#في ثورة حبك

مشهد من روايه جديده😍

اهلا احبتي مشهدان من رواياتي القادمه بإذن لله...

مشهد اول👇👇👇👇👇👇👇👇👇👇

جنت كاعده علئ المصطبه بالسنتر تقريبا الساعه بالوحده ونص واني منتظره صديقاتي يطلعون وحده بالمحاضره والثانيه ويه الكبل مالتها...

شفته وكف بباب الجامعه قريب من باب الخروج حسيت كلبي انعصر حيطلع الكلب السافل الحقير...

كرهته حييل لو يموت ما ارجعله...

باوعتله من بعيد واني شويه نضري ضعيف صح اشوفه بس محجوب شويه عندي...

شفته لابس بنطرون جوزي وتشيريت بيجي وكف بصف صديقه وضل يدخن ويسولف وياه...

طلعت موبايلي بعصبيه من جنطتي وحطيت السماعات واني اسوي نفسي ممهتمه اله

شغلت اغنية كارول سماحه خليك بحالك خليني بحالي ائتلك احسن كرمالك يمكن لو تبعد اشتئلك

وهو بعده واكف ويدخن ويسولف واني مشتعله نار مثل الجكاره...ليش اجه صارحني ليش وهمني بحبه زين هسه شنو علئ شنو احنه تعاركنه اصلا

كلت بكلبي امداني هسه شنو اني قاهره نفسي علئ هل عار اني قويه وما اهتم اله صارت مصايب ما كسرتني عاد مو هذا يكسرني...

طلعت ساجده عبيد يميين يسااار يميين يسااار فوووك تحت...وضلت تغني تحمست اجيت اركص بنص السنتر بس صبرت روحي وساجده عبيد ويه اغانيها نسيت ابو حبيبي

وصلت المقطع دكول...اريد احجي علئ جويسم ابو الغيره شراب العرك وبطالة البيره...

ابتسمت بهدوء لو حابه جويسم ولا محمد الحقير العار اكررررررهك...

شفت صديقه تقرب مني واني بسرعه طفيت موبايلي وكف يم ولد وضل يسولف وياه

وبعدها اجه حبيبي عشتو وكف بصفهم وضل يحجي وياهم ويضحك وهمه بس،يسولفون علئ البنات

ومحمد العار مسوي روحه شريف ويضحك يكولهم ...يابه فضحتونه طلعتو زواحف...

عقدت حواجبي واني كوه مصبره نفسي ..لا والله مسوي مو زاحف لعد منو زحفلي منا لمن العميد كله بس بس هههه حقير

امداني مسميته كلاص قشطه هو هذا مال قشطه ..بس هو صح حلووو وحلوو حييل شكله مينوصف عيون خضر وشعر اصفر الله مبدع بخلقه ومنطي كووولشي حتئ،غمازه...

بس حرامات ما عنده اخلاااق...

حسيت تشاركت بالمصطبه باوعتله شفته كعد قريب مني بينه بس نفر واحد

تفاجئت ابتسمت بفرح اهاا الحمد لله يعني بعده يحبني اي الحمد لله ياربي حنن كلبه عليه هل كلب العار...

بس كلت لازم ابيع ثكل عليه وابين اني ممهتمه اله واني ضايجه منه فدرت وجهي ومنطيته اي اهتمام...

وهو احس بيه كل شويه وباوعلي واني ابببد مباوعتله

سمعت صديقه كله...يالله محمد شنو ناوي تعزل الجامعه علئ ايدك خلينه نطلع

هو جاوبه...روحو اجي وراكم

واحد منهم كله...لا عيني شنو تجي ورانه ما نقبل اخاف تلعب بذيلك امشي ويانه هسه

ضحك..شعندي يابه ديالله شويه واجيكم

ضحك الثاني...والله لا تخليني هسه اكعد بالنص تمشي لو شلون

هو وكف وجر نفس باوعلي كلهم ...يالله امشو

خله وطلع واني اباوعله اتمنيت اسحل صديقه بنص الجامعه اللزكه انت مرته مرته انت شكو لطشت امشي ما امشي دخلي نفتهم ليش كعد يمكن جان يريد يحجي ويايه

ابتسمت من شفته طلع من باب الجامعه وخليت وطلعت وراه شفت الخط مالتنه جاي سلمت علئ عمو ابو الخط وكعدت بالاخير منتضره البنات...

شويه واجن وجوهن تلطم...

باوعتلهن باستغراب كلت...خيير شكوو

جاوبتني صديقتي ويايه بالخط كالت...اكوولج اني اليوم داريد اعاركج

ضحكت...يااا يااا يااا خير شكووو ؟

ردت بقهر...محمد حبيبج هسه يباوعلي يكولي لا تباوعين ترئ ما افيدج

ضحكت...ياااا وانتي ضايجه من هاي الكلمه

تخصرت...لا ولله شنو ما افيده جايه من الملاهي وما افيده

جريت نفس...اوك بس ليش كلج هيج اكيد تباوعيله

بدلت ملامحه بسرعه وبارتباك...اي اي اباوعله لان جنت دا اراقبه الج

ضجت حييل...اهووو شنو دكولين هيج شنو تراقبينه بابا اني وياه انتيهينه لا تراقبي ولا تباوعيله

ردت...اهااا والله والله اله باجر اتعارك وياه

جريت نفس...لا اني هسه افتح الحظر عنه واحجي وياه

خفت تحجي وياه وتالي تكبل وياه ويعوفي عاد اني اختي من ابويه ما امن بيها امن بهاي

باوعتلها مطنكره عليه اصلا ما اهتميت الها...

وصلنه للبيت دخلنه استقبلتنه عمتي وهي تبوس بطيبه وتسأل عنها...

عادي اني هماتين اكرهن ثنينهن دخلت للمطبخ شفت اختي التوم تحضر بالاكل ضحكت

بستها بخدها وهي باوعتلي مرعوبه كالت...كبر عبالي واحد من ولد عمي كيفت ههههه

عبالي موستفاه باسني

ضحكت بس حييل انقهرت عليها غمضت عيوني وكعت دمعه مت عيني شكد ضايجه من هل عيشه من يوم الي اخذوني من امي صح اخذوني كبيره بس حطموني

والله يساعد اختي احنه توائم ارواح معلقه ببعض فرقونه من طفولتنا ورجعونا واحنه كبار بس حرمونا من امنا...

واعرف بمصطفى مجبور عليها وهي متعرف

وهذا عود حبيبي ردته سند ضهري وهو عود ابن عمي تاليها هيج يكسرني والله متوقعت...

بدلت بسرعه وفتحت موبايلي اتذكرت حاضرته صار اسبوع فتحت عليه الحظر وكتبت محمد موجود عندي موضوع وياك

شاف الرساله وما رد ...يبووو اشتعلت ناااار

كتبت...عود شيسموها تشوف الرساله ومترد شوف ترئ لا ميته عليك ولا احبببك واصلا نسيتك والله وداعة ماما بس جان عندي موضوع وجنت ادا اريد افتهم منك

بس مو صوجك صوجي اني الحيوانه الي احجي ويياك

بسرعه رد عليه كتبت...هااا مينا لا حشاج بس نت ضعيف

تفضلي شنو موضوعج

جريت نفس...علئ شنو حشايه رجاءا من اغلط علئ نفسي لا تصبغني وبعدين من وراك نسيت شنو احجي

كتب...ههههه اخذي نفس واحجي

كتبت...اي بس صديقتي دكول اليوم انت كاليلها لا تباوعيلي مدري شنو ترئ الجامعه صغيره وجنها مول يعني شلون من نشوفك نسد عيونه وبعدين دكولها ما افيدج مدري شنو

بسرعه رد...وانتي تعرفين اشمر هيج كلام؟

كتبت...لا

اجتني...رساله منه...لعد هذا هو

انقهرت من كلامه حييل...هو اني كلبه حماره اصلا اني حاضرتك من زمان شكو ارجعلك شكووو وهااا ترئ البنيه مكبله وحبيبها كله يجيبلها بوكس ورد مو مثلك يالله بااي

كتب...لا حشاج مينا

ودازلي سمايل ابو بوسه

يالله شكدد باااارد اني مشتعله نار وهو يكولي حشااااج والله اله احضره السافل الساقط ابو البنات...

حضرته وشمرت الموبايل...والله والله ما ابجي لو يموووت انوب دازلي بووسه باستك عكربه ان شاء الله 

.............................

مشهد ثاني...👇👇👇👇

طلعت من البنايه الوسطيه ورحت للبنايه الطبيه الي هو موجود بيها ...

اليوم عندي موعد وياه يسويلي جلسة تنضيف الاسناني رغم نضيفات بس تنضيف الحبيب مثل اكل الزبيب...

جنت لابسه تنوره سوده وتشيرت اسوود  وشال اسود ومخليه مكياج خفيف...

شفته واكف ويه اصدقائه ولازم الاب كوت بيده يمممه يمممه هذا الله خلقه وكسر القالب شنو من جمال

أحلئ واحد بالجامعه. باوعلي من بعيد ضحك واني ابتسمت

اجه تقرب مني كال...هلاو حبيبي شلونج

همست بخجل وارتباك...اءء الحمد لله وانت

رد بثقه...اني بخير من شفتج صرت باحسن حال

ابتسمت...يالله جاهزه نضف اسناني

باوعلي بغموض...ينراد تنضيف لشفايفج حاطه هوايه حمره

ما فهمت قصده ومسحت بالكنلكس

مشه ومشيت وراه باوع لاصدقائه كلهم..بيشنت جديده

ضحكو ردو عليه...اي عمي بخت كل شويه بيشنت واحنه كوولشي ماكو بس لا تفرح مو لسواد عيونك لخضار عيونك

ضحك وما رد عليهم

دخلت للعياده مالت التنضيف كال اكعدي هنا...

كعدت علئ الكرسي مالت الاسنان وهو خله الاضاءه عليه همسلي بهدوء...الاسود كلش لايكلج

ضحكت بخجل ومجاوبته...

لبس قفازات وكمامه وخرها شويه ولزم ورقه وقلم كال...اي ست ميمي احجيلي عنج عمرج اهلج وين ساكنه

رفعت حواجبي...مو عساس متعرف دكتور هههه

عض شفته...لج اموووت علئ ضحكتج ..تدرين انتي مثل الفراوله هيج بلونها...

ابتسمت...اي بس اني بيضه مو حمره

رد بثقه...اي هي الفراوله بالعصر الحجري جانت بيضه بس من كثر ما تغزل بيها الفلاح من خجلها صارت حمره

هسه انتي هيج بيضه من اتغزل بيج تصيرين حمره

ضحكت بصوت...يمممه منك ما تنكدر

ضحك ...اووويلي منج ومن خجلج لج ادبسز امووووت علئ ربببج

ضربته بيده بعصبيه...لا دكول ادبسز هاي الكلمه اكرهها واني عرضك عيب دكول عليه ادبسز

ابتسم وهو يكتب بالورقه وبعدها باوع لشفايفي كال...افتحي حلكج وعوفي الكياته علئ صفحه

فتحت حلكي وهو دخل اله حديد وضل ينضف لعبت نفسي حييل ...

كال بهدوء...ان شاء الله باجر عازمج

وخرت ايده وكتله...ما اطلع وياك تريد ناكل ناكل بالنادي غير مكان لا اخاف منك

باوع للاله...ليش يابه قابل داخطفج

رديت...لا تضل تتغزل وتشطح علئ ترابي

ضحك...شنو قابل اكولج ادبسز

فتحت عيوني ضايجه...لا دكول ادبسز

هز راسه بأي وهو يبتسم ورجع يكمل ..اجه يمه الدكتور الي مشرف عليهم ضل يسأل بي وهو يجاوب بالانكليزي ...

وكله...مجرد تنضيف بسيط Simple..

ضل يساله عن سبب السواد الي يصير بالاسنان وهو جاوب بسبب التدخين وبقايا الطعام...

انطاه درجه وراح...

وبعدها سالني كال...اي مينا انتي تدخنين

كعدت مصدومه من كلامه ضربته بيده علئ بطنه...صدك متستحي شكلولك عليه ادبسز وادخن

حط ايده علئ مكان الضربه ...اخخ توجع اني شدخلني غير همه كاتبين بورقة الاسئله

درت وجهي زعلانه منه...

تقرب مني وهو يمهمس...اووووووويلي اليتزعل اووويلي ياااابه لج مينا انتي شنو

ضحكت رجع لمس شفايفي باصبعه.

بعدت ايده...هييي هييي شكوو بعد تعال بوسني شهل دكتور المنحرف...

رد ببراءه...شبيج وياي ليش حاقده عليه وشاده وياي فوك ما انضم اسنانج ...

خفيت ابتسامتي...ديالله نضف

جر نفس...اوووويلي الجوو بارد مال واحد يحضني

غلست سويت نفسي مسمعته ...

كمل...محد يحس متنه برد ربي لو تدفيها لو تخلي العالم تحس

جريت نفس بس ضجت من كلامه ...شكد ميستحي وساقط بس اهو ابن عمي وهذا اسلوبه ان شاء الله اعدله اله

كمل تنضيف واني وكفت رحت للمرايه عدلت شالي وغسلت الحمره جانت رايحه...

هو وكف بصفي اتكئ علئ الحايط ويباوعلي بنظرات جريئه كال...الدكتور يريد يشوف شغلي ..

ومد اليه كنلكس اخذته من ايده ومسحت شفايفي...

رحت وياه للدكتور الدكتور باوعلي كال ببتسامه ...بالله اضحكي

ضحكت كتله..هههه هاي ضحكت

كال...حلوه من قبل التنضيف

هو جر ايدي بسرعه وطلعنه باوعلي بعصبيه...مكيفه وتتمضحكين عجبج مووو

باوعتله بصدمه...ياااا شبيك

عقد حواجبه بغضب...لج ادبسز شنو مصدكتي كلج اضحكي طكيتيها ضحكه

دفعته ورحت شكد اضوج من يكول ادبسز نزلت الدرج بسرعه وهو يباوعلي...

ما حسيت غير بانثناء برجلي وبعدها ما سيطرت علئ نفسي صرررخت بصوت عالي...

وهو ركض عليه ...مييينا..

.....................

هذي مشاهد من روايتي الجديده...نبذه عنها تتحدث عن تؤامان ارواح معلقه ببعض يفترقان منذ الصغر ويلتقيان عند الكبر لكن القلوب ليست هي وحتئ الانفس تغيرت...ويفتقدان لصمام الأمان..هي..« والدتهن» ويعيشان تحت ضلم الاقرباء..لكن يواجهان الحياة بشتئ صعابها

لكل وحده حياة خاصه وتفكير مختلف واختلاف بلون البشره...« دينا...مينا »

انتظروني بإذن لله بهذه الروايه رومانسيه اكشن بمواقف كوميديه...اجتماعية....

رواية...في ثورة حبببك 💔

بقلمي نور سمو العراق....

كونوا انتم كونوا بخير...احبكم

نور سمو العراق😘

التصميم الطلحه usar75405907

ومن هسه اكلجن البطل خورافي عيون خضر وشعر اشكر هاي اول مره عندي بطل بمواصفات عالميه كلهم جلحان من خويلد وشيلو اديكم 😂😂😂😂