حامد يكول :-
مابـچـيت عينك وشبدر مني
كطن ابيض اجيتك رايد تلمني
لكلشي محسب اني وماحسبت لهاي
تضمد جروحـك وبالتالـي تشمرني
.........
مريم ...
طلعت من قاعه الامتحان اليوم آخر يوم وكلش تعبانه أريد بس ارجع للبيت حتى ارتاح لان ما نايمه بسبب تراكمات الماده الي صارت اقرايتها ب ليله الامتحان كالعاده
طلعت ضربت الشمس على عيوني رفعت ايدي حتى افي على عيني شفته اكبالي لابس نضاراته ويباوع على الي دا يطلعون أنتبه الي طلعت نزع نظارته بسرعه وركز عليه وصار يتقدم نحوي
رجفت اطرافي اتذكرت منظري بين ايدي ب اخر مره شفته بيها والخوف الي كان بيه وتعب الي سببه الي
ريكي يبس خوف على رهبه على مشاعر متضاربه بس بعيده عن الحب صارت بيه والسبب كله هو بسبب ضربه والاعمال الي سواها بيه خلاني بدال ما كنت اعتبره صديق وحبيب وزوج صرت اعتبره مصدر خوف واذيه
علي :- شلونج مريم
حجيت بتوتر
مريم :- شرايد شعدك جاي لهنا شتريد من عندي
علي :- اريدج
مريم :- من رخصتك لعد
علي :-اوكفي مريم أريد احجي وياج ونتفاهم
مريم :- شتريد كول ؟؟ خلصني اريد اروح
علي :- مو هنا خل نروح المطعم شي ونحجي منا العالم ما اريد تجيج حجايه خاف صوتنا يعلى وزحمه تصير سالفه
مريم :- ههه تجيني حجايه !! صدكت نفسك ،، ماشي بعيوني خل تشوف نهايتها شنو وشنو عندك من تبريرات وحجج
علي :- نهايتج ومرجعج الحضن علي مريومه
ما علقت على كلامهوما حجيت شي طلعنا وتوجهنا المطعم قريب على من الدوام كعدنا
علي :- شنو تريدين اطلب الج اومري مرامي
مريم :- ما جايه حتى اكل اني علي كول شنو تريد تحجي بسرعه لان ما عندي وقت
علي :-ما عندج وقت الي مرامي اني حبيبج وزوجج
مريم ؛- اي ما عندي وقت يلا احجي خل نخلص
علي :- مرامي ما كافي طول هاي الفترا وانتِ بعيده عن حضني ها مرامي مكافي هذا البعد ما حنيتي الي
ما حنيتي العليج ها حبيبتي يلا خل نرجع سوه ونحل كل هذا الي صار والي تريدينه يجرالج اومري واني انفذ وعلى هل خشم الي تحجي واذا على البنيه فكانت مجرد نزوه وراحت والبنيه راحت
الحال سبيلها وعن قريب تنخطب وانتهى كلشي بينه اني وياها ولا تنسين انتِ الاصل انتِ الي ب ظهر جنسيتي والي تزوجتج واختاريتج تكونين على ذمتي ومرتي وام اطفالي ان شاء الله
مرامي كافي زعل وارضي وتعالي ارجعي البيتج ونوري ترا اظلم بدونج حتى ما طايق افوت للبيت لان انتِ مو بي
مريم :- هههههههه بس نسيت شي علي انُ بكل بساطه وبعد كل الي صار صرت انت والبنيه بعد ما تهموني يعني هاي هي وانت تعرف بيه كلش زين ما يحتاج احجيلك عني انُ اني بنيه أهم شي عندي راحتي ونفسي شنسوي بـ؏ــد
علي :- يعني شنو ؟
مريم :- يعني اريد راحتي اريد اطلك او لا مو هيج هل ابسطها اكثر الك اريد اخلعك مثل ما يكولون او لا عيب احنا ناس مثقفين اريد انفصل عن حظرت جنابك علوشي
علي :- مريمممم لا تستفزيني بلسانج
مريم :- ما بي شي كلامي عادي مو اول ناس ينفصلون احنا ولا اخر ناس
علي :- مريم لا تخربين حياتنه وبيتنا ب ايدج علمود نزوه لا تقدم ولا اتاخر وغلط بسيط واحنا بعدنا ب البدايه
مريم :- العفوو ولو اقاطعك يعني بس عن أي بيت دا تحجي هاا هذاك البيت دا تقصد الي اني عايشه ب غرفه بي كنت ؟
وكنت عراقي اصيل بيه غيره ورجوله على اهل البيت اكثر من زوجي تقصد هذاك البيت الي كان بي واحد يكولوله زوجي مو وهو ما عنده شخصيه ولا شرف ولا غيره ولا قدره انو يحافظ على سمعه البيت وأهله وكان رجل كرسي موجود شكلا ؟؟؟
ضرب الطاولة علي كان اكو كم شخص بالطعم قليلين بس الكل صارت
انظارهم علينه دخل الخوف الكلبي لازم ارجع للبيت ب أمان لان غدار هو وكل شي اتوقع منه يسوي لأن نذل هو وكلشي يسوي
علي :- سدي حلكج مريم لا اشوفج الي ما عنده شخصيه شيسوي بيج خليني محترمج وجايج ب احترام ولو انتِ مو مال احترام شوفي ولج ترجعين للبيت ترجعين وغصب ما عليج وعلى اكبر شارب عدكم وله لا تخليني افضح كل شي وساعتها ترا حتى دفنه ما تحصلين
مريم :- هههههه ضحكتني تدري اوي خفت خفت منك شوفني خايفه شوف وركز زين ترا اني مو مريم القديمه الي تهددها وتسكت
اني مريم بنت العقيد حازم اذا ما سامع عنه وما تعرفنه روح اسال وهمه يكولون الك منو احنا خاف ملاك ما ادت الواجب وياك عدل ف اني ادي ركز زين وياي
تهددني اهددك ب تهديد أقوى من تهديدك وما تهز شعره مني فاهم لو لا وله نصيحتي لازم انت دير بالك مني لا يصير شي ما يعجبك مثلا (تقربت منه واحجي ب صوت شبهه هامس)
الفديو مالك انت والحب لومثلا اذا يعجبك نحجي عن الشقق المشبوهه الي تروح الهن اختك أو لا عيب هذا اسم محترم هنه اسمهن بيوت الدعارة ومخدرات
ترا عندي عناوينهن انطيك ياهن ؟ او لا المن اتعبك بمكالمه وحده الاخواني لو أي واحد من ولد عمومتي وتنكشفون شكد انتو وصخين وناس قذره ب كل معاني الكلمه
وعود بعدها انت تفاهم وي الوزير المحترم ب خصوص التهم الي راح تتهمون بيهن ماشي حبيبي اوي نسيت ههههه طليقي المحترم تمام عيوني أن شاء الله واسمع لا تلحكني ولا تلعب وياي ماشي لان راح تشوف شي مشايفه مني
عفته وكمت أخذت نفس وأيدي ترجف من الخوف بعد ما كنت اتصنع القوه صرت امشي سريع سريع أريد بسرعه أجر سياره بسرعه صعدت ب اول سياره وكفت الي وانطيت العنوان
الدموعي الي كنت حابستهن ب عيوني صار كالشلال ينزلن بسرعه شي ورى شي على خيبة الامل الكبيره
واني اقوي نفسي واحجي وياها
عفيه عليج خوفتي وسكتي عفيه عليج ما خليتي ياذيج ازيد انتِ ما تهتمين اله مريم ما تهتمين اله انتِ تحبين نفسج وبس نفسج وبسس مريم استوعبي يلا هدي هدي انتِ تحبين نفسج وبسس ما تحبين احد ثاني عفيه عليج عفيه. حجيتي كل الكلام الي كنتي تفكرين بي طول هذيج الفتره ونفذتي كل كلمه ردتي تكوليها اله وصلتي اله صوره انُ ما يكدرلج ما يكدرلج عفيه عليج
مسحت دموعي وصرت اهفي على وجهي حتى ابطل بجي باوع علي أبو التكسي رجال جبير كان
...:-بنيتي بيج شي صايرلج شي
مريم :- لا عمو تسلم ما بيه شي
سكت الرجال حسيته ما يريد يضغط عليه وصلني للبيت
دخلت لكيت ماما ب المطبخ رحت آلها
أم مريم :- ها يمه شو اتاخرتي اليوم وانتِ كلتي اجي من وكت ؟
مريم :- يمه علي اجاني للدوام وكال أريد احجي وياج
( حجيت الها كل شي ما عدا تهديدي اله وتهديده)
أم مريم :- يصير خير خل يجي ابوج من دوامه ونتفاهم على هل شي ونخصمه اليوم
مريم :- اني راح أصعد ارتاح محتاجه شي امي
أم مريم :- سلامتج يمه ما عدنا شي اصعدي ارتاحي
هزيت الها راسي وصعدت الغرفتي غيرت ملابس وتمددت حتى ارتاح احاول انسه كلشي وكل ساع اردد
انتِ تحبين نفسج وراحتج هاي هي راحتج اهم
ب هل جمله كنت دا اقوي نفسي انُ ما سويت شي غلط مر الوقت اجتي عليه امي
أم مريم :- ابوج يريدج جوه تعالي
مريم :- كلتي اله ؟
ام مريم :- اي كلت اله على كل الي صار
مريم :-ماشي جايه وراج
نزلت ماما نزلت وراها بابا كاعد وبيده اكلاص جاي
أبو مريم :- ها بويه شلونها وحيده ابوها
مريم :- ب وجودك يا عيوني اني بالف خير الله يديمك الي سند وقوه يابه
أبو مريم :- باباتي اتوقع صارت فترا طويله على الي صار بينج وبين علي وأن شاء الله كدرتي انو تاخذين قرارج ب خصوص موضوعج اني كتلج مراح ندخل ونضغط عليج ب اي شي لان هي حياتج وانتِ الي ديريها وتمشيها على الي يناسبج
مريم :-بابا اذا انت موافق ومثل ما تكول هي حياتي واني الي لازم اديرها ف اني أريد أطلك ما اتراهم وياه ابدا
سكت ابويه ما حجه شي شرب شويه من كلاص الجاي
مريم :- حباب بابا طلكني منه ما اريده اذاني هواي حبااب بابا
أبو مريم :-هاي هي بنتي لا تبجين ولا تقهرين نفسج اني وياج ب كل قراراتج وب اي شي تريدينه بس يا بنتي انتِ متأكده من قرارج ترا طلاك مو هين
مريم :- أي بابا متاكده حباب أريد أطلك لأن ما اكدر بعد ارجع اله ولا اعيش وياه وهم البيوت أسرار وهذاك البيت أسراره تهد الحيل وإني ما اكدر اتحملها ولا اكدر احجيها تبقه عرض وشرف بيت
ام مريم :- بس لــوو أ؏ــرف هذا العقل اليابس منين جايبته هسه غــير نعرف شكو هناك شكووو
ابو مريم /- عوفيها يا مره مدام كالت شرف وعرض بيت كان لازم تفهمين شنو تقصد واني بنتي ما تحجي ب اعراض الناس
امي صفنت على ابويه وكانو افتهمت شنو الي كان قاصده
أبو مريم :- ماشي بنيتي الي تريدينه يجرالج اني هسه اخابر على علي يجيب أهله ويجون ومثل ما دخلنا ب المعروف نطلع ب المعروف
مريم :- ماشي بابا من رخصتكم اني أصعد ارتاح
عفتهم وصعدت الغرفتي مرت نص ساعه دكت علي ملاك
ملاك :-ولج شصاير
مريم :- شصاير ؟؟ مفهمت
ملاك :- شنو شصاير غير ابوج دك على ابويه كال اله تعال وافهمك ومتت من الخوف كليلي اكو شي ؟؟
مريم :- ها لا ماكو شي اطمني بس علمود سالفتي أريد أطلك من علي وهم هو اليوم اجالي للدوام وبيني وبينج الكلام ملاك هددني انو يفضحني ونفس السالفه لا جديد
ملاك :- أيا كلب بس لو كنت وياج كان سحلته وعلمته شلون يحجي ويهدد منو مبين كان ضرب حامد اماثر علي ذاك اليوم وما استوعب كلامي وياه عدل
مريم :- ما يحتاج اتعبين نفسج لان اني هم هددني هوه رجعت هددته وخليته ما يعرف شنو يحجي
ملاك :- بشنو هددتي ؟
مريم :- بسالفه اخته والفديو ماله خيه
ملاك :- زين اسوين عفيه عليج هيج اريدج
مريم :- ما يحتاج توصين لان مدام اريد اخلص من عنده لازم هيج اسوي
كملت كلام وي ملاك وهي تواسيني وتصبرني على الي صار غلقت الجهاز ونمت من التعب ما اعرف كم مر من الوقت كعدت على صوت امي
مريم :- ها يمه شكو صاير شي
أم مريم :- صدك يمه !!؟
مريم :- شكو ؟؟
ام مريم :- يعني كل هل صياح الي صار جوه والهوسه وانتِ ما سمعتي شي ابد!!
مريم :- صياح شنو ليــش شصاير
أم مريم :- شصاير !! مو كتها عود بعدين اكولج شصار هسه يريدج ابوج جوه كومي بسرعه ترا عصبي صاير ومحترك دمه
مريم :- يا ستار ياربي شكوو
ام مريم :- كومي كومي هسه عود بـ؏ــدين افهمج
كمت وي امي نزلت كان ابو ملاك وحامد وابوي وهيثم وضرغام كاعدين ومبين من وجوهم انُ سالفه ما تبشر بخير بلعت ريكي ورحت كعدت ب صف بابا واني منزله راسي
أبو مريم :- بويه احنا أخذنا الأكيد من عم علي على موضوع الطلاك هسه ونفس ما ردتي
مريم :- تسلم يابه ما قصرت وياي
نزل والدي راسه ولعب ب سبحه وجمعها كلها ب ايد وحده وذبها على الايد الثانيه ورفع راسه وكال
ابو مريم :- بويه مريم خلي يكون ب علمج انُ ابن عمج كال انو هوه يريدج اله مره وزوجه وانُ اول ما تخلصين عده يعقد عليج بعد انتِ شنو جوابج على هل شي أحــچي ولا تستحين ماكو احد غريب هنا
ما اتفاجئت ابدا على طلب حامد لأن هاي فرصه واجتي اله وهو يريدني
مريم :- احم بويه بلا صغره ب مقدار حامد هو على الراس ينحط من بـ؏ــد موقفه اخر مره وياي واني احترمه واعزه بس اني قبل حامد هم تقدملي وكان جوابي انُ حامد مثل اخوي ما اكدر اعتبره غير شي وجوابي ما تغير راح يبقه هو هوه اليوم وباجر وعكبه حامد اخ من اخ وسند بس غــير شي ما اكدر يعذرني عمي وابن عمي
حامد :- بس اني مو اخوج اني ابن عمج وهذا مو عذر
مريم :- انت تعتبره هيج بس احنا تربينا على انُ احنا إخوان ولد عم ما تربينه على غير شي من صغري واني اعتبرك مثل هيثم وضرغام بس اذا انت كنت تفكر غير شي هذا شي اني ما الي ذنب بي
قاطعني عمي وهو ينهي الكلام
أبو ملاك :-خلص بنتي السالفه اهنا انحجت وهنا انسدت وان شاء الله ربج يعوضج ب الاحسن وحامد يبقه اخوج مثل ما كلتي وابن عمج وسندج موجود وساندج اذا احتاجيتي شي
مريم :- تسلم عمو الله يحفظك الي انت وبابا
صارت عيني بعين حامد يباوعلي ب انكسار نزل راسه وعافه بين ايده كمت اني من مكاني دا اصعد الدرج طلع هوه وبيده سويج سيارته مر من يمي همس
حامد :- ما قصرتي بكليبي بويه ما قصرتي
عافني وطلع صرت اصعد بايه بايه ب تعب مو طبيعي وصلت للغرفه فتحت الباب وكعدت على جربايه سويت مثل حركته راسي بين ايدي وصرت اشهك ب البجي اشهك ب قوه
كلماته هدن حيلي بس مو بيدي ما استاهلك والله ما استاهلك اني بـ؏ــد كل الي سويته وياك كنت اول الناس السانديني وكنت اول الناس الرايديني وكل مره تثبت شكد تحبني بس ما استاهلكك اني تستاهل وحده غيري تحبك وتصونك ب غيابك وب وجودك
ايام مرت واني ميته من ورى كلماته ونظراته الي هدن حيل حيلي رفعت قضيه الطلاق ب المحكمه
من بعد ما تمت الاجرائات اليوم اني واكفه يم القاضي واكفه اكبال أكبر خيبة امل الي كبالي الشي الي خلاني اخسر أجمل أيام عمري خله حياتي وياه خوف وقهر من الي جاي
واكف اكبالي ولا همه الي صار بيه ولا همه الجرح الكبير الي زرعه بيه الي أخذ نص حيلي كاشخ على آخر حبايه
والعطر ترس القاعة والابتسامه مرسومه على شفايفه ولا مهتم ابدا
كانت ابتسامته تعبر شكد كنت اني مخدوعه بي من صدك الشخص
ما يبين معدنه آلا لمن تعاشره
وبين معدن علي اليوم بعد ما كان ذهب لامع وغالي ب نسبه الي صار لا شي ما يسوه دينار واحد
اخر مره تقاتل عليه واليوم ولا كانُ عادي والبرود واضح والفرحه هم خلص مني بـ؏ــد
طلقنه القاضي
طلعنه توجهنا لشيخ حتى نطلق شرعا
دخلنا كان وياي والدي وقاضي
مريم :- شيخ أريد يطلكني ب الثلاثه
بده شيخ يحجي واخيرا نطق آخر كلام بينا
علي :- انتي طالق طالق طالق
غمضت عيوني ب قوه نزلت دمعه من عيني كامت هاي دمعه مو معنى انو انهاريت ولا انكسرت لا كان الها معنى ب خيبة أمل كبيره
على الي عشته ونوهمت بي كانت آخر شي صار ال مريم القديمه
لأن هسه هي انولدت من جديد وكلشي من الماضي انمحه بـ؏ــد
طلعت من الشيخ وبابا حاط ايده على متني ساندني حسيته يريد يوصل رساله انُ اني وياج باباتي ما اعوفج
طلعت من الشيخ واني ذابه ورايه كل ذكره جمعتني بي وكل ضحكه ضحكتها وياه وكل دمعه نزلت علمود خاطره ذابه ورايه كل الاشياء الي سويتها غلط ب الماضي ودفعت ثمنها
خسرت شخص يحبني ويفيدني بروحه وخسرت فرحه صارتلي وكان هذا اكبر ثمن ادفعه على كل شي غلط سويته
بدت أيام جديده الي يوم ورى يوم ورى يوم واني اقوي نفسي اكثر واكثر اسند نفسي اكثر واكثر
اليوم اول يوم إلي اكشخ من كل كلبي افرح من كلبي من بعد ما نصي الثاني السند الي انتجي علي حصلت الي تهوا وصارت
ملك اله وهوه ملك الها اليوم ........
ملاك ....
ثاني يوم كعدت كلي نشاط نزلت جوه ماما دا تتريك كعدت يمها بديت اكل
أم ملاك :- راح ارد خبر الحسن يكول النيار انو انتِ ما تقبلين بي تعتبري مثل اخوج ما اسمع كلمه منج
ملاك :- شنو؟؟ منو كال هذا الحجي بابا قابل واخواني قابلين بـ؏ــد ليــش رفض !؟
أم ملاك :- اني كلته واني المقابله خوش وهاي هي انسدت السالفه وبعد ما تنفتح
ملاك :- على أي أساس تنسد ؟؟؟ واصلاً اني موافقه على نيار بـ؏ــد ليــش ترفضين بدون ما تساليني ؟؟؟
أم ملاك :- اني اعرف مصلحتج والزين الج والمو زين وراح ارفضه وتقبلين ب حمه اختج وهاي هي
ملاك :- بس اني قابله بي واريده النيار مو ب كيفكم تقبلون بلي يعجبكم وترفضون الي ما يعجبكم
أم ملاك :- اكو أمور انتِ ما تعرفيها وملازم تعرفيها ودوخين نفسج بيها ونفس ما كلت الج اني اعرف مصلحتج واعرف الي يفيدج والي لا
ملاك :- اذا قصدج على سالفته وي دانيا ف اني اعرف بيها والغلط كله من بنتج وانت قبلتي وافقتي ب وقتها على كلامها هم ف يعني انت هم مسؤوله عن الي صار
،، واني قابله بي النيار وهاي هي مو ب كيفكم وبكيف ست دانيا امشي اني اني امشي بلي يصرفلي ويعجبني
ما اهتمت الكلامي وتجاهلته كامت بدت تجهز غراض الطبخ فار دمي من هل برود
ملاك :- يمهههه مو دا أحــچي ويااااج
أم ملاك :- اذا تعرفين ب كل الموضوع بعد ليش دا تعبين نفسج وتحجين هاهيه انجبي وما اريد اسمع منج كلمه ثانيه
وخليها ب اذنج اني ما انطيج الشخص كان يريد اختج واختج لعبت علي وخدعته صح الي سوته غلط بس بعد صار الي صار
واني اخاف عليج ما انطيج اله عود وإني احجي وي حسن اخلي يرفض ويسد الموضوع بينه وبين حسن وهنا حجينه وهنا طمرنه خووووووش ملااااك
كالت اسمي ب حده حتى توصل الي انُ هاي هي انتهى النقاش حجيت ب توتر واني ابلعم
ملاك :- بس نيار يحبني وإني احبه واريده وهوه هم يريدني
اندارت امي وصار وجهه كبالي تباوعلي ب تركيز مخيف كان بيدها خاشوكه طبخ خشب اجتي تقربت عليه وهي اتاشر ب الخاشوكه
أم ملاك :- شكلتي شكلتي ست ملاك ما سمعت
ملاك :- ااا اا يمه ااحبه
ضربتني على زندي ب قوه ب الخاشوكه طفرت من قوه ضربه بدون وعي واني الزم زندي
أم ملاك :- شنو تحبي ولج كلبه شلون هيج تحجيها ب كل وكاحهههه لج ملااااك تتمعشكين من ورانا اني وابوج واخوانج هاا ولججججج والله مو صوجج صوجي اني الما ربيتج عدل لــچ كللللبه اني تحجيها كدامي ب كل عرامه اني توكفين ب وجهي مخربج هل سرسري وجايه تتوكحين يمي
تحجي وهي تضرب بيه ب قوه كانت الخاشوكه خشب اصلي قويه وضربتها تفرفح الكلب من الوجع صعدت ركض للغرفه اجتي ورايه وهي عيونها تطاير شرار فتحت الباب ب ركعه وهي اتاشر عليه
أم ملاك :-وين تليفونج وينننننه
ملاك :- هى هى هذا هذاا
أم ملاك :- انطيني ياااه انطيني يااااه لــچ كلبه انطيني ياه
ملاك :-هذا هاج
أم ملاك :-اكعدي اهنا واذا شفتج طلعتي من هل غرفه رجليج اكسرهن فهمتييييي لو لا واذا لعبتي وياي والله ثم والله يا ملاك ما يطلع عليج الصبح ادفنج ب الكبر واخلص منننج
وشوفي راح اكول الحسن انو انتِ رفضتي والله ثم الله إذا فتحتي حلكج وروح ابويه افركه الج فرك واكسر الج واكص هل لسان الطولان واشوفج شي بعمرج ما شفتي
وروح ابويههه لــچ ملاااااك جري عدل لا والله اذبحج ب ايدددددي فااااهمه اذبحج ب ايدي
عافتني ونزلت كعدت ابجي مفرفحه مدري على الوجع مدري على كلامه مدري على شنو دانيا ورايه ورايه ما تريده
تريد حماها وتزن ب راس امي ليل مع نهار على حماها زين واني شنو ذنبي ب كل الي صار وامي شبيهاااا متخبله وما تريده وهي 24 ساعه تصيح ابني واعز ابني واعز هسه صار ما يشرفها ومو زين
بقيت ب أفراشي ابجي سمعت صوت حسن اجا من دوامه خفت لا تجي تحجي وياه وربي ينهدم كل شي
اني اريده اني اريده اول حب الي هذا اول اعجاب اول كلمه احبج اريده ما اكدر ابتعد عنه ما اكدر اصير الغيره ساكني محتلني غصب عني وعن عقلي محتل كل جزء بيه
وما اكدر اقاومه وابتعد ما اكدر منى تحجي وتنصح دومها تكول كان يحب اختج شلون تقبليها اكولها ما اله ذنب ذنب ذنب دانيا وامي الي قبلت وسكتت على الوضع
امي الي اول ما جابت دانيا عافتها ب حضنه وهمه يصيحون هاي مرتك هاي زوجتك حبها مو بيده وانطعن منها بس بعدين حبني هسه هوه يريدني الي يحبني الي كدر انُ يحبني
بدون وعي كعدت اخطط وافكر ما اسمح الهم انُ يرفضون ما اسمح نزل حسن يتغده ورجع صعد دخل الغرفته مسحت ادموعي عدلت نفسي ورتبها
ورحت بسرعه دكيت الباب مال غرفته قبل لا تجي امي ادري بيها ما حجت شي وياه بعدها لان ابويه كاعد
حسن :- ادخل
ملاك :- حسوني عندك رصيد حبيبي
حسن :- ليش محتاجه شي ؟
ملاك :- مو ما عندي رصيد وصديقتي منى مخلص الاشتراك وعندي وياها موضوع ضروري كلللش مو مال انتظر شوكت يشتركون فانطيني ثواني وارجعه الك والله
حسن :- هسه احول الج رصيد ثواني ملوكه
ملاك :- هاا لا لا
حسن :- شنو لا ؟!
ملاك :- مو مو اني مداينه من شركه فاول ما تحول راح يأخذو للرصيد ف عليمن انطيني منك اخابرها ثواني وارجعه والله ترا لا تخاف منى ما راح تزحفلك ههههه (حجيتها ب ضحك حتى اضيع ارتباكي )
حسن :-ههههه تهاج هاج أخذي ولمن تكملين عوفي على شحن راح انام اني عود ب 6 كعديني خوش
ملاك :- ماشي حبيبي
طلعت من غرفه ركضت على غرفتي قفلت الباب واني كلبي يدك سريع دكاته عاليه واحسها تنسمع رحت على جهات الاتصال كتبت اسمه ماكو ما لكيته ما اعرف رحت على فايبر كعدت ادور على صورته لكيته كاتب علي أبن الخال
رحت على جهات الاتصال ودكيت علي بسرعه واني كل جزء بيه يرجف من الخوف خاف تجي امي وتشوفني
نيار :- ها ولك كواد شتريد مني هستوني عفتك
ملاك :- هاي اني ملاك نيار ( حجيتها وبجيت )
نيار :- شكو ملاك شبيج هدي حبيبتي هدي فهميني شصاير ليش داكه من حسن مو من تليفونج بيج شي خرررب ملاك هدي خل افهم شي منج
صرت ابجي ب قوه وهوه يحاول يهديني حتى يفتهم شي مني
نيار :- بزونتي يروحي انتِ بس هدي وفهميني شبيج مو فطرتي كلبي ب بجيج هذا واني ما فاهم شي
ملاك :- امي امي ما تقبل بيك ولا تقبل تنطيني الك كالت راح احجي وي حسن اكوله انُ ملاك ما تريد نيار تكول مثل اخويه وتعاركت وياي وضربتني وأخذت تليفوني وهسه من يكعد حسن تحجي وياه ( أحــچي وابجي )
نيار :- شوكت صار كل هذا اشو البارحه ماكو شي وكانت ساكته ومبين راضيه ؟؟؟!!!!!
ملاك :- الصبح وحتى ضربتني فدووه هسه شنو مراح تقبل وراح تسد الموضوع من يمها تكول ما انطي الواحد كان يحب اختج
نيار :- خرب بيج دانيا حتى هنااااا ما تخليني اتهنه
صار يغلط ويصيح سكت ثواني وهوه ياخذ نفس قوي تغيرت نبرت صوته من عصبيه النبره هادئه وبيها حنيه وكال
بزونتي هدي وامسح دموعج والحل يمي غصب ما على الكل تصيرين الي خوش بزونتي ما اعوفج وحق علي تمام هسه انت هدي وروحي غسلي وارتاحي رجعي التليفون وإني احلها خليها عليه ولا تهتمين انتِ خوش حبيبتي
ملاك :- ماشي
سديت الخط من عنده ورجعت التليفون الحسن بعد ما مسحت المكالمه من السجل
رجعت وإني افكر شلون راح يحلها اني ما سالته يربي هسه شراح يسوي هذا بس لا يسويلي مصيبه خرب بيج ملاك دومج من توصل سالفه يمج عقاج يوكف وما تفكرين ويم غيرج عشره على عشره تفتحين وتفكرين خرررب
ازداد بجي واني كل سالفه مو زينه تجمعت ب راسي من بعد تعب البجي
غفيت بدون ما أحس على نفسي فزيت على امي وهي تنتر بيه
أم ملاك :- كومي يل مسعده كومي بيت خالج جوه كومي واني اعلمج كووومي
كمت من أفراشي وإني ما مستوعبه كلامها سحبتني من زندي عتتني عت واني عيوني كوه فاتحتهن لان مورمات
أم ملاك :- والله ثم والله اذا سالوج وكلتي موافقه لا أكون اني امج ولا انتِ بنتي فهمتي لــوو لا كتلج ما يرهملج هاي هي سدي الموضوع
ملاك :- ليش يمه هيج تحجين ليــش لان كتلج احبه ودانيا من كالت فرحتي ومشيتي وياها وعلى هواها واني من وصلت يمي صار حرام وتتبرين مني !!؟
أم ملاك :- كتلج اني اعرف مصلحتج ملااااك
ملاك :- بس اني احبه احبه احبه والله
ما حجت شي عافت ايدي ونزلت ومشيت نزلت وراها توجهت للحمام جوه غسلت
وجهي عدلت شعري ورتبته ورحت لل استقبال كان بابا وامي هم موجوده كاعده بصف ابويه وحسن ونيار وخالي ومرت خالي
سلمت عليهم ب توتر وخوف
أبو نيار :- تعالي بنيتي اكعدي يمي تعالي يبعد خالج شكد مشتاقلج
رحت كعدت يم خالو
أبو نيار :- هاي شبيهم عيونج حمر ومورمات بنيتي احد غاثج ب حجايه كليلي حتى هنا اموته الج اني هاي العيون ما يهون عليه يبجن يبعد خالج
ملاك :- ها لا مو جنت نايمه خالو فهيج يصيرن من انام
أبو نيار :- نوم العوافي يبعد خالج نامي ارتاحي
ملاك :- تسلم خالو
أبو نيار :- احم أي أبو حسن اني عندي منك طلب واتمنا ما تردني
أبو ملاك :- آفا عليك أبو نيار من شوكت إني راد طلب الك اذا اكدر علي بعيوني تأخذه وما اردك
أبو نيار :- أبو حسن يمكن عندك علم ب طلبنه بس اني اليوم اجيتك وكلي عشم بيك وما رايد انتظر بعد
لان شرف الي انُ اناسبكم اني أريد منك ورده والي هي ملاك واغلى ورده هاي عندي وعندك الفلاحها نيار وهو ابنك وربه بين ايدك اكثر مما ربه عندي
وان شاء الله هاي الورده ب عون إلله ما راح تشوفها بيوم ذبلانه لو فلاحها معذبها ما دام اني اشم الهوه وما يحتاج احمدلك على نيار لأن ابني لا هوه ابنك وانت أ؏ــرف بي وانتو تعرفونه واحنا اهل واتمنا ما تردونه
أبو ملاك :- نيار يشهد الله عليه ابني الثالث وبمعزت حسن وحامد
بس انت تعرف يخوي كلشي قسمه ونصيب اذا على رئي مالي اني موافق
وين الكه مثل نيار بس الرئي الأول والأخير الصاحبه الشأن هي الها الكلمه
ابو نيار :- بنيتي ملاك انتِ شنو رئيج
ملاك :- خالو اني
قاطعتني امي
أم ملاك :- خويه ملاك ما
أبو نيار :- لا خيتي ولو اقاطعج بس انريد نسمع الجواب من ملوكه احسن نفس ما كال ابو حسن رئي الها
ملاك :- خالو الي تشوفو مناسب اني قابله بي
كلتها ورفعت راسي نيار كاعد ب جهه المقابيلي بسرعه ظهرت ابتسامته الي نرسمت على وجهه وعيونه تضحك الي أصابعه دا تحرك ب شاربه
كاعد بكل ثقه صار عيوني ب عيونه هي الي عبرت عن كل الي
ب داخلي هي الي حجت اله عن الليالي الي عشتها ب دونه
عن كل الي صار بيه من تصرفاته الي كانت تعبر عن العصبيه والغضب الي ب داخله الي ب داخله
أم ملاك :- خويه عيوني ليش ما تنوطوها وقت نفكر بي وهي تفكر لان بعدها ما مفكره
أبو نيار :- ليش خويه ترا ملاك مو صغيره بنيه جبيره سنه ثانيه جامعه واحنا ما غاصبيها على شي وهي واعيه على الي دا نحجي بس شنو خاف ما تريدين تناسبين اخوج ها خيتي
حجاها ب ضحكه وحرج امي الي ما تكدر ترفض وتخسر اخوها
أم ملاك :- لا شنو هل حجي وين نلكه احسن منكم خويه
أبو نيار :- يلا لعد نقرأ الفاتحه ما دام مجتمعين وخل الفرحه تكمل لــوو شتكول ابو حسن
أبو ملاك "- أي ليش لا خويه
ب هاي الأثناء انفتح الباب ودخل حامد كان هسه نازل من دوامه جنطته ب ايده شافانه وذباها ب الكاع
اجا دخل لل استقبال وحجه
حامد :-يا ستار شعدكم مجتمعين بس لا صايره مصيبه ترا حيلي مهدود والزهره
نيار :- تسكت اسكت بعدك ما مفتهم أي شي وكلت مصيبه
ام نيار :- فال الله ولا فالك ابني كول يا الله
حامد :- ونعم بالله خالتي بس شنو فهموني شصاير هنا اجتماع سري معلن عائلي وطني فهموني
حسن :- حامد نيار طلب ملاك وقبلنه وراح نقرأ الفاتحه خويه اطمن ماكو شي
حامد :- على اي اساس يقره فاتحه هل هتلي ومنو كال اني اقبل انُ ملاك تصير النيار هوه احنا من غير شي نيار مزروع هنا واكف ابلعومي انوب يصير زوج اختي لا هاهيه ربحنا لا عيني ما ننطي مره لا شوفلك نسابه غيرنه
نيار :- لو ما اني العريس جان عرفت شنو احجي وياك واسكتك بس هسه عيب احتراما العمي وهم لا تنسه خياسك كله يمي
حامد :- شوفو يابه خالي شفت خوب ب يعينك بعده ما عاقد عليها وهددني علني لعد لو يزوجون شلون يعدمني كدامكم اكيد لا عيوني لا ما نتورط بيك
نيار :- تمشي لك اخذها اخذها غصب ما عليك
حامد :- اذا تعزمني عزيمه تسوه افكر
نيار :- صدق الله العظيم لا اعزمك ولا شي قريت اني الفاتحه وخلصت ما دخلني بلي ما لحك يقراها المهم اني قريتها المره صارت الي
حامد :- استغفر الله حتى الفاتحه لمضها علينه لا عيوني انت مو خوش نسيب ما ننطيك
الكل صار يضحك وهمه يتشاقون
بعد مرور أسبوعين ...
كاعده بغرفه امي منكعه رجلي ب مي بي ياس ورد احمر وأيدي على القرآن مفتوح على سوره الفتح وبين أصابع أيدي حاطين هيل
وعلى راسي وشاح ابيض كنت لابسه فستان ابيض مال عقد
نيار كاعد ب صفي وشيخ اكبالي دا يقرأ ايات مال عقد
الشيخ :- بنتي هل تقبلين الزواج من نيار ب مهر مقدمه ***** وموخره*****
ملاك :- نعم قبلت
للقصه تكمله .....
#الكاتبه فاطمه حمود
لا تنسون النجمة ⭐ وآرائكم ب تعليق