الشيخ نور التميمي

البارت ال13

مساؤؤؤؤ للزاعلنين 🙈🙈

بارت ال13

احبج وخلي بعالي صوتي حيل اصيح...

اريد اكول احبج ترا ولا يوم بنومي مستريح...

هذا الغرور والتكبر بس كدامج وبداخلي والله يمج اطيح....

الكاتبة التميمية...... altmeme313

بدلت زهراء ونزلت وراحت صبحت عالكل..وكلها ابوها يالله...واخذها للمستشفى العام لأن العصر دوم مشغول ميلحك ياخذها للعيادات وهو كله نفس شي بكل الاحوال خاص والعام كله ازدحامات...وحتى ادوية كله يكتبها من بره...

دخلو للدكتور كله نور عن حالة بته وانقطاع شهيتها وهي خايفة حتى ريكها نشف واكفة والتوتر والرعب ماخذها..وسألها اكثر من سؤال الدكتور وهي تجاوب وكأنه حبل المشنقة معلك بركبتها...

طلب اكثر من تحليل الدكتور..وكلهم يسونها الها وسوهن واخذوهن للدكتور دخلو والدكتور بعده ماقرا ورقة التحاليل اشو هاي انخرطت وطاحت ونور انفجع بيها....

الدكتور كام وتفقد نبضها..كله مابيها شي ضغطها نزل..هاي من قلة الأكل..ورفعها نور اكو سرير يم الدكتور حطاها عليه...

نقلوها للطوارئ وحطولها مغذي..الدكتور قرا التحاليل لأبوها كله بنتك عدها فقر دم...وراح تكون بخير وكتبلها علاجات...

وكله تكدر تاخذها هسة..اطمئن كلبه عليها واخذها ورجع للبيت وهي كل شوي تباوع لأبوها يوصي بيها الي فتهمته هي مابيها شي ومو حامل....

جانت مرعوبة بس نفسه شعورها ماتغير وهي تشوف ابوها خايف عليها ومهتم لصحتها ودها تبجي هسة بحضنه وهو الي دوم يحميها وهو الامان الوحيد...

هسة تخاف حتى تباوع بعيونه خجلانة منه وخايفة منه ماكدرت تحافظ على براءتها الي المفروض زوجها هو ياخذها...لازمة دموعها ماتبجي....

ورجعت للبيت وماحجت ولا حرف وابوها راحو هو وابوه وفارس ومشتاق للفاتحة والولد رايحين للصيد ورجعو العصر همه وجماعتهم رايحين...

وعبر اسبوعين نور مشاف نورسين..كله بالغرفة من يجي ومن يطلع يالله تطلع وهو فقدها اسبوعين ماشافها ولا حتى يراددها ويحاسبها لو رادت تطلع لو على لبسها...

ولا حتى كعدت على وجبه كلش فقدها ويكول هاي لو سافرت شيصير بكلبي..مو انته ماتريدها وتكول رخيصة شلون هل كثر كلبك ينبض الها...

وزهراء تزيد نحافة ماتتحسن حالتها...والكل مستغربين شبيها هيج صارت..ولا تدرس كلش وعلاماتها بداية الشهر كله نازلة كلش..

وفارس و بدور مشاكل تزيد ماتنقص بينهم...

نورسين كلش مشتاقة تشوفه ويشوفها مثل ماتحب عيونه يشوفنها بس تكابر وتكول خلي يتعاقب اني رخيصة خل اشوف هسة شلون يشتاق لهل الرخيصة...