الشيخ نور التميمي

البارت الرابع

صباحووووو

هاي هاي كابتن✋✋✋

البارت الرابع

لجين:اروح وياكم..ولزمت اطراف التنورة مالت نورسين عساس تكول حلوة لا تبدلينها... ومانتبهت نورسين ومشت وانسحبت التنورة وهي فيزون..ورجعت عليها وطلعت كل سيقانها الوردية من الاول للآخر.....

فارس دار وجهه بسرعة وطاح من الضحك..ونور  ماشاف شي لأنه مدنك من الأول..وملتهي بسبحته...

نورسين صارن خدودها حمر من الخجل بس هي لابسة سروال داخلي طويل للركب هاي تلبسهن جوى تنانير الكصيرة...

تباوع لفارس يضحك ولازم عيونه بيديه ويضحك من كل كلبه...وبدور ضاجت حتى وياها ماضاحك هيج...والبنات مافاهمات شي...

نورسين خجلانة:شنو هاي فارس كافي تضحك

فارس وجهه احمر من الضحك وبعده يضحك:وروح جدي ماشفت شي..بس اتذكرت لجين سوت بخالتها هيج موقف محرج..وصارلها شهرين ماتراويني وجهها هههههه

بدور:اي عادي حبيبتي مستورة انتي هههه..وباوعت لفارس بعده يضحك...

تتمنه ابتسامته وضحكته وياها ويضحك ويه الكل الا وياها..وكامت ولبست عبايتها..وكالت شنو ماراح نروح بيت عمي...

نور كام واستأذن وراح للديوان هو وفارس..ونورسين مابدلت ماخلنها البنات وكلولها هسة راح نروح هناك وين يشوفوج الولد...

راحن بيت عمهن الي يمهم..وشوي ورجعو للبيت وهنوب راحو بيت عمهم بهاء..وكل العائلة معزومة هناك وهوسة وجهال ونسوان....

والعصر كلش زهراء دكت على خالد يجي وياهم للبستان ميقبلون يطلعن ابحدهن وتثاكل خالد وكلها غير مرة اجيبكم انتي والبنات...

زهراء الا شوي تبجي وهو خبيث يلعب بأعصابها يكلها باجر وعكبه وينرفزها..وسدته منه وخابرت لأبوها وكلتله خالد مايقبل يجي ويانه للبستان...

كللها هسة اخلي يجيج ركض..بس باوعله ابوه وكله كوم..وهو فهم زهراء كلتله...وكال الا افرك خشمها بالتبليط اليوم...

وكام راح صاح باب المطبخ..وسلم على الي بالمطبخ..وطبعاً البنات كلهن وحتى بنات العمام يردون يرحون....

خالد باوعلهن:هاي الجيش كله راح يروح للبستان

زهراء:هههههه اي وشعبالك نروح بحدنه

خالد:وهاي راح ابقه انتظر حظرة جنابكم

زهراء:انته بس ودينه وماعليك عمه صباح اترجعنه

صباح اجت:ها ولك خويلد جني سمعت تحجي على جيشي

خالد:ههههه هلا عمه شلونج..لا حشاج منو يحجي على المطاية مالتج..انتي شايفتهن كل وحدة ماتعبر من الباب..بس زهرو وبت عمنه الألمانية رشيقات..شوفيهن هنه ووجوهن...

كلهن صاحن انجب خويلد واكل تبن من حلاتك تصنف..هو يصنف عليهن بس.. اصلاً كلهن حلوات عيون كبار ورموش ثخينة والوجه احمر رباني..بس اغلبهن سادس ابتدائي ويطلعن ويكعدن بالبيت واكو مادارسات كلش...

وشكو وحدة تبطل من المدرسة يجونها خطابة حتى وهنه 13 سنة..وبعضهن ازوجن والبعض لا حليانة بعيون ابوها وميهون عليه يزوجهن ويظلمهن...ويدرسن...

هو الأبو يباوع لطول بناته ويقيسه كل يوم..بس البعض للأسف ماينولها من حنانه ولا يعبرلها عن حبه حتى يصير بيها نقص حنان وادوره عند الزوج...واكو يلكونه واكو لا....

المهم اخذهم خالد للبستان..وعافهن وراح...

صباح:هذا خويلد فد واحد خبيث وكواد..ولا جنه تؤم زهيره

نورسين:يعني تؤمج هذا خالد..ههههه مايشبهج مختلف

زهراء:اي يسمونه التؤم المختلف..حتى لون بشرتنه تختلف..انه بيضة وهو حنطاوي على خوالي طالع

نورسين:فديت الحنطاوي هههههه

صباح:جنج على حنطاوي بعد عمتج

نورسين ظلت تمشي كدامهم ودارت عليهم:اي اي يجنن صاك على كولتكم..اممم وكون طويل وماحب العظلات احسهم وحوش اهل العظلات ههههه

صباح:الطويل ماشاء الله كل عمامج ولد عمج اعمدة كهرباء..اختاري ياهو تردينه خل اعددهم العزابية

نورسين بثقة:لا عمة ماريد اتزوج هيج اريد يحبني واحبه..واصير كاتبة مشهورة يالله اتزوج

صباح:لا البنية عدها احلام..بعد كلبي لعد طيري لألمانيا هنا ماكو احلام هنا زواج وجهال والمتخرج يدفنونه وميطلع تعينه..شوفي عمج صارله جم سنة دارس وماتعين ويكلي انتي فكر حياتي لا تعين لا حصلت شي غير خلفية بكد التانكي

نورسين:لااا صدك خطية عمو..ههههه شنو تانكي

صباح:بعد عمتج انه الخطية شابعة ظيم من وراه..والتانكي شوفي ذاك فوك البيوت مال الماي

نورسين:ههههههه...اني راح اروح لذيج الشجرة..ونزعت حذاءها وراحت عافتهم وركضت لبعيد وتأشرلهن يجن..وهنه ركضن وراها...

وكلهن اتجطلن بالأرض من التعب هنه وعبيهن..وهي تضحك عليهن..وحطت ايدها على ذقنها تفكر...

نورسين وكفت على راسهن:امممم يرادلكم تمارين حتى جسمكم يتعود على الركض

صباح اجت وكعدت هي وخلفيتها الكبيرة:مركبة رجلين حصان بعد عمتج..وهي تلهث..عزززااا هسة نزل مني كيلو

نورسين:هههههه ليش احسن

صباح:اي ولو اتزوج عمج عليه بشنو ادوسه غير بهالخلفية بعد عميمتج..وضربت عليها...

نورسين طاحت من الضحك:لا صدك..وليش يتزوج عليج عمو قاسم هاي خيانة

صباح:خيه يكول الشرع حللي اربع..كلولي الشرع كال يمته مامليت روح غير ودور المثنى والثلاث والرباع..لو افرمه بمفرامة الثيران هم يكلولي ليش؟... افرمه وياه واوزعه كباب عالمنطقة ثواب لأبوي وأمي

شهد:خطية عمو ليش تحجين عليه عمة خوش رجال وفديته شكد رومنسي اصلن ازوج عليج مرتين خخخخ

نورسين:لاااا مو صدك..اتزوج مرتين عليج وباقية وياه وين كرامتج عمه

صباح:اي والله خايبة تعاي اكعدي اسولفلج قصتي..اتزوج وحدة عرمة ومادري وحاطلها شقة ويروح ويكلي مسافر..ويروح بالشهرين ماشوفه وانه عمتج جنت مثل الاطرش بالزفة وباقية واندعيله يرجع بالسلامة..ويجي يوم واحد من الولد يشوفه بالبصرة وياه حرمة مفرعة ولا حياء ولا احترام..واجه كلي..انكلبت الدنيا عليه وعلي راد يرميني بالسلاح من كتله طلكها..وابتعد عني وبقيت بيت عمي ماقبلت اروح بيت ابوي مو للكرامة الضايعة بس ماعندي اب ولا ام بس اخ ومايهمه حالي ولا اهل عندي وجدج جان هو ابوي وكال صباح بنيتي وماتطلع..وقاسم هو يطلع وطرده وبال6 اشهر هو هاجرني ماشوف طوله وانه حامل ولدت ومات الطفل وره الولادة وبجيت دم عليه..بس الحمدلله عندي 3 بس جان حملي صعب ومو بسرعة يصير طفل...بس سمع بأبنه مات رجع النه وهو ندمان ومطلك ذيج طلع شايفها ويه واحد العرمة الماتستحي واجه بوس ايدي اسامحه..سامحته ماعندي ملجأ غيره..ورجع ازوج قبل سنتين وهم نفس الحالة ابوها خريج سجون وطلك بته جان طامع بالفلوس..فهل مرة كلت اذا اتزوج اكص ركبته اله وعلي ورجلينه وايدينه واخلي بعد مايكدر يقيس طوله ويه اي مرة ثانية واكص الي بالي بالكم

البنات ماتن ضحك وكلهن اختنكن بالضحك...ونورسين حزنت تكلها شنو هاي كلكم قصصكم حزينة...

نورسين:على شنو الضحك سفيهات قصتها حزينة

شهد:مافتهمتي اخر كلمة ههههههههههه..وي نسينه انتي مو من هنا

نورسين:امممم فهمني شنو السالفة شيضحك زوجها مزوج عليها مرتين....

صباح شرحتلها بالخط العريض شنو كالت اخر شي والبنات ماظل بيهن نفس من الضحك ونورسين هم كامت تضحك....

وبقن بالبستان يفترن ويضحكن..وماباقي شي وتغيب الشمس..البنات شافو العمام والولد وياهم كلهم اجو للبستان...بس عمامهم و ولدهم ماكو احد غريب....

ادريس راح يم البنات..وسلم عليهم وكل وحدة يسلم عليها يمد ايده يصافحها..واكو صافحنه واكو لا...

ادريس وصل لزهراء:هلا بعد بيتي هلا بالحلوة زهورة

زهراء كلبها دك من دون كل البنات غازلها شكد جريئ...خجلت وابتسمت بس...

نورسين ضحكت:صاير تحجي مثل نواف والولد..وهمستله كافي تتغزل البنية ابوها هنا

ادريس ماهتم لحجي نورسين وكف بصف زهراء...

ادريس:ياحلوة ممكن صفحتج بالفيسبوك

زهراء باوعت بوجهه:ماعندي فيسبوك اخوي مايقبل...البنات كامن يصيحن زحف زحف...

وادريس عجبته بالرغم مايحب البنات الخجولات..بس عيونها تجذب...

نورسين شافت نواف اتجه الهم وكالت ياربي الولد ميقبلون على بتهم وهذا احذره وميفيد..وسحبت ادريس من ايده...

نورسين:ادريس راويهم مهارتك بتسلق هالشجرة

ادريس:الا هسة..نواف تعال انته راويهم مهارتك مو كلت متسلق ماهر

نواف:هاا ماشاء الله كل الجواميس هنا ماشاء الله شوف الوجوه..شكد حاطات مكياج جكمات

كلهن صاحن عمه بعينك يمته حاطين مكياج...

نواف:يعني تقنعوني وجوهكم رباني

صباح ضربته على ظهره:ولك نويف تقصد الجواميس بيه مو طايح الحظ

نواف ضحك:لا حشاج عمة انتي منو بجمالج وعلي اطكين بالكاع وهذا قويسم مدري ليش يمشي اعوج وياج

زهراء:لاعب وياك دعبل تكول قويسم

نواف:سدي حلكج انتي لا خشمج افركه

نورسين:انته ليش متنمر خليك لطيف ويه اختك.. ويجننو البنات ليش هيج تكول عنهم والله جميلات كلهن

نواف التفت يمين ويسار:وعلي محد يلمع هنا غير بنت الألمانية..ترا اكو ناس اجت ويانه هذولاك همه يردون الولد يشلعون نخلة للجمار تردين تجربينه..وغمزلها..بس اكو ناس ويانه ماتقبل بهل اللبس يابه

نورسين:والله ردت ابدل ملابسي البنات مقبلن كالن ميشوفوج الشباب همه وحد عن النسوان

نواف:اي هل مرة يابه لبسي غير شي جدي وابوي وعمامي ميقبلون هيج..وهسة خل اراويج مهارتي بصعود الاشجار..احم وخرن لا يطيح عليكم غصن مكسور هههههه...ولزم الشجرة الجبيرة..وصعد...

وادريس ضحك ولحكه واتسلق اسرع منه وصعد للقمة وكله انته وملابسك وين تكدر تتسلق...واجه خالد يمهم ونواف صعد يم ادريس...

خالد:نويف لا تنجبح على وجهك بعد اخوك..وانتن حسابجن بعدين مارحتن لمن اجو عمامي والشباب

صباح:وشنو شايفنه بالداخليات حتى مايشوفونه..شنو محد شايف وجهي وكرشي الجميل بعد عمتك

خالد:هههههه لا عمتي صدك حلوة انتي ولا اتزعلين مااطيح حظهن الج بس بعد ماكو بستان...راد يكمل شمرت عليه صباح حجارة وضحك وراح جوى السدرة...

نواف:انته يالأشكر لا تستهين بأبن الشيخ نور..ترا جدي متريك ومتغدي ومتعشي ويه السباع..وابوي معاشر اسود

ادريس:اف اف كل هذا بعمي وابن عمي..اسود وسباع ماسوهم عشه هههههه

نواف:خايب ابو كذلة شكره اقصد ناس شجعان مو اسود حيوانات ههههههه

ادريس ظل يشاقي ويدفعه عود يحاول يطيحه...

نورسين:نواف احذر ادريس شقاه ثكيل عباله الوحوش اصدقاءه..ويه كلامها نواف فقد توازنه وطاح على الأرض والسدرة جبيرة وعالية وتوجع صدره ولزم ظلوعه...ونام عالأرض تألم انفاسه انكطعت...وغير شراميخ الشوك....

ركضن اله البنات..وزهراء لزمته..وتصيحله يكوم..

زهراء بخوف:نواف عمري شبيك توجعت...ولازمة ظلوعه ونواف تشنج ومن الألم اغمه عليه...خافت وظلت تهزه...

خالد صاح بصوت عالي:يابه الحك نواف طاح ومات..ويصيح نواف مات يابه...ولازمه يهزه...

سمعو صوته هيج يكول لو الزلم كلهم اجو من الفزع..ونور انفجع وهو يسمع اسم ابنه وياه كلمة مات...

اجه شافه امدد كلبه وكف عن ضخ الدم..واخذ راسه لحظنه ويضرب على وجهه...وادريس يعتذر ويكلهم ماقصد أذيه جنت امزح وياه....

نور يضرب على وجهه بخفيف:نواف بويه كوم شبيك..عمري على عمرك بويه كوم لتخوف ابوك

زهراء خافت ودموعها ظلن يطيحن وايناس همين...

نواف فتح عيونه:يابه والله دمعت عيوني اول مرة اعرف بيك تحبني هل كثر

كلهم بخوفهم انفجرو ضحك حتى جده الشيخ ابو نور...

نور نفض راسه من حظنه:يا طايح الحظ وانه جيت راكض وكف كلبي من الخرعة وانته طلعت تشاقه

نواف ضحك وهمسله:يابه هسة بيضت صفحتك..ترا بت عمك جاي تباوعلنه وشوف وجهها كمر يضوي بالنهار

نور كام وعافه:خالد صكر نويف شمروه بالبير عقاب اله على هالمقلب

نواف كام ولازم ظلوعه:يابه والله مو مقلب

ادريس:آسف هواي والله اقسم ماقصدت اطيحك

نواف:لا تعتذر مصار شي مابيه شي..وخطه خطوة وصاح بألم..ولزم ظلوعه..خالد وادريس لزموه..وصكر ابن عم نور...

نواف:مابيه شي لا تخافون وهاي رايح اشلع النخلة وياكم..وراد يتحرك وصاح بعلو صوته ولازم ظلوعه وتألم حتى عيونه دمعن...

كلهم اجوه الولد وهو مصر مابي شي..هنوب ظل مايكدر يحجي يختنك وظل يصيح من ألم ظلوعه..نور اختبص من جديد وكال شبي شنو تكسرن ظلوعه...

والولد يهدونه يكلوله مابي شي..وخذوه للمستشفى..وتأخرو للساعة 7 بالليل بالمستشفى نور وياه والولد...

وطبعاً رجعو كلمن بيتهم...

والبنات قلقات ويفكرن..وحتى العشه ماسون..واجو من المستشفى واستقبلوهم البنات..كلولهم كلشي مابي نويف جنه حصان...بس ظلوعه متشنجه...وجم يوم ويصير زين...

وراحن البنات كلهن سوى سون عشه لأن ولد عمهم يم نويف..وماشاء الله همه كومة..سون العشه وب8 ونص صبو وبال10 جابو الولد جمار الهن....

شالعين نخلة جبيرة ومجمريها وجابولهم..ونورسين اكلت منه وكالت طيب...

بالليل زهراء خذت تلفونها وصعدت فوك السطح تكعد تقرا براحتها...البنات نايمات..وتقرا وتضحك...يتبع

بارت صباحي 😊

غلاف القصة ويشبه نور الرجال مو هلكثر واضحة بس هاي الوحيد يشبهه 😁

وبس عندي الي يشبه ادريس 😁

يوزر انستا للعدها مالت الكاتبة زهراء امجد وهذا رابطه

https://instagram.com/black_2521?igshid=fwzhsarwiag2

وسلام ✋

الكاتبة التميمية...... altmeme313