الشيخ نور التميمي

البارت الخامس

بارت مسائي😈  والدلال يخلص اذا امل 😈😈😈🔪🔪🔪🔪🔪🔪

البارت الخامس

بالليل زهراء خذت تلفونها وصعدت فوك السطح تكعد تقرا براحتها...البنات نايمات..وتقرا وتضحك..وهم هاي اخر فرصة الها لازم تبدي تدرس...

نواف جان صاعد هو وادريس للسطح شافو زهراء كاعدة تضحك وبيدها تلفونها..وشافتهم تفاجئت بيهم..ونواف اشرلها على حجابها..ولبسته بسرعة..

نواف:شسوين هنا بهالوقت وتضحكين

زهراء:والله العظيم جاي اقرا رواية

نواف:جيبي تلفونج..وخذاه وفتحه على رواية وفتش منا ومنا وماشاف شي...هو يخاف على اخته وهو يحاسبهن اكثر من ابوه...

ادريس:تصرفك هذا يكسر كلبها..خليك واثق بأختك

زهراء:اي صدك عود ليش تشك بيه انته وتدري بيه تربيتكم ما اسوي غلط..واجي هنا اقرا روايات

نواف انطاها تلفونها:انه اخاف عليج الدنيا ما تتأمن وهالزمن يخوف وياكثر البنات الي سحبهم الانترنت..وبدل الروايات مو ادرسين احسن

زهراء:والله العظيم جاي اقرا بس ومو مال هالسوالف..وبس اليوم اقرا والله مهتمة لدروسي

نواف:يالله نزلي نامي مو اشوفج هنا بعد..واخذ ادريس وراح نامو بالديوان..بس ادريس مانام وكعد يفكر بزهراء...

والفجر..نواف كام من فراشه وظلوعه توجعه..لزمهن وكام لبس دشداشته وطلع وراح دخل الصالة يريد يروح يجيب فلوس...

شاف نورسين بيدها لابتوب وجاي تكتب بي ومتربعة على الأرض وحاطة الابتوب على مخدة الجلسة تصير عالية شوي ويابسة...

نواف:يابه صباح الكمر

نورسين رفعت راسها:هلا صباح الورد..وابتسمت..

نواف:بلكي فد ابتسامة لفد ناس ترا معوزين حنان هههه

نورسين:ههههه ومنو هذول المعوزين حنان

نواف:ابوي..أ أ اقصد... ويريد يضيع السالفة..اشو كاعدة

نورسين:اكتب..توني كعدت وبديت

نواف:شتكتبين

نورسين:اني كاتبة وجاي أألف كتاب من مجموعة قصص ملكية

نواف:هلا هلا بالمثقفة هو هذا الي يحتاجه الشيخ كاتبة بلكي تكدر تاخذ كلبه

نورسين مافهمت:شنو قصدك ياشيخ هذا

نواف:هههههه ماعليج خليج كملي..رايح اجيب فلوس واروح سوك السمج واريد اجيبلج زبيدي طويزج..واذا ماكو اجيبلج داكوك لو هامور..اريد اضوكج سمج اهل الملحة

نورسين:امممم اي يالله نشوف..اكلك شنو طويزج ههههههه

نواف:يعني طازج تازه هنا يكولونها ههههه

نورسين:اها..يعني انته تجيب للبيت من جيبك والله عجبتني نواف الكيوت الصاك ههههه

نواف يعدل بشعره:اشكرج اي طالع على ابوي نور اسم على مسمى شفتي..ويغمز الها..

نورسين ضحكت:اي شفته الله يحفظه الكم..اي ماكتلي انته تصرف عالبيت من جيبك

نواف:لا بويه هو انه منيلي جيب..مشكوك وكلما يخيطونه ينشك واطيح منه الفلوس..الله يخلي جيب جدي وابوي

نورسين ضحكت:والله كلامك يضحكني صدك انته مو مريض ليش راح تطلع هالوقت وحدك وين اخوانك ليش ميرحون وياك

نواف:نايمين ومابيه شي هاااا..واطلع هالوقت لأن الصيادين هالوقت يجيبون سمجهم التازه(الطازج)

نور طلع  من غرفته ونزل شاف نواف واكف يم نورسين وهي كاعدة على لابتوها وبس كفاها يشوفه وشعرها المفتوح..ولابسة تشيرت نص ردن وبيجاما...

نواف شافه:هلا يابه صباح الخير

نور:صباح الخير..وين رايح لابس دشداشتك وجفيتك

نورسين التفت لنور:صباح الخير ياشيخ...اول مرة تكله شيخ...هي تعرف شنو شيخ عدهم...

نور ماباوعلها:صباح الخير بت عمي

نواف:يابه رايح سوك السماجة

نور:وماكو احد غيرك يروح خلي عمك مشتاق يروح انته مريض..وخلي ياخذ خالد وياه

نواف:والله عمي مشتاق شكو سمجة عوره يجيبها ويجي..وشكو سمجة ارملة ومطلكه يجيبها ينكسر خاطره عليها

نور ضحك عليه:ولك حتى وانته مريض ماتوب من تحشيشك..امشي روح صلي وارجع لفراشك اليوم ماريدك تطلع مريض انته

نواف ظل يرمش:يابه والله راح يصير بيه جلطة من خوفك عليه مو مصدك هل كثر تحبني

نورسين:شوف هذا شيكول اكو اب ميحب اولاده..اسفة للتدخل

نور ميباوع عليها: لا مو مشكلة..وهاي اجاك الجواب..وانته ليش من احاسبك تعتقد اكرهك..انته لو تعرف حجم الحب الي بكلبي الك جان ماتكول هالحجي..انفتحتلي ابواب الحب من شفتك زغير وفتحت عيونك..وتحققت احلام العمر من شفتك تخطي اول خطوة

نورسين حبت كلامه:والله نواف مايعرف معنى كلامه عذره هو من حبه الك..ماما جانت هيج تكلنه انتم كل احلامي..وباوعت لنور..اني اتركم..وخذت لابتوبها وراحت للحديقة...

نواف:طفرت البنية يابه ليش هيج..لا تكول الكبر خذاني ومو مال عشك..ماشاء الله عليك يابه بعدك شباب

نور رفع سبابته بتحذير:نواف بطل سوالفك هاي ماريد افشلك كدامها الزم السانك هذا..وعاف ابنه وراح...

نواف:ان مادخلتها لراسك ياشيخ واخليك تحاجي نفسك فلا اكون نواف نور علي نور التميمي....

كعدت بالحديقة تفكر بشخصية نور ماتعرفه عدل بس توه كلامه عجبها..ولزمت كيبورد الابتوب وبدت تكتب...

الملك أدريان..ملك مستبد وقاساً ويعيث فساداً في بلاده حيث الشعب جائع وهو مستمر بحفلات الشرب والخمر والفتيات حوله... ولا يحب ملكته..لكنه يحب اولاده...

تأففت وسدت الابتوب...

نورسين:شجاب نور على أدريان الفاسد..ياربي عقلي ماعاد يشتغل هل يومين..شوفتهم وتعرفت عليهم تغيرت كل المشاعر الي بداخلي وكل تصوراتي...

وشافت نور طلع بطوله..ابتسمت على امل يباوع عليها وتبتسم بوجهه من باب اللطافة..بس ماباوع عليها..عبست..وتكول نور شنو مشكلته وياي...

نواف طلع واجه كعد يمها وهو لازم ظلوعه:ها شكو معبسة وماتكتبين

نورسين:نواف ابوك شنو مشكلته وياي..من احجي ولا يباوع عليه ولا يحاجيني..احسه مغرور كلش هوايه

نواف:ههههه لا ابد ابوي مو مغرور بس هاي طبيعته ثكيل مايباوع عليج لأنج بلا حجاب

نورسين:اي بررله مو هو ابوك

نواف:والله ماابررله ابوي انسان طيب..وكريم كرم مو طبيعي اتخيلي كل فاتحة تصير بالعائلة اغلبها عليه

نورسين:هلكد كريم..واووو.. وانته تختلف عن ابوك ههههه ماطالع عليه شخصيته تختلف عنك انته مرح وهو هادئ..بس الشكل سبحان الله تشبهه

نواف:لا يغرج هذا الهادئ من يعصب اعصار يمر علينه...يعني لازم اصير عابس حتى اشبه ابوي...بس خالد على خوالي..شفتي زهراء هم تشبه ابوي

نورسين:اي بس خالد لون بشرته تختلف عنها تؤم مختلف..سولفلي قصة امك وابوك تعرفها واذا ذكرها يوجعك انسه الكلته

نواف:لا لا مابيه شي امي قليل اذكر عليها جنت زغير من توفت..سولفولي قصة امي وابوي هو مايسولف بيها بس بيبي سولفتنه..زهراء تكعد تلح عليها كل يوم تسولفلها عنها وانه صرت احب اسمع عنها كلشي..وباوعلها ولمعت عيونه تبين...

والبلوجكتر بعده شاعل لان ظلمة فجر..

نورسين:اي صح كل يوم جنت اكول لبابا سولفلي قصتكم احب سيرتها..وتعلقت ب بابا هواي

نواف:نفس حالنه تعلقنه بأبوي وبيبتي لأن ماعدنه ام..سمعي قصة ابوي..ابوي مالتحق عسكرية بذاك الوقت يكدر يدفع بدل..والجامعي ميروح الا فترة محدودة وهو جان ويه جدي بالديوان بكل زغيرة وجبيرة مادرس ماكمل دراسته.. هي تصير بت عمه وجانت اله من همه زغار..كبرت امي وابوي حبها وحبته خطبوها اله واتزوجها..وجابو العسل الي كبالج

نورسين ضحكت:احب ثقتك بنفسك ههههه وخفة دمك

نواف طلع اسنانه:لا مو انه استحق الحب بداعة امي مو انه..اي اكملج امي جابتني وهنوب جابت خويلد وزهيره وهنوب هيثمو الطويل وهنوب ايناس.. جانت ماتلحك تجي يم شيخنا نور تطلع حامل بزعطوط وتجيبه وينعاد الانتاج لو باقية جان هسة صرنه 15 اخ ههههههه

نورسين ماتت ضحك:وربي ضحكتني ماشفت شخص مثلك انته واخوانك..ابوك تعب عليكم تعجبوني روحكم مرحة وخصوص البنات زهراء وايناس عسل ذني

نواف:بس امي جابت ايناس وتوفت ومحد يعرف شبيها بيبي تكول وبيوم لكوها على ايدها ايناس وهي لا حس ولا نفس..جان عمر ايناس 9 ايام

نورسين:ياربي والله قهر...الله يرحمها يعني مشافت امها..اووف وابوك شنو موقفه خطية

نواف:ماذكر بس ابوي لحد هسة حزين عليها وماتزوج بعدها ابداً وشكد حاولو وياه ماقبل وبت عمه مهره رادته وعنست وهي تنتظره وهسة عمرها 34 سنة وبعدها بلا زواج منتظره بعدها

نورسين:والله خطية تنتظره وليش مايحن عليها شنو كلبه ميت

نواف:مو كلبه ميت بس هو مايريدها كوه هي خو ما كوه..بنات عمي سفيهات بس للضحك انطيهن سوالف وضحك وجهال يموتن على الخلفة...هو انسان طيب وكريم وشجاع ويخاف الله بكلشي

نورسين:اي كل هذا بأبوك امممم خوش شخصية لملك شرايك شتكول

نواف:اي اي والقاسم يلوك عليه ملك..بس غير هو مايحجي.. تردين تخمطين شخصيته لقصة مووو لو موو

نورسين:اي عفية عليك...شخصية ملك بس ساعات اريد اسوي شرير الملك لأن ملل كل ملوك سلسلة الروايات مالتي ملوك عادلة وكل واحد قصته مختلفة بين حب والمملكة..واحد تخلى عن عرشه علمود حب حياته

نواف:اي واي شي تردين تعرفينه عن ابوي موجود يمج انه..حتى لون السروال والفانيلة الي يلبسهن اكلج اياهم ههههههه

نورسين:سخيف ههههههههه كوم روح صلي اذن الأذان

نواف هههههه:اي وانتي هم صلي يابه عوفي الابتوب

نورسين:احم احم اي اكيد شايفني كافرة

نواف:لا حشاج بت شيوخ انتي..وكام..ياالله سلام..اصلي واروح لسوك السمج

نورسين:بعدك مصر وكلام ابوك طيعه وصير عاقل

نواف:هههههه يمعودة لو ماروح انه محد يروح صدكي..وهم اخذلي فرة بسيارة الوالد..مع السلامة...وراح...

نورسين تحاجي نفسها:ههههههه وين اصلي واني بالشهرية...وكعدت تكتب لمن شافت ابوها اجه يروح للديوان يصلون هو وعمها ابو نور وصبحت عليهم وبوستهم ثنينهم...

وبعدين شافت نواف يريد يطلع بسيارة ابوه....ونور بالديوان والولد نايمين بعد ماصلو بالماي مكعدهم نور...وجدهم ابو نور يصلي بعد ماينام لذلك كاعد ويه اخوه ابو ادريس يسولفون ونور يمهم...

نورسين سدت الابتوب وراحت لنواف جاي يسد باب الكراج...

نورسين:نواف اخذني وياك

نواف:وين اخذج يمعودة سوك السمج مرايح للشلالات

نورسين:ههههه اي اعرف اريد اروح وياك اريد اشوف اسواقكم

نواف:حطي على راسج حجاب وتعاي

نورسين:اوك بس ابدل دقايق...وراحت للغرفة وخذت لابتوبها وشهد توها كاعدة تصلي وتصيح على زهراء وايناس يكومن...

نورسين صبحت عليها وطلعت ملابس للطلعة ونزعت التشيرت وهي بحمالات الصدر...

شهد:وين رايحة ولج وشفنه غراضج..ههههه فديت الاسود الابسته

نورسين:ههههه العندي نفس العندج ومانازعة كلش..رايحة ويه نواف

شهد:وين رايح نواف هذا مو مريض

نورسين:اي وابوه كله متروح بس شكله قنعه ويريد يروح سوك السمج..يالله تأخرت عليه..فدوة لجين لتلعب بجهازي مفتوح تضيع الكتبته كله

شهد:لا هسة اشيله..ديري بالج...وطلعت نورسين وهي لابسة بنطرون وقميص ابيض..عالخصر يجي شلون لاستيكه ومن جوى نص الفخذ...ولبست شال بأهمال وصعدت السيارة كدام...

نواف:جيت اعوفج شنو جنتي تحطين مكياج

نورسين:لاااء شوف وجهي بي مكياج اصلاً ماتأخرت عليك هنه خمس دقايق ليش تكبرهن..وصغرت عيونها اله...

نواف:لا االيوم نص المحافظة تكعد تباوعلنه وهلا هلا نواف ابن الشيخ نور جايب وياه بنية

نورسين:هههههههه لا شسالفة يعني احنه اخوان..وبعدين شعليك بالناس..يالله نروح خلي اشوف اسواقكم

نواف ضحك ويكول لنفسه اليوم احط ابويه براسي الا الينك واخليك طريقك ماتندلاه...

وراحو سوك السمج..ونواف فر نورسين فر وحتى ريكها..ورجعو للبيت...

وقت الغده الكل بالديوان كاعدين..اجو جم واحد من ولد عمهم ومن ضمنهم واحد اسمه سراب ونواف يصنفه تصنيف كلما يجي...

نواف:هلا والله بسريب..ارد اعرف بس شغله عمي من سماك جان شارب الرمين لو ماي غريب

خالد:ولك لا تحجي على سراب هسة يشور بيك ميرزا عنده شاره امه علويه..احنه بخت جدك..دستوركم خخخخ

سراب:اي ادري ابخت جدي عرفناها دستوركم شني هاي سويتنه جن اعوج

خالد:ههههههه اي انته غريب تخوف صراحة يعني شوف حنى رموشك لونهن ابيض بكد ما اشكر  المفروض يسمونك الأشهب

نواف:اي عود هو اشهب هذا غاطس بكونية طحين..هسة صدك حتى رموشك شكر..ادريس باوع لنواف...يابه انته لا تاخذ على روحك انته امك المانية هو امه سودانية مادري منين اجه الاشهب خاف بايكينك من المستشفى ولك

سراب:نويف هسة اكسر خشمك طايح الحظ احشمني انه اكبر منك

مشتاق:ياجماعة هاي طلع طفرة وراثية على اجدادنه قبل واسم سراب هاي جارتهم مسميته شايفته ابيض مثل الكلوب شعره ورموشه شكر حتى شعر صدره شوفو هسة اشكر..فجارتهم كالت سموه سراب

سراب:اي عفية شتوقي هالشي صحيح

مشتاق:ولك شنو شتوقي مو جاي ادافع عنك طاح حظك

سراب ضحك...

نواف:يعني هو الي يعصب منك ويحمك عليك بس يحط حرف زاي بدل السين ويصيحلك هذيج ماريد اكول اسمها استغفر الله استغفر الله

خالد وهيثم ومشتاق طاحو من الضحك...

سراب:نور ولدك راح اجلدهم واحد واحد وياهم مشتاق لا تكلي بعدين شسولك مايحترمون لا زغير ولا جبير

نور:كدام وجهك ادبهم 

سراب رفع ردان دشداشته:والله لغسل شراعكم...وطاحلهم واحد واحد بالنعل وهمه خربانين ضحك لااحساس ابد بس مشتاق سحل سراب ماكدر عليه...

وجدهم يكلهم بويه كافي احترمو شوي انتم اولاد شيوخ صيرو زلم كافي شقه..وهمه سكتو وصارو ملائكة...

نور:وعمر يكلي ليش ما ازوج نواف..هو خل يعقل خل يصير براسه خير اول ويصير رجال ويعتمد على نفسه

نواف:اويلي اشكد احب عمو عمر ينحط عالجرح يبرد والله ما جنه صديق ابوي عكسه تماما دوم مبتسم ويحب الحياة ومزوج مرتين بس ابوي قافل

فارس:وشبي ابوك ولك

نواف:موتني اريده يزوج بلكي يجيبنه جم زعطوط يونسونه

ابو ادريس:وليش تكل لأبوك ازوج كل لعمك مشتاق

مشتاق:انه ماريد ازوج هيج مرتاح وحلو شلي بسالفة الواق ويق وجهال وحفاظات يكرم السامع وحليب وجيب وتعال ودي وروح

ابو ادريس:هههههه ليش بويه احلى ما بالحياة تكون اب الابوة شيء حلو ومايتعوض واكو ناس محرومة

نواف:يعني عمي بربك شوف ابوي احجي وياه بلكي يقنع ويقرر ويزوج حتى يصير اب

مشتاق:هههههه واعمدة الكهرباء العنده شنو مو ابوهم..يالله نور اعترف انته لاكي نواف يم باب بيتنه

خالد:لا لكانه ابطن امنا وسبحان الله لكانه باب البيت ودخلنه بطن امنا ههههههههه

نور:هسة راح اطلعكم من الديوان

سراب:صدك نور ليش ماتزوج مهره بت عمي ترا عنست المرية وتنتظرك

نواف:افيييييه هم مهره اجتي بنصنه..لا يابه ابوي يريد وحدة زغيرة حتى ترجعه شباب

فارس:ولكم انتو ليش مصرين هل كثر على زواج ابوكم

نور:ياخوي العزيز بظنهم اعوفهم وبعد ماكو حسيب ولا رقيب هيج ظنهم حتى وين بأرض الله كاع يطيرون

خالد:لا ابد والله نفكر بيك

هيثم:وانا اشهد يابه انريدك تزوج بعدك مو جبير ترا 

نواف:وانه عندي العروس بس كول تم يابه المهر عليه والله ابيع كليتي وادفعلك المهر بس وافق

نور:اي ماشي لنفرض وازوجت..باجر تجون تشتكون مرت ابوي ومرت ابوي..هيج كالت وهيج سوت

نواف وخالد وهيثم تلاثتهم سويه حجو:يابه مانحجي وهااا..ولزمو حلكهم...

ضحكو عليهم الولد...وابو ادريس يكول اي بعد عمك مافاتك العمر ازوج...وابو نور يكول ايست منه انه اريد ازوج مشتاق...

وكعدو يسولفون الولد ويضحكون بيناتهم..نور خابر على صديقه عمر يجي يمهم يتغده واعتذر وكله زحمة عدكم خطار...نور كله شنو زحمة ياخوي تعال انته اخوي وعمي عمك...

واجه وياهم عالغده كاعدين..ونواف سحب الصحن من كدام ابوه وحطاه لعمه عمر...

نواف:يابه انته لا تاكل حافظ على رشاقتك هيج حلو لا تسمن ترا هي رشيقة رشيقة يابه وعلي تشك العيون بالطول

نور:منو هاي ولك شتقصد

شاف الكل يباوعون لأبوه والولد صفصفو وظلو ويردون يعرفون يقصدمن نواف...

نواف:هااا اي المشيخة يابه المشيخة..اي انته احكم اذا صرت سمين واجاك واحد يكول هذا الشيخ عنده كرش مينفع ميحل مشكلتنه...

والولد غصو بالأكل من الضحك..حتى ادريس مات ضحك وعمر همين...

نور:ولك انته هم تصير ادمي..شالخرابيط الي تكولها..كوم من يمي روح مناك

عمر:لا اكو شي ثاني بالموضوع نواف مايقصد المشيخة هذا لوتي هههههه نور يمك شي ومتكلي

نور:والله العظيم خلفتي مابيها خير بس البنات..وصدك يكول مشتاق يمكن مكايل بسم الله من سويتهم..نواف يقصد يتعاقب يابويه مايقصد شي 

نواف ولا بالبال:اي يابه عود لو زوجت هل مرة لا تنسه بسم الله ومو تشوف المرية وتنسه الرحمن الرحيم....

بعده مامكمل زمخ بي نور وكله روح تغده بالمطبخ....

نواف كام وبثقة:اي ليش لا اروح اشوف الشمس الضاويه ..يقصد نورسين..بس يخاف يكول ضوء القمر حتى لا يفتهمون ابوها واخوها...

وصدك راح بالمطبخ وكل للبنات حطولي اكل وحطوله وكف عالكاونتر ياكل ويمه سطل روبه(خاثر) مسوين منه لبن البنات هاي عليه صورة جاموسة حاطين...

غسل وراح داخل..وكاعدات ياكلن بعدهن وياكلن على كيف ويسولفن ويضحكن...زهراء جاي تتباهى بجمالها يم البنات وبدور همين...

نواف كعد وراهم وحط رجل على رجل..ويسمعهن يتباهن بجمالهن زهراء وبدور هاي تكول الحلو بيه هيج وهيج...

نواف:والله انه اشوفكم ثنينكم لو لونكم شوي اغمق تصيرون  نسخة من الجاموسة الي على الروبه......

البنات غصن بالضحك وايناس كامت تكركر بصوت عالي وزهراء وبدور يخزرن نواف...

بدور:ولك نويف انه دوم ادافعلك وانته تقصفنه..هاي لأن دوم اكول عنك حلو ياجلب

نواف:ههههههههه هاي قبل جنتو حلوات هسة شوفو ضوى الكمر الي يمكم اتذبكم كشور

نورسين:هههههه هاي عليه ضوى الكمر

نواف:اي بويه اي..اذوب اذوب..اكلج عندي سؤال صارله يومين براسي

نورسين:كول اسأل شنو هو

نواف:هاااا لا بعدين اخذ سيارة الوالد واخذج للشط

نورسين:اوك موافقة..بس البنات ويانه يرحون مو

نواف:لا ناقصني جواميس حسبالهم راعي بقر وجواميس ويطردوني من الكورنيش

زهراء:اياا الشرير واحنه..جواميس مو الا اكل لبابا اصبر..اذا ماتاخذنه

نواف:لا دخيلج خوفتيني..وبكيفي مزاجي افكر اخذكم او لا

بدور:كوم روح يم الزلم بدل ما كاعد هنا تتغزل بنورسين يالسخيف

ام نور:شبيكم على وليدي يشاقه ترا

نواف كعد يم بيبته:هلا بالطيبة الحنينة هلا بيبي الحبوبه..بيبي ابشرج راح ازوج ابوي قريباً..اليوم شكله مشتهي يزوج ومستحي

ام نور ابتسمت:الله وايدك بس منو يزوج ابوك مايسويها من جنتو زغار مازوج هسة يزوج لا ماتصير ابني واعرفه قافل 

ايناس عافت الأكل وكامت..من تسمع يكلون لأبوها تزوج تضوج ماتحب هالسالفة حتى زهراء مايردون ابوهم يزوج.. تاخذ مكانهن وميردون مرت ابو...

عبر اليوم بين ضحك الشباب وسوالفهم وبين نواف وابوه كل شوي يبسمره بحجاية ونور يعرف يقصد نورسين بس ساكت عنه....

وبالليل كلش زهراء كالعادة راحت فوك السطح تقرا رواياتها الي تحبها وتحس بسعادة من تقرا ولو بدت برواية ماتعوفها لمن تكملها حتى لو يومين متنام...وتعوف الدراسة...

واستغلت انشغال نواف ويه الشباب وتسمع ضحكهم بالحديقة كاعدين..طلت شوي من السطح شافتهم مندمجين بالسوالف والضحك وابوها وعمه يسولفون سويه...

رجعت لتلفونها وكعدت تقرا وماتدري ادريس لمحها طلت من سياج السطح لأن بينت وكام كلهم اروح الحمام...وراح للحمام وطلع ودخل داخل البيت...

وراح صعد الدرج ولسطح..شاف ضوى النقال بوجهها ولازمة ضحكتها حتى ميسموعها جوى بالحديقة...

راح كعد بصفها..وكال هلا بالحلوة شتسوين...وهي اخترعت وبسرعة لفت ربطتها الي على جتافها..وابتعدت عن ادريس لأن كعد بصفها كلش...

زهراء تريد تكوم ولزم ايدها وكلها كعدي ترا ما اعض اني وضحك..وهي خجلت...

ادريس:شنو تقرين شفتج اضحكين...يتبع

هل مرة قفلا التميمية مو خوش مو قوية عجزت يمكن 😂😂😂🔪🔪🔪 بس الجاي بارت الشوفة الشرعية 😂😂😂👌👌👌

بنياتي تابعو قصص هالبنات بليزO___Zainab___O

zan_eb15

واحبكم☺️☺️☺️

اووووش لايسمع 😈🔪

الكاتبة التميمية...... altmeme313