الجني اليهودي العاشق

البارت التاسع والعشرون

البارت التاسع والعشرون

الجني اليهودي العاشق

بارت مفاجئ لمتابعيني اللي أحبهم ❤

الطلب اللي طلبه الشيخ من رباب كان غريب جداً..

الشيخ ابو حكم : رباب انتي تردين تتزوجين لولا؟؟
رباب : بصراحة؟؟
الشيخ ابو حكم : اكيد ماكو احلى من الصراحة.. والصراحة راحة..
رباب : لا.. لا ما اريد اتزوج..
الشيخ ابو حكم : وهو المطلوب.. أني ما اريدج تتزوجين..
رباب : انت..؟!! زين ليش ما فهمت؟؟!
الشيخ ابو حكم : انتي مو متريدين تتزوجين ليش دتسألين عن السبب..؟

رباب : من حقي اعرف.. وهالشي اعتقد يخصني ميخص غيري..

الشيخ ابو حكم : أني ما دكول إلج لتتزوجين ابد.. بس اريدج هالفترة متتزوجين.. يعني بحدود بعد اربع خمس سنوات يله اريدج تفكرين بموضوع الزواج..

رباب : ليش..؟؟!

الشيخ ابو حكم : انتي بمثابة كنز.. كنز ولكيته وما اريد افرط بيج..
رباب : شلون يعني ترى كل شي ما دفهم من كلامك..

الشيخ ابو حكم : رباب اللي مثلج.. يعني اقصد مثل حالتج شي نادر.. انتي صرتي تكشفين.. وتكدرين تتكاشفين وية الجن وتحجين وياه وتشوفي وهالشي قلة نادرة يصير وية الناس.. وأني اريدج تحجيلي كل شي.. ما عدا اريدج تتعاملين وياية.. يعني نشتغل سوى

رباب : ما فهمت؟؟؟ شنو نشتغل سوى؟؟ وشنو دخل موضوع الزواج بهذا الشي؟؟

الشيخ ابو حكم : هو بتأجيل الزواج راح يكون اكو تعامل مشترك بيني وبينج..

رباب : فهمني أكثر..

الشيخ ابو حكم : اكو شي راح اكوله إلج لازم تسوي.. حتى بعدها نبدي نشتغل.. يصير التعاون المشترك..
رباب : شنو هالشي؟؟

الشيخ ابو حكم : الشي اللي اريد أطلبه منج الشرط الوحيد اللي بي.. هو لازم متتزوجين(شرط العمل لازم البنت او الولد اللي راح يشتغل هالشي يكون مو مرتبط مو متزوج)..

رباب : ترى كل شي ما دفتهم..

الشيخ ابو حكم : هسة شرحتلج أول شي لازم ماكو زواج هالفترة.. والعمل المشترك ميتم إلا إذا سويتي اللي راح أطلبه منج.. وإن شاء الله ما راح ترفضين..

رباب : كول شنو شو بديت أخاف.. 😥

الشيخ ابو حكم : اريدج تظلين فترة شهر كامل وحدج بالغرفة واريد الغرفة تكون فارغة ومصبوغة بلون ابيض(لون الطلاء(الصبغ) ابيض).. وياريت لو حمام قريب عليها.. واريدج متحجين وية اي بشر ابد.. والاكل يوصل ليمج بدون ليحجون وياج او يشوفوج.. وتظلين ليل ونهار كاعدة حاولي اكثر وقت تكدرين ظلي كاعدة.. وخاصة بالليل وراح انطيج تسبيحات وجمل وعبارات تظلين تردديهن ليل ونهار.. بعد ميمر الشهر وتكملين كل هذا الشي.. يعني تكملين كل الطلبات راح تصير عندج مكاشفة كاملة وية الجن كلهم.. وراح تتمكنين تاخذين إستخارة بمجرد النظر لعيون الشخص.. هاي ما عدا راح تصير عندج معلومات عن كل شخص وتكشفين للمستقبل..  وتكونين حاكمة جان.. اللي مثلج عملة نادرة رباب من لكيتج مااكدر اعوفج بعد اعتبرتج كنز والله.. رباب وافقي ومتخسرين.. وافقي.. وراح تصيرين مشهورة بهذا المجال.. وراح تصيرين غنية.. الفلوس راح تصير عليج مثل المطر.. حتى كلية ماكو داعي تكملين بعد.. لإن الثروة اللي راح تصير عندج شهرياً راح تكون أضعاف أضعاف الراتب اللي ممكن راح تستلمي مستقبلاً..

رباب : بس..
الشيخ ابو حكم : حالياً لتنطيني أي جواب.. فكري بالموضوع على راحتج وبعدين رجعيلي خبر.. ورقمي صار يم ابوج.. انتظر إتصالج وما اريد تحجين لأهلج كل هاي التفاصيل.. وذا وافقتي أني راح اطلب منهم يخلقون إلج أجواء الغرفة ويتركوج بالغرفة شهر كامل.. وراح اكول إلهم هذا من ضمن العلاج..

بهالأثناء..
الشيخ ابو حكم كام فتح الباب وصاح على ابو رباب..

الشيخ ابو حكم : تعال ابو رباب تفضل.. شو طولت بره
ابو رباب : من طلبت مني اطلع كلت خاف ميصير أظل متواجد بالمكان وهالشي خاف يأثر على رباب..

الشيخ ابو حكم رجع يقرأ على رباب..
بهالأثناء الشيخ ابو حكم ظل يباوع على وجه رباب ويكول اللهم صل على محمد وال محمد.. اللهم صل على محمد وال محمد
الشيخ ابو حكم : ابو رباب باوعلي على وجه رباب شلون صار..
ابو رباب : ما شاء الله 😍
الشيخ ابو حكم : شفت وجهها شلون صار يخبل.. صار وجهها نوراني.. حتى لون بشرتها تغير

كمل الشيخ ابو حكم قراءة على رباب..

ابو رباب ورباب طلعوا وصلوا يم الباب..

الشيخ ابو حكم : رباب.. تعالي

رباب رجعت راحت يم الشيخ وكفت..
رباب : ها شيخ
الشيخ ابو حكم : اذا الولد إجه تقدملج هالفترة انطيني خبر..
رباب : يا ولد؟
الشيخ ابو حكم : راح يجي يتقدملج شخص هالفترة.. وراح تصير.. بس..
رباب : بس شنو؟؟
الشيخ ابو حكم : لا ماكو شي.. بس اريدج بيوم اللي يجي يخطبج تخابريني وتنطيني إسمه.. عسى ولعل ميصير شي
رباب : ليش شكو؟ شنو اللي راح يصير..؟

الشيخ ابو حكم : ماكو شي بابا انسي الموضوع.. بس لتنسين تخابريني بيومها لتنسين..  ضروري...
وهسة روحي ابوج دينتظر.. ومثل ما كتلج لتكلين على كل التفاصيل لأهلج.. فكري بالموضوع وبعدين رديلي الخبر..

طلعت رباب..
صعدوا هي وأبوها بالسيارة..

الشيخ ابو حكم طلع من التكية صاح على ابو رباب (أشرله)..
ابو رباب نزل من السيارة راح على الشيخ..
ظلوا واكفين وحدهم دقائق يحجون..
كملوا حديثهم..
الشيخ رجع للتكية..

وابو رباب راح صعد بالسيارة
ابو رباب : شبيج؟ رباب شبيج..؟
رباب مو وياه اصلاً.. رباب بغير عالم

ابو رباب : رباب.. رباب
رباب : هاا.. ها بابا
ابو رباب : شبيج بنتي..؟
رباب : ما بية شي.. بس راسي يوجعني

ظلوا ساكتين..

رباب ظلت تفكر وتحجي بداخلها (اني.. اني لازم احجي لبابا اللي طلبه مني الشيخ هالمرة ما لازم اسكت.. ما لازم ابقى غبية اكثر من هيج.. ما لازم أدمر روحي بإيدي.. هالشي اللي طلبه ممكن يخلي حالتي تسوء اكثر من هسة.. ممكن اصير مجنونة رسمي..مجنونة علني.. لا.. لا ما لازم اكتم هالشي..ضميت مرة على أهلي وتندمت ماريد اندم مرة ثانية.. لو حاجيه لأهلي من البداية عن عمو رائد وحاجيتلهم عن قراءتي عن الجن والشياطين ما جان وصلت لهالحالة..)

رباب : بابا..
ابو رباب : ها بنتي كولي..
رباب : بابا الشيخ ابو حكم طلب مني شي غريب..
ابو رباب : شنو هو هالشي؟؟
رباب : طلب مني ما اتزوج..
ابو رباب : شنوو شدتحجين..؟
ابو رباب بهالأثناء وكف السيارة بنص الشارع..

ابو رباب : احجي ليش طلب منج هالطلب؟؟ سوالج شي؟؟ بيج شي بنتي جاوبيني؟؟

رباب : بابا شبيك شيسويلي شدتحجي..
ابو رباب : بنتي اقصد من طلب مني اطلع بره.. من طلعت خوما حاول يسويلج شي؟؟ خوما اتقربلج؟

رباب : استغفر الله بابا شدتحجي..
ابو رباب : لعد ليش طلب منج هذا الطلب..؟؟! ليش طلب منج متتزوجين..؟
رباب : حتى اشتغل وياه..
ابو رباب : شنو..؟ تشتغلين وياه؟؟
رباب : اي بابا.. طلب مني أظل فترة شهر كامل وحدي بغرفة فارغة ليل وية نهار وما احجي وية احد ولا اشوف احد وابقى اسبح تسبيحات هو يكتبلياهن وبعدها راح اكدر اتعامل وية الجن بسهولة.. واكدر اتكاشف وية اي جن.. واخذ إستخارة بمجرد النظر لعيون الشخص.. ووعدني.. وعدني اصير غنية هواية يصير عندي فلوس حتى كلي تركي الكلية لإن الفلوس اللي راح تحصليها من هذا المجال هواية وأضعاف اضعاف الراتب اللي ممكن تستلمي..
ابو رباب تخبل من سمع هالكلام..
شغل السيارة وطلع..
ابو رباب : استغفر الله العظيم.. استغفر الله ياربي.. شنو موضوع العالم وية بنتي راح يخبلوها حسبي الله ونعم الوكيل.. اني من البداية ما ارتاحيتله من كال يراد هواي فلوس حتى اعالجها.. وانتي بوقتها كلتيلي مادي.. بس سكتت لإن اريدج اطيبين اريد اسوي المستحيل حتى تطيبين مستعد ابيع اللي ورايه واللي كدامي بس اشوفج سليمة وطبيعية وما بيج شي..

رباب : زين بابا هو ليش صاحلك من طلعنا..؟

ابو رباب : طلب مني مبلغ.. مبلغ خيالي.. هواي راد مني فلوس.. بالجلسة اللي تجي طلب مني اجيبهن وياية يله يشتغلج.. وأني وافقت.. كلت لو حتى اداين فلوس هم ادبرله المبلغ وانطي لخاطرج.. بس طلع إنسان ميستحي حرامات بي كل فلس نطيته إله.. بس الحمد لله ربج كشفه.. بين حقيقته.. وما خلاج تصيرين ضحية إله.. كافي صرتي مرة ضحية لرائد النذل بعد ما اسمح لأحد يتقرب عليج..

رجعوا ابو رباب ورباب للبيت..
ابو رباب قرر يرجع يتصل بالسيد ابو حسين لإن ما ارتاح لبشر بكد ما ارتاحله.. إنسان يعرف الله والماديات آخر همه..

اتصل بي..
وصل السيد ابو حسين لبيت رباب..
ورجع كالعادة يقرأ عليها..
جلساته بدت اتطول وياها وهالشي ديخلي يقلق على رباب.. ديحس حالتها مو مثل غيرها؟؟ شنو السر..؟ ليش هالبنية مدتطيب؟؟!!!

رباب رجعت نامت هو ويقرأ عليها..
وما صحت لما طلع..
بعد ما صحت رباب متغيرة تغيير مو طبيعي..
كعدت من النوم اتدور على السيد.. بس..
بس بنفس الوقت تغلط عليه..
وأي شخص يحجي وياها من اهلها تغلط وتتجاوز عليه..

رباب بدأ شي غريب يصير وياها..
كاعدة وحدها..
ابوها إجه كعد يمها..
رباب : بابا
ابو رباب : ها حبيبتي
رباب : بابا راح احجيلك شي..
ابو رباب : احجي
رباب بدت تحجي لأبوها على شخص شخص بمنطقتها .. كامت تكشف لشخص شخص وتحجي عن مستقبلهم وشنو راح يصير وياهم.. وحتى حجتله عن بعض الأشخاص من أقاربها وعن مستقبلهم

وفجأة..
باوعت على إيد أبوها.. 😳😳  👀
رباب : بابا.. بابا إنزع هذا المحبس اللي لابسه..

ابو رباب : ليش..؟
رباب : بابا هذا المحبس يجلبلك الفقر.. بس..بس هذا المحبس الثاني كولش زين إلك.. هذا الحجر مالته ممتاز.. بس تعرف انت اكثر حجر يوالمك ويوالم شخصيتك هو العقيق حاول تشتري هيج حجر.. وراح انطيك لون معين تشتري..

دخلوا اهل رباب كلهم..
رباب بدت تستخير لواحد واحد من أهلها وتنطيهم تفاصيل عن مستقبلهم..

بهالأثناء..
جتي أختها المتزوجة أرباب وزوجها..

رباب ما كامت سلمت..
ظلت بس تباوع..
هاي شبيها رباب..؟؟
وين عيونها..؟؟ نظرها متسلط على شنو..؟؟

رباب عيونها على إيد زوج اختها..
دتباوع على إيده وفاتحة عيونها
الكل انتبهوا عليها..

زوج أرباب : رباب شبيج؟؟
رباب : هذا محبسك الخرزة مالته جايبيها من شبه الجزيرة العربية وعمرها آلاف السنين..
(بدت تنطي مواصفات الخرزة اللي لابسها وشنو يستفاد منها.. وشكد صارله من مشتريها) ونطته تفاصيل المحبس ال ثاني اللي لابسه
وطلبت منه يطلع محفضته..
كالتله اكو كارت بداخل المحفصة لونه اصفر طلعه من محفضتك ومزقه.. هذا الكارت جايبلك النحس..
طلع زوج أرباب المحفضة وفعلاً لكه موجود عنده هيج كارت قديم بمحفضته..
وكالتله عن اسم مرأة عمرها بالأربعين سنة دتحاول تتقربله هالفترة حذرته منها..
كال إلها فعلاً اكو هيج مرأة وصحيح هالفترة دتحاول هواية تتقرب مني.. هي زوجة واحد جان شركائي بالعمل.. دتتقرب مني هالفترة مااعرف ليش بس اني اكيد ما دنطيها مجال..

طبعاً أرباب زوجته تخبلت من سمعت هالكلام..

رباب : احذرها لهالإنسانة.. واكو هدية راح توصلك هالفترة.. الهدية عبارة عن سلة فواكه ديربالك تاكل منها.. أحذرك أحذرك أحذرك

ابو رباب تخبل من سمع بنته هيج دتحجي تفاصيل..

ابو رباب : رباب كافي.. كافي سكتي بعد لتحجين شي راح تتأذين يابه كافي..

رباب بهالأثناء باوعت على أخوها عاصف وظلت تغلط وتتجاوز عليه بدون سبب.. وتكله  انت راح تتمرض.. ومرضك راح يكون صعب..

فجأة..
رباب فقدت الوعي..
اتصل ابو رباب بالسيد ابو حسين..
إجه حتى يشوفها ويقرأ عليها..
بدأ يقرأ عليها بس.. بس رباب لا إيد ولا رجل..
بس تفتح عيونها وترجع تغمضهن..

استمرت رباب أيام على هذا الحال..

بيوم من الأيام..
وقت الفجر..
تقريبا الساعة بالخمسة..
كامت رباب توضت وراحت تصلي..
بقت تصلي هواية..
راحت بعدها لزمت القرآن وكامت تقرأ قرآن بصوت عالي (الصوت مو صوتها)
أبوها سمع صوت قرآن..
إجه عليها دخل للغرفة كعد يمها..

رباب : بابا اريد ابقى وحدي.. ارتاح من اقرأ قرآن وحدي..
أبوها تركها وطلع..
وياريته ما تاركها.. 💔

رباب سدت القرآن وغمضت عيونها وظلت مبتسمة..
هاي شنو..؟ شبيها رباب شدتشوف؟؟
ليش مبتسمة..؟
هاي شنو..؟ هالمرة رباب ما شافت الجني اليهودي..
لا.. لا..
هالمرة شافت......
#بقلمي #زهراء_الزهيري