حديثتي الشقراء

26/2

✨ حديثتي الشقراء ✨
🔹🔹

فريت من نومي على صوت اسامه وهو يحكيلي بنتك رضعيها ..
تباكيت والله على هالحال ماصارلي نص ساعه من غفيت وهاذي المره الخامسه الي اكعد بيهه بهالليل ..
تعبت اريد انام مثل خلك الله ..

اخذتها بحضني وارضعها وانا شبه مغفيه
اسامه يحاكيني حتى لا انسى نفسي واغفى عليها وبس شبعت اخذهه نومها حدرو

الصبح كعدت على صوت المنبه ساعه ٧
اسامه اليوم رحلتو للهند وهو بعدو نايم للحين
كسر كلبي الليل كلو صاحي عليها ماتهنى بنومتو ...

غسلت ونزلت حضرتلو الاكل وصعدت كعدته واخذت بنتي ارضعها وبعدين خليتها بفراشها ونزلت وياه ..
اكل وودعتو مثل كل مره ..

رجعت لبنتي بدلت ملابسها واخذتها ونزلت
تريكت وكعدت حدر الحجيه .. اخذتها مني تناغيلها وبنتي صافنه بوجهها تدحك وفاكه الحلك ..
نزل عمي صبح علينه واخذ مزنه من ايد الحجيه وضل يبوس بيهه وطلع بيهه للزرعات يسكيهن وهي بايدو ..

عمي متعلق بمزنه اكثر من اسامه نفسو
مرات اذا اسامه مسافر وانا وحدي هين بالغرفه بالليل وهي تصحى تبكي مااحس الا يدك الباب ويسألني خيرها .. واذا رضعت وشبعت يرجع ياخذها ويروح لمكتبو ينومها حدرو واضل انا الوب لا بيه امشيلو اخذها من حضنو ولا يجيني نوم وهي بعيده عني

اضل انتظرها ايمتى تجوع وتصحى تبكي حتى اروح اخذها وارجع انيمها حدري وارضعها ..

هديل من ساعه ما تصحى هي تفتر وراها ادحكها بيا حضن وتروح تكعد حدرها تصورها وتلاعبها ..

عمتي ام اسامه تعاتب بالكل لان ماينطوها مجال تاخذها بحضنها .. ودايماً تحكي ..
لا حضيت بحضن الولد ولا بنته ...

ام سالم مالها دخل كلش وبس رافعه خشمها علينه .. عرفت من هديل ان عمي متكاون وياهه بيوم الي رجعت انا لحديثه
وضاله هي اربع ايام ما تطلع من غرفتها ولا احد مدحكها .. وتالي رجع سالم للبيت يلا طلعت . .

عمي كل يوم الصبح بعد مايتريك ويسكي الزرعات يبدل ويطلع مانعرف وين يكضي وكتو وساعه ١٢ ونص ضبط لا يزيد عنها بيوم ولا يقل .. بهالوكت هو يرجع للبيت
يتغدا ويكعد يدحك تلفزيون والعصريه بمكتبو
تبدا هين اصوات الاغاني العريقه تملي المكان ..
عندو لابتوب وصوتو عالي مايوم نصاه ابد
لازم العصريه تتعالى اصوات الموسيقى والاغاني من كافه الانواع ..

انا من كثر الي سمعتو عن سالفتو كبل
ضليت اركز بكلمات الاغاني .. بنفسي افهم شي عن حالتو .. عمي من كثر الغموض الي بي يجذب ويثير الفضول .. كلشي عندو غامض وهادىء .. شكلو ونمط حياتو الخاص
محافظ على نمطه الستيني ..