حديثتي الشقراء

20/2

✨ حديثتي الشقراء ✨
🔹🔹
🌷🌷
انتي اصلاً بينهم ما تشبهين
غير نور الشمس او نور القمر
لك عيون ... الله يعين الناظرين
كل نظره منها ... شبه جمر
ولك خطاوي حتى كبل لا تخطين
لأجلها اللاممر ... يصبح ممر
وكل قاسي عود .. كدامك يلين
ما يطول...  لو يطول يندمر
ياااا غرام حروف شعري من تجين
انهمر .. مثل المطر من ينهمر
لا بديتي ... طالبك لا تنتهين
انتي اكثر شي ... ودي يستمر 💐

لمن لم يرضى حتى يرضى 🌝
🌷🌷

كعدت الشيخ ونزلنه نتوضى
جان تطلع غاليه من الغرفه مخبوصه وتكول ..
- يابه هذا هذا اسامه خابرني
ابوه جايتو نوبه وواكع وهسه ماخذينو للمستشفى
- كعدي جراح بالعجل
- كعد هو تايلبس

باوعلي الشيخ وكالي ..
- لزوم نمشي الهم حضريلي الملابس والفلوس بالعجل يلا بين مااصلي

صعدت حضرتهن وبقيت انتظره يجي
ماتاخر بسرعه اجه بدل و ديطلع صارت غاليه بوجهه كالت ..
- يابه هاي الفلوس انطيهه لاسامه هو انطايهم البارحه للجهاز بس وكاد الحين يحتاجها
احكيلو غاليه ارسلتها

جر راسهه باسهه واخذهن من ايدهه وكال ..
- بارك الله بغاليتنا

نزل وطلع هو وجراح الهم واني جنت كلشي اسوي مثل مامتعوده كل صبح بس احس مثل الي مبنجه مادري شجاني من سمعت هالخبر
شي بيه تجمد وصابني بالسكوت ..

غاليه كل شويه تخابر اسامه و هو يجاوبها بكلمه بعدين ويسده .. ماجنت اكوللها عوفي او لا تلحين عليه جنت بس ساكته واباوعلها

للظهر خابر اسامه وكال ..
جانت عنده نوبه ربو و بدايه جلطه
ضال من الصبح هو على الاوكسجين لحد هسه فك صدره و راح ياخذوه لمستشفى اهلي
لان هو جان لازم يسوي عمليه قلب مفتوح
عنده انسداد بالشريان التاجي ويحتاجله عمليه ترقيع وهو متأخر بيهه ..

سمعت منها هالحجي وكلتلهه الله يشافيه
وصعدت تمددت بغرفتي وضليت صافنه
اذكرت بهاللحظه يوم الي اعتقلوه وطفل الي خسرته من خوفي عليه ..
بكل مره يوكع بشده اني اكون بعيده عنه محرمه عليه ..
ماكدرت انزل دمعه وحده رغم احس اني لازم ابجي حتى اخلص من هالبرود الي تملكني بس مابجيت .. مادري شنو لازم يصير وارجع لوضعي الطبيعي بس ادري انه لازم يصير زين لازم يطيب ، مو هنا نهايته
لازم يرجع يوكف على حيله ويرجع يعيش براحه ..

اجتي غاليه يمي وضلت تحجي واني ساكته ومغمضه وره كم ساعه اجاهه اتصال من سدته كلتلي ..
- يمه جراح يريد انحضر مناشف وشفرات حلاقه وعشه و وصاني رماح ياخذهن الهم
- زين كومي حضريهن
- يمه عجل اهلو ليش مايحضرون هالاشياء ؟
- اسألي اخوج هو يعرف
- هو اسامه حكالي ان سالم بالدوام مو هين وفيصل كبل كم ساعه رايحلهم بس يعني ما ينطون خبر لزوجتو تحضرهن !
- بنتي من باب الواجب والمساعده اخوج تكفل بيهن قبل ما يتعبون نفسهم ويحيرون الولد .. اني انزل احضرلهم العشى وانتي
حضري الوصاج عليهن
- زين يمه

نزلت وعفتهه .. رحت فتحت الثلاجه صافنه احس راسي ثكيل واشوف ومااشوف ماركز
كعدت استغفر ربي وافرك راسي ورحت غسلت بمي بارد واجيت حضرتلهم اكل
ايوب حضرتله شوربه خضار خلطتهه بالخلاط حتى تصير خفيفه عليه ..
وصيت رماح يشوي كباب ودزيتلهم كاسات لبن على العدد ووياهن برياني وخليتلهم مواعين سفري وللجاي هم وضليت اوصيه
انته توكف تصب لكل واحد وتنطي ماعونه
وتجبرهم ياكلون وتنطي الشوربه لاسامه يوكل ابوه وياخذلهم صندوك مي بطريقه..

غاليه حطت بعلاكه منشفه وخاولي صغير وشفرات ومعجون الحلاقه وحتى بطانيات اثنين ومخاد خلت ..

خابرني الشيخ قبل مايطلع رماح وكالي ...
- تين يابه حضرتي العشه
-حضرت عيوني كلشي حضرت
- تره انا ماخليتهم يمشون لاهلهم ياخذون شي
لان وجوههم مصفره من الخوف ماردت اخليهم بعازه شي وهمه مشدوهين البال
- زين سويت ياعيني هنا كلشي حضرنا وهسه رماح راح يطلعلكم محتاجين شي
تبقى تبات يمهم لو ترجع؟
- لا يابه ابات هين عيب اخليهم وحدهم
فيصل راح يرجع يبات بيته لان حرمتو والجهال وحدهم وشلون اعوف اسامه وجراح
وحدهم هين هم كلفه لزوم اضل
وهي من الصبح العمليه
- هاا ان شاء الله تعدي بسلامه
ضل خابرني كل مايصيرلك مجال
- ان شاء الله يلا خلي رماح يتعجل

سديت الخط و نبهت على رماح اخر مره وطلع ..
حسين جان نايم كعدناه على العشى وسأل على رماح من عرف بي رايحلهم ضاج
وكال اني جنت انتظره ونروح سوه
وبس كمل اكل راح بدل واجاني يكولي ..
- يمه انا راح اطلع اروح ادحك العم وارفع من معنوياتو تلكيهم هسه كلهم مبومين الوجه حدرو
- روح ياعيني و ضحكه خفف التوتر عدهم ولده هم شاقيهم خطيه خايفين
- اكلبها كهوه ولا يهمك بس ورقيلي شويه حتى ماطبلهم فارغ الايد تعرفين ابنك جامعي ومصاريفو تكثر داريه داريه ياامي يعني الا انا اطلب
-هههههه ادلل الك كل فلس عندي شعندي غيرك يايمه اخذ شكد متريد وشوكت متريد لا تستحي
- عجل يلا يلا ورقي خلي امشي

انطيته فلوس وحضنته وهو من احضنه يضل يفرني منا ومنا يلا يوخر ويروح ..

صفنت على السما واكول سبحان الي خله كلوب حسين وايوب مترابطه
حسين هواي معجب بشخصيه ايوب ويكولي
هو يشوفني اهم واحد بيكم يقدر جوهري مو مثلكم ناسيني ..

رجعت دخلت واجتني غاليه ووجهه يبجي
كلتلهه ..
-هاا خيرج
- يمه اسامه كاعد يبكي على ابوه
- اسم الله عليه ليش هيج
- انا ادري ! هو متخوف كثير ويحكيلي بجبر من والدك انا اكلت ولا نفسي مسدوده وحلكي مر .. يمه اسامه خايف هذا الاب هم يخسرو
يحكيلي شلون اخذو الفجر ووجهو احمر ونفسو يصوفر ومايكدر يوكف على حيلو
بس فاك عينو وحلكو ويتشاهك
يقلي الرجفه بعدها بجسمي من منظرو
ولو هو مو بالبيت هاليوم كان ماحد اسعفه او تاخرو عليه ويروح بيها ويخسرو
والله كلبي متكطع عليه يمه ماعرف شنو احكي واطيب خاطرو
- لا تحجين شي يمه لا تحجين
البشر لازم يخاف ويتأذه على احبابه حتى يعرف قيمتهم
- بس مو وكت هالشي يمه ابوه حالتو خطره
عمليتو كبرى يمه قلب مفتوح هذا مو لعب
- يطيب ان شاء الله ويرجع لحيل الشباب
- مادري يمه انا خايفه والله كلام اسامه عليه خوفني .. يحكيلي مايكدر يتنفس بدون جهاز
للحين كل شويه يشيلوه ويرجع يختنك ويخلوه
- الله يكون بعونه ويشافيه
اكل ؟
- اسامه اييه اكل
- وابوه ؟
- ايييه اكل اكل
- اي زين
- يمه اسامه تشكرني على الفلوس وحكالي
الموقف هذا اخوي ماسواه الي
قلي بوكتهم هالفلوس لان اخوه جاي معتمد عليه وهو ما ماخذ وياه كثير مامحسب حساب عمليه
- اي بنتي زين سويتي حلوه وكفتج ويه رجلج بهيج شده ، شلتي عنه هم جبير
- ايييه هو هم حكالي شلتي هم كبير عني
لان انا بعمري ما طلبت من جدتي او مرت ابوي فلوس وهو مخلص راتبو ماباقي عندو الي يكفي لهالمصاريف
واخوه مايتدخل بهالشي هو مسؤول عنها وقلي لو سالم هين كان تصرف احسن من فيصل .. الظاهر فيصل شايل ايدو منهم
- الحمدلله مااعتاز لاحد انتي كفيتي ووفيتي
- هو مو بس مني يعني ضاف عليهم بس نفعوه ، وتدرين ابوي هو الي كل ساعه يدفع للممرضين اكراميه على كل شغله يسووهه
واسامه يحكيلي حيل خجلان منهم وكل مايمنع ابوي من هالشي ابوي يسكتو وقلي جراح
هو الي يمشي للدكتور قبلهم ويفهم منو ويشتري العلاج واحنه ماندري مانحس الا داخل ويه الممرض حتى ينطي العلاج لابوه
ومن يريد يرجعله الفلوس مايرضى ياخذهن
حكالي انتي خابري لجراح واحكيلو يبطل يدفع بدالي ماارضى هالشي ومو وكت نتشادد بالحكي هين
- اي كولي لجراح مثل ما وصاج
- يمه كأنك تعبانه. ؟
- لا
- لا والله مبين هالشي من بارحه انتي ممرتاحه مو امي الي اعرفها شصايرلك ؟
زعلانه ويه ابوي ؟
- لااا ماكو شي راح اصعد انام من يرجع حسين خلي يجيني

عفتها و صعدت ضليت كاعده على الجربايه واباوع لنفسي بالمرايه .. مالي فكر بشي
بس سكوووت بداخلي جبير ..

كدرت انام كم ساعه لحد ماكعدني حسين
وصار يحجيلي ..
- يمه هذا رجل اختي فكاكه خواااف يمكن لو اطك يمه اصبعتين يفز
- عيب هالحجي ابني شبيك
- شنو عيب صدك هذا عجل هو وجهه اصفر
يدحك لابوه مثل الحرمه الراح يزفوهه وياخذوهه من اهلهه وعيونه حمر مبين هذاااك وينو يبكي بالختله
- اي ياابني غير ابوه لعد الاب هين مينخاف عليه اكبر كلب يهزه
- بس خلي يشد حيله كدامنه فشله تره كلمه ندحكو هالشكل ونصنف عليه
عجل مااحنه ابونا وكع وشهور مو يوم
واخوتي يتراكضون بي بالدكاتره مادحكت واحد منهم مهزوز مثلو بالاخص جراح كان اسد بينا واسامه ضل بس يبكي بحضن ابوه
- ههه ولك يمه هذا خايف عليه لان ابوه الاول مات خاف لا هم عمه وابوه الوحيد البقاله يموت مايتحمل هيج صدمه بعد
- هااا اييي صحيح اذكرت هو ابن اخوه
والعم العقيد مربيه لااه وسفه عليك يا حسون
اخذت غيبه الرجال بالباطل
- اي فكر النوب قبل متخرط حجي على الناس
- اي اي ا ا يمه اليوم ابوي مو هييين اليوم يومييييي ههههههاااااييييي
-ههههه
- نعساان تعبان متكسر اشكال صايره بيه
نوميني باجر لازم ارجعلهم ادحك شصار ماصار ابوي وصاني الصبح اخذ ريوك واروحلهم
- اكولك شسوو بالشفرات ؟
- حلقو صدره وبطنه علمود العمليه
- هاا منو حلقله
- اسامه دخل وياه للحمام جناب فيصل ترخص وراح والله شنو مرتي والجهال وحدهم هي ابن .. لاا ابوه احبه
بس هي كديش ماوديتهم لبيت اهلك لبيت اهلهه دزيت امك يمهه هيج عايشين بالمنكطعه ! هو ادبسزز وعاق مبين من وجهه
- يبووو رجعت بالغيبه وكلام الباطل
- مو باطل هييين يمه هذا مايحترم ابوه عجل مخلي نسابه تبات حدر ابوه وتداريه وهو يمشي ينام بحضن مرته !
- والله ماانفهم مرساك وين
اسامه خايف على ابوه تصنف عليه
فيصل يروح خايف على بيته وعياله تحجي عليه
- ايييي هسه عوفيني افضفض بكيفي لو تعلمتي طبع ابوي تكفين على الكلمه ويه حسين
- ههههه نووب !!!
- يمه بله افتحي شعرك
- شتسوي بشعري ولك
- بس ادحكو والله صار زمان ماادحكك تفتحيه
-ابوك ميقبل
-ابوي مو هين اليوم انا اتأمر افتحيه الي عجل بس لابوي تتفننين بدلالو وانا طلب هالصغرو ما ترضين
- ولك طولك بطول الباب وعقلك بعده مال جهال شوكت تكبر وتخلصني من سالفه ابويه وابويه
- انتي ايمتى تكبرين وتبطلين دلال وياه وتنطيني حصتي
- ولك ياحصه لتخبلني هسه اني مقصره وياك
- ايي مقصره عجل انا ايمتى ادحكك نهاري بالدوام والعصريه نايم والليل انتي بس تحكيلي ها حسوني رايد شي مامه وتفلتين
هذا مو تقصير لو شيسموه !!!
- هههه انزووول عليك ياجذاب لعد منو التكعد وياك وتفركلك كتوفك وراسك
وتحضرلك ملابس الدوام لباجر وتكوي وتسويلك الحلويات وتخابرك على طول اليوم لو تطلع شو هذني متحسبهن !!!
- ايي بس بعد بعد مايشبعني هذني وحدهن
-اكولك انته شتريد اتزوجك يلا ترضى تره دقيتني
- هههههههااااي وين الله وتصير معجزه واطلع انا مو ابنك ويرجع الزمن واتزوجك كبل ابوي المحترم
- عااابت هالتفكير وبلى يريد يصير اعلامي هو انته بنجرنجي هواي عليك بهالعقل
- هههههههههه يمممه قصفتيني
- تستاااهل من حجيك الي يخبل
- يمه من حبك لاشاك عجل غير انا اعشكك يااامي يااحليوه ماتفتحين شعرك وحدك لو انا اتدخل
- اكعد بس اكعد

فتحت القراصه وصرت انزل شعري وهو حاط وجهه بين ايديه ويبتسم وخدوده ماليات جف ايده .. ادنى يمي وعدل كذلتي على وجهي وكالي ..
- يمه انتي عجب ما تكبرين ؟
- شلون مااكبر مو الشيب ترس راسي والتجاعيد بوجهي هاي مو كبر
- لا مو كبر والله مو كبر .. انا ادحكك مثل بنات الاعداديه تخبلين يمه والله حكه ابوي مستحلك وقافل عليكي قفله قيس على ليلى
انا لو بدالو يمكن احطك بجام خانه
- ههههه بدينا بهالمبله
- هااا همبله ! اشكرك هاي مشاعري هالشكل عندك !!
- اييي ابوك هم جان قبل يبوو اشعاره وهو ويتغزل وبس انتي وبس وساعه الي مايعجبه شي ويصير عصبي لو بيده يشمرني من الشباك يا حبيبه يا حلوه ياحب كله يتبخر
- هااا عجل شلون ضليتي وياه لليوم
- ضليت بكبر كلبي
- قصدك تتحملي
- اي همه الرياجيل ما يتعاشرون بدون خلك وكلب جبير
- اييي لو انا بدال ابوي اسويلك كلبي بكبر شعرك هذا يتحملك بدل ماانتي تتحمليني
- هههه لا عيني لااا الشيخ مابدله باحد
هو صح عصبي مرات بس هو حبيبيييي قبل كلشي
- احركي بكلبي احركي علي لصوتك بعد بعد سمعي الجيران واحكيلهم جياد باابني المسكين
-ههههههههههه اشاقى وياك ولك
- هي صدك السالفه مو مال شقى
- انته شكو هيج حتط كورتك من كوره ابوك
تره عيب يعني انته وين تريد توصل بهالغيره
- والله ياايمه الحب اعمى وحبيتك انا بعد ماتحمل حتى ابوي حدرك نااار الغيره تحركنننننييييييييي

كالها بصياح وشمر نفسه على المخاد وضل يشيل بشعري ويلفلف بي باصابعه ويكولي ..
- دورت بالجامعه على وحده شعرهه طويل ماكو كلهن مكطمات
- هههه هم صاير تبصبص
-عجل نفس هي لو حجاره
- هههههههه ولك طالعه عينك
- كبرت يمه كبررت عجل اضا محروم هم اريدلي بنوته حليوه اتونس بيها تالي الليل
- عزاا شكد طايح حظ ولك مو امك اني شويه استحي
- وليش استحي جذب هالشي ! ضايج انا اريد ارتبط اكبل اخطب اتزوج اي شي المهم اتونس شويه
- يعني ادورلك على مره
- تعرفين وحده تشبهك اذا تعرفين حتى اشتري الحلقات
- يمممه ابني مفلفل على الزواج
- طاااك كلبي يمه زوجيني على الاقل اكف عن ابوي واخليه يتهنى باخر هالعمر
-هههه بس ماكو وحده تشبهني اني خلصت جيلي بدا ينقرض بعد ماكو منه
- عجل خليني انا ادور وحده مهجنه بيهه من الجيلين
- شتريد بيها اهم شي
- اهم شي شعرها طويل وحنطاويه وناعمه
حتى اشيلها العب بيها لعب
- ههههههه تخليهه لعابه بيدك شنو
- اييييييييي اييي هذااا الي على لساني والله كفوو تعرفين تقرين افكاري
اريدهه تتحمل شقى وناعمه حتى اضل اشيل واشمر بيهه اخبلهه اتونس بيهه بخبااال
- يمه الله اليستر من التوكع بايدك يبوو
راح تصيح الغوث
- وعيونك ادللها دلاال الا اخليها ماتمشي على الكاع
- هااه شلون هاي تضل شايلهه !
-لااا اكسرهه وانومهه تضل مكرمه هخ هخ هخ بايخه هالمره ماتسوى الضحك
هاي الباتري جسى شويه مال نعاس
يلاااا ماتنوميني عاد سطرتيني بالحكي
- ياااه فوكها يتامر ابو شوارب
- اتامر عجل قلتلك اليوم يووومي
- دتعااال يلا خطيه انته
- اي اي خطيه راح ابكي سكتيني سكتيني
- هههههه ووولك كاافي سده لحلكك متتعب
- اصلا ماحكيت شي هاي بس غيرتلك جو دحكتك مبوزه ابوي مو هين كاتلك الهم عاد انا قلت خلي الاشي امي الحليوه لو اريد احكي اسطرك اسطرررررك

جريت راسه بحضني وسديت حلكه حتى يسكت وهو يضحك ويكرص بيه واني اضربه وميتوب من هالحاله ...
لحد ما من وحده سكت وجتف ايده وحط راسه يم ركبتي هو من يجتف ايده هيج معناهه ينام
من صغره هو مينام اذا مو هيج ...

ضليت كاعده اتلمس بلحيته وابتسم شكد كلبي يفرح من اشوف ابني الصغيرون هسه كبران وصاير رجال مشورب وهو ولحيته وطوله
بعده ينام بحضني ..

عفته نايم ونزلت توضيت وصعدت فرشت سجادتي وصليت الليل وكضيتها اقرا دعاء
الجوشن الكبير كلش اندمجت بي وخفف الي جان قابض على صدري .. ختمته ودعيت
لايوب بالشفاء والعافيه وان ربي يجعل ايامه الجايه كلها راحه وامان ..

نمت يم حسين وضحكت على نفسي ابني اكبر مني .. وتذكرت رماح اني ربيته وهسه استحي اوكف يمه اطلع هالكدوتني ..
ولدنا كلهم شبو بسرعه وصارو رجال ..

كعدتني غاليه الصبح ويه الصلاه واني جنت نايمه قبل ساعتين .. كمت واكعد حسين حتى ينزل يصلي ويانه يكولي ابويه مو هنا عوفيني رزلته على حجايته وهو يكولي احبج ميخالف رزليني .. عفته نايم ونزلت صبحت على الشيخه وبوست راسهه وصلينه وكعدت اسوي ريوك ..
عدنا عباس كلش خدوم هو شايل البيت شيل
كلشي نطلب منه يسوي وكلش هادىء عكس صكر صوته يسطر و لا ابالي ماله دخل بشي

عباس قبل ما يطلع للدوام اجاني يكولي شتحتاجين من المحل قبل مااطلع و وصيته
يجيب ريوك حتى ادزلهم للمستشفى وراح جاب الريوك وجاب الصمون حطهن وطلع لدوامه ...

عدنا كيك هم حطيتلهم حضرت الجنطه بيهه كلشي مسفط ورحت كعدت حسين ياخذهن ..

اجتني غاليه وكالت ..
- يمه راح ياخذوه للعمليه الحين ادعيلو
- الله ييسرهه عليه ويطلع منها بسلامه
بحق لا اله الا الله

من هاللحظه اني التزمت التسبيح اله وكل شويه ادعي ربي يحفظه ويجعلها خفيفه عليه هالعمليه ويطلع منها بسلامه ..
مكعده غاليه يمي وكل شويه اكوللها اتصلي شوفيه طلع بعده ، شوفي ابوج اكل ! شوفيهم يحتاجون شي اندزلهم؟

وهي تتصل وتحجيلي .. وطولت عمليته هواي .. خابرني الشيخ يكولي اسامه راح يخرب من طوله خلي بنتج تضل تخابره لا تعوفه ..
وغاليه من سمعت هيج انخبصت تكولي احجيلي شكوله شسويله ..
عاد كلتلهه ..
ضلي هدي بي وخلي يكعد وحده بعيد عنهم وانتي وياه بالتلفون ضلو سبحو وادعوله

وهي راحت بغرفتي تخابره وضليت اني
ادعيله وهالمره نذرت غدا لوجه الله بس يكوم بالسلامه .. ايوب مثل حسين بمثل الاحساس هسه احساسي عليه ...

ملتهيه بالتسبيح وسمعت غاليه نزلت على الدرج وحجلها يرن وهي تصيحلي يمه طلع
وصلت يمي وكالتلي ...
- يمه طلعوه هسه من العمليه و عمليتو ناجحه الحمدلله

غمضت عيني وابتسمت واني اردد الحمدلله
ضلت تخابر بجراح وبعدين كلتلي ..
- يمه اخذوه لغرفه العنايه راح يضل لبكرا يراقبون حالتو
- ان شاء الله يكوم بسلامه وتعدي هالشده
- يمه حسين ماراح للدوام تره ضل حدرهم
- اي زين يسوي اكيد جراح تعب خلي حسين يوكف بداله
- سالم هين هم من الصبح هو حدرهم رجع من دوام بوجهه للمستشفى
- اي خطيه همزين اجه حتى اسامه يتقوى شويه هو مبين يرتاح من سالم وياه
- ايييه يمه لو سامعه صوتو من دحك طلعو ابوه من العمليه اوييليي يمه انجن عليه حتى مالحك يسد الخط راحلو ركض
- الله يفرحه بسلامه ابوه
- يمه نحضرلهم غدا لو تتوقعين اهلو يدزون؟
- مادري اسألي جراح حتى اذا ما يجيبولهم نكوم نسوي
- زين لحظه

خابرت جراح ورجعت كالتلي ..
- لا يمه جدتهم بالطريق و وياهه الغدا
- اي زين

للعصر رجع الشيخ وحسين تلكيتهم و حسين كالب وجهه ومنفوخ كلتله ..
- شبيك حسون شو ضايج
- مابيه شي
- والله ؟
- بعدين

راح جوه وانداريت للشيخ كلتله ..
- شبيه حسين
- صيحت عليه
- ليش ! هاي انتو ماتنجمعون سوه اذا ما تنكلب الوجوه
- عجل ابنك مخلي صورتك خلفيه قفل تلفون
وكل ساعه ومطلعه يدحك بي وهذول ولد حدرو مايستحي من سوايتو هاذي !!
هاي هين كدام عيني كضبتو زين بالجامعه هم الرايح والجاي يدحكك بالتلفون
والله لو مالعيبه والناس حدري لا اكضبو ايبس جلدو على عظمو

بساعتهه الشيخ مايسمع مني شي اذا اكوله اهدا اعصابك يكولي لدافعيله اسكتي
وضل يمشي بالبيت ويصيح ويرزل بي
وهو حسين ساد باب غرفه الشيخه وماينسمعله حس .. بس الشيخ كلب البيت بصوته يمشي للمغسله يصيح يروح يشرب مي يصيح يكعد بالهول هم شويه وحجاله كلمتين عليه لحد ما طفح الكيل بعد شبعت قهر على ابني واذا تضل على الشيخ عشر ايام ما يسكت ويعوفه ..
رحتله وهو بالهول كعدت يمه شاورته ..
- خالد كوم شويه نصعد
- خيير
- شويه بس نحجي كلمتين مهمه
- اذا تجيبين طاريه اشمرك من فوك مفهوم
- لا مو عليه والله
- عجل امشي كدامي

صعدت وهو ورايه بثواني دخل كعد ويباوعلي .. اني اجيت وكفت بين رجليه
ودنكت بوست راسه وخدوده وشفته وعيونه
وهو ابتسم كلتله ..
- اشتاقيتلك عيوني شدعواك وياي
- يولي ابنك طشر موازين عكلي بسوايتو
- عوف سالفه حسين هسه كولي كدرت تنام
-لا غفيت دقايق على كعدتي
الليل كله اسامه يلوب حدر راسي
يروح ويرجع يدحك ابوه احكيلو ول يابه خليه نايم يحكيلي اي بس اتطمن
- خطييه كاسر كلبي اسامه اكثر واحد بيهم متاذي عليه
- ايييه والله صدكتي هو وسالم هم خطيه حدر مشلوش مايندل دربو دنك على ايدو يبوسها ويبوس راسو ويحضن بابوه وفيصل من بعيد لبعيد يحكي وياه
- مو خوش هالفيصل كلبه مو على اهله
-ايييييه
- زين شعجب مرته وامه مااجني البارحه ولا بوكت العمليه
- هو طلب من اسامه ما يخلي وحدتهن تصل هين بس الحجيه خابرت بالليل توسلت بي حتى ادحكو بكرا وسمحلها بس الها عاد الحجيه جابت الغدا وحدهه ودحكتو بالعنايه من بعيد ودموعها خطيه مانشفو عليه
- الله يصبرهم على مابتلاهم

جر ايدي وكعدني على رجله وحط راسه على جتفي .. ضليت اتلمسه وكلتله ..

- تنام حبيبي لو تسبح ؟
- ولا وحده خلينا كاعدين
- هه ماشي
- تين البارحه بالليل صفنت عليه ودحكتو صدك وحيد عليم الله لو ما حاط ايدي بايدو كان تندمت باقي عمري على خطيتو
- الحمدلله صرتله عون وسند بوكعته
- انا يوم الي تمرضت الكل حدري وانتي ماغفلتي عني لحظه بس هو ادحكو مبعد كل ناس عنو .. سألت فيصل على اخوه الي باربيل ما انطوه خبر حكالي يمكن بناتنا هسه انطوه خبر لان همه مزوجين بناتهم الاثنين لولد هذا العم
وسألت ابو سالم قلتلو اذا متقيد بينا واهلو ما يكدرون يحدرون هين احنه نطلع ونكعد بره وخلي الاهل ياخذون راحتهم هين بس هو حكالي لا انا ماريد احد منهم هين عندي ولدي وانتو كافييني
مادري ليش مايريد اهلو حدرو ؟ تذكرت انا ساعه ما دخلت المستشفى كل ولدي حدري بس مطلبي انتي الظاهر هو ما يحب يبين ضعيف كدام اهلو
- اي يجوز هالشي .. بس هسه هو شلون وضعه زين لو بي خطوره
- مستقر وبالعنايه محد دخل عليه ملفلفيه بالصوندات وسادين الباب عليه هو وربو بعد
يلطف بحالو
- الله كريم
- خليت جراح ورماح يضلون هالليله حدر الولد  وصي ام جراح تحضرلهم العشى وخلي ياخذه حسين او عباس دحكي ياهو الي يرضى يروح زين يابه
- ماشي عيني
- اييه تعرفين هذول الاثنين يتفستقون  باكلهم
ما راح يطيبلهم اكل البره
- ههه زين ادزلهم شي بعد
- ها تذكرت هذا معقم الايد الاصفر الي اشتراه رماح و وزعو علينه حطيلهم واحد منه لان هذا يضل يوهس تلاكيه الحين كاره نفسو ولدي واعرف خيوطهم
- صار عيوني هسه انزل واحضرلهم كل شي
- حضريلي حمام بدربك

اخذتله ملابس ونزلت حضرتله حمام وعفته يسبح ورحت لام جراح داسألهه شنسويلهم عشه راح يباتون هناك وهي ضاجت شكو ولدي يبقون بالمستشفى ورماح عنده دراسه
وخبصت الدنيا عفتهه تخابرهم ورحت اني حضرتلهم العشى وره شويه اجتي يمي وبس تتافف وساعدتني بالطبخ .. هم رتبنا علاكه الاكل ودزيناهه بيد عباس ..

رحت لحسين لكيته متلفلف ونايم . كعدت يم راسه وهو كبل كالي ..
- يمه نعسان عوفيني
- اكعد وليدي خلي اشوف شبيك شو دباوعلي

رفعت راسه عليه وهو مدلغم الوجه
ابتسمت وبوسته وضليت اكرص بخدوده
وهو ساكت .. كلتله ..
- ميخالف حبيبي انسى الصار هو ابوك من خوفه وغيرته هيج يحجي ويضوج ولا هو مدخل بيك قبل بس هالشي ما يرضيه تفهمه ياعيني لا تزعل منه
- بس انا ما سويت جريمه هي صوره انا وانتي بيها وانتي لابسه حجاب مو مفرعه ويبهذلني يحكيلي ما تعرف العرض انته مخلي صوره امك يدحكها الغريب
بجهازي يمه بجهاازي ما ناشرهه انا ومشهرك بالدنيا هي خلفيه خلفيه
- ابوك شويه يغار تفهمهه لا تاخذ على خاطرك اني اصلا فرحت انته مخلي صورتنا
شو خلي اشوف ياهيه
- شلتهه بعد
- حسون ماما خوف من ابوك وغيره هالتصرف مو انتقاصاً لقدرك ولا تشكيك بيك انته ابني الشهم ابو عقل الجبير ياهو يلحك
صفاتك وليدي ،، لا تتكأب هيج هو ابوك هم خطيه تعبان والليل منايم والجو متوتر شويه
جو المستشفيات يخنك الروح ويخلي الواحد اعصاب هم اتفهمه
- اييي هو لكاني بوجهه فرغ اعصابه بيه
وهو ميصدك حسين هذا اجته فرصه يترزل ليش يفوتهه
- ههههه يحبك والله ابوك يحبك بس انته حاط راسك من راسه

ضليت اكرص بوجهه وكومته ياكل وتعدلت نفسيته من ادخلت غاليه وصنف عليهه رجع مرتاح ..

ثاني يوم راح الشيخ من الصبح للمستشفى
واخذ وياه ريوك الهم وغاليه كل شويه تخابر
عرفنه للظهر مطلعين ايوب لغرفه خاصه
و وضعه مستقر ..
ما وكفت لحظه من الدعاء اله وتمنيت لو الوضع غير هالوضع واروح اتحمدله بالسلامه ..

للعصر اجتني غاليه ومبين بحلكهه حجايه لان تحوص فوك راسي وتمتمت .. كلتلهه..
- احجي احجي اسمعج
- ههه يمه نروح نسلم على ابو سالم
- لا يمه شيودينا اخوتج هناك كافين
- لاا يمه عجل غير انا كنتهم واروح اتحمد لعمي بالسلامه وهم ادحك اسامه لخاطرو لازم اروح عجل حلوه بحكي بعدين يعاتبني مارحت وسلمت على ابوه وهو طلع من الموت !
- بنتي الله يخليج اجليهه من يرجع لبيته روحي
- ما يجوز يمه يعني انا اعلمك بالاصول ! !!
- وانتي من كالج اخوتج يقبلون شو من وحدج تحجين ؟
- سألت جراح وهو حكالي براحتك اذا الكم نيه خلي حسين ياخذكم
- هااا يعني مدستره امورج وجايتني
- يمممه اماانه خلي نروح بنفسي ادحك اسامه واوكف حدرو فدووه يمه والله يعاتبني اذا مارحت وهو ابوه ما يطلع اليوم بعدو مايكدر يتنفس بدون جهاز جايز يضل يومين بعد
- مستشفى اهليه ما يطولون بكعدته باجر يطلعوه وروحيله للبيت
- اففف يمممه هسه ليش هالرفض وشبيهه السالفه !!!
-غاليه لتحرجيني فدوه كلتلج لا
- دايماً تتهربين من كلشي يخصهم مادري شسالفتك

عفتهه ورحت ماردت ارد عليهه بعد
من جهه اتمنى اروح واسلم عليه ومن جهه اكول البعد احسن

التهيت اشر ملابس بس هالسالفه ضلت ادك براسي اروح لو ماروح ؟؟
اخر شي نزلت خابرت الشيخ ..
— خالد عيوني ارد اكولك شي
- اييه يابه اسمعك
- غاليه تريد تجي تسلم على عمهه وتشوف اسامه كلتلي وكلتلها لا بس برأيك لازم نروح لو عادي بعدين لو منروح اصلا ؟؟
- هو من الواجب تحدر تسلم على عمها مابيها شي
- كلتلها بعدين من يروح لبيته روحي شوفي
- لا ما اريد البنت تضل كل يوم ماشيه لبيت عيالها ويتكلفون بينا
-لعد شنو اخليهه تخابره يكدر يحجي ؟
- لاا يابه مخابره شنو خلي حسين يجيبها هين
شغله ساعه وترجع
- ماشي عيني هسه اكوللهه تتحضر لعد

سكت شويه وكالي ..
- تريدين تسلمين عليه ؟
-ها مادري كيفك انته شتكول
- سلمي يابه سلمي هي بالوجه صارت بعد اذا. مو هين لزوم تمشين لبيتهم وهالشي ماارتاحلو انا ،، تحضري انتي وبنتك وخلي حسين ياخذكم
-ماشي عيني اجيب وياي عشه ؟
- ياريت والله تره انا للحين ماتغديت
- سوده عليه لعد راح احضر الاكل واجي

سديت الخط ونزلت لغاليه كلتلهه وهي طارت من الفرح .. اخذتها وياي للمطبخ وصرنه نحضرلهم الاكل ..
سويت شوربه لايوب وغاليه سوت عصير البرتقال ببطاله وجهزنا الاكل وصعدنا بدلنه
واخذنه حسين ..

اول ما وصلنه المستشفى تلكانه جراح جوه بالباب واخذنه للغرفه ...
دخلت سلمت بصوت عالي شويه واجوي الولد سالم واسامه سلمو وطلعو بالباب
غاليه تقربت يم ايوب سلمت عليه وهو
بس يهز براسه ..
صدره مكشف ولاصق العمليه صاير بالنص على طول صدره وجهاز التنفس بوجهه
وبايده مقياس النبض والمغذي ..
وجهه شاحب وعينه مفتوحه شويه
جانت ايدي ترجف وبعيني دمعه مغطيه عليهه المناظر بس مقويه ايدي بضغط على الجنطه .. وصلت يم موضع ايده وكلتله ..
- حمدلله على سلامتك

كدرت انطق بس هذني واني اشوف عيونه شلون تلمع ومركزه بيه رأساً انداريت ورحت كعدت يم الشيخ ..
كلتله ..
- عيوني احطلكم الاكل هسه
- اي والله فد مره جوعان كضيتهه بس جايات

ابتسمتله ورحت فتحت العلاكه واباوع غاليه ماكو هنا ولا اسامه .. خليتهه براحتهه وياه بره بس جراح كاعد ويهز برجله ويفر براسه باتجاه الباب كل شويه بعده ممتأقلم على فكره اكو احد بحياه غاليه ..اعرفه طبعه مثل طبع ابوه ..

جنت جايبه مواعين سفري حطيت لكل واحد منهم وقدمتله .. صبيتلهم العصير وضل اكل ايوب اباوع للحافظه ومتردده احجي بس بعدين تشجعت وشاورت الشيخ ..
- يصير ابو سالم ياكل سويناله شوربه
- والله هو مااكل شي بس عصاير اليوم كله
خلي يسألون الولد اذا يكدر ياكل

رحت شاورت جراح وكلتله يكمل اكله ويروح يسأل الدكتور وهو اكل بسرعه وراح سأل ورجع يكولي بس شوربه وكون خفيفه

مثل الي مسويتهه بالخلاط وخفيفه شويه ومابيهه اي دهن .. صبيتله بكاسه وضليت شايلتهه وهو يباوعلي بنظره ماعرفت افسرهه بس بيهه شي من التوسل مافهمت ليش ..

شافني جراح هيج شايله الكاسه ومتردده
اجه اخذهه مني وراح كعد يمه حتى يوكله
دخل حسين واخذهه منه كال اني هاي مهمتي
وصار حسين يوكله واني كاعده يم الشيخ اباوعلهم وابتسم بس كطعهه عليه صوت الشيخ وهو يشاورني ...
- مو قلتلك وحيد

باوعتله واحس نبتت هالكلمه بصدري
وحيد ليش!  ايوب ميستاهل يكون وحيد !
كلتله ..
- ليش سالم طلع ماضل هنا ؟
- حتى لو يضل ما يعرف يسوي شي
- ليش يعني مو ابوه مايعرف يعينه بهاليوم
- يستحي
- يستحي ؟
-اييه يستحي ابوهم ما معودهم على كربو
الظاهر كل علاقتهم حديه .. الولد شربه العصير واحد يذبها على الثاني يخجلون يتقربون منو هالشكل بس ولدي يسوون الشغله كبل ما يطلبها احد
- الحمدلله ولدنا صارو اله عون بهاليوم لو ضلت على ولده يشبع ضيم

رجعت باوعتلهم واشوف حسين شلون يشاوره ويضحك وايوب يبتسمله بتعب
و من كمل اكل انطيته كلاص عصير
شربه وجبره يخلصه كله وبعدين وكف وجان يضربه على زنده بقوه مرتين وهو يكول
- كفووو العم راجع حديد

رأساً صحت عليه ..
-حسين ابني شجاك وكت شقه هسه
- يمه عجل احد حاكيلك الشقى اله وكت
حديد احكيلها حديييد العم دحكيه عضل هيين عضل انا وبعز شبابي ماعندي مثلو

ابتسمت ودرت وجهي عنه باوعت الشيخ رافع حاجبه رأساً كلتله ..
- كول لابنك عيب هالتصرفات هنا لا كلش يطوخ شقه هو يخاف منك اني يضل يماطل وياي بالحجي
- اخذيه وارجعو عجل لان ابنك مايسكت وان سكتو بالغصب يتمزعل عليه مالي خلكو
- على كولتك اخذه احسن .. شوكت ترجع؟
- بعد كم ساعه
- ماشي عيوني مو تتأخر
-ان شاء الله

اخذت جنطتي وكمت صحت غاليه اجتي
وكلتلهه خلي نسلم ونرجع .. كبل اسامه كال
-اني ارجعكم بطريقي لان اريد امر للبيت
- ابقى يم ابوك احسن خاف يحتاج شي ويستحي يكول لولدنا
- لا ما تأخر مو ضروري اروح وهو سالم هنا باقي
-ماشي عيني كيفك

دخلنه سلمنه عليه و هو اشر لغاليه تدنى يمه
شاورهه وبعدين طلعنه ..
وصلنه اسامه لبيتنا وراح ..
اول ما دخلت غرفتي دانزع شالي جان تدخل غاليه بسطت وكعدت وهي تبتسم هالابتسامه الي تطلع كل اسنونهه .. كلتلهه ...
- شبيج
- يمه عمي وصاني اتشكرك على الاكل
حكالي قليلها .. الله يخلي ايدها وتسويلنا بعد
-هههههههه اووف يربي اووف
- يعني عمي عاجبته الشوربه وبعد يريد تسوين
-الله كريم هو بس باجر ويطلع لبيته
- يمه ذكرتيني سألت اسامه وعرفت محد زارهم هين بس اثنين اصدقاء مقربين لاسامه من المنطقه يعني حتى حرمتو وام اسامه مازاروه شلون يكدرون والله تعجبت
- ابوج كالي هو موصي محد منهن تجي تزوره بالمستشفى وقبل بس امه تجي
-لييش يعني ؟؟
- شي خاص بي احنه شمدرينا
- يمه اسامه تدرين شعندو راجع للبيت
-شعنده؟
- يريد يسبح هههههههههههه يحكيلي راح اطك احس دود بجسمي من يومين ما غسلت
وردت جيتكم حجه حتى اطلع للبيت اسبح
يمه طكيييت ضحك عليه طكيييت وترزلت منو بس ماكدرت اضمهه للضحكه
هههههههه يمه هالولد بطه بططططه
- هههههه ولج عييب هالحجي شجااج
اكو وحده تكول على رجلها بطه
- اقصد انه يسبح هواي مهووس بالمي هذا
مهووس والله
- مو زين رجال نظيف ومعتني بنفسه
هاي من الزينات
- تذكرررت القفص مانظفتو اليوم

كامت ركض نزلت واني بدلت وتمددت
ضليت مغمضه وافكر بهالقدر الي خلانه
سند و عوض لايوب بتالي العمر
يعني اني تعرفت عليه وصار الي صار حتى تالي هالعمر يوكف رجلي وابني اله هالوكفه!
سبحان مدبر الامور .. سبحان الي خلاني امشي لحديثه والكه بيهه كل العوض وكل القدر وكل الي احتاجيته وهو احتاجه
سبحان الي يعلم مالا نعلم ..

طلعوه ثاني يوم لبيته الصبح و ولدنا وياهم ماعافوهم لحد مااطمنو عليه يلا رجعو الظهر
وبدون غدا يكولون نستحي نكلفهم وعدهم مريض ...

غاليه صارت كل يوم تخابر ايوب تسلم عليه وتطمن ودزينه هديه سلامته دشداشه من احسن نوعيه اشتراهه حسين على ذوقه
وبفلوسي اخذهه اله هديه منه ومن غاليه
لسلامته ..
حسين كل يوميه وره العشى يروح يكعد وياه
اني ماارضى يروح اكوله رجال تعبان مريض يجوز اهله ينحرجون منك وهو يكولي انتي ماتفهمين الي بينا .. واذا اني مااروح تلكين هو يخابرني يعتب ليش ماجيت

يكولي اروح الكاه محضرلي اشكال الحلويات
اضل اكل واسولفله مواقف ونضحك وحدنا بغرفه كاعدين مرتاحين محد يدخل بينه
كلشي محضر يمنه العصير والحلويات والفواكه وحتى مخاد حاطين اتمدد واسولف براحتي وهو هم يسولفلي على حياته

عفته براحته بعد الي سمعته منه .. تأكدت ان ايوب يريد وجوده وياه انيس اله ...

الشيخ راح زاره كم مره هو والشيخه وباقي الولد واخذوله ذبيحه لسلامته ..

حسب الي اسمعه من حسين عليه صار يكدر يمشي براحه وبعده مستمر على تمارين التنفس ..

اسامه رجع لشغله وبيوم اجازته اجه لبيتنه
جايب لكل واحد منا هديه من سفره وبالاخص جراح وحسين انطاهم كل واحد ستره وبنطرون وقمصان اثنين وبقيه الولد على قميص وعطر .. والشيخ جايبله قاط اسود
وتشكر من عدهم على وكفتهم ..
تعشى يمنه واني غاليه يمي تحوص وتكولي
خلي اسلم يمه .. عيب يمه..  سويلي مجال

رحت تكتكت وسحبت الولد ودزيتهه
ما طولت عشر دقايق وطلعت صاحت اخوتهه يسلمون عليه حتى يروح ..

غاليه اخذت علاكتهه وصعدت .. وره شويه صعدت جانت هي تخابر كبل كلتله يلا باي باي وسدت تلفونهه وضلت تكولي ..
-يمممه احزري  هيين هديتي شنو ؟؟
- مكياج ؟ لو عطور؟
-غلططط العااب يمه مجموعه اميرات ديزني كلهاااااا
-هههههه وهذا مفرحج !!
- عجل ليش مايفرحني يمه اناا عندي كل اميرات ديزني اول مره بيتهم هداني
سنو وايت واليوم مشتريلي البقيه لان انا حكيتلو روح عمري هالاشياء
كلهم يمه تخيلي كلههههم هين عندي وكل وحده تتكبر وتصير هالطول
سندريلا وبيلا و مولان و ايرورا وميريدا
كلهن صارن عندي ههههههه
هاا وضلن ياسمين و إلسا و آنا حكالي على المره الجايه
-ههههه الله يسعدج ببناتج هذني ياعيني
-اوووف يمه ودي احضنهن وانااام لو ماادري حسين وجراح يخربوها عليه
- هههه لاحكه عليهن هنه الج باقيات اشبعي بيهن بغرفتج
-صح يمه ايمتى نرجع لحديثه اسامه حكالي الوضع صار احسن الحين
-بعد يمه مادري عند ابوج القرار
-زين يمه امانه ضميهم لبناتي هين مو تخلين حسين يدحكهن فدوه
-هههه زين عيني زين

اخذتهن ضميتهن بالكنتور وهي تفتر وتضحك فرحانه بيهن .. اعرف غاليه كلبها طفوولي
بحت بس لسانها مغطي عليها ..
ارتاح كلبي من عرفت اسامه يعرف جوهر وطبع غاليه وكل شخصيتها ..عرف شلون يسعدها وما استهزء بيها لان تحب الالعاب وهالاشياء هالشي كلش طمني على بنتي ..

وره اسبوعين اسامه دز فلوس الجهاز بيد جراح وغاليه تكولي .. اسامه يكول استعجلي جهزي كلشي قبل ماترجعون لحديثه

وصرنا نطلع اني وياهه للاعظميه مرات ناخذ عباس مرات حسين يعجبه يطلع
وهيج كضيناهه كل يومين نروح نشتري
جزء ..
كلنا حتى ماننخبص وننسى شي سوينه كل طلعه مخصصه لشي معين ..
اول شي بدينا بملابس البيت العاديه بعدين
بالكلبيات الفخمه وهي عجبها القفطان اكثر من الخليجي واخذت اثنين ..
بعدين بدينا بملابس الطلعه ماخذت هواي لان تكول حتى لو يطلعني مااطلع استحي ..
وصرنا نجهز ملابس النوم والداخليات بعدين المكياج جان تكولي .. اسامه يكول راح نسافر شهر عسل ولازم تاخذين شي رياضي باللبس
لان تنزعين النقاب ..
رجعنا مره ثانيه نشتري ملابس طلعه ومن سألها شنو المكان الي تروحوله ؟ شنو خطتكم وين تروحون شتسون حتى نعرف شنشتري
تكولي مادري كالي نسافر وبس ..

اشترينا اول شي قمصان طوال وستر واحذيه جان تكولي ... سألت اسامه وكالي اختاري وين يعجبج واني اختاريت تركيا كالي لعد خلي اكثر الملابس رياضيه واخذي الوان فاتح ..

وصرنا نشتري مثل ماطلب الاخ .. وكملناهن
جهزنا العطور والغسولات وهنا اجانه خبر
من الشيخ انُ صار وكت رجعتنا لحديثه

بدايه شهر الخامس راحو الشيخ وجراح و صكر واسر لحديثه حتى يشوفون البيوت وينظفوها و احنه بقينه نلم بالغراض ونحضر لرجعتنه ..

اسبوعين ورجعنه لحديثه ...
بشهر الخامس ٢٠١٧ رجعنه لديرتنا وبيوتنا وخيرنا ... جان كل وجه يفرح ويبجي بنفس الوكت .. كلها تدمع عينها بكل فرع او شارع ندخله قبل ما نوصل لبيوتنا ..

الولد جانو منظفين البيوت وراجعين صابغين البوب والحديقه راحعين مرتبيها والمضيف مبخر ومترتب وكأن البارحه عفنه بيوتنا
كلشي مرجعينه مثل كبل ...

بيومها اجتمعنا كلنه بيت الشيخه وتعشينه سوه براحه وفرح وبدينا نرتب الغراض نص بالليل ونص كملنه الصبح وطايرين من الفرح ببيوتنا ...

رجع المضيف مليان بالرجال والشيخ رجع لكشخته الاولانيه ووجهه يضحك صبح ومسا
رجع يكولي رتبيلي اليشمغ وعطريني بايدج
ورجع يجيني من الفجر بليله ام جراح

غاليه رتبت لعاباتهه الاميرات على ميز بصف جربايتهه وشابعتهن تصوير
تخلي حسين يصورهن لقطات بكاميرته
ويرتب الصور يفلترهن ويدزلهه
مخليتهن خلفيه جهازهه ومرات اذا وحدنه بالبيت تنزل وحده منهن وياهه وتضل ترتب بشعرهه وبس يجون اخوتهه تذبهه وتغطيهه بالكوشات ...

حسين راح لخواله بس حتى يمتحن اخير السنه واخذ وياه باقي اخوته لان كلهم عدهم امتحانات .. الشيخ دز وياهم مسواك كامل
لكعدتهم هناك ..

عرفت ان امي مريضه فد مره وتريد تشوفني
رحتلهه باخر يوم من امتحانات الولد
شفتهه صايره جلد وعظم ومتلفلفه بالبطانيه
ونايمه ويمهه علاكه الادويه ..

ردت اكعدهه وكرت شكوللهه ..
اكول يمه ماينطقها لساني .. اسميها باسم الجبير واني الجبيره ..
ضليت اباوعلهه وبعدين لزمت جتفهه وكعدتهه واني اكوللهه حجيه اكعدي

فتحت عينهه وضلت تباوعلي وكالتلي ..
- يمه العمر ماضل بي غير ايام ورايدتج تسامحيني
- اسامحج بس كوليلي ليش .. ليش كرهتيني
لهالدرجه

بجت واني كعدت يمهه على فراشهه وصارت تكولي...
-  ردت الفلوس محتاجتهه جنت وانتي جنتي سبيل الها
- اني سبيل لفلوسج تزوجيني لمحمد وتخليه يعيرني بيج !
- عبالي يحبج ويريد خاطرج ماعبالي يسوي بيج هالسوايه
- انتي تعرفين هو شسوه بيه ؟
-لا والله ماعرف بس اعرفه اذاج وجان جذاب وسكير
- اي زين خليج لاتعرفين احسن هو مات بعد والايام هذيج هم ماتت .. ليش ما حبيتي ابويه
جان زين وياج وويانه كلنه ليش عذبتيه !؟
-  ما تراهمنا بس اني ماكرهته ولا كرهتكم
بس حب المال وحاجته هو السبب
- الله يغفرلج ويغفرلنه مسامحه على كل شي
- اني ما عشت وياج ولا وكفتلج بشده
بس جنت راضيه عليج

دمعت عيني وهزيتلهه براسي وهي لزمت ايدي كالتلي ..
- انتي عيناً ابوج كل مااسمع عنج خبر بهالكبر اشوفج تشبهينه بكل صفاته
كون ربيتي ولدج على نفس مارباج ابوج ؟
-اي ربيتهم نفس الشي
- الحمدلله
- انتي عشتي مرتاحه ؟

ضليت اباوعلهه وانتظر منها جواب وهي كالتلي ..
- عشت مثل ما هويت بكل قوتي و يباس راسي بس ضليت احس بنقص ولليوم ماعرفته شنو
- الحمدلله على كل حال
- اختج دعاء راح تجي اليوم ابقي وتعشو سوه هنا انتي واخوتج وولدج
- ماشي

بقيت اباوعلهه وتباوعلي .. ماتخيلت بيوم اشوف امي هيج صايبهه الضعف وتحاجيني بهالنبره وتلزم ايدي وعينها تدمع عليه
بس شاء القدر وخلاها هيج ..

تعشينه هاليوم سوه .. مصطفى ومرته وجهاله وعلي ودعاء وابني حسين ورماح وعباس وصكر وحر واسر كلنه التمينه بسفره وحده
كدامهه وهي بس تباوعلنه وتبتسم ..

ثاني يوم رجعنه من الصبح اني والولد
واسبوع وتوفت امي ..
كالي بخبر وفاتهه الشيخ وضليت ساكته واباوعله وهو يعيدهه عليه ..
كلت الله يرحمهه ورحت لغرفتي ضليت كاعده ولازمه راسي ..
اجه كعد يمي وكالي ..
- خيرك يا يابه فهميني شسالفتك
- ما بيه شي بس صعبه واحسها كاسره كلبي
ان امي تموت وما يرف كلبي عليها او ابجي واصرخ مثل كل البنات على امهاتهن
ليش احسها عاديه معقول لهالدرجه اني كلبي ميت على امي ؟ يعني بنت عاقه اني لو شنو !
- الغلط مو منك يا عيني الغلط من طريقه عشرتكم هي الي خلتك هالشكل
- ما تمنيت انساهه بحياتهه وموتهه
بس هي ما تمنت قربي خافت بس على ذنبها وياي واخذت سماحه وراحت
- اذكري الله يابه اذكري الله وترحميلها

ضليت استغفر ربي واترحمتلهه وحضرت نفسي ثاني يوم اخذني الشيخ للفاتحه
كضيناهه بشكل عادي مااحس نفسي متأثره هواي بس كاسر كلبي انها راحت واني مااحس بيها ..

رجعنه لحديثه و مشت الايام عاديه ..
اسامه متخبل لان صارلهم عارض بزواجهم
غاليه تكول باقي بس يركع راسه بالحايط
ويكول اريد احجي ويه امج واستحي
كلتلهه لا يحاجيني احسن لان عيب الزواج وبعد حتى الاربعين ماطالعه ...

وره ما طلعت الاربعين جراح جاب بدلات غاليه اسامه مشتريهن الهه من تركيا كايللهه مايعجبني اي شي مستعمل من هنا وهناك ارخص واني بذوقي اشتري ..

شفناهن حلوات كلش بدله الحنه لونها تفاحي على مشمشي
غاليه كالت هو يحب هاللون اكثر كل الالوان
وبدله العرس مو كلش نفشه ولمع .. وماخذهه ردان كيبور حتى تاخذ راحتهه ويه اخوتهه
والطرحه طويله ..

ضلت غاليه معلكتهن ومعلكه وكت زواجهه على قرارنا ..

عدا شهرين على الاربعين كال امي وخابرني مصطفى .. كالي خلي يتزوجون خطيه ينتظرون منا لسنه وهو مادام طلعت الاربعين كافي بعد يحقلهم يتزوجون ومنطقتهم بعيده عنا خلي ياخذون راحتهم ..

كلت للشيخ كالي انتي الشغله راجعه الج
واني وافقت على زواجهم هالايام ..
كلشي عدهم جاهز بس راحو عقدو محكمه
وصار العقد بغداد لان اهل اسامه ينتظرونهم على الغدا ..

اني ما رحت دزيت ام جراح والشيخ واخوتهه جراح وحسين وياهه ...
من بعد موقف ام سالم حرمت هذاك البيت عليه ...
بس كسرت كلمتي يوم الي صار لازم نودي جهازهه ومالكيت اكو بنيه اكدر ادزهه بدالي
بس ام جراح وما قبلت تروح وحدهه الا وياهه اني .. وغاليه تخبلت من سمعت ماريد اروح ضلت تحوص الا اعرف شنو ليش متروحين تودين جهازي مو انتي امي منو يوكفلي غيرج ... تحججت بوفاه امي بس ماتعبر عليهه وعفتهه معلكه السالفه ماحجيت شي بس كلتلهه انطيهم خبر على جيتنه ..

رحت اني وام جراح اخذنا رماح وصلنه لبيت اسامه وبهاليوم اسامه جان بالشغل وسالم بالشغل .. تلكتنه ام اسامه والحجيه رحبن بينه بس ام سالم ماشفتهه .. وحتى ايوب ماشفته
من سألت ام اسامه كالت ايوب طالع من الصبح وام سالم بغرفتها ما طلعت اليوم ابد

ارتاحيت لهالشي كلش عبالك يعرف اني بشنو متقيده وخلاه سهله عليه ...
مرتاحه ان بنتي الوحيده راح تعيش بين ايد امينه مثل ايد ايوب ..

صعدنا لغرفتهه هاي اول مره اشوفهه
حلوه جبيره كنتورها ابيض على طول الحايط
وتقسيماته مرتبه وعمليه ..
لكيت ملابس اسامه مرتبه بجهه معزوله ويه غراضه كلهه والباقي فارغ لغاليه ..
مخلين فرشات اربعه وبطانيتين بخانه وحدهن
الغرفه مصبوغه بلون زيتوني لامع بضلع الجربايه الي لونها اسود والباقي ابيض بس مكان الشاشه محاوط باطار ذهبي وبي رفوف

رتبنه غراضهه واخته ويانه تساعدنه ونزلنه تغدينه وشربنا الجاي وسولفنه ويه الحجيه
وام اسامه كلش تنحب وعلى نياتهه مثل ما وصفهه ايوب ابد ما بالغ بخوفه عليهه
لان فعلاً فطيره وحتى ماتعرف تقرا وتكتب

رجعنه العصريه لحديثه وصلناهه بالليل
وارتاحيت من هذا الهم الجان على كلبي بشوفه ام سالم ..

وراهه باربع ايام صارت الحنه
البيت كله مخبوص بالتحضير .. بين الي متكفل بالطبخ وبين الي بالترتيب ..

سويناهه بيت الشيخه لان اكبر وجراح طلب هالشي .. كال اريد غاليه تنزف من بيتي ..

اني سويت جسمهه واني حضرت جنطتها للفندق وجنطه سفرهه واني فتحت وياهه موضوع ليله العرس وحجيت بي بتلميحات بسيطه لان هي تخجل هواي وكل شويه اسكتي واسكتي .. عاد رحت دزيتلهه فيديو تعليمي من اليوتيوب ..
اقراه والي اشوفه يفيدهه ادزلهه وبصباح الحنه سألتهه شفتي الي دزيتهن كلتلي اي
سكتت بعد عرفت انها فهمت الي اريد اوصله الهه ...

غاليه بحنتها مثل التفاحه كلشي بيهه مورد ومتفح .. ضحكتها خدودها جسمهه لون مكياجهه كله مثل ماتمنيته لبنتي ..

اني جنت لابسه اسود بس بشي يلائم هيج مناسبه ..
اسامه من اول ما كملت بالصالون خابرهه وكال اني وصلت منطقتكم دليني وين صالونج .. اخذت التلفون واني دليته
واجه اخذنا للبيت جان جايب وياه مصوره
وغاليه بدل ماتفرح جايهه يتصور وياهه بالحنه ويشوفهه طنكرت شلون مكعد وياه بنيه بالصدر من بغداد لحديثه وياه ومكايلي

ضلو بيتي ياخذون صور بس هي ماتقبل المصوره تصورهم الا سدت باب الهول وضلت تتعارك هي وياه ووين يلا فتحو وجانت الوجوه تضحك يلا عاد تصورو

بس كمل صور اخذ سيارته ورجع لبغداد
وصارت حنتهه حلوه وهي فرحتهه محليتهه

بليلتها نامت بحضني وبغرفتي والشيخ يمنه
نايم جنت امشي ايدي على شعرها وادعي بكلبي ..
ياربي تجعل هالزواج الها راحه وفرح
وكل امورها تتيسر بي وتصير فاتحه خير عليهم ويحبها الجبير والصغير ..

الليل كله اني امسح بدموعي وادعيلها واشم براسهه .. شكد فرحانه على فرحتهه وزواجهه من شخص وعائله مناسبه بس
مال تبعد عن عيني هاي كلبي ماتحملها
بالاخص هي صديقتي مو بس بنتي
متشاركين اني وياهه كلشي .. هي ماعدها غيري صديقه ولا اني .. علاقتنا اكبر من اي بنت عاديه وامها ..

بيوم عرسها زفيتها بدموعي ودعواتي
طلعت من بيتي مرتاحه مدللـه فرحانه واميره وراحت لبيت تبقى بي اميره مثل مارادت وطلبت وتمنت كل عمرها ..

.
.
.
يتبع

صباح الخير 🌷
ماكو نت ابد اببد ايرثلنك صايره زباله بس توصل اشعارات وكل قوتهه تفتح رساله بالتلي ..

كعدت اصلي وكلت خلي اشوف بلكي يكعد الحظ هسه
ومادري شوكت راح ينزل بس
اني داكتب هالشي بيوم الثلاثاء ساعه ٥:١٢ ص
&&
ابشركم اليوم حصلت رمز جيرانه 🌚
عدت الازمه ان شاء الله 💫
ارائكم لاتنسون تكتبولي 🥰
الختام بات قريب 🌷💓