بارت الحادي عشر
#انين_الرووح
ريا ..اسمعي نور
هذا الكلام الراح اكوله ماريد تنطقين بي كدام حتى نفسج بالمرايه
مجرد راح احجي هسه الج من انكوم كله اريدج تنسي واذا اسمعت فديوم انتي معيره رشا بي صدكي انسه صداقتنه وتعامل وياج غير معامله
هاي شبيج ريا شو كلامج احسه تهديد الي صدك خوفني شنو هالحجي هذا تره اني اليسرني بحجايه اظل العمر كله شايلتها بكلبي ويمكن انتي جربتيني بهالشي لو اني غلطانه من جحتيلي ع خطيبج واني عندج علاقه بواحد بالكليه تره ما اعير بس احب اذكر
كافي كافي يمعوده ليروح زوجي يسمعج
نور لاتهديد ولا شي بس الحذر واجب بالاخص ابموضوع رشا
لان هي ابسبب هالموضوع عدها عقده نفسيه
اوك احجي وعد مني الشي الراح اعرفه ما اجيب بي طاري مع اي بشر
حتى ويه روحي ما احجي
من جانت رشا صغيره تقريب عمرها
٦ سنوات صف اول ابتدائي اتعرضت الحادث والسبب جان محمد
وشنو هالحادث قصدج حادث سير
لا رشا عينها اليمين مشوها مشوف بيها يعني عوره
محمد بدون قصد شوه عينها وصارت عوره
شنوووووو ....؟
اي خلي اكملج السالفه
هي جانت مطلعه دفترها تكتب دار دور تتعلم لان عدهم واجب
امي جانت كاعده اتعلمها
من فات محمد للبيت صاحته امي حتى يكعد يم رشا بين ما امي اتكوم اشوف الجدر عالنار وتصبنه غده
امي كامت وهو اجه يركض الرشا يريد يبوسها ويشيلها لان جانت حلوه دبدوبه وخدودها حمر وصاحبه اللسان
اني جنت احضر السفره ويه امي
من اجه يركض وحضنها هي صرخت صرخه اله اتموت وع حسها كلنه شهكنه
اجينه كلنه نركض ع حسها
شفنه محمد واكف مصدوم ورشا عيونها تنزف دم ويطفر بكل مكان
ابويه راح لمحمد يسئله وهوه عصبي وامي ادك وتلطم
ومحمد ميححي عبالك اخرس
ورشا تصرخ وتبجي وتكمز ابمكانها
كام ابويه رفع يدها من عينها والدم صار طشار ابساع شالها اخذها كبل وراح هو وامي للمستشفى اباوع ع محمد جامد ابمكانه وشفت بنطرونه اتنكع عرفت بال ع حاله محجيت شي لان خفت عليه عفته ورحت لميت الماعين وكتله تعال اتغده
هو مجاوبني عافني ودخل للحمام وره ساعه طلع بس عيونه طماطه وخدوده كلها املخها خراميش
عبالك بزون ومخرمشه وجهه عرفت هو اذه حاله بالحمام ما سئلته عفته لان الموقف صعب واكيد هو حاس بالذنب والخوف
الوصع مجهول منعرف شنو صار برشا وليش اهلنه تاخرو هيج بالمستشفى صارلهم بالساعتين تلاثه
من رجعوا اهلي صدمونه بالخبر وصدمتنه الاكبر من شفنه عيون رشا مربوطه
وهناك اهلي انصدموا بحجي الدكتور
خطيه اثناء ما محمد حاضنها ميدري فايت القلم بعينها ومكسوره النباله بداخل البؤبؤ وخابط عدها الاسود والابيض
لا لا لا ريا شنو هالحجي عفيه يمه عزه هاي شلون فاجعه شلون اتحملت الوجع خطيه
مو كتلج ابوكتها اعياطها جاب الجيران كلهم علينه
اهلي بهذاك الوكت ماعدهم فلوس يسولها عمليه
لان مكلفه حيل
والدكتور نصح والدي من تكبر تسويها لان هسه عمرها ميتحمل بنج قوي والعمليه اطول بالساعات
لان متضرره العين حيل
بس رغم هذا كله ابويه معافها ظل يراجع بيها الدكتور
حتى نشوف وين وصلت حالتها
بالبدايه جانت تشوف بيها قليل وبعد فتره بده نظرها يقل اكثر واكثر
الحد ما فقدت بصرها بيها نهائيا صارت عميه بتك عين اتباوع
وظلت عينها البؤبؤ مشوه ومنظره مخيف لان خابط السواد بالبياض
الدكتور كال الابويه يزرعولها عيون جامه بس مكلفه وبالعراق مو مضمونه هالعمليه
لان جانت بدايه حرب وسقوط واكثر الاطباء طلعت خارج العراق
ف والدي رفض يسويها كال خل تكبر ودبر فلوسها وطلعها بره اسويلها عمليه
بس الدكتور انطاه عدسه طبيه متنزعها ابدا بس من اتنام او تتعرض لسشوار او اي حراره اتكون قريبه حيل ع عينها
وهاي صارلها كم سنه لابسه العدسه ليل مع انهار وكل شهر او اكثر تشتري وحده جديده بنفس الون
حتى العالم عبالهم هاي لون عيونها الحقيقي
حتى كرايبنه لان ابد متنزعها
كل هذا المرت بي رشا محد دره بي من كرايبنه لان ابوي كال لحد يحجي بالموضوع والبنيه اتصير بيها حاله نفسيه وتتعقد وتكره نفسها
هذا قضاء ربج وقدره اتكون هالطفله ابتك عين
وعاد ظل محمد ياكل بروحه لان هو الوحيد الحاس بالذنب
وصار هو عينها الثانيه
كل طلعتها كعدتها دراستها مشوارها هو وياها يسوي
صار مثل ظلها ابكل مكان
حتى من جانت صغيره اتنام يمه عالسرير
الحد قبل سنتين يله عزلت نومتها بغرفتها
عرفتي ليش رشا اضوج منج لان حست انتي اخذتي محمد منها
وهو كان كلشي بالنسبه الها
مو دائما تسمعين محمد يصيحلها عيوني
وهي تكله نظرها
هاي عرفتي سر العدسات وسر عشق محمد الاخته رشا
الاحساس بالذنب يكتل كتل يانور
ومحمد هيج حاس ضميره جاي يكتله كل ما يشوف رشا
ويتمنى يسويلها عمليه ويرتاح
والله صدمتيني يا ريا فعلا مجنت اتوقع اسمع هالكلام المؤلم
اووووف شلون جانت متحمله خطيه
بس صدكي اني مشايفه العدسات ولا شايلتهم
اعرف نور هي جانت ناسيه وين خالتهن وبعدين لكتهن
بس تهمتني بالسرقه
اي انفعلت لان مالكتها كدامها ف اصورت انتي شايلتها
بس هي اتندمت من لكت مكانها وتهمتج بالسرقه
ومثل ما وصيتج نور انتي هسه عرفتي ف لجيبين طاري لحد وبعد تسئلين ع موضوع العدسه فهمتي
اي صار
يله عيني خلي نروح هم يله نلحك نوصل بيتنه
ليش متباتين يمنه شعندج
لاحبي باجر دوام زوجي عنده خطيه
اوك ع راحتج
راحت ريا وزوجها
فكرت ادخل ع رشا اشوفها هم خطيه اكيد نفسيتها تعبانه وتعذر منها لان كنت دائما اضلمها في ظني بيها
فعلا ان بعض الظن اثم
استغفر الله ربي واتوب اليه
دكيت الباب وصحت رشا كاعده
شرايده مني
محتاجه احجي وياج
روحي ماريد اشوف احد وبالاخص انتي ماريد اشوفج
رشا اسمعيني لحظه وحده
كتلج ماريد اسمع ولا اشوف احد متفهمين انتي
امشي منا
صحت رشا وفتحت الباب بهدوء
وهي عاطت بيه وبصوت عالي امشششششششي دا اكلج
رجعت خطواتي بخيبه امل جنت اتمنى اكعد وياها واحجي وشيل من المها اشويه
جنت اتمنى احسسها بأن اني مثل اختها واشيل همها مهما يكن بس هي رفضتني ورفضت تسمعني
عفتها وكعدت بالاستقبال فتحت تلفوني ع الرايو
اكو اذاعه اعشقها اطلع فقرات حلوه شعر واغاني قديمه حلوه اسمها اور FM
اوووف وطلعت اغنيه قديم اسمعا يانبعه الريحان حني ع الولهان
ظليت ادندن وياها وسرحت بخيالي الملهم
الله كلام ولا اروع
وسرحت بالكلام وتهت بي
وذكرت سالفه رشا
يعني صارلي ست اشهور يمكم وصرت منكم وبيكم ومجنت
اعرف بأن رشا عدها الم قديم وتعاني منه
شكد لعد كارهين وجودي يمهم الي حتى ميقبلون اشاركهم افراحهم وحزانهم
ست شهور واني غريبه عدكم
الله شكد اشتاقيت الاهلي الماما بابا سيف زيد
معقوله ما امر ع بالكم معقوله مشتاقيتوا الي
انتي ياماما موجنتي الي مو بس ام
جنت امي واختي وصديقتي وحبيبتي ليش نسيتيني ماما
اتمنى احجي وياكم هسه وعرف اخباركم وضم راسي بحضنكم وشتم عطركم
وصيح افيييييييش ياريحه هلي وحبابي
افيييش ياريحه امي وابويه واخوتي
تعالوا ضموني الكم حوطوني بذراعكم
اني مثل شجره صحاري ومحتاجه ظلكم
عيني بالشوك تكتب الكم وعيونكم بالصمت تقره الرساله
فأن مررت بين حروفي المبعثرة
القي السلام على قلبي
فالحرف ان كان صادق
يعادل ألف للقاء
والله يا اهلي حيل مشتاكه الكم وروحي مثل الطير مكسور اجناح ويرفرف ابمكانه بس يريد يوصللكم ويعرف اخباركم
بس شلون اوصللكم وشلون ومنين اجيب ارقامكم
بس لا لازم احجي ويه محمد اكله اني اريد اشوفكم كافي صار ست اشهور مبتعده عنكم
كافي فراك
رحت الغرفتي دخلت شفت محمد نايم
ضجت حيل
يعني ميصير هيج
اشوكت راح اتحس بيه
كل ما ادخل لو رشا يمك لو نايم
حتى شعور الزوجه ابسببك فقدته
سويت المنبه ع ساعه ثنتين لان محمد عنده علاج كل ست ساعات
اباوع عليه واجر حصره بظهر حصره
لشوكت هذا الجفاء
انطيته العلاج ورجعنه نمنه من غير اي كلمه طلعت منه اثنينه
صبحنه الصبح واخذنا للعلاج اني وعمي
عمتي مجتي ويانه لان ظهرها يوجعها وتعذرت
الحمدلله الدكتور بشرنه خير وكال لمحمد يكدر يمشي ع رجله بس ليضغط عليها هواي ولازم يمشي بحجله القدم وابد ميسوي اي حركه غير ممارسه المشي
واني هواي نبهني الدكتور ع حركات رجليه ولازم ابكل هدوء يحركها
لان هو مو بس رجله مكسره حتى الحوض وكل حركه يكوم بيها لازم يحسب احساب للحوض حتى ميندم بعدين
وظلينه ع هالحال يمشي بس ع كد دخوله للحمام واي حركه بعدها ميسوي يظل امدد ع سريره
ويتابع تلفزيون ويظل يطلب مني جاي ماي جكاير ودي جيبي
ماكو غير شي حتى كلمه شكرا منه ماكو
يمه صح هدوء
ومن اطلع من غرفتي تبدي رحمه الله ويه عمتي وحماتي رشا
رشا ..وينج اليوم ست الحسن شو مالج خبر
نور ..جنت ويه اخوج بالعلاج اليوم موعده
يله خليني ويه اخويه وحدنه ولظلين كل اشويه داخله تسمعين علينه
رشا ...!
اسمعي ماريد اسمع اسمي بلسانج
لعد شكلج ست رشا
لجيبين طاري اسمي دا اكلج
عافتني ودخلت غرفتي وطبكت الباب بقوه وراها
هزيت ايدي والله يا الله هم نزل وهم يدبج عالسطح
تدخل غرفتي وتستخدم غراضي ولازم ما احجي اني شي والله هالناس غريبه بس هم ميخالف الج الله يانور
عمتي ..صخمانه وينج
هااا عمه
اشو رحتي مارجعتي
عمه محمد رادني احضرله الفراش
اي غصبن عليج اتحضري
ميحتاج غصب عمه
هو زوجي واجبي اخذمه
اكلج صار سنه من تزوجتوا شو انتي ماغيرتي من اسلوبج الوكح
اسمعي اني ابني حلو والف وحده تتمناه
اي عمه شنو قصدج
اذا متردين اتخلفين منه الف وحده ازوجه من عين باجر ولبش الف وحده اشو بنت اختي موجوده حلوه وحبابه ومطيعه صدقه لسمها
عمه ...!😲😲😲
عمه العماج ..دا اكلج اريد اشوف خلفته وانتي صار سنه ماحبلتي
عمه هو غير يتزو ...!😠😠
محمد ..نور ...نور
اي جيت
هاااااااا
وسماه وين غداج
حاضر حجيبه بس امك جانت تحجي ويايه
لتكولين امك حيوانه
لعد شكول ..اشو اليوم الكل كالب ع اسمه لتكولين ولتحجين تره فعلا طفرت روحي منك ومن كل شي بالدنيا
يا ابن الناس افهم تره الحياه والحب مو بس كلام تره
الإحتواء والحب نملكه بكلوبنه مو باموالنه !
والإبتسامة تطلع من ارواحنه مو من اجيوبنه
والدفء العائلي يحتاج الى لمسة عطف وحنان مو بطاقة ائتمان
الذكريات الجميلة نحفظها بقلوبنه مو متاحة لجميع
أكثر الأشياء الجميله ليس لها ثمن فالجمال بما زرعنا من قيم وحب وفرح وامل في قلوب اناسنا واحبابنا يامحمد
.....
ياريت وصلك الشي الاريد اوصله الك
كافي افهمت هالخرابيط روحي خلي الغده تره سطرتيني بكلامج الفارغ وشمر عليه اكلاص المي ونجب عليه والكلاص اتكسر وبعيطه
رشا روحي انتي خلي الغده ماريد اكل من ايدها شي
ميحتاج لتكومين رشا اصلا اني طالعه وبعد ما ارجع ادخل للغرفه لان هي من اساسها مو غرفتي غرفت محمد وغرفتج
واني مجرد جرجوبه او غرض من اثاث هالغرفه
طلعت ودموعي عالخدر تجري جريان
عندي انكتل بنعال
ولا اسمع كلام مسموم من احد
عالاقل الضرب ميحفر اثر بالجسم
بس الكلام يسوي حفر عميقه يالكلب اووووووف يامراره كلبي وحياتي اي من اولها هيج اوووووف شكد عاندت وشكد اتواكحت ويه اهلي
ليش مسمعت كلمتهم ليش ما مشيت وره ابويه واخوتي
ليش عاندت الكل حتى اشتري كلب مو الي مجرد جنت ضحكه اله بس لا هو جان يحبني فعلا وضحه من اجلي واكيد عاند اهله علمودي لا ما اصدك محمد يكرهني لا ما اصدك ولا راح اصدك
"شخص مثلي، لن يفلت يده إلا عندما يتفتت قلبه من المحاولة.
رحت للمطبخ ومريت ع خرفه الاستقبال اسمعت صوت ركزت حيل عالصوت
هي هاي الجبتيها لخوج يالعويه وتكليلي يمه تنفعه راح تخلي اخوي فوك النخل راح يكون من اهل الفلوس والثروه
جا وين كلامج لا فلوس ولا شغل ولا عمل
النوب ازوجت ابني سكطته عمت عيني وكعدته اكبالها
لا وكل هذا ما تريد تخلف منه وجيب طفل يملي عليه ضوجته من هالكعده المكسرته الكسيفه
عمت عينج ع هالاختيار ياريا قلن بنات الجامعه جبتي هاي وجيتي
يمه اني شمدرين اهلها يطلعون اجلاب هيج ويتبرون منها هي صح متنجرع ومتنحب بس اني هم جنت مستفاده منها بالجامعه هم جان اكلي عليها اغلب كراساتي وملازمي عليها شسويله لخويه اذا ما عرف يغير من طبعها النكس
عبالي زواجها بي مصلحه لخويه تلكاله شغله زين او يشتغل ويه اخوتها او ابوها يلكاله تعين زين
اني لو ادري بيها هيج فكر وتكسح النعمه فلا اخلي اخويه يزوجها قابل قحطن البنات بس كلت فيد وستفسد
بس اااااخ من اهلها الجلاب ابساع اتبرو منها الله لا يوفقهم
الام ..النوب صار سنه محد دك ولا سئل عليها جنهم ما مصدكين زوجوها ولج خاف بتهم معيوبه وشمروها ع ابني
لا يمه شنو هالحجي البنيه شريفه وحبابه بس هي جامده ومتنحب بسهوله وطبعها متعب
بس هم يجي يوم ونحصل ع فلوسها خوما ابوها يعمر لازم يجي يوم ويموت
واكيد هي لازم اتحصل ورث من ابوها هذيج الساعه ناخذ افلوسها ونفتح مشروع لمحمد وهو بعد ابكيفه يريد يبقيها يطلكها
الام ..اي اي يطلكها اني ماريدها ما اطيقها ما احبها ياناس
يمه هذا امر راجع لمحمد مالنه دخل احنه بي كل العلينه هسه انخليها يمنه ولازم تتحمل محمد عالاقل هي قايمه بواجبه منو اله خلك لمحمد اني مزوجه
ورشا تك عين ورنا طالبه وصغيره وانتي ماشالله شايله امراض الدنيا كلها
عالاقل اكو اليخدمه بنومته كعدته غسلته اكله حمامه
يمه حمدي ربج ع نور لو غيرها مزوجه محمد وصاير بي هالحادث وسنه نايم بالفراش صدكي مطول يمه شهر وتطلك
عزه بعيني هاي لو اني صاير هالشي ويه زوجي صدكي ما ابقه اسبوع شنو اني ازوج رجال لو ازوج مستشفى وعلاجات والنوب متكسر ومابي نفعه
يمه يمكن نور بعدها عذراء شتكولين انتي
الام ..انجبي شنو عذراء سنه مزوجه وتكولين عذراء
اي يوم هو من اول يوم وتكسر حتى ملحك بسوي شي والهذا يومه نايم بالفراش
انجبي انجبي اكرمينه سكوتج
محمد كام ومشه بس الدكتور كله لا تتعب حالك لان بعد كسوره مو كلها ملتحمه بالاخص حوضك
اي يوم الحوض بعده واكو عظمه متهشنه محتاجه عظم حتى تكتمل اكيد يخاف ع حاله ومسوه وياها شي
خايبه ريا خليتي هالشي براسي ولج اني صدك فايتتني هالشغله لا لازم اشوف نور وسئلها وعرف هي مره لو بعدها ابنيه
نور ..نصدمت من اسمعت كلام ريا وعمتي هيج يحجون عليه
تاليها هسه اكتشفت حب محمد كذب وجان علمود مصلحته وبس
جان يريد مني ارفعه من الطهاره للمناره هيج جان حبه الي مجرد فلوس ويعرف شلون يستفاد من اهلي
اووووف والله جان والدي حاس بهالشي بس مااعندني اني موت الكرفني
استاهل كلشي يصير بيه
واكف وره الباب وبأذني اسمعت كلشي
لا تحلف اترجاك لتكلي ماكلت شي
كتلهم اريد انساه ما اريد اظل وياه
انه اسمعه دمي يفور والدمعه بطرف رمشي
اعذرك بعد ما اكدر غدرك واضح امبين جرحك يا اعز الناس كلش صعب مو هين
صدك متريدني انت حناني والوفه بعته
بعد لتكلي اسف لا اعذارك بعد ما تمشي
جنت اتكلي احبك موت ليش اتكلي ماحبك
زين احجيلي انه اشبيك رايح تحجي للغربه
انت لو مصارحني ابد ما جان جارحني
لتكلي اسف للللللا عذرك بعد مايمشي
اعذرك بعد ما اكدر غدرك واضح امبين
ونفتح الباب وصارت عمتي بوجهي
يتبع