| عشگ المداح | ' باللهجة العراقية '

البارت السادس و العشرون

#عشگ المداح
#بقلم: الراوية
#البارت السادس و العشرون

بسم الله ❤
اللهم صلِ على محمد و آل محمد❤

.

ناز..

نطقت أمي كلامها..و حسيت گلبي وگف ل دقائق..
لزمتها من ايدها و خليتها تفوت جوه..تلگتنا الحجيه و هي تسأل على الي صار ب أمي
دخلنا لغرفة الگعده..و التمن البنات علينا

اجا عبدلله و گعد يمنا..و امي سولفت الي صار
خالي ڤيد من عرف انو امي تتواصل وي سيد..لازمها و ماخذ التلفون و كاسره..و ضاربها او بالاحرى كاتلها كتله و كاسر ايدها..السالفة صاير بال١ و نص بالليل

و ما مصدگه يجي الصبح..حتى ماخذه واحد من تلفون زوجة خالي و متصله ب سيد علمود يجي يأخذها

و هي لامه ملابسها و واگفه بالفرع تنتظرة..بالاول ماخذها للمستشفى و مجبرين ايدها و منظفين جروحها..
و مو بس هيچ..رايحه لمركز الشرطه و مشتكيه عليهم..اسمع حچيها و اني بداخلي بركان و يثور..انقهرت و حسيت الي صار لامي بسببي

من سألتها و شنو سولوهم الشرطه..گالت وقفوا خالچ بالحبس هسا..

ختمت كلامها و التفتت ل عبدلله الي گال

- و إني حچيت وي المحامي فارس..راح ارفع عليهم قضية الحادث

- بس شلون..كل الأدلة ماكو

ابتسمت ماما و هي تمد ايدها ل جيب التنوره الي لابستها و انطتني ميموري..باوعتله و گلت باستغراب

- ماما شنو هذا !

- اني مخليه رام بالتلفون..و من مرة حچيت وي خالچ چنت فاتحه تسجيل..و خالچ من كسر التلفون ما انتبه للميموري..خفت لا مكسور او تالف بس خلاه  السيد بتلفونه و اشتغل

باوعت ل عبدلله الي گعد يمي و گال بابتسامه

- يعني مصيرهم معلگ بهاي القطعة الصغيره

سكتت و ما عرفت شنو اجاوبه..باوعت ل ماما و رجعت باوعتله و هو يطمني بنظراته..

شوية و فاتت حنين و هي شايله ريان الي چانت تبچي

صبينا الغدا..و ما اكلت شوية ..چانت شايله هم و بنفس الوقت حسيتها مستحيه من عيالي..

بقيت طول اليوم بصفها..و بالليل نامت بغرفة الحجيه..
من تأكدت انو هي نايمه و ما تحتاج شي

فتت ل غرفتي..لگيت عبدلله مخلي ريان بحظنه و هو يلاعب بيها..ابتسمتله و اجيت گعدت يمه

باوعلي و تقرب و طبع بوسه خفيفه يم شفتي..
لزمت ايد ريان و اني امسح عليها بخفة گلت

- عبدلله

- عيونو

- صحيح باچر راح تروح ترفع القضية

تنهد و گال

- اي

باوعت بعيونه و گلت

- مو بيدي بس و الرب خايفة عليك منهم..انت شفت شنو سوو بيك بوقتها اجيت اموت و مريم العذراء

جر حسرة و هو يحاوط اكتافي و يقربني اله
غورقت عيوني و هو باسني من راسي و گال

- ناز..مقدر خوفچ بس مو اني الي اعوف حقي و حق اخوتي..انتي شفتي حالهم و شجرالهم
و بعدين خوالچ اذونا هيچ..مو بعيده يأذون غيرنا
ربچ ما يرضى هيچ والله..تريد حقك اخذو بس مو بهاي الطريقة

- و إذا رجعوا اذوك مرة الخ..خوالي و اعرفهم

- ربچ ويانا..و ماكو مكان للخوف ان شاء الله

سكتت و اني اسند راسي على صدره و اباوع ل ريان..الي تبتسملي ابتسمت بخفوت و تنهدت..اتمنى كلشي يعدي على خير
اريد اعيش بهدوء..أعيش بسلام افتقدته بسبب خوالي.
اريد اربي بنتي اني و سيد..اريد اخلي راسي على المخده بدون ما شايله هم باچر..لو خايفة شنو مظوم

اخذت ريان منه..و نومتها بمكانها..و فتحلي سيد ايده حتى اجي انام بصفة

فتحت شعري و تمددت و هو حاوط خصري و قربني اله
و اني احس بانفاسه تضرب رقبتي غمضت عيوني من طبع بوسة صغيره و گال بهمس

- لا تظلين شايله هم و خايفة

- بس اني ما حچيت

- مبين بعيونچ..

ابتسمت و التفتت اله و حاوطت رقبته بيديه و گلت بخفوت

- يعني تعرفني من نظرة عيني

- ما اكذب و اگول..اي حافظچ و حافظ تصرفاتچ‌ و عيونچ..لان كل واحد بينا ظام شي..مرات محد يفهمو
اني مرات اصيب و افهمچ من حركة عينچ‌.. و مرات لا ما افهمچ الا تجين و تحچيلي

- تعرف احب صراحتك

حچيتها بهمس..و هو قرب وجهه من وجهي و طبع بوسه جوه عيني و گال

- و اني احبچ كلچ..

الصبح من گعدنا..سويتله الريوگ
گعد يتريگ و هو يحچي وي المحامي بالتلفون..ماما هماتين راح تروح وياه

و عمار گال اجي وياك لأن اني واحد من المتضررين..چنت خايفة عليهم و اني مخليه ايدي على گلبي

طلعوا و ودعته يم الباب..و إني عيوني مدمعه..وگفت يمي الحجيه و لزمت ايدي و گالت

- يمه لا تخافين..ربچ يحرسهم من عالي سماه
هو رايح ياخذ حقو مو يظلم

هزيت راسي ب اي و مسحت دمعتي..

رجعت فتت جوه و اني طول اليوم شايله هم و خايفة..محمد راد يطلعني من الضوجه الي محاوطتني..ف قرر يأخذني اني و تقيه لبستانهم..و حنين گالت أجي وياكم..و ما حب يفشلها و گاللها تعالي..رحنا بالسيارة و قبل لا نوصل للبستان نزلنا منها و كملنا الطريق مشي..

مثل ما گال بس تشوفين الشجر و الزرع راح ترتاحين..
هو يمشي گدامنا و لازم ايد تقيه..اباوعله ما ترك ايدها من طلعنا من باب البيت.

بقينا نص ساعة تقريباً..و رجعنا للبيت
بقيت انتظر رجعت عبدلله أتصلت بيه و أكثر من مرة
و ما رد عليه..وراها بساعة رجع أتصل بيه و هو يگلي رجعنا هيانه بالطريق

من اجوا چانوا متغدين..گعدنا و سولف سيد انو رفعوا القضية..و انطوا كل اقوالهم و التسجيل سمعته المحكمه..بس بقت كم شغلة تخلص
ف لذلك للجلسة الثانيه بعد اسبوع..

صعد فوگ و إني اخذت ريان و صعدت وراه..گال حظريلي ملابس اريد اسبح
حظرتله و فات للحمام

چان تلفونه على الميز..دگ و فصل و اني ما رحت اله گلت يمكن واحد من معارفة
بس وراها بدت تجي رسائل ما گدرت الا اروح اشوفهن..اخذت التلفون و هو چان مخلي رمز..بس اني اعرفه لأن گالي عليه

توي اجيت اشوف منو متصل..مد ايديه و حاوط خصري و گال

- ها صرنا نشك

انداريت اله و بلعت ريگي و گلت و اني انطيه التلفون

- و الرب ما قريت حرف..بس اتصال اجاك و رسائل هواي

ابتسم هو و أخذه مني و فتح الرسائل..و گال

- خلي نشوف منو هذا

حچاها و فتح الرسائل و شو فجاة وجهه انگلب..
عگد حاجبه و اني حسيت اكو شي صاير..
غلق التلفون و خلاه على الميز..و يمكن حتى يضيع الموضوع حاوط رقبتي و گال بصوت شبه همس

- ناز..ما ظل شي و تخلص سالفة القضية وي خوالچ
و أريد اخذچ لمكان حيل حلو

عگدت حاجبي و گلت

- وين !

قربني اله و أردف

- اخذچ للشمال..لدهوك
للجبال و الطبيعة..

ابتسمت و هو كمل كلامه بنبفس النبرة

- اني اميل للطبيعة و الخضار اكثر من المدن..بس إذا ردتي نغير الوجهة

هزيت راسي ب لا..و گلت

- لا نبقى على قرارك..هو اكو احلى من الطبيعة

- اي انتي

حچاها و هي يتقرب و يطبع بوسة على شفتي..
رفعني شوية عن الگاع و هو يحاوط خصري..فجاة
يان گامت تبچي و هو وخرني وجر حسرة..
رحت الها و اني أخذها ل حظني و گال

- شبيها يعني طول عمرها ساكته من استخليت بيچ الأخت تذكرت تبچي

گمت اضحك و هو بادلني الضحكه..
بالأيام الي مرت..چنت احاول اكون طبيعيه..يعني على الأقل گدام عبدلله..الي دائماً يگلي انتي تخافين من اي شي

اما ماما ف بقت عدنا..شوية تحسنت حالتها
و جروحها بدت تختفي بس الكسر ما زال

بيوم الي چانت جلسة المحكمه الثانيه.
طلعوا عمار و سيد و محمد و امي..چنت خايفة
بس من ناحية ثانيه مطمنه و إني متأكده راح يربحون القضية

شي بداخلي چانت متأكد مئة بالمئة..و من رجعوا الظهر قريب الساعة ال٢ و ربع...
احجوا تلگيتهم عند الباب..و بس شفت امي و البسمه مرسومه على ملامحها..عرفت انو ربحنا..
رحت بسرعة و حظنتها بقوة و هي گالت

- خالچ‌ ڤيد انسجن

وخرت عنها و هي انمسحت ابتسامتها..صح فرحت
بس مهما يصير يبقى خالي..رغم ذب عليه تهمه شرف و راد يقتل زوجي..بس ابقى بصغري شلون چان يحبني
يشيلني بحظنه و يأخذني للاسواق و هو يشتريلي حلويات..

غورقت غيوني و اجا سيد يمي و گال

- تخفف السجن من ٣ سنوات ل سنة و نص

هزيت راسي ب أي و مسحت دمعتي
و فتت جوه..و إني احس بوجع بگلبي..على خالي و على حاله
من جبروته و ظلمه للغير انذب بالسجن..
و راح تضيع من عنده ايام و شهور بعيد عن عائلته و زوجته

.

تقيه..
بعد مرور شهرين

گاعده على التخت و اني ادحگ للتلفون
و بالتحديد ببرنامج الواتساب..صار اكثر من نص ساعة و علامة متصل الآن يم اسم محمد..

سديت التلفون بعصبيه و اني اذبو على التخت و گمت من مكاني

گمت امسح على شعري و اني اهدي من نفسي و انو ما يجي و اسوي مشكله او بالاحرى كوانه..

رجعت گعدت على التخت و إني اتذكر انو هالشي كلو من ايدي..ادري بي ما يگدر الا يصاحب و يحچي وي نسوان..و اني الثوله الي صدگتو من وعدني بليلة عرسنا انو بعد ما يحچي

و خلال هالشهرين..اكتشفت اثنين يراسلهن..و من سألتو ما نكر..بالعكس اعترف بعظمة السانو
گال اريد امهد الهن الكلام و اگوللهن ما بينا حچي بعد
و صحيح سوه هيچ و بطل يحچي وياهن..بس اني شمدريني بس هذني الاثنين
يمكن أربعة لو عشره..

جريت حسرة و دحگت للساعة..چانت بال٤ و ربع
شوية و يجي من دوامو

طلعت من الغرفة و فتت للمطبخ..لگيت حنين و فاطمه توي بدن يلفن بالكبة..گعدت وياهن و بديت أساعدهن

جتي ناز و هي شايله ريان..حطتها بالحجله و گعدت تساعد بينا

ادحگ على حنين و الابتسامه على ملامحها..قبل أسبوعين عرفت انو هي حامل...بصراحة فرحتلها
كل البيت فرحلها...و الحجيه وزعت جكليت على الجوارين..
دعيت انو يجي يوم و اني همين الله يرزقني و احمل
بلكي على الأقل محمد يعقل و يعوف هاي السوالف..

كملنا لف الكبة و جه محمد..غسلت ايديه و رحت حظرتلو الحمام..بس ما دحگت بوجهو..ردت ابين الو انو اني زعلانة

من طلع من الحمام انتبهلي و سألني شبيه..و إني ما سكتت سألتو شعندك متصل لأكثر من ساعة بالواتساب..اني حافظة محمد
و عرفتو تردد بالحچي

اخر شي جر التلفون و ناوشنيا..بس گبلها فتح الواتساب على اخر محادثه
چان بس رقم..گعدت على التخت و هو گال اقري

گعدت اقرا و اني احس الدم فار براسي
اول المحادثه چانت تحچي وياه بس هو شكلو مو عارفها..داگ الميانه وياها و مسولفها عنو و عن شغلو
كل هذا و هو ما يعرف منو هاي..

بالاخير طالعه وحده چان مصادقها..من عارفها گبل مرزلها و گايللها عوفيني بحالي
اغلب الحچي يگوللها ما بينا شي و اني تزوجت

بس شيفيد هالحچي و هو حاچي وياها و طاگ حنچ

ما عرفت شسوي..قهر و ظيم ترس گلبي
ذبيت التلفون على الگاع و تطشر

گمت ابچي ما ادري على قهري منو..لو على التلفون الي انكسر

گلت هسا يصيح عليه..هسا يعصب و يمكن يوصل انو يضربني..بس حسيت على ايديه تحاوطني من اكتافي..و شابكني

گمت ابچي و اني احچي بغصة

- ليش محمد هاا..مو وعدتني انو بعد ما تسولف وياهم ليش تكسر وعدك ليه ليش

ما جاوبني لو بحرف واحد...و هو يرجع يشبكني و يدفن راسي بصدرو..جيت اوخر عنو بس هو چان يشبكني اكثر و يگول

- حقچ..والله حقچ

- كل مرة اگول راح تتعدل..كل مرة اگول بعد ما عليه بيهن تگلي انتي بس الي بگلبي و عيني ما تشوف غير‌چ بس ترجع تصادق و تصاحب رغم اني ما مقصره وياك بشي

حچيتها و بعدتو عني..و هو حاوط وجهي بيديه اثنينهن و گال بصوت ناصي

- كافي تقيه فدوه اروحلچ
اسف والله..و وعد حتى رقمي راح اغيرو و حسابي

- ما اريد وعود محمد..اريد شي ملموس
كافي توعدني و ما توفي بوعدك كاافي

- تقيه..من البداية رضيتي بيه ليش هسا تفطنتني ! تعرفيني منو اني و شنو..محد جبرچ على الموافقه

- يعني الحچي صار هيچ !! مو انت وعدتني انو تتغير

تحاشى انو يدحگ بعيوني..
دفعتو عني..و دموعي تحدر على خدي

- بليلة عرسنا وعدتني..و ما وفيت رجعت تحچي وي اثنين مو بس وحده
و هسا تحچي وي هاي..محمد إذا اني مقصره وياك گولي..

- ما مقصره ما مقصره..بس هذا اني عجبچ عجبچ
ما عجبچ طبچ مرض..مليون مرة گلتلچ هذا اني و هاي شخصيتي
صاحب نسوان و ما اگدر اكتفي بوحده بعد تريدين حچي اكثر من هذا !!

ظليت صافنه عليه..و إني اعض على شفتي كاتمه دموعي
گبل لا اروح صوبو و إضربو على صدرو و احچي و ابچي بكل حرگة گلب..و هو عبالك صنم ظل بمكانو

على صوت صياحي فات سيد و عمار و الحجيه..و الاخيرة گعدت تولو و هي تگوا عوفي زلمتچ..
زلمتي الي بس شاف اخواني دفعني و صاح بيه بعصبيه

- عاد كافي فضحتيناا..هذوله اخوانچ و اشكيلهم
گوليلهم رجلي يخوني لو اگوللهم اني

فتحت عيوني على وسعهم..و الساني انربط

اتجهه للكنتور و فتح باب خزانتو..و بالمجر الي داخل الخزانة گعد يدور شي
آخر شي طلع تلفون آخر و ذبو على التخت و گال

- و هذا مظموم عنچ..احاچي بي مو بس وحده
لا بگد شعر راسچ..

- الله يطيح حظك يا ناقص..

صاح بي سيد..الي هجم عليه و انطاه بوكس بنص وجوهو خلاه يرجع ليورا و هو يكمش خشمو..و مو بس هيچ رجع يضرب بيه
و محمد همين ما سكت همين ضرب سيد
تدخلوا عمار و ياسر و هما يفاككوهم..ياسر ما چان فاهم القصة..ف حسبالوا سيد هو العايل

بس دره من عبدلله الي گالوا ورا ما وخرو عن محمد

- عوفني اسگط عالساقط المحد عرف يربيه..بكل عين صلافة و ما حاطلنا لا قدر و لا قيمة گدامنا يگول ل تقيه مصادق  عليچ..والله مو صوچو صوچنا احنا الي زوجنا اختنا

و ياسر بس سمع هيچ..تخبل و صار عمار بدل لا يحير بواحد صار حاير بثنين

و على اصواتنا جني البنوات..صنمن بمكانهن و هن يشوفن عركة الإخوان..بس ناز الوحيده الي تدخلت
و هي تريد توخر سيد عنهم

اما الحجيه بدل لا توگف وياي..على الي سمعتو من محمد
گعدت تحچي عليه و اني گبتت النار بينهم

دحگتلها و الدمعه بعيني..
و گدر اخيراً عمار و ناز يوخرونهم عن محمد الي صار  مدمي

گوه طلعهم عمار و طببهم للهول و هو يسد الباب وراهم..و قفلو بالمفتاح
بس ما چان منتبه للباب الثاني

توي طاب للغرفة و هو يريد يتفاهم
رجعوا سيد و ياسر من الباب الثاني..و همين گوه سكتهم و هو لأول مرة يصيح بيهم...

سكتو و اني وگفت يمو و محمد گبالنا يمسح بدمو
و لأن ما اگدر اشوفو متأذي..و لان هو رجلي وخرت من يم عمار و رحت صوبو تا امسح دمايتو
بس هو كل الي سواه دفعني و هو يصيح بيه

گمت ابچي و سيد رجع تخبل و هو يصيح عليه...

ما چان بيد الحجيه الا تصيح بيهم و تگوللهم خلولي قيمة..سكتوا و صارت الغرفة بحالة سكون فضيعه..

جر عمار حسرة و گال

- احچوا شنو اساس المشكله

- هه خلي سيد يحچيلك..

حچاها محمد بسخرية و هو يتناوش كلينسه و يمسح خشمو

استغفر عمار و هو يرجع يسأل
بس وجه الكلام عليه..و إني سكتت لحظات و گلت اقصر الشر و أسكت
بس محمد چان عندو قرار ثاني.
و هو يگوللهم

- لگفتني احچي وي وحده يعني شصاير

- و فوگاها بكل عين وقحه تحچي..عمت عين حظي على هيچ نسيت..

حچاها سيد و محمد بس أبتسم باستهزاء
ظليت ادحگلو و عيوني تصب دمع..اريدو بس يدحگ بعيوني و تا يبطل يجرح بيه
اني الي شگد تغاضيت عن چثير اشياء علمودو..

ردتو بس يعتذر و يگول اوعدچ بس ما اسوي هيچ‌..
على الأقل گبال اخوتي

سألني عمار شصار بالتفصيل..و إني دنگت راسي و گعدت اسولف و اني ما احط عيني بعينو..

و هو ما چان يدافع عن نفسو...لا بالعكس مثل ما عهدتو يحچي و لا يهمو مشاعر الآخرين

الحجيه فجاة غيرت رأييها و صارت وياي و هي تلوم بمحمد..
الي و لا دار بال..يگول هذا اني و هاي شخصيتي
هي وافقت عليه رغم تعرفني حق المعرفة و ابو طبع ما يغير طبعو

ضحك عبدلله و گال

- والله صدگ‌ ذيل الچلب ما ينعدل..
من طاح حظك والله..خللينا حشمه و قدر
بس تدري مو صوچها من وافقت..يمكن گالت يتغير و هذا ابن عمي و ربى ويانا..بس صوچنا احنا خوتها الي زوجناك اياها و نعرفك واحد ناقص و سگط فوگاها

- عبدلله كافي تذب حچي و تهيني..بدل لا تحچي عليه ما حچيت عليها هي الي رفضت المعاريس
و فسخت خطوبتها من سامي علمودي

صنمت بمكاني و الأنظار كلها توجهت عليه...
دحگتلو بعتب..و هو تحاشى يحط عينو بعيني..
اعرفو صار عصبي..ادري انزعج لأن كلها حچت عليه..بس ما يصل الحال انو يگعد يحچي بالماضي
يحچي عن اشياء سويتها علمودو لان احبو

رفعت راسي بخجل من گال عمار

- من الأخير محمد..تعال اعتذر منها و أخذ بخاطرها
و سدو الموضوع..عيب عليك تحچي هيچ على مرتك
اذا فسخت خطوبتها من سامي لان حابتك..ف إني ما الومها..فسخت گبل احسن من ما تتندم بعدين..
و شي آخر حط الها قيمة و قدر گاعد تعايرها گبالنا على حبها الك..

ما جاوبو بحرف واحد..انتظرت كلمة منو بس خذلني و ظل ساكت
جاي فاطمه صوبي بعد ما صاحلها عمار..اخذتني هي و حنين و ناز و اني دموعي تگع علةى خدي..و أجر اذيال الخيبة وراية

طبيت ل غرفة عمار و خطية البنات گعدن يواسن بيه
و انو راح يرجع يعتذر منچ..هو هسا عصبي و ما يعرف شيحچي.. يمكن ربع ساعة و صار هدوء بالبيت..فات عمار و دحگ للبنوات بنظرة انو يطلعن..طلعن و ظلينا اني وياه

بس فجاة فات سيد..گالو عمار

- سيد اذا تتعصب عوفني وياها

- لا تخاف ما احچي

حچاها و گعد بصفي على جهتي اليمنى
و على اليسرى عمار

الي تحمحم و گال

- اي تقيه..احچيلي

- شنو احچيلك ! انت سمعت كلشي صار

- لا على سالفة سامي و فسخت خطوبتچ منو

- عمار خوية..سالفة انسدت

حچاها سيد و دحگلي..و عمار جاوبو

- اعرف انسدت و اني ما عندي اعتراض
و ارجع اگول مثل ما گلت گبال محمد..احسن فسختي من الاول بدل لا تتندمين بعدين..بس الي اريد افهمو..انتي و محمد من زمان واحد رايد الآخر و محد حچه

استحيت اگو لا...بس اني رايدتو..بس دحگت ل سيد الي  من خلال نظراتو افتهمت انو لازم احچي و ما اظم شي

- اني فسخت لأن چنت احبو..بس الله شاهد هو ما يعرف
الا ناز حچتلو

جر حسرة و گال عمار

- و وراها هو رادچ و خطبچ..بس سؤال ليش رفضتيه اول مرة !

- چنت حسبالي يشفق عليه و خطبني
بس بعدين حچه وياي و گال لا رايدچ..و صار النصيب

تنهد عمار و ظل ساكت لحظات..
دحگت ل سيد الي گال

- و الاخ بدل لا يبطل سوالف المزعطه
زاد..و فوگاها عندو جهاز ثاني..و يحچي بي..اوف يا تقيه شورطچ بي

- سيد قسمه و نصيب..و تقيه هيچ مكتوبلها
بس هسا مشكلتنا مو وي تقيه و ليش وافقت..المشكله وي محمد الي ما ناوي يعترف بخطأو

انداريت ل سيد الي كمل ورا ما سكت عمار

- زين تقيه انني ليش من الأول ما حچيتي ! ليش ظليتي ساكته

دمعت عيوني و اني اگول

- گلت يجي يوم و يتعدل..ما دريت انو ابو طبع ما يغير طبعو

ما گدرت اكتم دموعي أكثر و گمت ابچي..ابچي من قهري و خذلاني من محمد
سيد  من شافني شلون ابچي سحبني لحظنو و هو يسكت بيه..و عمار يمسح  على ايدي و يگلي بطلي بچي ما يستاهل دمعه من عينچ..

من طلعت من غرفة عمار ورا ما حسيت براحه..عرفت انو محمد طالع من البيت
على العشا خابرو عمار و ما رد عليه..گوه اكلت و اني نفسي مسدوده
و الحمدلله اهلي ما رجعوا فتحوا الموضوع..

بالليل الحجيه ما خلتني احدر جوه..ف اخذتني فوگ بغرفتها تا انام

هي نامت..و الخلق كلها اخذها النوم  و ظليت اني انتظر رجعتو..ورا كل الي سواه بيه بعدني ما شايله بگلبي عليه

حدرت جوه و اني انتظرو بالطرمة..الجو بدا يتغير و البرد خف
لامه رجليه ل صدري و اني انتظرو يرجع
انفتح باب الحوش و فات هو..شافني گاعده  و جه صوبي

گمت على حيلي..و هو ظل ساكت و اني ما عرفت شحچي
كمش ايدي و فتنا جوه
اخذني للغرفة و سد الباب وراه..خفت منو و من سكوتو

گبل يلا يتقرب و هو يأخذني لحظنو..و اني عبالك عيوني حنفيه و انفتحت گمت ابچي و هو يمسح على شعري ويسكت بيه..

چنت منتظرة منو هالحضن..و انو نرجع لبعض
و صدگ رجعنا..أخذني للتخت و حظني و هو يحچي يم اذني و يتعذر مني على كل كلمة گالها بحقي
و گال من باچر اعتذر من اخوتچ
و التلفون كسرتتدو و اشتريت خط جديد
چنت اسمعلو و إني ابتسم مثل الثوله..

نمت هذيچ الليلة و هو حاظني

و من  گعدت الصبح..تلمست مكانو چان فارغ
انداريت للجهة الثانيه و عگدت حاجبي من لگيتو گاعد يحط هدومو بالجنطه
صابني الهلع و الخوف انو راح يعوفني و يروح بسبب الصار البارحه

گمت على حيلي و اني اگول بشفة ترجف

- وين ؟ وين تريد تروح

رفع راسو عليه و أبتسم و هو يعوف الي بيدو..جه صوبي و هو يحاوط وجهي و گال

- تقيه شبيچ نسيتي موضوع سفرتي لأمريكا علمود دراستي

- بس..بس ليش هسا

- احسن هسا..اني حيل تأخرت

دموعي وگعت و هو رجع يلم بهدومو
و اني گلت بغصة

- و إني !

- تقيه..دراستي مهمه والله

- و اني مو مهمه بحياتك  !

جر حسرة و عاف الجنطه و اندار عليه و گال

- تقيه هذا حلمي
و بعدين اذا تريدين تروحين وياي عادي..ورا ما اسافر حظري جوازچ و كلشي و الحگيني

نبرة صوتو نظرات عيونو..كلها خذلان الي
يا ريت گايل انتظرچ والله چان رحت وياه
وگعت دموعي على خدي و اني اگول

- زين انتظرني علما اكمل كلشي..و نسافر سوية

- وإذا ما كمل كلشي ! تضيع عليه ايام

- محمد ليش تسوي بيه هيچ !
كلو علمود سالفة البارحه..مو بالليل تصالحنا

التفتت عليه و گال بشبه عصبيه

-يعني ليش تحسسيني انو اني هلگد مهتم بالموضوع ! گتلچ سديه و كافي تروحين و ترجعين عليه

كلامو اجا مثل السچينه بنص خاصرتي..گلت كافي تقيه اهدرتي كرامتچ و نزلتي نفسچ الو و هو و لا داير بال..
هزيت راسي ب اي و گلت

- خوش..تروح و ترجع بالسلامه

حچيتها و إني اطلع من الغرفة و أسد الباب وراية..و يمكن وي سدت الباب انسد اخر قرار صاح بيني و بين محمد

.

ناز..

اباوع ل تقيه الي دتسوي بالعشا ويانا
الوجه ذبلان و العيون شاحبه..هيچ سوه بيها فراق محمد !

اسبوعين من الفراق غيرنها ١٨٠ درجة..
اباوع الها و اگول يا رب لا تخليني بنفس حالها..ما بيه طاقة تحمل افترق عن سيد..

محمد الكل انتبه اله انو تغير..سافر هيچ فجاة
و حتى اتصال قليل كُلش يتصل يگول مشغول..ابدأ ما فتح ويانا اتصال كاميرا..بس مكالمة على الفيس على تلفون عمار..

اما تقيه تگول مرة وحده لو اثنين حچه وياي..
دگ تلفوني..و جريت حسرة من باوعت على الرقم الي اعتلى الشاشه و بجانبة رساله..نفس كل مرة انطيتها حذف بدون ما اقراها..

انسان صارله اسبوع يزعج بيه..يتصل و انطيه رفض و ما اجاوبة..و يدزلي رسائل ردي و اريد احچي وياچ

رجع أتصل و گبل انطيته حظر..رجعت التلفون لجيب دشداشتي و كملت شغلي وي البنات..

بالليل من صعدنا فوگ..چنت انوم ب ريان
انفتح الباب و دخل سيد..بس حسيته مو على بعضه
وجهه مو طبيعي و عاگد حاجبه
سألته شبيك و ما رد..و من صحتله مرة ثانيه جاوبني بنتره انو ما بيه شي

ف اني سكتت و گلت هو من يهدأ يحاچيني
نام من وكت و اني كملت ريان
و رحت مددت بصفة ورا ما طفيت الضو
باوعت اله و گلت بصوت خافت

- عبدلله..ليش ضايج هيچ صاير شي !

اندار عليه و هو يعگد حواجبه و گال

- ما بيه راسي يوجعني

سكتت و اني اوخر عنه شوية..دگ تلفوني
و هو گبل گال

- منو

باوعت اله و گلت

- بعدني هياني ! ما شفت

رحتله و حسيت صدگ صاير شي
اول مرة سيد يسويها ويسألني منو خابرچ
أخذت التلفون و لگيت رقم ماما

ماما ورا اسبوعين من سجن خالي ڤيد..إتصل بيها خالي الچبير..انو هو رجع للعراق و راح يستقر هنا
چانت متردده و خايفة منه..بس هو وعدها و گاللها اني اخوچ و ما اذيچ
و صدگ راحت اله و گعدت يمه هو و زوجته و اولادة ال٣
و استقرت عنده..من أتصل بيها تگول مرتاحه و خالچ ما مقصر ويايه بشي..

حچيت وياها شوية و سديت التلفون..و رجعت للچرباية

تنهدت من شفت سيد يدحگ للسگف و هو ساكت بس حسيتو يفكر بشي

سكتت و ما حچيت..لان مرتين اسأله و ينكر ..لو يريدني اعرف چان حچه..

و مرت يومين على هذا الحادث

چانت الدنيا ظهر ورا الغدا..يوم جمعة
چان سيد  متمدد على الچرباية و يريد ينام..و إني دارتب بالملابس بالكنتور لان غسلتهن..

فجأة اجاني إتصال..و من شفت منو لگيته رقم غريب
ما فكرت و لا لحظه انو اني اجاوبه
انطينه ل سيد الي استغرب من انطيته التلفون
و هو عگد حواجبه من شاف الرقم غريب

رد عليه و گال

- الو

سكت سيد و باوعلي و گال

- هذا رقم مرتي منو انت

بلعت ريگي و حسيت بخوف..لان طريقة كلام عبدلله چانت بنبرة عصبيه

گام على حيله و گال

- شو گمت تلوص بحچيك ! منين تعرفها حتى تسأل شلونها

طگطگت أصابعي و اني اتقرب اله
هو باوع عليه و رجع گال

- منو دزك عليه !!
و انت صارلك شگد تتصل !

- الوو

گام يحچي سيد و يصيح الو و هو ما يرد

اخر شي غلق الخط و باوع عليه و گال گبل

- ناز احچي الصحيح..رقم يتصل عليچ و يدزلچ رسايل

هزيت راسي ب اي..و رجعت احچي بغصة

- بس والرب انطيته حظر و حتى الرسائل احذفهن
و لا مرة جاوبته

عيوني غورقت و هو جر حسرة و گام يمسح على شعره..اباوعله شلون يروح و يرجع بالغرفة و اسمعه يتمتم و مرة يرجع يستغفر ربه

ما فهمت شنو الصار...و خفت اسأله لو يروح يعصب عليه

بلعت ريگي و گلت

- عبدلله منو هذا

- واحد ما عنده سالفة..يدگد على الأرقام و يدور تعارف

عگدت حاجبي و اني اتذكر كلامه قبل يومين..من اتصلت ماما و سألني منو

بس لا حسباله اكو شي بينا..اجيت ناحيته و گلت

- بس لا شكيت بيه !  من أتصلت ماما

غمض عيونه و گال

- الله يلعن الشيطان..و الله ....استغفر الله

و بقهر گلت

- يعني شكيت انو داخونك

- ناز شهل الحچي ! والله ما شكيت بيچ
بس غير كلامها خلاني اتخوف

- منوو

تسألت و هو تنهد و گال

- گبل ٣ ايام من رحت ل بيت خالي
من شوية انتكس من طلعت منهم لحگتني أحلام و هي تگول مرتك شلونها..استغربت سؤالها و گبل گلتلها انتي شعليچ..و هي گبل گالتلي دير بالك و راقب تلفونها

والله طلعت كلامها من راسي..لأن ادري بيها وحده تريد تخرب بينا..بس بنفس اليوم السالتچ بي شفت تلفونچ يدگ برقم غريب..ما اگلچ ما لعب گلبي من الرقم..فتحت الخط و محد جاوبني
گبل انطيتو حظر و ما حچيتلچ.. بس هسا من اتصل گال متوهم..

غمضت عيوني و گمت ابچي و هو حظني و گام يسكت بيه..و إني بقهر حچيت

- يعني تصدگ ب احلام و تشك بيه

- ناز اني ما شكيت بيچ والله
بس استغربت من الوضع لا اكثر..احلام تگول دير بالك و من هين الاتصالات الغريبه

وخرت عنه و گلت

- المتصل شنو گالك

- ما گال شي..الموضوع سديه
و اني اعرف شلون احله

سكتت و ما حچيت شي..بس ظليت ضايجه
ضجت من شك بيه..بس مرات اگول يمكن حقه شاف الرقم الي لح هواي بالاتصال بيه

باسني من راسي و هو يرجع يعتذر..و إني سديت السالفة

مدد على الچربايه و أخذني لحظنه..باسني من رگبتي و هو يگول

- لا تفكرين لحظه انو اشك بيچ ناز..بس ضجت لأن ما حچيتيلي على الرقم

- ما درت بال اله..گلت يمل و يبطل إتصال

توي نريد نغفى و ما حسينا الا حسبنا صوت صياح جاي من الممر

خفنا و طلعنا نشوف شنو صار..
صنمت بمكاني من لگينا تقيه واگعه يم الدرج و بقعة دم جواها..و عمار يصيحلنا..اباوعلها لا ايد و لا رجل
مثل الجثة بين ايدين أخوها

.

السلام عليكم شلونكم حبايب قلبي ان شاء الله الكل بخير
اول شي والله اعتذر على التأخير الي صار

بس الاشتراك خلص و هسا فعلنا و نشرت هسا البارت

اتمنى البارت عجبكم

شنو ارائكم و توقعاتكم ؟

و ها للعلم القصة قاربت كلشش على الانتهاء
يعني بارت لو بارتين ☻💔

و ها (٢) شبي محمد 😐💔
اني حرت وياه بصراحه☻☻☻
انتوا همين حرتوا مو 😂💔

و سالفة الاتصالات الي اجت على ناز شنو قصتها
و يا ترى سيد عرف سالفتهن !

و اخيراً تقيه شبيها !

و بس والله

نلتقي على خير احبتي
اذا كدرت اكمل بارت ثاني انشر بنفس توقيتنا كل يوم..يعني اذا گدرت