| عشگ المداح | ' باللهجة العراقية '

البارت الثالث و العشرون

#عشگ المداح
#بقلم: الراوية
#البارت الثالث و العشرون

بسم الله ❤
اللهم صلِ على محمد و آل محمد❤

.

ناز..

بس ختمت حنين كلامها..فزيت من مكاني و اني التفتت الها ريگي نشف و عيوني گامت تغوش
حنين خلت ايدها على شفتها و شهگت لأن ما توقعتني گاعده..
ياسر تنهد

و اني بشفايف ترجف گلت و دموعي تصب

- عبدلله شبي ؟

- ناز خيتي هسا افهمچ

حچاها ياسر و إني انداريت الهم..و حسيت بخيوط العملية شگگت لحمي
بس ما اهتميت..الي سمعته خلاني ما احس ب أي شي سوى رغبتي ب شوفت سيد..

نزلت رجليه من الچربايه و اجيت اگوم بس صحت من وجع بطني
حنين گبل اجت ناحيتي و هي تحچي حتى ارجع
بس اني ما درت بال..
گعدت اطمن بيه و تگلي والله ما بي شي
بس إصابة اجت على راسه و اذت المركز البصري بالدماغ ..هنا اني تخبلت حسيت الدنيا اظلمت
گمت ابچي و هي تحظن بي و تسكتني

ياسر خطية اجا يمي و گال بغصة

- ناز يمعوده شجاچ..الحمدلله بهذا و لا غير شي
عجل گوليلي محمد شلون بي..صارلو ٣ ايام فاقد
و الأطباء يشكون انو دخل غيبوبه..كافي خيتي بچي الحمدلله هو زين و يحچي ويانا بس يدورلچ

من ختم كلامه عضيت على شفتي و اني اهز راسي ب اي..مسحت دموعي..
و باوعن ل حنين و گلت

- حنين عفيه اريد اشوفه

- بس شلون ما تگدرين تمشين

- ما عليه شي..حتلو كرسي متحرك
و الرب طگ گلبي على شوفته

باوعت حنين  ل ياسر و گالتله

- هما يخلونها تفوت

هز راسه ب اي و گال..توي چنت عنده و امي همين

راح ياسر يجيب كرسي و حنين عدلتلي ملابسي و گالت اني ابقى عند البنيه..گعدت اسالها على محمد و عمار..عمار رضوض و كسور بس تعبان كلش و محمد فاقد
رجعت سالتها على تقيه و فاطمه..تگول صارن جثث يتحركن و خصوصاً تقيه الدمعه ما بطلت من عينها

اجا ياسر و هو يدفع بالكرسي..و بمساعدة حنين گعدت و خلتلي شرشف خفيف على رجليه

طلعني ياسر و بقت حنين..
بالطريق گعد ياسر يوصيني انو ما انفعل لو ابچي گدام سيد..لأن حالته تعبانه..و لأزم نتصرف وياه طبيعي حتى ما يحس بالنقص
لأن نصف العلاج نفسي

هزيت راسي ب اي..و إني احاول اخذ كلامه بعين الاعتبار..

من وصلنا يم غرفته فتح الباب..و دفعني على خفيف
چانت الحجيه موجوده بس شافتني حطت شيلتها على شفتها و بچت
و اني رفعت اصبعي على شفتي اترجاها انو ما تبچي..

باوعت چان سيد گاعد..ماد رجليه و راسه ملفوف بشاش..ملامح وجهه مجرحه
و ايده هماتين ملفوفه من فوگ بزنده..و اخر شي عيونه ملفوف هماتين

چان ساكت..و الغرفة داخله بصمت مطبق..بس فجاة گام يتلتفت و هو يگول بصوت مبحوح

- يمه جتي ناز

حچه هيچ و اني اجهشت بالبچي..خليت أيدي على شفتي و ياسر گال

- اي سيد..جبتلك ناز

هو ابتسم بحزن..قدم ياسر الكرسي للسرير و اني گلت

- اگدر اوگف ياسر..خلي هنا

هز رأسه ب أي..و هو استأذن و الحجيه طلعت وراه و هي تمسح دموعها..
بس قبلها گالت راح اروح اشوف محمد و عمار..الي چانن يمهن فاطمه و تقيه

بصعوبة گدرت اگوم على حيلي و اني اگعد بصفة..لزمت ايده و گال

- ناز..بعد ما اشوف

حچاها و رفع ايده و اني خليتها على خدي و هو رجع گال

- كافي بچي يا عيني انتي

ما گدرت اتحمل أكثر و اني اتقرب منه و احظنه على كيفي..هو جر نفس و گال

- بنتي شلونها ؟

- زينه..خليت حنين عدها

- تشبهچ

هزيت راسي ب لا و گلت بغصة

- عيونها نفس عيونك..

ابتسم هو و رجع گال

- تدرين بلحظتها من انگلبت السيارة..جيتي انتي و بنتي على بالي
گلت ربي طلعني منها سلامات لخاطر عيونهن..و ربچ اخذ نظري بس فدوة ما طول انتن بخير

عضيت على شفتي و اني كاتمه شهگتي..تنهد و بقت ايده على خدي و گال

- راضي بحكمة رب العالمين والحمدلله..
ف يا ناز با عمري بطلي بچي ربچ كتب هالشي

- اي

حچيتها و إني اتقرب و ابوسه من جوه عينه..و گلت بضعف

- ما اريد من هالدنيا بس تكون بخير..ما اريدك تعوفني و لا لحظه

- الواحد يگدر بلا روحه..

بقيت گاعده يمه شوية..بس اباوعله و هو يجر حسرات و حچه ورا لحظات..

- ناز روحي عند البنيه..و إنتي هسا تعبانه

- اريد ابقى يمك

- اني ما بيه شي..روحي هناك
و امي و ياسر وياي

باوعتله و هو ابتسم بخفوت
ما حبيت اعانده..و گلت

- خوش عمري..هسا يجي ياسر و أرجع وياه

ما جاوبني و هو مدنگ راسه و ساكت
شوية و إجا ياسر و رجعت وياه..بس قبلها مريت على محمد و عمار..
عمار صاحي بس كل جسمه مكسر..فاطمه و الحجيه چانن عنده..
فتت للغرفة و سلمت عليه..و هو خطية گوه جاوبني صوته مبحوح و رگبته ما يگدر يحركها

استأذنت منهم..و إني گوه كاتمه دموعي
الله لا ينطي الي سوو بيهم هيچ..تلث شباب بهالعمر كل واحد وضعه اتعب من الثاني..
من طلعنا سألت ياسر على تقيه
خطية جاوبني بصوت خافت و القهر واضح بنبرته

- چانت گبل شوية يم عمار و سيد..و كالعادة راحت مگابله باب غرفة محمد

- لعد تگدر تاخذني الها ..إذا ما صارت زحمه

- تدللين يمعوده

اخذني لغرفة الانعاش مالت محمد..لگيت تقيه گاعده و هي طاويه رجليها ل صدرها
و گاعده بالگاع..ترك ياسر الكرسي و راح الها
خلاها توگف على حيلها و هي شافتني و جتي يمي
دنگت عليه و حظنتني و إني ما اتحملت و گمت ابچي و هي تحچي بغصة

- ناز على منو التفت يولي..و الله گلبي ما يتحمل والله
من هين خوتي و من هين محمد الي ما گعد لهسا

ما عرفت شنو اجاوبها..لأن الظرف الي هي بي كلش صعب
صعب علينا كلنا..احاول اصير شوية قويه لأجل سيد
اريد نتخطى هالوضع سوية..
بقيت وياها شوية و رجعت ل غرفتي..

ثالث يوم كتبتلي الدكتوره خروج..ما قبلت اطلع و اترك سيد و البقيه..
محمد لحد هسا ما گعد..الدكاتره حارت وياه..كلشي زين التحاليل و المفراس..رغم عنده كم رض و كسر برجله

سيد من عرف انو كتبتلي خروج و اني ما قبلت گام يحچي عليه انو لازم اطلع..
من خلال حديثه عرفت انو هو ما يدري بسالفة محمد
و تأكدت من سألت ياسر..گال ما گدرنا نحچيله اريد حالته تتحسن و ننطيه خبر..گالو اله انو عنده كسر بالظهر..

و طول مدة بقائنا بالمستشفى الناس ما فرغت..يروح واحد يجي آخر..يگولون بيت ممدوح و أولاده ما قصروا وي احد..الي يطلبهم يگولون گبل ابشر

چنت اروح اگعد يمه و اني الدمعة بعيني..اباوعله شلون يتلتفت على اقل حركة..الشاش شالوه من فوگ عيونه
و سولو فحوصات..و تحاليل
مرات اباوعله و احسه نفس الإنسان الضايع..

تحسنت حالته..ايده ظلت مجبره و راسه بعد اكو خيوط بي..بس كتبلوه خروج
و كتبوله طن علاجات و مقويات..صح فرحت انو راح يطلع

بس بقيت شايل هم محمد و عمار..
اخذنا سيد الي خلاه ياسر على كرسي المتحرك و اخذه ل عمار..قبل لا يطلع من المستشفى..و عمار كتبوله للاسبوع الجاي

و من اجا يروح ل محمد..تحجج ياسر انو هو قبل شوية انطوه منوم..لان ظهره كلش يوجعه..
رجعنا وي ابن عمهم..اخو فاطمه للبيت
و هناك لگينا اخت فاطمه و امها و خطيه ما قصرن

الخطار گامت تجي حتى تسلم عليه..ف الحجيه رجعت للبيت
بالليل نام سيد جوه بالهول..و اني بقيت يمه
هو أخذ علاجه و نام گبل..و إني بقيت اباوعله
گامت تبچي البنيه و رضعتها..انفتح الباب و دخلت حنين
الي گالت

- اعتذر..بس سمعت البنيه تبچي

- لا عمري ما بيها

ابتسمت و مست عليه و طلعت
و اني بداخلي اگول شهل التغيير الي صار ب حنين !

ثاني يوم دزت الحجيه على تقيه...و اجت حتى تهتم بأطفال عمار و البيت وي حنين
خطية اختها ل فاطمه دارت بالها للجهال طول مدة بقائنا بالمستشفى..

اجت تقيه و الوجه شاحب و ساكته و ما تحچي وي احد..
الناس منا تجي تسلم عليه و على سيد..

بالليل صعدنا فوگ صحيح گوه صعدت و بطني وجعتني..بس علمود سيد گال فوگ ارتاح
صعدته تقيه و اخوه فاطمه الي راح بوقت متأخر اخاف نحتاجه بشي..

تمدد على الچربايه و اني خليت البنوته بالسرير مالتها.. بس ما نايمه انطيتها مميه و تركتها
اجيت و بصعوبة گعدت على الچربايه بصفه هو چان يباوع للفراغ
اما اني..ف دايسه على نفسي و وجعي..حتى بنتي هملتها و خطيه حنين هي الي مهتمه بيها..چنت بس منطيه كل اهتمامي ل سيد...

- سيد

- هممم

جاوبني بهمهه و اني لزمت ايده و گلت

- محتاج شي ؟

- تؤ بس راسي يوجعني

- تريد تنام ؟

- ما ادري..احس بخنگه

كتمت دمعتي و اني اتقرب اله و اشبكه و بنبرة خافته گلت

- تريد اجيبلك البنوته

ضحك و هو يگول

- ليش تسمينها البنوته !

- لأن ما الها اسم لحد هسا

سكت لحظات و گال

- ليش ما سميتوها !

- انتظرتك انت تسميها

- و شلون طلعتوها بيان ولاده

سكتت و عگدت حاجبي..اي و الرب شلون نسيت !
ياسر هو الي تكفل بهالشي..تحمحمت و گلت

- ما ادري

ضحك و اني رفعت راسي اله..ابتسمت على ضحكته بس سرعان ما اختفت
بقيت اباوعله و حسرة بگد الجبال بصدري
معقوله راح يبقى طول العمر هيچ‌ ! يعني بعد ما يرجع يشوف

بعد ما يباوعلي بالنظرة الي احبها..هزيت راسي ابعد هاي الفكرة عن راسي و اني ارجع احظنه بشدة..و هو گال

- جيبي ريان

- ريان ؟

تسألت باستغراب و هو گال

- ليش ما تريدين هالاسم ! عادي نغيرو

- لا لا...اسم كلش حلو

ابتسم و اني گمت على كيفي
رحت اخذتها و اني اشيلها على كيفي..
رحت للتخت و گلت ل سيد

- عدل ايدك حتى اخليها بحظنك

هو عدل ايده و اني خليتها بين ايديه..خليته يلزمها عظل
ايد جوه رقبتها و ايد جوه رجليها رفعها ل حد شفته و باسها من خده..و هو يغمض عيونه
لحظات بقى ساكت قبل لا يگول

- تشبه ريحتچ‌.. ان شاء الله تطلع مثلچ

ابتسمت و گلت

- اريدها تطلع مثلك..

- يعني راح نتكاون !!

- لا

جاوبته.. و هو رفع ايده و گعد يمسح بابهامه على خدها و گال بضحكه

- خدها ناعم..مثل امها

سكتت لحظات و رجع گال بصوت ناصي

- ناز اوصيفها ليه

گوه كتمت دمعتي و غصيتي الي وگفت بحنجرتي
لزمت ايده و گلت و اني اباوعلها و عيوني تغورق

- عيونها نفس لون عيونك..صافيات كُلش
و بيضه و شعرها اسود ناعم..صغيرونه و عدها وحمه بمعصم ايدها من جوه على دائرة صغيره و ملمسها رقيق

هو بقى ساكت و رجع قربها ل وجهه و استنشق عطرها...
و قبل لا احچي كلمة عد اذنها گام يأذن..
بقيت اباوعله و هو مرة يغمض عينه و مرة يفتحها..صوته بي بحه و يخلي الواحد ينجذب اله

كمل و گام يمسح على شعرها و هو يقرا ايات
من كمل مدها عليه و اني اخذتها من عنده و گال

- يمكن نعست نوميها

- اي

حچيتها و اخذتها لسريرها..و بقيت اهز بيها على خفيف
و هي صدگ چانت نعسانه..لحظات قليله و نامت

رجعت ل عبدلله و گعدت يمه..باوعت لايده الملفوفه
و گلت

- ايدك توجعك

- مو حيل..هي مو كسر يمكن رض قوي

- اي گال ياسر رض..

تنهد و گال

- خطية عمار..گالت امي جسمو كلو متفلش

- اي..بس هسا بدا يتحسن

- و محمد ! ما خلوني اروحلو

- مو نايم

حچيتها و هو تنهد..و رجع گال

- يعني ما گدروا يگعدونو..اريد اروحلو و اشوف حالو

ما جاوبته..لأن لو افك حلگي راح احچي گبل

- ناز..عدليلي مخدتي اريد انام

- من عيوني

حچيتها و گمت على كيفي..لزمت بطني و اني اعدله بالمخاد..تمدد و غطيته
و هو گال

- تعاي نامي بحظني

رحت طفيت الضو و جيت مددت بصفه..حاولت شوية اخلي مسافة بينا حتى ما يتعور
بس هو گال

- تعاي يمي

تقربت و لف ايده على بطني على خفيف..و اني غمضت عيوني و نمت..

مرت ايام..و الايام صارت اسبوعين بالتمام
عمار طلع من المستشفى..بس يمشي على عكازه رباعيه و الي هي حجله..ايده بدت تشفى و الجروح بوجه بدت تختفي

سيد هماتين..الجروح تقريباً ما بقت..بس بدا يضوج
و تحول من سيد الهادئ الطباع..لشخص عصبي و من اقل كلمة يتنرفز..و خصوصاً بعد ما عرف بحالة محمد

محمد موضوع آخر..خلال الأسبوعين مرة وحده گعد و بوقت متأخر من الليل..تقريباً بال٣ الفجر ماكو دقيقتين و راجع نايم..

هالخبر چان مفرح..لأن دليل انو ما هو ما داخل غيبوبة..بس بعده الأمر غريب..

چان يوم جمعة..نزلت جوه حتى اسوي مميه ل ريان..
الجو هادئ و كلهم مجتمعين بالهول..فتت للمطبخ و لگيت تقيه..الي بدينا ما نعرفها
الوجه و العيون و التعب الي مستحل وجهها..
و الاهم الدمعة الي ما فارقت عينها..

باوعتلها و هي گاعده على الميز و تنظف بالخضروات بذهن شارد..
اجيت احچي وياها..بس تراجعت لان إذا حچيت وياها أكيد راح تجاوبني برود..مثل ما تحچي وي الكل

سويت المميه و صعدت فوگ..خليت ريان بحظني و گعدت اناغيها..
توي مخليه المميه بحلگها سمعت صوت هلهلوله من جوه

گلبي دگ بسرعة..و گبل شلت بنتي و نزلت
طلعت حنين من الهول و هي تگول بفرحه و عيونها مدمعه

- نازز محمد صحى..محمد گعد

نزلت دموعي من الفرح..و اني بداخلي اشكر الرب انو رجعه سالم
طلع ياسر و ولد عمه و الحجيه و اهم شي تقيه الي انگلب وجهها و ردت بي الروح

بقوا عمار و سيد..لأن عمار ما يگدر يمشي و سيد علمود وضعه

و رجعت الفرحع النسبيه للبيت..من شفت محمد و هو يمشي على عكازه
بس ما رجع بنفس اليوم..لا ثالث يوم الظهر
و رجعوا  الناس التمت و هي  تتحمد و تسلم على محمد..

.

تقية..

بالليل ورا رجعت محمد للبيت و صحوتو من الغيبوبة..
دخل لغرفتو و اني وياه..تمدد على التخت و اني ظليت ادحگلو..هو رفع راسو و گال بصوت خافت

- تقيه تعاي

جيت گعدت يمو..و هو رفع ايدو و لمس خدي و گال

- شصاير بيچ يولي

- يعني قليل الي مريت بي..من هين انت و من هين اخواني

تنهد و گال بحسرة

- من صحيت و شفت حالهم..عمار و رجليه المكسرة
و سيد الي فقد بصرو..حطيت الوم عليه
اني الي اخذتهم وياي تا اسافر

- محمد هاي قسمة و نصيب..ربك كاتب هالشي
انت ما عليك

- احاول اقتنع بهالشي

حچاها و تنهد و عيونو بدت  ادحگ للفراغ..قبل لا يگول

- يا ريت ظال بغيبوية و لا شايف حالهم

- محمد شهل الحچي !! ترا والله ازعل

حچيتها و عيوني غورقت..الله كاتب انو بهذا اليوم يروحون و يسوون الحادث ليش ما يقتنع

دحگ عليه و ابتسم و هو يرجع يحط ايدو عل  خدي و گال

- خوش عيوني انتي خوش..

حچاها و قرب راسي منو و باسني من شعري و گال

- اريدچ تنامين يمي

- محمد

- شنوو ترا انتي مرتي

حچاها باعتراض..و اني حفزت من مكاني..لو شوف شيصير بي لازم يذب حچايه

تأكدت انو تمدد و ارتاح بنومتو..مسيت عليه و طفيت الضو و طلعت..

صعدت ل غرفتي..و جيت افوتلها بس سمعت صوت سيد الي يصيح..غمضت عيوني و زفرت
هالايام صاير من أدنى شي يعصب

و محمد يگدر يلومو..الي هو بي صعب و حيل
فجاة بين يوم و ليله..يلگه نفسو فاقد للبصر
حسرة شكبرها بگلبي و اني ادحگلو و شلون يتخبط و ما يگدر يخطي خطوتين الا احد وياه

ترددت اروح..اخاف ينحرج مني لو ناز
بس گلت هو اخوية..و الاخ لازم يوگف وي اخوه

دگيت الباب..و فتت لگيتو گاعد على التخت و عيونو حمر و ملامحو منقبضه
و ناز گاعده على جهة و هي شايله ريان و حاظنتها و تبچي بحسرة

- سيد

صحتلو بصوت ناصي...و اني اتقدم ناحيتو
دحگت ل ناز و هزيت راسي بتساؤل و هي مسحت دمعتها و طلعت برا..

اني تنهدت و رحت گعدت بصفو..ظليت ساكته لحظات گبل لا اكمش ايدو و اني اگول بخفوت

- حبيبي اخوية انت شبيك

- ما بيه

- شنو ما بيك ! صياحك وصل لغرفتي
شصار بينك و بين ناز حتى تطلع هيچ زعلانه

تنهد و عيونو غورقت و هو يحچي

- تقيه..تعبت اقسم بالله تعبت
احس نفسي ضايع..عايش بفراغ فضيع
اغمض عيوني و افتحهن اريد اشوف شي غير الفراغ وماكو..ليش محد يحس بيه ليش

ختم كلامو و دمعتو وگعت..و هاي اول مرة اشوف دمعتو على خدو..گبل حظنتو و هو شبك ايديه ورا ظهري و اني گلت و دمعتي تگع

- شنو محد يحس بيك سيد..والله حاسين بوجعك بس يا عمري شبيدنا ما تگلي..والله لو تريد عيوني اشلعهن و انطيهن الك
بس الله يخليك لا تقهر نفسك هيج..سيد اني طول عمري اخذ القوة منك..تعلمت منك انو دائماً اكون قوية

- كل قوي يجي يوم و يضعف و يلين..و يمكن جه وقتي
تقيه..ما اريد اظلم ناز وياي والله..بعدها بنية بعز شبابها ما اريد اشبعها قهر و ظيم و هي ما شافت شي..ما اريد يجي اليوم الي تمل مني بي

- گلي هي اشتكت

- لا..

- انت اكثر واحد بينا تعرف ناز شگد تحبك..ما طلعت السبعة من ولادتها و هي تساعدك و اطعمك و تبدلك..ليش تشك بيها انو يجي يوم و تتركك..سيد ناز تحبك بكل جوراحها لا تظن بيها هيچ

- تقيه

- عيونها ل تقيه

- صيحيلها..اريد أراضيها..

ابتسمت و وخرت عنو و گلت و اني احط ايدي على لحيتو

- يبو گلباً طيب ربي ما يحرمنا من هالوجه الحلو

ابتسم و اني بستو من راسو و گلت

- هسا اصيحها..بس دير بالك اضوجها..ترا هاي الغاليه

- ما اضوجها بعد والله..بس هي همين خلي تفهمني
اني مو سيد القديم..ما اريد احسها تشفق عليه من تهتم بيه هلگد

- هي ما تشفق عليك..هي تحبك و مهتمه بيك بزيادة..يعني امي من هين توصيها لا تعوفين رجلچ لو لحظه..و انت من هين تگوللها ما اريد اهتمام..البنيه هسا شتسوي !!

- ما تسوي شي..هسا روحي صيحيلها

- من عيوني

حچيتها..و طلعت من الغرفة

لگيت باب غرفتي مفتوح..طبيت و لگيت ناز گاعده على التخت و هي حاطه ريان بصفها
گعدت من الجهة الثانيه و گلت

- سيد يصيحلچ

- سيد ما عنده غير العصبيه و الصياح و بعدين تعالي

- ناز..على كيفچ يا عمري

اندارت عليه و دموعها توگع على خدها

- تقيه فهميني شسوي !!
يعني اهتمامي بي و انو ما ينقصه شي اسمه شفقه! من شوكت صارن اذا تهتم بزوجها انو تشفق عليه

- ناز انتي تعرفين وضعو..ف اعذريه

- و الرب عاذرته..و ما شايل گلبي عليه لو بگد الذرة..بس من يصيح بيه و يرفض اهتمامي بي و يگولي بطلي شفقة شسوي اكيد اتخبل لا محال

- هو حچالي..ناز اعرف الموضوع صعب والله
بس هاي طبيعة عبدلله..يحس اهتمامچ بي لأن بسبب وضعو..انتي حاولي تتصرفين وياه طبيعي
يعني لا اربعة و عشرين ساعة مضيقة الخناق عليه

- و إذا ما اهتميت بي راح يگولون زوجته مهمله

- طز بيهم..الناس ما عدها وضيفة  غير گال فلان و حچه علان..انتي اگعدي وياه..و احچي بهدوء و افهمي گوليه شتريد مني اني حاظره
ناز لا تصيرين انتي و الوكت عليه

عضت شفتها و دموعها توگع..سكتت لحظات و هي تگول

- يا ريت بيه و لا بي..لو معمية عيوني و لا عيونه
ولچ تقيه..و ربي احس نار بگلبي من اباوعله

- كلنا هيچ..صدگيني گلوبنا تعبانه و ما بيها طاقة تحمل..بس ادعي انو ربچ يلطف بحالو
و لا تنسين الطب تطور

هزت راسها ب اي و مسحت دموعها..اخذت ريان و هي تگول اروح اشوفه
طلعت و سدت الباب وراها..مددت على التخت و ظليت ادحگ للسگف
گمت اتگلب بمكاني..فجاة تذكرت محمد
ترددت احدر جوه..بس قررت انو اروح اشوفو

حدرت جوه و رحت ل غرفتو بس قبلها دحگت هيچ و هيچ اخاف اكو احد..فتحت الباب على كيفي
وبضو موبايلي بدون ما اشغل الكشاف بس الواجهة..ضويت طريقي..
صعدت من الجهة الثانيه للتخت..چان گلبي يدگ الف دگه بالثانيه..والله لو اشوفني الحجيه الا من باچر تنصب عرسنا..و مو بعيده تسويني حامل..
صرت قريبه منو كتفي طاخ كتفو..هو ما گعد يمكن من ورا المسكن

ظليت ادحگلو و اني اتمعن بوجهو..حواجبو الثخينه و شعرو النازل على جوانب وجهو..و رموشو الطويله

يمكن ملامحو عند البعض عاديه..بس اني احسهن لا..كل تقسيم من وجهو احسو مو عادي ابداً

حطيت راسي على كتفو و اني اطوق خصرو بيدي..هو حس بيه..فتح عيونو على خفيف و دحگلي و گال بخفوت

- يولي شجابچ

- تريدني ارجع

ضحك ببحه و گال

- لا يولي ظلي

رفعت راسي اله و گلت

- محمد من چنت بغيبوبه شنو چنت تشوف

سكت لحظات قبل لا تنرسم ابتسامه مكر على وجهو و هو يگول

- حلمت انو اني محبلچ بجهالين..و عدنا سبع اولاد

فتحت عيوني على وسعهن و حفزت من مكاني و اني اگول

- محمد يا ادب س...

قطعت كلامي و إني اتذكر انو هو صار زوجي..هو رفع تك حاجب و ضحك

و اني تحمحت و گلت

- شهل الحچي اكيد تشاقة

سحبني من ايدي على كيفو و خلاني ارجع لوضعيتي و هو يگول

- لا والله..شگد چنت احلم..و فوگاها اسمع حچيكم
بس شلون الطابوگه على لساني ما اگدر احچي و اگوللكم اني اسمعكم هياني گاعد

دمعت عيني و اني اگول

- يعني چنت تسمع كلامي

- هو الوحيد الظل بالي

ابتسمت و اني امسح دمعتي و حچيت بشقة

- يعني ماكو داعي ارجع احچيه و اگولك هيچ حچيت

- لا ماكو داعي..بس صدگ چان طالع من گلبچ

هزيت راسي ب اي..و اني اتذكر شلون اجي يمو و اگعد ابچي و اترجاه انو يگعد..لأن مشتاقتلو..

- يلا تقتق نامي..لان والله نعسان

- فوگ الإسبوعين نايم..ما شبعت

- إذا تريدني اظل گاعد..ف لأزم شوية نسوي اشياء بيها فاحشة و منكره..ف بكيفچ انام لو لا...

- لا لا نام حبيبي..اصلاً النوم زين للصحة

هو ضحك و اني خفت من  بصراحه..من ختم ضحكتو حط ايدو على خدي و گال

- حماره انتي والله..ما اتقربلچ الا بليلتنا

وجهي صار طماطه حمره..جيت اگوم بس هو ما هد ايدي و هو يرجع يحلف انو ما يسوي شي
و صدگ امنت و نمت هذيچ الليله..و راسي ساندتو على كتفو

الصبح گعدت گبل لا يگعدون اهلي و صعدت فوگ..ادري هو رجلي بس ما اريد يبين انو هلگد ميته على حظنو و استحي من نظرتهم الي من يشوفوني طالعة من غرفتو..

.

ناز..چنت گاعده يم سيد و بحظنو ريان الي يلاعب بيها
دگ تلفوني..و گمت عليه
لگيت امي تتصل

اول ما فتحت الخط گالتلي

- ماما ناز..منو يمچ ؟

- ليش

- اكو موضوع لازم احچي وياچ بي..لا تظلين يم أحد

باوعت ل سيد..و گلت

- حبيبي لحظه و اجي..خلي ريان يمك

- ميخالف بس لا اطولين

طلعت و رحت للممر..چانت الساعة تقريباً بال١١ و ربع

- ها ماما شكو

- ناز..ناز خوالچ السبب بالحادث الي صار ل رجلچ و اخوانه

- شنوو ماما شدتحچين

- ولچ ايي..تذكرين من خابرتيني و گلت محمد راح يسافر !! و گلتي عمار و سيد وياه
ولچ خوالچ الحقراء طلعوا مراقبين رقمي و اي اتصل يصلني يسمعونه..و هما سوو هيچ
و من سألت خالچ ڤيد ما نكر و گال اي احنا راقبنا رقمچ و راقبناهم

من هول الي سمعته..حسيت رجليه بعد ما اگدر اوگف عليهن..تهاويت و گعدت بالگاع و اني اسند ظهري على الحايط
خليت ايدي على راسي و اني اگول

- ماما مو لهاي الدرجه

- لاا لهاي الدرجه و أكثر..ولچ مو تهموچ بشرفچ
ما تريديهم يحاولون يقتلون زوجچ‌...اني من الأول عرفت تنازلهم عن القضيه مو لان حسو بالذنب لو صدگوچ..چانو يريدون يضربونكم ضربه توجع

- بس ماما عبدالله شدخله !! شنو سو الهم حتى يقتلونه

- ناس ما عدهم ذرة رحمه..اني من باچر راح اطلع من بيتهم..حتلو اگعد بدور المسنين لو الكنيسه و لا ابقى بهذا البيت..ولچ متت بمكاني من عرفت..

امي تحچي و إني دموعي توگع على خدي..من اگول اني وجه شر على هذا البيت كلها تگلي لا..
من اول ما فتت عتبة هذا البيت و كل المصائب توگع على راسهم..و هاي اخر شي بسببي فقد سيد بصره
و عمار و محمد اجوا يموتون..چان دمهم صار برقبتي

- ناز اني خابرتچ انطيچ علم..بنتي اسمعي سدي الموضوع و لا تجيبين طاري
و الرب اذا عرفوا عيالچ الا يشمروچ عليه و بوقتها كلها تنبذچ

- لا لا ماما عبدلله ما يعوفني..حتلو عرف انو خوالي ضربوهم..بس ماما عفيه انتي متأكده من كلامچ

- نازز اني شوكت مكذبة عليچ !!
اني هسا لازم اسد الخط..و باچر راح اطلع منا و اگدر احچي وياچ  براحتي

ودعتتي و سدت الخط و إني ما نطقت كلمة
دموعي وگعت على خدي..و اني بداخلي اشتم و ادعي على نفسي
شورطني و حچيت وي ماما..ليش گلتلها راح يروحون..لو ما حاچيه چان كلشس بخير

فزيت على طولي من لگيت تقيه واگفه بعيد عني..يم باب غرفة الحجيه
بس ما انتبهت الها..چانت تباوعلي بنظرة ما افتهمتها

تقربت عليه و اني مسحت دموعي و ردت افهمها الوضع..لأن هي أكثر وحده تفهمني

- راح تظمين هالسر موو ! ما راح تحچين انو خوالچ جوي يكتلون اخواني

- تقيه لا..

- شنوو لا..هاا يولي بأذني سمعت كلشي
خوالچ من الله لا ينطيهم هما السبب..ولچ ليش مو لفيناچ و اعتبرناچ وحده منا ليش  تغدرين بينا

- تقيه شهل الحچي..ولچ انتوا اهلي شلون اغدر بيكم
بس يشهد ربي ما چنت ادري راح يصير هيچ

تقيه الي من وصولي لهذا البيت..عمرها ما رفعت صوتها عليه
دائماً چانت المتفهمه الي تفهمني اختي الي اهدتني اياها الدنيا..كل اسرارها عندي و أسراري همين
بس فجاة صارت تشوفني وحده غداره و اريد اقتل اخوانها

على صوتها طلعت الحجيه و صاح سيد..
ترجيتها تسد الموضوع..بس لا زاد الوضع
فتحت باب الغرفة مالتنا..و سردت كلشي على مسامع عبدلله

و اني البزون بلع لساني..حاولت افهمها بس هي چانت نار بكبرها..من جهة حقها
الي اجت تخسرهم هما اخوتها و زوجها..بس اني همين جيت اخسر عبدلله ابو بنتي..و اخواني
مو عمار گال اني اخوچ ! ليش ما تفهم انو من سابع المستحيلات اغدر بيهم..

على صياحنا و صمت سيد المطبق
صعد ياسر و هو يريد يفهم الموضوع.. الحجيه گالت حدرو جوه خلي نفهم..

اخذ ياسر بيد سيد الساكت و نزلنا للطابق الاول..و إني اترجى ب تقيه و الحجيه انو يفهمني

نزلنا جوه و لگيت محمد و عمار ينتظرونا جوه يريدون يفهمون شكو..بس گال عمار شصاير

انتفضت تقيه و هي گعدت تحچي الي سمعته..
اني غمضت عيوني و بچيت من وجهلي عمار السؤال

- صحيح ناز ! خوالچ الهم يد بالموضوع

هزيت راسي ب اي و گلت و اني اباوعله

- بس والله ما عليه..هما مراقبين تلفون امي

- احچي كلشي يا ناز خلينا نفهم

حچت الحجيه كلامها..و اني گعدت احچي الي صار..
و كل شوية اباوع ل عبدلله الي ساكت
ختمت كلامي و إني اگول بشفايف ترجف

- و روح بابا ما چنت ادري هيچ راح يصير..ما چنت ادري كلمة مني تسوي

- طبعاً ما تعرفين..لأن الي تاذوا مو من اهل بيتچ
ما احترگ گلبچ عليهم..شنو هامچ انتي إذا ماتوا لو عاشوا

- تقيه صمي حلگچ

صاح بيها عبدلله..و اني گلت و دموعي توگع على خدي
و قهر بگلبي من تقيه و كلامها الجارح

- شنو ما يهمني..ترا الي تاذوا اخوتي..و الي فقد بصره هذا رجلي ابو بنتي شلون ما يهمني
تقيه اني توقعتچ راح توگفين وياي و تتفهميني ليش هيچ تتهميني

سكتت و هي تتحاشى تباوع عليه..و اني بقيت واگفة انتظر كلمة منهم تبريني

باوعت ل سيد الي گال بجديه

- هالموضوع اريد من الله ينفتح..تا اگلب البيت فوگ رأسكم..محد تاذى منكم بس اني و الولد
و اني عن نفسي ما داير بال ف محد يفتح حلگو و يحط الصوچ ب ناز..قدر الله و ما شاء فعل..

- مثل ما گال سيد..سدوا هالموضوع
الحمدلله فترة و عدت..و الصار ناز ما عليها بي لا من بعيد و لا من گريب

حچاها عمار..و اني مسحت دموعي و باوعت ل تقيه
صعبة كلش الي داحس بي..فوگ تأنيب الضمير زعل تقيه مني..

الحجيه گالت كل واحد يصعد ل غرفته..و سدو هالموضوع مثل گالوا

لزمت ايد سيد..و صعدت فوگ من وصلنا للتخت سحبها مني و تمدد..باوعتله و هو ما نطق كلمة
شلت ريان الي نامت و خليتها بمكانها..تمددت بمكاني و سيد انطاني ظهره

عضيت على شفتي و اني اريد اكتم دموعي بس وگعت و حرگت خدي..ابداً ما تخيلت هاي اللحظه انو يجي يوم و سيد ينطيني ظهره بزعل

گلت هو ما رايدني ليش باقيه على التخت..گمت من مكاني و گلت امد مندر بالگاع و انام عليه..
بس من تحركت سمعت صوت سيد و هو يگول

- تعاي هين..و الله مو زعلان منچ

حچاها و أني عبالك وحده عمرها ما حاچيه و هسا گدرت تنطق حرف

- لعد ليش انطيتني ظهرك ! ليش ما حچيت كلمة
سيد و الرب ما چنت اعرف راح توصل الأمور ل هذا الحد

هو مدد على ظهره و گال

- تعاي يمي

دست على نفسي و رجعت على التخت.. و هو گام يتلمس حتى يوصلني اني تقربت اله..و هو من لزم معصمي سحبني عليه

مددت بصفة و هو جر حسرة و گال

- عصبت بس والله ما زعلت..و ردت شوية اهدي نفسي و احچي وياچ..ناز انتي ما عليچ بالموضوع
انتي مرتي و بنيتي شلون اشك و اعصب عليچ على شي رب العالمين من سابع سماه كاتبو..

- لعد ليش تقيه تحچي هيچ

- تقيه عصبت لأن احنا اخوتها و خافت علينا..يعني على فطرتها حچت و زعلت منچ..اي شخص من يتأذى احد غالي عليه هيچ يسوي

- بس و الرب اني ما الي دخل

- كافي تحلفين..و الله مصدگچ
و هسا سدي هالموضوع..شي خلاص انتهى

و مثل ما گال سديت الموضوع
هو قربني اله و حظني..و هو يطمن بيه
اني هدأت و صرت احسن..بس من اتذكر كلام تقيه ارجع اشبع قهر..

تقريباً ورا اسبوع..اخذ ياسر و اخو فاطمه و محمد..الي اثر انو هماتين يروح سيد لدكتور عيون شاطر بكركوك..
اني ما گدرت اروح..لأن ريان تبقى وحدها

اني و تقيه رجعنا نحچي عادي..بس احسها متفشله مني و اني ما حبيت أحرجها او حتى اسألها..رجعت اتصرف وياها بكل عفوية مثل قبل..

المغرب من رجعوا اني تلگيتهم بالطرمة..چنت بس اريد اعرف شنو الي گالوا الطبيب
فتنا جوه و خطيه اخو فاطمه ما قبل يبقى گبل راح..چنا الكل ملتمين بالصالة..اني گعدت يمه سيد لزمت ايده و گلت

- ها شنو گالك الدكتور

جر حسرة و باوعت ل ياسر الي گال

- يگول علاجو مو يمي

- عجل هو موو دكتور شنو علاجو مو يمو

- يمه خلي نكمل حچينا..گال اني ما بيدي شي اسوي
اكو أمل ٣٠ بالمية اذا سوه عمليه يرجع يشوف ان شاء الله

باوعت ل ياسر و رجعت اگول

- ٣٠ بالمية نسبة كلش قليلة

- لذلك اني ترددت..بس سيد گال ماكو مشكله نسويها و عليك يا الله

باوعت ل عبدلله الي سألوا عمار

- سيد..ترا نسبة على گولت ناز قليلة

تنهد عبدلله  و گال

- هسا انتوا ليش گبل تشأمتوا و گعدتوا تحبطون معنوياتي..اني وافقت و عليك يا الله
لا ادحگلون لل٣٠ بالمية..دحگوا ل قدرة رب العالمين و حكمتوا..اني ما معلگ امالي بال٣٠ بالمية..اني معلگ كل امالي برب العالمين

ورا كلمته الكل سكت..و بقوا واحد يباوع على الآخر..قبل لا تقطع الصمت تقيه و هي تگول

- زين العملية وين يسووها ! بكركوك  ؟

- لا..بإيران عند دكتور مختص و عندو تواصل وي هالدكتور

گبل باوعت ل سيد الي ابتسم من گلت

- شبعدها إيران..ليش ما تسويها هنا

ايدي چانت لازمه ايده..هو ضغط عليها و گال بضحكه

- هسا شعليچ بالبعد..هيانها بينا حدود
و بعدين انتي مقرر اخذچ وياي..تا نسوي شهر العسل هناك بجبال زاغروس

.

السلام عليكم شلونكم حبايب قلبي ان شاء الله الكل بخير

اتمنى البارت عجبكم

و شنو ارائكم و توقعاتكم

قبل كلشي احب انوه على شي..النشر يومي
و يكون بال١٢ بالليل لو وراها..و مستحيل اتركم بدون بارت ☻❤

( لأن هالسؤال گمت اشوفو وين ما اروح 😂😂)

ف إذا تاخرت ف استميحكم عذراً..

المهم شنو ارائكم بأحداث البارت
اعرف سألتكم فوگ بس بصراحه ما عندي سؤال 😂😂😂

هذا البارت بديت اكتب بي بال٩ و نص
و علما كملت و ارجع ادقق بي ( و اكيد راح تلكون اخطاء إملائية بس لخاطر عيون السيد غلسوا عليهن 😂😘 )

و بس والله وصلنا لنهاية البارت
تصبحون على أحلام سعيده و نلتقي على خير احبتي 📎❤😘