✨حديثتي الشقراء ✨
***
حضنتها واني افكر لازم اسوي هالعيد مختلف
واخلي بي بصمه خاصه لضيفه الشيخ ..
لليل كملت شغلي ونزلت الكتاب وكعدت احدد الاكلات الي راح اسويها .. واكتب على جهه بورقه المكونات الي ناقصتني ...
ورحت خليت الورقه يم الشيخه وطفيت الضوا وطلعت .. جنت تعبانه ومابالي شي اسويه للشيخ
فحضرتله ماعون فواكه شيفتهن ورتبتهن وغطيتهن وصعدت نمت ...
ثاني يوم من كعدت احضر الريوك نزلو البنات من وكت اليوم وعرفت انهن يريدن يسون حمله تنظيف للبيت والحديقه ...
اني صارت حصتي تنظيف المطبخ والمخزن مالته
وهنه الباقي عليهن .. وره ماطلع الشيخ بدينا نشتغل واني كعدت جلفت كلشي بالكاونتر والشيخه دزتني اطلع من بوفيتها صياني نحاسيه منقشه
كالت هاي مخليتهه للضيافه واخذت وياهن مواعين كبار فرفوري ابيض وكعدت اجلف بيهن
لحد مالمعتهن ونشفتهن وصفطتهن بالكاونتر كلت هذني للضيافه بالعيد اقدم بيهن ....
راحت هي للسوك واني رجعت اكمل شغلي وبعدين حضرت الغدا وانتظرت البنات كملن شغلهن وسبحن يلا صبيت الغدا ..
شفت مغيرات الزوالي و وجوه المخاد والبردات والبيت يعط بريحه البخور كلت هاي الاجواء ناقصتهه ريحه الكليجه ولمتهه ..
ارتاحينه بنومه الظهريه وكعدنا العصر التمينه نشتغل بالكليجه ..الشيخه جانت هي تعجنهه بايدهه
تكول ماارتاح اذا مو عجين ايدي .. واني احضر بالقوالب وافلس الحلقوم وصفيه تفلس التمر
وكعدنا حطينه الصياني وبدينا نلفها وخلينه مناسك تكعد يم الفرن واحنه نسوي وننطيهه ..
صارت ساعه سته وبعدنه ممخلصين لان الحجيه عجنت بطشت شكبره ونلف وبعد بي سويناهه صدك مال عشيره ....
حضرت العشه وهنه كاعدات يكملن و وياهن ام حسن هم كعدت على الواهس والشيخ سمعنه طالع مايجي على العشه فكعدنا سويه ناكل وبعدهه لملمنه المطبخ اني وام جراح .. هي تحطلي واني اغسل ولاول مره تحجي وياي وتكولي ..
- ما تزوري اهلك صباح العيد
باوعتلهه وكلت ..
- لاا بعيدين همه ماكدر
- من ضلك منهم ببغداد
- عمامي اثنين واخواني
-هااا ماشاء الله عجل ليه تركتيهم وجيتي لهين
- سالفه طويله عوفيهه
- لا بالله ليه ؟ يعني عمامكم كيف خلوكي تمشي مع رجال غريب عنك
- شويه مشاكل بينه صارت وماتدخلو
- واخوتك عايشين لوحدهم الحين ؟
- لا اكو من يداريهم
- ليه ماضليتي مع اخوتك انتي وش سالفتك ماتعلميني عنها ليه ساكته واجر الحرف منك بالويل
- عفيه هذا شي خاص ومااحب احجي عنه
- من يومك ثقيله دم الله اعلم وش في وراكي
- ام جراح ليش تحجين هيج هسه اني مضوجتج بشي
YOU ARE READING
حديثتي الشقراء
Romanceليست مجرد سطور .. انها رواية خلود .. حكمه ومبادىء .. روايه يحتاجها من هم في أوج الشباب تجسيد لمعنى كلمه ' قدر ' حديثتي الشقراء .. خالده عصرنا الالفيني الغلاف من صديقتي الغاليه Marwa-Albidhani ✨..
