| عشگ المداح | ' باللهجة العراقية '

البارت الرابع

#عشگ المداح
#بقلم: الراوية
#البارت الرابع

بسم الله ❤
اللهم صلِ على محمد و آل محمد❤

.

ناز..

الظهر چنت بالمطبخ وي البنات..گاعده على الطاوله و اني على أعصابي
لحد هسا ما اتصل و لا انطاني خبر..اطرق على الطاوله و اصدر صوت يبعث للبقيه انو اني متوتره
جريت حسرة و باوعت ل تقيه الي تباوعلي و هي تبتسم تحاول انو اطمني

گمت على حيلي ورا ما نادتني تقيه لشغله..اول ما طلعنا من باب المطبخ
انفتح باب الصاله و طلع منه سيد و هو مخلي التلفون على أذنه..أشر بيديه يعني تعالي
حسبالي يقصد تقيه الي تحركت من مكانها بس هو رجع أشر عليه

هي رجعت لمكانها و اني تقدمت ناحيته
فات هو و اني فتت وراه..چان محد موجود بس الحجيه و محمد
الي متكي على يدة القنفه و هو يباوع لتلفونه من فتت رفع راسه الي

تجاهلت نظراته و گلت

- طلبتني سيد

أشر على التلفون و اني تنهدت شوية و انطاني التلفون و گال

- صاحب الرقم

عگدت حاجبي و اني أخذ التلفون..خليته على اذاني و گلت

- آلو

- آلو بنتي ناز

اجاني صوت رجال و اني باوعت ل سيد الي گعد على القنفة و رجعت گلت

- منو وياي ؟

- اني جرجيس..عمو ناز ما عرفتيني !

- عمو جرجيس هذا انت ؟

- اي عمو..شلونچ

خليت ايدي على شفتي و اني اكتم دمعتي و اني اگول

- عمو زينه..بس بابا ماكو

- اعرف يا بنتي اعرف..الاخ عبدالله حچالي
بنتي اسمعيني زين
ابوچ بخير صدگيني و البارحه چنت عنده

- عموو صدگ

- عمري كاذب عليچ

- زين هو وين ؟ ليش ما رجع اخذني
اني دانتظره

- ناز بنتي

نبرة صوته چانت تطغيها الجديه تحممت و گلت

- ها عمو

- اسمعي بنتي..و ما اريدچ تنفعلين لو تضوجين
تعرفين ابوچ ما ينخاف عليه

- عمو شبي بابا

سمعت تنهيدته و اني ايدي بدت ترجف و اني اسمع كلامه الي وگع على مسامعي بثقل

- ابوچ انسجن..اعترف انو هو قاتل خالچ

عيوني غوشت و اني اريد انطق كلمه بس لساني انربط..نوبة الهلع رجعتلي و اني احس نفسي بدأ يثقل..التلفون اجا يوگع من ايدي لو ما تتلاحگ الحجيه و تاخذه مني و تنطيه لابنها..