..انتي مو بألمانيا نور هسة بيا حال حتى يديرلج بال
نورسين دمعت عيونها:شهد ترا كلامج قاسي ماسويله شي بس اكون بجانبه بهالوضع
شهد:احسن حتى تتعلمين مو كلما صار شي وركضتي بين الزلم ورحتيله مايرضه وسكتلج مرة مرتين لا تعيديها تعاي رجعي
نورسين مسحت دموعها ورجعت وكعدت بالغرفة وهي حاضنة رجليها وتمسح دموع وينزلن غيرهن..وتذكرت يوم موت ابوها...
وكالت يعني هسة هيثم راح يموت..كلتلها أمل بيد الله اسم الله عليه ان شاء الله يكوم بالسلامة..ونورسين تذكر ابتسامته وتبجي عليه اكثر...
وبألمانيا..طبعاً زهراء ماتعرف ولا اي شي عن الي يصير هناك ونورسين ماتريد تخليها تقلق هي من غير شي متغربة وصعبة عليها الصار كله..وكل الي يصير يمهم ماتكلها...
بس هي تكل لنورسين كلشي وكل صغيرة وكبيرة...
فزت نص الليل حلمانة حلم مزعج وشافت ادريس نايم يمها..وفزعت وكامت من يمه وهو كعد على كعدتها...
ادريس:زهراء شبيج فزعتي هيجي
زهراء عصبت:لا تعيدها مرة ثانية وتجي يمي..وطلعت وركعت الباب حيل وكعدت بالهول..سمعت صوت صفارات الشرطة...
راحت باوعت من الشباك..رفعت البردة شوي..ورجعت سدتها..وشافت ادريس طلع وما سألته وين رايح...وراحت راسلت نورسين وكالت بلكي كاعدة...
وصار الصبح ونورسين ماجاوبتها على رسايلها...نايمة وتحلم بنور اجالها يبجي ويكلها هيثم مات..كامت مفزوعة من الحلم...
وخايفة..شافت شهد اجتها وهي كلتلها شنو هيثم مات...
شهد:لا ولج الحمدلله تجاوزها بس شايلين الطحال عنده لان متأذي واضطرو يشيلونه..ورصاتين وحدة بجتفه ورجله وان شاء الله يكون بخير...
نورسين تنفست:اوم ماي كاد..يالهي ونور شلونها اصابته..غفيت لحظات وحلمت بي واختنكت من الحلم
شهد:زين بيده الرصاصة وكالو ماعليه شي..بس هيثم خطية بعده بداية عمره وشالو الطحال ويكولون هسة صار عرضة للأمراض بسهولة يعني شوي صعوبات بس ماعليه شي بدونه ان شاء الله
نورسين:الحمدلله ان شاء الله يكونون بخير دوم..وهيثم اعتقد لازم ياخذ لقاحات هسة لأن شالو الطحال بسرعة يمرض ومضادات التهابات ياخذ
شهد:الحمدلله من الله سلمه..والله انكسر كلبي عيوني راحت عليه..وبجت..ياناس عمره 18 بعده ماشاف شي بحياته ورادو يموتوه الله ينتقم منهم
نورسين:هسة يخلونه نروح نشوفهم..اريد اشوف نور والله من البارحة واني مختنكه والهوى كزاز يدخل لرئتي
شهد:ماعرف..خابريله بلكي يرد عليج
نورسين:اي هسة..ودورت تلفونها لكته جوى المخده واتصلت على نور..واول ما اتصلت اجاها الرد...
نور:هلا بويه
نورسين دمعن عيونها:مو واعدتني ماعليك شي..وهاي انته وهيثم بالمستشفى وجان راح يموت هيثم..وانته لو جاية الرصاصة بكلبك..بعد ما اصدك وعودك..شلون ايدك
نور:بويه بخير انه مابيه شي..بس لو صاير لأبني شي جان جبيرهم وزغيرهم هجولتهم من هنا والعار الي صوب هيثم عندي بس خل اطلع واشوفه الا اشخله بالرصاص
نورسين:انته مو نور شخص ثاني جاي يحاجيني شنو هذا الكلام تريد تصير قاتل..انسه السالفة وعديها سلامات انته الكبير والعاقل..وطيبة كلبك تخجل اكبر مجرم
نور:يابه روحي واطمني انه مابيه شي وهيثم عدت عليه بسلامة..وماسوي شي بدون تفكير لتخافين اكو براسي عقل..ولا تكولين اجي ترا واصلة عندي خليج مكانج ماشي بويه
نورسين:ماشي بس ترد عليه من اتصل
نور:صار ديري بالج على نفسج..اي شي تحتاجينه خابري لنواف يجيج لو خالد
نورسين:اوك..متوجع حبيبي انته
نور:مو كد المي على ابني..يالله في امان الله....وسداه منها...
وشهد يمها تكلها شكو نورسين سكتت ومجاوبت وعبست..وخايفة ومرعوبة على نور..تعرف هاي مو هينة يتعرض لمحاولة قتل وعدهم بأعرافهم لا بدايته خير ولا نهايته...الا نور يكبر عقله ويسدها للسالفة من يمه......
شهد:شصار مو احاجيج
نورسين:ماكو شي خايفة نور يتهور..توه يحجي وياي ولا كأنه نور ابداً
شهد:الله يعديها على خير..جانو راح يكتلونه هو وهيثم شنو تتوقعين منه..بس نور عاقل مو مال سوايات متهورة لتخافين هسة هو يحلها صدكيني
نورسين:ماعرف خايفة عليه ماريد يصيبه شي..ياربي عمتي وين البارحة موتتلي كلبي بجيها ودعاءها
شهد:اخذوها تشوفهم
نورسين:ليش اني ماخذوني اشوفهم..حرام عليهم..اريد اشوفه يعني زوجي بالمستشفى ومايخلوني اشوفه..اروح احاجي عمي....وطلعت عافت شهد...
وبالجهة الثانية....
زهراء سمعت صوت الباب وهي تنظف..ضربات خفيفة..وراحت باوعت من فتحة الباب مشافت احد مافتحت بس سمعت الدكات مرة ثانية...
عبالها طفل وفتحته وهي معصبة وشافت ادريس كاعد بباب الشقة ومتكي عالحايط وشكله مو طبيعي..خافت بس ماجرأت تلمسه...بس شافته يضرب عالأرض وكأنه مو بوعيه...
هو اصلاً جان بره البيت من طلع نص الليل وهاي جيته..عرفت شبي ولزمت دموعها واجتها المفاجئات وتكول بعد وبعد شنو اكو عندك ادريس...
مدت ايديها وكومته وتريد تكومه ادخله..ماكدرت بنية جسمه اكبر منها بهواي..ونزلت دموعها على حظها...دفع ايديها وكام لوحده...
ويكلها بترنح وعصبي..كله من ابوج هو السبب..ابوج وابوج وابوج..زعلي على ابوج وحاسبي..ويحجي على نور وهي واكفة وعيونها تصب دموع وهي تشوفه بهالحالة....
وتريد ادخله مايقبل ومستمر يحجي على ابوها..ويصيح تعالو شوفو ابوها شنو سوه بيها..وطلع رجال وسطة عمر ألماني وحجه وياه ماتفهم شنو...وهي لبدت وره باب الشقة ماتعرفه حتى لو لابسة حجابها تخاف من الكل...
ودخل ادريس ويرطن كلمات ماتفهمها وكأنه الرجال معصب عليه..ويأشر عليها وهي ميته خوف وماتعرف شتسوي...
وطلع الرجال وادريس نام مكانه..وهي قفلت باب الشقة وكعدت وراه وظلت تنحب..وتكول بابا تعال اخذني من هذا المكان...............
نور كام من مكانه ولا يحب يكون مقيد..ومعلكه ايده بركبته..راح يشوف ابنه وراحله..وباس راسه وكله مابيك شي بويه..وابد ماعلمهم عالضعف وقت الشدة يكونون اقوياء...
وبعدها طلع من المستشفى العصر وهو الي اصر يطلع حتى يشوف هذا الي رمه عليه وعلى ابنه وخله ابنه نايم هالنومة...
ومن شافه حابسينه الولد بغرفة حتى يلزمه نور بيده...تفاجأ بالولد عمره مايتجاوز ال18 بعمر هيثم مبين...
نور:منو هذا مو من اخوان الشيخ محمد باقر...
كلوله هو هذا الي رمه عليك رجال خير لزمه وحبسانه هنا....
كلهم الشاب مالي علاقة ناس انطوني فلوس وكلولي سويها وانه حتى ماعرفهم بس انطوني مبلغ جبير...
نور كال يعني الجبناء ميجون يسونها بنفسهم ورطو هالولد بالسالفة..وصيح عليه نور وكله انته بعدك بداية عمرك ليش تصير مجرم...
وكلهم جيبولي سلاح اريده يتألم مثل ما هيثم يتألم هسة...بس ابد مو طبيعة نور هيج ودوم يحل الامور بدون قتل وظلم...وتنهد وتراجع ليورى....
وكلهم اريده يندم سوه هيج واريده يفهم ارواح الناس ما تنباع بالفلوس...وصدك كسرو تكسر الولد ونواف شوه وجهه وين ضرب هيثم بالطلق يضربه حيل ويكله لو ما ابوي كال مانموتك جان موتك على ايدي..وسلمو للحكومة بعد هاي كله...
ومايعرف ذولي الي انطوه الفلوس بس نور يعرف هذول اخوان محمد باقر الي سوه هيج..وماتنازل عن دمات ابنه الي طاحن عالأرض...
واجه محمد باقر لنور وكله وحلفله انه ماقابل بالي يسونه ولا اعرف بيا كاع جان احطهم بيدك وانته تأدبهم من جديد....
كله نور لا تبرر اعرف مالك علاقة بشي ولو ما معزة محمد باقر عنده جان سواها ظلمة عليهم....
ومرت يومين وهذا الي حاول يقتلهم صار يم الحكومة بعد نور كال لاندخل عائلته بالسالفة خل هو يتعاقب....
واجو اخوان الشيخ محمد باقر لبيتهم وبعدهم مطلوبين جانو جاين صدفة... للبيت ويطلعون بدون مايشوفهم محمد بس صدفة جاي ولزمهم..وسحب السلاح عليهم وصارت هوسة والنسوان يصرخن...
وحطه براسه وكلهم اكتل نفسي وارتاح من مصايبكم..شسويتو بيه وكصيتو وجهي الرجال ماتعمد يموت الولد وراح لربه وهاي قدره...
وكلهم الناس كامت تضحك عليه رجال شكبره وشكده وعلى راسه عكاله وميكدر يرد اخوانه...وكلهم اليوم ترحون للشيخ وتعتذرون وتبوسون راسه وعكاله ترا والله افرغ هذا براسكم واخلص منكم....
وبنفس اليوم محمد باقر اخذ اخوانه لنور واعتذرو منه يبوسون راسه وغصبن على خشمهم..نور ميحب يذل احد اصلاً مايريدهم يحبون راسه هالمجرمين...
ولخاطر الشيخ محمد باقر وعشرته وياه تجاوزهم بأخلاقه ولأن هو سبب موت ابنهم ومن غضبهم هيج سوه..بس ماتعمد كل هذا يصير وصار وابنه الي اكلها...
واعدوه مايعترضون طريقه...ولا يدنون على منطقتهم حتى...والشيخ محمد باقر كله علاج ابنك وحتى فصله كله عليه....
نور كله لا فصل ولا غيره انتهت السالفة بس خلها ابالك والله لو اعترضو احد من اهلي اقتلهم هل مرة بيدي ثنينهم اخوانك وبوقتها مايلزمني ولا شي....
وهسة انتهت هاي السالفة نور مايريد يصير عداوة بينهم..بس كال خلي ياخذون عقابهم عد القانون وماتنازل عن القضية...وخذوهم الحكومة....
وهيثم بعده بالمستشفى مايطلع بعده ونور راح بيت عمه اليوم ياخذ النسوان للبيت بعد انتهت السالفة...
بالحديقة تلعب ويه البنات والجهال وشهد وهاجر يباوعن عليها بس حجابها على راسها لأن ولد عمهم يجون بأي وقت...
وهي ظهرها للباب جاي تلعب وياهم محيبس يحبون يلعبون وياها هاي اللعبة.. لابسة محبسين حلقة ومحبس سويه هاي مالات عرسهم....
وماتنزعهن ابد عدها مستعزه بيهن لان مالت زواجها ماتنزعهن ابداً...يسمونهن توينزات يلبسن بأصبع واحد...
هي هيج معتقدها محبس زواجها ماتنزعه الا هو يخلعه من ايدها ويشمره ويعوفها...بس اكو محبس ثاني لابسته بأصبع ثاني نازعته وتحطه بيدها وتلعب ويه الجهال....
دخلو الولد وياهم نور..كالو سلام وسمعت صوته وياهم ميزته من بينهم كلهم وكامت والتفتت وطاح منها المحبس وركضت حضنته حيل بالرغم واكفين ولد عمها...
بس محد همها وهي صارلها جم يوم ماشايفته من راح هذيج الليلة وغدروه...شدت بأيديها على ركبته وهو يكلها ايدي بويه ايدي ويضحك....
وخرت عنه وهي تكول اسفة اسفة والله مشتاقتلك...وباوعت للولد مبتسمين..ونور تحمحم بمعنى يكول يبنية سكتي وضمي الشوق من نكون بحدنه واكفين الولد يمعودة....
وهي وخرت عنه وسلمت عالولد..وتكله انته اجيت المفروض نجيك احنه....
نواف:هاي لو شتوقي جان نام فوك مرته هنا وبنصنه...ماكمل اجته ضربه على ركبته من مشتاق نسته حياته....
وهاجر خجلت وشهد تكله طاح حظك شوكت تبطل من سوالفك التعبانة...وضحكو الولد وراحو للديوان ونورسين متحمسة شافت نور بس أيده المعلكه بركبته وجعت كلبها...
وشوي اجه نواف تحمحم ودخل وكلهم يالله جهزو نفسكم راح ناخذكم للبيت...
نواف باوع لشهد:عمتي الحلوة لكيتلج عريس..خوش عريس معدل
شهد:هههههه ما عاتبة عليك سخيف
نواف:ولج خوش زلمة معدل..وعنده كووومة فلوس وبس يومين وياج يموت وتورثينه
شهد:عابتلك جايبلي عريس ومفاولة بالموت
نواف:اي مو عمره شوي اكبر منج..شوي مو هواي..هو اكبر منج بس 50 سنة بس...ها شكلتي
شهد:عمه بعينك عمه يعني عمره 78 سنة ولك ليش شايفني عجوز عمري تو صار 28 سنة
نواف:اي راح ادخلين الثلاثين وانتي معنسة..كلت اكسب اجر اجمع راسين بالحلال وهم انتي محمضة على جبدنه
أمل:ههههههههه ولك نويف غير ابوك ماينطيها لأحد..ياهو اليجي ماينطي
نواف:والله غير ابوي يريدلها انسان زين والي اجوها كلهم مايستاهلون الحاته عمتي الحلوة..ويغمز الها...
شهد:خجلتني بعد عمري حبيب عمتك
نواف:شمالني مخبل اخليج تزوجين هو شيسوة بيتنه بدونج
شهد حضنته وعصرته حيل:شكد احبك يامخبل وشبيك انه شلون اعوفكم وازوج باقية على كلبك للأبد
نواف:هذا مجرد كلام بس لو شفتي هذاك الرجال بالغرفة تنسيني وتنسين الجابج ههههههههه
شهد وخرت عنه وكفخته:طايح الحظ توني اكول شكد احبك شكد مكروه..تفووو عليك
نواف ضحك وامل ميته ضحك يموتون على سوالف نواف وخالد وحتى مشتاق مرات يسون سراب مطنزة وهو يسوي نفسه معصب بس هو يحبهم ويتحمل شقاهم...
ورجعو البنات للبيت..ونواف الي يسوق وابوه كدام...شهد ونورسين وايناس وياهم...وهاجر ويه رجلها... امه وزينب وبناتهم ويه فارس...
نورسين وره مقعد نور وحاطه ايدها جوى حنجها وتباوع للجامه والي يعبرونه تباوعله وصافنه....
والاوضاع هاي كلها فزعت كلبها وعيشتها مثل مرة عاشت هيج برعب من ادريس حب البرازلية جانت حبيبة صديقة ديلان وتركته وحبت ادريس وهي ظلت تلاحكه وهو حباها وصار بينهم مشكلة...
وتذكر ديلان رفع مسدسه على ادريس وجان راح يقتله لو ما الشرطة لاحكته..وهو مسجون بسبب هالسالفة وصار جم سنة وهسة ماتعرف اذا طلع او لا وخايفة يرجع يتعرض لأدريس...
نور ايده اليسرى المصابة ومعلكه بركبته...لذلك طلع محبسها من جيبه بيده اليمنه وباوعله ورجعه بجيبه...هاي لكاه بيد ابن ابن عمه وعرفه محبسها...
هو نفسه جان بيدها بالحديقة وجانت تلاعب البنات بي وطاح منها ونسته اصلاً وهو الطفل ماخذه ودوم يكعد يم نور وشافه بيده يكلب بي....
وصلو للبيت ونزلو وبيومها نورسين مشافت نور ابد..لأن ناس يجوله وبعدها يروح للمستشفى لهيثم...وهمه البنات التهو بتنظيف البيت جم يوم مو موجودين والولد شكد نظيفين بس مو مال شغل بيت وينظفون...
ومرت ليالي نورسين ماتشوف نور ابداً.. ياخذوله ملابس وبالليل يبقه بالديوان...وكل يوم تصير اجتماعات بالديوان ومايعرفون شيصير هناك بس كووومة زلم...
وحسب الي سمعته من نواف الي يجون شيوخ وناس كبارية مو يجون يزورون نور بس يتناقشون بسالفة اخوان محمد باقر..وياهم الشيخ محمد باقر...
ونور كل يوم يروح المستشفى هم يغيرون ضماداته هم يكعد يم هيثم..وقررو يطلعونه لهيثم...بس باجر يسجلوله خروج...
صعد لغرفته صارله جم يوم مايجي ولا يشوفها حتى تراسله مايلحك كله يمه عالم وناس وبالليل يكون تعبان وينام...
فتح الباب ودخل..وجاي تسشور شعرها وشافته اجه التفتت اله..وعافت السشوار يشتغل وراحت حضنته حيل...
نورحضنها بيده اليمين:عندي حساب الج على شبكة هذاك اليوم كدام الولد
نورسين ضحكت وزادت بالحضن:لو مرة كول مشتاقلج بدل هالكلام المتسلط
نور:هههههه ايدي بويه هسة تظل تنزف
نورسين وخرت عنه:لاااااا بيه ولا بيك حبيبي..وباست جرحه بخفيف..توجعك
نور ابتسم:هسة راح المها..شنو جنج ماخذه راحتج بالغرفة بحدج
نورسين:هوووااااي هههههههه..اصلاً وحشة وغربة كل مكان بدونك..واقتربت كلش منه ورفعت طولها..بعد بيتي على كولتك..ماتصورت هل كثر اني منغرسة بحبك وماكدر افارقك ولا يوم نور ولا يوم اكدر بدونك
نور:وهاي اجيت وماروح مكان..وبعد ماتتهنين بالغرفة بحدج..وهسة اريد اسبح..اساعديني..بس انزع ملابسي والباقي اكدر عليه
نورسين:بعيوني اشيلك مو بس اساعدك..لا ماتسوي شي اني اساعدك..وشالت شعرها لمته وتريد تشده..مد ايده بجيبه وطلع المحبس كلما يسبح ويبدل يطلعه ويرجعه بجيبه...
نورسين ابتسمت:وين لكيته هذا ماذكر وين فقدته..وتذكرت..هااا اي بحديقة بيت عمو بهاء
نور:لكيته بيد فضل ابن عباس..تصدكين اشتريته منه انطيته 10 الاف كتله صار اليه..يكول عمو بعد ثانية وانطيته الثانية يالله انطاه الي السرسري عباله 250 دينار هالفلوس هههههههه
نورسين خربت ضحك:ايا الفصعون طماع..يعني حبيبي عرف محبسي وجابه الي واشتراه اليه..اووووي يفدوة بس هو مو بهالقيمة...ورفعت روحها وباسته بخده..اموووت بهواك والي يحفظ اشيائي اروحله فدوة
نور:فدوة الج اله قيمة لوما اله.. وهسة اكو مساعدة لو لا
نورسين:عيووني الك حبيبي...
ساعدته ينزع الدشداشة والفانيلة..وكلتله ادخل الحمام وهسة جاية دقيقة..وراحت لبست تراك شورت حتى ما تتلعوس ماي ملابسها...
ودخلت عليه الحمام يحاول يشيل الشاش الملفوف شوي..والتفت الها وشافها بهاللبس ويكول بكلبه..يلعن هبل هيج جايتني وانه رجال مصاوب وكلت كلمة ماكدر اتراجع عنها....
نورسين:عمري لا تشيله بعد ماتخلص الحمام اني اعقمه الك اوك...هز راسه بأي..ولازم تصب الماي هي صب عليه حتى مايلوح الجرح...شنو باقي بلا حمام هل الفترة كلها..وشمت ركبته..ريحتك تجنن
نور بهل الوضع مايحب حركاتها جاي تحرك بأعصابه...
نور:بربج اظل طول هالفترة بلا حمام
نورسين:اكول ريحتك حلوة..بس منو يساعدك
نور:نواف وخالد بس اذوني يشاقون ويضحكون وتعرفين شقاهم ماصخ ومثل الدم
نورسين ضحكت:الله عليك شيكولون
نور:يكلولي لازم مرتك تسبحك..كلتلهم صبرو اليوم اروح لمرتي تسبحني..السرسرية فهموني غلط
نورسين ماتت ضحك وتفرك بصدره:كلولك انته مصاب ودير بالك عالجرح مو هيجي
نور لزم ضحكته:لا اسوء..انسي يالله خلصيني باردة انتي.....
هي مو باردة بس اجت على قلب الشيخ وبهالوضع راح يتراجع عن كلمته..موزلمة اذا اقربلج حتى بوسة خد..ومنا صار ايام مشايفها ومشتاق لعطرها...
نورسين:ماريد اوجعك يعمري لذلك اغسلك بهدوء
نور:هيج راح تأذيني اكثر..كاعد على اعصابي موتيني ببرودج
نورسين:ههههههه اوك راح اسرع...وخلص حمام الشيخ وهو كلبه يدك بكل شوك الها..وحتى وهي تسولف وياه وهو مصفن بوجهها...
ومن خلصت نشفته وهي تحجي وياه بس ماسمع ولا شي صافن بشكلها وحركاتها..شمته وبوست خده..وكلتله فديت البيبي مالتي حمام الهنا نعيماً...
نور:طلعي بره
نورسين:ليش خلي اساعدك تلبس الملابس
نور:طلعي بويه انه ابدل..الداخليات
نورسين:اها اي اي طالعة..وتكول بهمس..احسن لا اخترع وانصدم...وضحكت...لو يسمعها...
..وطلعت..وبدل وطلع...وكلتله خلي اعقم الجرح هسة والفه..جايبة الادوات كاملة شاش ومعقم وكلشي...
وعقمت جرحه..ورادت تلبسه الفانيلة كلها تولي ماكدر انام بيها...ونام على جهة اليمين..ونورسين تشوفه متألم تألم كلبها عليه...
وكلها اريد تلفوني وجابته وخابر يسأل على هيثم...
خالد الليلة باقي يمه..وكله تمام وهاي هو يحاجيك وحجه وياه وكله بويه اصبر بس الليلة هناك باجر اجيبك هنا وترتاح من المستشفى...
وحتى نورسين حجت وياه..وخالد يكلها انتي ديري بالج على ابوي ولا يهمج هيثم بعيونه...وتضحك وتكله الشيخ عيوني الاشوف بيهن...وسدته منهم...
وشافت نور غمض عيونه من التعب البي..كامت طفت الضوى..وبقت تستمع لأنفاسه ومبينه مو منتظمة ويسحب النفس قوي وبقت شكثر تراقبه هيج وهو نايم....
وحطت ايدها بجبينة شافته شاعل نار..وراحت جابت كمادات وحطتله وبقت نص ساعة هيج تحطله كمادة ومايدري بنفسه...
وشافته مافاده الكمادة..ظلت تصحي ويفتح عيونه ويسدها...
نورسين:نور حبيبي كوم انته محموم
نور يفتح عيونه ويسدهن: مابيه شي بويه نامي
نورسين:عمري حرارتك كلش مرتفعة مو زين هيجي كوم..وكامت تلبس..راح اكعد الولد ياخذوك للطبيب
نور رفع ايده اليمنه:بس جيبيلي ماي لا تكعدين احد
نورسين:اخذت ادويتك..خاف بيك شي..انطته ماي وراحت كعدت نواف واجاه بسرعة...وكومه...
نور بالكوة يحجي:يابه والله مابيه شي شوي صخونة وتروح الصبح
نواف:يابه صارلك ليليتين هيج البارحة هم كلت مابيه شي..كوم اخذك للطوارئ
نورسين:البارحة هم هيج صاير بي وماخذيته للطبيب يالله نواف صدك تحجي...
وبالكوة ماخذه نواف يكول مابيه شي وهو شاعل نار...وجهه احمر من الحرارة ويحس جسمه مكسر...ونحول وتعب بي...
وشافه دكتور وشاف جرحه كله الجرح ملتهب جاي ياخذ ادويته...نواف كله بيدي انطي بأنتظام وتنظيف الجرح وتعقيمه اجيبه هنا...
كال شهل الأهمال مجاي يتعقم جرحه عدل...لازم اهتمام اكثر بجرحه...
نواف بمزح:دكتور هاي مو من الجرح بس الشيخ جنه احنه ندخله للحمام والبارحة مرته دخلته الحمام..ومرته شباااااااب شبااااب يادكتور واحسب حساااب..ويغمز للدكتور...
الدكتور ضحك:هنا الكلام العدل الشيخ ماخذ جرعة زايدة من الماي هههههه
نور ضحك بوجع راسه:دكتور اذا اكو عملية زراعة عقل اريد واحد من فضلك لأبني...
ونواف يضحك...
الدكتور:هههههه معافه ان شاء الله ماعليك شر...طبعاً الدكتور يعرفه لنور...وبقاه يمهم الليلة ونورسين هناك مانامت ابداً...وتفكر بي وتروح وتجي...
والفجر رد عليها وكلها مابيه شي ويشاقيها ويكلها هاي لأن سبحتيني الدكتور كال مرتك لا تدخل وياك الحمام تصخن وترتفع حرارتك بسببها وهي تضحك بدموعها عليه....
اكو وياه بالردهة حجي جبير وسامعه مايدري بي موجود...
الحجي وخر البردة:هو ياهو موتنه غير النسوان همه طيحونه وسوت بيه جلطة الحجية فخرية
نور ابتسم:اي والله حجي يرادلهم كلب من حديد
الحجي:حتى الحديد يصدأنه..شصايرلك بويه ليش انته هنا
نور تنهد:سالفة طويلة ياحجي بس ثنين مايخافون الله وبسببهم هنا انه وابني جان راح يموت بحضني
الحجي:ياهو هذول المايخافون الله شنو عدهم ثار..ترجعلهم يبوك ترجعلهم
نور:يابويه المشكلة انه سبب موت ابنهم بغير قصد طفل عمره 13 وطاحن بأبني ياريت بس بيه
الحجي:انته ياهو ابن من جني شايفك بويه..تشبه الشيخ علي نور
نور:اي بويه انه ابنه الشيخ نور علي
الحجي:ياهلا بويه تشرفت هلا بالشيخ اعرف ابوك علي خوش زلمة ابن سباع..شلون صحته..انه الحجي ابراهيم ال.....
نور:الشرف الي حجي..هو عالأطراف صحته تعبانة..خيرك بويه
الحجي ابراهيم:الضغط صعد يابوك كله من وره هالويلاد..دومهم رافعين الضغط
نور:سلامتك يابويه اي والله يابويه خلصو كلبي ولدي وبنيتي تغربت وخذت كلبي وياها وراحت...وسكت...
والحجي بقه يسولف وياه وشوي طلع وبقه بس هو بالردهة..وكعد يفكر بنورسين...
نور:خلصت عمري وراح شبابي وماخذيت من دنيتي غير اولادي وزهراء شتت كلبي..ومابقه من عمري كد الراح ومو كادر انسه سالفة بت الألمانية..اريد انساها واعيش وياها باقي العمر
وشال هل الأفكار من باله هسة مو وقته...وطلع الصبح من المستشفى ويه الدوام وطلعو وياه هيثم واخذوه للبيت والكل فرحو بطلعته...
و3 ايام ماخلصو الخطار واليجون لهيثم وحاطينه بالديوان...وبعدها رجعو يجون لنور على سالفة اخوان محمد باقر...
يردون نور يتنازل عن القضية بس هو مايريد يتنازل وجان راح يموتون هو وابنه...طبعاً هسة عليهم بس قضية تهديد الشيخ...
وهذول مصطفى ومازن اخوان محمد باقر عليهم قضية تهديد الشيخ نور ...وبس يردون نور يتنازل حتى يطلعون بس يمه باقية...وهو ماقابل...
ومرت الأيام وصار شهرين على حادثة موت ابن اخو الشيخ محمد باقر...وهيثم صار احسن بس بعده شوي تعبان ويعتنون بي هواي...
ونور تحسن الحمدلله ويكدر يحرك ايده..ولحد هسة يكلوله اتنازل عن القضية وخلي تخلص السالفة واذا حاولو او تعرضو الك نطرهم طر...
وام محمد باقر اجت لنور تريده يتنازل عن القضية ويطلع ولدها وحلفته بغلات امه..وهو لخاطر محمد باقر وامه تنازل مو علمودهم...
وكلها حجية على راسي انتي وابنج بس ولدج حاولو يقتلوني انه وابني وابنكم الله يعلم ماتعمدت يصير هيج وانه جنت راح روحي وياه....
والشيخ محمد باقر زعل على امه ومايحاجيها شلون راحت لنور وتنازل عن القضية جان يريدهم ياخذون درس ويتأدبون عن تصرفاتهم الطايشة ويتحملون ثمن غلطهم...خزوه كدام العالم....
ونور ونورسين على حالهم ماتغير شي بس نور صار يفكر كبر والعمر يجري وماشي مو يرجع..ومقتنع بأنو نورسين لحد هسة مشاف عليها شي ابداً....
وهذا العشك الي بكلبه ماتغير لا يزيد ماينقص..وهي كذلك رغم كلشي رغم كل كلامه الجارح قبل وتحبه بجنون ورغم انو هو مرايدها زوجة بالجسد بس تحبه ما هامها شي ابداً....
قبل فترة مر عيد ميلادها وصار عمرها 26 سنة...وهي ويه زهراء اول بأول بس ماتكلها شي عن الصاير هنا وماتريد تكلها ومحذرتهم كلهم مايحجولها كلهم...
وهي تحجي ويه الكل كل فترة وحجت مرة ويه ابوها ونورسين لاحظته بعد ماحجه وياها طلع للديوان كعد بحده تعرفه كلما يجي طاري زهراء يسكت ويصفن وتحس بكلبه يحزن....
وهي مرة حجه وياها وبعد ماحاجاها...وهاجر ومشتاق حلوين سويه وهي تحبه صارت بجنون وهو كذلك وحتى الكل يلاحظهم ثنائي مرح والشقه والضحك...بس ماصار عدهم طفل ليهسة ومشتاق يكول مانريد هسة....
وفارس وزنوبه العشاق الهادئين عشاق السنين الما اختفه حبهم وسبحانه من زرع هالحب ونغرس وبعد ماراح رغم البعد...وفرحانين ومنتظرين الزغيرون...
حاطة بذانها هيتفون اغنية عراقية..وظلت تركص على الأغنية..وخذاها موج الموسيقى وتركص اجنبي مو شرقي...
والتفتت بركصتها وهي بهتفونها شافته واكف ومتكتف ويضحك..وهي وكفت ونزعت الهيتفون...
نورسين:شنو اليضحك..وعقدت حواجبها...
نور يضحك:عبالي طاب للملهى مو غرفتي
نورسين ابتسمت على ضحكته:عاد حلو اركص لو بس اهز ههههه
نور سد الباب:لا ماشاء الله مبدعة مرت الشيخ
نورسين بثقة:اي شتظن لعد..غير اعرف شرقي واجنبي
نور:اي استمري بس غير بهالغرفة ماكو هيج حركات..ونزع شماغه وعكاله ويريد يدخل الحمام يغسل ويطلع...
نورسين: نور سؤال...ماتحرك داخلك شي شنو انته ليش بهالقوة..احسك بقوة الحجر
نور التفت الها:انه حجر
نورسين:اي حجر انته...واعصابك وياي بااااارده
نور:منو الحجر هذا ومنو هذا البارد ولج شو ماتعرفين تحجين..واتجه الها..بارد هااا..شتردين توصلين..اعرف شتردين توصليله...وبدون مقدمات لزم وجهها وباسها بشفتها قوي وهو يبوسها خلاها اطيح عالسرير...
وهي وخرته..وكلتله هاي الفهمته من كلامي طاح حظي اي والله ولا مرة فهمتني...
نور يكول بداخله:فهمتج ياعيوني بس هاي عقاب للي تسوينه بيه...ودار وجهه وعافها ودخل الحمام وظل يغسل وجهه قوي ويكول ليش ماكدر التزم بكلمة وياها وهاي ثاني مرة اتراجع عن كلامي وابوسها....
طلع ومالكاها بالغرفة..وتنهد وكعد عالسرير وحط ايديه على راسه..ويكول هي تعرف اعشكها بس ليش مو راضي لساني يعترف بهالشي...
وبالجانب الثاني زهراء وادريس...
زهراء مو مثل اول ما اجتي لألمانيا صح ماتقبل تطلع بس تغيرت اشياء هواي وصارت تكعد يم ادريس وتسولف بس مو مثل مايريد هو...
واكيد الزمن كفيل يشيل كل الجروح..بس جرح البنية بأعز ماتملك وبسبب حبيبها مستحيل ينسي..بس شتسوي جاي تحاول تتقبل حياتها وياه لأنه مصيرها...
متنام بصفه بس عالأقل تغيرت هواي اشياء بينهم..وهي كل يوم تموت شوق على اهلها وابوها واخوانها ومرات تكعد تبجي وادريس يحزن مايعرف شيسوي ويحاول يطلعها ماتقبل....
كللها بس اخلص هالسنة نرجع لهناك وهي فرحت وتحمست وصارت نشيطة كل يوم وكل شي تسوي بس ماتقبل تطلع من البيت....
ادريس طلع من الغرفة ويريد يطلع:زهراء ما مليتي من الكعدة بالشقه..كومي بدلي خلي اطلعج شوي من جيتي ليهسة مرتين بس طلعتي
زهراء:والله مالي خلك..انته اطلع وباجر اطلع وياك
ادريس:جانت نورسين ادوخني اذا يوم ما نطلع اني وياها ونتمشه مرات..بس نمشي شوي اني وياج
زهراء:لا غير مرة مابيه حيل ومالي خلك وبرد
ادريس:ماشي..تحتاجين شي راح امر للسوبر ماركت..هزت راسها بلا...
ادريس طبعاً اجاها مرتين شارب وسكران بس عاتبته وكلتله هو هيج راح تعوضني تجي سكران وتغثني بكلامك وتكول ابوج السبب....
وهو بقه ايام مايحاجيها ماله عين يحطها بعينها..بس ابد ماراح شرب ابداً وجاي يحاول بكل الطرق يرجع يكسب ثقتها ويحصل على كلبها من جديد....
بس زهراء تغيرت ماعادت مثل قبل..حبت وخذلها هالحب وتغيرت كلش وماعادت زهراء الهادئة والحبابة صارت عصبية وعلى كلشي تصرخ وتعصب عليه....
طلع وراح..وره لحظات اندك الجرس وعبالها ادريس رجع وناسي تلفونه..ولبست حجابها متعودة من تفتح الباب تلبس الحجاب حتى محد يشوفها وهو عابر...
فتحته..وصار بوجهها شخص غريب وحاط ايدينه على صفحتين من الباب وعلى وجهه الأستغراب من شافها...
خافت وسدته بوجهه بس هو لزم الباب ودفعه..وتراجعت بخوف وهي صارت خوافة بشكل ماينوصف من حادثتها ويه ادريس...
ديلان يحجي ألماني:من انتِ..اين السافل ادريس الجبان الحقير
زهراء بخوف:منو انته
ديلان ابتسم بخبث وحجه انكليزي:حسناً انتِ عربية..لا تفهمين ما اقول..هل انتِ فتاتهُ الجديدة..تبدين جميلة صغيرتي..اممم لقد شاركني فتاتي من قبل لن يضر ان تشاركت معهُ فتاتهُ..ماذا تقولين انتِ ياعصفورة..وابتسم بخبث..اين هو
زهراء ماتت رعب وماتفهم شيكول الا قليل جم كلمة ومن أبتسامته فهمت نيته سوء ومبين شخص مو زين بوجهه طبرتين....
وركضت للغرفة وسدت الباب وقفلته وهو يحاول يكسره وماتت رعب وظلت تبجي..وخذت التلفون تتصل بالشرطة لو ادريس...
اتصلت بالشرطة..وادريس محفظها العنوان مال البناية والشقة عدل حتى من يصير شي تكلهم...وبس ردو كلتلهم بالألمانية هجوم النجدة وكلتلهم العنوان بس ماتعرف شي بعد....
وتريد تتصل بأدريس هذا كسر الباب ودخل عليها وظلت تبجي وترجف من الخوف..بس استنجدت بأبوها....ونست كل هل العالم والوحيد اليحميها جان ابوها...
سحبها من ايدها وحست روحها طلعت من جسمها وشعور صعب وراح تنعاد عليها هذيج اللحظة الي انهانت جسدياً ومعنوياً وانظلمت بأبشع جريمة وهي الأغتصاب...صرخت وكتم صوتها وتذكرت من كتم صوتها ادريس...وانعاد عليها كلشي...............يتبع
توقعكم 🥺
بس عندي سؤال للمتابعات 😂اذا تنحط كرامة نور بين ايديكم شسولها؟؟؟؟😁😁😁😁😂😂😂😂😂
وهاااا نسيت اكلكم شغلة الشيخ برج الجوزاء 😉
ونورسين برج الميزان 😍😍😍
بس الحب صدك 😂👌
كتبولي اعماركم يالمتابعات على هاي الفقرة خل اعرف لان اكو احداث جاية😁😁😁😁😁😁 ماتناسب المزعطة اريد اعرف عمركم بدون كذب 😉
الكاتبة التميمية...... altmeme313